Oqaluuserisassani immikkoortoq 55-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 3. juni nal. 19.14
Ataatsimiinnermik aqutsisoq: Finn Karlsen, Siulittaasoqarfimmut ilaasortaq.
Anthon Frederiksen, siunnersuuteqartoq, Kattusseqatigiit:
Siunnersuutigisakka sisamat uani pineqarput. Unalu siulleq aatsaaginnaqqinnaaq oqaluuserineqareerpoq, tassa Danmarkimi ilinniartunut tunngasoq. Siunnersuuteqartutut siunnersuutigissavara oqaluuserineqareermat taanna tikinneqassanngitsoq.
Taavalu siunnersuutima aappaanut tassalu boligstĝttemi illutaarsimasut pillaammik ernialiinikkut akiligassinneqartarnerisa atorunnaarsinneqarnissaat siunnersuutigivara, tamatumani akiliisinnaassutsip qanoq ittuunera apeqqutaatillugu atorunnaarsinneqarnissaa.
Aammalu nunaqarfinni nammineerluni illuliaasartunut periuserineqartup assinganik illoqarfinni nammineerluni illuliorsinnaanerup ammaassivigineqarnissaa.
Taavalu BSU-miit illutaarineqarsimasut inuerunnerisa kingorna piaarnerusumik inuttalerneqaqqissinnaanerat anguniarlugu Kommuneqarfiiit pisinnaatitaaffimmik tunineqassasut piaarnerusumik inuttaliisinnaaneq eqqarsaatigalugu.
Jakob Sivertsen, Ineqarnermut ataatsimiititaliap
siulittaasorigallagaa:
Inatsisartut 1997-imi upernaakkut
ataatsimiinnerannut atatillugu Inatsisartut Ineqarnermut ataatsimiititalia
ulluni 6. aamma 22. maj ataatsimiittarsimavoq. Ataatsimiittarnerni
siunnersuutit Ineqarnermut ataatsimiititaliamut suliassanngortinneqartarsimasut
oqaluuserineqartarsimapput. Naak Anthon Frederiksen-ip siunnersuutini
aatsaannguaq oqaluuserineqartoq sammeqqunngikkaluaraa kisianni Ineqarnermut
ataatsimiititaliap suliassaq taannarpiaq akisussaaffigimmagu matumuuna aamma
ilanngullu oqaaseqarfigissavarput.
Anthon Frederiksen-ip kalaallit Danmarkimi
ilinniartut ilinniakkaminnik naammassinninneranni Nutsinnullu uterlutik
atorfininniarneranni ajornannginnerusumik inissaqartinneqartalernissaannik
siunnersuutaa, taavalu Anthon Frederiksen-ip boligstĝtte aqqutigalugu
illutaarsimasut akiitsuisa pillaammik ernialersorneqartarunnaanissaannik
siunnersuutaa, Anthon Frederiksen-ip nunaqarfinni nammineerluni
illuliaasartunut periuserineqartup illoqarfinni atorneqalernissaannik
siunnersuutaa, kiisalu Anthon Frederiksen-ip BSU-mi illutaarineqarsimasut
inuerussimallu piaarnerusumik inuleqqinneqartarnissaat siunertaralu Kommunit
imaluunniit Kommuneqarfinni ineqarnermut aqutsisut BSU-mut annerusumik
pisinnaatitaaffimmik tunineqarnissaannik siunnersuutaa.
Siunnersuummut siullermut tunngatillugu
Ineqarnermut ataatsimiititaliap isumaqatigiissup assigiimmik pineqarnissaq
tunngavigalugu innuttaasut immikkoortut allanit ajornannginnerusumik
initaarnissamut periarfissaqartinnissaat akuersaarsinnaanngilaa.
Ataatsimiiitaliamit innersuussutigineqarpoq ilinniagaqartut innuttaasunut
allanut atugassarititaasut malillugit inissarsiorlutik utaqqisut
allattorsimaffiannut allatsissinnaasut.
