Kalaallit Nunaanni Inatsisartut

Oqaluuserisassani immikkoortoq 44-1

Ataatsimiinnerit ] Tilbage ] Op ] Nĉste ]

Siullermeerneqarnera Aappassaanneerneqarnera Pingajussaaneerneqarnera

Marlunngorneq 03.06.1997 nal. 20.46

 

Oqaluuserisassani immikkoortoq 44.

 

Eqqissisimatitsinermut Avatangiisinullu Ataatsimiititaliap isumaliutissiissutaa.

(Ataatsimiititaliap siulittaasua aamma Jakob Sivertsen, Naimanngitsoq Petersen)

 

 

 

Ataatsimiinnermik aqutsisoq: Inatsisartut Siulittaasuat Jonathan Motzfeldt.

 

Jakob Sivertsen, Atassut, siunnersuuteqartoq:

Inatsisartut upernaaq  manna ataatsimiinnissaannut siunnersuummik imaattumik saqqummiussa­qarsimavunga:

Qaanaami, Illoqqortoormiuni Tasiilamilu imeruersaatit assigiinngitsut puukuisa utertinneqartar­sinnaanissaannik suujunnaarsinneqartarsinnaanissaannilluunniit pimoorutamik suliniuteqalernis­samik siunnersuut.

 

Naluneqanngilaq illoqarfinni siuliini taaneqartuni imeruersaatit puukui utertinneqarneq ajortut, tamatumalu kingunerisaanik eqqaavimmi qaleriiaarpassuanngortarlutik sakkortuumillu anorliler­sillugu sumut tamaannga teqqarneqartarlutik.

 

Nunatta alianaatsup avatangiisitta eqqiluitsuutinneqarnissaa takornarissanullu takujuminartuunis­saa tamatta pingaartillugu suliniutigaarput. Isumaqarpunga pisariaqalersoq imeruersaatit puukor­passuisa qanoq-ilillugit suujunnaarsinneqartarnissaat imaluunniit utertinneqartarsinnaanissaat pimoorullugu sulissutigineqaleqqullugu, ilaatigut makku peqqutigalugit:

 

Illoqarfinni tassalu Qaanaami, Illoqqortoormiuni kiisalu Tasiilami imeruersaatit assigiinngitsut, tassalu sodavandiniit immiaaqqanut kiisalu saftit assigiinngitsut puuinnut 2 kr.-inik akissuusii­nikkut akileraaruserneqartarput. Illoqarfinni pingasuni nunaqarfittaannilu eqqagassat eqqarsaati­gissagaanni imaluunniit tunineqartartut eqqarsaatigissagaanni, ukiumut aningaasarpassuit Landskarsimut isertinneqartarput. Taamaammat tunngavissaqarpoq illoqarfinni siuliini taaneqar­tuni sodavandit imeruersaatillu allat puukuisa utertinneqartarsinnaanissaat suujunnaarsinneqar­tarsinnaanissaallu pimoorutamik aaqqinniarlugu oqallisigineqartariaqalersoq.

 

Taamatut naatsunnguamik saqqummiussaqarlunga siunnersuut Inatsisartunut oqaluuserisassan-ngortippara.

 

Ataatsimiinnermik aqutsisoq:


Maannakkullu Naimanngitsoq Petersenip siunnersuutaa Otto Storchip saqqummiutissavaa.

 

Otto Storch, Atassut, siunnersuuteqartoq Naimanngitsoq Petersen sinnerlugu:

Inatsisartut upernaakkut ataatsimiinnissaannut Inatsisartunut ilaasortap Naimanngitsoq Peterse­nip siunnersuutaa, siunnersuuteqartoq sinnerlugu saqqummiutissavara.

 

Inatsisartut ukiakkut ataatsimiinnerannni tallimanngornikkut apeqquteqaateqarsimavunga, Avanersuarmi qaqugu tuttunik kisitsisoqassanersoq pilersaaruteqartoqarnersoq.

 

Akissutigineqarsimasut paasisallu tunngavigalugit matumuuna Inatsisartut ataatsimiinneranni siunnersuutigaara, Avanersuarmi tuttunik umimmannillu piaartumik misissuisoqassasoq kisitsi­soqarlunilu, ukioq manna ingerlanneqartumik. Ullumikkut pisariaqalerluinnalersimavoq erseq­qissumik tuttut amerlassusaannik paasisaqarnissaq aammalu taamatuttaaq umimmaat ilanngullu­git. Oqaatigineqartarpoq umimmaat nunamik annertuumik sakkaasartut aammalu uumasut allat nerisassaannik piujunnaarsitsisartut.

