Oqaluuserisassani immokkoortoq 52-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 4. November 1997, nal. 11.22
Ataatsimiinnermik aqutsisoq: Inatsisartut Siulittaasuat Anders Andreassen.
Kristine Raahauge (S), Ataatsimiititaliap siulittaasua:
Inatsisartut Kultureqarnermut Ilinniartitaanermullu Ataatsimiititaliaata
Isumaliutissiissutaa saqqummiutissavara.
Inatsisartut Kultureqarnermut Ilinniartitaanermullu Ataatsimiititaliaat
1997-imi ukiakkut ataatsimiinnerup nalaani arlaleriarluni ataatsimiittarpoq.
Ataatsimiititaliap Inatsisartunut ilaasortap Manasse Berthelsenip
"Sanaluttartut aaqqissuussaanerusumik ataavartumillu pikkorissartinneqartarnissaannut@
siunnersuut kiisalu Asinerissami sanaluttartut atortussaminnik piniarneranni
ajornannginnerusumik periarfissinnissaat" pillugu siunnersuutaa sammivaa.
Taassuma saniatigut ataatsimiititaliap qulequttat allat sammivai,
isumaliutissiissummi matumani nassuiaateqarfigineqartut.
Manasse Berthelsenip siunnersuutaata suliarineqarneranut atatillugu
ataatsimiititaliaq ilaatigut oqaasiinnartigut allakkatigullu Kultureqarnermut,
Ilinniartitaanermut Ilageeqarnermullu Pisortaqarfimmit
ilisimatitsissuteqarfigineqartarpoq. Ataatsimiititaliamut
ilisimatitsissutigineqartarput eqqumiitsuliortunik pikkorissartitsisarnerit
Kultureqarnermut, Ilinniartitaanermut Ilageeqarnermullu Pisortaqarfimmit
ilisimasaqarfigineqartut. Taamatuttaaq ataatsimiititaliap ilisimavaa kommunit
ilaat sanaluttartunik eqqumiitsuliortunillu nammineerlutik
pikkorissartitsisartut. Kissaatiginarpoq tamakkununnga tunngatillugu kommunit
aamma Kultureqarnermut, Ilinniartitaanermut Ilageeqarnermullu Pisortaqarfiup
akornanni annertunerusumik suleqatigiittoqalissasoq.
Ataatsimiititaliami isumaqarpugut sanaluttartut eqqumiitsuliortullu
inuussutissarsiummik ingerlataqarnissamut periarfissat siuarsarneqartariaqartut
sanalunnikkut eqqumiitsuliornikkullu tunisassiat ilaatigut takornarianut
annertunerusumik tunisaalernissaat siunertaralugu. Taamatut
ineriartortitsisoqassappat ilinniartitaaneq pisariaqarpoq. Tamatumunnga
atatillugu ataatsimiititaliap ajuusaarnartuutippaa eqqumiitsuliorneq pillugu
isumasioqatigiissitsinissaq pilersaarutaasimagaluartoq
taamaatiinnarneqarsimammat.
Manasse Berthelsenip siunnersuutaa paasissutissallu siuliini taaneqartut
tunngavigalugit ataatsimiititaliap isumaqatigiissup inassutigaa
naalakkersuisut sanalunneq eqqumiitsuliornerlu pillugit ullumikkut killiffiit
pillugit nalunaarusiamik kiisalu sanaluttarnermi eqqumiitsuliornermilu
pikkorissartitsinermik ilitsersuisartunik siunnersortimilluunniit
atorfinitsitsinissaq pillugu 1998-imi upernaakkut ataatsimiinnermut
iliuusissatut pilersaarummik saqqummiussissasut sanaluttartunut
eqqumiitsuliortunullu inuussutissarsiornikkut periarfissat
pikkorissartitsisarnissallu siuarsarniarlugit.
Taamatuttaaq ataatsimiititaliap Ilisimatusarfimmi init ilinniartitsiviit
oqallisigai. Ataatsimiititaliami isumaqarpugut Ilisimatusarfimmi ilinniartut
sulisullu inissatigut atugarisaat naammaginanngitsut taamatuttaaq illut
pitsaasuunngitsut inissakilliortoqarlunilu.
Taamaammat ataatsimiititaliap isumaqatigiissup Naalakkersuisunut
kaammattuutigissavaa pissutsit tamakku sapinngisamik piaartumik
aaqqinneqassasut.
Kultureqarnermut, Ilinniartitaanermut Ilageeqarnermullu Naalakkersuisoq
isumasioqatigineqarpoq. Isumasioqatigiinnermi naalakkersuisunut ilaasortap nunatsinni
atuarfiit oqaluffiillu nutarterneqarnerat pillugu killiffik
nassuiaateqarfigaa. Ataatsimiititaliap nassuiaat tusaatissatut tiguaa
iluarisimaarlugulu nunatsinni oqaluffiit toqusullu inaasa qanoq issusiinik
nalunaarsuineq maannakkut aallartinneqarsimammat.
Ataatsimiititaliap timersortarfeeqqat aamma nunaqarfinni timersortarfiit
assigiinngitsunut periarfissallit sanaartorneqarsinnaanerat oqallisigaa.
Tamatuma kingorna ataatsimiititaliap isumaqatigiissup Naalakkersuisunut
kaammattuutigaa soorlu Atammimmi timersortarfeeraliornissamik
aaqqiissuteqarniaqqullugit najukkami pisariaqartitanut naleqqussakkamik
sanasoqarnissaa eqqarsaatigalugu. Ataatsimiititaliap tamatumunnga atatillugu
Atammimmi innuttaasut nammineerlutik aningaasanik timersortarfeeraliornissamut
tapiissutissanik katersuinermikkut maligassiuilluarsimanerat
erseqqissarusuppaa.
Ataatsimiititaliap isumaqatigiissup naggataatigut kaammattuutigissavaa
sunngiffimmut kulturimullu tunngasutigut kommuninik iluarsaaqqinnissamut
ataatsimiititaliarsuup kaammattuutaasa malitseqartinneqarnissaat
Naalakkersuisut KANUKOKA suleqatigalugu ingerlateqqissagaat, taamatullu aamma
peqatigiiffinnut tapiissuteqartarnernik aaqqissuussinerit Naalakkersuisut
pitsaanerulersinniassagaat.
Ataatsimiititaliami ilaasortaapput: Kristine Raahauge (S), siulittaasoq;
Naimanngitsoq Petersen (A), siulittaasup tullia; Knud Sĝrensen (A); Ruth
Heilmann (S); Manasse Berthelsen (IA).
Konrad Stenholdt, Kultureqarnermut Ilinniarnermut Ilageeqarnermullu
Naalakkersuisoq:
Aallartinnagu oqaatigilaarlara una akissuteqaat aningaasanut inatsisip
1998-mi atuuttussap, suli tamakkiisumik akuersissutigineqanngikkallarnerani
allagaasimanera pillugu saqqummiunnerani naqqiissuteqalaartarumaarpunga.
Inatsisisartut Kultureqanermut Ilinniartinaanermullu Ataatsimiititaliaat
isumaliutissiissusiorsimavoq, tassani saqqummiunneqarput inassuteqaatit
tapersiinerillu Naalakkersuisut oqaaseqarfigissallugit pissuteqartitaat.
