Kalaallit Nunaanni Inatsisartut

Oqaluuserisassani immokkoortoq 13-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ataasinngorneq 13. oktober 1997 nal. 13.00

 

Oqaluuserisassani immikkoortoq 13.

 

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaannut siunnersuut.

(Aningaasaqarnermut Ineqarnermullu Naalakkersuisoq)

Siullermeerneqarnera.

 

 

 

Ataatsimiinnermik aqutsisoq, Inatsisartut Siulittaasuat Anders Andreassen:

Ataatsimiinneq ammarpoq. Ullumikkut ataasinngornermi 13. oktober makku oqaluuserineqas­sapput. Immikkoortoq 13: Inissianik attartorneq pillugu Inatsisartut peqqussutaata allanngortin­neqarneranik Inatsisartut peqqussutissaattut siunnersuut siullermeerneqarnera. Immikkoortut 14-iat: Piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutissaannut siunnersuut, siullermeerneqarnera. Immikkoortoq 21. Nalunaara­suartaatitigut attaveqarneq sullissinerillu pillugit Inatsisartut peqqussutaata allanngortinneqar­neranik Inatsisartut peqqussutissaannut siunnersuut, aappassaaneerneqarnera. Kiisalu immikko­ortoq 22: Tele Attaveqaatit aktiaateqarluni ingerlatseqatigiiffinngortinneqarnerat pillugu Inatsi­sartut peqqussutaata allanngortinneqarneranik Inatsisartut peqqussutissaannut siunnersuut, aappassaaneerneqarnera.

 

Daniel Skifte, Aningaasaqarnermut Ineqarnermullu Naalakkersuisoq:

Naalakkersuisut sinnerlugit maanna saqqummiutissavara inissianik attartorneq pillugu inatsisar­tut peqqussutaata allanngortinneqarneranik inatsisartut peqqussutissaattut siunnersuut.

 

Allanngortitsinerup kingunerissavaa namminersortut attartortitassatut inissiaataanni attartorner­mut akiliutissanik  aalajangersaasarneq pillugu peqqussummi maannakkut atuuttumi killilersuutit atorunnaarsinneqarnissaat. Ineqarnermut akiliutissap qaffasinnerpaaffissaata qanoq naatsorsorne­qartarnissaanut erseqqissorujussuarnik malittarisassaliunngikkaluarluni illuatungeriit tamanut naammaginartumik isumaqatigiissuteqartarnissaminnut pisussaaffilerneqassapput.

 

Inissiap attartortitalluunniit pitsanngorsarneqarneranut atatillugu attartortitsisoq attartornermut akiliummik qaffaanissaminut suli periarfissaqassaaq. Aammattaaq akiliutinik qaffaanissamik ilimasaarutit isumaqatigiinngissutigineqarnerannut atatillugu eqqartuussivimmut suliassanngor­titsisinnaaneq suli atuutissaaq. Kisianni siunnersuutip kingunerissavaa attartortup suliassanngor­titsisinnaalernera, siusinnerusukkut attartortitsisoq kisimi taamaaliorsinnaasimalluni.

 

Siunnersuummut aallarniutaavoq akileraarutitigut nalikilliliisarneq pillugu maleruagassani pineqartunut inuussutissarsiutigalugu inissianik sanaartornerup ingerlatsinerullu ilanngunneqar­nissaannik inatsisartunut ilaasortap Anders Nilssonip 1997-imi upernaakkut ataatsimiinnermut siunnersuutaa. Tassunga atatillugu tikkuarneqarpoq namminersortut inissiaataanni attartortittak­kani attartornermut akiliutissanik aalajangersaasarnermi maleruagassat atuuttut namminersortut inissianik attartortittakkanik sanaartorniarnissaannut akimmisaaruteqaataasinnaanerat.

 

Upernaakkut ataatsimiinnermi Naalakkersuisut neriorsuutigaat pisortat inissialiortitsinerannut, tassunga ilanngullugu sulisorisanut inissianik, tapertatut namminersortut inissialiortitsisinnaa­nerannut periarfissat misissuiffigeqqissaarneqarnissaat allaaserineqarnissaallu sulissutigineqalis­sasoq.

 

Tamanna tunngavigalugu Aningaasaqarnermut Ineqarnermullu Naalakkersuisoqarfik pilersitsi­voq suleqatigiissitamik illunik nioqquteqartartoq suleqatigalugu aningaasalersuinissamut periarfissanik assigiinngitsunik misissuisussamik.

 

Suleqatigiissitap nalilersuinermini assersuutitut tunngavigaa Nuummi inuussutissarsiutigalugu inissialiaq 26-nik inissiartalik katillugit 1.890 kvadratmeterinik angissusilik. Ilanngullugu tunngavigineqarpoq sanaartornermi aki kvadratmeterimut 12.500 kr.-iusoq, taamanikkut Nuum­mi sanaartornermi unammilleqatigiinnermi atugaasutut piviusorsiornerpaatut nalilerneqartoq.

 

Suleqatigiissitap sulinini ingerlappaa Nunatsinni namminersortut attartortittakkanik inissialiorti­ternissaminnut piffissami sivisuumi akilersugassanik taarsigassarsiarisinnaasaattut  piviusorsior­tumik naatsorsuutigineqarsinnaasutut nalilikkani tunngavigalugit. Nalilerneqarpoq piffissami sivisuumi akilersugassanik taarsigassarsisoqarsinnaasoq aningaasartuutit tamarmiusut 75%-iannut naleqquttumik. Sanaartornermut akiliutissat sinneri 25% namminersortuulluni sanatitsisup nammineq akiligassaralugit.

 

Nalikilliliisarnermut maleruagassanut allannguutissat, Aningaasaqarnermut Ineqarnermullu Naalakkersuisoqarfimmi maannakkut suliarineqartut, namminersortut aningaasaliiumasut attartortitassanik inissialiortiternissamut kajuminnerulersissinnaavaat.

 

Nalikilliliisarnermut maleruagassat allanngortitat namminersortuulluni sanatitsisup 25%-inik aningaasaliisup iluanaaruteqarnissaanut sunniuteqassapput. Taamaattumik suliffiit akileraarute­qartarnerannut tunngasut aningaasalersuutit imminnut akilersinnaassusiannut aningaasalersui­nerullu annertussusaanut sunniuteqassapput.

 

Sulissutigineqarpoq nalikilliliisarnermut maleruagassat januarip aallaqqaataani 1998 allanngor­tinneqassasut, taamaalillutik ingerlatseqatigiiffiit periarfissinneqassallutik inissianut, ingerlatse­qatigiiffiup sulisorisanut inissiatut imaluunniit nalinginnaasumik attartortitassatut sanatissimasa­nut, nalikilliliinissaminnut.

 

Inuit nammineq suliffiutillit periarfissinneqarput illunut sulisunut inissiassatut imaluunniit inuussutissarsiutitut atatillugu allaffittut suliarineqarsimasunut nalikilliliinissaminnut.

 

Illuliat 1998-imi januarip aallaqqaataa kingoqqullugu pissarsiarineqartut killiliineqanngitsumik nalikilliliiffigineqarsinnaapput, illut 1998-imi januarip aallaqqaataa sioqqullugu pissarsiarineqar­tut eqqarsaatigalugit piffissami ukiunik qulinik sivisussusilimmi ukiumut annerpaamik 10% nalikilliliissutigineqartassapput.

 

Assersuusiaq tunngavigalugu suleqatigiissitap naatsorsorsimavai ingerlatsinermut aningaasanullu tigoriaannarnut missingersuutit, pingaartumik aningaasaqarnikkut aningaasartuutit ingerlatsiner­mut aningaasanut tamarmiusunut sunniutissaat eqqarsaatigalugit.

 

Missingersuutini ilaatinneqarput attartornermut akiliutissat, assersuummi ininut pineqartunut nalinginnaasumik akiliutigitinneqartartutut ilisimaneqartut, taakkununnga ilanngullugit ingerlat­sinermi aningaasartuutit assersuummi pineqartumut naatsorsuutigineqarsinnaasut.

 

Suleqatigiissitaq naliliivoq inuussutissarsiutissatut inissialiortiterneq aatsaat atorneqarsinnaasoq piffissami sivisuumi akilersugassanik minnerpaamik aningaasartuutissat 75%-ii taarsigassarsiari­neqarsinnaappata, tassungalu peqatigitillugu inissiat nutaatillugit pissarsiarineqartut allaaserine­qartutut killiliineqanngitsumik nalikilliliissutigineqarsinnaappata.

 

75%-init qaffasinnerusunik taarsigassarsinissaq anguneqarsinnaappat, piffissami sivisunerusumi akilersuisoqarsinnaappat ernialiutallu allaaserineqartumit appasinnerusinnaappata inuussutissar­siutissatut inissialiortitsisinnaaneq kajungernarnerussaaq. Maannakkuugallartorli tamatuma piviusunngortinneqarsinnaanera ilimagineqanngilaq.

 

Inatsisartunut ilaasortap Anders Nilssonip ilanngullugu siunnersuutigaa suliffeqarfiit Namminer­sornerullutik Oqartussat ataanniittut sulisumik inissaannik namminersortut attartortitassatut inissiaataannik ukiuni qulini 15-iniluunniit attartornissamut isumaqatigiissuteqarsinnaasariaqar­tut. Assersuutitut taaneqarpoq Dronning Ingridip Napparsimmavissua.

Assersuutitut takorlooraanni Napparsimmavissuaq inissianik 26-inik sulisorisami inissaannik ukiunut qulinut attartornissamut isumaqatigiissuteqartoq, taava Napparsimmavissuup naatsorsuu­tigisinnaavaa ingerlatsinerminut aningaasartuutimi ukiumut 1,1 mio. kr.-it  imaluunniit missaan­nik amerlanerunissaat. Taakku Napparsimmavissuup attartornissamut isumaqatigiissuteqarnermi­gut attartornermut akiliutissaasa aamma maleruagassat atuuttut malillugit sulisut ineqarnermut akiliutissaasa nikingassutigaat.

