2024 2023 2022 Flere år...
06-09-2016
Ataatsimut oqaaseqaat
"Nunanut Allanut Sillimaniarnermullu Ataatsimiititaliaq Inuussutissarsiornermut, Suliffeqarnermut, Niuernermut Nunanullu allanut Naalakkersuisoq peqatigalugu Washington D.C.-mut Colorado Springsimullu USA-miittumut amerikamiut Kalaallit Nunaanni sakkutooqarnerannut tunngasut pillugit pitsaanerusumik paasisaqarusullutik angalaqqammerpoq. Angalaneq paasisaqarfiulluarpoq isumassarsiorfiulluarlunilu, makkuninngalu oqaaseqaateqarfigineqarluni:
Ersarippoq USA-p Kalaallit Nunaanni sakkutooqarfeqarnerata Kalaallit Nunaannut naammaginartumik pissarsiffiusannginnera, taamatullu illersornissamut isumaqatigiissutip 1951-meersup tamatumalu kingorna tapiliunneqarsimasut Kalaallit Nunaata soqutigisaanut naammaginartumik qulakkeerinninngitsut. Tassani ilaatigut Thule Air Base pineqarpoq, aammattaarli USA-p Kalaallit Nunaanni illersornissamut isumaqatigiissutip imarisaani pineqartuni allani suliaqartarsimanerini, ilaatigut Kalaallit Nunaanni sakkutooqarfiit sanaartukkallu qimaannakkat amerlallutik. Pissutsit maanna killiffiat akuersaarneqarsinnaanngilaq.
Tamanna aallaavigalugu ataatsimiititaliap isumaqatigiittup Nunanut Allanut Naalakkersuisoq Washington D.C.-mi Colorado Springsimilu ataatsimiinnerni tapersersorpaa. USA-p Kunngeqarfiullu Danmarkip Illersornissamut isumaqatigiissummi 1951-meersumi tamatumalu kingorna tapiliunneqartuni Kalaallit Nunaata kalaallillu inuiaqatigiit ataavartumik tigussaasumik pitsaaqutinik qulakkeerinniffigineqarsimannginnerat Kalaallit Nunaannit akuersaarneqarsinnaanngilaq.
Thule Air Basemi kiffartuussinissamut isumaqatigiissuteqartarnerit ersersippaat taamatut aaqqissuussisimaneq qajannarpallaartoq inuiaqatigiinnullu kalaallinut ataatsimut isigalugu killilerujussuarmik iluaqutissiisartoq. Taamaattumik Naalakkersuisut ilungersorlutik ataavartumik aaqqiiniarlutik USA peqatigalugu aaqqiissuteqarniarnerat ataatsimiititaliamit tamakkiisumik tapersersorneqarpoq, tassuunakkut USA-p Kalaallit Nunaanni qaqugukkulluunniit sakkutooqarfeqarnera inuiaqatigiinnut kalaallinut annertunerpaamik iluaqutissarsiffigineqarniassammat.
Nunanut Allanut Sillimaniarnermullu Ataatsimiititaliaq Nunanut Allanut Naalakkersuisoq peqatigalugu amerikamiut nunatsinni sakkutooqarfeqarneranni sapinngisamik annertunerpaamik nunatsinnut inuiaqatigiinnullu iluanaarutaanissaa iluaqutaanissaalu qulakkeerniarlugu ilungersorluni sulivoq, apeqqutaatinnagu tamanna Illersornissamut isumaqatigiissut 1951-meersoq tamatumalu kingorna tapiliussat aqqutigalugit pissanersoq imaluunnit isumaqatigiissut tamarmi isumaqatiginniutigeqqinneqassanersoq."
Justus Hansen
Nunanut Allanut Sillimaniarnermullu Ataatsimiititaliap Siulittaasua
Paasissutissat sukumiinerusut ataatsimiititaliap siulittaasua Justus Hansen +299 53 12 10 attaveqarfigalugu pissarsiarineqarsinnaapput
Ataatsimiititaliap Nunanullu Allanut Naalakkersuisup makku ataatsimeeqatigaat:
Washington D.C.
- ?Sinniisoqarfimmi pisortaq Inuuteq Holm Olsen
- Ambassadøri pisortallu tullia Lars Bo Møller
- State Department Deputy Assistant Secretary, Ben Ziff
- Special Representative for the Arctic, Adm. Robert Papp, State Department
- Cathleen Kelly, Center for American Progress
- Ugpeagvik Inupiat Corporation: Kimberly Panitciaq Jorgensen in DC and Karlin Itchoak og Kristina Baiborodova via video link from Anchorage
Colorado Springs
- Arctic threat brief and discussion by Northern Command and NORAd
- Air Force Space Command brief and discussion
- Kiisalu takuniarlugu Cheyenne Mountain