Sanaluttartut aaqqissuussaanerusumik ataavartumillu pikkorissartinneqarnissaannut,
kissalu sinerissami sanaluttartut atortussaminnim piniarneranni
ajornannginnerusumik periarfissinnissaat pillugit Inatsisartunut ilaasortap
Manasse Berthelsen-ip siunnersuutai pillugit, ataatsimiititaliap inassutigaa
Naalakkersuisut sanalunneq eqqumiitsuliornerlu pillugit, ullumikku killiffik
pillugu nalunaarusiamik kiisalu sanaluttarnermi eqqumiitsuliornermilu
pikkorissartitsinermi ilitsersuisartunik siunnersortimilluunniit
atorfinitsitsinissaq pillugu, 1998-imi upernaakkut ataatsimiinnermut
iliuusissatut pilersaarummik saqqummiussissasut sanaluttartunut
eqqumiitsuliortunullu inuussutissarsiornikkut periarfissat
pikkorissartitsisarnissallu siuarsarniarlugit.
Eqqumiitsuliorneq ulluinnarni pigaangatsigu pisarpagut ammit, meqqut,
tuugaat, nassuit, saarngit, soqqat, qisuit, ujaqqat aammalu allat nunatsinni
pinngortitami nassaarisinnaasagut atorlugit suliaqarneq. Oqaatigilluaannarlugu
nunatsinni pinngortitami nasaarisinnaasagut atorlugit suliaqarneq.
Oqaatigilluaannarlugu nunatsinni tamatta eqqumiitsuliorsinnaavugut, taamatullu
suliaqarneq saniatigooralugu. Sunngiffimmilu sammisaammat kikkut taamatut
suliaqarnissaat ullumikkut killissaqartitaanngilaq.
Nunatsinni inuit amerliartuinnartut eqqumiitsuliornermik aallutaqartut,
ilaasa sunngiffimminni amerlanerulli saniatigut isertitsissutissatut.
Ikittuinnaat, amerliartuinnartulli eqqumiitsuliaminnik tunisaqartarnertik
aningaasarsiutigilluarsinnaalersimavaat taamaalillutillu pingaarnerutillugu
aningaasarsiutigilersimallugu.
Kalaallit eqqumiitsuliaat Canada-mi, Alaska-mi aamma Sibiria-mi
naggueqatitta eqqumiitsuliaannut naleqqiullugit pitsaasorujussuupput.
Eqqumiitsuliortut akornanni unammileriartorneq aammalu inuiaqatigiinni, taamalu
pisiortortartuniit malinnaaffigineqarnerulerneq ilutigalugu eqqumiitsuliat
naammassineqartartut ukiuni kingullerni pitsaaneruleriartorsimapput.
Takornariartitsinerup annertusiartuaarnera ilutigalugu aqqusaartunut
taakkununnga eqqumiitsuliat tunineqartut amerliartuinnarput. Tamatuma
peqatigisaanik nunatsinni innuttaasut nunatsinni eqqumitsuliat sanalukkallu
tunissutissatut naleqqussiat ilisimaarileriartorpaat.
Nunatsinni eqqumiitsuliortarneq suli nuna tamakkerlugu maannamut
aaqqissuussivigineqarsimanngilaq. Matumani pineqarput eqqumiitsuliortut namminneq
akunnerminni aaqqissuussaanerat, taakkuninnga ilinniartitaanernik
pilersitsiortornerit, sannavinnik pilersitsinerit aammalu tuniniaasartunik
pilersitsinerit. Taamaattoq nunatsinni ataasiakkaani eqqumiitsuliortut tuniniaasarnerlu
aaqqissuussaapput, aallartisarnerusumilli.
Sanaluttartunut eqqumiitsuliortunullu inuussutissarsiornikkut periarfissat
pikkorissartitsisarnissallu siuarsarniarlugit sanaluttarnermi
eqqumiitsuliortarnermilu pikkorissartitsinermik ilitsersuisartunik
siunnersortimilluunniit atorfinitsitsinissaq pillugu 1998-mi upernaakkut
ataatsimiinnermut iliuusissanut pilersaarut.
Kalaallit eqqumiitsuliaasa tunineqartarneranni isertitat
qaffakkiartuinnarnerannik tuniniaasarfiit nalunaartarnerisa taamatut aallussaqarnerup
nunatsinni ilaqutariinnut amerlasuunut aningaasarsiutaallualersinnaasutut
malinnaavigineqarnerulernissaa pissutissaqartippaa. Nunatta iluani
takornarianullu eqqumiitsulianik nioqquteqarnermi kaaviaartitat ukiumut 30 mio
kr.-inik isertissutaasartutut siorna Naalakkersuisut mianersortumik
eqqoriaanerinnarmillu missingerpaat. Tamannalumi tunngavigalugu
eqqumiitsuliortarnermillu ineriartortitsinissaq eqqarsaatigalugu
siuneqarluartumik iliuuseqarnissaq maannakkut pisariaqarluinnarlerpoq.
Taamaattoq iliuusissanut tamakkiisumik pilersaarusiornissami pisortaqarfiit
arlallit suleqatigiinissaat pisariaqarpoq, tassa Namminersornerullutik
Oqartussani pisortaqarfiit arlallit eqqumiitsuliortarnermut
tunngassuteqartunik suliassaqartitermata. Kultureqarnermut, Ilinniartitaanermut
Ilageeqarnermullu Pisortaqarfimmut atapput ilinniartitsineq,
pikkorissartitsisarneq, pitsaassutitsinik nalilersuineq aamma
saqqummersitsisarneq. Takornariaqarnermut Angallannermut Niuernermut
Attaveqaatinullu Pisortaqarfimmut atapput atortussanik sanaassanillu
pissarsinissaq, sanaffiusinnaasut tuniniaaffiusinnaasullu.
Suliffissaqartitsinermut tunngasut eqqarsaatigalugit Isumaginninnermut
Suliffeqarnermut Pisortallu Suliassaqarfiutaannut Pisortaqarfik iliuusissanut
tamakkiisumik pilersaarusiornissami ilaatinneqartariaqarpoq. Aamma
iliuusissanut tamakkiisumik pilersaarusiornissami KANUKOKA-mi qanittumik
suleqatgineqarnissaa pissusissamisoorpoq.
Iliuusissatut pilersarutip suliariuneqarnissaata sapinngisamik piaartumik
aallartinneqarnissaa Naalakkersuisut isumaginiarpaat eqqumiitsuliortarneq
eqqarsatigalugu aaqqissuulluakkamik siunertassanik tikkuussisussaq, tassunga
ilanngullugu pulaffigineqassallutik sanaluttartunut ilinniarfeqarlernissamut
periarfissat aammalu pikkorissartitsinermi ilitsersuisartunik siunnersortimilluunniit
atorfinitsitsinissaq.