 

Napparsimaveqarfissuup ingerlanneqarnera aningaasanut inatsimmi aningaasaliissutit aqqutiga­lugit akilerneqartarmat Napparsimmavissuaq qinnuteqartariaqarpoq ingerlatsinermut aningaasar­tuutinut amerleriaatit taakku, ukiuni qulini 11 mio. kr.-iusussat, aningaasanut inatsisikkut aningaasaliissutigineqarnissaannik.

 

Namminersornerullutik Oqartussat suliffiutimik ilaata sulisuni inissaqartikkumallugit piffissami sivisuumi namminersortut inissiaataannik attartortittakkamik attartornissamut isumaqatigiissute­qarnera pissutigalugu taama amerlatigisunik ingerlatsinermut tapiissuteqartariaqartoqassappat pisuni ataasiakkaani nalilerneqartariaqarpoq sulisut inissaannik inissialiortitsinissaq Namminer­sornerullutik Oqartussanut pitsaanerunnginnersoq.

 

Upernaaq ataatsimiinnermi nalunaarutigineqartutut namminersortut inissianik attartortittakkanik sanaartornissaannut periarfissat pitsaanerulersinneqarnissaannut naalakkersuisut peqataajumap­put. Inissianik attartorneq pillugu inatsisartut peqqussutaata allanngortinneranik inatsisartut peqqussutissaattut siunnersuut manna tamatumunnga iluaqutaasinnaasoq naalakkersuisut isumaqarput, neriuutigaarpullu siunnersuut inatsisartunit akuersortumik oqaluuserineqassasoq.

 

Naalakkersuisut siunnersuutigaat peqqussutissatut siunnersuut aappassaaneerneqannginnermini Ineqarnermut ataatsimiititaliami oqaluuserisassanngortinneqassasoq.

 

Ruth Heilmann, Siumup oqaaseqartua:

Inissianik attartornermi Inatsisartut peqqussutaata allanngortinneqarneranik Naalakkersuisut saqqummiussaat tunngaviatigut Siumumiit isumaqatigisarput pillugu imatut oqaaseqarniarpugut.

 

Siumumiit pingaartipparput angujumallugulu nunatsinni najugaqartut tamarmik pitsaasunik najugaqartitaanissaat minnerunngitsumillu inigisaminnut naapertuuttumik nammassinnaasamin­nillu ineqarnerminnut akiliuteqartarnerisa qulakkeersimaneqarnissaat, taamaattumik Naalakker­suisut taamatut ittumik saqqummiussaqarnerat Siumup tungaaniit iluarisimaarparput, isumaqar­narmat taamatut inatsisiliornikkut aamma attartortut naapertuilluarnerusumik akiliuteqartitaasar­nissaat ilanngullugu aqqutissiuunneqarniartoq.

Ullumikkut ilaatigut attartortunut akigititatigut naammaginanngitsumik qaffasippallaartumillu angissuseqartumik inuit ilaqutariit inimik illumillu atuisut akiliuteqartitaasarput .inissaaleqineru­jussuarmik peqquteqartumik tamanna Siumumiit naannaginngilluinnagaraarput.

 

Taamaattumik illumik piginnittuusup attartortullu akornanni isumaqatigiinniartoqareerneratigut illugiinnut naammaginartumik isumaqatigiissuteqarlunilu atsioqatigiittoqartarnissaanik piumasa­qaateqartoqarsinnaalernissa naammagisimaarnartuuvoq. Taamalu naammagittaalliuuteqarsinnaa­nermik illersorneqarsinnaanermillu aamma eqqartuussiviit angullugit periarfissaqarnerulersitsini­arneq Siumumiit iluarisimaarlutigut.

 

Kisiannili isumaqarluta akerlianik pisoqannginnissaa sillimmartaarfigineqarlunilu nakkutigine­qartuartariaqartoq, tassani attartortitsinerup attartortumut asuli iluanaarniutigineqannginnissaa nakkutigilluinnartariaqartuummat, tamannalu qulakkeerniarlugu Naalakkersuisut ersarinnerusu­mik qanoq iliuuseqarniarnerminnik erseqqissaanissat Siumumiit piumasarissavarput.

 

Siusinnerusukkut inissianik attartortittakkanik kommunit Namminersornerusullu samaartortitta­gaasa akimikkut qaffasippallaarnerisa, najugaqartunut inuiaqatigiinnullu ullumikkut akiliutitigut attartortunut akisuallaarlunilu ilaatigut artukkiisartup, tassuuna peqqussutiliortoqarneratigut aamma pinaveersimatinniarneqartumut, ilapittuutitut tamanna taamatut Siumumiit isigaarput.

 

Attartortunut akiliutissamik millisitsiniarluni sanaartornermi kvadratmeterimut akikinneqqusaa­titsinermi akiusunik, Naalakkersuisut aalajangersimanerusumik periuseqarlutik killiliisalernerat aamma Siumumiit tapersersorlutigulu pissusissamisoortuutipparput.

 

Uanili erseqqissaatigineqartariaqarpoq samaartukkat akii qaffasippallaaraangata aamma malitsi­gisarmagu attartortut akiliutaat qaffasippallaalertarnerat. Tamanna arlaqaqisuni attartortunut naalliuperaarnartumik najugaqartunut tamaviaartitsisartuusoq isiginngitsuusaartariaqaranilu. Kisiannili mianersuuttariaqarpoq kommunit illoqarfiillu aalangersimasuinnaat akissaqarnerusul­lu, kisimik sanaartornermi peqataalinnginnissaat pinaveersimatinniartariaqarmat. Kommunimmi kissaateqartut tamarmik sanartornermi aamma naligiinnerusumik aningaasaliissutinik ukiuniit ukiunut agguaaffigineqartarnissaat anguniartariaqarmat.

 

Nunatsinni inissaaleqinerujussuup sutigut tamatigut millisinniartariaqarnera Siumup anguniar­paa. Taamaattumik aamma kikkulluunniit nukissaqartut suliffeqarfiugunik, selskab-iugunik, innuttaaqataagunik namminersortuugunilluunniit pisortat iliuuseqarnissaat utaqqiinnarnagu, inissialiornissaminnut periarfissaqarnissaannik Naalakkersuisut akimmisaarutitaqarpallaanngit­sumik eqaannerusumillu peqqussutikkut periarfissiiniarnerat oqaatigissavarput Siumumiit tamakkiisumik tapersersoratsigu.

 

Tassunga ilaatillugu upernaaq Inatsisartuni ilaasortap Anders Nilsson-ip siunnersuutaanut tunngatillugu, Naalakkersuisut suleqatigiissitaliornermikkut misilittagaqartumik ilaqarlutik nalilersuisimanerat Siumumiit iluarisimaarparput, akileraarutitigut nalikilliliisarnermi inuutissar­siutigalugu illuliortarnerup ilanngunneqarnissaanik periarfissaqartilerlugu.

 

Taamaalilluni namminersortut aningaasaliiumasut attartortitassanik inissialiortiternissaminnut aamma kajuminnerulersinneqarsinnaalerlutik, kiisalu suliffiutillit illuutimik imaluunniillu allaffiutimik inuutissarsiummut atatillugu suliarineqarsimasunut nalikilliliinissaminnut, aamma periarfissineqarlutik 1998 sioqqullugu ukiunik qulinik pisoqaassuseqartunut ukiumut 10%-imik nalikilliliinermut, taamalu ukioq aamma taanna aallarnerfigalugu illulianut killiliinertaqanngitsu­mik nalikilliliisoqarsinnaanngorluni.

 

Naalakkersuisut suliffeqarfinnut siumut ukiunik arlaqartunik attartugassanik isumaqatigiissute­qartarnissaminnut periarfissaqalernissaanik, Anders Nilsson-ip siunnersuutaanut Naalakkersuisut akerliunerat, Siumumiit isumaqatigaarput.

 

Suliffeqarfimmi ingerlatsinermut suli aningaasartuutit qaffatsinneqarnissaannik kinguneqarsin­naammat, kiisalu aarleqqutigineqarsinnaalluni aamma, siunnersuut akuerineqassaguni suli najugaqartunut akiliutip qaffanneqarnissaanik malitseqarsinnanera, tamannalu ullumikkut akinik appartiteriniarnermut anguniagaqarnermut naapertuutinngitsuulluni.

 

Siumumiillu iluarinartinnerussavarput aningaasat nukiillu nissaaleqinerup millisarneqarnissaanut atorpata. Tamannami naapertuunnerusutut pisariaqavissutullu isumaqarfigigatsigu. Ilaqutariimmi arlaqartut vakantimi utaqqiisaasumik ilaatigut ineerannguani sivisuumik utaqqisitaasarnerat, ilaqutariit inuunerannut naammaginarunnavittartoq ilisimaaraarput.

 

Isumaqarpugullu Siumumi maani Nuummi pissutsit immikkut ittuusut, ajornartorsiutaasullu tunngavii annertussusaallu saqqummiunneqarnissaat nassuiaassutigineqarnissaallu piumasaqaati­gineqartariaqartoq. Atukkat piviusut suuneri tusatsiagaannanngitsut atorfeqartuni, ilinniagaqartu­ni taamalu inissaaleqinermi nalinginnaasumik ineqarnikkut atukkat ersarissumik Naalakkersuisu­tigoortumik misissorneqarlutillu, nassuiaassutigineqarnissaat pisariaqavissutut Siumumiit isumaqarfigigatsigu.

