Kalaallit Nunaanni Inatsisartut

Oqaluuserisassani immikkoortoq 06-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ataasinngorneq 5. maj 1997 nal. 17.25

 

Oqaluuserisassani immikkoortoq 6.

 

Siunnersuut aalajangiiffigisassaq: Aalisarnermut, piniarnermut nunalerinermullu tapersiisarneq pillugu Inatsisartut peqqussutaannut allannguutissamik siunnersuut.

(Inatsisartunut ilaasortaq Jakob Sivertsen)

 

 

 

Ataatsimiinnermik aqutsisoq: Inatsisartut Siulittaasuat Jonathan Motzfeldt.

 

 Jakob Sivertsen, Inatsisartunut Ilaasortaq, siunnersuuteqartoq, Atassut:

Aalisarnermut, Piniarnermut Nunalerinermullu tapersiisarneq pillugu Inatsisartut peqqussutaan­nut allannguutissamik siunnersuut upernaaq manna Inatsissartut ataatsimiineranni saqqummiussi­mavara, imatut aallartippoq.

 

Nunatsinni piniarnermik aalisarnermik uumasuuteqarnermillu inuussutissarsiuteqarnerup ineriartortinneqarnerani inuusuttut sapinngisaq tamaat tapersersortariaqarparput, siunissami piniarnermik aalisarnermik uumasuuteqarnermillu inuussutissarsiuteqarnitta isumannaatsumik ingerlanneqarnissaa qulakkeerniarlugu.

 

Ullumikkut aalisarnermik piniarnermik nunalerinermillu tapersiisarneq pillugu Inatsisartut pieqqussutaat tunngavigalugu, inuusuttut savaatilinngorniarlutik aallartinniarneranni tapersiissu­tigineqartartut, inuusuttut aalisartunngorniarlutik aallartinniarneranni tapiissutit assigiingippal­laarujussuaqaat.

 

Nalunngilarput piniarnerinnarmik inuussutissariuteqartut atugaat qanoq ilungersunartigisut, pingaartumik inuusuttut piniarluaraluarlutik ammit suliarineqarnissaannut naammattumik ikiortissaqanngikkunik angallatitaarniarnerminni aningaasanik aallarniutissanik katersisinnaann­gillat.

 

Ullumikkut Tunumi, tassa Tasiilami Illoqqortoormiuni, kiisalu Qaanaami piniarnerinnarmik inuussutissarsiuteqarnerup ilungersunartup nuliaasumullu sulerulunnaqisup, aalisarnermik tapertaqartinneqarlernissaa ilungersuullugu anguinarneqartoq nalunngilarput.

 

Piniartuunermiit aalisarnermut ikaarsaarialernermi, inuusuttut aallaqqaataaniit peqataarusukkalu­arlutik aningaasanik aallarniutissaqannginnertik peqqutigalugu qanoq ilioriarsinnaanngitsut ikiorsertariaqalerpagut, inuusuttut savaatilinngorniarlutik aallarteqqaat ikiorserneqartarnerannut assingusumik.

 

Ullumikkut inuusuttut savaatilinngorniarlutik aallartinnerminni ESU aqqutigalugu aningaasanik aalarniutissanik 95 %-i angullugu tapiiffigineqartarput, tamannalu assut savaatilinngorniartunut iluaqutaasimavoq aammalu piumassuseqarnermik annertuumik takutitsiffiusimalluni, tamannalu nunatsinni namminermi neqissaqarniarnitsinnut iluaqutaasimavoq nuannaarutissaasoq annertooq. Sinissami tapersersorluninnartariaqartoq inuusuttut savaatilinngorniartut pisortanit taperserluar­neqarnermikkut sapinngisut pisinnaalluartullu takoreerpagut. Matumuuna Tunumi tassalu Tasiilami, Illoqqortoormini aammalu Qaanaami inuusuttut piniartuunermiit aalisartuunermut ikaarsaarialerneranni pitsaasumik pisortanit tapersersorneqarnissaat anguniarlugu siunnersuum­mik sakkummiussannik upernaaq manna saqqummiussaqarpunga nalunnginnakku inuusuttut avalliunerusuniittut piumassuseqarlutillu pisinnaalluartuusut.

