Oqaluuserisassani immokkoortoq 62-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 28.oktober 1997 nal. 19.12
Ataatsimiinnermik aqutsisoq: Inatsisartut Siulittaasuata tullia, Finn
Karlsen.
Anthon Frederiksen, Kattusseqatigiit:
Siullermik ilisimatsitissutigissavara una
oqaluuserisassatut siunnersuut oktoberip aallaqqaataani Inatsisartut
siulittaasoqarfianut tunniussimagakku, imatullu nipeqarpoq:
Tusagassiuutitigut saqqummiunneqartut
naapertorlugit naalakkersuisut siulittaasorisimasaata, Kultuureqarnermut,
Ilinniartitaaanermut Ilageeqarnermut naalakkersuisup, immaqalu taammanikkut
naalakkersuisut ilanngullugit KNR-imi siulersuisuusimasunut, atorfillillu
qullersaannut tunngasunik suliaqarnermi Inatsisartut inatsisaannik, tassalu
naalakkersuisut akisussaassuseqarnerannut tunngasumik sumiginnaasimasutut
akisussaatinneqarsinnaannerannik nipilimmik saqqummiussaqarnerat
imaannaanngitsoq, tusaanngitsusaaginnarneqarsinnaanngilaq. Taamaattumik
Inatsisartutut ilaasortatat, piumasarissavara tusagassiuutitigut
saqqummiunneqartut eqqortuunerat eqqortuunnginneralluunniit qulaajarniarlugu,
Inatsisartuni ilaasortaasugut suliamut tunngasumik tamakkiisumik
ersarissasumillu paasitinneqarnissarput, aammalu pisariaqarpoq Inatsisartuni
piaarnerpaamik suliarnieqarsimasunut tunngatillugu oqallittoqarnissaa,
paasissutissallu tamaassa Inatsisartunut saqqummiullugit, tusagassiuutitigummi
saqqummiunneqartartut kisiisa tunngavigalugit oqallinneq
ingerlanneqarsinnaangilaq. Suliami aningaasarpassuit pineqarput,
taamaattumillu Siulittaasoqarfik ataqqinartoq qinnuigissavara torersumik
suliarineqarnissaa anguniarniarlugu piaartumik Inatsisartunut
saqqummiunneqarnissaa sulissutigeqqullugu.
Konrad Steenholdt, Kultureqarnermut, Ilinniartitaanermut
Ilageeqarnermullu Naalakkersuisoq:
Nassuiaateqarfigeqqulluni Hr. Anthon
Frederiksen-iminngaanniit piumasaqaataasoq, taanna pillugu
naalakkersuisuninngaanniit imatut akissuteqassaagut:
Oqaluuserisassani immikkoortup 49-p
oqaluuserineqarnerani suliassap ingerlasimanera pillugu Inatsisartunut
erseqqissumik tamakkiisumillu naalakkersuisut nassuiaateqareermata naalakkersuisut
isumaqarput tassunga oqaaseqaateqaqqinnissaq pissutissaqanngitsoq,
taamaattumillu immikkoortumut 49-mut akissuteqaat ataastimut isigalugu
innersuussutigissallugu.
Laannguaq Lynge, Siumup oqaaseqartua:
Uagut Siumuminngaanniit aamma
Naalakkersuisut akissuteqaataat innersuullugu isumaqarpugut oqaluusserisassaq
taanna siunnersuutip taassuma oqaluuserineqarnissaa 49-mi oqaluuserineqareersimammat
oqaasissaqarnata allamik.