 

Taamatut Siumumiit oqaaseqarluta peqqussutissamik siunnersuutip, ineqarnermut ataatsimiitita­liamut aappassaaneerneqartinnagu, isummersorfigineqarnissaanik Naalakkersuisut siullermeerin­ninnermi saqqummiussaat, isumaqatigalugit ataatsimiitaliami suliarineqarnissaa Siumumiit innersuussutigaarput.

 

Jakob Sivertsen, Atassutip oqaaseqartua:

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut. Atassut-miit imatut oqaaseqarfiginiarparput.

 

Nammineerluni ineqarsinnaaneq inuit pisinnaatitaaffiannut ilaavoq, taamaattumik Atassut-miit  nunatsinni inissaqarniarnikkut ajornartorsiutit aaqqiissuteqarfiginiarlugit suleqataanerput nagittumik ingerlateqqissavarput, Atassut-miit  anguniagariuaratsigu nunatsinni inissaqarniarnik­kut periarfissat annertunerulersittariaqartut inuit tamarmik assigiinnerusumik inissaqarniarnikkut periarfissaqartitaalernerisigut.

 

Inuit ataasiakkaat ullumikkornit annertunerusumik namminerisaminnik inissaqalersinnaanissaat annertusarneqartariaqarpoq, ullumikkut periarfissaareersut saniatigut, tamatumani inuit akunnat­tumik akissaatillit piumassuseqartut namminneq peqataanermikkut inissialiorsinnaasuugaluit periarfissaqanngitsut eqqarsaatigaagut.

 

Atassut-miit  isumaqarpugut nutaamik aaqqissuussinikkut anguneqarsinnaasoq, soorlu nunatsinni nammineerlutik peqataanermikkut illuliorniartut, kiisalu BSU-mit illutaarsimasut eqqarsaatigalu­git illuutimik aserfallatsaalinissaannut namminneq iluarsaassisinnaanngorlugit aningaasanik taarsigassarsiffigisinnaasaannik periarfissiinikkut, ullumikkummi taamaaliornissaq inatsisitigut ajornartoq nalunnginnatsigu.

 

Taamatut periarfissiinikkut siunissaq ungasinnerusoq isigalugu pisortat illuliortittinerannut aningaasarpassuit atorneqartartut siammasinnerusumik illuutinillu ullumikkornit amerlanerun­gaartunik aserfallatsaaliinermut atorneqartassagaluarput, tamatumalu kingunerissallugu initaarni­arluni utaqqisarnerujussuup malunnaatilimmik annikillisinneqarneranik.

 

Nunatsinni ineqarnermut akiliutit qaffasinnerujussuat innuttaasut akornanni akiligassarpassuaqa­lernermik kinguneqartartoq, ilaatigut takussutissaavoq. Nunatsinni inissialiortiternerup akisu­nerujussuanut, matumuuna Naalakkersuisut periuuserilersimasaat inissialiortiternermi kvadrat­meterimut aki qaffassippallaarsorigaangamikku sanaartugassanik unitsitsisarnertik nagittumik ingerlateqqissagat Atassut-miit piumasaraarput, inissialiortiternermi kvadratmeterimut akeq inissiani najugaqarnermi qanoq akiliuteqarnissamik aalajngiisuuttuuinnartartoq nalunnginnatsi­gu.

 

Inissianik attartorneq pillugu Inatsisartut peqqussutaata allanngortinneqarnerata kingunerisassai Atassut-miit misissorluarsimavagut, soorlu namminersortut attartortitassatut inissiaataanni attartornermut akiliutissanik  aalajangersaanerup peqqussummi maannakkut atuuttumi killiler­suutit atorunnaarsinneqarnerat kingunerisussaagaa, taamaalilluni ineqarnermut akiliutissap qaffasinnerpaaffissaata illuatungeriit isumaqatigiinniarnermikkut aalajangersinnaalissallugu.

 

Matumuuna Atassut-miit Naalakkersuisunut piumasarissavarput, inissiani attartortitakkani nalinginnaasumik akit sapinngisamik qaangernaveersaarnissaat eqqummaariffigineqassasoq, soorlu aamma saqqummiussami oqaatigineqartoq inissiap attartortitalluunniit pitsanngorsarne­qarneranut atatillugu attartortitsisoq akiliummik qaffaanissaminut periarfissaqartoq. Periarfissap atornerlunneqannginnissa Atassut-miit kaammattuutigaarput.

 

Atassut-miit namminersortut periarfissaqarttitaajuarnissaat suleqataaffigiuaratsigu, matumuuna inissianik attartorneq pillugu Inatsisartut peqqussutaata allannguutissaa alloriarnertut siullertut paasillugu, kingunissai Atassut-miit malinnaaffigissavagut.

 

Inatsisartunut ilaasortaq Anders Nilsson upernaaq Inatsisartut ataatsimiinneranni siunnersuute­qarpoq, namminersortut inissialiortiternerminni akileraarutitigut nalikilliliiffigineqartarnissaan­nik imalimmik, taamaaliornikkut namminersortut inissialiornerminni aningaasat atukkatik akileraarutitigut oqilisaassiffigilersinnaanissaat namminersortut aningaasaqarniarnerannut iluaqutaasumik, taamatut aaqqiissuteqarniarneq Atassut-miit tamakkiisumik taperserparput.

 

Namminersortut inissialiortiternissaminnut aningaasalersuinissaannut periarfissaat saqqummius­sami oqaatigineqartut annertunerusumik pulaffiginagit taperserparput, aallariarfissatut oqareer­nertut siullertut pitsaasutut isumaqarfigigatsigik.

 

Nalikilliliisarnissanut maleruagassat allannguutissaat maannakkut suliarineqartoq Naalakkersui­sumit oqaatigineqarpoq, naatsorsuutigineqarlunilu namminersortut inissialiorsinnaanerannut kajungernerulernermik kinguneqartussaasut, neriuppugut taamatut kinguneqarsinnaajumaartoq, aammami siunnersuutip tamanna siunertarimmagu.

 

Illulianut 1998-ip kingorna pissarsiarineqartunut killeqanngitsumik nalikilliisinnaanermik saqqummiussami oqaatigineqartoq Atassut-miit akuersaarpagut, kiisalu illut 1998-ip siornagut pissarsiarineqartut eqqarsaatigalugit ukiunik qulinik sivisussusilimmik annerpaamik ukiumut 10%-mik nalikilliliiffigineqartarnissaannik saqqummiusaq, aammattaaq Atassut-miit akuersaar­parput.

 

Saqqummiussami oqaatigineqartut allat isumaqatigigatsigik annertunerusumik pulaffigissanngi­lagut, upernaaq siunnersuut Inatsisartuni sammineqarmat oqaaserparujussuit tassunga tunngasu­mik anereersimagatsigit

 

Taamatut oqaaseqarluta peqqussutissatut siunnersuutip aappassaaneerneqartinnani ineqarnermut ataatsimiitaliami sammineqarnissaanut Atassut-miit suleqataanissarput matumuuna oqaatigaar­put, aammalu aappassaaneerneqarnissaanut akuersaarluta taaseqataanissarput matumuuna nalunaarutigereersinnaavarput.

 

Maliinannguaq M. Mølgaard, Inuit Ataqatigiit oqaaseqartuat:

Ukiuni arlaqalersuni nunatsinni ajornartorsiutaanerpaasut ilagaat inissaaleqinerujussuaq. Tamatu­mallu nassataanik suliffeqarfiit kissaateqartalersimapput sulisuminnut namminneq illuliorsinnaa­lernissaminnik. Upernaaq inatsisartut ataatsimiinneranni inatsisartunut ilaasortaq Anders Nilsson siunnersuuteqarpoq akileraarutitigut nalikilliliisarneq pillugu maleruagassani, inuussutissarsiuti­galugu inissianik sanaartornerup ingerlatsinerullu ilanngunneqarnissaannik.

 

Tamatumanilu siunnersuut Inuit Ataqatigiinniit tapersersimavarput, isumaqaratta taamatut pisinnaatitaalernermi nunatsinni inissaaleqinerujussuaq aamma akiorneqarumaartoq.

 

Paasivarpullu suleqatigiissitaq pilersinneqarsimasoq illunik nioqquteqartartumik suleqateqarluni missuisussaq. Taassumalu misissuinermini nalilersuinerminilu paasisaasa erseqqissumik takusinnaannginneri Inuit Ataqatigiinniit uggoraagut. Naak ilaatigut nassuiaatigineqarsimagalu­artut Naalakkersuisup saqqummiussaaniit.

 

Innersuussutigineqarporli sivisuumik akilersugassanik 75%-nik nalilinnik  attartortoqarsinnaalis­sasoq, 25%-illu sanaartorniartup nammineq akilertassagai. Taassumalu saniatigut ingerlatseqati­giiffiit inissialiortitsisut nalikilliliinissaminnut 1. januar 1998-imiit periarfissinneqassasut.

 

Tassanissaaq namminersortut inissialiorsinnaalernissaat ammaanneqarpoq, tamatumanilu inissaaleqinerujussuup atornerlunneqannginnissaata sakkortuumik nakkutigineqarnissaa Inuit Ataqatigiinniit kaammattuutiginiarparput. Tassami imaattariaqanngimmat inissaaleqinerup kingunerisaannik namminersorlutik attartortitsisartut atornerluillutik akisoorujussuarmik akilersillugu attartortitsisarnissaat. Taamaalilluni ammaanneqassasoq.

