Oqaluuserisassani immokkoortoq 53-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 4.november
1997 nal. 12.18
Ataatsimiinnermik aqutsisoq:
Inatsisartut Siulittaasuata tulliisa aappaat Hans Enoksen.
Finn Karlsen,
Ataatsimiititaliap siulittaasua, Atassut:
Inatsisartut
Isumaginninnermut Ataatsimiititaliaata
isumaliuttissiissataa saqqummiutissavara.
Inatsisartut
Isumaginninnermut Suliffeqarnermullu Ataatsimiititaliaat 1997-imi ukiakkut
ataatsimiinnermini ulluni oktobarip aallaqqaataani, 9-ani, 16-iani aamma
30-iani ataatsimiittarpoq.
Inatsisartunut ilaasortap
Manasse Berthelsenip inuit ulluinnarni inuiaqatigiinni inuunerisa
misissuiffigineqarnissaannik siunnersuutaa ataatsimiititaliamut
oqaluuserisassanngortinneqarsimavoq.
Manasse Berthelsen
periarfissaqarsimavoq siunnersuutimi ataatsimiititaliamut itisiliinissaminut,
tamatumunngalu atatillugu siunnersuutini pillugu allakkiamik ataatsimiititaliamut
tunniussaqarluni.
Ataatsimiititaliap
isumaqatigiissup Manasse Berthelsenip siunnersuutaa siunertarisaalu tapersersorpai,
kaammattuutigissallugulu Naalakkersuisut ukioq allortarlugu inuit ulluinnarni
atugarisaat pillugit nassuiaasiortalissasut, assersuutigalugu soorlu
peqqinnissamut ingerlatsineq pillugu nassuiaasiortoqartartoq.
Tamatuma saniatigut
ataatsimiititaliaq Isumaginninnermut, Suliffeqarnermut Pisortallu Suliassaqarfiutaannut
Naalakkersuisumik paasissutisseeqatigiiffiusumik ataatsimeeqateqarpoq, tassani
ataatsimiititaliaq ilisimatinneqarluni suliffeqarnermut tunngasutigut
naalakkersuisunut ilaasortap siunissaq eqqarsaatigalugu pilersaarutaanik
kiisalu Isumaginninnermik iluarsaaqqinnissamut ataatsimiititaliarsuup
sulinerata malitseqartinneqarnissaa pillugu.
Isumaginninnermut,
Suliffeqarnermut Pisortallu Suliffeqarfiutaannut Naalakkersuisup Isumaginninnermik ataatsimiititaliarsuup
isumaliutissiissutaata malitseqartinneqarnissaa pillugu nassuiaata
eqqarsaatigalugu, Isumaginninnermut Suliffeqarnermullu Ataatsimiititaliap
nassuiaat tusaatissatut tiguaa. Tamatumunnga atatillugu ataatsimiititaliap
naalakkersuisunut kaammattuutigissavaa ataatsimiititaliaq
malitseqartitsiniarluni sulineq kiisalu naalakkersuisut inatsisiliornikkut
suliniutiginiagaat pillugit ataavartumik ilisimatinneqartarnissaq.
Inatsisartut
Isumaginninnermi Ataatsimmititaliaani ilaasortaapput: Lars Sĝrensen Inuit
Ataqatigiiniit, Ruth Heilmann, Siumut, Laanngunaq Lynge Siumumiit, Jakob Sivertsen,
Atassut aamma
Finn Karlsen, Atassut.
Mikael Petersen, Isumaginninnermut, Suliffeqarnermut Pisortallu
Suliassaqarfiutaannut Naa-lakkersuisoq:
Inatsisartut Isumaginninnermut Suliffeqarnermullu Ataatsimiititaliaannit
isumaliutissiissut naalakkersuisut sinnerlugit imatut oqaaseqarfigissavara:
Inatsisartunut ilaasortap Manasse Berthelsenip inuit ulluinnarni
inuiaqatigiinni inuunerisa misissuiffigineqarnissaannik siunnersuutaa
tunngavigalugu naalakkersuisut suliniutiginiarpaat isumaginninnikkut ingerlatsineq
pillugu nassuiaasiortoqartalernissaa. Taamatut nassuiaat siulleq upernaakkut
ataatsimiinnissami Inatsisartunut saqqummiunneqariissaaq. Ukioq allortarlugu
taamatut nassuiaateqartoqartalernissaanik Inatsisartut Isumaginninnermut
Suliffeqarnermullu Ataatsimiititaliaata kaammattuutaa naalakkersuisut
taamaalillugu taperserpaat.
Suliffeqarnermut tunngasutigut ingerlatsineq eqqarsaatigalugu tamatumani
ilaatigut innersuussutigineqassapput Namminersornerullutik Oqartussani
sulisorisat katitigaanerat suliffissaqartitsiniarnikkullu ingerlatsineq
pillugit nassuiaat pillugu aqagu maani inimi oqallinnissaq kiisalu
qulliunerusut eqqarsaatigalugit nalinginnaasumik suliffeqarnikkut ingerlatsineq
pillugu nassuiaatissaq Inatsisartut 1998-imi ukiakkut ataatsimiinneranni
saqqummiunneqartussaq. Naalakkersuisut siunertaraat - isumaginninnikkut
ingerlatsineq pillugu nassuiaateqartarnissatulli - ukioq allortarlugu
suliffeqarnikkut ingerlatsineq pillugu nassuiaateqartassallutik.