 

Siuliini oqaatigisakka tunngavigalugit Aalisarnermut, piniarnermut Nunalerinermullu tapersiisar­neq pillugu Inatsisartut peqqussutaata imatut allanngortinneqarnissaa siunnersuutigaara, tassani paragrafit erseqqissumik allaneqarsimammata annertunerusumik oqaaseqarfigissanngilakka.

 

Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:

Aalajangernissamut siunnersuut saqqummiunneqartoq siorna ukiakkut ataatsimiinnermut Inatsi-sartunut ilaasortap Ataasummeersup allap siunnersuutaanut assingusoq Naalakkersuisut paasi­vaat. Siunersuut taamanikkut Inatsisartut Aalisarnermut, Piniarnermut Nunalersinermullu ataatsimiititaliaanni suliarineqarpoq. Siunnersuut pillugu ataatsimiititaliap isumaliutissiissutaa Naalakkersuisut tamakkiisumik isumaqatigaat.

 

Naalakkersuisut sinnerlugit nalunaarutigisinnaavara isumarput taamanikkornit allangunngimmat, taamatullu aamma naatsorsuutiginagu Inatsisartut isummaminnik allanngortitsisimanissaat. Taamaattumik naatsumik makku oqaatigiinnassavakka.

 

Piniarnermi, aalisarnermi nunalerinermilu siunertanut inuussutissarsiutinut tapersiinsarneq pil-lugu malittarisassanik aalajangersaasoqartariaqarpoq pissutsit assigiingitsut inuussutissarsiutit pineqartut iluini atuuttut tunngavigalugit.

 

Taammaattumik nersutaateqarneq, tuttuuteqarneq assigisaallu pillugit Inatsisartut Peqqussutaanni aalangersakkat inuussutissarsiutini taakkunanai atugassarititaasut aallaavigalugit aalajangersa­gaapput imaaliallaannaq inuussutissarsiutinut allanut nuunneqarsinnaangitsut.

 

Ilisimatitsissutigisinnaavarattaaq savaatillit 90 %-imik erniaqanngitsunik akilersuutitaqanngiitsu­nillu taarsigassarsillutik aningaasaliiffigisinnaasatuaat tassaammata inuussutissarsiummut ata-tillugu illuutit nammineerluni sanaartukkatut napparneqartut.

Sanasunit ikiorneqarnissani savaatillip kissaatigippugu tamatumunnga taamaallat ernialinnik taarsigassarsisitisoqarsinnaavoq taarsigassarsianulluunniit qularnaveeqqusiisoqarsinnaalluni.

 

Jakob Sivertsen-ip siunnersuutaanut tunngaviusoq, tassalu Tasiilap, Illoqqortoomiit Qaanaallu eqqanni aalisarnermik inuussutissariuteqarnerup ineriartortinneqarnerata ingerlateqqinneqarnis­saa, Naalakkersuisut tamakkiisumik ilalersinnaavaat. Ineriartornerup tamatuma ilaatut Tasiilap eqqaani misileraalluni aalisartoqarsimavoq inuussutissarsiutinullu tapersiisarnermut ataatsimiiti­taliaq angallatinut nutaanut angaallatinullu atornikunut aalisartinneqalersimasunut taarsigassarsi­sitsisarsimalluni.

 

Ukioq manna Illoqqortoormiit eqqaanni misileraalluni aalisarneq ingerlanneqassaaq.

 

Isumaqatiginngilarali aalisarnerup ineriartorteqqinnissaanut aalisarnermut, piniarnermut nuna­lerinermullu tapersiinsarneq pillugu Inatsisartut peqqussutaanni Jakob Sivertsen-ip allanguutissa­tut siunnersuutai pisariaqatut. Peqqussummi simiiffinnut pineqartunut inuussutissarsiutigalugu umiatsiaaqqanut tapiissutinut malittarisassat aamma angallatinut motoreqareersunut immikkut oqilisaanertalimmik aningaasalersuinikkut aaqqissuussineq siunertamik naammassinnissinnaap­put.

