Nutaarsiassat

03-11-2017

Nunat Avannarliit Siunnersuisoqatigiiffiata Finlandimi Helsinkimi 69-issaanik ataatsimiinneranit

Nunat Avannarliit Siunnersuisoqatigiiffiata Finlandimi Helsinkimi 69-issaanik ataatsimiinnerani inatsisartutigoortumik sulinermi Inatsisartut sinnerlugit Ineqi Kielsen aamma Kelly Berthelsen peqataapput.

Ataatsimiinnermit Ineqi Kielsenip Kelly Berthelsenillu aalajangiinerit marluk erseqqissarusuppaat:

• Finland Islandilu siunnersuuteqarsimapput finskisut islandimiutullu oqaatsit svenskit, norskit danskillu oqaasii assigalugit siunnersuisoqatigiiffiup sulinerani oqaatsitut atorneqarsinnaasutut akuerineqassasut. Tamannali nunat ilaasortaasut akornanni isumaqatigiissutigineqarsinnaasimanngilaq. Naaperiaataasumilli isumaqatigiissuteqartoqarpoq – nunat ilaasortaasut tamarmik siunissami nunat ataasiakkaat nammineq oqaasii atorlugit siunnersuisoqatigiiffiup ataatsimiinnerinut siunnersuuteqarsinnaalissapput.

• Savalimmiut 2016-imi Nunat Avannarliit Siunnersuisoqatigiiffiannut tamakkiisumik ilaasortanngornissaminik qinnuteqarpoq. Taamatut kissaateqarneq aallaqqaammut itigartinneqartussatut isikkoqaraluarpoq. Siunnersuutilli ataatsimeersuarnermi oqallisigineqarnerani tamanna pinngitsoortinneqarpoq, taarsiullugulu aalajangernissaq 2018-imi Nunat Avannarliit Siunnersuisoqatigiiffiata 70-issaanik ataatsimiinnissaanut kinguartinneqarluni, taamaalillunilu siunnersuisoqatigiiffiup iluani isumaqatigiinniarnerit ingerlaqqissinnaallutik, Savalimmiut Nunat Avannarliit Siunnersuisoqatigiiffiannut tamakkiisumik ilaasortanngorneranik kinguneqarnissaannik neriuuteqarfiusumik.

Nunat Avannarliit Siunnersuisoqatigiiffiata ataatsimut ataatsimiittarnerisa 2018-imi septembarimi nunatsinni ingerlanneqarnissaat sulissutigineqarpoq, tamannalu Ineqi Kielsenip Kelly Berthelsenillu qilanaaraat tikilluaqqullugulu.

Paasissutissat sukumiinerusut Ineqi Kielsen 58 73 31 aamma Kelly Berthelsen 58 63 69 attaveqarfigalugit pissarsiarineqarsinnaapput.

Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallit Nunaanniillu inatsisartunut ilaasortanit 87-init ilaasortaaffigineqartoq.

Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput sinniisussalinnik. Ineqi Kielsen, Siumut, ilaasortaavoq Vivian Motzfeldt, Siumut, sinniisussaralugu, ilaasortallu aapparalugu Kelly Berthelsen, Inuit Ataqatigiit, Aaja Chemnitz Larsen, Inuit Ataqatigiit, sinniisussaralugu. Kelly Berthelsen Nunani Avannarlerni Ilisimasanut Kultureqarnermullu Ataatsimiititaliamut ilaasortaavoq, Ineqi Kielsen/Vivian Motzfeldt Nunat Avannarliit Piujuaannartitsiviunissaannut Ataatsimiititaliamut ilaasortaallutik. Ilaasortat sinniisussallu Inatsisartunut ilaasortaassapput taakkunanngalu toqqarneqarsimassallutik.