Ilanngullugu nalunaarutigineqarsinnaavoq Naalakkersuisut Kultureqarnermut
Ilinniartitaanermut Ilageeqarnermullu Pisortaqarfikkoortumik 1997-mi
november-ip qaamataata naalernerani nunatsinni hĝjskole-t sinniisuisa
ataatsimeeqatigineqarnissaat isumaqatigiissutigisimagaat, tassani
eqqumiitsuliortunut ilinniarfimmik pilersitsinissamut periarfissat
oqallissutigineqassallutik. Eqqarsaatigineqarpoq eqqumitsuliortunut ilinniartitsinermi
atugassanik ininik sannavinnilu atugassiinissamik hĝjskole-t
piumaffigineqassasut. Naatsorsuutaavoq ilinniartitsineq pilersinneqassasoq
pikkorissartitsinikkut ilinniartitsinertut, siunertaavorlu peqataasut ilaatigut
atortussat, periutsit (teknik) tuniniaasarnerlu tungaasigut
ilisimasaqarnerulernissaat.
Kiisalu oqaatigiinnassavara aningaasanut inatsisissamik Naalakkersuisut
saqqummiussereermata allannguutissamik, tassani eqqumiitsuliornermik
inuussutissarsiornerup siuarsaavigineqarnissaanut 1,5 mio kr.-it
aningaasaliissutigineqarnissaat nunaqarfinni illoqarfinnilu inuussutissarsiutit
ilisimasat annikilliartuaarnerannik paasisaqarfiusuni suliassaqartitsiuarnissaq
aningaasarsiorfissaqartuarnissarlu qularnaarniarlugit.
Naalakkersuisut isumaqarput sanalunneq eqqumiitsuliornerlu
takornariartitsisarnermi aningaasarsiutissatut periarfissaalluartut,
atortussanik pissarsinissamut periutsit, amerlasuunngorlugit
pitsaalluinnartunillu suliaqarnissamut periusissat pitsaaluartut aammalu sanaat
tuniniarneqarnissaannut periutsit pitsaasut imminnut ullumikkumiit
pitsaanerusumik ataqatigiissaariffigineqarsinnaappata. Taamaattumik
aningaasaliisoqarnissaanik qinnuteqaateqarnermi ilaatigut siunertaavoq
siunnersortimik angalasartussamik atorfinitsitsinissaq. Taassuma kommunit
eqqumiitsuliornermillu ingerlataqartut suleqatigalugit ajornartorsiutaasartut
qulaani taaneqartut aaqqinniarlugit iliuusissat pilersissallugit.
Tassunga ilanngullugu oqaatigilaarlara aningaasat 1,5 mio kr.-it, taakkua
pineqartut tassa konto-mi 701210-miimmata. Tassalu Takornariaqarnemut
Angallannermut Niuernermut Attaveqaatinullu Naalakersuisup ataaniillutik.
Taava Atammimmi timersortarfiliornissaq pillugu oqaatigiumasat.
Naalakkersuisut ataatsimiititaliatuulli arlaleriarlutik maluginiarsimavaat
Atammimmi innuttaasut nammineerlutik iliuuseqarnermikkut
maligassiuilluarsimanerat. Aammattaaq nammineerlunga takusimavara nerrivimmi
arsaaratartut Atammimmiut timersortartunut nunani allaneersunut,
assersuutigalugu Arctic Winter Games-imi, unammineq qanoq unammilluartiginerat.
Tamanna tunngavigalugu Atammimmi illumik sammisaqartitsivissamik
sanasoqarnissaanut tapiissutissat Naalakkersuisut arlaleriarlutik
nassaariniartarsimagaluarpaat.
Taamaattumik Maniitsup kommunia suleqatigalugu Naalakkersuisut 1998-imut
aningaasanut inatsisissap pingajussaaneerneqarnissaanut allannguutissatut
siunnersuusiorput, taamaalilluni sanaartugassamut tassunga 1998-imi 500.000
kr.-it 1999-imilu 3,5 mio kr.-it immikkoortitassanngorlugit.
Kulturimut sunngiffimullu tunngasut kommuninik iluarsaaqqinnermi
malitseqartinnerat pillugu.
Sunngiffimmut kulturimullu tunngasutigut kommuninik iluarsaaqqinnissamut
ataatsimiititaliarsuup inassuteqaataasa malitseqartinneqarnissaat
eqqarsaatigalugu Naalakkeruisut nalunaarutigisinnaavaat
pilersaarusioqatigiittussat pilersinneqarsimasut, taakku inatsisiliornermi
iluarsaasarnissaat il.il. pillugit inassuteqaatit suliarissalugit. Tassani
KANUKOKA aamma sinniisuutitaqarpoq.
Pilersaarusioqatigiittussat katersugaasiveqarnermut atuakkanillu
atorniartarfeqarnermut tunngasut pillugit inassuteqaatinik
saqqummiussereerput. Inassuteqaatit taakku suliassaqarfiit takku pillugit
inatsisiliat suliarineqarnissaanni ilanngussuunneqareerput. Sunngiffimmut
tunngasut iluini suliassaqarfinnut allanut tunngasut suliarineqarnerat
unitsinneqarallartariaqarsimavoq, isumaginninnermik iluarsaaqqinnissamut
ataatsimiititaliarsuup isumaliutissiissutissaa aammalu
meeqqat atuarfiat pillugu peqqussut utaqqineqaqqaartariaqarsimammata.
Upernaakkut ataatsimiinnermi qulaani taaneqartut oqaluuserineqareermata
pilersaarusioqatigiit sulineq ingerlateqqippaat. Ukioq manna novemberip
qaammataani sunngiffimmi sammisassaqartitsinermut ataatsimititaliami
siulittaasut pisortallu tamarmik aammalu eqqumiitsuliortut kattuffiisa
sinniisuutitaat sammisaqaatigalutik isumasioqatigiissinneqassapput,
pilersaarusoqatigiit sulinermik ingerlatseqqinnerminni atugassaannik
kaammattuutinik saqqummiussinissamut
periarfissinneqassallutik.
Pilersaarusioqatigiit piffissamut pilersaarusiaat naapertorlugu
naatsorsuutigineqarpoq sunngiffik pillugu peqqussutip
iluarsaateqqinneqarnissaanut siunnersuut 1998-imi ukiakkut ataatsimiinnermi
saqqummiunneqarsimasoq.
Piffissamut pilersaarusiaq malillugu suliamut attuumassuteqartut tamarmik
tusarniaavigineqarnissaat piffissaqarfigineqassaaq. Tassunga nangissutitut
malugeqqussavara malitseqartitsineq STI-mi ilinniartitaaneq pillugu sulinermut
ingerlareersumut soorunami ataqatigiissaarneqassammat, tassa meeqqat
atuarfiata aamma inuussutissarsiutinut ilinniartitaanerit akornanni ikaarsaariarfeqarnissaata
pilersaarusiorneqarnissaa ilimagineqareersinnaammat.
Taavalu ilisimatusarfimmi init ilinniartitsiviit pillugit.
Ilisimatusarfimmi init ilinniartunut sulisunullu tattoqisaaffiulerlutillu
naammaginannginnerannik kultureqarnermut ilinniartitaanermullu
ataatsimiititaliap naliliinera naalakkersuisut isumaqatigaat. Maannakkut
Ilisimatusarfimmi ilinniartut 110-usut assigiinngitsunut sisamanut ilinniagaqartuusut,
ilinniartitsisut allaffimmiullu 18-iusut inissakippallaarujussusarput.
