Oqaluuserisassani immokkoortoq 43-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Tallimanngorneq
10. oktober 1997 nal. 13.03
Ataatsimiinnermik
aqutsisoq: Inatsisartut Siulittaasuata tullia, Finn Karlsen.
Josef
Motzfeldt, Maliinannguaq Markussen Mĝlgaard sinnerlugu, Inuit Ataqatigiit :
Ukiuni
makkunani nunatsinni takornariaqarnerup siuarsarneqarnissaa pingaaruteqartutut
taakkartorneqartarpoq piviusunngortitsiviulluni. Siulittarineqarlunilu
siunissami suli annertunerusumik nunatsinni takornariaqarnerup
inuutissarsiutitut ineriartortinneqarluni atorluarneqariartulernissaa. Taamaattumik
pingaaruteqarpoq takornariaqarnerup ineriartortinneqarnerata siammasissumik
ingerlanneqarnissaa, qullersaqarfiullu Greenland Tourism-ip Nuummiinnaq
inissisimanani aamma sinerissami immikkoortortaqalernissaa pisariaqarluni.
Takornariaqarnermut
siuarsaassagaanni pisariaqarpoq takornariaqarnermi siuarsaaviusussatut
qaninnerusumik inissisimanissaa, naluneqanngilarlu sunaluunniit qanimut
najorlugu takusinnaallugulu periarfissaasut aporfiusinnaasullu
takujuminarnerusartut. Maanna takornariaqarnermut ineriartorfiusut illoqarfiit
aalajangersuusimanerupput, aammali nunatta sinnerani ineriartortitsiviusinnaasut
suli amerlaqalutik, illoqarfiinnaanngitsuni aammali nunaqarfinni. Taamaattumik
Greenland Tourism-ip Avannaani
Kujataanilu aalajangersimasunik immikkoortortaqalernissaa siunnersuutigaara,
taamaalillunimi aamma illoqarfiit, nunap immikkoortui qanigisat takornariaqarnikkut
ineriartortitsinissamut ikiorserneqarsinnaalissagaluarput,
alakkaallatsiaannarneqartaratik, sivisunerusumillu najorneqartarlutik.
Takornariaqarneq
inuutissarsiutitut pimoorukkaanni aamma ilisimasat ineriartortitsinerlu
siammasinnerusumik ingerlattariaqarput, ineriartortitsinerimi aamma
innuttaasunut qanimut
suleqataaffigineqarluni ingerlanneqassappat inuit tikillugit sulisoqartariaqarpoq.
Taamatut
oqaluuserisassatut Inatsisartunut siunnersuuteqarpoq Malinannguaq Markussen
Mĝlgaard.
Peter Grĝnvold Samuelsen,
Takornariaqarnermut Naalakkersuisoq:
Inatsisartunut ilaasortaq
Maliinannguaq Markussen Mĝlgaard, Inatsisartut 1997-imi ukiakkut
ataatsimiinnissaannut Greenland Tourism A/S-ip nunatta Avannaani Kujataanilu
immikkoortoqarlernissaanut siunnersuuteqarpoq.
Naalakkersuisuni isumaqatigaarput
takornariaqarneq inuussutissarsiutaammat annertuumik ineriartortitsiviusinnaasoq,
innuttaasullu qanimut peqataanissaat pingaaruteqartoq. Aallaqqaasiullugu
Naalakkersuisuniit innersuutigissavarput 1996-imi upernaakkut ataatsimiinnermi
takornariaqarnermik ingerlatsineq pillugu nassuiaammut, tassanilu
inassuteqaataasunut Inatsisartut isumaqataammata. Nassuiaammi ilaatigut
tikkuarneqarpoq siunnerfilinnik suliniuteqartoqarnissaa aallaqqaammut
pisariaqassasoq nunatsinni takornariaqarnermik inuutissarsiuteqarneq
siuarsarniarlugu, allatut oqaatigalugu suliniutit allaqqaammut najukkanik
aalajangersimasunik siuarsarneqassasut.
Tamannali imatut paasineqassanngilaq
nunatsinni sumiiffiit allat ineriartortitsinermut tunngatillugu
ilanngunneqassanngitsut. Naalakkersuisuni sianigeqqissaarparput
takornariaqarnermik inuutissarsiuteqarnerup ineriartortinneqarnerani
assigiimmik atugassassaqartitsisagatta. Taamaalilluni Greenland Tourism
1992-imili pilersinneqarmat assigiinngitsunik suliniuteqartoqartarsimavoq
takornariaqarnermik inuutissarsiutip najukkani ineriartortinneqarnerata iluaquserneqarnissaa
siunertaralugu.
Taamaalilluni Greenland Tourism
piffissami 1993-imiit 1996-imut najukkani ineriartortitsinermut najukkanik
aamma nunap immikkoortuini takornariaqarnermik ingerlatseqatigiiffiit aqqutigalugit
12 mio. kr. missaanik aningaasaliisimavoq, tamannalu najukkani
ingerlatsilernermut pissutaaqataasimalluni. Najukkani
takornariaqartitsisarnermik suliaqarnerup nukittorsarneqarnissaa
siunertaralugu Greenland Tourism pilersaaruteqarpoq najukkani takornariaqarnermut
allaffinnut piumasaqaataasut minnerpaaffissaannik paasiniaaniarluni. Sulineq
tamanna ingerlanneqassaaq najukkanik takorniartitseqatigiiffiit
suleqatigalugit.
Tamatumuuna siunertarineqarpoq
1998-ip ingerlanerani akuersisutigiffigineqartarnermik aaqqissuussinermik
atulersitsisoqarnissaa. Aaqqissuussinerit taamaattut nunani allani atugaapput
suliniuteqarnerlu najukkani takornariaqartitsinermi suliaqarnerup
pitsaalersinneqarnissaanut peqataassaaq. Siunetarineqarportaaq
akuersissutigineqartarnermik aaqqissuussineq akuersissutinik pigisaqartunut
ilinniartitaanikkut suliniutinik pikkorissarnissanullu neqeroorutinik assigiinngitsunik
ilaqartinneqassasoq.
Tamatumunna peqatigitillugu
siunertarineqarpoq qanoq isigineqartarnermik paasisitsiniaaneq
aallartinneqassasoq, najukkani takornariaqartitsisarnermik suliaqarnerup
ataqqineqarnerulernissaa paasisaqarnerulernissaalu anguniarlugit.
Siunertarineqarpoq akuersisutigineqartarnermik aaqqissuussineq kommunit
kattuffiannut isumaqatigiinniutigineqassasoq, tassami najukkanut
takornariaqartitsinermut suliaqarnermut aningaasatigut tunngavissat najukkami
pilersinneqartussaammata. Taamaattorli nunatsinni takornariaqarnermik
inuutissarsiuteqarnermi ajornatorsiutit annertuut ilagaat najukkani takornarianik
sullissinermi suleqataasut akornanni ataavaartumik ingerlasoqartannginnera.
Taamaammat Naalakkersuisut
takornariaqarnermi ingerlatsineq pillugu nassuiaammik malitseqartitsinerup
ilaattut nunatsinni takornariaqarnermut suliffeqarfinni ineriartortitsinermut
ilinniartitaanermullu maannakkut siunissamut pisariaqartitaasut
mississorneqarnerat aallartissimavaat. Naalakkersuisut naatsorsuutigaat
nassuiaat inerniliisartut misissuinermik aallartinneqartumik tunngavilik
Inatsisartut 1998-imi upernaakkut ataatsimiinnissaannut
saqqummiussinnaassallugu.
