Oqaluuserisassani immikkoortoq 21-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 13. maj 1997 nal. 18.25
Ataatsimiinnermik
aqutsisoq: Inatsisartut Siulittaasuat Jonathan Motzfeldt.
Daniel Skifte, Aningaasaqarnermut Ineqarnermullu Naalakkersuisoq:
Aningaasarsianit akileraarutit pillugit Inatsisartut intsisaat naapertorlugu Inatsisartut ukiup 1997-ip affaani siullermi ataatsimiinnerminni 1998-imut akileraarutitigut il.il. ilanngaatissat aalajangersaartussaavaat.
Ilanngaatit il.il. makku pineqarput:
1. Inummut
ilanngaat - ' 32, imm. 1.
2. Ilanngaat
aalajangersimasoq - ' 16,
imm. 2.
3. Aningaasarsiat
B-t akileraaruteqaataasussaanngitsut - ' 15, imm. 2.
4. Akissarsiortut
killilimmik akileraartussaasunut ilaanngaat aalajangersimasoq - ' 2, imm. 2.
5. Kommuninut
ataatsimut akileraarut - ' 28
a, imm. 2.
Ilanngaatit ataatsiakkaat il.il.
erseqqinnerusumik nassuiarneqrnerannut qanoq sunniuteqarnerannut kiisalu
ukiuni siuliini qanoq angissusilerneqartarnerannut atatillugu saqqummiussinermi
ilanngussaq 1 innersuussutigineqassaaq. Taamatuttaaq ilanngussaq 2-mi
nassuiaateqarfigineqarput 1998-imi aningaasarisat tunngavissaattut
naatsorsuutigisat.
Naalakkersuisut sinnerlugit
inassutigissavara 1998-imut akileraarutitigut il.il. ilanngaatissat ima
angissusilerneqassasut:
1. Inummut
ilanngaat....................................................... Kr. 40.000 (ukiumut)
2. Ilanngaat
aalajangersimasoq ....................................... - 6.000 (ukiumut)
3. Aningaasarsiat
B-t akileraaruteqaataasussanngitsut ..... - 5.000 (ukiumut)
4. Killilimmik
akileraartussaasunut ilanngaat .................... -
1.000 (ukiumut)
5. Kommuninut
ataatsimut akileraarut ............................. 4%
Taamaalilluni 1998-imut ilanngaatissat
il.il. 1997-mut ilanngaatissatuulli angissusilerneqarnissaat
inassutigineqarpoq.
1998-imi kommuninut ataatsimut akileraarutip
allanngornagu 4%-inut angissusilerneqarnissaa Kalaallit Nunaanni Kommuneqarfiit
Kattuffiata isumaqataaffigaa, taamatuttaarlu ilanngaatissat allanngornagit
aalajangerneqarnissaat Kattuffiup isumaqataaffigalugu.
Aallaqqaataani oqaatigeriikkattut paasissutissat
sukumiinerusut pillugit soqutiginnittut ilanngussanut 1-imut 2-mullu
innersuutiitigalugit Akileraartarnermi Ataatsimiititaliap siulittaasua
qinnuigissavara 1998-imut akileraarutitigut ilanngaatissat il.il. pillugit
ataatsimiititaliap isumaliutissiissutaa saqqummiuteqqullugu..
Jonathan Motzfeldt, Inatsisartut Siulittasut,
Ataatsimiinnermik aqutsisoq:
Isumaliutissiissut tamanna ilaasortanut
agguaanneqarsimavoq maannakkullu Akileraartarnermut Ataatsimiititaliap
siulittaasuata saqqummiutissavaa.
Karl Lyberth, Akileraartarnermut Ataatsimiititaliap
siulittaasua, Siumut:
1998-imut akileraarutitigut ilanngaatissat
il.il. aalajangersarneqarnerat pillugu isumaliutissiissut, tassa siunnersuutip
oqaluuserineqarnissaanut tamamuuna saqqummiunneqartoq:
Inatsisartut Akileraartarnermut
Ataatsimiititaliaata oqaluuserinninnerani peqataapput ataatsimiititaliami
ilaasortat ukuusut; Mikael Petersen, Siumut, Karl Lyberth, Siumut maannakkumut
siulittaasutut atuuttoq, kiisalu Sivert K. Heilmann aamma Otto Steenholdt,
Atassut, Inuit Ataqatigiinniillu Mannasse Berthelsen.
1998-imut akileraarutitigut ilanngaatissat
il.il. aalajangersarneqarnissaannut Naalakkersuisut siunnersuutaata
Inatsisartuni oqaluuserineqarnissaanut Inatsisartut Akileraartarnermut
Ataatsimiititaliaata saqqummiussissut taassumunngalu ilanngussat
misissuataarpai.
Tamatuma kingorna ataatsimiititaliap
isumaqatigiissut Inatsisartunut inassutigaa akileraarutiti- gut ilanngaatissat
Aningaasaqarnermut Ineqarnermullu Naalakkersuisup siunnersuutigisaatut
aalajangerneqassasut.
Jonathan Motzfeldt, Inatsisartut Siulittaasuat,
Ataatsimiinnermi aqutsisoq:
Akuersissutigineqartinnagu oqaaseqarumavoq
Otto Storch, Atassut.
Otto Storch, Atassut:
Akileraartarnermi ilanngaatit
qaffanneqartarnerat Atassummit qanimut malinnaaffigaarput, soorlu inummut
ilanngaat 1975-miit, tassa aningaasarsianit akileraartarneq nunatsinnut
eqqunneqarneranniit ullumimut pingasoriarluni qaffanneqartarsimavoq.
Taamaaliortarneq Atassummiit pissusissamisoorsoraarput kommunini akileraartarnermut %-ip qaffakkiartorneranut peqatigitillugu inummut ilanngaat malinnaatinneqarsimammat. Kiisalu ilanngaat aalajangersimasoq 1975-miit ullumimut marloriarluni allanngortinneqartarsimavoq, tamatumani aningaasarsianit akileraarnerup saniatigut isertitanit akileraartarneq oqinnerulersinniarlugu.
Taamatut aaqqiisuteqarnerit Atassummiit suleqataaffigalugillu aalajangeeqqataaffigisarsimavagut. Atassummiit oqaatigissavarput nunatsinni aningaasarsiornitta pitsanngoriartornera ilutigalugu akileraarnermi inummut ilanngaatip qaffanneqarsinnaanerat ukiut tamaasa aalajangersaaffigineqartartoq nunatta aningaasatigut ingerlaneranut sanilliuttarlugu siunissami nalilersueqataaffigisassagatsigu.
Taamatut oqaaseqarluta akileraartarnermi inummut ilanngaatip ullumikkutuut allannguuteqartinnagit 1998-mi atuutiinnarnissaat Atassummiit akuersaarparput.
Jonathan Motzfeldt, Inatsisartut Siulittaasuat, ataatsimiinnermik aqutsisoq:
Taamaalilluni ataatsimiititaliaminngaanniit siunnersuutigineqarpoq Naalakkersuisut siunnersuutigisaannut aalajangersarneqassasut tamannalu partiinit tamanit akuersaarneqarmat taamaalillugu akuersissutigineqartutut nalunaarutigissavarput. Taamaalilluni ullumikkut ataatsimiinneq naammassivoq, tassa immikkoortoq 29 pinse-p kingornatigut inissinneqartussanngorlugu siunnersuutigiumaaratsigu. Ullumikkut ataatsimiinneq naammassivoq.
Oqaluuserisaq naammassivoq.