Oqaluuserisassani immokkoortoq 31-1 |
|
||
Siullermeerneqarnera | Aappassaanneerneqarnera | Aappassaanneerneqarnerata nanginnera | Pingajussaaneerneqarnera |
Siisamanngorneq 25. september 1997
nal. 13.05
Ataatsimiinnermik aqutsisoq:
Inatsisartut Siulittaasuat Anders Andreassen.
Konrad Steenholdt, Kultereqarnermut
Ilinniartitaanermut Ilageeqarnermullu Naalakkersuisoq:
Naalakkersuisut sinnerlugit
Oqaatsinik Pikkorissarfik pillugu Inatsisartut inatsisissaattut siunnersuut
maanna saqqummiutissavara.
Inatsisartut ukiakkut 1996-imi
ataatsimiinnermi aningaasanut inatsisip akuersissutigineranut atasumik
aalajangerput 1997-ip ingerlanerani
oqaatsinik ilinniarfimmik pilersitsisoqassasoq. Tamanna tunngavigalugu Naalakkersuisut
tamatuma kingorna aalajangerneq timitalerniarumallugu sulinialerput.
Taamaattumik init ingerlatassatut kissaatigineqartut ingerlanneqarfigisassaat
naleqquttut pissarsiarineqarput aammattaarlu ilinniarfimmik pilersitsinissaq
annertuumik suliniutigineqarluni.
Oqaasiliortunut saqqummiussinerup
kingorna ilinniarfissap pisortatigoortumik Oqaatsinik Pikkorissarfik
taaguutigilerpaa. Taaguutip taassuma toqqarneqarneranut pissutaavoq Oqaatsinik
Pikkorissarfiup Inatsisartut aalajangernerat naapertorlugu ingerlatassaasa
nalunaarmassuk oqaatsinik ilinniarfittut nalunngisatsitut atuutissanngitsoq,
atuutissasorli oqaatsinik pikkorissarfittut, oqaatsinut tunngasunik
assigiinngitsorpassuarnik suliaqarfittut, aamma suliassanik oqaatsinik
ilinniarfimmi suliaagajunngitsunik.
Taaneqartutut atsiinikkut
nalunaarneqarpoq oqaatsinik pikkorissarfiup sumut atornissaa. Naalakkersuisulli
eqqornerpaasoraat oqaatsinik pikkorissarfimmi ingerlatassat pingaarnerusut
allat Inatsisartut aalajangerpatigittaaq. Tassani eqqarsaatigineqarnerupput
Oqaatsinik Pikkorissarfiup aqunneqarnissaanut tunngasut. Tamakku
aalajangerneqarpata pisariaqalissaaq Naalakkersuisut Inatsisartunit
pisinnaatinneqarlutik Oqaatsinik Pikkorissarfimmi malinneqartussanik tassanilu
ingerlatassanik erseqqinnerusunik malittarisassaliorsinnaatinnissaat. Tassalu
tamanna tunngaviginerullugu Inatsisartut inatsisissaattut siunnersuut
Naalakkersuisunit saqqummiunneqarpoq.
Siunnersuummi takuneqarsinnaavoq
Oqaatsinik Pikkorissarfiup siunertaa pingaarneq tassaassasoq oqaatsinik
ilinniartitsinermik nukittorsaanissaq, tamannalu pissasoq namminersortut
pisortallu pisariaqartitaannut assigiinngitsunut naapertuuttumik aammalu
inuutissarsiornikkut, suliffeqarnikkut ilinniartitaanikkullu qaqugukkulluunniit
pisariaqartitassatut aalajangersakkat naapertorlugit. Siunertatut oqaatigisaq
tamanna annertukuluppoq, kisianni tamatumuunarpiaq isumannaallilerneqassaaq
Oqaatsinik Pikkorissarfiup suliassanik assigiinngitsorpassuarnik, inuiaqatigiit
oqaatsinik ilinniarnissamut pisariaqartitsinerannut takussutissaasunik,
isumaginnissinnaalernissaa. Tamatumuunattaaq periarfissaqalerpoq Oqaatsinik
Pikkorissarfiup inuiaqatigiit pisariaqartitaasa allanngorarneri malillugit
ineriartorsinnaanissaa.
Siunertatut oqaatigisamut
ilanngunneqarpoq Oqaatsinik Pikkorissarfiup siunertaa anguniarneqassasoq
pingaartumik pikkorissarfimmi oqaatsinik pikkorissarnernik
ilinniartitsinernillu aaqqissuussisarnertigut ingerlatsisarnertigullu,
Kalaallit Nunaanni aammattaaq avataani ilinniarfinni, oqaatsinik ilinniarfinni
assigisaannilu oqaatsinik pikkorissarnernut oqaatsinillu ilinniartitsinernut
aqqutissiuussillunilu aaqqissuussisarnikkut kiisalu ilisimasanik eqiteriffittut
pikkorissarfimmi allanilu oqaatsinik pikkorissartitsisarnissamut periarfissat
oqaatsinillu ilinniartitsinissamut neqeroorutit pillugit siunnersuisinnaasutut
atuunnikkut. Tamakku taagorlugit oqarsinnaavugut oqaatsinik pikkorissarfimmi
ingerlatassat annikinnerpaaffissalerneqartut. Kisiannili akornutissaqanngilaq
oqaatsinik pikkorissarfiup suliniutinik allanittaaq siunertarisap
allaaserinerani ilaatinneqarsinnaasunik aallartitsisarsinnaanissaa. Tamanna
nukittorsaaqataassaaq oqaatsinik pikkorissarfiup piumasarisanut
assigiinngitsunut naapertuuttumik sulinissaanut.