Naggasiullugu Naalakkersuisut
naliliipput Greenland Tourism A/S-ip nunatta avannaani kujataanilu
immikkoortortanik pilersitsinikkut pingitsoorani inuttaasut qanimut
peqataatinneqalernavianngitsut, soorlumi tamanna Inatsisartut Ilaasortap
Malinannguaq Markussen Mĝlgaard-ip ujartoraa. Assersuutigalugu Naalakkersuisut
isumaqarput akilersiissuteqartarnermik aaqqissuussinissaq
eqqarsaatigineqartoq, taamalu najukkani innuttaasut peqataatinneqarnerisa
nukittorsarneqarnerat sapinngisamik piaartumik ineriartortinneqaqittariaqartoq
piviusunngortinneqartariaqarlunilu. Taamaalilluni najukkanik
takoriaqartitsisarnermik suliaqarnermut innuttaasut amerlanerpaat qanimut
peqataatinneqalersinnaaqqullugit.
Taammaattaaq Naalakkersuisuni
isumaqarpugut maakkut takornariaqarnermut periaatsit sukumiisumik
mississuiffigineqarnissaannut piffissanngorsimasoq,
eqqarsaatigineqartariaqalerlunilu qanoq ililluta maannakkut nunap immikkoortui
ataatsimut isigalugu ineriartitsinerup ilusaanut suli annertunerusumik
peqataatilersinnaanerigut.
Ruth
Heilmann, Siumup oqaaseqartua:
Inatsisartunut
ilaasortaq Maliinannguaq M. Mĝlgaard Inatsisartut 1997-imi ukiakkut ataatsimiinnissaannut
Greenland Tourism A/S-ip nunatta avannaani kujataanilu
immikkoortortaqarlernissaanik siunnersuutaa Siumumiit imatut
oqaaseqarfigissavarput:
Siumup
anguniarpaa takornariartitsinerup inuussutissarsiutinngortinneqarnissaa,
aningaasarsiornikkut imminut napatittunngorlugu, inuiaqatigiinnullu
aningaasarsiornikkut toqqammaviit ilaattut inissisimalersillugu.
Siumut
isumaqarpoq takornariartitsinermi kalaallit kultoorerput Nunattalu
pinngortitarsua pissanganartorpassuarnik alianaassusermik
immikkuullarissutsinik assigiinngitsorpassuarnik
pigisaqartup
avammut nioqqutiginissaanut pisuussuteqangaarlutalu periarfissarpassuaqartugut
atorluartariaqakkatsinnik.
Tupinnaannartunik tulluusimaarutissarpassuaqarpugut nunatta ukiup
allanngorarneri malillugit aamma iliuuseqarfigisinnaasatsinnik upernalaami
aasarimmi ukiami ukiuuneranilu. Tamarmik immikkut qalipaateqarmata tamatsinnut
pingaartumillu aamma maani najugaqanngitsuni alutornaqqiffissaqanngitsumik
misigisaqarfiusinnaasut. Takornarissat nuan-nersumik tikilluaqquneqarnermik
qanilaarnermillu tapertaqartumik misigitinneqartarnissaat tamatta
pisussaaffigaarput. Taamaattumik sapinngisamik takornariartitsisut kalaallisut
aamma oqaaseqartut atorlugit takornariartitsineq ingerlanneqartariaqarpoq,
nunap inuisa takornarianik qanimut tikillugit sullissinermikkut
paaseqateqarluarnissaat qulakkeerniarlugu.
Siumumi
maluginiarpavut sinerissami illoqarfinni ataasiakkaani takornariaqarnermut
ingerlatseqatigiiffiit ingerlalluartut amerligaluttuinnarnerat, tamannalu
nuannaarutigineqartariaqartutut isumaqarfigaarput. Periarfissarlu manna iluatsillugu Siumumiit takornariaqarnermik
suliaqartut, pikkorillutik suliaminnullu tunniusimallutik sullissilluartut
Inatsisartut oqaluttarfianniit matumuuna qutsavigerusuppavut, siunissami
suliniartuarnissaat neriuuteqarfigaavut sulilu amerlasuut suleqataallutillu
kalluusimalernissaat pisariaqarteqaarput.
Qitiusumik
allaffeqarfiit avalequtaannik nunap immikkoortuini allaffeeraliortitertarnerit
misilittakkat najoqqutaralugit pitsaasuinnarmik
misigisaqarfigisimanngilagut. Siumumi isumaqarpugut
Maliinannguaq M. Mĝlgaardip siunnersuummini tunngavilersuutai
naammassiniarneqarsinnaasut, nutaanik allaffiliortitinngikkaluarluni.
Siumumiit
nunap immikkoortuini takornariaqartitsinermut suleqatigiissumik ineriartortitsinissap siuarsarneqarnissaa
anguniarlugu aaqqiissutissatut siunnersuutigerusupparput, Greenland Tourism-ip
suleqatigiissitsisartutut ataqatigiissaarisartutullu inissisimanerata
suliaqartussaaneratalu ersarinnerulerlunilu annertusarneqarnissaa. Taamaaliornikkut kommunit akornanni suleqatigiinnerulernissaq,
nunallu immikkoortuini suleqatigiilluni takornariaqarnermi siuarsaanissaq
aqqutissiuukkumallugit. Nunaqarfiimmi aamma takornariaqarnermi
ineriartortitsinissaat aallarnisaleruttorpoq, tamannalu suliassaavoq
pingaaruteqarluinnartoq.
Kommunit
tamarmik nunaqarfiilu
peqataaniartariaqarpugut nunap immikkoortui aalajangersimasut kisiisa
annerutinnissaat uniffiginagu nunarpullu tamaat isigalugu
periarfissittariaqarmat. Naalakkersuisut akuersissuteqarfigineqartarnermik
aaqqissuussinissaq eqqarsaatigineqartoq sapinngisamik piaartumik
ineriartorteqqinneqarlunilu piviusunngortinneqartariaqarnerannik
siunniussaqarnerat Siumumiit isumaqatigaarput, taamaaliornermi najukkani ataasiakkaani
innuttaasut qanimut peqataatinneqarnerisa nukittorsarneqarnissaa angujumallugu.
Taamatuttaaq
Naalakkersuisut maannakkut takornariaqarnermi periaatsip sukumiisumik misissuiffigineqarnissaannut
eqqarsaateqarnerat taperserparput, tassuunakkut nunap immikkoortuisa ataatsimut
isigalugu ataqatigiissumillu ineriartortitsinerup ilusaanut suli
annertunerusumik peqataatinneqalersinnaanissaat angujumallugu.
Taamatut
Siumumiit oqaaseqarluta siunnersuutigineqartumut Naalakkersuisut akissutaat
taperserlugu naggataagut ima oqarniarpugut:
Takornariaqarnermut
atatillugu, takornariaasartuusut nalunngilaat nunamut tikeqqaakkaminnut
anillalluta avatangiisit, pinngortitap saniatigut, inuttut, tikeraatut,
nalorsartutut qanoq tikilluaqquneqarluta misigisarneq. Kiinnat inussiarnersut, ikiuukkumanerit,
allagartarsuit il.il. inussiarnersumik oqaasertallit paasissutissanik
tunioraanerit, minnerunngitsumik nunatta nerisassaataalu. tamarmik nunamik
tikitamik tikilluaqqusaasutut misigineq pilersittarpaat. Imminut aperisariaqarpugut,
uagullu qanoq iliorfigaavut? Qanoq
takusassaqartippavut Kangerlussuarmi, Narsarsuarmi allanilumi, taamatut
anersaaqarluta tikilluaqqusarnerpavut?