 

Ukiut arlallit matuma siornagut Avanersuarmi umimmaliisoqarsimavoq, tamannalu iluatsilluarsi­mavoq, umimmaat amerliartortinneqarlutik eqqissisitaanermikkut. Avanersuarmi piniartunit paasineqalersimavoq oqaatigineqartarluni umimmaat amerlavallaalersimasut uumasunullu allanut ajoqutaalersimasut oqaatigineqartarluni. Tamakku paasisat tunngavigalugit piaartumik isumaqarpunga kisitsisoqartariaqartoq. Ilanngullugu piniartunit paasineqarsimavoq ukaleqarfis­suaq ukaleerutilersoq umimmannit inangerneqarlutik, umimmaat amerlavallaalernerisa kingu­nerisaannik.

 

Tuttunik umimmannillu misissuisoqarnissamik kisitsisoqarnissamillu taamatut siunnersuute-qarlunga Inatsisartunut suliassanngortippara.

 

Jonathan Motzfeldt, Ataatsimiititaliap siulittaasua:

Inatsisartunut ilaasortap Naimanngitsoq Petersenip, Avanersuarmi umimmaat tuttullu kisinneqar­nissaat pillugu siunnersuutaa pillugu Ataatsimiititaliaq paasissutissanik Pinngortitaleriffimmi pissarsivoq. Aamma Avatangiisinut Pinngortitamullu Pisortaqarfik Pinngortitaleriffillu aam-mattaaq oqaasiinnartigut Ataatsimiititaliamut aamma paasissutissiipput.

 

Pinngortitaleriffik uumasut assigiinngitsut kalaallinut pingaaruteqartut amerlassusiinik ataavartu­mik alapernaarsuivoq. Suliaq tamanna Ataatsimiititaliap pingaarutilerujussuartut isigaa, umim­maat tuttullu amerlassusiinik paasissutissat, siunnersuutip uuma oqaluuserinissaanut Ataatsimii­titaliap pissarsia isumaliutissiissummut matumunnga tapiliussatut ilanngunneqarput, taakkulu soqutiginarluinnartunik kisitsisinik takussutissanik peqarmata innersuussutigissavavut.

 


Inatsisartut Eqqissisimatitsinermut Avatangiisinullu Ataatsimiititaliaata Naalakkersuisunut inassutigaa Avanersuarmi umimmannik tuttunillu kisitsineq ataavartumik ingerlanneqassasoq.

 

Jakob Sivertsenip siunnersuutaanut puiaasaaqqanik utertitsisarnermik aaqqissuussinerup ima­luunniit puukunik suujunnaarsitsisarnerup, Qaanaami, Illoqqortoormiuni Tasiilami atulernissaa­nut siunnersuutaa, aamma paasissutissanik tassani pissarsiaqarpugut tassa Akileraartarnermik Pisortaqarfimmit, Avatangiisinut Pinngortitamullu Pisortaqarfimmit taavalu KNI Pilersuisup aamma paasissutissat nassiussaat.

 

Inatsisartut Eqqissisimatitsinermut Avatangiisinullu Ataatsimiitialiaata aallaqqaasiullugu oqaatigissavaa, Ataatsimiititaliap Avanersuarmi Tunumilu poortuutikut  ajornartorsiutaanerata qaangerneqarnissaa pingaarutilerujussuartut isigimmagu.

 

KNI Pilersuisoq A/S-ip Tunumut Qaanaallu pigisaani immiaaqqanik sodavandinillu nioqqusianik eqqussuineq isumagisaraa. Nioqqutissiat Danmarkimiit Europamiillu toqqaannartumik tikisinne­qartarput, tamanna Nuna Imeq-up sumiiffimmi taaneqarluni pilersuisuunnginneranik pissuteqar­poq. Sumiiffimmi taaneqartumik utertitsisarnermi aaqqissuussineq atuutinngilaq.