 

Naak taamaalillunga siunnersuut saqqummiunneqartoq tapersersorsinnaanngikkaluarlugu Naa-lakkersuisut sinnerlugit Tasiilami, Ittoqqoortoormiini Qaanaamilu aalisarnermik inuussutissar­siuteqarnerup illersorneqarsinnaasumik ineriartortinneqarnissaata pingaartinneqarnissaa nerior­suutigisinnaavara. Ukiuni kingullerni suliniutinik aallartitsisoqartarsimavoq, misilittagarilersima­sallu tunngavigalugit suliniaqqittoqarluni. Suliap tamatuma ukiuni aggersuni ingerlateqqineqar­nissaa qularutigineqassanngilaq.

 

Angusarineqartut Naalakkersuisunit eqqumaffigineqarluassapput. Naalakkersuisut taamattuttaaq nakkutiginiarpaat peqqussutip qaqugukkulluunniit sumiiffinni pineqartuni aalisarsinnaanermut periarfissat pillugit paasisanut nutaanut katersorneqartunut naapertuuttuujuarnissaanut pisariaqar­tunik aalisarnermut, piniarnermut nunalerinermullu tapersiisarneq pillugu inatsisartut peqqussu­taata allanngortinneqarnissaanut siunnersuuteqartoqartarumaartoq.

 

Lars Karl Jensen, Siumup oqaaseqartua:

Inatsisartunut ilaasortap Jakob Sivertsen-ip Atassummeersup, Aalisarnermut, Piniarnermut Nunalerinermullu tapersiisarneq pillugu Inatsisartut peqqussutissaannut allannguutissamik siunnersuutaanut, Siumumiit imatut oqaaseqaateqassaagut.

 

Siumumiit maluginiarparput qulequtaq taanna siusinnerusukkut saqqummiunneqarnikuusoq, taamanikkullu akissuteqaatigineqartut tunngaviisigut paasillugit, allanngortitsinissamut peqqu­taasinnaasumik Siumumiit tapersiutissaqannginnerput nalunaarutigissavarput.

 

Taamatut oqarnitsinni eqqarsaatigaarput Inatsisartut Aalisarnermut Piniarnermut Nunaleriner­mullu ataatsimiititaliaata upernaakkut 1996-mi, Aalisarnermut, Piniarnermut Nunalerinermullu tapersiisarneq pillugu Inatsisartut peqqussutissaanik suliaqarnermi tamanna ilanngullugu isummerfigereernikkuummagu.

 

Peqqussutissamillu suliaqarnermi aamma isorliunerusut eqqarsaatigalugit, angallatitaartunut aallartitsissutigissallugit angallatit nalequttut 21 fod tikillugu angissusillit pisaariniarneranni nammineq aningaasaliissutissat 10 %-miit 5 %-mut appartimmatigit, anginerusunillu angallati­taarniartunut nammineq aningaasaliissutissat siornatigut 10 %-iusut 7,5 %-mut aamma oqili-saassiffiummata. Umiatsiaarartaarniartunullu Namminersornerullutik Oqartussat tapiissutaat eqqarsaatigalugit Siumumiit isumaqarpugut angallatitaarniartunut oqilisaassineq pitsaasumik anguneqareersimasoq.

 

Tamakkuami takuneqarsinnaapput, Aalisarnermut, Piniarnermut Nunalerinermullu tapersiisarneq pillugu Inatsisartut peqqussutaanni nr. 8, 31. oktober 1996-mi atuutilersukkut.

 

Siumumiillu ilisimavarput angallatitaarniartut aallarniutissanik ajornartoriortut kommuunit ilaasa inuussutissarsiutitigut siuarsaanermut aningaasaliissutinik taallugit tapiissuteqarfigisaraat, taamatullu periuseqarneq siunnersuuteqartup Kommuuniani aamma atorneqartartoq ilisimaneqar­poq.

 

Taamaattumik Siumumiit siuliani taagukkavut toqqammavigalugit Jakob Sivertsen-imit siun-nersuutigineqartoq imaliinnarlugu akuersaarnartinngilarput.