 

Naalakkersuisullumi saqqummiinermini oqaatigaa inatsisinik allanngortitsinerup kingunerissa­gaa, namminersortut attartortitassatut inissiaataanni attartornermut akiliutissanik aalajangersaa­sarnermi killilersuutit atorunnaarsinneqassasut. Tassalu imannerpoq akit annerpaaffeqassangitsut qanorluunniillu akiilistisisoqarsinnalissasoq? Taamaappat tamanna Inuit Ataqatigiinniit akueriu­minaatsipparput, inuimmi inissaaleqinerat atornerlunneqartariaqanngimmat.

 

Tassungalu atatillugu akit qaffatsaaliornissaannik naalakkersuisooqatigiit isumaqatigiissutigisi­masat tamatumani sukkut illersorneqarpa?

 

Qanoq ilillunilumi qulakkeerneqarsinnaassava inigisat akissamisut akilersortinneqarnersut? Oqaatigineqaraluarpoq atornerlunneqartutut misigisimasoq eqqartuussivikkoorlugu akinik appartitsiniarsinnaasoq. Ilumut tamanna siunissami aqqutissatut takorloorneqassava? Nalunngi­larpummi eqqartuussiviit suliassarpassuaqartartut, ilaatigullu suliap ingerlanerani sivisuumik utaqqisoqartariaqartartoq.

 

Maanna najugallit akiliisinnaajunnaarlutik A/S Ini-miit anisitaasartut kommuuninit artukkiisu­mik suliassanngortarput, matumanilu akit qaffasinnerpaaffeqanngitsut pilerpata, attartortitsisorlu killeqanngitsumik iliorsinnaalerpat tamanna kommuuninut ullumernit suli nammakkiinerulis­sannginnerpoq?

 

Inatsip manna allanngortinneqartussaq inissianik attartortunut attartortartussanullu pingaarute­qarluinnartuuvoq, Inuit Ataqatigiinniillu paaserusupparput ineqartut kattuffiat matumani tusarni­arneqarsimanersoq?

 

Inuit Ataqatigiinniillu oqaatigissavarput siunnersuutip matuma upernaaq saqqummiunneqarnera­ni suliffeqarfiit sulisuminnut inissialiorsinnaalernissaat tapersersorsimagatsigu, uanili namminer­sortut killeqanngitsumik akeqartitsillutik attartortitsisarnissaat akueriuminaatsillugu. Tamannami kiap nakkutigissavaa? Attartortummi isaannik isigalugu tamanna navianartoqarsorigatsigu.

 

Naggasiullugu apeqqutigerusupparput, upernaaq eqqartorsimasarput inimilu maani akuersaarsi­masarput, attartortut inigisartik angigigunikku mikigilersimagunikkuluunniit paarlaassisinnaa­nerat atuutilersinneqarsimannginnersoq?

 

Taama oqaaseqarluta peqqussutissatut siunnersuutip aappassaaniinnginnermini ineqarnermut ataatsimiititami oqaluuserineqarnissaa innersuussutigaarput.

 

Bjarne Kreutzmann, Akulliit Partiiat:

Aallaqqaammut erseqqissassavara inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut tamakkiisumik taperser­sorakku. Tassanimi pineqarpoq namminersortut attartortitassatut inissiaataanni attartornermut akiliutissanik aalajngersaasarneq pillugu peqqussummi maannakkut atuuttumi killilersuutit atorunnaarsinneqarnissaat, taavalu illuatungeriinnut namminernut aalajangigassanngorlugu ineqarnermut akiliutip illuatungeriinnuut tamanit iluarineqarsinnaasup nassaarinissaa.

 

Paasivara siunnersuut aallaaveqartoq upernaaq ataatsimiinnitsinni oqaluuserisatsinit uannga, tassa ineqarnermut akiliutip aalajangerniarneranut sumi sunalu akimmisaarutaanersoq, Taamaat­tumik nuannaarutigaara suleqatigiissitap taamani kingorna pilersinneqartup aningaasalersuinissa­mut periarfissat assigiinngitsut misissoqqissaarsimammagit.

 

Nalikillisaanermut maleruagassanut allannguutissat oqaatigineqartut maanna suliarineqartut, qularnanngivissumik kajumissaataassapput illuatungeriinnut aningaasaliissuteqarusunnerannut.

 

Aammattaaq isumaqatigaara nalikilliliinermut maleruagassat 1. januar 1998-imiit allanngortinne­qarnissaat , taamaalillutik ingerlatseqatigiiffiit periarfissinneqassammata inissianut sulisorisa­minnut inissiatut imaluunniit nalinginnaasumik attartortitassatut sanatissimasaminnut nalikillilii­nissaannut tunngatillugu, isumaqarpunga tamanna iluaqutaassasoq, aamma inissarsiorlutik allatsissimasunut utaqqisuniittunut ikilisaataasinnaassammata.

 

Kommunit qangaanilli kissaatigisaraat nalunngilara, suliffeqarfiit anginerusut sulisuminnut inissiat namminneq akilersortassagaat, taamaattumik naliliiffigisariaqarpoq Namminersornerullu­tik Oqartussanut pitsaanerussannginnersoq sulisuminnut inissianik amerlassusii aalajangersima­sunik namminneq santitsippata.

 

Taama oqaaseqarlunga inassutigissavara, peqqussutissatut siunnersuut aappassaaneerneqanngin­nermini ineqarnermut ataatsimiititaliamut oqaluuserisassanngortinneqassasoq.

 

Anthon Frederiksen, Kattusseqatigiit:

Upernaakkut 1997-imi Inatsisartut ataatsimiinnitsinni, inuussutissarsiummut atasumik inissialior­titernerup inissianillu ingerlatsinerup, akileraartarnermi nalikilliliisarnerit pillugit malittarisassa­nut ilaatinneqalernissaannik, Inatsisartut aalajangernissaannut siunnersuutip, saqqummiunneqar­nerani Kattusseqatigiinniit oqaaseqaatikka innersuussutigalugit, inissianik attartorneq pillugu Inatsisartut peqqussutaata allanngortinneqarnissaanut siunnersuummut imatut oqaaseqaateqas­saanga:

 

Siullermik oqaatigissavara siunnersuut tunngaviatigut tapersersorakku, tassami nunatsinni inissaaleqinerup sapinngisamik piaartumik qaangerniarnissaa pisariaqarmat. Aammalu peqqussu­tip allangortinneqarneratigut namminersortut nammineerlutik, sulisuminnut attartortittakkanik inissialiornissaannut periarfissinneqassammata.

 

Kisianni soorunami inissaaleqinermik ajornartorsiutip qaangerniarnerani, qaanngiiniarnerinnaq kisimi isigineqartariaqanngilaq, tamanulli ajunnginerpaamik angusaqarnissaq aamma eqqaama­sariaqarluni.

 

Tassami ajoraluartumik suulluunniit iliuutsit, aamma ajunngitsumik siunertaqarluni iliuutsit, amerlanertigut akiligassamik malitseqartarmata, taamaattumik Inatsisartut upernaaq ataatsimiin­nitsinni inassutigaara, taamanikkut oqaluuserisap, ullumikkut oqaluuserisatsinnut ilaatigut tunngaviliisup, aningaasatigut qanoq sunniuteqarsinaanera Akileraartarnermut Ataatsimiititalia­mi nalilersuiffigineqassasoq, kisiannili tamanna pisimanngilaq.

 

Tassami siunnersuut kommuninut ataasiakkaanut akileraarutitigut isertittakkatigut annaasaqar­nermik kinguneqartussaavoq, ilanngaatigineqartartussat landsakarsimit matussuserneqartassann­gippata, taamaattumik taassuma tungaata iluarsineqarnissaa aamma pingaaruteqarpoq, qaangiin­nartariaqanngitsoq.

 

Inatsisartunimi aalajangiisarnerpassuit inatsisiliornikkut, peqqussusiornikkullu imaluunniit Naalakkersuisut nalunaarusiornermikkut puigorluinnartarpaat, imaluunniit puigortarparput aalajangiisarnerit kommuninut aningaasatigut qanoq sunniuteqarsinaanersut.

 

Peqqussummi allanngortitsiniarnermi siunertat ajunngeqaat isumaqatiginarlutillu, aammalu siunissami tamanut iluaqutaasumik ajunngitsumillu kinguneqassappata, aningaasatigut sunniutis­sai piareersimaffigineqartariaqarput.

 

Aammalu qulakkeertariaqarpoq aaqqissuussinerup atuisunut sunniuteqapilunnginnissaa, taamaat­tumik pisariaqarpoq landskarsi akileraarutitigut ilanngaatissanut nalikilliliinerit matussutissaan­nut qanoq piareersimatiginera, aammalu aningaasat tamakkununnga atugassat qanoq amerlatigi­nersut inuiaqatigiinnut paasissutissiissutigissallugit!

 

Suleqatigiissitap naliniinera naapertussagaanni inuussutissarsiutissatut inissialiortiterneq aatsaat atorneqarniarsinnaavoq, minnerpaamik aningaasat 75%-ii taarsigassarsiarineqarsinnaappata piffissami sivisuumi akilersugassatut, taamaattumik Naalakkersuisunut inassutigisariaqarpoq, aningaasanik erniakitsunik nunatta avataanit taarsigassarsiniartaleqqissinnaanerup ammaassivigi­neqaqqinnissaa suliniutigeqqullugu.                                                                                                              

 

Tassami inissaaleqineq anigorneqassappat periarfissat sapinngisamik amerlanerpaat atorniartaria­qarput, soorunalimi aningaasatigut qanoq sunniuteqarsinnaaneri puigornagit, minnerunngitsumik atuisunut.

 

Assersuutigisinnaavarpummi ukiualuit matuma siornatigut Real-Kredit, Ny-Kredit-ilu assigis­saallu atorlugit illuliortiterneq ingerlanneqarsimavoq, ilaatigut ajunngitsumik kinguneqartumik, kisiannili aamma nuannersuinnaanngitsunik kinguneqartumik, tassa akilersuutit ilaatigut ilaqutariinnut artornarluinnartut atorntinneqarmata, taammaattumik Inatsisartuni peqqussusior­nermi malitsissai, kingunerisinnaasaalu ilanngullugit isiginiartariaqarput, soorunami ajortuinnaat isigineqassanngillat, kisianni sillimasoqartariaqarpoq.