Taamaaliortariaqarpugut,
unammillerluta takornariaqarnermi aamma nunarput nioqqutiginiassagutsigu
ussassaarutit, takoqqusaarutit inussiarnersut kiffartuussilluarnerillu
aqqutigalugit iliuuseqarluta. Taamaattumik Siumumi isumaqartuarpugut
sulisussanik ilinniartitsinerit pikkorissartitsinerit eqqumiitsuliornikkullu
siuarsaanerit pisariaqarteqisavut aamma annertunerusumik
aningaasaliiffigisarutsigit siunissami akilersinnaasumik takornariartitsinerup
inuutissarsiutaalernissaanik aatsaat qulakkeerinnissinnaanerput iluatsittumik
anguneqarumaartoq.
Jakob
Sivertsen, Atassutip oqaaseqartua:
Greenland
Tourism A/S-ip nunatta avannaani kujataanilu immikkoortortaqarlernissaannik
Malinannguaq M. Mĝlgaard-ip siunnersuutaa pillugu Atassut-mit imatut
oqaaseqarniarpugut:
Atassut-mit
ersaqqissumik oqaatigissavarput nunatsinni pinngortitarsuup pissusia pinnissusialu
nunarsuarni allani takunnissimasut nutaamillu takunnikkumasut takujumasaasa
ilagimmassuk, takornarissanut takussallugu qaqutigoortumik pinnissusilik
takullugu immikkut misigititsisartoq, tassalu pisuussuterput takornarissanut
nittarsaatigissallugu ajukkunnanngitsoq.
Taamaammat
Atassut-mit pingaartitariuarparput, nunatsinni takornariartitsinerup
piorsaavigineqarnissaa pimooruttariaqartoq, takornariartitsineq iluamik
aallutileraanni Kalaallit nunatsinni aningaasarsiutinngorsinnaavoq
suliffissaqartitsinermik annertuumik kinguneqartussaq, soorlu nunani allani
annertoorujussuarmik aningaasarsiutitut tapertarineqarluni pimoorunneqarlunilu
ingerlanneqartoq nalunngikkipput.
Nunatsinni
takornariartitsinerup annertusarneqarnera inuussutissarsiutitullu
ingerlanneqarsinnaanerata piorsaavigineqarnera aningaasalersuinerlu immunnut
ataqatigiissittariaqarput, oqaannartoqarsinnaanngilaq takornariartitsineq
annertusarneqassaaq, taamaaliussagaannilu malitsigisassai aamma
piorsarneqartariaqarput ineriartortitsineq equngasumik ingerlanneqarleqqunagu.
Taamaattumik
siunnersuutigneqartutuut takornarissanik avammut ussassaarineq annertusarniarlugu,
siamasinnerusumillu annertusaarnerup ingerlanneqalernissaa anguarniarlugu,
kujataani avannaanilu Greenland Tourism A/S-ip immikkoortortaqalernissaanik
Maliinannguaq M. Mĝlgaard-ip siunnersuutaa Atassut-mit
soqutigalnartuutipparput, suleqataaffigisinnaallugulu. Tassami nunatsinni
takornariartitsineq siamasissumik piorsaaffigineqassappat nunarput ima isorartutigaaq,
suut tamarmik qitiusumiit ingerlanneqarsinnaanatik, eqqaamasariaqarpoq kuja-
taa avannaalu kisimik takornariaqarneq ajormata, aamma illoqarfeqarpoq
ullumikkut nunatsinni takornariaqarnikkut suiarsimanerpaamik, tassalu Tunumi
illoqarfiit pingaarnersaanni Tasiilami.
Atassut-mit
isumaqarpugut nunatta avannaani kujataanilu Greenland Tourism A/S-ip immikkoortortaqalernissaa
anguniarneqassappat pinngitsoorani aamma Tasiilami immikkoortortaqartariaqartoq takornariartitsinermik inuussutissarsiuteqarnerup
ineriartortinneqarnerani assigiimmik atugassaqartitsinissaq, taamaassappat
taava ullumikkornit siammasinnerusumik siuarsaanissaq pisariaqarpoq, aamma
eqqaamassavarput nunatsinni timmisartunut suluusalinnut mittarfiit sanaartorneqartut
atorneqalerpata nunatsinni takornarissat tikittartut annertuumik amerleriassammata,
taamaattumik pisussat siumut sillimaffigisariaqarparput, taamaaliunngikkutta
takornariartitsinermi siunnerfipput equngasumik ingerlanneqalissamm
oqareernitsituut nunarput ima isorartutigaaq suut tamarmik qitiusumiit
aqunneqarsinnaanatik.
Siunnersuummut tunngatillugu
naalakkersuisut akissuteqaamminni oqaatigaat nunatsinni takornariartitsinermik
inuussutissarsiuteqarnerup ineriartortinneqarnerani assigiimmik atugassaqartitsinissaq,
taamaassappat taava ullumikkornit siammasinnerusumik siuarsaanissaq pisariaqarpoq,
aamma eqqaamassavarput nunatsinni timmisartunut suluusalinnut mittarfiit
sanaartorneqartut atorneqalerpata nunatsinni takornarissat tikittartut
annertuumik amerleriassammata, taamaattumik pisussat siumut
sillimaffigisariaqarparput, taamaaliunngikkutta takornariartitsinermi
siunnerfipput equngasumik ingerlanneqalissammat.
Nunatsinni takornariartitsineq
oqaaserpassuit atorlugit sammineqarsinnaagaluartoq, matumuuna naalakkersuisut
1998-mi Inatsisartut upernaakkut ataatsimiinnissaannut nunatsinni
takornariartitsinerup ineriartornera pillugu nassuiaateqarnissaq
neriorsuutigimmassuk, tamakkiisumik inerniliinissaq tamatumani anguniarlugu, taamaattumik
Atassut-miit nassuiaat utaqqeqqaarusupparput aalajangiivinnissaq pitinnagu.
Naggataatigut Atassut-miit
pingaartillugu aammalu pissutissaqarpugut Tasiilami takornariartitsisarnerup
siuarsarneqarnerani Hotel Ammassalik piginnittut nersualaassallugu, pisortat
qanoq iliornissaat utaqqinagit ikioqatigiinnikkut nunatsinni
takornariartitsinikkut siuarsimanerpaatut ingerlatsilersimammata, naak
kommuneqarfik pisoorsuartut oqaatigineqarsinnaanngikkaluartoq. Kiisalu aamma
Atassut-miit nersualaarusupparput Qaanaami Hotel-iutilik assorsuaq takornariartitsinermik
annertuumik suliniuteqarnermigut kusanartumik aammattaaq angusaqarsimammat.
Taamatuttaaq isorliunerusuni kusanartigisumik angusaqartoqarsinnaappat sooq
taava nunatta sinnerani takornariartitsinerup siuarsarneqarniarnerani pisortat
kisimik isumalluutigineqassappat.