 

Siverth K. Heilmann, Atassutip oqaaseqartua:

Inatsisartunut ilaasortap Jakob Sivertsen-ip siunnersuutaa, tassalu Aalisarnermut, Piniarnermut Nunalerinermullu Ataatsimiititaliap tapersiisarneq pillugu Inatsisartut peqqussutaata allanngor­tinneqarnissaanik imalik Atassut-miit imatut oqaaseqarfigissavarput.

 

Ilumoorpoq Inatsisartut siorna ukiakkut ataatsimiinneranni Inatsisartunut ilaasortap Peter Ostermann-ip Atassut, Jakob Sivertsen-ip Atassut, siunnersuutaannut assingusumik siunnersuu­teqarsimammat aammalu inatsisartut Aalisarnermut, Piniarnermut Nunalerinermullu Ataatsimii­titaliaanni suliarineqarsimammat.

 

Atassut-miit siunnersuuteqartoq isumaqatigilluinnarparput, nunatsinni piniarnermik aalisarner­millu inuussutissariuteqarnerup ineriartortinneqarnerani inuusuttut sapinngisaq tamaat taperser­sortariaqartut, siunissami piniarnermik, aalisarnermik uumasuuteqarnermillu inuussutissarsiute­qarnitta isumannaatsumik ingerlanneqarnissaa qulakkeerniartariaqarmat.

 

Atassut-miit arajutsisimanngilarput pingaartumik isorliunerusuni piniarnerinnarmik inuussu-tissarsiuteqartut atugaat qanoq ilungersunartigisut, pingaartumillu inuusuttut piniarluaraluarlutik puisit pisamik amiinik suliarineqarnissaannut nammattumik ikiortissaqanngikkunik, nutaamik angallatitaarniarnerminni aningaasanik aallarniutissanik katersaqarniarsinnaanerat qanoq ajor-nakusoortigisoq.

 

Taamaattumik Atassut-miit isumaqarpugut, siunnersuuteqartup anguniagaatut tunngavilersuutai immikkorluinnaq isiginarneqartariaqatut, tassalu Tasiilami, Ilooqqorttoormiuni aammalu Qaa-naami, inuusuttut piniartuunermiit aalisartuunermut ikaarsaarialerneranni pitsaasumik pisortanit tapersersorneqarnissaat Inatsisartuni anguniartariaqaripput.

 

Atassut-miit nuannaarutigisarparput Kitaani aalisartortatta oqilisaaffigineqarnerinut peqataasar­nerput, soorlu nunami tunitsiviusut saniatigut umiarsuarnik tunitsiviugallartussanik aningaasa-liisarnerit, aalisakkanik misileraanernut aningaasaliissutaareersut saniatigut qaavisigut aningaasa­leeqqittarnerit, massakkullu soorlu qassusersornermiit ningittagarsornermut ikaarsaariartitsi-nermut oqilisaassinissamut Inatsisartuni tamatta piumassuseqarnerput il.il. Taammattumik Atassut-miit siunnersuuteqartoq tunngaviatigut annertuumik tapersersorparput.

 

Atassut-miit erseqqissaatigissavarput Aalisarnermut, Piniarnermut Nunalerinermullu Naalakker­suisoq ilumoormat, siorna ukiakkut Inatsisartut ataatsimiinneranni taamatut assingusumik siun-nersuuteqartoqarnerani, Inatsisartut Aalisarnermut, Piniarnermut Nunalerinermullu ataatsimiitita­liaanni suliarineqarsimasoq aammalu ataatsimiititaliap isumaliutissiissutaani takuneqarsinnaasoq taamanikkut siunnersuut tamakkiisumik isumaqatigineqarsimangitsoq.

 

Naalakkersuisoq Atassut-miit isumaqatigaarput oqarmat, Tasiilap, Illoqqortoomiut aamalu Qaanaap eqqaani aalisarnermik inuussutissarsiuteqarnerup ineriartortinneqarnerata ingerlateqqin­neqarnissaa aammalu misileraalluni aalisarnerup piffinni assigiingitsuni ingerlaannarnissaa pisariarqartoq.

