Nutaarsiassat

01-11-2018

Inatsisartut siulittaasuata Vivian Motzfeldtip nunani avannarlerni inatsisartut siulittaasuinik naapitsivoq

Nunani avannarlerni inatsisartut siulittaasuisa ataatsimiinneranni Inatsisartut Siulittaasuat Vivian Motzfeldt peqataavoq. Ataatsimiinneq Nunat Avannarliit Siunnersuisoqatigiiffiata Oslomi, Norgemi ulluni 30.-miit 31. oktober 2018-p tungaanut ingerlanneqartumi ataatsimiinneranut atatillugu ingerlanneqarpoq.

Nunat Avannarliit inatsisartut siulittaasuisa ataatsimeeqatigiinneranni Norge, Sverige, Finland, Island, Danmark, Savalimmiut, Åland aamma Kalaallit Nunaata peqataaffigisaanni “Tatiginninneq – innuttaasut naalakkersuinermik suliaqartunik naalakkersuisoqarfinnillu pingaartumillu nunani ataasiakkaani inatsisartunik tatiginninneq” ataatsimiinnermi pingaarnertut qulequtarineqarpoq.

Nunat Avannarlit Siunnersuisoqatigiiffiata Ataatsimiinneranut atatillugu norskit kunngikkormiuisa Kong Harald tallimaat aamma Dronning Sonja qaaqqusisoralugit Nunani Avannarlerni Siunnersuisoqatigiit, nunat avannarliit naalakkersuisui, kiisalu nunani avannarlerni inatsisartunut siulittaasut ullup qeqqasiorneq ingerlanneqarpoq. Tamatuma kingorna Nunat Avannarliit Ataatsimiinnerat 70-issaat norskit inatsisartuini Stortingimi Naalakkersuisut ataatsimiinnerannik ammarneqarluni, ilaatigut qarasaasiatigut sillimaniarneq, Nunani Avannarlerni killeqanngitsumik angalasinnaaneq inatsisilerinermilu suleqatigiinneq oqaluuserineqarlutik.

Nunat Avannarliit Killiit Siunnersuisoqatigiiffianni Præsidentitut Inatsisartut Siulittaasuat ataatsimiinnernut arlalinnut peqataavoq, ilaatigut Nunat Avannarliit Siunnersuisoqatigiiffiata siulittaasoqarfianik, naalakkersuisut suleqatigiit aamma Nunat Avannarliit Killiit siulittaasoqarfiannik ataatsimeeqateqarluni.

Kalaallit Nunaata attaveqaatai suleqatigisallu pioreersut nukittorsarneqarnissaannut oqallittarfinni assigiinngitsuni Kalaallit Nunaata peqataasarnissaa pingaaruteqartoq Inatsisartut Siulittaasuat Vivian Motzfeldt isumaqarpoq.