Oqaatsinik Pikkorissarfiup
aqunneqarnera pillugu Naalakkersuisut pingaartutut isigaat oqaatsinik
pikkorissarfiup immikkut siulersuisoqarnissaa, inuttaqartunik oqaatsinik
suliffeqarfinni assigiinngitsuni, soorlu aatsitassarsiornermik, takornariartitsinermik
niuernermillu sammisaqarfiusuni atorneqartunik paasisimasaqartunik
ilisimasaqartunillu. Siulersuisut taakkua paasisimasallit suliassarissavaat
Inatsisartut inatsisaanni aalajangersakkat malillugit Oqaatsinik
Pikkorissarfiup sulinerani anguniagassat tunaartarisassallu, siulersuisullu
aammattaaq tamakkununnga tamakkiisumik akisussaassapput.
Naalakkersuisut pingaartutut
isigaattaaq oqaatsinik pikkorissarfiup Naalakkersuisullu akornanni qanittumik
ataavartumillu atassuteqaqatigiittoqarnissaa, taamaattumillu
siunnersuutigineqarpoq siulersuisut siulittaasuata Kultureqarnermut,
Ilinniartitaanermut Ilageeqarnermut Naalakkersuisumit toqqagaasarnissaa.
Oqaatsinik Pikkorissarfiup pisortassaanik, oqaatsinik pikkorissarfimmik
ulluinnarni siulersuisuusussamik, atorfinitsitsinikkut Naalakkersuisut
siunnersuut naapertorlugu allaffissornikkut aqutsinermut aningaasanullu
tunngasutigut akisussaassapput, tamatumunngalu pissutaavoq Oqaatsinik
Pikkorissarfiup annerusumik landskassimit aningaasalersugaanissaa.
Taamaattorli tamatumunnga atatillugu oqaatigineqassaaq Oqaatsinik Pikkorissarfik
siunnersuut naapertorlugu isertitsissutaasinnaasunik suliaqarnernik aamma
ingerlataqarsinnaasoq.
Siunnersuutip imarisai pillugit taama
oqaaseqarlutik Naalakkersuisut innersuussutigissavaattaaq siunnersuut
oqaaseqaatitaalu.
Naalakkersuisut saqqummiussinermi
matumani naggasiullu annertunngitsunik oqaaseqaateqassapput Oqaatsinik
Pikkorissarfimmik pilersitsiniarnerup sumut killinnera pillugu.
Kultureqarnermut, Ilinniartitaanermut
Ilageeqarnermullu naalakkersuisoqarfiup 1. september 1997 tikillugu sulisut
(atorfillit) marluk sulisippai Oqaatsinik Pikkorissarfiup pilersinnissaanut
suliassanullu arlalinnut Oqaatsinik Pikkorissarfiup siunissami ingerlatassaanut
tunngasunik. Illumi (KNI-p Sisimiuni illuutigisimasaani) sanaqqiinerup
allanngortiterinerullu, misissuinerit suleqatissanillu
isumaqatigiinniuteqartarnerit saniatigut sammineqarnerupput Kalaallit Nunaan-ni
taamatullu Kalaallit Nunaata avataani oqaatsinik pikkorissartitsinernik
ingerlatsisarnissat.
Ilisimatitsissutigissavarput
Kalaallit Nunaanni tuluit oqaasiinik annertuumik pikkorissartitsinissat marluk
Ilinniarfissuarmi ilinniartunut neqeroorutigineqarsimammata.
Kalaallit Nunaata avataani oqaatsinik
pikkorissartitsinernut tunngatillugu ilisimatitsissutigine-qarsinnaavoq
inuusuttut aqqaneq-marluk akuerineqarmata Danmarkimi højskolini oqaatsinik
pikkorissarnissaminnut. Taama akuersinermi piumasarisat ilagaat
pikkorissartitsinerup pisinnaalersitsinissaa qinnuteqartup
suliffeqalernissaanut ilinniarnissaanulluunniit.