Siunnersuutip oqaluuserineqarneranut uiggiullugu
inuusuttut inissaminnik pissarsiniarnissaminnut ajornartorsiutigisartagai
ataatsimiititaliap sukumiisumik oqaluuserai. Ataatsimiiitaliarlu isumaqarpoq
inuusuttut inissaminnik pissarsinissaminnut periarfissaminnik
pitsaanerulersitsinissamut piumassuseqarnerat tapersersortariaqartoq. Tassunga
atatillugu ataatsimiititaliamik Naalakkersuisunut kaammattuutigineqarpoq
initaarnissamut ileqqaaruteqartarnermik aaqqissuussineq atuuttoq
misissoqqullugu inuusuttut initaarnissaminnut ileqqaaruteqarnerulernissaannut
aammalu piumassuseqarnerulernissaannut siunertaq aqqutissiuunneqaqqullugu.
Siunnersuummut tullermut
ataatsimiititaliaq isumaqarpoq akiligassat akileriigassaagaluit pillaammillu
erniat annertuumik ajornartorsiutaasut inuiaqatigiit aningaasaqarniarnerat
inuillu ataasiakkaat eqqarsaatigalugit. Taamaattumik ajornartorsiutit
oqaluuserineqartuarlutillu aaq-qinniarneqartariaqarput. Taamaattumik
siunnersuutip oqaluuserineqarnerani ataatsimiititaliap ajornartorsiutit
sukumiisumik oqaluuserisimavai aammalu Aningaasaqarnermut Ineqarnermullu
Naalakkersuisoq tamanna pillugu paasissutissanik pissarsiffiginiarsimallugu.
Tassunga tunngatillu ataatsimiititalimut nalunaarutigineqarpoq akiligassat
akileriigassaagaluit amerlanerpaartaat akileerusussuseqannginnermik
patsiseqartut. Tamannalu naammaginanngitsumik akiliititsiniartarnermik
tunngaveqartoq oqaatigineqarluni. Taamaattoq ataatsimiititaliamut
ilisimatitsissutigineqarsimavoq 1995-imi akiitsulli akiliisinnaassuseqartutut
ilimagineqartut sukannernerusumik pineqartalersimasut. Tamanna tunngavigalugu
ataatsimiititaliap Naalakkersuisunut kaammattuutigissavaa akiitsulinnut
taakkununnga naammaginarnerusumik akiliititsiniartalernissap sulissutigineqarnera
ingerlatiinnaqqullugu.
Peqatigitillugu ataatsimiititaliap paasisimavaa
Naalakkersuisunut ilaasortamit nalunaarutigi-neqarsimasoq
akiliisitsiniartarnerup inuppalaartuunissaata aalajangiusimaneqarnissaa
pisariaqartinneqartoq aammalu akiliisitsiniarnerni ataasiakkaani
taarsigassarsisut akiliisinnaassuseqarnerat aammalu ineqarnermut
tapiissutisisinnaanermut periarfissaat imaluunniit allatut pisortanit
ikiorserneqarsinnaanerat nalilersorneqartariaqartut.
Tassunga uiggiutitut ataatsimiititaliami
amerlanerussuteqartut kissaatigaat akiitsullit akiliisinnaassuseqanngitsut
aammalu inuit akiitsuminnik akiliinissaminnut piumassuseqanngitsut
immikkoortinneqartariaqartut. Tassunga atatillugu ataatsimiititaliami
amerlanerussuteqartut Naalakkersuisunut kaammattuutigissavaat boligstĝtte
aqqutigalugu illutaarsimasunut akiliiumassuseqaraluarlutik akiitsunik
akiliinissaminnut aningaasassaqartitsinngitsut pillaammik ernialersuiffigineqartarunnaanissaannik
aaqqissuussinermik nassaarniartoqarsinnaasoq misissussagaa.
Ataatsimiititaliami ilaasortaq ataaseq
Anders Nilsson apeqqummut ikinnerussuteqarluni oqaaseqaateqarpoq imatut
nipilimmik "Pillaammik erniat oqaaseq suna atorneqaraluarpalluunnit
akiligassat akileriigassaagaluit ingerlatsivigineqarneranni sulinerunermut
akiliutaapput pillaammik ernialiutakkat atorunnaarsinneqarnerisigut
taarsigassarsisimasut piffissaq eqqorlugu terminimut akiliutissanik
akiliisartut sussassarinngisaminnik immikkut aningaasartuuteqartinneqarnerulissapput.
