Nutaarsiassat

06-09-2018

Siulittaasoqarfimmit inissiisoqanngilaq – pissanganartorsiortoqanngilaq.

Inatsisartut ataatsimiinnissaannut oqaluuserisassat, minnerunngitsumillu aalisarnermut inatsisissatut siunnersuutip manna tikillugu oqaluuserisassanut ilanngunneqarsimannginnera tusagassiorfinnit assut soqutigineqarput. Soqutinninneq ilassilluarneqarpoq, ajoraluartumilli tusagassiorfinni saqqummiineq pisariaqanngitsumik isummersornermik pissanganartorsiortitsinermillu kinguneqartumik ilaatigut paatsoornermik tunngaveqarpoq.

Piviusumilli suliassaq pissanganartorsiorfiunngilaq:

Siunnersuutit saqqummiussassatut kissaatigineqartut Inatsisartut ataatsimiinnissaat sapaatit akunnerinik tallimanik sioqqullugu Siulittaasoqarfimmut nassiunneqassapput. Taama piffissaliinikkut ilaatigut siunertarineqarpoq siunnersuuteqarpassuarnik suliassaminnik misissuinissamut Inatsisartunut ilaasortat piffissaqarnissaannik qulakkeerinninnissaq.

Naalakkersuisulli tamatumunnga immikkut pissutissaqartillugu piffissaliussap saneqqunneqarnissaanik siumoortumik qinnutiginninnissaminnut periarfissaqarput. Aalisarnermut inatsimmut tunngatillugu immikkut taama akuerineqarnissaq Naalakkersuisut qinnutigaat Siulittaasoqarfimmullu nalunaarutigalugu inatsisissatut siunnersuut Inatsisartunut ulloq 21. september nassiunneqarsinnaassasoq.

Immikkut akuerineqarnissap itigartitsissutigineqarneranik Siulittaasoqarfik Naalakkersuisunut nalunaaruteqanngilaq allatigulluunniit Naalakkersuisunut imaluunniit Aalisarnermut, Piniarnermut Nunalerinermullu Naalakkersuisumut ”inissiinani”.

Allaallumi immikkut akuerineqarnissamik qinnuteqaat Siulittaasoqarfimmit suli inaarutaasumik isummerfigineqanngilaq. Siulittaasoqarfik aatsaat taamaliussaaq inatsisissatut siunnersuut Siulittaasoqarfimmit tiguneqarpat.

Tamanna pissanganartorsiornertaqanngilaq; Siunnersuutip illersorneqarsinnaasumik suliarineqartussanngortinneqarnissaa Siulittaasoqarfiup soorunami nakkutigisassaraa; tassungalu ilaavoq inatsisissatut siunnersuutip ilusiligaanermigut pisariaqartumik pitsaassuseqarnissaa aammalu inatsisissatut siunnersuummik misissuinissaminnut Inatsisartunut ilaasortat naammattumik piffissaqartinneqarnissaat.

Piffissaliussat saneqqunneqarnissaannut immikkut akuerineqarnissamik qinnuteqartoqartarnera nalinginnaavoq, taakkulu assigiimmik Siulittaasoqarfimmit pinerit tamaasa suliarineqartarput. Immikkut pissutissaqartillugu immikkut akuerineqarnissamik qinnuteqaat nalinginnaasumik akuerineqartarpoq, tamanna illersorneqarsinnaasutut Siulittaasoqarfimmit isigineqaraangat. Inatsisissatut siunnersuutip tigunissaanut Siulittaasoqarfiup naliliinissaa utaqqinneqarpoq. Pissanganartorsiortoqanngilaq, inissiisoqanngilaq – oqaluuserisassanulli Inatsisartullu ataatsimiinnissannut soqutiginninneq qujassutigaarput.

Siulittaasoqarfik sinnerlugu

Hans Enoksen

Inatsisartut siulittaasuat