Kalaallit Nunaanni Inatsisartut

Oqaluuserisassani immikkoortoq 03		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 4. juni 1997 nal.  17.10

 

Oqaluuserisassani immikkoortoq 3.

 

Tullianik ataatsimiinnissap qaqugu pinissaata aalajangerneqarnera.

(Siulittaasoqarfik)

 

 

 

Ataatsimiinnermik aqutsisoq: Otto Steenholdt, Siulittaasoqarfik.

 

Jonathan Motzfeldt, Inatsisartut Siulittaasuat:

Siulittaasoqarfiup Inatsisartunut akuereqqullugu inassutigaa 1997-imi ukiakkut ataatsimiinneq aallartissasoq 25. september 1997 naammassissoorlu kingusinnerpaamik 6. november 1997, taamatuttaaq Siulittaasoqarfiup Inatsisartunut inassutigaa 1998-imi upernaakkut ataatsimiinneq 15. april 1998 aallartissasoq naamassissoorlu kingusinnerpaamik 4. juni 1998.

 

Upernaakkut ataatsimiinnissaq Siulittaasoqarfiup tungaaniit pingaartinneqarsimavoq, tassa tamanna suleriaatsimi naatsorsuutigineqanngikkaluarpoq, kisianni avatangiisigut aammalu Naalakkersuisoqarfiit isigalugit pisariaqartissimavarput taamaattumik siunnersuuteqarnissaq.

 

Sivert K. Heilmann, Atassutip oqaaseqartua:

Tullianik ileqquusumik maani ataatsimiinnissamut Atassumminngaanniit Siulittaasoqarfiup saqqummiutaanut qujavugut, kisianni Atassutip tungaaninngaanniit siunnersuutigerusupparput ukiamut ataatsimiinnissaq aallartissasoq 19. september 1997 - tassa 25. september 1997 aallarti­gani.

 

Taavalu aamma aappaagumut Siulittaasoqarfimmiit siunnersuutigineqarpoq 15. april 1998 aallartissasoq Atassumminngaanniit siunnersuutigerusupparput 13. marts 1998 ataatsimiinneq aallartissasoq.

 

Taamaatut naatsumik Siulittaasoqarfiup saqqummiutaa Atassutip tungaaninngaanniit akivara aammalu neriuppunga taperserneqarumaartoq, naggataagullu naammassigatta Siulittaasoqarfik, Inatsisartunut ilaasortat, Naalakkersuisut aammalu sulisorpassuit tamassi qamannga pisumik sulilluarsimanermut qujavunga tamassilu ajunnginniarisi.

 

Johan Lund Olsen, Inuit Ataqatigiit:

Aamma uagut Inuit Ataqatigiinninngaanniit tullissaanik, tassa ukiamut, ataatsimiilernissarput pillugu gruppe-tinni aamma eqqartuisimavugut. Siulittaasoqarfiup siunnersuutigisaani allaaneru­laartumik isummerluta aammalu aatsaaginnaq oqaaseqartup siunnersuutigisaa isumaqatigalutigu Inuit Ataqatigiinninngaanniit kissaatigissavarput ukiamiit ataatsimiinnissarput 19. september 1997-miit aallartissasoq.

 

Kisianni aamma siorna Inatsisartut suleriaaserput allanngortinneqarnissaa pillugu ataatsimiitita­liorluta maani Inatsisartuni akuersissutigeriigarput innersuussutigalugu aamma kissaatigerusup­parput sapaatip akunneranik suli ataatsimik immaqa ilaneqarsinnaanissaa tamanna isumaliutigi­neqaqqullugu.

 

Tassami maluginiaratsigu, naak, ukioq manna 1. januar 1997-niit allanngortiterinerput aallartit­tussaareeraluartoq, tassa ataatsimiittarnigut sapaatip akunnerini qulinik sivisussuseqartarnissaat, taanna maannakkut qimakkiartorneqalereersimavoq. Ukiamullu ataatsimiinnissarput siunnersuu­tigineqartutuut 25. september 1997-miit aallartissimasuuppat 6. november 1997-llu tungaanut ingerlassappat, tassa sapaatip akunneri arfinilingajaannaapput.

 

Tamanna eqqarsaatigilaariarutsigu aamma ukiamut suliassarpassuagut maanna Inatsisartuni isummerfigisassagut eqqarsaatigilaariarutsigit, soorlu aningaasaqarnermut inatsit allarpassuillu pingaaruteqarluinnartut ataatsimiinnissarput puullaaqqinarseriissaaq immaqa sapaatit akunneri marluk ingerlariiginnarneranni. Taamaattumik siorna, tassa ukiakkut maani Inatsisartut aamma akuersissutigeriigaarput, puigornagu isumaqarpugut pingaaruteqartoq Inatsisartuni sulinerput aamma peqqissaarutissagutsigu pisariaqartoq takinerulaartunik ataatsimiittarnissarput.