Oqaatigisariaqarpoq Ilisimatusarfik iluatsilluarnermigut imminut
eqqorsimasoq, tassa 1987-imi aallartinneqarnerminiit ilinniakkanut ingerlatanut
ilinniagaqarusuttut amerliartuinnarsimapput. Taamanikkumiit
ilinniartunngortartut, naammassisartut/ ilinniarunnaartut
ilanngaatigereerlugit, ukiumut ilinniartunik qulinik ilasarput, massakkullu
iluatsisimaarneq ima annertutigaaq ilinniartut sulisullu
amerlanerulersinneqarnissaannut inissaqanngilluinnarluni. Kiisalu
qatserisartoqarnerni oqartussaasut piumasaqaataat, init annerusumik
atorneqarnissaannut suli aamma killiliipput.Taamaattoqarnera
pitsaanngilluinnarpoq.
Tassa ukiuni aggersuni ukioqatigiiaat ilinniarnertuunngorniarfinnilu
atuartut amerlassusiisa kingunerinngitsoornavianngimmassuk ilinniartitaanermut
qaffasinnerusunut, taakkununnga ilanngullugu ilisimatusarfimmi, ilinniarniartut
amerlanerulernissaat.
Tamanna tunngavigalugu eqqaamaneqartariaqarpoq Ilisimatusarfimmi
ilinniagarineqarsinnaasut taakku sisamat (upperisarsiorneq, kalaallit oqaasii,
oqaluttuarisaaneq/ qanganisarsiorneq aammalu aqutsineq) Kalaallit Nunaanni
pilersinneqarsimammata ilinniartitaanerit taakku sisamat inuiaqatigiit
kalaallit ineriartoqqinnissaanni kinaassuseqarnerannullu
qitiulluinnartuusariaqarnerannik eqqarsaateqarnerit tunngavigalugit,
taamaattumillu danskit imaluunniit nunat allat universitet-iini
isumagineqarnissaat kissaataasimanani.
Ilisimatusarfimmi inissatigut ajornartorsiuteqarnerup qanoq ililluni qaangerniarneqarnissaa
ukiuni kingullerni Naalakkersuisut eqqarsaatersuutigisarsimavaat. Maannakkut
noorlerni inissisimaffigisaani alliliinissamut periarfissaqanngilaq, aamma
illut allanngutsaaliugassanngortinneqarnikuummata.
Taamaattumik periarfissanit Naalakkersuisut tikkuarsimavaat Ailisimatusarfiit
eqiruffiata@ pilesinneqarsinnaanera. Tassani Ilisimatusarfik, Naatsorsueqqissaartarfi,
Nunatta Aatuagaateqarfiata katersuugaatai, Groenlandica, Nunattalu
Katersugaasiviata allagaateqarfia Pinngortitaleriffiup eqqaani sanaartukkani
ineqartinneqarsinnaallutik. Tassa Pinngortitaleriffik tassaavoq massakkut
sananeqartoq mittarfeqarfiup aqqusernata eqqaani. Taamak aaqqiinikkut,
Ilisimatusarfiup allilerneqarnissaanut periarfissat, saniatigut
suliffeqarfinnut ilisimatusarnermut tunngasunik aamma suliaqartunut
pisariaqarneratut ataqatigiisitsinissaq qularnaaneqassaaq aammalu ilinniartitsisut
inillu pitsaanerusumik atorneqalernissaat tunngavissinneqassallutik.
Maannakkut killiffik tassaavoq Pingortitaleriffiup eqqaani nunaminertamik
Nuup kommuniata inniminniisimanera, aammalu suliassamut attuumassuteqartut
tamarmik petaaffigisaannik suleqatigiissitaliamik suliassamik sukumiinerusumik
misissuataarisussamik piaartumik pilersitsisoqarnissaa.
Ruth Heilmann, Siumup oqaaseqartua:
Inatsisartut Kultureqarnermut Ilinniartitaanermut Ataatsimiititaliaata
isumaliutissiissutaanut Naalakkersuisut akissutaat qujassutigalugu imatut
Siumumit aamma oqaaseqassaagut.
Inatsisartuni ilaasortap Manasse Berthelsenip siunnersuutigaa sanaluttartut
pikkorissartinneqartarnissaannik neqerooruteqartoqarlunilu
eqqqumiitsuliornermi atortussanik sannatinillu
pissarsisinnaanissaminnut periarfissaqarnerulernissaannik aqqutissiuussisoqassasoq.
Taamatut siunnersuuteqaneq aallaavigalugu ataatsimiititaliaq
isumaliutissiissutiliorpoq ilaatigut sanaluttartut siunnersorteqalernissaannik
isummersuuteqarluni aammalu sanalunnikkut eqqumiitsuliornikkulu nunatsinni
qanoq ingerlasoqarneranik nassuiaasoqarnissaanik upernaamut 1998 -imi
inatsisartuni saqqumiusseqqusilluni.
Taamalu eqqumiitsuliornerup sanaluttarnerullu ineriartortinneqarnerani
Suliffissaqartitsinermi Takornariaqarnermi Niuernermi Ilinniartitaanermilu
ataqatigiissaarnerusumik aalajangersimanerusumillu sammiveqartumik
aaqqissuussisoqarnissaanik Naalakkersuisutigoortumik suliniuteqaqqusineq
ilanngunneqarluni.
Naalakkersuisut akissuteqarnerminni nassuiaateqarput
suleqatigiittoqartariaqartoq qulaani pisortaqarfiit susassaqartut Kanukokallu
peqataaffigisaanik. Tamanna Siumumit
pisariaqarluinnartutut isumaqarfigigatsigu kaammattuutigerusunnarpoq
suleqatigiissitaliamik pilersitsisoqartariaqartoq, aammalu ilisimasaqartumik
pissutsinik allaaserinnittoqartariaqartoq. Taamaalilluni upernaamut
tamakkiisumik inatsisartut oqallinnissaminnut tunngavissaqarnerullutik
isummersorsinnaalissammata nassuiaammik takussutissaqarlutik pissusiviusunik
aallaaveqartumik.
Eqqumiitsuliornermik pikkorissuseqartut tamakkiisumik kajumissuseqarnertik atorlugu
toqqorternagulu
aningaasarsiutaalernissaa anguneqassappat isumaliutigisassat
amerlasuujusut Siumumit nalunngilarput.
Nunatsinni eqqumiitsuliornikkut tuniniaasarnerit aaqqissuussaanerusumik
ingerlanneqalernissaannik ataqatigiissaartumik isummersorfigisariaqarnerannik
Naalakkersuisut akissumminni pingaartitsinerat Siumup aamma
isumaqataaffigalugillu suleqataaffigissavai. Sineriammi angalaarluni
peqatigiiffinnik ingerlatsisunillu
ataatsimeeqatiginnillunilu siunnersuisarnissamik siunertaqartumik
tamatumunnga aningaasaliissutaasut tamanut angusaqaataasumik atorluarneqarnissaat
Siumumit kissaatigilluinnarparput.
Eqqumiitsuliortut ataavartumik pikkorissartinneqartarnissaannik
aaqqissuussisoqartariaqarpoq.