 

Sinerissatsinni aammalu Tunumi aalisarnikkut inuussutissariuteqarnerup nutarterneqarnerata nalaani aammalu aalisariaatsinut aallanut ikaarssarniarnermi misileraanernullu aningaasaliisar­nerit, kusanartut pissusissamittullu ingerlasutut oqaatigineqarsinnaasut tamatta Inatsisartuni tapersersorpagut, pisariaqartutulli Atassut-miit isigaarput illoqarfinni qulaani pineqartuni suli-niutit iluatsissappata katataasoqassanngippallu tapersiisarnermi periaaseq allanngortitariaqartoq.

 

Taamatut oqaaseqarlunga Atassut-miit neriuutigaarput Inatsisartuni aammalu ataatsimiititaliami susassaqartumi suliaq nalilersorneqarluarumaartoq.

Ewald Brønlund, Inuit Ataqatigiit oqaaseqartuat:

Inatsisartuni ilaasortap Jakob Sivertsen-ip siunnersuutaa paasivarput 1996-mi ukiakkut ataatsi­miinnermi siunnersuutigineqarsimasumut assingusoq. Taamaattumik Inuit Ataqatigiit paasilluar­sinnaavarput piniartoqarfinni pineqartuni tassalu Qaanaami Ittoqqortoomiini Tasiilamilu aalisarnermut ikaarsaariartornermi piniartut angallatitaarniarnerminnut tunngatillugu aningaa- sat tungaatigut isertittagaasa qanoq killeqartiginerat siunnersuuteqartup taakkartormagu.  Tamannalu aamma uagut Inuit Ataqatigiit-niit ilisimaaralugu oqaatigisinnavarput.

 

Illoqarfinni pineqartuni aalisarnermik inuussutissarsiuteqarnerup ineriartortinneqarnerani inuu-suttut piumassuseqartut allallumi Namminersornerullutik Oqartussaniit tapersersorneqarluarnis­saat siunissami aaliangiussimaneqartariaqarpoq. Taamaattumik inuusuttut tapersersorneqarner­mikkut aamma namminneq inuttut imminut tatiginerunermik piumassuseqarnermillu kinguneqar­tussaavoq. Ukiuni kingullerni aalisarnermik misileraanerup kiisalu ukioq manna Illoqqortoomiit kangerluanni misileraanissat eqqarsaatigalugit Inuit Ataqatigiiniit Naalakkersuisut kaammattoru­suppagut aalisarnermik inuussutissarsiorfeqarnerup illersorneqarsinnaasumik ineriar-tortinneqar­nissaa piniartuni eqqumaffiginiaqqullugu.

 

Siunnersuut tunngaviatigut paasilluarsinnaagaluarlutigu, taamaattorli oqaatigissavarput Aalisar­nermut, Pinarnermut Nunalerinermullu Naalakkersuisoq matumuuna isumaqatigigatsigu, piffinni pineqartuni aalisarnermut periarfissat kiisalu aamma paasissutissat nutaat toqqammavigalugit siunissami inuussutissarsiutinut tapersiisarneq pillugu Inatsartut peqqussutaata allanngortinne­qarsinnaanerannik siunniussaqarmat. Tassa imatut paasillugu peqqussummut allannguutissamut siunnersuut massakkut uagut periarfissaasorinnginnatsigu.

 

Taamatut inuussutissatsiuteqarnermut tapersiisarneq pillugu peqqussummut allanguutissatut siunnersuut Inuit Ataqatigiit oqaaseqarfigaarput.

 

Bjarne Kreutzmann, Akulliit Partiiat:

Aalisarnermut, Piniarnermut Nunalerinermulu tapersiisarneq pillugu Inatsisartut peqqussutaannut allannguutissamik siunnersuut Inatsisartut aalajangigassaat Akulliit Partiiata soqutigalugu misissuataarsimavaa.

 

Misiligaalluni aalisarnerup, ukiuni kingullerni Tasiilami ingerlanneqarsimasup innuttaasullu qanoq soqutiginngitsiginerat eqqarssatigalugu iluatsilluarsimasutut oqaatigisariaqartup aamma Akulliit Partiiannit nersualaarneqarsimasup iluani nutaamik suliniuteqarnissanut Akulliit Partiiata tapersersuinera kiallunniit apersuusissanngilaa.