Taamatut siunnersuut
saqqummiunneqartoq soqutigalugu Atassut-miit oqaaseqarfigaarput, qilanaarpugut
1998-mi Inatsisartut ataatsimiinnissaannut Naalakkersuisut takornariaqarneq
pillugu tamakkiisumik nassuiaateqarnisaannut.
Josef Motzfeldt, Inuit Ataqatigiit oqaaseqartuat:
Inuussutissarsiutit inuiaqatigiit
pingaarnertut nappatigisinnaasaasa pingajuat takornariartitsineq, ullumikkutut
ingerlanneqarnermisut oqimaaqatigiinngitsumik ingerlassaguni, nunap
immikkoortuisa ilaannut iluaqutaasinnaanngilaq.
Ajornartorsiut naatsorsuutigisamik
aatsaat qaangerneqarsinnaavoq, kommuunit aammalu Greenland Tourism-illu
suleqatigiinnerisigut.
Nutaamik eqqarsartoqartariaqarpoq,
inuussutissarsiut nutaaq matumani pineqarmat. Ilumut nunamut tamarmut
iluaqutaasumik malunnaatilimmillu ineriartortitsissagaanni eqqarsartaatsit
nutartertariaqartut ilagaat. Ullumikkummi nunap immikkoortui ataatsiakkaat
kisimik annerusumik ineriartorfiupput, tamannalu ineriartortitsineq inuit
ataasiakkaat paasisimasaqariissusiannut atavallaarpoq, inuiaqatigiinnullu
tamakkiisumik sunniuteqanngippallaarluni.
Inuit naqqaniit
soqutiginninngikkutta, naatsorsuutigineqanngikkutta peqataatinneqanngikkuttalu,
aningaasat qanorluunniit amerlatigisut aningaasaliissutigigaluarutsigit, taakku
iluaqutaanngitsumik atorneqassapput, illuatungaaniilluaasiit
isiginnaartuinnartut inissinneqassalluta.
Greenland Tourism-ip qanorluunniit
nunarput takoqqutigisinnaavaa, nunatsinnili nunaqavissut periarfissinniarlugit
sulinianngikkutta siunnerfissaqanngikkuttalu inuiaqatigiit neriulussinnartissavagut.
Greenland Tourism-ip
takornariartitsiviit pisariaqartitsineq naapertorlugu ikiugassarai sinerissamiittut,
aappaagumullu 23. mio. kr-ninik aningaasaliiffigissagipput siunnersuutaavoq,
aningaasanik inatsisissakkut. Taakkulu aningaasat avammut usassaarinermuinnaq
atornagit, aamma nunap sinnerani ineriartortitsiviunngitsuni suliniarnernut
atorneqartariaqarput. Sumummi iluaqutaassava, aningaasarpassuit atorlugit
nunarput takoqqusaarutigigutsigu, takornariaqarnerup tungaatigut sumiiffiit
ilarpassui katataagaluttuinnartillugit.
Greenland Tourism periutsinik
ilisimasaqarpoq, aningaasaateqarpoq, imaluunniit akissaqartariaqarpoq allani
ineriartortitsinermi peqataanissaminut.
Kommunit innuttaasullu
takornariartitsinermik aallartitsiniartut qanimut pissutsinik periarfissanillu
ilisimasaqarput.
Nukiit tamakku katillugit
iluaqutiginiarneqartariaqarput.
Taamaattumik nunatsinni
siammasissumik takornariartitsineq ineriartortissagaanni kommuunit,
takornariartitseqatigiit allallu aallartisarniartut tikillugit, GT
suleqataasariaqartoq Inuit Ataqatigiinniit isumaqarpugut.
Gt-p Sassartaarnerunissaanik
siunnersuutigineqartoq Inuit Ataqatigiit tapersersorluinnarpaat,
naalakkersuisullu inussiarnersumik kaammattorumavagut siulersuisuutitatik
aqqutigalugit tamanna suliniutigeqqullugu.
Nunarpummi tamarmi
takornariarfigineqarsinnaasutsiarsuaq ullumikkumut ineriartortitsiviusut nalaatsornerinnaavallaartunik
tunngaveqarput. Ullumikkullu allaffilersornikkut, ilinniarfilersornikkut
suliffissuaqarnikkullu ineriartortitsineq annertunerusumik siuarsaanerni
pisortanit aningaasaliiffigineqartarpoq.
Tamakkunatigulli
periarfissinneqanngitsut takornariartitsinikkut ineriartortitsivigineqarnissaat
inatsisartut pisussaaffigaarput.
Bjarne Kreutzmann, Akulliit Partiat:
Akulliit Partiiata inunnguussaraluguli
assut pingaartillugu suliniutigisimavaa nunarput tamaat ataatsimut isigalugu
takornariartitsisarnerup siuarsarneqarnissaa, minnerunngitsumik nunaqarfiit
eqqarsaatigalugit.
Tassani aamma uparuarsimavara nunaqarfiit
tunisassiornikkut periarfissaqarpianngitsut pinngortitamik alianaatsorsuarmik
avatangiisillit avatangiisiminnik iluaquteqarniarnissaat. Tamatumani
eqqarsaatigalugu takornariartitsisarneq.
Aaqqissuulluakkamik pilersaarusiornikkut
piumassuseqarluarnikkullu, najukkami periarfissat aallaavigalugit
pinngortitamik takornariartitsisarneq allatullu iliuutaasinaasut iluaqutiginiarneqarsinnaapput.
Greenland Tourism-ip nunatta avannaani
kujataanilu immikkoortortaqalernissaanik fru Maliinannguaq M. Mĝlgaard-ip
siunnersuutaa isumaga naapertorlugu isumassarsiaavoq ajunngivissoq, taannalu ataqatigiissinneqarsinnaassaaq
najukkani takornariaqarnermut allaffinnut piumasaqaataasut
minnerpaaffissaannik paasiniaaniarluni Greenland
Tourism-ip/Namminersornerullutik Oqaartussat pilersaarutaannut.
Najukkani takornariartitsisarnermik
suliaqarnerup pitsanngorsaavigineqarnissaa siunertaralugu
akuersissuteqartarnermik aaqqissuussinerup 1998-ip ingerlanerani
atuutilersinneqarnissaanik siunertaq pissanganartutut isigaara.
Najukkani takornarianik sullissinermi
suleqataasut akornanni ataavartumik ingerlatsisoqartannginneranik
saqqummiussilluni allakkiami oqaatigineqartoq isumaqarpunga ullutsinni
pissutsit eqqarsaatigalugit eqquinngitsoq. Takornariartitsisarnermut
tunngatillugu isumaqarpunga, najukkani takornariartitsisarnermik suliaqartut
ilitsoqqussatik tunngavigalugit najukkaminni kulturimut tunngasunik
paasisimasaqarnerugamik nunaqqatitillu ilisarisimalluaramikkik piukkunnarnerpaasut.
Aammami nammineq sulinitsigut aatsaat misilittakkat pissarsiarisinnaavagut
allanit ikiorneqarnissarput utaqqiinnarnagu. tamannami eqqumiippallaassaqaaq.
Nassuiaat Inatsisartut 1998-imi
upernaakkut ataatsimiinnissaanni saqqummiunneqassamaartoq qilanaaralugu
utaqqissavara.