Ilanngullugu erseqqissaatigineqassaaq Inatsisartut - aamma Inatsisartut
Isumaginninnermut Suliffeqarnermullu Ataatsimiititaliaat - soorunami
Isumaginninnermik iluarsaaqqinnissamut ataatsimiititaliarsuup
isumaliutissiissutaa pillugu malitseqartinniarlugulu sulineq annertooq kiisalu
suliffeqarnikkut ingerlatsinermut tunngasut eqqarsaatigalugit naalakkersuisut
pilersaarutaat suliniutiginiagaallu pillugit ataavartumik
ilisimatinneqartassammata.
Taamatut naatsumik oqaaseqarlunga naggataatigut naalakkersuisut sinnerlugit
Inatsisartut Isumaginninnermut Suliffeqarnermullu Ataatsimiititaliaannit
isumaliutissiissummut qujavunga.
Laannguaq Lynge, Siumup oqaaseqartua:
Siumup Ataatsimiititaliap Naalakkersuisunut inassutigisai tunngaviatigut
tapersersorparput. Siumumi isumaqarpugut inuit atugarisaat pillugit ukioq
allortarlugu Naalakkersuisut Inatsisartunut taamaalilluni innuttaasunut
nalunaarusiortalernissaa pitassasumik inunnik isumaginninnikkut
sullissinissamut ikorfartuutaalluassasoq. Pingaartumik aamma Inunnik
Isumaginninnermi Ataatsimiititaliarsuup isumaliutissiissutaata
malitseqartinnissaanik sulinissamik iluaqutaassinnaajumaartoq
isumaqarfigaarput. Tamannalu Naalakkersuisut ersarinnerusumik ammanerusumillu
Inunnik Isumaginninnikkut politikkeqarnissamik oqariartuutigiumassanut naapertuulluinnassaaq.
Nuannaarutigaarpullu Naalakkersuisut upernaamut nalunaarummik taamaattumik
pilersaaruteqarnertik nalunaarutigereermassuk ilanngullugulu ukioq
allortarlugu isumaginninnikkut nalunaaruteqartarnissamik pilersaaruteqarnerat
qilanaaralugu. Siumumi soorlu oqaatigereeripput Isumaginninnermi
Ataatsimiititaliarsuup isumaliutissiissutaata malitseqartinneqarnissaanik
suleqataanissarput qilanaarigipput, taamatuttaaq Inunnik Isumaginninnermut
Suliffeqarnermullu Ataatsimiititaliap isumaliutissiissutip
malitseqartinneqarnissaanik suleqataalluarumalluni
malin-naatinneqartuarnissaminik kaammattuuteqarsimanera taperserparput.
Taama naatsumik oqaaseqarluta Siumumiit ataatsimiititaliaq
sulilluarsimaneranik qutsavigalugu isumaliutissiissutaa tusaatissatut
tiguarput.
Otto Steenholdt, Atassutip
oqaaseqartua:
Siunnersuumut
saqqummiunneqarsimasumut Ataatsimiititaliap isummiussaa Atassummiit
taperserparput, Inunnik Isumaginninneq ataatsimut tamaat eqqarsaatigalugu
Inunnik Isumaginninnermi Ataatsimiititaliarsuup inassuteqaataasa
tulleriiaarinikkut piviusunngortikkiartuaarneqarnisaanni Inatsisartuni
nassuiaateqartarnissaq pisariaqarmat. Atassummiit Inunnik Isumaginninnermi
iluarsaaqqinnissamut Ataatsimiititaliarsuup suliniutissatut
innersuussutaasa tulleriiarinikkut
piviusunngortikkiartuaarnissaannik
Inunnik Isumaginninnermi Ataatsimiititaliap qanimut
suleqatigineqarnissaanik oqariartuutigineqartoq Arassumminngaaniit
tamakkiisumik taperserparput.
Taama naatsumik
oqaaseqarluta tusaatissatut isumaliutissiissut Atassumminngaaniit tiguarput.
Lars Sĝrensen, Inuit
Ataqatigiit oqaaseqartuat:
Inatsisartunut ilaasortap
Manasse Berthelsen inuit ulluinnarni inuiaqatigiinni inuunerisa misissuiffigineqarnissaanik
siunnersuutaa siunertaalu Inuit Ataqatigiinniit soorunami tamakkiisumik
taperserparput. Inuit Ataqatigiit upernaaq Isumaginninnermi Iluarsaaqqinnermi
Ataatsimiititaliarsuup Isumaliutissiissutaata oqallisiginerani oqaatsigaarput
pisariaqarluinnalersimasoq isumaginninnermut
ingerlatsineq pillugu nassuiaammik ukiut allortarlugit
saqqummiussisoqartalernissaa.
