2024 2023 2022 Flere år...
04-11-2016
2016-imi Inatsisartut ukiakkut ataatsimiinneranni oqaluuserisassani allannguutit amerlanerusut
Inatsisartut ukiakkut ataatsimiinnerat ingerlasoq eqqarsaatigalugu suli allannguutinik amerlanerusunik Inatsisartut Siulittaasoqarfiat ullumi aalajangiivoq.
Immikkoortut assigiinngitsut oqaluuserineqarfissaat allanngortinneqarput:
- 20 Missingersuutit pillugit inatsit: Aappassaaneerneqarnissaa ulloq 14. novemberimut kinguartinneqarpoq, pingajussaaneerinninnissaq ulloq 18. novemberimut nuunneqarluni.
- 24 Akileraaruserinermik ingerlatsineq: Aappassaaneerneqarnissaa ulloq 11. novemberimut kinguartinneqarpoq, pingajussaaneerinninneq pilersaarutaareersutut ulloq 15. november pissalluni.
- 25 Pinnguaatit ilaat pillugit Kalaallit Nunaannut inatsit: Aappassaaneerneqarnissaa ulloq 11. novemberimut kinguartinneqarpoq.
- 142 Inatsisartoqarfissaq pillugu tunngaviusumik aalajangiinissaq: Aappassaaneerneqarnissaa 2017-imi upernaakkut ataatsimiinnissamut kinguartinneqarpoq.
- 121 Nuna tamakkerlugu angajoqqaat siunnersuisoqatigiivinik pilersitsinissaq: Aappassaaneerneqarnissaa pingajussaaneerneqarnissaalu 2017-imi upernaakkut ataatsimiinnissamut kinguartinneqarput
- 33 Atuarfimmi atuartitsinermi atortut pitsaassusiannik misissuineq: Aappassaaneerneqarnissaa ulloq 14. novemberimut kinguartinneqarpoq.
- 40 Suleriaatsip allanngortinneqarnera: Aappassaaneerneqarnissaa ulloq 17. novemberimut kinguartinneqarpoq.
Tamatuma saniatigut apeqquteqaat aallaavigalugu oqallinnissamik siunnersuut nutaaq, imm. 61, 18. november oqaluuserisassanngortinneqarpoq, immikkoortorlu 65 Partii Naleqqap inatsisartunut ilaasortaatitaanit tiguneqarluni.
Oqaluuserisassani immikkoortut uku 2016-imi ukiakkut ataatsimiinnermit tunuartinneqarput:
- 122 Imigassat aalakoornartortallit pillugit inatsit.
- 127 Inuit amerliartuinnartut nunatsinnit nuuttartut pillugit aalajangiiffigisassatut siunnersuut.
- 66 Aalisarneq pillugu inatsisip allanngortinneqarnissaanik aalajangiiffigisassatut siunnersuut.
- 70 Apeqquteqaat aallaavigalugu oqallinnissamik siunnersuut.
Inatsisartut oqaluuserisassaanni allannguutit www.inatsisartut.gl -imi takuneqarsinnaapput. Nittartagaq ulloq 23. september 2016 attaveqaatit aqqutaanni isertunik anisunillu aqutsissutip ajutoornerata kingorna suli pissusissamisut tamakkiisumik ingerlaleqqissimanngilaq, atortussanillu amigaateqassagaluaraanni tamanna pillugu Laila Kristiansen lkri@inatsisartut.gl atorlugu attaveqarfigineqarsinnaavoq.