 

Paasissutissani Akileraarnermut Pisortaqarfimmi pissarsiarineqartuni takuneqarsinnaavoq, Qaanaaq, Ittoqqortoormiut Tasiilarlu immiaaqqat imeruersaatillu kulsyretallit puuinnut akit­suummik akiliisussaatitaanngitsut. Akiliisussaannginnermut patsisaatinneqartoq tassaavoq, akitsuutip utertitsiffiusartuni utertitsiffiusanngitsunilu tunisinermi akinut angivallaamik assi­giinngissutaalersinnaanera. Eqqissisimatitsimermut Avatangiisinullu Ataatsimiititaliap akissute­qarnermini, KNI Pilersuisoq A/S-ip Avanersuarmi Tunumilu poortuutinik ajornartorsiutit anigorneqarnissaanik soqutiginninnini peqataanissamillu kissaateqarnini ersersippaa. Taamaattu­mik Eqqissisimatitsinermut Avatangiisinullu Ataatsimiitaliap Naalakkersuisunut inassutigaa, suleqatigiissitamik Avatangiisinut Pinngortitamillu Pisortaqarfimmut atasumik pilersitsisoqassa­soq, tassani KNI Pilersuisoq A/S kommunellu kattuffiat KANUKOKA sinniisuutitaqassallutik.

 

Suleqatigiissitap qaangiiniarmi teknikkikkut periarfissat suut  atorneqarsinnaanerannik misis-suinissaq aallartittariaqarpaa aammalu aningaasaliinissamik pisariaqartitsineq nalunaarlugu, kiisalu  aningaasaqarnikkut aqutsinikkut, teknikkikkut allatulluunniit ittumik Qaanaami, Ittoq­qortoormiuni Tasiilamilu utertitsisarnermik aaqqissuussinerup atulersinneqarnissaata kingu-nerisinnaasaanik allanik. Suleqatigiissitap aammattaaq nalilertariaqarpaa poortuutinut qanoq-ittunut suujunnaarsitsinermik aaqqissuussineq atulersikkaanni pitsaanerussanersoq.

 

Marianne Jensen, Peqqinnissamut, Avatangiisinut Ilisimatusarnermullu Naalakkersuisoq:

Inatsisartut Eqqissisimatitsinermut Avatangiisinullu Ataatsimiititaliaata isumaliutissiissutaa Naalakkersuisut nuannaarutigalugu tiguaat.


Inatsisartunut ilaasortap Naimanngitsoq Petersenip, Avanersuarmi umimmaat tuttullu kisinne-qarnissaat pillugu siunnersuutaanut tunngatillugu, Eqqissisimatitsinermut Avatangiisinullu Ataatsimiititaliap Naalakkersuisunut inassutigaa Avanersuarmi umimmannik tuttunillu kisitsineq ataavartumik ingerlanneqassasoq. Inassuteqaat taanna Naalakkersuisut paasivaat kisiannili peqatigisaanik tikkuarneqassaaq Pinngortitaleriffik Kalaallit Nunaanni pisuussutinik uumas-susilinnik ilisimatuussutsikkut misissuisartuummat, taamaattumik Naalakkersuisut qaqugu kisitsisoqarnissaanut toqqaannartumik aalajangiinissaminnut periarfissaqanngillat, tamanna Pinngortitaleriffiup siulersuisa suliassarimmassuk.

 

Tamanna tunngavigalugu Pinngortitaleriffik qinnuigissavara siunnersuuteqaqqullugu, qanoq-iliorluni qanorlu akulikitsigisunik pissusissamisoortumik Avanersuarmi uumasunik kisitsiso-qartarsinnaanersoq, aningaasartuutit kisitsinermi atorneqartartussat aamma eqqarsaatigalugit.

 

Tassunga atatillugu oqaatigissavara ullumikkut Avanersuup kommuneani uumasut amerlassu- siat agguataarnerallu paasisimaneqarluarmata.

 

Jakob Sivertsenip immiaaqqat imeruersaatillu puuisa Avanersuarmi Tunumilu ajornartorsiutaa­nerisa qaangerniarneqarnissaannut tunngatillu siunnersuutaanut oqaatigissavara, Naalakkersuisut ajornartorsiut arajutsisimanngimmassuk aammalu ajornartorsiutip qaangerneqarnissaanut arlalinnik suliniuteqarlutik. Pisortaqarfiit assigiinngitsut peqataaffigisaannik suleqatigiissitamik pilersitsisoqareerpoq, puukunik ajornartorsiutip qaangerniarnissaanut allaffissornikkut tunnga-vissiortussanik.

 

Suliap taassuma inerneri najoqqutaralugit Naalakkersuisut,  suleqatigiissitap nutaap  ataatsimiiti­taliap pilersinneqaqqullugu qinnutigisaataa sulinissaanut tunngavissanik piareersaassaaput. Peqatigisaanik Naalakkersuisut nalilissavaat naleqquttuussanersoq, suleqatigiissitap KANU-KOKA-p, KNI Pilersuisoq A/S-ip aammalu Avatangiisinut Pinngortitamullu Pisortaqarfiup avataasigut pisortaqarfinnik allanik peqataaffigineqarpat. Soorunami ilungersorluta avatangiisik­kut aningaasaqarnikkullu pitsaanerpaamik qaangiissutaasinnaasunik nassarniassaagut.