 

Ineqarnermut akiliutip attatortumit piginnittumillu isumaqatigiissuteqarfigineqartarnerat pisorta­nit susassarineqarpalaanngitsutut oqaatigineqarsinnaagaluartoq, taamaattoq inissaaleqisut illersorneqarnisaat eqqarsaatigalugu ineqarnermut akiliutit qaffasinnerpaaffilerneqarsinnaanerat eqqarsaatigalugu Ineqarnermut Ataatsimiititaliami oqaluuserineqarnissaa kaammattuutigissavara, tassami ullumikkut tusartakkavut naapertorlugit ilaatigut ineeqqat qaammammut tusinde-nik arlalinnik akilersillugit attatortinneqartarneri akuersaaginnarneqarsinnaanngillat, min­nerunngit­sumik inissiani pisortat akileeqataaffigisimasaanni atuutinneqartarsimappata.

 

Ineqarnermut akiliutinut ilanngaatigineqarsinnaasunut tunngatillugu soqutigineqarpoq paasissal­lugu:

Aappariit boligstøtte aqqutigalugu illutaarsimasut - avinnerup kingorna - aappaasup meeqqanillu tigumianngitsup, taamaakkaluartorli meeqqanut akilersuutinik tigumiaqartup, meeqqanut tapiissutit ilaannilluunniit pisinnaatitaanera qanoq periarfissaqartigaa? Tassami avinnerup kingorna angutip, arnalluunniit arlariinnik meeraqarsimagunik, boligstøtte aqqutigalugu illullip, meeqqanilli tiguminninngitsup, kisiannili meeqqanut akilersuisup, aammalu meeqqat illumi najugaqarunnaarnerat pissutigalugu, meeqqat tapii atorunnaarsinneqarnerat peqqutaallutik, akilersugaasa ukiup affaanut tusind-inik arlalinnik qaffanneqarnerinik kinguneqarsinnaasartut, soorunami meeqqat qassiuneri apeqqutaalluni, qanoq iliuuseqarfigineqartarneri paasissallugit soqutigineqarput.

 

Eqqartuussisarnermi inatsisit aammalu danskit naalagaaffianni tunngaviusumik inatsisit tunnga­vigalugit, innuttaasut kikkulluunniit eqqartuussivimmut suliakkiisinnaanerat killilersorneqanngi­laq, taammaattumik ' 11, imm. 2,3,4, aamma 5 isumaqatiginngilakka, taakkualu atorun­naarsin­neqarnissaat matumuuna allannguutissatut siunnersuutigaara, makku pissutigalugit:

 

1.           Inissianik attatornermut akiliutit qaffatsaalinissaannut anguniakkanut akerliummat.

1.                                                  Naalakkersuisut Sulinermillu Inuussutissarsiuteqartut Kattuffiata isumaqatigiissutaan­nut, tassalu ineqarnermut il.il. akiliutit qaffatsaatineqarnissaannut akerliummat.

 

2.                                                  Aammalu eqqartuussiviup aalajangertariaqanngimmagu, ineqarnermut ilaqutariit sorliit qanoq akiliuteqartigineqartassanersut.

 

Tassami '-i qulaani pineqartoq immikkoortuilu ilanngullugit atortussanngortinneqassappata, ineqartut qanorluunniit piumanngitsigigaluarpata, qaammatinik pingasunnik sioqqutsilluni nalunaarfigeriarlugit, ineqarnermut akiliut qanorluunniit iliorneqarsinnaalissaaq, piumagaannilu ukiut tamaasa qaffaqattaarneqarsinnaalissaaq, inigisanik iluarsaassinissaq patsisiliullugu.

 

Taammaattumik ' 11, imm. 2,3,4 aamma 5-ip akuerineqarnissaannut akerliullunga taasissaanga.

 

Aamma eqqaamasariaqarpoq, inuit kikkulluunniit pisinnaatitaaffiinut ilaareermata, inuit nammi­neerlutik eqqartuussivik akulerutinngikkaluarlugu isumaqatigiissusiorsinnaanerat.

 

Eqqartuussiviummi suliassai naammareerput, ilaatigullu pillaammik akiliisitsissutissat, suliassa­miit suliassamut tamatigut assigiinneq ajorput, pillaammik akiliisitsissutisssap annertussusiler­nissai aalajangertarlugit, taamaattumik naleqqutinngilaq inuit nalinginnaasumik saqitsaassutaat taakkunatut aalajangiiffigineqartalissappata.

 

Aammalu ilisimasariaqarpoq isumaqatigiissut illua-tungeriinnit atsiorneqarsimasoq, eqqartuussi­sut aalajangerneratulli atuutsinneqarsinnaammat.

 

Tassami peqqussutit allanngortinnerisigut atuisut attatortullu atugaasa ajorseriannginnissaat soqugisariaqarpoq.

 

Taamatut oqaaseqarlunga peqqussutissatut siunersuutip aappassaaneerneqannginnermini Inatsisartut Ineqarnermut Ataatsimiititaliaanni oqaluuserisassangortinneqarnera ilalerpara.

 

Daniel Skifte, Aningaasaqarnermut Ineqarnermullu Naalakkersuisoq:

Siullermik partiit oqaaseqartuinut tamanut qujanaq.

 

Siunnersuut ullumikkut qaffatsinneqartoq ataatsimut oqaatigissagaanni tamanit isumaqatigine­qarmat nuannaarutigaara. Kisiannili partiit ataasiakkaat oqariartuutaat aammalu eqqartugaat erngiinnannguaq uterfigissavakka. Naliliisinnaanerali naapertorlugu paasivara siunnersuut tamanit isumaqatigineqartoq, aammalu Ineqarnermut Ataatsimiitaliami ingerlateqqinneqassallu­ni.

 

Siumup oqaaseqartuanut oqassaanga, nuannaarutigalugu siunnersuut Siumup tamakkiisumik isumaqatigimmagu taperserlugulu. Aammali oqariartuutigaat, soorlu partiit Siumup, Atassutip Inuit Ataqatigiillu, siunnersuutip iluanaarniutiginiapilunneqarnissaa mianersuutigineqartariaqar­toq. Isumaqarpungalu tamanna nakkutigeqqissaarneqartariaqartoq, Ineqarnermullu Naalakkersui­soqarfimmi tamanna naammassineqarsinnaasoq.

 

Taamaattumik aamma ajunngilaq Siumup piumasarimmagu qanoq Naalakkersuisut erseqqin­nerusumik iliuuseqarnissaminnut uunga qaffatsinneqartumut najoqqutassaanullu tusaaniarnissaat. Aamma qujanarpoq Siumup oqaatigimmagu Naalakkersuisut aalajangersimarpalunnerusumik ukiuni kingullerni pissuserisaat, tassa kvadrat-meter-imut inissiat akiisa qaffasippallaarnerat appartikkiartuaarnissaat piumasarimmassuk.

 

Aamma oqariartuutigineqartoq Nuummi pissutsit misissorluarnissaat Siumumiit piumasarineqar­mat, isumaqarpunga ajornartorsiutaanngitsoq sukkasuumillu naammassineqarsinnaassoq. Neri­orsuutigissavaralu tamanna piumasarineqartoq piffissaq sivisunngitsoq atorlugu, nalunaarusior­nikkut, pingaartumik sulisut inaannut tunngasoq maani Nuummi, boligudvalg-imut assersuutiga­lugulu finansudvalg-imut sukkasuumik suliassaq tunniutissagipput, taamaalilluni suliassaq ajunngitsumik kinguneqartumik suliarineqarsinnaammat.

 

Atassutip siunnersuut tunngaviatigut isumaqatigimmagu aamma nuannerpoq, aammalu suleriaq­qinnissamut aallaaviussalluni.

 

Immikkut oqaaseqarfigerusuppara Kattusseqatigiit saqqummiussaat. Ilisimaneqartutut ukiaq Inatsisartut ataatsimiinnitsinni pkt. 18-itut eqqartorneqartussaavoq boligstøtte pillugu nassuiaat. Taamaattumik matumuuna taanna anginerusumik oqaaseqarfigissanngilara naak ussernartorsior­naraluartoq. Nassuiaat maanna suliarineqareerpoq ilaasortanullu sapaatip akunnerini aggersuni agguaanneqartussaassalluni. Taanna aallaavigalugu ilimasaarutigaara apeqqutit assigiinngitsut nassuiaammi akineqarumaartut.

 

Qularnaatsorli uaniippoq, tassa Atassutip saqqummiunneqartoq tamaat isumaqatigaa.

 

Inuit Ataqatigiit aamma peqqussutissatut siunnersuut tunngaviatigut isumaqatigigaat paasivara. Uggorisaalli tassaavoq erseqqinnerusumik Naalakkersuisut paasissutissanik nalunaaruteqarsin­naasarsimannginnerat, tassani eqqarsaatigineqarlutik suleqatigiissitaliami ingerlatsineq. Paasissu­tissatullu una oqaatigissavara; suleqatigiissitaliaq immikkoortortaqarfiit aningaasaqarnermut tunngasut, pilersaarusiornermut tunngasut, ineqarnermut tunngasut aammalu kukkunersiuisoqar­nermut tunngasut suliaat annertusimavoq -  maannakkut taamatut oqartarput, taanna tunngaviga­lugu qaffatsinneqartoq. Maluginiarpara aamma Inuit Ataqatigiit qularnaatsumik siunnersuutip uuma atornerlunneqannginnissaa kissaatigigaat taanna akuersaassavarput malittareqqissaarnias­sallugulu, taavalu kisianni iluatungaasigut IA soorlulusooq qularpasinnerulaalersoq kingusineru­sukkut ilaatigut immaqa akigititat qaffariataarujussuarnissaanik ilimasunneq tunngavigalugu.