Ilinniartut 14-init
Ilisimatusarfimmeersut tuluit ilisimatuut oqaasiinik Canadami universitetimi
pikkorissarsimapput. Pikkorissarnermi tassani siunertarineqartut ilagaat
inuusuttut periarfissinnissaat tuluit oqaasiinik pisariaqartumik
ilinniarnissaannut aammalu sapiissuseqarnerulersinnissaat Kalaallit Nunaata
avataaniittunik paarlaasseqatigiinniartarnissamut. Tamatuminnga pissuteqartumik
paarlaasseqatigiissitsisarnissamik isumaqatigiissuteqarfiginiarneqalerpoq
Carleton University Ottawamiittoq.
Ukioq kingulleq inuit 14-it
nunaqqatitsinnit assigiinngitsuneersut qaammatini marlunni oqaatsinik
pikkorissarfimmiitinneqarput Vancouver Community Collegemi, tassaniinnerisalu
nalilerneqarluarnerat pissutigalugu college taanna
isumaqatigiinniarfigineqalerpoq oqaatsinik pikko-rissarfimmiititseqqinnissaq
anguniarlugu.
Kiisalu taaneqarsinnaavoq Tyskland
Frankrigilu isumaqatigiinniarfineqalersimasut nunani taakkunani pingasunik
stipendiaqartitsilluni ilinniagaqartitsinissaq pillugu. Tyskland isumaqatigiissuteqarfigneqareerportaaq
pisariaqalerpat tyskisut pisariaqartitsineq naapertorlugu ilinniartitsisussaqartitsisinnaanissaq.
Piffissami qaninnermi ingerlatassatut taaneqarsinnaapput takornariartitsinermut
tunngasunik suliaqartartunut tuluttut tyskisullu pikkorissartitsinissamik
pilersaaruteqarneq.
Taamaalilluni Oqaatsinik
Pikkorissarfimmi aqutsisut ukiuni aggersuni ingerlatsinissaminni
iluaqutiginiarsinnaasassaannik tunngavissaqarlualereerpoq. Oqaatsinik
Pikkorissarfiup siulersugaaneranut tunngatillugu
ilisimatitsissutigineqarsinnaavortaaq Oqaatsinik Pikkorissarfimmi ulluinnarni
pisortassamik 1. september 1997-imit atuutilersumik atorfinitsitsisoqarmat.
Taassuma suliassaasa siulliit ilagissavaat sulisussanik allanik
atorfinitsinissaq atoqqaarfissiortitsinissallu novembarip affaata kingulliup
ingerlanerani pisussaagunartup pilersaarusiornissaa. Taamaalilluni Oqaatsinik
Pikkorissarfiup ingerlatsinerani malittarisassat Naalakkersuisut
siunnersuutigisaat makku Inatsisartut akuersissutigippatigik
atortussanngorsinnaassapputtaaq.
Taama oqaaseqarluta, Oqaatsinik
Pikkorissarfiup siunissami sulinissaa isumalluarfigeqalugu, Naalakkersuisunit siunnersuut
matumuuna saqqummiupparput neriulluta Inatsisartunit akuersaarneqassasoq.
Ruth
Heilmann, Siumup oqaaseqartua:
Oqaatsinik
Pikkorissarfik pillugu Inatsisartut inatsisissaannut siunnersuumut Siumumiit
ima oqaaseqassaagut:
Oqaatsinik
ilinniarfimmik siunnersuut Siumup suliniutigiumallugu piusunngornissaalu angujumallugu
manna oqaluttarfik atorlugu soorlu aamma ilinniagaqartut
ataatsimiitsinneqartarnerani kiisalu tusagassiutinik allanilu arlaleriarluni
saqqumiuttareersimavaa. Taamalullu Siumut Atassutillu suleqatigiissutissamittut
anguniagaannuttaaq ilanngunneqarnikuulluni isumaqatigiissumilu kingullermi
Oqaatsinik Pikkorissarfiup pilersinneqartussap piorsaqqinneqarnissaa aamma
ilanngunneqarpoq. Siumumi nuannaarutigaarput oqaatsinik pikkorissarfimmik
pilersitsinissap piviusunngortinneqartussanngornera.
Taamaattumik
aamma taamatut siunnersuuteqartut tamaviaaruteqartullu tamaasa qamannga pisumik
Siumumiit pilluaqquniarpagut. Siumumiit naatsorsuutigaarput oqaatsinik
pikkorissarfittaarnerup kingunerisaanik nunat allanut oqaatsinik
ilinniartariaqartussanut periarfissarititaasut ajornerulissanngitsut,
kisiannili oqaatsinik pikkorissarfik nunanut allanut ilinniariarnissamut
alloriarnerit ilaattut tapertaasutulluunniit inissisimalissasoq. Oqaatsinik pikkorissarfimmut
tunngatillugu inatsisissamik siunnersuutaasoq tamakkiisumik tapersersorparput.