 

Nuannaarutigaara maanna Ittoqqortoormiuni aamma misiliisoqarnialermat neriuutigalugulu Tasiilami misiliinertulli soqutigineqartigalunilu ilungersuunneqartigiummartoq.

Taamaattoq sukumiinerusumik misissuereerluta Akulliit Partiianni paasivarput, siunnersuutigine­qartup Inatsisartuni maani siornatigut suliarereersimasarput assigigaa oqaatigisariaqartoq, aamma siunnersuuteqartup savaateqarnermut tunngatillugu assersuutitut saqqummiussai pissutsinut siunnersuummi pineqartunut sanilliunneqarsinnaanngitsut.

 

Naalakkersuisut suliami uani neriorsuipput angusarineqartussat eqqumaffigineqarumaartut, ne-riorsuillutillu Tasiilami, Ittoqqortoomiini Qaanaamilu aalisarneq suli ineriartortinneqassasoq, tamanna Akulliit Partiiannit nuannaarluta malinnaaffigissavarput.

 

Taamak naatsumik siunnersuut oqaaseqarfigaarput.

 

Anthon Frederiksen, Kattusseqatigiit:

Inatsisartunut ilaasortap Jakob Sivertsen-ip siunnersuutaa paasilluarlugu taperserniarpara, tassami naluneqanngilaq nunarqarfinni avinngarussimasunilu aalisarnermik, minnerunngitsumil­lu pinarnerinnarmik inuussutissarsiutillit inuuniarnikkut qanoq ajornartorsiuteqartartiginerat.

 

Allaallumi avinngarusimasuniinngikkaluartuni aalisartut, piniartullu aningaasariornikkut ajornartorsiornerat ukioq 1996-mi december-i qaammat Kangaatsiap kommuuniani aalisartut piliartullu ilungersungaarlutik Naalakkersuisoqarfimmut, inatsisartunilu ilaasortanut saaffiginnis­sutaanni takuneqarsinnaavoq, tassami aalisartut, piniartullu Kangaatsiap kommunniani 1996-mi assersuutigalugu ukiumut agguaqatigiisillugu taamaallaat 4000,- kr-nit missaannaanni aningaa­sarsisimapput.

 

Taamaattumik kialluunniit takusinnaavaa aningaasat isertinneqartut akilersuutigissallugit naammanngilluinnartut, taamaattumik inuiaqatigiinnut pingaaruteqartunik suliaqartilluta in-nuttaaqatigut Nuup avataaniittut ilanngullugit eqqaamasariaqarpavut.

 

Nutaamik angallatitaarniarnissamut akilersuinissamullu aalisartorpassuit, pinartullu ilaat annertuunik ajornartorisuteqarput, taamaattumik inuussutissarsiutinik ingerlatsiniarneranni oqilisaaffigineqarnissaat pisariaqarpoq, minnerunngitsumik aalisartut piniartullu nunaqarfimmin­ni tunitsiveqarniarnikkut periarfissaqartinneqanngitsut.

 

Taama naatsumik oqaaseqarlunga siunnersuutit Aalisarnermut Piniarnermullu Ataatsimiititaliami oqaluuserineqarnissaa inassutigaara.

 

Jakob Sivertsen, siunnersuuteqartoq,Atassut:

Eqqortoq takugaangakku tamatigut eqqortortaa malittarisarpara, aamma siunnersuummi uani eqqortoq takugakku eqqortortaa malittaralugu saqqummiuteqqippara.

 

Isorliunerusuni pissutsit Kitaanut sanilliunneqarsinnaangillat, aamma ukiorpassuarni ESU, tassa aamma tunumiut akileeqataaffigisartagaat, annertunerpaamik nunatta kitaani iluaqutigineqarsi­mavoq, aamma tamanna kiallunniit isorliunerusuni angalasartup takusinnaallugulu uppernarsar­sinnaavaa.

 

Ukiuni kingullerni aamma Aalisarnermut, Piniarnermut Nunalerinermullu inatsit pitsanngortin­neqarsimagaluarpoq, kisianni ajoraluartumik avalliuneerusuni aningaasarsiorneq ima ilunnger-sunartigaaq, inatsit pitsanngortinneqaraluarluni suli avalliunerusuni malinnaaffigineqarsinnaan­nani.