 

Naggataatigut Ataatsimiititaliaq suliassanik suliassanngortinneqartunik angusaqaataasinnaasumik peqqissaartumillu suliarinnissimaneranut qutsavigaara.

 

Niels Mattaaq, Siumup oqaaseqartua:

Inatsisartut Eqqissisimatitsinermut Avatangiisinullu Ataatsimiititaliaata ulluni aprilip 23-ani, majip 21-ani aamma majip 27-ani ataatsimiinnerminni suliatik tunngavigalugit isumaliutissiissu­taani saqqummiussat Siumumiit misissuataarpavut imatullu oqaaseqarfigissallugit:

 


Inatsisartut Eqqissisimatitsinermut Avatangiisinullu Ataatsimiititaliaata isumaliutissiissutaani oqaatigineqartut immikkoortut taagorneqartut maani inimi oqaluuserineqareermata, immikkut taagornagit Ataatsimiititaliallu siunnersuuteqartunut akissutaani Siumumiit oqaaseqarfigaavut.

 

Inatsisartunut ilaasortap Naimanngitsoq Petersenip Avanersuarmi umimmaat tuttullu kisinneqar­nissaat pillugu siunnersuutaa, siunnersuummut tunngatillugu paasissutissanik piniartoqarsima­voq, Siumumiit Pinngortitaleriffimmiit paasissutissat pingaaruteqartut pissarsiarineqarsimasut naammagisimaarpavut, sukumiisumik paasititsiisimaneq tunngavigalugu.

 

Siumumiilli Eqqissisimatitsinermut Avatangiisinullu Ataatsimiititaliap Naalakkersuisunut inas-sutaa, Avanersuarmi umimmannik tuttunillu kisitsineq ataavartumik ingerlanneqassasoq, isumaqatigaarput.

 

Inatsisartunut ilaasortap Jakob Sivertsenip puiaasaaqqanik utertitsisarnermik aaqqissuussinerup imaluunniit puukunik suujunnaarsitsisarnerup Qaanaami, Illoqqortoormiuni Tasiilamilu atu-lersinneqarnissaannik siunnersuutaa imatut oqaaseqarfigissavarput:

 

Siumumiit iluarisimaarparput Eqqissisimatitsinermut Avatangiisinullu Ataatsimiititaliap paa-sissutissanik pissarsiniarsiamanera makkunanit: Akileraartarnermik Pisortaqarfik, Avatangiisinut Pinngortitamullu Pisortaqarfik aammalu KNI Pilersuisoq A/S-imut. Isumaliutissiissummi oqaatigineqartoq Siumumiit isumaqatigaarput. Avanersuarmi Tunumilu poortuutit ajornartorsiu­taanerata qaangerniarneqarnissaa pingaaruteqartutut taagormagu. Nassuiaammi oqaatigineqarpoq sumiiffinni taagorneqartuni Nuuk Imeq pilersuisuunnginneranik pissuteqartumik utertitsisar-nermik aaqqissuussineq atuutinngitsoq.

 

Siumumiit Eqqissisimatitsinermut Avatangiisinullu Ataatsimiititaliap paasissutissanik pissar-sisinneqarnermini nalunaarutigisaa, KNI Pilersuisoq A/S-ip Avanersuarmi Tunumilu ajornartor­siummik qaangiiniarnermik peqataanissaminik ersersitsinera nuannaarutigaarput.

 

Siumumiit Eqqissisimatitsinermut Avatangiisinullu Ataatsimiititaliaq isumaqatigaarput sule-qatigiissitaliornikkut aaqqiiniartoqarnissaa inassutigimmagu.

 

Siumumiit taama oqaaseqarluta Eqqissisimatitsinermut Avatangiisinullu Ataatsimitaliap isuma­liutissiissutaa akuersaarparput.