Assigiinngiiaartitsineq ataatsimiititaliamit amerlanerussuteqartut tikkuagaat tassa
ilaqutariit naammanngitsumik isertitaqartartut pillaammik
ernialersuiffigineqartarunnaarsillugit INI-mut suliaqarnerulersitsissaaq
ingerlatseqatigiiffiup suliassap suliarineqarnissaanut tunngavissaqarfiginngisaanik.
Aammalu akiitsullit ataasiakkaat aningaasaqarniarnerannut
tunngassuteqartut INI-ip suliarineqarnissaanut tunngavissaqarfiginngisaanut.
Aammalu akiitsullit ataasiakkaat aningaasaqarniarnerannut tunngassuteqartut
INI-ip paasisinnaajunnaassallugit, INI-ip suliassaq naammassisinnaassanngilaa.
Taamatut aaqqissuussineq tunngavimmigut isumaginninnermik iluarsaaqqinnissamut
Ataatsimiititaliarsuup sulinerani eqqarsaataasunut assortuuttussaavoq.
Suliakkiutini isumannaallisaassutigalugit ikiorsiissutit pillugit immikkoortoq
issuaavigissavara "Taamatuttaaq isumannaallisaassutigalugit
ikiorsiissutaasartut pillugit maleruagassat misissoqqissaarneqassapput
inatsisitigut iluarsaaqqinnissaq siunertaralugu aammattaaq ikiorsiissutinut
taakkununnga pissarsisinnaatitaanermut ingerlatsinikkut malitassat pisarillisaavigineqassapput
taamaalilluni ikiorsiissutit assigiinngitsut akornanni
ataqatigiititsiniartarnermi ajornartorsiutaasartut piiarneqarsinnaaqqullugit.
Taamattumik ilaqutariinnut BSU-imit
taarsigassarsiaminnut akiitsulinnut aningaasarsiaqarnertillu tunngavigalugu
isumannaallisaassutigalugit ikiorsiissutisisinnaatitaasunut ernialersuisarunnaarnissamik
maleruagassiornissaq Isumaginninnermi Iluarsaaqqinnisamut
Ataatsimiititaliarsuup isumaliutissiissutaa aallaavigalugu iluarsisassatut
naammasserusutatsinnut assortuutissaaq."
Kiisalu ataatsimiititaliap ilisimavaa
taarsigassarsitsisup aalajangersartaraa ukiumoortumik akiliutissat
qaammammoortumik qaammatit pingasukkaarlugit imaluunniit ukiup affakkaarlugu
akilerneqartassanersut. Naalakkersuisunut ilaasortap ataatsimiititaliamut
nalunaarutigisimavaa akiligassat akileriigassaagaluit ilaat
pinngitsoortinneqarsinnaassagaluartut taarsigassarsisima- sut terminimut akiliutissaminnik
qaammatikkaartumik ukiup affakkaarani akilersuisaraluarpa- ta.
Ataatsimiititaliap taamatuttaaq isumaqarmat ataatsimiititaliap isumaqatigiissut
kaammattuutigissavaa BSU aqqutigalugu illuutillit terminimut
akiliutigisartagassatik qaammammoortumik akilertalissagaat.
Siunnersuummut tullermut
ataatsimiititaliap ilisimavaa nammineq illuliassanut nunaqarfinni
illoqarfinnilu ineqarnermut tunngasutigut nunaqarfinni
allaanerungaatsiarfiunngitsuni napparneqartussanut Namminersornerullutik
Oqartussat taarsigassarsititsisartut. Peqatigitillugu ataatsimiititaliap
malugeqqussavaa paasissutissat Naalakkersuisunut ilaasortamit tiguneqarsimasut.
Aalajangersagaq qulaani taaneqartoq
eqqassaanngikkaani nammineq illuliassanik illoqarfinni nappaanissamut
periarfissat taamaallaat killilerneqarput Kommuninut najukkanullu pilersaarutini
aalajangersakkani. Tassa eqqagassanut, kuuffinnut ernullu aqqutaanut
attaviliinissat amerlasuutigut periarfissanik killiliisassallutik.
