2024 2023 2022 Flere år...
02-02-2018
Nunat Avannarliit Killiit Siunnersuisoqatigiiffiannit nutaarsiassat
Nunat Avannarliit Killiit siunnersuisoqatigiiffiata Issittumi Siunnersuisoqatigiit aqqutigalugit inuusuttut aanngajaarniutinik atuinerat isiginiarniarpaa, misissuineq Issittumi Siunnersuisoqatigiinni suleqatigiissitaq SustainableDevelopment Working Group, SDWG (Piujuaannartitsinermik ineriartortitsinermut Suleqatigiissitaq) aqqutigalugu ingerlanneqassaaq.
Nunat Avannarliit Killiit Siunnersuisoqatigiiffiat suliniut "Issittumi inuusuttut akornanni aanngajaarniutinik atuinermik pinaveersaartitsinermik" taaneqartoq pillugu The Iceland Centre for Social Research and Analysisimik (ICSRA) (Islandimi inuttut atugarisanik misissuisoqarfik nalilersuisarfillu) 2018-imi ataasinngornermi ulloq 29. januar suleqatigiinnissamik siunertaqarneq pillugu nalunaarummik isumaqatigiissuteqarpoq.
Nunat Avannarliit Kiliit Siunnersuisoqatigiiffiat maj 2017-imi Issittumi Siunnersuisoqatigiinni alaatsinaatsutut inissisimalerpoq, tassungalu atatillugu issittumi innuttaasut atugarissaarnerat immikkut pingaartinniarlugu aalajangiullugu. Suliniut "Issittumi inuusuttut akornanni aanngajaarniutinik atuinermik pinaveersaartitsineq" taamak siunertaqalernermut tulluartuuvoq. Suliniummi periuseq atorneqartoq Islandimiutooq sunniuteqarlluartartuusoq paasinarsisimavoq nunarsuarmilu tamarmi maanna atorneqaleriartorluni.
Issittumi inuiaqatigiit akornanni inuusuttut aanngajaarniutinik atuisarnerat ajornartorsiutaavoq siaruaasimaqisoq. Inuusuttut akornanni aanngajaarniutinik atuineq pinaveersaartinniaraanni annikillisarniarlugulu qanoq atuisoqartiginerata nalunaarsorneqarnissaa pisariaqarpoq. Taamak siunertaqarnermi Iceland Centre for Social Research and Analysisimik, (ISCRA) qanittumik suleqateqarnissaq tulluartuuvoq. Nunat Avannarliit Killiit Siunnersuisoqatigiiffiata maannakkut suliniummut siunnersuut Issittumi Siunnersuisoqatigiinni Piujuaannartitsinermik ineriartortitsinermut Suleqatigiissitamut(SDWG) saqqummiutissavaa.
- Nunat Avannarliit Killiit Siunnersuisoqatigiiffiat Issittumi Siunnersuisoqatigiinni alaatsinaatsutut inissisimalermat Issittumi Siunnersuisoqatigiinni Piujuaannartitsinermik Ineriartortitsinermut Suleqatigiissitami sulinermut qanoq tapersiisinnaanerput pillugu misissuilerpugut. Nunanit Issittumi Siunnersuisoqatigiinni ilaasortaasunit taperserneqassagutta issittumi inuusuttut akornanni aanngajaarniutinik atuineq qulaajarlugu aallartissaagut, taamaalilluta ukiut marluk qaangiuppata inuusuttut imigassamik, tupamik, aanngajaarniutinik, opioidinik (nakorsaatinik nipaallisaatinik sakkortuunik) nuannaarniutinillu allanik atuinerat issittumilu inuusuttut ataatsimut isigalugu qanoq inuunerissaartiginerat pillugu paasissutissanik tapiissuteqarsinnaassaagut. Taamak nalunaarsuissagaanni ISCRA-mik suleqateqarnissaq piumasaqaataavoq, taamaammallu suleqatigiinnissamik siunertaqarneq pillugu nalunaarummik isumaqatigiissuteqarneq Nunat Avannarliit Killiit Siunnersuisoqatigiiffiata siulittaasuanit Kári Páll Højgaardimit nuannaarutigineqarpoq.
The Icelandic Centre for Social Research and Analysisip, (ISCRA) pisortaata Jón Sigfússonip Kári Páll Højgaard taamak isummermat isumaqatigaa.
- Nunat Avannarliit Killiit Siunnersuisoqatigiiffiata issittumi inuusuttut atugarissaarnerannik nalunaarsuinikkut Issittumi Siunnersuisoqatigiinni sulinermut tapiissuteqarnissaa pillugu isumaqatigiissuteqarneq ICSRA-mit assorsuaq nuannaarutigineqarpoq. ICSRA-p pisortaa Jón Sigfússon oqarpoq; nunarsuup annersaani sulinermut assut misilittagaqarpugut taamaattorli suli issittumi suliaqarsimanata. Misissuinermi inernerisassat assut isumalluarfigaagut neriuutigalugulu inuiaqatigiit pitsaasumik ineriartulernissaannut atorluarneqarsinnaassasut.
Paasisaqarnerorusukkaanni ataani atsiortoq saaffigineqarsinnaavoq:
Inga Dóra Markussen
Generalsekretær / Secretary General
Tel + 354 5630 731
Fax + 354 5630 435
Vestnordisk Råd / West Nordic Council
Althingi
Kirkjustræti
101 Reykjavík
Island
Web: www.vestnordisk.is