Pikkorissorpassuaqarmammi ilaatigut siunnersorneqarnerunissaminnik
imaluunniit pikkorissarneqarnerulaarnissaminnik pisariaqartitsisunik.
Taamaalilluni aamma anguneqassammat tuniniakkat pitsaasuunissaannik
kusanartuunissaannillu angusaqarneq, arlaqarnerusunullu inuutissarsiutaasumik aningaasarsiutaalertussamillu
nuannaarutaasumik kinguneqarsinnaalluni.
Soorlu Ittoqqortoormiini tamatut pikkorissartoqarnerani ullumikkut
angusaasut pitsaalluinnartut takussutissaqartinneqalereersut eqqarsaatigalugit
allanissaaq taamatut ingerlatsisoqarnissaa Siumumit
kaammattuutigerusupparput. Aammalu
illut iluaqutit 30-t sinneqartut pigineqartut iluaqutaallutik ilaasa
atorneqartut suli annertunerusumik iluaqutaasumik tassuunakkut aamma
atorneqarsinnaaneri Siumumit takorloorparput.
Siumumit isumaqarpugut Takornariaqarneq inuutissarsiutigisassatta
pingaarutillit pingajuattut inissinneqarnerani assassukkatigut sanalunnermi
ammerinermilu eqqumiitsuliat takornarianut niuverutissatut
pingaartorujussuartut isigineqartariaqartunut ilaasut. Aammalu Siumumit
isumaqarluta niuverutigineqartunut ilanngullugit takornariaqarnermut
ilaatillugit eqqartorneqartariaqartut, soorlu peqatigiiffiit assigiinngitsunik
sammisaqartut aamma erinarsoqatigiit, isiginnaartitsisartut,
qajartortitsisartut, sisorartitsisartut, qimussertitsisartut aammalu allat
taamaaqataat ilanngullugit.
Eqqumiitsuliornikkut inuutissarsiorneq kunsterhverv siunissaqarluartuuvoq,
aningaasarsiornikkut isumalluutigalugu piviusumik
ineriartortinneqartariaqartoq.
Taamaattumik Naalakkersuisut tassuunakkut qanoq iliuuseqarumassuseqarnerat Siumumit tapersersorluinnarparput.
Siumumit ataatsimiititaliatulli iluarisimaarparput Atammimmi
timersortarfeerannguamik sanasoqartussanngornera. Tassami nunaqarfimmiut
piumassuseqarnerminnik arlariinnik takutitsisariaqarput taamaattumik
pilersitsivigineqarnissamik sallinngornissaminnut. Soorlu halkomité-mik
namminneq pilersitsinermikkut aningaasanik katersiniarsimapput. Aammalu
inuusuttuaqqat meeqqallu nerrivimmi arsaararnermik katersortarfinnguaminni
ukiorpaalunni ingerlatsisarsimanerat nikallujuillutillu sungiusartarsimanerat
NAPA 86-ip tusaamaneqarluarneranik kinguneqarsimasoq allaat nunarsuarmiunut
sapiutinngivillutik nunarput sinnerlugu nuannaarutaasumik
nittarsaassisalerlutik.
Ataatsimiititaliap isumaliutersuummini toqqammaviginiarpaa siunissami
nunaqarfinnut naleqqussakkamik akimikkut angissutsimikkullu unamminartunik
timersortarfeeraliortarnissamik Naalakkersuisut sanaartornissamik kajumissuseqarnerulernissaat.
Assersuutitullu aallartissutigissallugu Atammik naleqquttutut isigineqarluni,
tamanna Siumumit isumaqataaffigaarput.
Ilisimatusarfimmi tattorliuuttoqarneranik paasisavut tunngavigalugit manna
oqaluttarfik atorlugu aamma ingerlateriikkavut Naalakkersuisut paasilluarmatigit
nuannaarutigaarput. Aammalu paasillugu siunissami qaninnerusumi nutaamik
ilisimatusarfiliortoqarnissaannik eqqarsaatersuuteqalereersimasut. Tamanna Siumumit malittarissavarput
isumaqaratta pingaarluinnartuusoq nunatsinni ilisimatusarnerup aamma soqutigineqarluartup
annertusarneqarnissaa. Nalunngereeqaarpummi ilinniagaqarnertuut qanoq
nunatsinni atorfissaqartinneqartigisut. Taammaattumik aamma naleqquttumik
atukkamikkullu atugarliuuteqarpallaaratik ilinniarnerminnik ingerlatsisarnissaat
ilungersortumik aqqutissiuunneqartariaqarparput.
Naggataagut ataatsimiititaliap isumaliutissiissummini kaammattuutigisaa
kommuninik iluarsaaqqinnermi suliat sunngiffimmi kulturimut peqatigiiffinnullu
tapersiissuteqartarnernut tunngasutigut
aaqqissuussinerni Kanukoka peqatigalugu nalilersueqqittoqarnissaanik taamatut
kaammattuuteqarneq Siumumit ullumikkut pisariaqalersutut isigilluinnaratsigu
tapersersorluinnarparput.
Taamatut Siumumit ataatsimiititaliap isumaliutissiissutaanut Naalakkersuisullu
akissutaanut akuersaarnerput oqaatigissavarput aammalu saqquumiisut
suleqataasullu tamaasa qujassuteqarfigalugit.
Knud Sĝrensen, Atassutip
oqaaseqartua:
Atassut-mit
oqaatiginiarparput isumaliutissiissut manna ataatsimiititaliami ilaasortagut
aqqutigalugit peqataaffigisarput taamaallaat naatsumik
oqaaseqarfigissagatsigu.
Sanaluttarneq
eqqumiitsuliornerlu pillugit ataatsimiititaliap eqqartuisimaneri
assigiinngitsut, siunnerfinnillu pitsaasunik imaqartut tassaapput ukiuni
aggersuni pinngitsooratik iliuuseris-sallugit pisariaqartitat
allaqquttussaanngitsut. Ukiut makku aggersullu eqqumiitsuliornerup
sanaluttarnerullu takornariaqartitsinermi aningaasarsiornikkut piinnarani,
kulturittali tamati-goortup nunarsuup ilaani ilisarillualerneqarnissaani ersiutaajumaarput.
Taamaattumik
Naalakkersuisunut ilaasortap akissummini pineqartunut
soqutiginnilluinnar-nermik ersitsinera Atassut-mit nuannersumik tiguarput.
Ataatsimiititaliap
Ilisimatusarfik pillugu eqqartuisimanera siuneqarluartoq, tamatumunngalu
Naalakkersuisunut ilaasortap akissutaa Atassut-mit tamaannarmik
siuneqarluartutut isigaagut.
Atassut-milli
pinngitsoorumanngilagut uparuassallugu ukiuni qaninnerpaani Ilisimatusarfiup
illutassaanik sananissamut aningaasaliisoqartariaqarnera pinngitsoorneqarsinnaanngimmat,
allaalluunniit tulleriissaarinerit allanngortissagaluarpata.
Atassut-mit
isumaliutissiissutip imai allat immikkut oqaaseqarfiginagit taama
naatsuliorluta isumaliutissiissut tusaatissatut tiguarput.