 

Piniartut atugaat pillugit misissuititsisimavugut Inatsisartuni paasiniarlugu ilumut oqartarnersu­gut avalliunerusuni inuuniarneq ilungersunaqaaq, aamma paasissutissaq taanna 1995-mi saqqum­mersinneqarnikuuvoq. Erseqqissumik takuneqarsinnaavoq piniartut ilaqutariit agguaqatigiisil-lugu ukiumut 40.000-illuuniit anguneq ajorpaat.

 

Ilumut malugisinnaavarsi tusarsinnaagussi ilungersunaqaaq, taamaattumik allatut iliunngikkutta peqartut peqangaalersissavagut, peqanngitsulli pissaannik arsaarlugit. Taamaattumik oqarpunga  eqqortumik takusaqartillunga eqqortortaa tamatigut aalajaallunga anguniartarpara.

 

Qujanaq.

 

Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:

Paasisinnaasat malillugit, siullermik qujavunga, oqaaserineqartunut aammalu tunngavilersuutaa­sunut. Paasisinnaasakka malillugit amerlanerussuteqarluartut tassa Siumukkut, IA-kut, Akulliit Partiiat taavalu paasisakka malillugit Atassutip Naalakkersuisunik issiatitai isumaqataapput Naalakkersuisup akissuteqaataanut taamaattumik akissuteqaatitsinnut oqaaseqaatit taava tamaasa partiinit qujassutigaagut, aammalu oqaaserineqartut pingaartunik misileraanermut tunngatillugu oqaaserineqqartut nuannaarutigaakka. Naalakkersuisut sinnerlugit ingerlatsinerput iluarisimaar­neqarmat - aammalu nuannaarluta taanna misileraaneq aamma Tunumut Avanersuarmullu tunngatillugu ingerlateqqissagatsigu.

 

Neriuutegaarput soorunami aamma inuussutissarsiortut taakkunaniittut suli maannamornit pitsaanerusumik periarfississagigut, aalisarnermik inuussutissarsiummik tapertaqaannarnissaat iluaquserneqassasoq.

 

Siunnersuuteqartumut oqaatigerusuppara aatsaat taamak ESU pillugu peqqussut - angallatitaarni­arnermut tapersiisarnermut periarfissat atorluarneqartigimmata. Neriuutigaarput oqareernittut avalliunerusuni tassa pineqartuni taakkunani pingasuni tassa Avanersuarmi Ittoqqortoormiini aammalu Tasiilap komuuniani suli annertunerusumik tapersiisarnerit pilerumaartut, tassami oqareernertut misileraanerit suli annertusarneqaqqittussaasut, taamaalillugillu tunngavissat aalisariutitaartitsinissamut annertusiallaqqissasut.

 

Taamatut oqarlunga naggataatungaatigut aamma ESU-p peqqussutaa atsaat  taamak oktober-ip 31-anni 1996-mi atuutilersinneqartut periarfissagissaartigimmat aamma taakkunani nunap immikoortortaani pineqartuni.

 

Taamatut oqarlunga Naalakkersuisup akissuteqaataanut tapersiineq partiinit amerlanerpaanit inimi maani issiasunit tapersersorneqartoq qujassutigaara.

 

Jonathan Motzfeldt, ataatsimiinnermik aqutsisoq, Inatsisartut Siulittaasuat:

Jakob Sivertsen-ip siunnersuutaa tunngaviatigut taamaalilluni aamma Naalakkersuisut oqaase­qaataat amerlanerusunit taperserneqartoq eqqumaffiginiarneqarluni - aammalu tassani kommuu­nit tapiissutinik aaqqissusimanerat ilaatineqartoq - Naalakkersuisullu aamma Erhvervsstøtte -mi periarfissanik alaatsinaassillutik naleqqussaallutillu Tasiilami, Illoqqortoormiini Qaanaamilu  periarfissanik alaatsinaassutissaminnik neriorsussutaat akuersaarneqarpoq.

 

Taamaalilluni ullumi oqaluuserisat naammassipput - aammalu ullumikkut taamaalilluni ataatsi­miineq  naammassivoq.

 

Oqaluuserisaq naammassivoq.