2024 2023 2022 Flere år...
10-08-2017
Inatsisartunut ilaasortaasimasoq Vittus Maaru Mikaelsen toqukkut qimaguppoq
Inatsisartunut ilaasortaasimasoq Vittus Maaru Mikaelsen ulloq 9. august toqukkut qimaguppoq.
Maaru piffissami 16. februar 1999-imiit 2. december 2002-mut taamatullu 15. november 2005-imiit 1. juni 2009-mut Inatsisartunut ilaasortaasimavoq.
Vittus Maaru Mikaelsen aamma taamanikkut Ammassalik Kommuniusimasumi ukiuni arlalissuarni naalakkersuinikkut sunniuteqarluni suliaqartarsimavoq. Ukiuni 1979-imiit 83-imut kiisalu 1993-imiit 97-imut kommunalbestyrelsimut ilaasortaavoq, tamatuma kingorna 2008 tikillugu atuuffigisaminik borgmesteriulluni. Tamatuma kingorna ukioq manna april tikillugu qinigaaffinni marlunni Kommuneqarfik Sermersuumi kommunalbestyrelsimut ilaasortaavoq.
Vittus Maaru Mikaelsen innaallagissiorfimmi pisortatut ilinniagaqarsimasuuvoq Tasiilallu nunaqarfiini arlalinni innaallagissiorfinnik paarsaqarsimalluni. Siullertulli pingaarnertullu Vittus Maaru Mikaelsen piniartorsuusimavoq ataqqineqartoq, nunaqarfimminiillu Isortumit Tasiilamut nuunnissamik aalajangersimanerminut meeqqami pitsaasumik ilinniagaqarnissaannik siunertaqarnini tunngavigisimavaa. Inuit pikkorissuunissaat pingaartitarisimavaa, taamaammallu nunaqqatiminut, piumassutsiminnik iliuuseqarneroqqullugit kaammattortakkaminut isorisaqaraangami uparuaateqarnissani tunuarsimaarfigisarsimanngilaa.
Piniartorsuaq ataqqinartoq ukiorpassuarnilu nunaminik nunaqqatiminillu sullissilluni politikeriusimasoq, inuk immikkut taasarialimmik anersaakkut timikkullu piginnaassusilik, maanna akornatsinniikkunnaartoq ataqqillugu maqaasillugulu eqqaamassavarput.
Vittus Maaru Mikaelsen 66-inik ukioqalerpoq, eqqarsaatitsigut nulia, meerai ilaqutaalu allat najorpagut.
Eqqaaneqarnera ataqqinartitaali.
Lars-Emil Johansen
Inatsisartut Siulittaasuat