Lars Sĝrensen, Inuit Ataqatigiit oqaaseqartuat:
Ullormut oqaluuserisassatut immikkoortut
62-i oqaluusererinissaanut Inuit Ataqatigiinninngaanniit
oqaluuserisassanngortitaqarsimanerput 49-mut oqaatsivut, oqaaserparujussuagut
innersuussutigalugit ilaatigut oqaatigiinnassavarput suliani ilaatigut
pingaaruteqartuni tungassuni paasissutissat assigiinngitsut Inatsisartunut
ulluinnarni ataatsimiititalianut ilaasortaanngitsunut agguaanneqaarsinnaanissaat
isumaqarpunga siunissami aamma anguniartariaqartoq, tamannaasimagunarmat
ilaatigut siunnesuuteqartup oqaluuserisassanngortitsinermi tunngaviisa
ilagisimassagaat.
Anthon Frederiksen, Kattusseqatigiit:
Tupigusuutiginngilluinnarpara
naalakkersuisust suliaq manna piaarnerpaamik qaangerniarlugu suliniuteqarmata.
Taamaakkaluartoq isumaqarpunga naalakkersuinikkut kukkuneq ersarissoq
inuiaqatigiinnut akilersinniarneqartariaqanngitsoq, tamannami qinersisartunut
akikinaarineruallaaqaaq, qinersisartummi sianiitsuunngillat tamanna maannamut
allaleriarluni ilaatigut tusagassiuutitigut saqqummersinneqartareerpoq,
aammalu malunnarluinnarpoq qinersisartut minerungitsumik immikkoortoq 49-up
oqaluuserineqarnerata kingorna naalakkersuisooqatigiit suliamik matuminnga
qaangiipallanniarsarinerat akuersaarneqanngilluinnartoq. Tassa qinersisartunit,
tassami suliassami inuiaqatigiit namminneq pisuussutiginngisaannut
naalakkersuisoqatigiinnit tassalu Siumut-mit Atassummillillu
akiliisussanngortinneqarnerat akuersaarneqarsinnaangilaq.
Sooq suliami taama pingaaruteqartigisumi
paasissutissat pingaaruteqartut Inatsisartunut ilaaasortanut
tunniukkumaneqanngillat, tassami suliap siullermeerluguli suliarineqarneranut
atatillugu Inatsisartunut ilaasortatut, pisussaaffigalu qinikkatut
naapertorlugu kiisalu pisortat ingerlatsinerat pillugu inatsisit
tunngavigalugit paasissutissat noqqaassutigisimagaluarpakka, kisiannili manna
tikillugu taannaluunniit akineqanngilaq, taamaallaat naalakkersuisoq maannamut
oqaaluuserisaq immikkoortoq 62 pillugu titarnernik sisamanik oqaaseqarpoq,
tassami inatsit pisortat ingerlatsinerat pillugu
paasissutissiisussaatitaanermut tunngasoq naapertorlugu paasissutissat sooq
tunniunneqanngilat.
Taamaattumik pinngitsoorani arlaatigut
ajortoqartoq qularnarunnaarpoq, tamannalu qularnaallisisllugu innuttaasullu
toqqissisimanartumik aaqqiisoqassappat naalakkersuisut piumassuseqartarariqarput
suliap assuarnaatsumik naammasineqarnissaa sulissutigissallugu, ilaatigummi
tusagassiutitigut saqqummiunneqartut tunngavigalugugit naalakkersuisut
Inatsisartut inatsisaaannik tassalu naalakkersuisut
akisussaatitaasinnaanerannik inatsimmik unioqqutitsisutut nalilerneqarnerat
aammalu Kultureqarnermut Ilinniartitaanermullu naalakkersuisup tamanut
ammasumik inuiqatigiinnut sallunerarneqarnera tamakkiisumik
uppernarsineqanngilaq.
Taamaattumik suliaq
ingerlateqqinneqassanngippat apeqqusertariaqarpoq ilumut nunatsinni demokrati tunngavigalugu naalakkersuinermik
ingerlatsisoqarnersoq, tassami naalakkersuisut imminnut illersoriaasiat
Inatsisartuni amerlanerussuteqarneq sakkuliullugu ileqqupalaaliutiinnaneqarsinnaanngilaq
akuersaarneqarsinnaananilu. Tassami taamaatoqanngippat sooq paasissutissat
sulianut ataatsiakkanut tunngasut Inatsisartunut ilaasortanut
isertuuneqassappat?
