2024 2023 2022 Flere år...
31-03-2022
2022-mi upernaakkut ataatsimiinnermi oqaluuserisassat nutarterneqarneri naleqqussarneqarnerilu.
Naalakkersuisut ataanni qarasaasiaqarnikkut isumannaallisaanikkut ajutoortoqarnerata malitsigisaanik sapaatit akunneranni 13-imi oqaluuserisassani immikkoortut tamarmik kinguartinneqarnerisa kingorna 2022-mi upernaakkut ataatsimiinnermi oqaluuserisassat naleqqussakkat Siulittaasoqarfiup ulloq 31. marts akuerai.
Inatsisartuni qarasaasiaqarnikkut periaaseq Naalakkersuisunit immikkoorpoq taamaattumillu suliassaqarfinni qarasaasiaqarnikkut ataatsimut periaaseqarfiusuni soorlu pifffissamik suliffiusumik nalunaarsueriaatsimi, oqarasuaateqarnikkut periaatsimi allaffinnullu isersinnaanermut periaatsimi Inatsisartut taamaallaat eqqorneqarsimallutik.
Siulittaasoqarfiup taamaalilluni UPA22-mi oqaluuserisassani naleqqussaanerit tulliuttut akuersissutigai:
- Sapaatip akunneani 13-imi ullut ataatsimiiffiusussat pingasut sapaatip akunneranut 14-imut kinguartinneqassasut
- Tamatuma kingorna sapaatip akunneranit 14-imiit oqaluuserisassani immikkoortut taamaaqataanik sapaatit akunnerinut tulliuttunut nuunneqassasut – oqaluuserisassani immikkoortut ikittunnguit eqqaassanngikkaanni
- Sapaatit akunneri 15 aamma 16 Inatsisartuni ataatsimiiffiunatik ataatsimiititalianit ataatsimiiffiusussasut (13. aprilimiit 19. aprilimut poorskikkunni unillatsiarneq eqqaassanngikkaanni)
- UPA22-mi akunnerit apeqquteqarfiusinnaasut sinneruttut arfineq-marluussapput taakkulu ulluni 6/4, 27/4, 4/5, 11/5, 18/5, 25/5 aamma 1/6 pissallutik
- Partiit siuttuisa apeqqarissaarnissaat allanngortinneqarani ulloq 27/4 nal. 9.30-mit 11.00-imut ingerlanneqassaaq, tamatumalu kingorna akunneq apeqquteqarfiusinnaasoq ingerlanneqarluni
- Sapaatip akunnerani 17-imi Inatsisartuni ullut ataatsimiiffiusut sisamaassapput – sapaatip akunnerani 14-imi ullumi sisamani ataatsimiiffiusussami oqaluuserisassat sapaatip akunneranut 17-imut ingerlateqqinneqarmata
- Sapaatip akunnerani 21-mi ullut ataatsimiiffiusut pingasuussapput, tassa marlunngorneq, pingasunngorneq tallimanngornerlu (sisamanngornikkut qilaliarfik pissutigalugu)
- UPA22-mi oqaluuserisassat naleqqussakkat nalaanni ullut nalliuttut marluupput, tassa tallimanngornermi ulloq 13. maj Tussiarfissuaq sisamanngornermilu ulloq 26. maj Qilaliarfik
- Naalakkersuisunit immikkoortumik nutaamik (178) ilanngussisoqassasoq ulloq taanna pingasoriarlugu oqaluuserineqartussamik. Immikkoortup ulloq 13. april tunniunneqarnissaa ullorlu 26. april siullermeerlugu, aappassaaneerlugu pingajussaaneerlugulu oqaluuserisassanngortinneqarnissaa naatsorsuutigineqarpoq
- UPA22-mi ullut ataatsimiiffiusussat amerlassusii allanngortinneqassapput ullut ataatsimiiffiusussat pilersaarutaaqqaartutut 27-iugaluarlutik 25-iussallutik
- UPA22-mi ulloq ataatsimiiffiusussaq kingulleq tassaalissaaq pingasunngorneq ulloq 1. juni
Oqaluuserisassalli nutartikkat immikkoortut ullormi ataatsimiiffiusumi naammassillugit suliarineqanngitsut ullormut ataatsimiiffiusumut tullermut ingerlateqqinneqartarnerannik suleriaaseq atuuttoq malissavaat, soorlu aamma tamanna pisariaqassappat ataatsimiinnerup sivitsorneqarsinnaanera nalinginnaasumik suleriaasiusoq.
Oqaluuserisassat ataatsimiinnerup ingerlanerani ingerlaavartumik nutarterneqartarput allannguutillu Inatsisartut nittartagaanni takuneqarsinnaasarlutik.
Inussiarnersumik inuulluaqqusillunga
Hans Enoksen