Manasse Berthelsen, IA
oqaaseqartua:
Inatsisartut
Kultureqarnermut Ilinniartitaanermullu Ataatsimiititaliaata
isumaliutissiissutaa Inuit Ataqatigiinni soqutigalugu isummersorfigisimavarput.
Inatsisartunut ilaasortap
Manasse Berthelsen-ip Sanaluttartut ataavartumik pikkorissartinneqarnissaannik
kiisalu sanaluttartut sakkussaminnik piniarneranni
tapiiffigineqartalernissaanik siunnersuutaanut ima oqaaseqassaagut.
Ullumikkut
takornariaqarnerup piorsaaffigineqarnerani ilaalluinnartunut ilaasariaqarpoq
aamma sanaluttarnikkut ineriartortinneqartariaqarpoq pisinnaasaatigut
pikkorissaanikkut.
Taamaammat Kultureqarnermut
Ilinniartitaanermullu ataatsimiititaliap tamakkiisumik tapersiiginnarani
Naalakkersuisunut piumasaqaatigimmagu upernaamut ataatsimiinnissamut sanaluttartut
maannakkut inissisianerat, kiisalu iliuusissamik siunnnersuusioqqullugit.
Minnerunngitsumillu Naalakkersuisup akissuteqarnermini iliuusissatut
siunnersuusiorniarlutik suliniuteqalertorniarlutik oqarmat Inuit
Ataqatigiinniit nuannaarutigaarput. Maannamummi nassuiaatit misissuinerpassuillu
ingerlanneqartareerput, iliuuseqarnissarlu tullinnguulluni. Iliuusissamilu
suliassat annertuujupput sanaluttartunik pikkorissartitsinissamut, sanalukkat
tuniniarneqartarnerisa aaqqissuunnissaat, ilisarnaasersorneri allarpassuillu inissitassaapput.
Naalakkersuisup akissummini
taavaa nunatsinni hĝjskole-nik oqaloqateqarnerit aallartisarniarlugit. Inuit
Ataqatigiinniit pingartutut isigaarput, sanalukkanik sananermi, soorlu tupilaliornerni,
saaqqusiornerni, qilaasiornerni allanillu pitoqqatsinnik sananermi aamma
oqaluttuassartaasa ilisimaarilluarnissaat. Oqaluttuassartaami
tuniniarneqarnerini aamma ussassaarutaalluarnissaat pingaartikkatsigu.
Minnerunngitsumillu uagut kalaallit isiginnittaasitsinniippoq suut tamaasa
anersaaqartikkatsigit, tassa inoqartikkatsigit (inua). Taamaattumik
pingaaruteqarluinnarpoq erseqqissartuassallugu sanalukkat ilusii silaannarmiit
tigusaanngimmata, kisiannili siulitta inuusaasiannik, oqaluttuassartaannik
annertuumik imaqarmata. Taamaammat naalakkersuisup hĝjskole-nik
oqaloqateqarniaruni anersaakkut tunisisinnaanerpaaq ujartortariaqaraa Inuit
Ataqatigiinniit isumaqarpugut.
Sanaluttartut sakkussaannik
pissarsiniarnermi tapiiffigineqartarnissaat pisariaqartutut Inuit
Ataqatigiinniit isumaqatigaarput, eqqaaginnarsinnaavagummi ujaqqanik
pilattuutit, pujoralannik milluaatit assigisaallu akikitsuunngitsut.
Sanaluttartut pillugit
naggataatigut Inuit Ataqatigiinniit oqaatigeqqissavarput, nuannaarutigigatsigu
naalakkersuisut upernaamut iliuusissatut siunnersuummik saqqummiiniarmata,
misissuinerimmi nassuiaasiornerillu naammareerput, maannalu tigussaasunik
iliuuseqartariaqarpugut.
Inuit Ataqatigiinniit
nuannaarutigaarput Atammimmi timersortarfeeraliortitsinissaq. Minnerunngitsumik
timersortarfeeqqap nunaqarfinnut naleqqulluarnera akimigullu unammillersinnaanerujussua
isigissagaanni. Taamaattunik timersortarfeeqqanik siunertanut allanut aamma
atorneqarsinnaasut suli ineriartortittuarnissaat ujartortuartariaqarpoq.
Maniitsummi kommuniata Atammiullu takutippaat timersortarfeeraq 10 mill.
akeqartariaqanngitsoq, kisialli 4 mill. akilimmik sanasoqarsinnaasoq,
saniatigullu atuartitsivittut atorsinnaalluarluni.
Inuit Ataqatigiinniit
Ilisimatusarfiup inissisimaneranut Naalakkersuisup nassuiaataani erserpoq,
Ilisimatusarfimmi ilinniartut suli ukiorpaaluit utaqqisariaqartut iluamik
inissaqalernissaannut. Ilisamatusarnikkummi eqiteruffik AForskerpark@-imik pilersitsiniarnissaq
ukiorpaaluit ingerlasussaassasoq paasinarmat.
Taamatut oqaaseqarluta
Kultureqarnermut Ilinniartitaanermullu Ataatsimiititaliap isumaliutissiissutaa
imartooq kiisalu Naalakkersuisullu akissutaa, annertuumik
paasissutissiinerusoq, Inuit Ataqatigiinniit ilassilluarpagut.
Bjarne Kreutzmann, Akulliit Partiiat:
AP-ata ataatsimiititaliaq isumaqatigaa imak isumaqarmat: Tassa
sanaluttartutut eqqumiitsuliortutullu inuussutissarsiummik
ingerlataqarnissamut periarfissat siusarneqartariaqartut, sanalunnikkut
eqqumiitsuliornikullu tunisassiat ilaatigut takornarianik annertunerusumik
tunisaalernissaat siunertaralugu.
AP-ata taamaattumik ajuusaarnartippaa eqqumiitsuliorneq pillugu
isumasioqatigiisitsinissaq pilersaarutaasimagaluartoq taamaatiinneqarsimammat.
Aammattaaq Manasse Berthelsen-ip siunnersuutaa tunngavigalugu
ataatsimiititaliap inassutigisai AP-ata taperserumavai. Tassa Naalakkersuisut
ullumikkut killiffik pillugu nalunaarusiussasut.
Ilisimatusarfimmi inissatigut atugarisat naammaginanngitsut
aaqqiivigineqassasut. Nunatsinni atuarfiit oqaluffiillu nutartinneqarnerat
pillugu killiffimmik nassuiaateqartoqassasoq.
Aammalu nunaqarfinni timersortarfeeraliortoqassasoq, kiisalu kommunini
iluarsaaqqinnermut ataatsimiititaliarsuup sunngiffimmut kulturimullu
tunngasutigut kaammattuutai malitsinneqassasut. Kiisalu peqatigiiffinnut
tapiissuteqarnermik aaqqissuussinerit Naalakkersuisut pitsaanerulersinniassagaat.
Pingaartumik pineqartut kingulliit marluk, taakku AP-ata suliniuutigiuarsimasaanut
naapertuulluinnarput, tassa inuiaqatigiit sunngiffeqarnermut
pilliuteqarnerusariaqartut. Meeqqat inuusuttullu alliartornerini
periarfissiniarlugit ileqqorissaarnikkut imminnullu naalakkersinnaanikkut,
taamalu peqqissutsikkut isumannaannerulernissaannut patajaannerulernissaannullu.