Nunatsinni inatsisiliortuulluta
kissaatigaarput inatsisiliata peqqussutillu innuttaasunik ataqqineqarlutillu
malinneqarnissaat, taamaattumik tamakku malitsinneqarnissaat ilaatigut
anguniarlugu assersuutigalugu aalisarnermut piniarnermullu
nakkutilliisoqalernissaa sulissutigineqarpoq. Soormi taama
piumasaqarsinnaavugut Inatsisartut nammineerluta inatsisiliatsinnik
malitsitsisinnaanngikkutta? Ilumut taamaattoqassappat suliamut allamut
tunngatillugu Inatsisartuni ilaasortap ilaata oqarnera
ilumoortortaqarsimassooq; pissutsit ilaatigut Sydafrikammi atuuttunut assersuunneqarsinnaapput,
tassalu naalakkersuisoqatigiit imminnut pitsaaliorlutik illersorneqarnerat
eqqarsaatigalugu. Allaanngilarmi innuttaasut sutigut tamatigut
malersorneqarnissaat kisimi naalakkersuisoqatigiinniit pingaartinneqarnerusoq,
tassa imaalersimagunarmat Naalakkersuisunut ilaasortat arlaat Inatsisartut
inatsisaannik malinninngikkaluaruni soqutaanngilaq.
Pissutsit taamaattut ajorput
akuersaarneqarsinnaanatillu, taamaattumik suliaq manna Inatsisartuni
amerlanerussuteqarneq kisiat sakkugalugu unitsinneqassappat
piumasarisariaqarpoq suliap aqqutit allat atorlugit ingerlateqqinneqarnissaa.
Konrad Steenhold, Kultureqarnermut, Ilinniartitaanermut
Ilageeqarenrmullu Naalakkersuisoq:
Kingumut innersuutiginnsaavakka ullormut
oqaluuserisassami immikoortoq 49-mi akuissuteqaatit sukumiisut, taakkua uani
oqaluuserisassanngortitsisumut atuaqqullugit, taavalu aamma oqaasiinut
tunngatillugu una oqaatigilaaginnassavara, ilisimatitsissuterusukkakku
ullumikkut aamma Sydafrikami demokrati atorlugu ingerlatsisoqarmat.
Misissuinikkut aamma ullumikkut taakkua soorunami kimillunniiit
paasineqarsinnaapput. Taamatut oqaaseqarlunga innersuussutigeqqissavara taakku
uani innersuusstigisssagut tunngavigalugit taasuma apeqquteqaatitp
akineqarsimanera oqallinnermut matumani naammagisimaarneqassasoq.
Anthon Frederiksen, Kattusseqatigiit:
Uanga tupigilluinnarpara sooq pisortat
ingerlatsinerat pillugu paasitinneqarsinnaatitaaneq pillugu Inatsisartut
inatsisaat nr. 9, 13.juni 1994-meersoq ' 4, imm. 1 aammalu ' 8 imm. 1, nr. 3 naapertorlugu Inatsisartut
qinnuigineqarnertik akuersaanngikkaat. Inatsit taanna naapertorlugu
tunngavissaqareerpoq paasissutissat assigiinngitsut tunniunneqarsinnaanerannut,
sooruku tunniunneqanngitsut? Inatsisartut namminneerlutik uani inatsimmi
pineqartum unioqqutitsipput taamaaliunnginnamik, taannalu suliassaq uanga
ingerlateqqissallugu piareersimavunga.
Finn Karlsen, Inatsisartut Siulittaasoqarfianni Siulittaasup
tullia:
Tassa taamaalilluni immikoortoq 62 -ip
oqaluuserineqarnera naammassivoq.
Oqaluuserisassaq naammassivoq