 

Kisianni oqaatigissavara, aatsaaginnaq Atassutip siunnersuutigisaa tassa ukiaru 19. september 1997 aallartinnissarput Inuit Ataqatigiinniit akuersaarumavarput aammalu akuersaarumavarput aappaagu upernaakkut ataatsimiilernissarput 15. april 1998 aallartigani 13. marts 1998 aallartin­nissaa uagut kissaatigissagatsigu.

 

Periarfissaq manna iluatsillugu, tassa 1. januar 1997-niit allanngortiterinerup nassatarisaanik ilisimaneqartutuut Inatsisartut qiffartuunneqarnermikkut immikkut maannakkut aaqqissuussif-figineqarsimapput, tassa Inatsisartut namminerisaminnik ilaatigut Inuit Ataqatigiinniit siunner­suuteqareernitta kingorna maannakkut Allattoqarfeqalersimavugut isumaqarpunga periarfissaq manna iluatsillugu aamma Allattoqarfitsinni sulisorisagut sulilluarsimaqisut aamma immikkut qutsavigissallugit, taamatuttaaq oqalutsigut/nutserisugut maani uagutsinni Amakkulukkusoqi-sunik@ aamma nutserussisarsimasut immikkut qutsavigisariaqaratsigit taakkununnga apuutissa­vara - qujanarsuaq.

 

Laannguaq Lynge, Siumut:

Siumuminngaanniit Atassuminngaanniillu siunnersuutigineqartoq, tassa ukiamut 1997-mi ataatsimiilernissami ullut allanngortinneqarnissaannik 19. september 1997 aallartinnissaanik siunnersuutigineqartoq Siumuminngaanniit akuersaarparput aammalu taamatut upernaakkut 1998-mi allannguutissatut siunnersuutaat 15. april 1998-mi aallartinnani 13. marts 1998-mi aallartinnissaa aamma Siumumiit akuersaarumavarput.

 

Iluatsillugu aamma uaguttaaq Siumuminngaanniit qutsavigerusuppagut Inatsisartut ataatsimiis-simanitsinni uani aamma taamatut sulisorisimasagut tamaasa immikkut taagunngikkaluarlugit aamma neriuppugut aasarsiorluarumaartusi tamassi.

 

Bjarne Kreutzmann, Akulliit Partiiat:

Akulliit Partiianninngaanniit aamma tapersersorpakka siunnersuutigineqartut ullut 19. september 1997-mi aallartinnissaq aammalu upernaamut 13. marts 1998-niit aallartinnissaq.

 

Ataattsimiinnerput maani pisarnermisut pissanganarsimaqaaq, nuannersimaqaaq ilungersornar-simagaluarluni, nuannaarutiginarporlu uanga tunginninngaanniit Inatsisartuni sulinermi aningaa­sarsiornikkut siuariarnissamik siunnersuutit ilaqarnerujartuinnarmata - qujanarujussuaq tamassi, aasarsiorluarisi sulisut tamassi Inatsisartullu.

 

Anthon Frederiksen, Kattusseqatigiit:

Siorna suleriaaseq pillugu oqallikkatta aalajangersimavissumik ataatsimiittarnerit pisarnissaat akuersissutigaavut, kisianni malunnarpoq taamatut ataatsimiinnerup piffissami aalajangersi-mavissortumi qaqugu naanissaa aalajangiutereerlugu aalajangertarnera aamma illuatungaatigut equsoortitsisartoq.

 

Assersuutigiinnariarutsigu ippassaq - ippassaq suliassagut tamaasa naammassinngitsoorlugit ullumikkumut ilai kinguartinneqarput aammalu ullumikkut naatsorsuutigineqartumik 1 tiimi kingusinaarpugut imaluunniit 1 tiimi sinnerlugu naammassinissamut.

 

Taamaattumik isumaqarpunga apeqqutaalluinnartariaqartoq ataatsimiinnerup sivisussusissaata aalajangerneqarneranut tunngatillugu suliassat qanoq amerlatigineri aamma ilaasortaninngaanniit nassiussuunneqartut oqaluuserisassat assigiinngitsut apeqqutaalluinnartariaqarput ataatsimiin-nissap qanoq sivisussusilernissaanut aalajangernissamut.

 

Tamanna ilaatigut uannut - soorunami kisimiittumut - assorujussuaq pingaaruteqarpoq pissutiga­lugu ilaannikkut Adøgn@-imut, soorlu ippassaani, 18-19 tiimit sulisariaqarsimavunga pissutiga-lugu piffissap kinguartinneqarnerani oqaluuserisassaat immikkoortorpassuit assigiinngitsut tamaasa angumeriniassagaanni immaqa Arobot@-imik ikiorteqarnassagaluarporluunniit, kisianni suli angummassinnaavunga ajunngilaq.