Isumaliutissiissut taamatut oqaaseqarlunga tusaatitut tiguara.
Anthon Frederiksen, Kattusseqatigiit:
Inatsisartunut ilaasortap Manasse Berthelsen-ip siunnersuutaanut
tunngatillugu Kattusseqatigiinniit oqaatigissavara; ilumut pisariaqarpoq kalaallit
kusanartuliaasa piorsaaffigineqarnissaat, pikkorissartitsisarnerit,
atortutigut/sakkutigullu pitsaasumik aaqqissuussinertigut aammalu
minnerunngitsumik tunitsiveqarnerup tungaatigut pitsaasumik
periarfissaqartitsisinnaaneq ilanngullugit aqqutissiuunneqarnerisigut.
Tassami inimi maani siusinnerusukkut tamakku pillugit aamma oqallinnerit
ingerlanneqartareerput, soorlu siorna ukiakkut ataatsimiinnermi aamma
tamakkununnga tunngasut annertuumik oqaluuserineqarput, kisianni oqallinnerit
qanoq-uku kinguneqartut. Taamanikkummi ilaatigut siunniunneqarpoq Canada-mut
sanalukkat, sanaluttarnerlu pillugit, sanalukkanik nalunaaqutsersuisarneq
il.il. pillugit paasisassarsiortoqassasoq. Tamakku qanoq
ingerlanneqarpat?
Suulluunniit suliat
aallaqqaataaniik tigusaqattaarlugit, pisortaqarfiit Naalakkersuisoqarfiillu
assigiinngitsut tamarmik immikkut suliarissappatigit, isumaqarpunga tamanna
piffissamik nukinnillu annertuallaamik atuinermik kinguneqartassasoq,
kinguneqartarlunilumi. Taamaattumik suliassat Naalakkersuisoqarfinnut
assigiingitsunut siammarnagit, ataatsimut pilersaarusiorluarlugit
suliarineqartarnissaat Kattusseqatigiinniit kaammattuutigissavara.
Suliammi
uteqattaartuarlugit, oqallisigeqattaartuarlugit annerusaumillu
naammassisaqarfigissanagit nukillalaarnarpoq, piffissamik nukinnillu
atuipilunneruvoq. Taamaattumik suliat assigiinngitsut,
Naalakkersuisoqarfinnullu assigiinngitsunut attuumassuseqartut, ataatsimut
Naalakkersuisoqarfimmi ataatsimi suliarineqartarsinnaanerat
ajornarluinnartutut takorloorneqarsinnaanngilaq. Aamma isumaqarpunga
akunnerminni tamanna ajornartorsiutiginagu aaqqissinnaasariaqaraat.
Oqartoqaannarsinnaanngilarmi
suliap immikkoortuata ilaa takornariaqarnermiippoq, suliap immikkoortuata ilaa
suliffissaqartitsiniarnermiippoq, suliap immikkoortuata ilaa kultureqarnermut
tunngassuteqarpoq il.il., tamaammallu Naalakkersuisoqarfiit assigiinngitsut
pinngitsooratik aqqusaarneqaqqaartariaqartut.
Taamatut periuseqarneq
isumaqarpunga Naalakkersuisoqarfiit akunnerminni aaqqittariaqaraat, tassami
suliaq ataasinnaanngilaq suliassalli arlalissuupput, immaqa eqaannerusumik
aaqqissuussinikkut piaarnerusumik naammassineqarsinnaagaluartut.
Taamatut oqaaseqarlunga
isumaliutissiissut, Naalakkersuisullu akissuteqaataat tusaatissatut tiguara,
qilanaaralugulu suliap Naalakkersuisunit ingerlateqqinneqarluni pitsaasumik
naammassineqarnissaa.
Konrad Steenholdt,
Kultureqarnermut Ilinniartitaanermut ilageeqarnermullu Naalakkersuisoq:
Oqaaserineqartunut tamanut
qujavunga, tassalu neriorsuutigeriikkatsituut upernaamut killiffimmik
nalunaaruteqarnissaq aamma naammassiniassavarput.
Paasinarpoq
ataatsimiititaliap sammisimasai inassuteqaataalu taavalu
Naalakkersuisuninngaaniik tamakkiisumik akissuteqarnerput oqaluttunik tamanik
naammagisimaarneqartoq.
Sanaluttarneq
eqqumiitsuliorneq eqqarsaatigalugu, aap ilumoorpoq sivisuumik tamakku eqqartorsimavagut.
Tassungalu aamma ilaatigut eqeersaanermut ilaalluinnarpoq, ukiuni kingullermi
inuutissarsiutinut pingaarnernut ilanngullugu, takornariaqarneq
piorsarneqarnialernera aalajangiunneqarmat, tappiffigineqarnerulersimavoq
eqqumiitsuliortut takornariat tammaviuttussaanik sanasinnaanerit
siuarsarneqarsinnaanerat.
Eqqumiitsuliortut
tungaaninngaaniit suliniarnerit ingerlanniarneqarsimapput misilittagaqarfiullutillu,
soorlu Siumup oqaluttuata taanna taasaa Ittoqqortoormiit-niittoqarsimavoq.
Sivikittuinnarmik qanoq iliortoqarsinnaaneranik umimmaat soorlu nassui
atorlugit ilitsersuisumik takkuttoqarsimalluni. Kisianni piffissaq
sivikitsuinnaagaluartoq pissarsiffiulluarsimavoq, ullimikkullu ilaatigut
aningaasarsiorfiullualersimalluni. Kisianni soorunami taamaattut amerlanerit
iliuuseqarfigisariaqarpagut.
Oqaluttullu kingulliup aamma
taasaa pisortaqarfiit assigiinngitsut, uani taagorneqartut aammalu saqqummiussininni
taasakka ilumoorpoq pinngitsooratik ataatsimut suleqatigiittariaqarpugut.
Taamatut suleqatigiineq ingerlanneqareerpoq, soorlu ilaatigut taamak
oqaatigaara 1,5 mio kr. immikkoortinneqarsimasut uanga pisortaqarfinniinngillat
kisianni takornariaqarnermut suliaqartuni taakkua taamatut
immikkoortinneqarsimallutik.
Isumaqarpungalu
annilaangassutigisariaqanngitsoq taanna Naalakkersuisut piumassuseqarluarput
takornariaqarnerup iluani aaqqiissutaasinnaasut, inuutissarsiutinik aamma
pilersitsisinnaasut suleqatigiiffigalugit pilersinniassaqqaarpagut.