Inissianik pissarsinissamut innuttaasut
peqataanerulernissaminnik periarfissinneqartariaqarnerat ataatsimiititaliap
tunngaviatigut akuersaarsimavaa. Taamaattoq ataatsimiititaliap Naalakkersuisunut
kaammattuutigaa nammineq illuliassat illoqarfinni
napparneqarsinnaalersitaanissaat pitinnagu tamanna Naalakkersuisunit
sukumiisumik misissuiffigineqaqqaartariaqartoq. Ataatsimiititaliap tassunga
tunngatillugu kaammattuutigissavaa nammineq illuliaasartut illoqarfinni
napparneqarsinnaalernerisigut nunaqarfinni illuliaasartut innuttaasunut
eqqorneqannginnissaat.
Siunnersuummut kingullermut
ataatsimiititaliap malugeqqussavaa Aningaasaqarnermut Ineqarnermullu
Naalakkersuisumit nalunaarutigineqarsimammat boligstĝtte aqqutigalugu illuliat
taarsigassarsianik suli taarsigassaqarfiusut utertillugit tigunissaat
Namminersornerullutik Oqar-tussanit pisussaaffigineqartoq. Taamaattumik
boligstĝtte aqqutigalugu illulianik Namminersornerullutik OQartussat
isumagisaqartuarput piginnittut allanit taarserserlugit. Illup qanoq sivisutigisumik
inuttaqannginnissaanik apeqqutaapput Kommunini ataasiakkaani
taarsigassarsisinneqarsinnaasunik piukkunnartunik soqutiginnittoqarnersoq.
Toqusut pigisaasa suliarineqartarnerat
nalilersuinerit aammalu illut iluarsaanneqarnissaat ulloq 24. april 1997
boligstĝtte aqqutigalugu illuliat inuttaqanngitsut katillugit 185-iupput, taakkuli
amerlanersaat taarsigassarsisussanit nutaanik tiguneqartussaallutik.
Ataatsimiititaliap ilisimavaa BSU aqqutigalugu illuliat inuttaqanngitsut
suliassartaat sivisuumik suliarineqartartut. Ataatsimiititaliaq isumaqarpoq
inissaaleqineq eqqarsaatigalugu boligstĝtte aqqutigalugu illuliat sivisuallaamik
inuttaqanngittarnerat pinaveersaarluinnartariaqartoq.
Taamaattumik ataatsimiititaliap
Naalakkersuisunut sakkortuumik kaammattuutigissavaa BSU aqqutigalugu illuliat
inuttaqanngitsut atoqqinneqartalernissaannut suliariaaseq sukanninnerulersissagaat
tassungalu atatillugu ataatsimiititaliap Naalakkersuisunut kaammattuutigissavaa
suliamut attuumassuteqartut suleqatigalugit tamanna qulakkeerniarlugu suut
suliniutigisariaqarnersut misissussagaat. Tassunga atatillugu
ataatsimiititaliap kaammattuutigissavaa BSU aqqutigalugu illuliat qanoq
sivisutigisumik inuttaqannginnissaat aalajangersimasunik piffissalerneqassasoq.
Taamatut ataatsimiititaliap oqaaseqarluni
Inatsisartunut isumaliutissiissut oqaluuserisassanngorpaa.
Daniel Skifte, Aningaasaqarnermut Ineqarnermullu Naalakkersuisoq:
Naalakkersuisut Inatsisartut Ineqarnermut
ataatsimiititaliaata isumaliutissiissutaa tiguaat. Ataatsimiititaliap
oqaluuserisimavai ilaasortat siunnersuutai assigiinngitsut annerusumik
bolig-stĝttemut tunngasutigut nutaamik suliuniuteqarnissamik siunnersuutinik
imaqartut.
Naalakkersuisut aallarniutigalugu
oqaatigissavaat ilaasortat siunnersuutaannik ataatsimiititaliap peqqissaartumik
oqaaluuserinnissimanera aammalu Naalakkersuisut suliamik ingerlatitseqqinnissaannut
kaammattuutinik atorluarsinnaasunik ataatsimiititaliap saqqummiussinera
naammagisimaarlugu.
