Kalaallit Nunaanni Inatsisartut

Oqaluuserisassani immikkoortoq 22-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Marlunngorneq 13. maj 1997 nal. 18.05

 

Oqaluuserisassani immikkoortoq 22.

 

Nioqqutissanik eqqussuinermi akitsuutit pillugit Inatsisartut inatsisaata allanngortinneqarnera pillugu Inatsisartut inatsisissaannut siunnersuut.

(Aningaasaqarnermut, Ineqarnermullu Naalakkersuisoq)

Siullermeerneqarnera

 

 

 

Ataatsimiinnermik aqutsisoq: Hans Enoksen, Siulittaasoqarfimmi ilaasortaq, Siumut.

 

Daniel Skifte, Aningaasaqarnermut Ineqarnermullu Naalakkersuisoq:

Naalakkersuisut sinnerlugit matumuuna nioqqutissanik eqqussuinermi akitsuutit pillugit Inat­si­­sartut inatsisaata allanngortinneqarneranik Inatsisartut inatsisissaattut siunnersuut  saqqum­mi­utissavara.

 

Siunnersuutigineqarpoq imeruersaatit puuinut nioqqutissanik eqqussuinermi akitsuut allan­ngortinneqassasoq akitsuutit annertussusii atuuttut allanngortinnagit. Siunnersuut malillugu siullermik imeruersaatit puuinut imaarnikunut akitsuusiinissamik pisussaaffik atorunnaarsinne­qassaaq illuatungaatigullu puunut utertitassatut akuerisaasunut akitsuuteqartitsinnginneq atorun­naarsinneqassalluni.

 

Siunnersuut imatut paasineqassaaq ullumikkut puiaasanik ulloq manna tikillugu uagut kisitta atortakkatsinnik utertitsisarnitsinnit puiaasat allat nutaat atorneqartalernissaat erniinnaq pisa­riaqalersussaammat. Tassani pineqarput puiaasat plastikkit qipisartakkanik simillit 0,5 liter­i­mik imaqartartut, ilaatigut Coca-Colamik imaqarsinnaasut, nunani allani nuannarisaasorujussuit. Taa­maa­lillutik niuertut atuisartullu tamatuma kingorna sodavandinik sodavandillu puui­nik assi­giinngiiaartunik amerlanerusunik qinigassaqarnerulissapput.

 

Siunissami puiaasanik utertitseriaaseq puiaasat plastikkit nutaat tunisassiornermut, niuernermut utertitsisarnermullu tunngatillugu iluamik tulluarsarneqarnissaannut piffissarititat qulak­keerniar­lugit siunnersuutigineqassaaq matumani siunnersuut aatsaat 1. februar 1998-imi atuu­tilissasoq. Tamanna aamma pissutigalugu naatsorsuutigineqarpoq puiaasat plastikkit mingutsitsinaveersaar­nissaq eqqarsaatigalugu akuerineqarnerat aammattaaq 1. februar 1998-imi atuu­­tilerumaartoq.

 

Puunut akitsuut pillugu aalajangersagaq atuuttoq allanngortinnagu ingerlatiinnarneqassappat tamatumalu saniatigut puiaasat plastikkit mingutsitsinaveersaarnissaq eqqarsaatigalugu akue­rine­qarlutik, taava puiaasanik uter­tit­seriaaserput ajoquserneqarsinnaavoq, pissutigalugu pui­aasat plastikkit uagut puiaasatsinnit igalaaminiusunit immikkut ittunit allaanerusut nunani al­lani aamma atorneqartarmata. Nunatsinni sodavandinik tunisassiortarnermit aqqutit allat ator­lugit puunik utertittakkanik mingutsaaliuinermut akuerisaasunik eqqussuinermi akit­suute­qar­titsin-nginneq pisinnaassappat taamaalilluni oqimaaqatigiinnginnermik pilersoqarsinnaavoq, puut utertittakkat eqqunneqartartut amerlassusiisa nunatsinni tunisassiortup utertitse­riaatsimi­ni tigusinnaasai qaangeratarsinnaammagit. Tamannalu avatangiisinut ajoqusiisussaavoq.