Bjarne Kreutzmann, Anthon Frederiksen, Kattusseqatigiit
sinnerlugit:
Kattusseqatigiit oqaasissaat imaapput.
Inatsisartunut ilaasortap Maliinannguaq M.
Mĝlgaard-ip siunnersuutaa Kattusseqatigiinniit tunngaviatigut isumaqatigaarput.
Matumanilu innersuussutigissuakka 1996-imi
upernaakkut inatsisartut ataatsimiinnitsinni takornariaqarnikkut ingerlatsineq
pillugu nassuiaatip saqqummiunneqarnerani oqaaseqaatigisakka.
Tassami nunaqavissut
salliutinneqarnissaat, nunatsinnilu pioreersut, soorlu aalisariutut siunertamut
atorunnaartut, nunaqarfiit inuerussimasut il.il. atorluarneqarnerulernissaat
nunatsinni aningaasarsiornikkut isertitsissutaasinnaasut suulluunniit
piorsarneqarlutillu ineriartortinneqartuarnissaat kattusseqatigiinniit
soqutigisatta ilagilluinnarpaat.
Soorunami sutigut tamatigut piorsaanerit,
ineriartortitsinerilluunniit ingerlanneqartillugit siumuinnaq isigineq
ajornartarpoq, tassami suna tamarmi illuatungeqartarmat.
Matumani eqqarsaatigaakka nunaqqatigut
kalaallit ullumimut annikippallaartumik suli takornariaqarnerup iluani
atorneqartartut, illuatungaatigullu nunami allamiut, nunaqavissumik aasiit
annertuallaartumik ingiangaangaluttuinnartut, taamaattumik alloriarnermiit,
alloriarnermut nikeriaqqinnginnermi sutigut tamatigut kalaallit
salliutinneqarnissaat qulakkeeqqaartariaqarparput.
Taamaattumik Greenland Tourism-i avannaani
kujataanilu immikkoortortaqalissappat, taakkua suliniutissaasa pingaarnerit
ilagisariaqarpaat kalaallit takornariartitsinermi annerusumik atorneqalernissaat.
Assersuutigalugu aalisartut piniartullu,
umiatsiaaqqamik akisunerpaajunngikkaluartumik angallatillit, aalisariarnermi,
piniariarnermilu takornarissanik ilaasoqarsinnaanerat, soorunami perusuttunut,
annerusumik periarfissiuunneqartariaqarpoq.
Aammalu takornariartitsivinni
ingerlatsivinni pisortat, ingerlatanik allanik sammisaqannginnissaat qulakkeerneqartariaqarpoq,
tassami takornariartitsineq pimoorullugu sulissutigissangaanni, taanna kisimi
pisortaritinneqartumik sammineqartariaqarpoq.
Inatsisartunut ilaasortaq Maliinannguaq M.
Mĝlgaard isumaqatigaara oqarmat, avannaani kujataanilu Greenland Tourism A/S-ip
immikkoortortaqalerneratigut innuttaasunut qanimut
peqataatitsisoqalersinnaanera aqqutissiuunneqassagaluarmat, tassami nunarput
angeqaaq, taamaammallu ingerlatsinerit, aqutsinerillu tamarmik Nuuk-miik
ingerlanneqartariaqanngillat.
Aamma aappaatigut Naalakkersuisut
isumaqatigaakka oqarmata, takornariaqarnermi periaatsit sukumiisumik
misissuiffigineqarnissaannut piffissanngorsimanersoq eqqarsaatigineqartariaqalinnginnersoq.
Ilumut. Isumaqarpunga paasissutissat annertuut ilanngullugit 1998-imi
inatsisartut upernaakkut ataatsimiinnissaannut ilanngunneqartariaqartut.
Taamatut naakkaluamik oqaaseqarlunga
siunnersuut, ilaatigut takornarissat ukiumut 61.000-it anguniarneqarnerannut
iluaqutaasinnaasoq Kattusseqatigiinniit taperserpara, kisiannili ajorinagu
paasissutissat amerlanerusut nutaallu, inatsisartut upernaakkut 1998-imi
ataatsimiinnissaanni saqqummiunneqarnissaat utaqqineqassappat. Taama
oqaaseqarput Kattusseqatigiit.
Peter Grĝnvold Samuelsen, Takornariaqarnermut Naalakkersuisoq:
Tassa siullermik partiit oqaaseqartui tamaasa sisamaasut, oqaaseqartut tallimaagaluarlutik taakku tamaasa qutsavigaakka Naalakkersuisut sinnerlugit.
Tusarnaarpagut partiininngaanniit oqariartuutigineqartut. Aamma isummersuutinik aaliangersimavissunik kaasarfimmiorluta maanga isinngilagut. Ammasumik oqaloqataarusuppugut, inuutissarsiutip pingaarnerit pingajuattut toqqarsimasatta ineriartorteqqinnissaata Inatsisartuni maani apeqquteqaat una iluatsillugu. Oqaaseqarfigineqarnissaanut peqataassalluta.
Akissuteqarninni innersuussutigaara 1992-mi aamma 1996-mi ineriartortitsinermut matumunnga tunngavissat maani Inatsisartuni isummersorfigineqarlutik tapersersorneqarsimanerat. Taanna uniffigissanngilarput aamma ineriartortitsineq ingerlavoq. Ingerlaneranilu inatsisiliortut aningaasaliisartugullu aamma tamatumani soorunami peqataanissaat, isumaqatiginaannarani pisariaqartuuvoq.
Oqaaseqarfigisassat ataasiakkaat tikilinnginnerini uani pingaarnerpaatillugu, apeqquteqaateqartup ujartormagu Greenland Tourism-i Nuuk-mi qitiusumik allaffeqarfiata saniatigut sineriammi ineriartortitsinerup uukkataarneqarnerunissaa. Ersarinnerulersittariaqartoq annertunerulersittariaqartoq, tassunga atatillugu ukua oqaatigilaarusuppakka, Greenland Tourism-ip assersuutigalugu ukiormanna 1997-imi sineriammi sulinermut peqataaffigisai.
Illoqqortoormiut aallarniutigigutsigit. Tassani Out-feed-itut inuit marluk peqataatinneqarsimapput. Illoqqortoormiit inuutissarsiutitigut ineriartortinneqarnissaa pillugu Naalakkersuisut kommunillu suleqatigiillutik, ataatsimiittartuini GT peqataavoq. Island-iminngaanniit selskab-i Nonni Travel, kommunalbestyrelsep illoqqortoormiuni suleqatigilluinnarlugu maannakkut takornariartitsinerup ineriartortinneqarneranut suliaqartoq, aamma GT-minngaanniit peqataaffigineqarpoq.
Tasiilami. Tasiilaq eqqarsaatigalugu, takornariartitsinermi pisortaq kommunilu peqatigalugit suliniuteqartoqarpoq, ilaatigut illut imaluunniit illuaqqat arfineq marluk sanaartorneqarlutik. Pisuttartut nuna assingani aqqutigisinnaasaasa innersuunneqarnerani suliaqartoqarpoq 1998-mi saqqummersinneqartussamik.
Kuummiut-i eqalussuarniarneq misiliutigineqarsimavoq, aliikkutaralugu sammineqarsinnaanersoq paasiniarlugu.