Ataatsimiititaliap kaammattuutai
Naalakkersuisut ataasiakkaanik oqaaseqarfigissavaat aamma Inatsisartunut
ilaasortap Anthon Frederiksen-ip siunnersuutaa tunngavigalugu
initaarnissamut ileqqaaruteqarnissamut
aaqqissuussinermik maannakkut atuuttumik misissuineq aallartikkumaarlugu.
Akiitsut pillaammik ernialersorneqarunnaarnissaannik Anthon Frederiksen-ip siunnersuutaata oqaluuserineqarnera
tunngavigalugu Ineqarnermut ataatsimiititaliami amerlanerussuteqartut Naalakkersuisunut kaammattuutigaat
isumaginninnikkut pisussaaffiit tunngavigalugit periuseqartoqartariaqartoq
akiitsullit akiliisinnaassuseqanngitsut pillaammik
ernialersuutitaqartarunnaarsillugit.
Taamaattumik Ineqarnermut
ataatsimiititaliami amerlanerussuteqartut pillaammik ernialiisarneq
atorunnaarsinnianngilaat tassa akiitsullit akiliisinnaassuseqartut pillaammik
suli ernialiiffigineqartassammata. Aaqqissuussineq taamaattoq
piviusunngortinniarneqarsinnaanngilaq tassa INI isertitat akileraarutinullu
tunngasut pillugit paasissutissat tunngavigalugit pillaammik ernialersuilernissaminut
tunngavissaminik isertitat pillugit paasissutissanik pissarsinissamut
periarfissaqartinneqanngimmat.
Inuit inuunerminni nalaatatik soorlu
suliffissaaleqilerneq pissutigalugit pisortanit isumaginninnikkut immikkut
ikiortariaqalersimanerannik naliliisussat tassaapput isumaginninnikkut oqartussat.
Tamanna ataatsimiititaliami ilaasortap
Anders Nilsson-ip malugeqqusimavaa Ineqarnermut ataatsimiititaliap
isumaliutissiissutaani ikinnerussuteqarluni oqaaseqaateqarnermigut, tamannalu
Naalakkersuisut isumaqatigaat.
Boligstĝtte aqqutigalugu illuutillit
suliffissaaleqilersimanertik pissutigalugu aningaasaqarniarnikkut
ajornartorsiuteqalerunik isumaginninneq pillugu inatsisit tunngavigalugit
ikiortariaqarput. Isumaqatiginninnikkut oqartussaasut nalilersugassaannik INI
nalilersuisussanngorlugu aaqqissuussinerit atorneqalernerisiguunngitsut.
Naalakkersuisut isumaqarput akiitsunik
ajornartorsiuteqarnermut tunngasoq taanna isumaginninnermut tunngasuni
suliniutinut nutaanut ataqatigiissillugu aaqqinneqartariaqartoq. Isumaginninnermi
Iluarsaaqqinnermut Ataatsimiititaliarsuup isumaliutissiissutaani
kaammattuutigineqartut aallaavigalugit.
Naalakkersuisut naammagisimaarlugu
paasivaat naammaginartumik akiliisitsiniartarnerup ukiuni kingullerni
ingerlanneqarsimasup ingerlatiinnarneqarnissaa Ineqarnermut ataatsimiititaliap
kaammattuutigigaa. Ingerlatsineq sakkortooq pisariaqartinneqartorli
aallartinneqarsimavoq. Akuersaarsinnaanngilarput inuit
akiliisinnaassuseqaraluartut akiitsunik naammaginanngitsumik
akiliisitsiniartarneq pissutigiinnarlugu akiligassaminnik akiliisannginnerat.
Naalakkersuisut ataatsimiititaliaq isumaqatigaat terminimut akiliutissaat
qaammatikkuutaartumik akilersorneqartalernissaat akiitsoqalitsaaliuinermi
sakkugineqarsinnaammat, tikkuartariaqarporli inissialiornermut tapiissuteqartarneq
pillugu peqqussutip 1995-imi allanngortinneqarnera sioqqullugu
taarsigassarsiaasimasut eqqarsaatigalugit taarsigassarsisup
Namminersornerullutillu akornanni isumaqatigiissuteqarnissaa pisariaqarmat.
Naalakkersuisut INI kaammattorsimavaat inissialiornermut
tapiissuteqartarneq pillugu peqqussummi tamatumunnga periarfissiineq
atorneruleqqullugu. Naalakkersuisut taarsigassarsiaqartut aamma taamatut
isumaqatigiissuteqarnissaannik kajumissaassavaat.