 

Ukiamut ataatsimiinnissap 19. september 1997-p pinissaa uanga aamma ajorinngilara, kisiannili eqqarsarnartoqarpoq taamatut piffissamik oqareerluni ataatsimiinnissaq uani ullormi naassooq. Isumaqarpunga taanna eqqarsaatigeqqittariaqartoq aammalu nalilersuiffigineqaqqittariaqarluni.

 

Naggataatungaatigut tamassinnut qujanaq, aalisaatit ningilaarlugit aamma upattortut nuanner-taqaat ilaanni kiiniavissunngikkaluarlutik aamma ilai sanninngaarneqarsinnaasarmata. Aammalu soorunami sulisunut tamanut minnerunngitsumik Abetjent@-it, soorunami pisortaqarfinni sulisor­passuit aamma tamaasa qujassuteqarfigissuagut, massuma ataatsimiinnerup piviusunngortinne­qarneranut, naak, piffissaq eqqorluarlugu aallartivissunngikkaluarluta - qujanarsuaq, tamassi aamma aasarsiorluarniarisi apissilluarisilu.

 

Jonathan Motzfeldt, Inatsisartut Siulittaasuat:

Paasivara aallartissasugut 19. september 1997 ukiaq manna, taavalu aamma aappaagu 13. marts 1998 taamaalilluni siunnerfigineqassasoq.

 

Taava eqqaasissutigissavarput Naalakkersuisut Siulittaasuat qinnuigisimavara naapeqatigiissa-sugut - taamalu taanna pissaaq. Tassa Inatsisartunut inatsisissat saqqummiunneqartussat ukiup ingerlanerani sapinngisamik suuneri Inatsisartut ataatsimiinnissaat sioqqullugu paaseqatigiiffigi­niarlugit ukiup ingerlaneranut qanoq amerlatigisut inatsisissat ilimagineqassanersut paaseqati­giiffiginiarneqassallutik.

 

Aammalu taassuma saniatigut suleriaaseq nutaaq maannakkut atulersoq ilaatigut Inuit Ataqatigiit eqqartugaat tunngavigalugu Inatsisartuni sulinitta tamarmi ukiaminngaanniit qularnanngilaq suleriaatsimik allaanerulaartumik aamma siunnersuuteqarfigineqarnissaa ilimagineqassaaq.  Soorunami aallartinniarnissarput 19. september 1997 tikitsinnagu siunnersuutissat assigiinngitsut tamarmik piareersimanissaat naatsorsuutigissavarput.

 

Aamma pingaaruteqarpoq una qaqugu ulloq taasinnaaneripput soraarfissatut. Suleriaaserput najoqqutaralugu inatsisissat tunniunneqartut ataatsimiiffissap aalajangerneqarsimasup iluani naammassiniarneqartussat aamma taakkununnga pingaaruteqarpoq qaqugu ulloq ataatsimiiffis­saq kingulleq ilisimaneqassanersoq Naalakkersuisuni ilaasortanillu tamani. Taamaattumik allatut ajornartumik aamma soraarfissaq maannakkut ullulersimanissaa pingaaruteqarpoq.

 

Taamaattumik maannakkut ilisimaannarallassavarput 6. november 1997 siunnerfigalugu suliso­qarallassammat ukiaru aallartinnermi. Kisianni taava suleqatigiiffigalugu naammassiniassagipput neriuutigaara; aasarsiorluarnissassinnillu aammalu qujallunga maannakkut maanaannakkut iseraluarlunga maanga sullivissannut siulittaasutut partiit tamarmik saaffigalugit suleqatigiumi­narneri qujassutigaakka aammalu suliassagut taamaalilluni naammassiniarsimavarput.

 

Naalakkersuisut qutsavigaakka piffissarititaasuni assigiinngitsuni aammalu aaqqissuussinissani nukinginnartunik paaseqatigiilluta Inatsisartullu qullersaqarfiat paaseqatigalugu ingerlasinnaasi­magatta. Taavalu tamassi aasarsiorlunissamik kissaatereerassi maani aviisiliortullu aammalu atorfilittagut tamaasa, tusarnaartartullu tamaasa aasarsiorluarnissaannik kissaappakka - qujanaq.

 

Otto Steenholdt, Ataatsimiinnermik aqutsisoq:

Tassalu immikkoortut pingajuat tullianik ataatsimiinnissap qaqugu pinissaata alajangerneqarnera, taamaalilluni amerlanerusunit nalunaarutigineqarpoq 19. september 1997 ataatsimiinnissaq ukiaru aallartissasoq, taavalu aamma taaneqarluni 13. marts 1998-mi aallartinneqassasoq.

 

Taamaalilluni oqaluuserisaq 3 inerlugu oqaluuserineqarpoq.

 

Jonathan Motzfeldt, Inatsisartut Siulittaasuat, ataatsimiinnermik aqutsisoq:

Taamaalilluni ataatsimiinneq naammassivoq.