Tassunga tulliinngullugu
taarusutara tassaavoq ilisimatusarfimmi inissaaleqineq. Aap ilungersunarpoq
taanna, kisianni siusinnerusukkut maani oqaatigereersimavara upernaamut ataatsimiinnissamut
eeqqarsaatigalugu saqqummiussaqarnissaq anguniarlugu ataatsimiititaliami
suligasuartussamik pilersitsisimagama. Tassa tassani eqqartorneqassallutik
nunatsinni ilinniagaqartut najugaqarnermikkut ajornartorsiutaat, tassanilu
ilaatigut minnerunngitsumik nalilerniagassat ilagisussaassavaat Nuummi
ilinniagaqartut ineqarniarnerannut tunngasut. Tassungalu tunngatillugu
qularnanngilluinnarpoq erseqqinnerusumik nalunaarutigisinnaassagipput taanna AForskerpark@-imik taaneqartoq
nalunaarutigisinnaassagipput qanoq piaartigisumik aningaasalersorneqarnermigut
allatigullu sukkanerusumik pilersinneqarnissaanut
suliniuteqartoqarsinnaanersoq.
Soorunami landskarsi kisiat
aningaasanik nassaariniarnerani isumalluutiginngilarput, kisianni fond-it
assigiinngitsut aamma tamakkununnga neqerooruteqarsinnaanerat massakkut
suliaralugu aamma aallartereerparput misissorlugulu.
Ilaatugut oqartoqaraluarpoq
oqaluttuninngaaniik massakkut nalunaarutigut malillugit qanittukkut pisussatuut
naatsorsuutigineqarsinnaanngitsoq. Kisianni soorunami inatsisartut taakkuupput
aalajangiisussat, aningaasat immikkoortinneqarnissaannut piumassuseqarutta
pilertornerusumik taassuma pilersinniarnissaa angusinnaavarput.
Ulluni kingullerni
nalunaarutaasartut imminnut apuraatilaartarnerat pillugu erseqqissaatigilaarlara
isortuussimannginnakku aamma ullumikkut ilinniarfinnut qulliunerusunut
nalunaartartut inuusuttortatta amerliartornerat. Soorlu assersuutigalugu
taasimavara 1995-imi naatsorsuutit malillugit aningaasaqtuuteqarpallaarsimavugut
50.000 kr.-nik ilinniartut inissaqarniarneri eqqarsaatigalugit, kisiannili
ukiup aappaata affaa ingerlatinnaarnerini qaangiunnerinnaani 3 mio.
kr.-ninngorsimavoq taanna atuivallaarnerput. Isumaqarpunga taanna
takussutissaalluartoq ilinniagaqarusuttut amerliartornerannut. Ullunili
kingullerni, soorlu Kangerlussuarmi ataatsimiissimanermi tunngatillugu,
ilaatigut imannak taamaatiinnartartut amerlavallaarujussuartut allaat 1/3-i
atuarunnaartartut.
Kisianni manna iluatsillugu
oqaatigilaarlara kisitsisit 1995-ip siornatigut naatsorsuusiaasimasut taamatut
oqaaseqarnermi tunngaviummata, kisianni 1995-ip kingornaninngaaniik malunnaavissumik
ilinniagaqarniartut nalunaartut amerliartorsimapput. Aammalu ukiuni
marlunngulersuni taakkunani maluginiarsimavarput ilinniarnerminnik
ingerlatsiniartut nalunaartut tunuaannartarnerat taanna
annikilligaluttuinnartoq. Ilaatigut soorlu GU-mi atuartut eqqarsaatigigutsigit
eqqarsaatigigutsigit 1. Kl.-minngaaniit klasse pingasut aallartikkaangamik,
massakkut imaappoq klasse pingasuullutik atuarnertik naammassisaraat. Taanna
erseqqissaaffigilaarpara kisitsisit tunngavigineqartut assigiinnginnerat
pissutigalugit assigiinngitsunik paasisoqarsinnaammat.
Taavalu pingajussaattut
tamaasa oqaluttut ataasiakkaarlugit akissuteqarfiginngikkaluarlugit
erseqqissaatigilaarlara. Ilumoorpoq sunngiffiup nalaani
sammisassaqartitsiniarnermut inatsit utaqqivarput maannakkut, tassa
Kommunalreformkommission-ip inassuteqaatai utaqqivagut qanoq ililluni
aaqqiisoqarnissaa.
Siulleq: Atuarfeqarnermut
inatsit Kommunalreformkommission-iminngaaniit inassuteqaataasut tunngavigalugit
inissereerpoq, tulliinnguuttorlu tassaavoq sunngiffiup nalaani inatsisip
ullutsinnut naleqquttussanngorsarnissaa. Tassanilu naleqqussaaniarnermi
eqqorneqartut, ilaatigut pissangalluta utaqqisagut, tassaavoq klub-eqarnikkut
timersortarfeqarnikkullu allatigullu kommunit ingerlatsisutuut
Namminersornerullutillu Oqartussat pisussaaffiisa erseqqinnerusumik
inissinnissaat.
Ullumikkut una tusartuarparput
kommuninngooq suliassaanik tuniorarpagut aningaasaliissuteqassanatalu,
taamatut aporaannerit ullumikkut nalunngilagut ingerlapput kisiannili taakkua
aaqqiissutissaat aatsaat iluamik ilusilersinnaassavagut sunngiffiup nalaani
inatsisissap massakkut suliarineqartoq piareerluni inissinneqarmat.
Allaalluunniit uanninngaaniik isigalugu uggornangajakkaluarpoq 1998-mi
ukiakkut aatsaat taanna inatsisiliorneq angumerisinnaassagatsigu. Kisianni
ajornartorsiutivut assigiingitsut tappiffigalugit qanoq iliuuseqarniarsarivugut.
Isumaqarpungalu taamatut oqaaseqarnikkut oqaaseqartut apeqquteqaataat tamaasa
akillugit. Partiit Kattusseqatigiillu oqaaseqartui taamatut tapersiillutik
saqqummiinnerat Naalakkersuisut sinnerlugit qujassutigaara suliassaq
ingerlateqqissavarput, neriorsuutituulluupernaamut aammalu ukiamut ataatsimiinnissamut
saqqummiinniarumaarpugut sumut killinnitsinnik erseqqissaaqqinnerusumik.
Qujanaq.
Kristine Raahauge,
Ataatsimiititaliap siulittaasua, Siumut:
Kultureqarnermut
Ilinniartitaanermilu Ataatsimiititaliami isumaliutissiissutitta
ilassilluarneqarnera nuannaarutigaarput, naalakkersuisullu akissuteqaataat
suliap sumut killissimaneranut ersarissumik nassuiaatitalik aamma
qujassutigalugu, partiillu oqaaseqartuisa tapersersuinerat aallaavigalugu
suliassat ingerlateqqinnissaanut suleqataanissarput qilanaaralugu oqaaseqaatisi
tamaasa qutsatigivagut, tassanilu aamma soorunami maluginiarparput suliassat
ilaatigut ilisimatusarfik pillugu pilersaarutit piviusunngortinnissaasa
nukinginnarsinerat ersermat, taakkua aamma annertuumik nalunngilagut aningaasartaqassasut, taamaattumik assut
qujanarpoq oqaaseqartut pingaartitaminnik ersarissumik oqaaseqarnerat. Qujanaq.
Hans Enoksen,
ataatsimiinnermik aqutsisoq:
Taamaalilluni immikkoortoq
52 naammasivoq. Kultureqarnermut Ilinniartitaanermullu Ataatsimiititaliap
isumaliutissiissutaa.
Oqaluuserisaq naammassivoq.