Nammineq illuliortarnermik aaqqissuussineq
pillugu ataatsimiititaliap oqaaseqaatai Naalakkersuisut tusaatissatut tiguaat.
Taakkulu boligstĝttemut tunngasut iluarsaateqqinneqarnissaat pillugu
Naalakkersuisut isumaliutissiissutissaannut ilanngunneqassapput.
Naalakkersuisut paasivaat ataatsimiititaliap
kajumissaarutigigaa BSU aqqutigalugu illuliat qa-noq sivisutigisumik
inuttaqannginnissaat aalajangersimasumik piffissalerneqartariaqartoq.
Naalakkersuisut ataatsimiititaliaq isumaqatigaat illut sivisuallaamik
atorneqanngittaruttaarsinneqartariaqarmata, kisiannili eqqaamasariaqarparput
illumik piginnittup taarsernera soorlu toqusut pigisaasa il.il.
suliarineqartarnerat ilaatigut sivisusarmata, ilaatigullu inatsisilerinikkut
isumaqatigiinngissuteqartoqarsinnaalluni.
Naalakkersuisut
isumaliutersiissutigissavaat tamatumani suleriaatsit allanngortinneqarnissaat
pisariaqartinneqarnersoq.
Periarfissaq iluatsillugu Naalakkersuisut
erseqqissarusuppaat nunaqarfinni illut inuttaqanngitsut
aaqqiiviginiarneqarnerat nunaqarfinni inissaqartitsinikkut
ineriartortitsinissamut iliusissamut pilersaarummut suliarineqaleruttortumut
tamarmiusumut ilaatinneqassasoq. Naatsorsuutigineqarpoq iliuusissanut
pilersaarutip ilaa nunaqarfinni inissialiortitsinissamut pilersaarummut
ilaatillugu 1998-imut aningaasanut inatsisissatut siunnersuummut
ilanngunneqarumaartoq.
Boligstĝttemut tunngasut pillugit
ataatsimiititaliap isumai ataatsimut isigalugu Naalakkersuisut isumaqatigaat,
sulissutigissallugu boligstĝttemut tunngasut tamakkiisumik iluarsaateqqinneqarnissaannut
siunnersuummik upernaakkut ataatsimiinissami 1998-imi Inatsisartunut
aalajangiiffigisassamik saqqummiussisoqarnissaa. Tamatumunngalu
peqatigitillugu Naalakkersuisut imminnut pisussaatipput inissialiornermut
tapiissuteqartarneq pillugu peqqussut atuuttoq pillugu nassuiaammik ukiakkut
ataatsimiinnissami 1997-imi saqqummiussinissamut. Tassa pingaartumik
akiitsoqarnerup ajornartorsiutaanera misissuiffigeqqissaarneqarsimassalluni
taamanikkussamut.
Naggasiullugu Naalakkersuisut sinnerlugit
qujassutigissavara Ineqarnermut ataatsimiititaliap Naalakkersuisullu akornanni
pitsaasumik atorluarsinnaasumillu suleqatigiittoqarmat.
Jonathan Motzfeldt, Siumup oqaaseqartua:
Ataatsimiititaliap Inatsisartunut
ilaasortap Anthon Frederiksen-ip siunnersuutaanut isummersuutit
minnerunngitsumillu Naalakkersuisunit akissutitut isummerfigineqartut
tunngavigalugit Siumumit makku oqaaseqarfiginiarpagut.
Tassani innersuussutigissavagut Anthon
Frederiksen-ip Danmarkimi ilinniartut pillugit saq-qummiussaa siunnersuummi
allami oqaaseqarfigereeratsigu.
Siullermik erseqqissaatigerusupparput
malugisinnaagatsigu ataatsimiititaliaq peqqissaartumik aammalu
isumaqatigiiginnarani ammasumik oqallissimasoq malugisimagatsigu. Allaat
ilaatigut ikinnerussuteqarluni oqaaseqartoqarsimalluni.