 

Siverth K. Heilmann, Atassutip oqaaseqartua:

Inatsisartunut ilaasortap Naimanngitsoq Petersen-ip Avanersuarmi umimmaat tuttullu kisinneqar­nissaat pillugu siunnersuutaanut imatut naatsumik Atassummiit oqaaseqassaagut:

 


Atassummiit Inatsisartut Eqqissisimatitsinermut Avatangiisinullu Ataatsimiititaliaani siunner-suut oqaloqataaffigereeratsigu annerusumik oqaaseqarfiginagu, Ataatsimiititaliap Naalakkersui­sunut inassutaat, tassa Avanersuarmi umimmannik tuttunillu kisitsisarnerup ingerlaannarnissaa­nut tunngasoq, Atassummiit isumaqataaffigalugu matumuuna nalunaarutigaarput.

 

Inatsisartunut ilaasortap Jakob Sivertsenip puiaasaaqqanik utertitsisarnermik aaqqissuussine-   rup imaluunniit puukunik suujunnaarsitsisarnerup Qaanaami, Ittoqqortoormiuni Tasiilamilu atuutilersinneqarnissaannik siunnersuutaanut atatillugu imatut naatsumik aamma Atassummiit oqaaseqassaagut:

 

Atassummiit Inatsisartut Eqqissisimatitsinermut Avatangiisinullu Ataatsimiititaliaani sukumii-sumik tusarniaanerillu assigiinngitsut ingerlanneqarnerini oqaloqataaffigereeratsigit annerusumik oqaaseqarfiginagu, Ataatsimiititaliap Naalakkersuisunut inassutaa suleqatigiissitamik Avatangii­sunut Pinngortitamullu Pisortaqarfimmut atasumik, tassalu KNI Pilersuisoq A/S-imiit, kommu­nellu kattuffiat KANUKOKA-miillu sinniisuutitaqartumik pilersitsisoqarnissaa, Atassummiit sakkortuumik taperseratsigu. Matumuunalu Naalakkersuisunut kaammattuutigissavarput siun-nersuutip naammassineqarnissaa pisariaqalivissimammat,  piaartumik sulissutigeqqullugu.

 

Evald Brĝnlund, Inuit Ataqatigiit oqaaseqartuat:

Inuit Ataqatigiit takusinnaavarput Inatsisartut Eqqissisimatitsinermut Avatangiisinullu Ataatsi­miititaliaa, uani Inatsisartut ataatsimiinerata nalaani arlaleriarluni ataatsimiittarsimasoq.

 

Ataatsimiititaliap taassuma ilaatigut eqqartorsimavaa Inatsisartunut ilaasortap Naimanngitsoq Petersenip Avanersuarmi umimmaat tuttullu kisinneqarnissaannut siunnersuutaa. Ataatsimiititali­ap pineqartup siunnersuutigineqartumut tunngatillugu Avatangiisinut Pinngortitamullu Pisor-taqarfik Pinngortitaleriffimmullu paasiniaalluarnera, pissusisamisoorluinnartutut Inuit Ataqati­giinniit isumaqarfigaat. Taamaalilluni takuneqarsinnaanngorsimalluni Avanersuup kommunea- ni ullumikkut uumasut amerlassusaat agguataarnerallu paasisimasaqarfigineqarlualersimalluni. Taamaakkaluartorli Avatangiisinut Pinngortitamullu Naalakkersuisup akissuteqaataa isuma-qatigaarput, qanoq-iliorluni qanorlu akulikitsigisumik Avanersuup kommuneani uumasunik kisitsisoqarsinnaanera Pinngortitaleriffimmut saaffiginnissutigisimammagu. Tassani kisitsisoqas­sappat kisitsinermi aningaasartuutaasussat siunnersuusiornermi ilanngunneqarnissaat naatsor-suutigineqartariaqarpoq.

 

Ataatsimiititaliattaaq ataatsimiinnermini Inatsisartunut ilaasortap Jakob Sivertsenip siunner-suutaa, tassalu Qaanaami Tunumilu puiaasaaqqanik utertitsinissamik aaqqissuussisoqarnissaa imaluunniit puukunik suujuunaartitsisoqartarnissaanik siunnersuutaa eqqartorsimavaa. Ajornar­torsiut tamanna aamma uagut Inuit Ataqatigiinniit arajutsisimanngilarput, taamaattumik siun-nersuummut isumaqataanerput matumuuna nalunaarutigissallutigu.

 


Naalakkersuisup akissuteqaataani takuneqarsinnaavoq pisortaqarfiit assigiinngitsut peqataaffi-gisaannik suleqatigiissitanik pilersitsisoqareersimasoq, taamaattumik Inuit Ataqatigiit suleqati­gissitaliaq kaammattuinnassavarput suliassaq ilungersortumik angusaqarfiusumillu suliaralugu naammassiumaaraa.