 

Erseqqissaqqissavara uani nassuiaammi aallaavigineqarmat kvadratmeter-imut 12.500 kr. maani akigitinneqartoq aallaavigalugu, taamaattumillu taamatut akeqartuuppat kvadratmeter-imut inissialiorneq, taava atuisartunut sunniutissaa annikinnerujussuussaaq imaluunniit akikinnerus­saaq ullumikkut sanaartukkarnit, 13 imaluunniit 14.000-ninngarnit akeqartuuppat. Taamaattumik taanna qulaarneq isumaqarpunga imatut akissallugu paasilluarpara Larsi, kisiannili nakkutigeq­qissaarneratigut atornerlunneqannginnissaa partiinit tamarmiusunit isumaqatigineqartoq aallaavi­galugu tunngavissiornissaa ilimanarpoq ajussanngitsoq.

 

Kommunit akiliunneqarmata aammalu soorlu taanna Katusseqartigiinniit taaneqartoq oqaatigis­savara namminersortut akiliisinnaajunnaarunik namminneq akisussaaffigissavaat, kommunimit aningaasanik akiliisinnaajunnaarnertik peqqutigalugu aallersinnaangillat imaluunniit Namminer­sornerusunngaaniit. Apeqqummut erseqqissumut aamma oqaaseqassaanga, tassani apeqqutigine­qarmat ineqartut kattuffiat tusarniarneqarsimanersoq, naagga, ineqartut kattuffiat tassaavoq ulluinnarni inissiarsuarnik kommuunip imaluunniit Namminersornerullutik Oqartussat pigisaan­nik aqutsisunik sinniisoqarfiusoq. Unalu namminersortunut tunngammat, taakkua akuliunneqar­simanngillat, taamatut erseqqissumik oqaatigissavara.

 

Aamma apeqqutigineqarpoq attartortut pigisatit angigigunikkit mikinerusumik taarserniarsinnaa­neraat? Aap, taamaappoq, ullumikkut malittarisassat malillugit eqqaamanerlunngikkukku 1995-imili taamatut aalajangiisoqarnikuuvoq aammalu taamatut periarfissaq ullumikkut atorneqarluni. Kisianni tassani Inuit Ataqatigiit qaffatsitaat, isumaqarpunga suli anginerusumik oqallisigineqar­tariaqartoq, taamaalilluni inuit ilisimaneruniassammassuk, naluneqanngimmammi inissiarsuit ilaanni allaat init arlalissuit atugaritiinnarneqartartut, soorlu meeqqat inuusuttunngorlutik allamut nuukkaangata mikinerusumik ineqaleratik tassaniiginnartarmata.

 

Taan­na apeqqut taamaattumik nuannaarutigaara Inuit Ataqatigiit qaffatsimmassuk, nakkutigine­qarnera taassuma paasissutiginiarneqarneralu anginerusariaqarsorinarput, kisianni inatsisigut najoqqutassatigullu Inatsisartunik tunngavineqarnikuuvugut taamaaliorsinnaatitaanitsinnut. Taamatut oqarnikkut eqqarsaatigaara soorluli bsu-imut boligstøtte-mut tunngasumik nassuiaate­qarninni ersersinneqartussaasoq kisitsisinngorlugit ullumikkut Namminersornerullutik Oqartus­sat inissiarsuaataat 7.850 missaanniipput, illuaatungaatigulli kommuunit inissiarsuuaataat 3.800 missaanillutik. Tassa katikkaanni 11.650 missaanniipput, taakkua illuatungaaniipput nunatsin­niittut illut privat-imik pigineqartut ikittuaraarassuit. Akulliit Partiata aamma tapersiinera qujassutigaara, maleruagassallu eqqartorneqartut aamma taperseqqimmagit ukioq jannuari aallaqqaataaninngaanniik qaffattussat atulersussat taakkua naatsumik taakkua quassutigaakka.

 

Aamma taamaappoq kattusseqatigiit tunngaviatigut aamma tapersiimmata Kattusseqatigiit taasaqarput arlalissuarnik ilai immaqa paatsualaanermik tunuliaqutaqarsinnaasut tassani aat­saannguaq oqarnittuut taamatut nutaamik aaqissuussiniarneq kommuninut nanertuu­taannginnis­saa ilimagisariaqassavarput kommunit illuliuutissanngillat imaluunniit namminersornerusut, kisianili assersuutigalugu aningaaseriviit imaluunniit privatit sulisuminnut inissialiortitsinnaap­put, taavalu tassani piumasarineqartut aallavigalugit taamatut iliurunik taava attartortut atortitsi­sullu akornanni isumaqatigiinniartoqassalluni.

 

Taamaattumik nalikilliliinerit Katusseqatigiit eqqartugaat taakkua nalikilliliinerit tassaasussaap­put qallunaatut taaneqartartut afskrivninger, tassaasussaapput sanasitsisup iluanaarniarnermini akileraarutit aallaavigalugit ilanngaassutigisinnaasai, taamaattumik taassuma tungaa aamma suleqatigiissitanik nalilersorneqarsimavoq, taamaattumillu tupinnanngitsumik 75 %-iti attartor­sinnaagaanni namminerlu 25 %-itit akilerlugu, tassa taanna kingulleq procent-i taasara tassaas­saaq taassuminnga aningaasaliinermini isertitsissutiginiagassaasa ilaat. Oqareernittuut boligstøtte pillugu nassuiaat qaffatsinneqartussaammat taanna annerusumik eqqartornagu ineqarnermut ataatsimiitsitaliami eqqartorneqarnissaa innersuussutigissavara. Aap, kisiannili aamma aatsaann­guaq oqarnertut Katusseqatigiit immaqa patsualaarnermik tunngaveqartumik eqqartuineri assigiinngitsunik ataasiakkaarlugit uteqattaarfiginngikaluarlugit ilaatigut oqaatigineqarmat ineeqqat qaammammut tusind-inik arlalinnik akilersillugit attartortinneqartartut, oqassaangaa aatsaannguaq oqarnittuut nunatsinni inissiat amerlanerpaartaat kommunit Namminersornerullu­tillu Oqartussat aqutaraat.

 

Ikittuararsuit privat-iupput, taamaattumik taassuma tungaa uagut qanoq iliuriarsinnaanngilarput, unali peqqussut atulissappat malittareqqissaanissaa apeqqutip kommunimmi naak partimik kissaatigimmassuk, aallaaviginiassallutigu. Aamma taamaappoq assersuutigineqartoq boligstøtte aqqutigalugu illutaarsimasut, tassani meeqqat qassit inissiami najugaqarnersut immaqalu ilaqutaqarnerup tungaatigut avissaartoqarsimappat, tamakkua kingunissai maannakkut annertu­nerusumik pulaffigissanngilakka, kisiannili nalilersortinnissai tulluartuutillugit ineqarnermut ataatsimiitsitaliami. Aamma taamatut oqassaanga isumaqatiginngisai Anthon Frederiksen-ip assigiinngitsut, soorlu immikkoortortat pingasut taaneqartut taakkua maannangaaq oqaaseqarfigi­nagit ineqarnermi ataatsimiitsitaliami suliareqqinneqarnissaat kissaatiginarpoq.

Taamatut maannakkuugallartoq partit oqaaseqartuinut oqaaseqarpunga.

 

Malinannguaq M. Mølgaard, Inuit Ataqatigiit oqaaseqartuat:

Ilaatigununa apeqquteqaqqilaarusullunga, tassa uani apeqqummi taamatut upernaaq Inatsisartuni Ilaasortaq Anders Nielsson siunnersuuteqarnerani periarfissanik ammaassinissaq eqqartorneqar­simavoq aammalu tapersersorneqarluni. Taava inatsimmi allannguutissatut siunnersuummi apeqqutigirusuppara taamatut inigisamut attartortisup qaffasinnerpaaffissamik aalajangiisarnerata atorunnaarsinneqarnissaa, imaluunniit inigisap akigisaata qaffasinnerpaaffissaanik aalajangersak­kap atorunnaarsinneqarnissa sumik tunngaveqarnersoq.

 

Sooruna taanna qulakkeerinnersimagaluarneq atorunnaarsinniarneqartoq matumani? Tassami uani maluginiarakku partiit tamarmik, annerit tamarmik, Siumut, Atassut aammalu tungitsin­ninngaanniik uparuaraat taamatut iluanaarniartoqarsinnaanera arleqqutigalugu aamma akit qaffasippallaannginnissaat aammalu qaffappallannginnissaat qeqqumaffigeqqullugu kaammat­tuutigigaat. Tassanili partiinut apeqqutigirusuppara taamatut inatsisip allanngortinneqarnissaata tapersersorneraat imaluunniit tapersersunnginneraat?

 

Tassa imaappoq taassumap killigititap atorunnaarsinneqarnissaa uani erfattutut ikkami, oqarto­qaraluarpoq qaffasippallaanngitsumik, imaluunniit taanna nakkutigineqartariatoq, taava kisianni qanoq nakkutigineqassava? Inatsit taanna atuuttinneqassava imaluunniit atorunnaartinneqassava? Taava taanna attartortitsisup qanorluunniit qaffasitsigisumik akeqartitsilluni attartortitsisalernis­saa erseqqissumik tapersersorneqarnersoq assut paaserusunnarpoq.

