2024 2023 2022 Flere år...
29-04-2016
Nuummi ulloq 29. april Hans Egedep Illuani persuarsiornartumik nalliuttorsiutiginninnermi Inatsisartut Siulittaasuata Lars-Emil Johansenip Inatsisartunut siulittaasuusimasoq Ruth Heilmann kuultiusumik nersornaaserpaa
Inatsisartut Siulittaasoqarfiata Inatsisartunut siulittaasuusimasoq Ruth Heilmann ukiorpassuarni naalakkersuinermik suliaqarsimaneranut nersorinnissutitut kuultiusumik Nersornaaserpaa.
Inatsisartut Siulittaasuata Lars-Emil Johansenip Ruth Heilmannimut oqaaseqarnermi ilaatigut ima oqarpoq:
"Inatsisartut Siulittaasoqarfiata kuultiusumik Nersornaaserpaatsit ukiorpassuarni naalakkersuinermik tunniussimallutit suliaqarsimanerit pissutigalugu. Siullermik taamanikkut Maniitsup kommuniani kommunalbestyrelsimut 1989-imi qinigaaqqaarputit, taamatullu aamma kommunimi piffissami 1997-imiit 2001-imut borgmesteriullutit. Inatsisartunut 1995-imi qinigaavutit, ilaatigullu isumaginninnermik iluarsaaqqinnissamut ataatsimiititaliarsuaq 1997-ip tungaanut siulittaasuuffigalugu. 2013-ip tungaanut Inatsisartuniipput, piffissami 2008-miit 2009-mut Inatsisartut Siulittaasuattut inissisimallutit. Taamatuttaaq Naalakkersuisunut ilaasortaasimavutit, 2002-mi ilinniartitaanermut naalakkersuisutut tamatumalu kingorna aamma 2003-miit peqqissutsimut ilaqutariinnermullu naalakkersuisutut. Naalakkersuinermik suliaqarsimanippit annertuumik suliaqarsimanerit tunniusimasimanerillu takutippaat. (.)
Oqaatigeriikkattut assut nuannaarutigeqaara taamatut kuultiusumik Nersornaasersinnaagakkit, tassani nalunnginnakku naalakkersuinikkut assut suli piumassuseqartutit, taamaattumillu ullumikkut Inatsisartunut ilaasortaanngikkaluarlutit suli atorfissaqartinneqartartutit, inuiaqatigiit pillugit annertuumik ilisimasaqarnerit misilittagaqarnerillu pissutigalugit."
Siulittaasoqarfik sinnerlugu
Lars-Emil Johansen
Inatsisartut Siulitaasuat
Paasisaqarnerorusunnermi Inatsisartut Siulittaasuat Lars-Emil Johansen attavigineqarsinnaavoq, oqarasuaat angallattagaq una sianerfigalugu +299 55 19 15.