Ullutsinni
nunatsinni atugarisagut eqqarsaatigalugit inuutissarsiutinilu
siuarsaaniarnermik annertuumik suliniuteqarnitsinni Siumumiit pingaartorujussuartut
isigaarput nunanit allanik attaveqarnitta suleqateqarnittalu
annertusarneqartuarnissaa. Attaveqarnitsinnut oqaatsinik ilisimasaqarnissap
pingaaruteqassusia paasilluinnarsimavarput, taamaatumillu oqaatsinik
ilinniarnissarput sakkortunerpaamik suliniutiginiarparput nunat allamiunik
oqaatsisigut apor-feqarata saqqummertalernissarput inuiaat kalaaliusugut
sapinngittariaqaratsigu. Sumiluunniim-mi najugaqarnerput atorfeqarnerput
inuutissarsiuteqarpullu apeqqutaatinngilluinnarlugu ta-matsinnut nuannissagaluaqimmat
ingerlaannaq oqarput allamiut oqaasiinut sangutiallatsissinnaassagutsigu,
pingaartumik aamma qaluunaatut tuluttullu oqaasii eqqarsaatigalugit.
Taamaattumik
meeqqat aallaavigalugit oqaatsinik ilinniarnermi piorsaanermik suliniuteqarni- gut ingerlattuattariaqarpagut. Meeqqivinni
atuarfinni ilinniarfinnilu allani aamma tamani sunngiffimmi atuartitsinermi
ullukkut unnukkullu aamma ingerlanneqarsinnaajuartariaqarpoq oqaatsinik
ilinniarneq, soorlu aamma kalaallisut qallunaatut tuluillu oqaasii
eqqarsaatigalugit. Tassami uniffigisariaqanngimmat maannakkut oqaatsinik
pikkorissafeqarlernissarput pisiaqar-titsinermi annertoorujussuusoq tamatta
nalunngeqaarput.
Angoqqaarpassuit
atuartuutillik qitornamik oqaatsinik suli annertunerusumik pikkorissuseqalernissaat
anguniartarpaat, periarfissaqartullu AFS aqqutigalugu ukioq ataaseq qitornatik
nunanut allanut ukiiartortittarpaat, ilaqutariinni najugaqarlutik, oqaatsinik
ilinniarnissaat siunnertaralugu, minnerunngitsumillu inuiaqatigiit allat
ingerlaasiannik paasisaqarnissaat anguniarlugu. Misilittagaalualersimavoq
taamatut angajoqqaatik nunartillu qimakkallarlugu ukiiartortarnitik inuttut
aamma ingerlaqqinnissamut inuusuttortatta nakussasaatigilluartaraat. Tamanna
annertuumik Inatsisartunik Naalakkersuisunillu tapersersorneqarpoq,
taamaattumillu aamma suli annertunerusumik atorneqartalernissaa anguniarlugu
angalasarnerisigut tapiissutaasartut annertuninngortinneqarsimapput,
taamaattumik atuartut angajoqqaallu kajumissaarusuppagut suli annerusumik tamanna
periarfissaq iluatinnartoq aamma atorluarniaqqullugu.
Maannakkut
oqaatsinik pikkorissarfiup pilersinneqarleruttortup Sisimiuniittussatup
oqaatigi-neqartup sulinissaanut najoqqutarisassaq inatsisissarlu
nassuiaatigineqarpoq. Oqaatsinik pikkorissarfiup siunertassaatut
saqqummiunneqartut Siumumiit tamakkiisumik tapersersorpagut aammalu eqaatsumik
ammasumillu Inatsisartut Naalakkersuisullu piumasaqaataannik pikko-rissarfiup
sulisinneqartarnissaa periarfissaqartittuarnissaalu pissusissamisoortumik isumaqarfi-galugu,
tassuunakkut pikkorissarfiup ineriartornermut malinnaatinneqarnissaa aamma qulak-keerneqarmat.
Pikkorissarfiup
aningaasalersorneqarnera Nammersornerusuniit ingerlanneqartussaasoq pissusissamisoortutut
isumaqarfigaarput aammalu pikkorissarfiup nammineerluni suliaqartarnermigut
aningaasanik isersissuteqartarnissaanik periarfissaqarnera naapertuusoraarput,
soorlu aamma nutserilluni atuakkanik allanillu naammassisaqartarnissaanik
nuannersumik takorloorneqarsinnaammat. Pikkorissarfiup suliassaasa ilaat
nunanik allanik paarlaasseqatigiilluni ilinniartunik aqqutissarsiuussisarnissaa
aamma pissanganartutut atorluagassatullu isumaqarfigilluinnarparput.
Oqaatsinik
pikkorissartarfiup siulersuisuisa inutalersorneqarnissaa suliffeqarfinni
assigiinngitsuni aallaveqartinneqarpoq takornariaqartitsinermik
aatsitassiornermik niuernermik assigiinngitsunillu suliffeqarfinnit
katitigaanissaa Siumumiit isumaqatigaarput. Tassanilu aamma ilanngul- lugu
nutserisoqarnerup tungaaniit sinniisoqartarnissaa pissusissamisoortutut
Siumuminngaaniit isigalutigu. Pikkorissarfimmi pikkorissartartussat pillugit
annertunerusumik saqqummiutami eqqartorneqanngitsoq amigaatiginarsinnaasutut
ippoq, soorlu pikkorissarneq qanoq ulluinnarni aaqqissuuneqarnissaa,
pikkorissarnerup qanoq sivisutigisarnissaa, oqaatsinik pikkorissarnerup
saniatigut allanik sunik sukisaarsaaruteqarnissaa il.il.