 

Tamanna tunngaviuvoq siunnersuutigineqarmat akitsuusiinissamik pisussaaffiliinermi apeq­qu­­taajunnaassammat puut eqqussorneqartut ataasiaannarlugit atugassatut puujunersut ima­luun­niit puujunersut utertittagassat. Tamatumunnga taarsiullugu siunnersuutigineqassaaq taa­maallaat akitsuusiinissamut pisussaaffiliisoqassasoq puut nioqqutissanik eqqussinerup nalaani immerne­qarsimasut pineqartillugit, puulli imaqanngitsut akitsuuteqartinnagit.

 

Naalakkersuisut isumaqarput siunnersuut una aqqutigalugu puiaasanik utertitseriaatsimi pui­aa- ­­sat nutaat allat ilannguttalernissaanni siunissami ajornartorsiutaalersussat pinngitsoorniarlugit iliuusissamik naleqquttumik aalajangiisinnaasugut, tamatumunnga peqatigitillugu ullumik­kut akitsuusiisarnerup annertussusia attatiinnarneqassaaq atuisartunut akigititamut imaluunniit namminersortut aningaasartuutigisartagaannut sunniuteqarnerlunngitsumik.

 

Siunnersuut una ukioq manna aningaasatigut pissarsiat tamarmiusut amerlassusiannut ima­luun­­­niit ukiunut missingersuusiorfiusunut 1998-imut 1999-imullu sunniuteqarnavianngilaq.

 

Taamatut oqaaseqarlunga Naalakkersuisut sinnerlugit nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Inatsisartunut oqaluuserisassanngortippara aammalu akileraartarnermut ataatsimiititaliamit oqaluuserineqareerpat aappassaaneerlugu oqaluuserisassanngortillugu.

 

Mikael Petersen, Siumup oqaaseqartua:

Matumuuna allannguutissatut siunnersuutigineqartoq qilanaaralugu utaqqisimavarput, oqaati-gissavarpullu siunnersuut tamakkiisumik isumaqatigigatsigu.

 

Taamaalilluni inatsisip allanngortinneratigut niiuertut atuisullu tamamik periarfissinneqassamma­ta imeruersaatit tungaatigut assigiinngitsunik qinigassaqarnissamut, soorlu matumani Coca Cola-t taaneqartut.

 

Inatsisip allannguutaata atuutilersinneqarnissaanut piffissaliunneqartoq 1. Februar 1998 isuma-qatigaarput, taamaaliornikkut tamatuma tungaanut piareersagassat naammasseqqaarneqassam-mata.

Taamannak oqaaseqarluta siunnersuutip taamatut isikkoqarluni aappassaanneerneqarnissaaminut ingerlaqqsinnissaa inassutigaarput.

 

Manasse Berthelsen, Inuit Ataqatigiit oqaaseqartuat:

Nunatsinni puiaasat uterteqqinneqartartut arlariinngortinniarneqarnerinut kiisalu puiaasat nunatsinni utertinneqarsinnaasut nunatsinnut eqqorsorneqarnerisa tunuarsimaartinneqarnissaannut akitsuusiineq Inuit Ataqatigiinniit isumaqatigaarput.

 

Nunnani allani puiaasat nioqqutigineqartut, nunatsinnilu utertinneqarsinnaatillugit atulerutsigit sianigisariaqarparput nunatsinni puiaasat kaaviiaartinneqartut amerlavallaalinnginnissaat.

 

Inuit Ataqatigiinniit Aningaasaqarnermut Ineqarnermullu Naalakkersuisup siunnersuutaanut isumaqataavugut Akileraartarnermullu Ataatsimiititaliamut ingerlateqqinneqarnissaa innersuussu­tigalugu.

