2024 2023 2022 Flere år...
29-03-2022
Inatsisartunut ataatsimiititaliat ataatsimoorlutik angalanerat iluatsilluarpoq
Aningaasaqarnermut Ataatsimiititaliaq, Aalisarnermut, Piniarnermut Nunalerinermullu Ataatsimiititaliaq aammalu Inuussutissarsiornermut Aatsitassanullu Ataatsimiititaliaq ulluni 4.-6. marts 2022-mi Ilulissanut, Oqaatsunut Ilimanamullu paasisassarsiorlutik angalapput.
Ataatsimoorluni paasisassarsiorluni angalaneq pitsaasuullunilu pissarsiffiulluartoq ataatsimiititaliat peqataasut pingasuusut isumaqatigiissutigaat. Paasissutissat sulinerminni atugassatut pissarsiatik ataatsimiititaliat nuannaarutigaat.
Paasisassarsiorluni angalanermi ilaatigut Halibut Greenland Aps, Rodebay Fish aammalu Kair International ataatsimiititalianit pulaarneqarlutillu Ilulissani mittarfiliorfik kiisalu KJ Greenlandip illut uiguleriiaat 48-t sanaartugai takuniarneqarput.
Angalanerminni ataatsimiititaliat pulaakkatik tamaasa qujaffigai, minnerunngitsumillu nunaqarfinni Oqaatsuni Ilimanamilu tikeraarneq aammalu taakkunani ataatsimiinnerit oqaloqatigiinnerillu immikkut nuannaarutigineqarput.
Avannaata Kommunianit tikilluaqqulluarneqarneq aammalu borgmesterimik kommunalbestyrelsimillu kiisalu Oqaatsuni Ilimanamilu nunaqarfinnut aqutsisut sinniisuannik ataatsimeeqateqarnerit nuannersut ataatsimiititaliamit qujassutigineqarput.
Annertunerusumik paasisaqarusunnermi Jens Napaattooq, Aningaasaqarnermut Akileraartarnermullu Ataatsimiititaliamut aammalu Aalisarnermut, Piniarnermut Nunalernermullu Ataatsimiititaliamut siulittaasoq 25 88 66-imut sianerluni attavigineqarsinnaavoq.