Neriuutigalugit
tamakku taasariaqartut allat saniatigut aaqqiinnagassatut isigineqarsinnaammata
tunngaviatigut saqqummiutap siullermeerneqarnerani oqaaserisagut
innersuussutigalugit aappassaannerneqarnissaanut
ingerlateqqinngineqannginnerani Kultureqarnermi Ilinniartitaanermut
Ilageeqarnermullu ataatsimiititaliami sammineqarnissaa Siumumiit
inaassuteqaatigaarput -takkulu sulilluarnissaannik kissaallutigit.
Sivert
K. Heilmann, Atassutip oqaaseqartua:
Inatsisartut
1996-imi ukiakkut ataatsimiinnitsinni partiit tamatta isumaqatigiilluinnarluta
oqaatsinik ilinniarfimmik 1997 ingerlanerani isumaqatigiippugut pilersissoqassasoq.
Tamannalumi Sisimiuni piviusunngureersimanera Atassumiit nuannaarutigaarput
aammalu akueralutigu Oqaatsinik Pikkorissarfimmik taaguuteqalernera.
Atassumiit
pingaartipparput pitsaasumik atuartitaaneq kikkut tamarmik atorfissaqartitaat
kissaatigisaallu aammalu inuiaqatigiit atorfissaqartitsinerat najoqqutaralugit
annerusumik ilinniarfissanut ikaarsaariartarfilinnut tassaanginnanngilaq
ataasiakkaanut inuttut piginnaatitaaffik. Aammattaarli tassaavoq inuiaat
kikkuugaluartut tamarmik ineriartornerannut tunngaviusoq
pingaaruteqarluinnartoq.
Taamaattumik
Atassut-ip piumasaraa qanoq oqaaseqarneq ataqqillugu peroriartornermi oqaatsit
nunanit allanisuulli ataqqineqartarnissaat. Aamma pingaartutut isigaarput
oqaatsit nunatsinni atorneqartut marlugiit ataqqineqartuarnissaat inuit
akornanni avissaartuunnermik pisoqaqqunagu. Tamanna anguneqarsinnaavoq
assigiisitsinikkut ilersorneqarsinnaasumilli atugaqarsitsinikkut
arlaannaalluunniit atuartitsinerup naleqassusia innarlernagu. Taamaattumik
ukiut 2000-inut ikaarsaariarnissatsinnut piareersarluartariaqarpugut,
nunarsuarmioqatigiit peqatigiikkaluttuinnarneranni piumasaasut periarfissallu
peqataaffigisinnaajumallugit.
Nunarsuarmi
inoqataasutut nunat allamiut oqaasiinut piginnaanngorsartariaqarpugut
kinaassu-serpulli sorlagullu katannagit. Taamaattumik Atassut-ip
anguniartuarpaa nunat allamiut oqaasiinik soorlu tuluttut tyskisut
franskisullu atuartitsinerup qaffassartuarnissaa. Qaffasinnerusumik
ilinniarfinni nangittussat universitet-inilu ilinniartussat kisimik nunat
allamiut oqaasii pisiaqartitarinngilaat aammali takornarissanik
sullissisinerup ineriartortinneqarneranut atasumik sulissilluarnissarput
pingaaruteqarpoq. Tamakkuupput siusinnerusukkut ilinniartitaaneq aammalu oqaatsinik
pikkorissarfeqarnissaq anguniarlugu oqallittarnermi Atassummiit oqaatsit
atortakkagut.
Taamaattumillu
Kultureqarnermut Ilinniartitaanermut Ilageeqarnermullu Naalakkersuisup
Naalakkersuisut sinnerlugit saqqummiussai oqaatsinik pikkorissarfimmik aqutsinermut
ingerlatitsinermillu aningaasalersuinissamut il.il. inatsisissamut siunnersuut
Atassummiit tapersersoratsigu. Atassummiittaaq oqaatsinik pikkorissarfiup
siunissami ingerlalluarnissaa aammalu pingaartumik inuusuttortatsinnit
atorluarneqarnissaa angusaqarfiunissaalu neriuffigilluarfigaarput.
Taamatut
oqaaseqarluta Atassummiit Oqaatsinik Pikkorissarfik pillugu Inatsisartut
inatsisissaannut siunnersuutip siullermeerneqarnera akuersaarparput.