 

Otto Steenholdt, Atassutip oqaaseqartua:

Inatsisissatut siunnersuut tunngaviatigut Atassummiit passilluarlugu akuersaarparput. Puiaasanik utertitseriaatsimi puiaasat nutaat allatut sanaajusut siunissamik ajornartorsiutaalersinnaasut pinngitsoorniarlugit ilioriusaasussaammat naleqquttoq.

 

Taama akuersaarnitsinnut aamma oqimaaloqutigitipparput periusiulersussaq atuisartunut akigi-titamut imaluunniit nammisortut aningaasartuutigisartagaannut sunniuteqarnerluttussaanngimmat. Inatsisip taamatut allanngorluni atuutsitaalernissaa pillugu ulloq taasaq aamma Atassummin-ngaanniit akuersaarparput.

 

Bjarne Kreutzmann, Akulliit Partiiat:

Nioqqutissanik eqqussuinermi Inatsisartut inatsisaata allanngortinneqarnissaanut Akulliit Partiiata isumaqataanini matumuuna nalunaarutigaa.

 

Paasivara tassani pineqartut tassaasut puiaasat plastikkit qipisartakkanik simillit 0,5 literinik imaqartut, soorlu Coca Cola-t. Taamaalilluni niuertut atuisartullu matuma kingorna sodavandinik sodavandillu puuinik assigiinngiiaartunik amerlanerusunik qinigassaqarsinnaaleqqullugit aamma aalajangersagaq maannakkut atuuttoq atuutiinnassagaluarpat tamanna puiaasanik utertitsisarner­mik periaatsimut ajoqutaasinnaammat.

 

Siunnersuut sunniuteqartussaanngilaq aningaasanut ukiumi matumani ukiuniluuniit missinger-suusiorfinni 1998-mi 1999-milu aningaasatigut pissarsiassanut tamarmiusunut .

 

Taama oqaaseqarlunga inassutigissavara siunnersuut Inatsisartuni aappassaaneerlugu oqaluu­serinnginnerani Akileraartarnermut Ataatsimiititaliamut ingerlanneqassasoq.

 

Taama oqareerlunga ilanngutilaassavara - matumuna ilanngutinngitsoorsimagakku - atulerfissaani siunnersuut ulloq aamma Akullit Partiiata tapersersormagu.

 

Anthon Frederiksen, Kattusseqatigiit:

Kattusseqatigiinniit nioqqutissanik akitsuutit pillugit Inatsisartut inatsisaata allanngortinneqarnera pillugu Inatsisartut inatsisissaannut siunnersuut annerusumik oqaaseqarfiginagu Akileraartarner­mut Ataatsimiititaliami oqaluuserineqarnissaa inassutigiinnarusuppara.

 

Daniel Skifte, Aningaasaqarnermut Ineqarnermullu Naalakkersuisoq:

Qujavunga partiit oqaaseqartui tamarmik isumaqatigiimmata qularnaatsumillu oqartariaqarunar­pugut siunnersuutigineqartut tamiginnit akuersaarneqartut aammalu ulloq atulerfissaat aammalu partiit arlaqartut Coca Cola-torusunnertik siunissami nalunaarutigaat - tamanna iluarinarpoq.

 

Piffissap atulerfissaa 1. Februar 1998 soorunami peqquteqarpoq inatsisissap matuma akuersissu-tigineqariarpat, taava - soorlu Nuuk Imeq A/S - qanoq iliuuseqartariaqassammat inatsimmik tunngaveqarluni allaanerusumik aaqqissuussinissaminut.

 

Taamatut naatsumik oqaaseqarlunga partiit tamakkiisumik siunnersuut akuersaarmassuk qujassu­gaara.

 

Johathan Motzfeldt, Inatsisartut Siulittaasuat, Ataatsimiinnermik aqutsisoq:

Immikoortoq 22 siunnersuutigineqartutut Akileraartarnermut Ataatsimiititaliamut ingerlatinne­qassaaq tassanilu misissorneqassalluni.

 

Oqaluuserisaq naammassivoq.