 

Bjarne Kreutzmann, Akulliit Partiiat:

Avanersuup kommuneani tuttut umimmaallu kisinneqarnissaannik Naimanngitsoq Petersenip siunnersuutaanut tunngatillugu, Akulliit Partiiata paasivaa tamakkununnga tunngasut Naturinsti­tuttimit tigummeqartut, aammalu Avanersuup kommuneani tuttut umimmaallu ullumikkut amerlassusiannut qanorlu agguataarsimanerannut tunngasutigut paasissutissat ajunngivissut ullumikkut pigineqartut.

 

Jakob Sivertsenip siunnersuutaanut, tassa Avanersuarmi Tunumilu immiaaqqat imeruersaatillu  kulsyremik akullit puuinnut tunngatillugu, siunnersuummut tunngatillugu Akulliit Partiiata paasivaa aaqqiissutissatut periarfissanik assigiinngitsunik Naalakkersuisut maanna suliaqartut, aammalu suleqatigiissitap pisortaqarfinnit attuumassuteqartunit assigiinngitsuneersup tamatu­munnga aaqqiissutissap suliarigaa.

 

Isumaliutissiissut taamatut tusaatitut tiguara.

 

Anthon Frederiksen, Kattusseqatigiit:

Inatsisartunut ilaasortap Naimanngitsoq Petersenip siunnersuutaa Kattusseqatigiinniit taperser­parput taamaattumillu annerusumik oqaaseqarfiginagu,  Eqqissisimatitsinermut Avatangiisinullu Ataatsimiititaliap Naalakkersuisunut inassuteqaataa isumaqatigalutigu. Taamatullu inatsisartunut ilaasortap Jakob Sivertsenip siunnersuutaa aamma paasilluarlutigu, Eqqissisimatitsinermut Avatangiisinullu Ataatsimiititaliap Naalakkersuisunut inassuteqaataa aamma taperserlutigu.

 

Taamatut naatsumik oqaaseqarlunga Eqqissisimatitsinermut Avatangiisinullu Ataatsimiititaliap  isumaliutissiissutaa tusaatissatut tiguara.

 

Marianne Jensen, Peqqinnissamut, Avatangiisinut Ilisimatusarnermullu Naalakkersuisoq:

Oqaluuserisami uani tamakkiisumik isumaqatigiinneq nuannaarutigaara, tapiliullugu ilisimatit­sissutigiinnassavara ungasinngitsukkut Qaanaami tikeraarninnut atatillugu Avanersuup kommu­neani Kommunalbestyrelse, Avanersuarmi uumasoqassuseq, minnerunngitsumik tuttut umim­maammallu pillugit  aamma ataatsimeeqatigisimagakku aammalu tassani, uani Inatsisartunut siunnersuuteqartoq  Naimanngitsoq Petersen, Kommunalbestyrelsemi ilaasortatut aamma tassani ataatsimiinnermi peqataavoq. Tassanilu ilisimatitsissutigiinnaassavara aamma siunissami matumuunakkut suleqatigiinnissaq aamma paaseqatigiissutigineqartumik naammassineqarmat.

 


Tamatta soorunalimi soqutigaarput naammaginartumik malinnaavigineqarnissaa nunatsinni tuttoqassuseq  umimmaqassuserlu, tassani eqqarsaatigalugit Avanersuup kommuneani kisiannilu aamma nunatta sinnerani, taamaattumik neriuppunga naatsorsuutigalugulu aamma Naalakkersui­sut Pinngortitaleriffiup siulersuisui Inatsisartunut ilaasortat sinnerlugit, Avataangiisinut Eqqissi­simatitsinermullu Ataatsimiititaliaq allallu paaseqatigiittumik tamakkua qanoq siunissami aamma ingerlanneqarnissaannik ingerlatsisarumaartut.

 

Jakob Sivertsen, Atassut:

Siunnersuutigisannut tunngatillugu Inatsisartut Naalakkersuisullu siunnersuummut paasinnillu-arlutik tamakkiisumik tapersiinerat qujarullugu tiguara. Neriuutigissalluguli ajornartorsiut ilungersunarmat, piaartumik aaqqiiniutissamik suliniutit  aallartinneqarsinnaajumaartut. Tamas­sinnut qujanarujussuaq.

 

Ataatsimiinnermik aqutsisoq:

Taamaasilluni aamma ullumikkut oqaluuserisassaq immikkoortoq 44 Eqqissisimatitsinermut Avatangiisinullu Ataatsimiititaliap isumaliutissiissutaata oqaluuserineqarnera naammassivoq.