Manasse
Berthelsen, Inuit Ataqatigiit oqaaseqartuat:
Oqaatsinik
Pikkorissarfiup inatsisitigut toqqammivissaanik Naalakkersuisut
siunnersuuteqarnerat Inuit Ataqatigiinniit ilassilluarlugu oqaatigissavarput
inuiaat ilisarnaataasa annersarimmassuk tassa nammineq oqaatsitik inuiallu
nunarsuarmioqataallutik ineriartortinnissaminnut tunngavissaraat nunuarsuarmi
oqaatsit atorneqartut nalornisiginagit atorsinnaaneri.
Nuannaarutigeqaarput
oqaatsit tungaatigut sullissiniarneq ukiuni makkunani malunnaatilimmik
iluarsiiviginiarneqarmat oqaatsinut allaffeqarfittaarnikkut oqaatsinillu
pikkorissarfittaarnikkut. Siullermik inatsisissamut uunga tikkuarusutarput
tassaavoq ' 3-mi
allassimasoq: Issuaaneq aallartippoq: ANaalakkersuisut
Siulersuisuini tallimaniit arfineq-pingasunut ilaasortalimmik
pilersitsissapput.@
Issuaaneq naavoq. Inuit Ataqatigiinniit siunnersuutigerusupparput Inatsisar-
tut siulersuisussanik toqqaasassasut, taakkuummatami aningaasaliisartut
pisariaqartinneqarpal- lu immikkut ilisimasalinnik ataatsimiititaqartarnissaa -
siunnersuutigissavarput.
Inuit
Ataqatigiiniit eqqaanngitsoorusunngilagut meeqqat atuarfianniit naammassisartut
danskisut pisinnaasatik annertusarniarlugit ukiuni kingullerni
Danmark-imukartartut amerliartuinnavissimammata. Inuit Ataqatigiiniit
neriuutigilluinnarparput oqaatsinik pikkorissarfik aqqutigalugu meeqqat
atuarfianni atuartut annerit danskisut immikkut pikkorisartinneqartalernissaat
aqqutissiunneqassasoq. Minnerunngitsumillu danskisut atuartitsisartut
pikkorissartinneqartassasut nunami allamiutut oqaatsitut
atuartitsissutigisarnissaannut. Inuit Ataqatigiinnimi maluginiarsimavarput
danskisut atuartitsisartut danskinut atuartitseriaaseq ingerlattarlugu.
Oqaatsinik Pikkorissarfiup ingerlatsinermi Inuit Ataqatigiinniit neriutigaarput
sinerissami angalaarsinnaaneq aamma atorluarneqassasoq, pikkorissariartortussat sinerissamiit
Sisimiunukartarnissaat akisoqisoq minnerpaaffimmiitinniarlugu.
Siunissamimi
oqaatsinik pikkorissarfik nunatsinnut pingaaruteqartussaavoq oqaatsinik
nunami-ullu allat oqaasiinik ilikkarniarnitsinnut. Inuussutissarsiornikkut
nunanut allanut attaveqarnerulerneq pissusissamisoortoq annertusiartunavippoq,
Danmark-imi kisimi niueqatigiunnaariartoratsigu. Takornariaqarnerup
ineriartortinnerani nunat allamiut oqaasiinik pisinnaasagut annertusinissaat
pisariaqarluinnarpoq. Takornariartitsineq pissusissamisoortumik
ineriartortinneqassappat. Oqaatsinik pikkorissarfik Inuit Ataqatigiinniit
neriulluarfigeqaarput nunatsinni inuttaasut silassorissorsuit ilinniakkanut
annertunerusunut mattunneqarsimajuartarmata danskisut pisin-naasaat
aporfiusarmmata. Inuit Ataqatigiinniit takorluugarput anguniagaralugu
siunissami nunarput imaalissasoq anguneqarnissaanut qanillattuinissaq
neriuppugut inumminik nunarput imaassasoq inumminnik oqartussaaffigineqartoq
nunagisaminni nammineq oqaatsit atorlugit aqunneqartoq.
Taamatut
oqaaseqarluta siunnersuutigissavarput Kultureqarnermut Ilinniartitaanermut
Ilageeqarnermullu ataatsimiitsitaliami aappassanerneqannginnerani
suliarineqaqqaarnissaa.
Bjarne
Kreutzmann, Akulliit Partiiat:
Eqqaamavarput
inersuarmi matumani 1996-imi isumaqatigiissutigigatsigu Oqaatsinik Pikkorissarfimmik
1997 ingerlanerani pilersitsisoqassasoq.
Taamaattumik
Akulliit Partiiata tapersersorpaa Oqaatsinik Pikkorissarfik pillugu Inatsisartut
inatsisissaannut siunnersuut - isumaqarpunga aamma taamatut ateqarnissaa
akornutissaqanngivissoq. Taamaalillunga saqqummiussinermi Naalakkersuisunik
saqqummiunneqartut tamakkiisumik taperserpakka, taakkualu tassaasut siullermik
oqaatsinik pikkorissarfimmi ingerlatassat pingaarnerusut allat Inatsisartut
aalajangissagaat, soorlu oqaatsinik pikkorissarfiup aqunneqarnissaanut
tunngasut.