Kulusuk-mi akunnittarfiliortoqarpoq, maj-imi naammassineqartussamik. Ataatsimeeqateqartoqartarsimavoq, aammalu Tasiilap kommunalbestyrelsiata inuutissarsiutit pillugit ineriartortinneqarnissaanut ataatsimiititaliami Naalakkersuisut peqatigalugit suliarineqarpoq. Aamma tassani GT suleqataasimalluni.
Nanortalimminngaanniit inuit marluk aamma aallarnisaasutut pikkorissartinneqarsimapput. Takornariartitsinermi allaffiup sulisussaanik. Sulisussarsiornermi GT suleqataasimavoq.
Qaqortumi inuit takornariat pisuttut aqqutissaasa aamma nunap assiliorneqarnera 98-mi saqqummertussaq aamma suleqataaffigaa, kiisalu aamma kujaataani kommunit tamaasa ataatsimeeqatigineqarsimapput Greenland Tourism-mit sulisuminngaaniit ilaatigut aamma umiarsuit sinersortaatit takornariartaatit tikinnerani qanoq pissuseqartoqassanersoq oqaloqatiginnittunit.
Narsami Igaliko-mi illuaqqiorneq taanna ingerlanneqartoq aamma peqataaffigineqarsimavoq aamma pisuttartut aqqutissaata nalunaarsorneqarneranut aamma suleqataalluni.
Narsarsuarmi aamma taamatut. Nuummi, Maniitsumi, Kangerlussuarmi, Sisimiuni, Aasianni, Qasigiannguani, Ilulissani, Qeqertarsuarmi, Saqqami, Uummannami tamakkua tamaasa peqatigalugit inuit, kommunit Greenland Tourism suleqataavoq.
Taakkua saniatigut Qeqertarsuup tunuani avannaanilumi takornariartitsisartut ukiumoortumik ataatsimiisinneqartarput aamma taamatut kujataani kommunit eqqarsaatigalugit tassanilu najukkani ataasiakkaani takornariartitsinermik suliaqartut ukiumut misilissimasatik naapissimasatik oqaluuserisarpaat aammalu ukiumi tulliuttumi qanoq pilersaaruteqarnertik oqaloqatigiissutigisarlugit qanorlu suleqatigiinnerusinnaanertik aamma oqaloqatigiissutigisarlugit.
Taassuma saniatigut aamma nunat avannarliit killiit takornariartitsineq pillugu suleqatigiinnerminni nuisitsisarnerini amerligaluttuinnartut nunatsinneersut peqataanermikkut tassani aamma naapeqatigiillutik pilersaarutit ukiumi tulliuttumi pereersullu oqaloqatigiissutigisarpaat. Taamaalillutik aamma isumasioqatigiinnikkut suleqatigiinnerullu tungaasigut aamma periarfissatik misissuataartarlugit isummersorfigalugillu.
Ilumut takornariartitsineq siunissaqarpoq, soorlu partiit oqaaseqartui tamarmik taamatut oqartut. Ukiualunnguit matuma siornatigut ineriartortitsineq aallartimmat pissutsit ullumikkut sanilliukkaanni alloriartoqarsimavoq. Taanna miserratigineqarsinnaanngilaq. Inuusuttut inuillu amerlanerusut takornariartitsinermi suleqataalersimapput. Pikkorissartitsinerit ingerlanneqalersimapput.
Siunnerfiit tunngaviusut taakkua inatsisartuniit isummersorfigineqartut akuerineqarsimapput. Taakkulu ilagaat Greenland Tourism suliassaqartitaammat aamma aningaasalersorneqartumik nunatta ussassaarutigineqarnera takornarianik soqutiginnilersitsineq nunatsinni takornariaqartitsinermik suliaqartunik ikorfartuinerlu ingerlanneqarput.
Angallannikkut pissutsit maannakkut pisoqaraluttuarfiulerput. Akunnittarfiliortiterneq Inatsisartut aningaasaliinerisigut aamma peqataaffigineqarpoq. Takornariaqartitsinermi suliaqartut atortussaminnik imaluunniit aallartitsiniarnerminni aningaasatigut tapersersorneqarnerat periarfissaalersimavoq.
Taakkua pereerput soorlulu maannakkut oqariartuuteqarnerit tusarnaakkakka Naalakkersuisut tungaanninngaanniit isumaqatigisinnaasagut ukuupput alloriaqqinnissaq tulleq uaneralaannguamiilerpoq. Minnerunngitsumik unaasoq, innuttaasut maani nunatsinni innuttaasut nunaqavissut tassani inuutissarsiummi peqataaninnerulernissaat.
Nunap immikkortui aaqqissuussaanerusumik suleqatigineqarnissaat, kissaatigineqartoq taanna tusaavarput aamma mattutinngilarput naalakkersuisooqatigiit nutaat Naalakkersuisut nikillatsiarnerini naalakkersuisoqarfinnillu aaqqissuusillatsiarnermi alloriarfigisaat unaavoq: Tassalu isumaqatigiissuteqarnerup naalakkersuisooqatigiinnermi isumaqatigiissummi ersarissarneqarmat, takornariartitsineq pillugu erseqqissarneqassasoq naalakkersuisooqatigiit siunerfigigaat takornariartitsinikkut aningaasarsiornerup annertusarneqarnissaata anguniarneqarnera nangeqqinneqartoq, tamatumanilu kommunit takornariartitsinikkut suliniutaat peqatigalugit ingerlatsineq nukittorsarneqassasoq.
Ullumikkullu naalakkersuisuninngaanniit aamma oqariartornitsinni nalunaarutigisarput unaavoq takornariartitsinerup iluani ilinniartitaanerit, pikkorissartitsinerit taakkua ilusilimmik 1998-p upernaavani saqqummiunneqarumaartut inatsisartunut.
Alla oqaatiginngisarput tassaavoq 1998-mi ukiakkut saqqummiutilersaagarput tassaasoq takornariartitsinerup inuutissarsiutitut sukutsitaaguna aningaasarsiorfigigipput, sukutsitaaguna aningaasarsiorfissaqqissutut ilusilerniaripput imaluunniit uukkatariniaripput. Oqarnikuuvugut ukiut ima amerlatigisut qaangiuppata takorniariat ima amerlatigilersimassapput taakkulu tunniussinnaasaat aajuna ukiumut 500 mill. koruunit.
Taamatut siunnerfeqarpugut. Kisianni takornariartitsinerup iluani uukkatarpassuit amerlaqisut sukutsitaaniuna aningaasat taakkua nassaariniarigut. Qanoriliorutta takornarianinngaanniit aningaasat taakkua aatsaat kaasarfiininngaaniit aasinnaavagut. Iliuuseqanngikkutta soorunami aallernissarput killeqassaaq qanorluunniit amerlatigisut tikikkaluarpata.
Taammaattumik aamma maannakkut oqariartuutigineqartut tamaasa ilanngullugit Naalakkersuisut suleriaqqinnissatsinni upernaamut nassuiaateqaqqinnissarput aallaavigalugu taassuma saniatigut siunnerfimmik toraarsisimanerput taanna nalilersoqqissuarput, nalilersorlugulu inatsisartunut saqqummiukkumaarlugu.
Asuli tigunngilarput oqariartorneq, qaammarsaaneq, peqataatitsitineq inuttaasunit takornariartitsinerup piorsarneqarnerini qanoq pingaaruteqartigisoq isumaqataaffigaarput, akiunngilarput. Taannalu tunaartaralugu siunnerfiup nalilersoqqinneqaqqinneqarneranut atatillugu oqariartuutigissavarput.