Pisariaqartitsineq
qanittukkut kingumut ersersinneqarqippoq saqqummiunneqarmat innuttaasut
ullumikkut atugarisaasa Kommuuneqarfimmiit Kommuneqarfimmut
assigiinngitsorujussuanngorsimammata. Tassani assersuutit ilaatigut
taaneqarpoq nunatsinni Kommunit pisuujunersaanni, tassa Nuummi, innuttaasut
agguaqatigiisillugu ukiumut isertitaat akileraarutissatut 1994-mi
127.000kr-iusimasut, Kommuuninilu piitsuunerusuni ukiumut isertitat
akileraarutissat taamaallaat 50.000 missaaniisimallutik.
Taamatuttaaq ukiuni
kingullerni pingaartumik Naalakkersuisuniit oqaatiginiarneqartartoq tassalu
nunatsinni sulifissaaleqisut ikiliartornerat, akerlianilli Kommunit
kisitsisitigut tikkuartarlugu suliffissaaleqisut Kommunini amerlanerni
amerliartortut. Kikkut eqqortumik oqalunnersut soortunami
assortuussutaajuassaaq sulifissaaleqisunut naatsorsueriaaseq
assigiissaarneqanngippat. Inuit Ataqatigiinniit qularinngilluinnarparput
siunissami isumaginninnikkut ingerlatsineq pillugu nassuiaammik
saqqummertoqartarlerpat nunatsinni isumaginninneq ataatsimut eqqarsaatigalugu sullissinerit siunissami
assigiiaarneqassasut, tamannami pisariaqarpoq, soorlu siunnersuuteqartup aamma
oqaatigereeraa.
Naggataatigut Inuit
Ataqatigiinniit nuannaarutigaarput Isumaginninnermi Naalakkersuisoq
Inatsisartut Isumaginninnermi Ataatsimiititaliaat Isumaginninnermi
Iliuarsaaqqinnissamut Ataatsimiititaliarsuup isumaluitissiissutaa malitseqartinnniarlugu
suleqqinnissami ataavartumik ilisimatitsisarniarmat.
Taamatut naatsumik
oqaaseqarluta Inatsisartut
Isumaginninnermut Suliffeqarnermullu Ataatsimiititaliaata isumaliutissiissutaa
oqaaseqarigaarput.
Bjarne Kreutzmann, Akulliit Partiiat:
Iluarsaaqqiinissamik Ataatsimiititaliarsuup malitseqartitsinissamik
oqaaseqaataa innersuullugu peqqinnissamut tunngasutigut ingerlatsineq pillugu
nassuiaasiortoqarneranut assingusumik Naalakkersuisut ukioq allortarlugu inuit
ulluinnarni atugarisaat pillugit nassuiaasiortoqarnissaanik Manasse
Berthelsenip siunnersuutaata imaanut siunertarisaanullu Isumaginninnermut
Suliffeqarnermullu Ataatsimiititaliap tapersiinera Akulliit Partiianniit
matumuuna aammattaaq taperserparput. Akulliit Partiiani paasivarput suliamut
tassunga atatillugu siunissami pilersaarutit pillugit aamma
Ataatsimiititaliarsuup sulinera pillugu Naalakkersuisunut ilaasortap
Ataatsimiititaliaq ilisimatissimagaa. Tamanna aaliangiinerit
malitseqartinneqarnissaannik aamma
siullermik pisortaqarfiit namminneq iluanni aappassaanillu pisortaqarfiit
akornanni ammasuunissamik Akulliit Partiiatut siunertarisaanut
naapertuulluarpoq.
Isumaliutissiissut taama oqaaseqarlunga tusaatissatut tiguara.
Anthon Frederiksen, Kattusseqatigiit:
Inatsisartut Isumaginninnermut Suliffeqarnermullu Ataatsimiititaliaata
isumaliutissiissutaa Naalakkersuisullu akissuteqaataat soqutigalugit
misissorsimavakka. Inatsisartunut ilaasortap Manasse Berthelsenip siunnersuutaa
assut soqutiginarpoq, tassami inuiaqatigiinni inuit ulluinnarni atugarisaasa
inuunerisalu naliginnaasumik atugarititaasut tunngavigalugit inuunerat malinnaavigissallugu annerusumillu
paasisaqarfigissallugu pisariaqarput, minnerunngitsumik Inunnik
Isumaginninnermik Ataatsimiititaliarsuup suliaasa malitseqartinneqarnissaat
eqqarsaatigalugu.
Taamaattumik ataatsimiititaliap Naalakkersuisunut kaammattuutaa
Naalakkersuisullu akuersaarlutik
akissuteqaataat tamakkiisumik akuersaarpakka.
Hans Enoksen, ataatsimiinnermik aqutsisoq:
Taamaalilluni immikkoortoq 53 Isumaginninnermut Suliffeqarnermullu
Ataatsimiititaliap isumaliutissiissutaa naammassivoq.
Oqaluuserisaq naammassivoq.