Isumaqarpungalu
taakku isumaqatigiissutigineqarpata taava ingerlatassat assigiinngitsut erseqqinnerusumik
malittarisassaliunneqarsinnaassasut. Aappassaanik siulersuisut
inuttalersorneqassasut ulluinnarni sulinerminni oqaatsinut attuumassutilinnut
suliaqartunik. Tassami aamma taanna tunuliaqutaavoq pingaarnerusoq
Naalakkersuisut Inatsisartut inatsisissaannik saqqumi-ussineranni. Oqaatsinik
Pikkorissarfiup pilersinneqarnera qularnanngitsumik iluaqutissanik
assigiinngitsorpassuaq nassataqartussaavoq ullumi ilisimasatsinnit
amerlanerusunik.
Ullumikkut
oqaatsinut tungassutilimmut oqaluuserisamut allamut tunngatillugu Akulliit
Partiiat sinnerlugit uparuarsimavara oqaatsit pillugit siunnersortit maanna
piusut annertusineqarnissaat. Taamaalilluni siunnersuut una kalaallisut
oqaatsigut pillugit uanga isumannut naaperluuttuinnartuuvoq. Taamaalilluni
ullumikkut pissusiusunut annertuumik iluaqutaasussaassaaq, qularnanngitsumillu
oqaatsitta oqaasitoqartaasa kusarnartortaasa ullumikkut tammariartortutut
isiginiarneqartartut kusanartumik atorneqaqqilernissaannut
aqqutissiuussalluni. Tamamuuna eqqarsaatigaara - naak siunissaq ungasinnerusoq
eqqasaatiginerugaluarlugu qallunaatut allatat issuaannarpallaar-lugit
kalaallisuunngortitsisarnerup oqalunnerullu qaangerniarneqarnissa -
oqaatsittalu kusanartumik atorneqarnissaasa eqqumaffigilernissaat
Siulersuisuni siulittaasup kulturimut
tunngassutilinnut Naalakkersuisumit toqqarneqarnissaanik isuma
isumaqatigilluinnarpara.
Suliniutit assigiinngitsut
saqqummiuussinermi eqqartorneqartut nuannaarlunga tusaatissatut tiguakka,
taamaalillungalu Oqaatsinik Pikkorissarfik pillugu Inatsisartut
inatsisissaattut siun-nersuut matumuuna taperserlugu.
Anthon Frederiksen, Kattusseqatigiit:
Kattusseqatigiinniit
soqutigilluinnarparput nunatsinni ilinniartitaanikkut pitsanngorsaajuarnissaq
ineriartortitsijuarnissarlu, taamaattumik inatsisartut aalajangersimanerat
tunngavigalugu maanna Oqaatsinik Pikkorissarfiup ukiamut atoqqaartinneqarnisaa
angusaavoq tamatsinnut nunatsinnullu annertuumik pisuunnguallaasussaq.
Atserneqarsimanera siunertarisamut
naleqqulluinnarpoq aammalu pissusissamisoorluinnas- sooq pikkorissarfiup ingerlatassaanut tunngasut
naalakkersuisunit malittarisassiuunneqarsin-naanerat inatsisartunit
pisinnaatitsissutigineqarpat.
Pikkorissarfiup suliassai anguniagaalu
ilaatigut taajuutaata ersersereerpai soorunami inatsisissami
siunertarineqartut ajunngitsut Kattusseqatigiinniit isumaqamatigilluinnarpakka.
Taamaattumik Pikkorissarfiup siunissami eqaatsumik akisussaassuseqartumik
angusaqarfiulluartumillu ingerlanissaa neriuuteqarfigalugu inatsisartut
inatsisissatut siunnersuutaat akuersaarpara, taamatullu isikkoqarluni
kultureqarnermut ilinniartitaanermullu ataatsimiisitaliami aappassaaneerneqannginnermini
oqaluuserineqarnissaa innersuussutigalugu.
Konrad Steenholdt, Kultureqarnermut Ilinniartitaanermut
Ilageeqarnermullu Naalakkersuisoq: Ukiorpaalussuit Inatsisartuni
ilaasortaalluni ilaasortaasutuut misigisimavunga ilaatigut qaquti-goortartoq
taamatut misigisaqassalluni taama isumaqatigiittoqartigimmat saqqummiussamut
tunngatillugu. Aamma nuannaarnera minnerulinngilaq pisuunnguallaatissarput
inuiattuut uani siunnersuutigineqartut tamanit assortuussutaanngitsumik
akuersaarumaneqarmata.
Inuit 55.000 missaannaaniippugut
ulluinnarni piumasaqarfigineqarpugut oqaatsit assigiinngit- sut pisinnaaffigissagigut. Uanilu aamma
isumaqarpunga malugisariaqartut ilagigaat taama ikitsigigaluartut inuiaat aamma
una isiginiarsarigatsigu Kalaallit Nunaannut tikeraartugut imaluunniit maani
atorfilittagut piarfissikkumagatsigit pikkorissartuarnissamut oqaatsivut
kisiisa piinnanngikkaluarlugit, kisianni inuiannut akulerukkaluttuinnarnerput
ilutigalugu aamma sulisutta pikkorissartuarnissaat ugguunakkut
isumannaarniaratsigu.