Una ataaseq tamatumani eqqaamaqqussavara tassa amerlanerpaanik peqataatitsineq taanna pingaarnerusariaqanngimmat, kisiannili peqataanerup kimeqassusia suliniutit pitsaassusii taakkua aamma puigussannginnatsigit.
Oqaatigisinnaavara aningaasanut inatsisip aappassaaneerneqarnisaannut aammami saqqummiunneqareersoq eqqarsaatigalugu. Akunniittarfiliortiternermut aningaasat aningaasaliissutissat taakkua aalajangiusimagatsigit aamma aallarnisaasunut aningaasaliissutissat aalajangiusimagatsigit. Tassani Naalakkersuisutut soorunami Inatsisartunut taamaaliorneq ajoraluarpunga, ataasiakkaarluta oqariartuutigiinnarusuppara ikilisaasoqannginnissaa suliassami matumani pingaarmat. Imaanngitsoq uanga immikkoortortaqarfigigakku, kisianni inuutissarsiutitut aningaasarsiorfissatsitullu. Taamatut oqaatsit kusanartigisut matumani aniatittuannguarlugit suliniutit tassaniittut aningaasartaasa ikilisarneqarnissaat mianersuutigisariaqarmat. Saniatigut oqaluttuannguarluta suliniutit nutaat allat tassunga suliassaqarfimmut ikissagigut. Taanna imminut naapertuutinngimmat erseqqissarusuinnarpara soorunami suliniutinik nutaanik ikisissagutta aamma malitseqartariaqarmat sulisut suliniutissaasa piviusunngortinnissaannut.
Takornariartitsinerup oqaluuserineqarnerini naggataatigut una erseqqissarusuppara. Ilaatigut ullumikkut aviisitigut saqqummiunneqartoq, nissimaamut atatillugu suliaq ukiut arlallit nammanniarsimavarput. Minnerunngitsumik maanni aningaasaliisartut tungaaninngaanniit naammagittarneq angivoq aningaasaleerusunneq piusimavoq, suliassat pissanganartut kusanartut nuannerunartut taakkua sassaalliutigineqartammata.
Naalakkersuisuni nalilersorsimavarput. Aamma taanna saqqummissaaq aningaasanut inatsisissap suliarineqarnerannnut atatillugu. Isumaqarpugut suliniutit qanorluunniit kusanartigisut tassani suliassaqarfimmi nammanniarneqaraluarpata taava eqqartorneqartuninngaanniit amerlanerujussuarnik aningaasanik pisariaqartitsisoqartoq, kivinneqassappat suliassaq taanna, taanalu maannakkut nukissaqarfiginngitsutut ipparput. Illuatungaatigut suliassat ilai nissimaap suliffianiittut allanut illukartinneqarsinnaanera taanna isumaliutigaarput.
Taassumalu aamma saniatigut naggaterpallaavatigut oqaatigerusuppara Naalakkersuisuni eqqarsaatitsinniimmat aamma Inatsisartut ataatsimiinneri tamangajaasa tikinneqartartoq. Tassalu inuutissarsiut takornariartitsinermut attuumassuteqarluinnartoq, tassalu sanaluttarneq. Sanaluttarneq iliuuseqarfigerusupparput, aamma matumani ataatsimiinnitsinni aamma tikikkusupparput Inatsisartuniillu taperserneqarumavugut.
Ataatsimiitsitaliani, tusagassiorfitsigut oqallinnermilu tusartuarparput nunap ilaani qanoq inuutissarsiutitigut periarfissaalatsisoqartigisoq. Tunisassiorfinnik pilersitsisarpugut, miliuuninik taamannanik nalilinnik, tunitsivigineqarnerat ilaasa - ilai eqqarsaatigalugit - annikitsuinnaavoq. Taamaalillunilu innuttaasunik sumiiffinni ataasiakkaani suliniuteqarnerit tamakkua aningaasaliissutit annikitsuinnaallutik.
Eqqarsarutta ullumikkut 35-inik illunik sulliviuteqarluta sineriammi. Sumut atorpavut? Errorsiartortoqartarpoq - taana ajunngilaq - aamma uffartarfeqarpoq - aamma taana ajunngilaq. Aamma assigiinngitsutigut piniutitigut atortuutitigut aaqqissuussiffigineqartarput, taana ajunngilaq. Kisianni qanormitaava annikittunnguugaluartunilluunniit sakkulilaarlugit, sanalunnermik sakkunik atortuutinik, inuillu taakkua nunap immikkoortukkuutaarlugit ornillugit pikkorissartillugit. Soorlu Ittoqqortoormiini misilinneqareertoq, Tasiilakkunni, Avanersuakkunni. Sanalunnerup annikittunnguugaluarluni inoqutigiinnut aningaasanik tunisisinnaanera, illussaarsuarnik sananngikkaluarluni pissarsiviusinnaasoq, taana nalunngereerparput. Taamaattumik aamma Inatsisartuninngaanniit aamma niuernermut ataatsimiitsitaliaminngaanniit, qularnanngitsumillu aamma maannakkut takornariarnermut ataatsimiitsitaliaminngaanniit noqqaassutigineqartuartoq taanna iliuuseqarfigissavarput.
Taassuma aamma qularnanngitsumik takutissavaa inuit namminneerlutik misigigunikku aamma oorinnguanik pissarsivigisinnaallugu. Ilumut upperaara aatsaat paasilissavarput takornariartitsineq inuutissarsiutaasinnaasoq aningaasamininnguanik aamma pissarsiviusinnaasoq. Taamaalillunilu soqutiginninneq tassani annertusissasoq qularinngilara.
Immaqa tannaaleraluarlugu taamatut oqaaseqarpunga. Qujaqqippunga partiit oqaaseqartuinut. Aamma suliassaq taamaalillugu nalilersoqqissavarput. Imatut oqariartuuterput Naalakkersuisunit uaniippoq eqikkarlugu: GT immini suliffittut immikkut sumi tamaani allaffilersunngikkaluarlugu kisianni allatut aaqqissuussinikkut peqataatinneqarnerata aaqqissuuneqarnissaa taanna aqqutissiuukkumagipput.
Josef Motzfeldt, Inuit Ataqatigiit oqaaseqartuat:
Oqaluuserisassami siunnersuuteqartoq Maliinannguaq Markussen Mĝlgaard sinnerlugu oqaaserineqartut nuannaarutigaavut. Tassa partiinit amerlanernit toqqaanartumik immikkoortortaqalersinnaaneq, isumassarsiatut ajunngitsutut ilassineqarpoq. Kisiannili aamma tassunga ilanngullugu Inuit Ataqatigiinninngaanniit paasivarput, upernaaru Inatsisartut upernaakkut ataatsimiinnissaannut, takornariartitsinermut tunngasunik nassuiaasoqarnissaa, ilimasaarutaasoq. Tamanna ajunngilluinnarpoq - pisariaqarpoq - inuussutissarsiut nutaaq ineriartuleruttortoq, qanoq oqassuunga, illinermut ikkutilivinnginnerani sapinngisamik aaqqitassartai aaqqissuussivigineqarsinnaasappata. Aamma pisortat kisimik isumalluutigineqartariaqannginnerat tassani siunnersuuteqartup isumagilluinnarmagu, oqaaseqartut ilaannut oqaatigiinnassavara. Tassa Namminersornerullutik Oqartussat selskabimik pilersitsisimagunik inuiaqatigiinni siuarsaanissamut siunnersortitut, qitiusumillu ingerlatsivittut siunnerfeqartumik. Tamanna inuiaqatigiinni isumalluutigineqarmat paasineqartariaqarpoq- aamma paasineqarpoq partiinit amerlanernit.