 

Taavalu Naalakkersuisumut apeqqutigerusullugu oqaravit nakkutigineqartumik aamma ingerlan­neqarnissaa taanna nammineq orniginartillugu, qanoq ilulluni taamak nakkutigineqartumik ingerlanneqassava, uani naalakkesuisup innersuussutaani eqqartuussisut nakkutiginnittutullusooq aaqqiisartussatut innersussutigineqarmata.

 

Jakob Sivertsen, Atassut-ip oqaaseqartua:

Naatsunnguamik ineqarnermut naalakkersuisoq oqalunnguatsialuni Atassut periarlugu ingerla­tiinnaq Katusseqatigiinnut eqaartoorami, taavalu tassani paasineqarsinnaannginnami kina oqaasii akissuteqarfiginerai. Tamatigut annertunerpaamik Katusseqatigiinni oqaatsit taakkua anngukka­migit Atassut-ip oqaaseqartuanut ilanngullugit. Taakku naqqiissuteqarfiginiarpakka. Uagut inatsississamut siunnersuut ataasiakkaatigut apeqquserlugit pingaartumik taanna partit tamarmik eqqartugaat, akit qaffasinnerpaaffissaata atorunnaarneratigut inatsisartuninngaanniit inatsit atorunnaarmat taava kiap nakkutigissavaa? Taannaana uparuaripput atorunnaartitsinerup kingornatigut malinnaaffigiluarneqartariaqarpoq, ullumikkut ineqartut ilai allatut atornartumik anisinneqartarput, taamak pisoqartillugu atorunnaartitsineq atornerlunneqannginnissaa Atassum­minngaannik pingaartipparput.

 

Kiisalu aamma periarfissat ilaattut eqqaasimasarput, tassa bsu-imi illuutillik, taakkua aserfallat­saaliinissaminnut namminneq atorniasinnaanissamut periarfissinneqarsinnaannginnersut. Taamatut saqqummiussaqarnitsinnut peqqutigaarput bsu ukiut 15-it 20-it matuma siornatigut sananeqarsimasut iluatungaa qaavaluunniit iluasaanneqaruni, kukkussanngikkuma, 300 %-imik akisunerussaaq. Taamaalilluni takornartaanngilaq nunatsinni sumiluunniit bsu-mik illuliarparu­jussuit igalaavi matooraannakkat, tassa imaappoq atorsinnaasuugaluit kisianni ineqartut iluar­saanneqarpat iluarsaannera akissaqartinnginnamikku qimaannartarpaat.

 

Aammalu nalunngilarput bsu-mik illuat qimanneqartut tuniniarneqarunik akissallit pisiarigunik­ku iluarsaatissavaat kusanartunngorlugit, taakkulu taamannak akilersillugit atortittarlugit attartortittarlugit inissaaleqisunut, taamaattumik isumaqarpunga una saqqummiussarput aappaati­gut soqutiginarsinnaasoq, ullumikkut periarfissaareersut saniatigut periarfissatut pitsaasutut isumaqarfigigatsigu.

 

Anders Nielsson, Atassut-ip oqaaseqartua:

Oqaatigilaaginnarniarpara taanna maani eqqartugarput tassaavoq Inatsisartut peqqussutaat tassa allanngortinnerat, tassa ineqarnermut akiliutit allanngortinnerat, taanna tunuliaqutaajuna pujunn­guatsiratsigu, taakkua aalajangersakkat allanngortinnagit taava maakkut index-i atorneqartoq København-ip Fondbørs-ianinngaanersoq aallavigineqarpoq tassani, taannalu index-i atorunnaar­sereerneqarnikuuvoq, tassa ineqarnermut akiliut aalajangersartarparput index-i atorunnaareersi­masoq København-imiinikuusimasoq aallaavigalugu, taannaana qaangerniarlugu maannakkut aalajangiiniarsarisugut. Taamaaliornikkut maanna peqqussut piviusunik tunngavilersorniarpar­put, tassa taannaana erseqqissaatigilaaginnarniariga.

 

Daniel Skifte, Aningaasaqarnermut Ineqarnermullu Naalakkersuisoq:

Siullermik Malinannguaq M. Mølgaard apeqqutisaa akissutigeqarfiagiassavara. Tassa una partiinit tamanit allanit mianersoqqussutaasoq nakkutigeqqissaarneqarnissaa aammalu akit qaffasippallaalersuunnginnissaat siunnerfigalugu inatsisit allanngortinneqassanersut aammalu qanoq nakkutigineqassanersoq, taanna imatut oqaatigissavara inissialiornermi inatsit nammineq taamatut isikkumigut allanngussanngilaq, kisiannili ammaassilluni aamma sulisitsisunik asser­suutigalugu Royal Arctic Line-p Namminersornerullutik Oqartussat suliffissuaqarfiat imaluunniit alla kinaanersoq inissialiorsinnaalersillugu, siornatigut taamaalliorsinnaanngikkaluaramik, maannakkut inissaaleqinerujussuaq ilaatigut aallaavigalugu periarfissiiniartoqarpoq, assersuuti­galugu suliffissuaqarfiit ilaat inuit inissiat atugassaannik tigusisarmata, tassa kommunit Nammi­nersornerullutik Oqartussat inissiaataannik tigusisarmata, taamatut inatsiseqannginneq niuerpa­laartumik sulilluni aallaaveqarneq tunngavigalugu nalikilliliisinnaanermut periarfissaq inatsisi­liinngimmat.

 

Taamaattumik ammaanniarneqarpoq, taannalu kissaatigisaat partiit ataasiakkaat qanoq nakkutigi­nissaa neriorsuutigaara naalakkersuisut sinnerlugit tassumap nakkutigeqqissaarneqarnissaa akitsusoqannginnissaa aammalu iluanaarniarpiluutigineqannginninnissaa, taanna naalakkersuisu­niit partinit oqariartuutigineqartoq malinnaaffigeqqissaartariaqassavarput. Oqalunninni aallaq­qaammut oqarpunga maannakkut taamatut nalilersuinermi aallaavigineqarsimavoq kvadratmeter-imut akeq ullumikkut unammerluarsinnaasorineqartoq, tassasoq maani Nuummi 12.500 kruuni­lik. Sanaartugassat assersuutigalugu 15.000-ippata kruuneqarpat kvadratmeter-imut, taava taanna ajussaaq.

 

Tamatigulli attartortitsiniarnermi attartortitsisoq attartortorlu taakkua tassa aalajangiisuussapput naleqquttumik qanoq akeqarnissamik. Tassuma tungaa maannakkut periarfissinniarneqarpoq isumaqatigiinngitsoqassappallu namminersornerusut imaluunniit kommunit tassani akuliutis­sanngillat, isumaqatigiinngittoqassaguni taava allatulli pitsaangitsumik pineqartoq eqqartuussisut atorlugit suliassanngortitsisoqarsinnaavoq, imaluunniit akiliinngitsoqattaalerpat attartortoq taava anitsitinermik kinguneqassaaq.

 

Tassa allaassutaa uagut anisitsiniartarnerput kommunini namminersornerusunilu allaanerusus­saassaaq uani maakkut una akuersissutigineqassappat uani siunnerfimmi. Atassut-ip oqaluttuani Jakob Sivertsen-imut soorunami utoqqatsissaanga oqalunnerma ilaani imatut nipeqarsimassagu­ma Atassut taagaluaannariarlugu Katusseqatigiinnut nuussimavunga, taanna Atassut-mut utoqqatsisutigissavara, soorunami inatsisit ullumikkut atuuttut aturunnaarsinneqassanngillat, kisianni inatsisit ullumikkut periarfissaat ammaassineruvoq, periarfissamik nutaamik ammaassil­luni, taamaalilluni inissaaleqineq nunatsinni annertoqisoq aamma millisaaffigeqartaaniassammat.

 

Oqaatigeqqissavara kisianni bsu pillugu iluarsiinissamut, bsu pillugu nassuiaat taanna suli maannakkut agguaanneqanngitsoq, tassani erseqqissaaq tassanilu oqalusissiarineqarpoq assi­giinngitsut soorlu maannakkut Atassut oqaluttuata oqaatigisai iluarsaanissamut atorniarsinnaa­nersut eqqaaneqarmata, taanna innersuussutigissavara piffissamut eqqortumut qaffatsinneqaqqul­lugu. Uani qulequtarput allaanerummat aammalu inatsisartut nalunaarutaareermat nassuiaatissat bsu pillugu upernaarli ataatsimiinnermi ilimasaarutigineqarmat, maannakkulu oqaatigissagakku piviusunngortussaammat, taamaattumik taanna uteqattaarnianngilara.

 

Anthon Frederiksen, Kattusseqatigiit:

Isumaqarpunga Inatsisartuni ilaasortat amerlanerit isumaqartut ullumikkut ineqarnermi attartor­titsisarnermi akiliutigineqartartut qaffannginneqarnis­saat eqqumaffigilluartariaqartoq aammalu tamanna taamaappoq. Tassa asser­suutigeriarutsigu massakkut peqqussummik allanngortitsiniar­neq iusinneru­sukkulli taakkua saqqummiussininni taasakka ' 11-joqqooqaaq immikkoortut atuutereersimasuuppata taava tamatta eqqaamalluinnarparput INI A/S ineqar­nermut akiliutinik qaffatsitsinialeraluallarmat, una peqqussut taamanikkul­li atuutilereersimagaluarpat INI A/S ajornanngeqqinnaamik ineqarnermut aki­liutit qaffassimassagaluarpai.

 

Massakkut aamma tassa una peqqussut akuerineqassagaluarpat aqqutissiunne­qartussaavoq periarfissaq taanna. Taannaana pillugu sulinermik inuutissar­siuteqartut Naalakkersuisullu akornanni isumaqatigiissutaat tunngavigalugu ineqarnermi akiliutit qaffatsaaliorneqarnissaat pillugu taakkua '-imi taa­gorneqartut peerneqarnissaat eqqaagiga.