Una qularutigineqassanngilaq Oqaatsinik
Pikkorissartarfiup aamma isumagissammagu oqaatsit-ta iluamik
atorluarneqarnissaat. Sisimiunut inissinneranut tunngatillugu aamma
anguniakkatta ilagivaat aamma højskole, Knud Rasmussenip Højskolia, taavani
inissisimareersoq oqaatsitsigut kulturikkullu suliniutitigut aamma
ingerlassisoq aamma suleqatigalugu suliassat assigiinngit- sut ingerlanneqartussaapput.
Uunga tunngasumik aamma oqaatigilara,
naalakkersuisoqarfinni oqaatsitigut ilinniartitaaner- mut tunngassuteqartut allaffikkut ingerlanneqarnerat soorunami Sisimiuninngaanniit
aqunneqalertussaavoq, maanngaanniit Sisimiunut inissinneqarluni.
Isumaqarpungalu oqaaseqartut uani paatsuungassutiginngikkaat siullermik suut
siunniukkallarigut, kingornatigut aamma nassaarissaqqaarpagut assigiinngitsut
suliassat uani akuliarmittoorsimagutsigit.
Taamaattumik aamma pissusissamisoortutut
isigaara aappassaaneertinnagu kultureqarnermut ilinniartitaanermullu
ataatsimiititaliap uani apeqqutit assigiinngitsut erseqqissarlugit
oqallisi-gippatigit, tassa partiit oqaaseqartuisa kissaatigisaat tassani
nalilersorneqarpata, taava maannga aappassaaneerneqarani oqqunneqarpat
soorunami nalilersueriaaseq pissusissamisoortoq ingerlatissavarput.
Ilaatigut apeqqutigineqarmat pisortaq,
kina pisortassatuut toqqarneqarsimanersoq siulittaasup akuersineratigut
oqaatigilaassavara toqqarneqarsimammat Johan Meyer, massakkut pikani issiasoq,
nunatsinni ilinniartitsisuusimavoq Saattuni Uummannamilu. Piffissarlu aamma
iluat-sillugu tikilluaqqussavara, neriullungalu suliassaminik ingerlatsilluarnissaa.
Uani nutserisoqarfiup ilaatigut
eqqaatsiarneqara taanna piukkuppara ataatsimiititaliami taariikkanni
aappassaaniinnginnerani nalilersuinissami taassuma nalilersorneqarnissaa
oqallisigineqarnissaalu. Taannami oqaaseqartunit tamanit kissaatigineqarpoq,
uuma saqqummiutatta tassani nalilersorneqarluni oqallisiginissaa.
Soorunami sammisarput unaavoq
ilinniagaqartut tassani pikkorissarnissaat ammaaffigineqartariaqartoq,
kisiannili aamma una nuannequtaasa ilagivaat: meeqqat inuusuttuaqqallu kisiisa
piinnarnagit, kisianni kikkulluunniit nunatsinni atorfeqarfinni
assigiinngitsuni sulisuusut piumagunik soorlu ulluni 14-ni aaliangersimasuni
arlaanni oqaatsimik sammisaqarsinnaapput, taannaannaavillu ulluni taakkunani
ilinniarfigisamimmi. Taamaattumik aamma soqutiginarsinnaavoq tamanit
tusassallugu ulluni 14-ni taakkuinnarsuit samminiarunikkit ilaa naggataatigummi
taava qanoq isikkoqassappat. Taamaattumik pingaartuuvoq aamma nalilersussallugu
ataatsimiisitaliami eqqartulaassallugu, sunngiffiummitaava nalaani sulerisarunik
isikkorinnerullutik ullut 14-nit qaangiunnerani angerlarsinnaalissanerpat.
Tamakkua eqqartorneqarumaarput.
Taamatut naatsumik oqaaseqarlunga tamaasa
oqaaseqartut oqaasii nalilersunngikkaluarlugit kisianni qujavunga suliniut
tamanit akuersaarneqareersimasoq ilusilerneqarnerani tamakkiisumik
Inatsisartuni ilaasortaninngaaniit taperserneqarneranut. Qujanaq, suliaq
suliarissallugu nuannersereerpoq isumaqarpunga aamma nuannaarluta suliaq una
ingerlateqqittariaqaripput.
Ataatsimiinnermik aqutsisoq:
Taamaalilluni immikkoortut 31-ata
siullermeerlugu oqaluuserineqarnera naammassivoq. Aappassaaneerneqartinnanilu
kultureqarnermut ilinniartitaanermullu ilageeqarnermullu ataatsimiititaliami
suliarineqarallassaaq, tamatumalu kingorna aappassaaneerneqarumaarluni.
Oqaluuserisaq naammassivoq.