Kiisalu angallassisartut - sapinngisamik takornariartitsinermi angallassisartut Aguedit@ - tassa nunatta ilaanni sumiiffik najoqqutaralugu nassuiaasartut angallassillutik. Ilaatigut GT-p - Greeland Tourism-ip - peqataaffigisaanik pikkorissartinneqarsinnaanerat isumaqarpugut eqqarsaataasariaqartoq sunngiffimmiluunniit inatsit aallaavigalugu. Tamanna sumiiffinni assigiinngisitaartuni ingerlanneqarsinnaammat.
Ullumikkummi nunatta immikkoortuini assigiinngitsuni ineriartortitsisimaneq oqaatigigatsigu inuit ataasiakkaat aallussisinnaanerannik, paasisimasaqarnerannik aallaaveqarpallaartoq. Tassani assersuutitut taarusuppagut, kommunit ilai atorfeqartitaqarput inuussutissarsiutinut takornariartitsinermullu siunnersortitut taallugu. Ilaatigut angallassiviutillit namminneq ingerlassiniarsaripput. Ilaatigut ingerlatseqatigiiffeqartoq selskabitut imaluunniit turismeservicetut taagorneqartunik. Ilaatigullu akunnittarfiutilinnik takornariaqarneq nunap immikkoortuini ingerlanneqarluni.
Tamakku tamaasa ilanngullugit nassuiaateqarfigineqarnissaat, nassuiaammullu atatillugu aamma misilittakkat ajunngitsut najoqqutaralugit, tikkuussinertalimmik upernaaru Naalakkersuisut saqqummiunniagaat qilanaaraarput. Kiisalu aamma qularnanngilaq takornariartitsisartut assigiinngitsut sineriammi immikkuutaarlutik eqqarsaatigisartagaat tassaasoq: aamma uagut Inatsisartuninngaanniit soqutigisariaqagarput tassalu, takornariartarnerup aasakkuinnaq pisarunnaarluni sapinngisamik ukiup immikkoortuini annertuninngorluni siammarneqarsinnaanerata eqqarsaataanissaa aamma nassuiaatigineqartumi eqqarsaataasussatut tamanna tunniukkusupparput.
Ruth Heilmann, Siumup oqaaseqartua:
Annikitsunnguamik Siumup
gruppianinngaanniit oqaaserisakka erseqqissaqqilaarniarpakka ilaatigut IA-p
oqaaserisaa una nunap immikkoortukkuutaavani Greeland Tourism-imi allaffeqannginnera pillugu, uani isiginnaartuinnartut
inissinneqartariaqanngilagut. Taana taamattariaqanngilaq soorunami. Isiginnaartuuneq aamma
utaqqiinartuuneq nunatsinni ineriartortumi pingaartumillu namminersulerusuttumi
naleqqutinngitsutut tamatta nassuerutigisinnaavarput. Taamaattumik nunatsinni
immikkoortukkuutaamik allaffeqarfiliortarnerit, qanoq iluseqarnissaannik
utaqqiinalersitsinermik isumalluuteqaanalersitsinermillu kinguneqaanartartut
pinngitsoortinniartariaqarpagut, sapinngisamik.
Akerlianilli isumaqarnarpoq kommunit
suleqatigiikkuuttaarfiini/suleqatigiiffiini periarfissaqarluartoq
periarfissaqartuassallunilu takornariartitsinerup ataqatigiissaartumik aamma
suleqatigiiffiusumik ingerlanneqalernissaa aammali ineriartortinneqarnissaa.
Pingaartumillu aamma angallannikkut ataqatigiissumik aaqqissuussinerit
suleqatigiiffiullutik, akerliuuffiuallaaratik ingerlanneqalernissaat taana
isumaqarpunga pisariaqartoq. Tamanna aamma takornariat naligiissumik
arlaannulluunniit aamma
nukillaarsaataanngitsumik, unammilleqatigiiffiusumillu ingerlanneqarsinnaammat.
Immikkuutaartumi sumi tamaani Tunumi, Avannaani Kujataanilu Greenland Tourism-i
immikkoortortaqarfiliunngikkaluarlugu. Taamaattoqalissagaluarpanaasiit una
pinngilaq uagut pinngilagut aamma tamakku oqaatsit aniatinneqalerumaarnissaat
taana pinngitsoorsimatittariaqarmat.
Naalakkersuisup oqaaserisai
qujassutigaakka, taavalu aamma
upernaammut pissanngatigalugu takornariartitsineq suliniutillu pillugit immaqa
sakkortunerusumik aamma ersarinnerusumik politikkeqarluta
ineriartortitsinissarput neriuutigalugu saqqummiunneqarumaartoq. Tassami uagut
aamma kalaaliusugut pingaartumik aamma kiffartuussinissamut
peqataanerusariaqarpugut. Isumaqarpungalu aamma tamanna aqqutissiuunneqassasoq
aamma Siumup gruppianit oqaatigineqarmat, pikkorissartitsinerit annertuut
ingerlanneqartariaqartut. Tamakku aqqutigalugit kalallit namminneq
peqataanissarput aamma anguneqarsinnaavoq.
Jakob Siverthsen, Atassut:
Marlussuit oqaaseqarfigilaarniarpakka,
tassa Naalakkersuisup oqaatigimmagu sanaluttarneq eqqarsaatigalugu annertuumik
saqqummiussaqarnissani naatsorsuutigineqartariaqartoq. Isumaqarpunga taana
assut pingaaruteqartoq. Nunatsinni takornarissat amerliartortillugit aamma
tammauittuttanik pisiassaqartinneqarnissaat pinngitsoorneqarsinnaanngilaq.
Taavalu aamma erseqqissumik
oqaatigigatsigu Atassummiit pisortat kisiisa eqqarsaatigineqartariaqanngitsut,
nunatsinni takornariaqarnerup annertusarneqarnera eqqarsaatigalugu. Aalajangiusimavarput
inuit nammineersinnaasut aammalu piumassuseqartut tapersersorneqarnerusariaqarput.
Taamaalilluni piumassuseqartut uniinannginnissaat siunissami
qulakkeerneqarsinnaaqqullugu.
Nalunngilarput sunaluunniit
pisortanit aqunneqalerpat, taava avataanniit piumassuseqartuugaluit isiginnaartuuginnalersarput. Taamaattumik
isumaqarpugut Atassummiit, takornariaqarneq eqqarsaatigalugu piumassuseqartoq
nalunngikkutsigu taava piumassuseqartut tamakkua sapinngisamik aamma tapersersorneqartariaqarmata.
Ataatsimiinnermik aqutsisoq:
Tassa taamaasilluni ullumikkut
ullormut oqaluuserisassat immikkoortoq 43, suleriaatsini paragraf 41
naapertorlugu apeqquteqaatip oqaluuserineqarnera tamaannga killeqarpoq.
Oqaluuserisaq naammassivoq.