 

Aammalu sooq nunatsinni oqartussaasut qullerpaat, tassa Inatsisartut suli­assat eqqartuussivim­mut tunniutissavaat? Una aalajangilaarsiuk ineqarnermut qanoq akiliisariaqartoq, uagut-una aalajangigassarput maani? Imaluunniit uagut peqqussusiornitsigut eqqartuussivimmut suliakkii­sariaqanngilagut, una aalajangilaarisiuk, ineqarnermut qanoq akiliumaarpugut, taava ilissi aala­jangersaanisi naapertorlugit ineqarnermut akiliutit aalajangersarneqartaru­maarput. Isumaqarpun­ga tamakku tulluanngitsut.

 

Aamma ineqarnermut Naalakkersuisup nuannarilluinnartagaasa ilagisarpaat, saqqummiussigaan­gama suliassami pineqartumi paatsoorsimanerartarlunga. A­junngilaq, aamma nammineq isumani isumagisariaqarpaa.

 

Aammalu uani eqqartukkakka nalikilliliisarnermut tunngasut upernaat Inatsi­sartuni ataatsimiin­nitsinni akuersissutigivagut, namminersortunik periar­fissiisussaammata aamma. Aamma eqqaamaneqassooq taamanikkut oqaaseqaatinni ilanngullugu eqqaasima­vara nunaqarfimmiut ineqarnermut tunngasut nammineer­lutik illuliorsimasut ajornartorsiutigisarmassuk illumik suliarineqarnis­saannut oqilisaaffigineqarnissartik ujartorlugu.

 

Taamaattumik aamma taakkununnga taanna nalikilliliisinnaaneq atortussann­gortinneqarnissaa ilanngullugu siunnersuutigisimagaluarpara oqaaseqarninni. Kisianni tamanna anguneqanngilaq.

 

Taakkua nalikilliliinerit eqqarsaatigilluaraanni naggaterpiaatigut aki­leraarutini nalikilliliinerni, tassaapput kommune-t pineqartut akiligassai, nalikilliliinerit taakku. Taamaattumik paatsoorner­mik taassuma tungaatigut oqartoqarnera utertit­tariaqarpoq.

 

Akileraarutitigut ukiut tamaasa immersuisarput soorunami namminersorluti­k ingerlatsisut aamma taakkunanilu ilanngaatissatut aningaasat akileraaruti­tigut ilanngaassutigisinnaasaat kommunet annaasaqaatigisarpai. Taakkuuku pillugit oqartunga, taakkua landskasse-minngaanniit matussuserneqassanngip­pata taava kommunet tassuunakkut annaasaqartussaapput.

 

Pappiaratigut aaqqissuussinerit annaasaqassanngitsutut isikkoqartaraluar­put, kisianni oqaaseqar­nerma ilaatigut oqarpunga, suulluunniit iliuutsit amerlanertigut tamatigut regning-imik akiligas­samik nassataqartarpoq aamma  uani taamaattussaavoq. Pinngitsooratik kommunet akileraarutiti­gut misigi­laartussaavaat ilaasa, pingaartumik immaqa Nuup kommuneata.

 

Ineqarnermut Naalakkersuisoq soorunami ilumoorpoq inissiat illullu amerla­nerpaat Namminer­sornerullutik Oqartussanit pigineqarput aammalu taakkunann­ga kommunenit immaqa pingajorar­terutaat pigineqarlutik. Kisianni takornar­taanngeqaaq ullumikkut, arajutsisimanngitsuusaaginnar­sinnaanngilarput, ine­eqqat assigiinngitsut, namminersortunik pigineqalereersimasut, init attar­tortinneqartartut tusind koruuninik arlalinnik akilerlugit qaammammut, t­aanna miserratissaanngi­laq. Taamaattumik tamakkuupput aamma eqqumaffigine­qartariaqartut.

 

Inigisap qaffatsaaliorneqarnissaanut sillimasariaqarpugut. Ilumoorpoq aamma tas­sani Inuit Ataqatigiinninngaanneersoq Maliinannguaq oqarmat, taannaana qanoq ililluni piniartoq? Isumaqarpunga uumap peqqussutissatut siunnersuu­tip allanngortinneqarnerani taakku '-it, ' 11-oqqooqaaq immikkoortut pine­qartut tassaapput ilaatigut qaffaanissamut aqqutissiuisussat, taakkuuppullu isumaqarpunga peerneqartariaqartut.

 

Daniel Skifte, Aningaasaqarnermut Ineqarnermullu Naalakkersuisoq:

Uani eqqartorneqartumut oqaluttumut atatillugu oqaaseqarfigeriissavara, tas­saavoq ininut akit oqaatigineqarmata Inatsisartut tamarmik isumaqatigi­saat. Tassa taamaappoq, tamanna qujanar­poq. Suliassaq aallartinneqarpoq Siumut-mi Atassut-milu. Siumukkut Atassutikkullu naalakkersuisooqatigii­lera­mik 1995-imi siunnerfigaat taassuma qaffatsaaliornissaa. Taanna sulias­saq Inatsisartunit tamanit isumaqatigineqarmat tamanna nuannaarutissaavoq. Aamma nuannaarutigaara taasumunnga isumaqataammata. Tassami SIK taamanikkut isumaqatigiiffigine­qarpoq Siumukkunnit Atassutik­kunnillu. Taamaattumik ta­manna isumaqatigiinngissutiginngilar­put isumaqatigiissuti­gaarput, Kattusse­qatigiillu aamma tassani isumaqataapput.

 

Paatsuunganartumik imaluunniit paatsoorsinnaaneranik Anthon Frederiksen oqaa­seqartarsima­nera  tamanna ammasumik utoqqatsissutigissavara, kisianni neriuppunga tamatigorluinnaq taamatut oqassananga. Kisianni qularnaatsumik takusinnaasannik, paatsuunganermik kingune­qartumik saqqummiussisoqarpat, kinaagaluarpalluunniit pisussaavunga pisussaasoralungalu taanna oqaatigis­sallugu.

 

Soorlu taamaappoq aamma, una siunnersuut atulissagaluarpat taava neriuppun­ga kommunet akileraarutitigut annaasaqaannaratik, annaasaqassangatinneqar­mata taanna ima annikitsigisussaa­voq illua´tungaatigut kommunet taamaalior­fiusut inissaaqiffiusut inissaaleqinerat iluaquserneqar­sinnaassappat, taava tamanna iluaqutaangaassalluni. Ullumikkut inissaaleqisorpassuarnik iluar­siiniutit ilaattut ilapittuutitut taanna siunnersuutaammat, pingaartumik illoqarfiit Nuuk, Sisimiut Ilulissallu eqqarsaatigalugit.

 

Aamma erseqqissarusuppara uani oqalunnermi Namminersornerullutik kommunellu inissiarsuaa­taat ullumikkut tassa taanna aallaavigeqqajaallugulusooq oqa­luttoqarmat erseqqissassavara INI-p ullumikkut suliarimmagit kommunet, taa­maallaat sisamat pinnatik, Namminersornerullutillu Oqartussat inissiarsuaa­taat. INI-p suliarinngilai privat-it illuutaat inissiaataat, assersuutiga­lugu taakkununnga ilaapput illualuppassuit nunatsinniittut Realkreditsi pileruttormat illuliarineqarsi­masut.

 

Tamakkua akitsorneqarnissat akikillineqarnissaat uagutsinniinngilaq, nammi­nerisamik illuutaam­mata. Taamaattumik INI akitsuisitsinaveersaarnavianngi­laq tamakkua eqqartukkakka illut aallaavigalugit. Inissiat privatimik pigi­neqartuummata.

 

Maliinannguaq M. Mølgaard, Inuit Ataqatigiit:

Una oqaatigineqartoq aamma Anthon Frederiksenimut tunngatillugu isumaqati­galugu oqaati­gerusuppara, uani inatsimmi ammaanneqarmat taamatut inissiani attartortitsinermi ukiumut ataasiarluni akinik qaffaasinnaanermut periar­fissiuussineq, tassa ukiumut, tassa immaqa ukiul­luunniit tamaasa qaffaaso­qarsinnaalissooq. Taavalu isumaqatiginniarnikkut ingerlatsinermi una am­maanneqassooq, tassa apeqqutaassooq inuup qanoq isumaqatiginninniallaqqis­su­sia. Ini ataaseq isigigaanni immaqa assigiit marluk sanileriit taava o­qaatigineqarsinnaalissaput, immaqa una ini uanngaanniit inimiit akikin­nerussooq naak assigiikkaluarlutik.

 

Tassa tamakkua ammaanneqartussapput uani inatsimmi isumaqatiginninniarsinnaanissaq taamatut eqqunneqarpat. Ta­makkuupput aamma ilaatigut mianersuutassat, taavalu siunnersuutigerusuppar­put attuisunut soorlu kommunet eqqartorneqarput KANUKOKA-ut aappassaaniinn­ginnerani periarfiis­siuullugu tusarniaaffigineqarnissaa. Aammalu oqaatigi­sarput una, ineqarnermut kattuffiit, tassani INI ataaniikkaluartut, kisian­ni misilittagaat toqqammaviga­lugit isumaqarpunga akornutissartaqarnaviann­gitsoq ineqartut aamma misilittagaat toqqammavi­galugu uagut inatsisartu­ninngaanniit atuisartut tusarniaaffigigaluarutsigit. Tassa ineqarnermut kattuffik aamma immaqa atuisartut isumaqarpunga tassani isumaat paasigutsi­gu, paasisatsinnut aamma tunuliaqutatsinnut iluaqutaassasut.

 

Oqaluuserisaq naammassivoq.