Ataatsimiititaliap kingumut
sammeqqissimavaa "pillaammik ernialiisarneq" oqaaseq taamaattoq
tusaaginnaraanni soorunami paasisariaqarpoq inoqarsimasoq pillartariaqartunik.
Imaappoq malittarisassanik tamatta maligassatsinnik uniuisunik. Taamaapporlumi.
Tassani pineqarput aammalu Naalakkersuisut erseqqissumik tamanna naqissuserpaat
inuit najukkaminnut akiliutissaminnik akiliiumanngitsut imaanngitsoq
akiliisinnaanngitsut pineqartut. Akiliisinnaanngitsut nappaammik
suliffissaqannginnermik il. il. inunnik ikiuinerit aaqqissuussinerisa
iluanniipput, tassanilu suliassaallutik.
Akiliiumanngitsut inuit
akissaqaraluarlutik akiliiumanngitsut 1995-imili sukannernerusumik
pineqartalersimanerat Naalakkersuisut aamma ingerlatiinnaqqusaat Siumumit isumaqatigaarput.
Akiliisinnaanngitsut patsisissaqartut isumaginninnermi aaqqissuussisut
suliassaraat. Tamannalu maani isumaginninnermi iluarsaaqqinnerup suliniarnerani
inaarsarneqarsinnaasoq Siumumi isumaqarpugut.
BSU-imi najugaqartut akiliisinnaasut tamarluinnaasa
qaammatikkuutaartumik akiliuteqartarnissaat Siumumit naammassineqaqqullugu
misissoqquarput imaluunniit kikkunnut aalajangersimasunik akissarsialinnut
tamanut. Immikkut aaqqissuussisoqassappat tamanna INI-ip malittarisassaasa
maanna atuuttut iluanni naammassiniarneqarsinnaavoq.
Taamaattumik ikinnerussuteqarluni Anders
Nilsson-ip oqaaseqaataa tunngaviusumik isumaqatigigatsigu
taaseqataaffiginiarparput taamatut isummernitta akerlerinngimmagu siuliini
suliareqqullugit innersuussutit aamma ataatsimiititaliap tunngaviusumik
misissoqqusai iluarsiiviginiaqqusaalu.
BSU-ip illuutai sivisuumik
inuttaqanngitsut piffissap aalajangersimasup iluani periarfissereerlugit
aaqqissuussamik allanut tunniunneqarsinnaanera maanna periarfissitaassasoq
Siumumit kissaatigaarput. Illut taamaattut oqallisaanerat maannamut sivisuumik
ingerlareermat. Taamaattumik aaqqissuusinermi arlaatigut kingunissalimmik
isumatuumillu aallartittoqarnissaa Siumumit ilungersortumik kissaatigalugu
isumaqatigilluinnarparput nunaqarfinni taamaliornissamut aaqqiinissaq
aappaagumiit piviusunngortinniarlugu aningaasaliinissaq periarfissinneqarnissaa
anguniarneqassappat.
Boligstĝttemi illuliornerup ataatsimut
tamarmi kiliffia qanoq atorneqarnissaa qanoq aningaasaliiffigisarnissaa
piginnittuunerup ilusilersornissaa il. il. aaqqiiviginiarlugu Naalakkersuisut
ukiamut saqqummiussaqarsinnaanerat tapersersornaqaaq. Tamatumani nammineq
illuliorsima-sut maannamut aningaasatigut nammakkersorsimaqisut BSU-ip
avataaniittut aamma ilanngul-lugit aaqqiivigineqarnissaat inimi maani
eqqartorneqartareersut ilanngullugit.
Ataatsimut isigalugu BSU-ip tungaatigut
aaqqissuusinerit nutartertariaqarluinnartut maani inimi
saqqummiunneqartuartarnerat tunngavigalugu Siumumiit kissaatigissavarput maanna
pimoorussamik Naalakkersuisut iliuuseqarnissaat pisariaqalersoq.
Illussaqarniarnermut pissutsit imaannaanngeqisut pimoorullugit
Naalakkersuinikkut iliuuseqarfigineqartariaqarnerat utaqqineqaannarani
ullutsinni piumasaqaataammat ilungersunartoq.
Nunaqarfiit ilaanni suli illulussuseq
takussaaqaaq illut namminermit pigineqartut iluarsartariaqarnerat
utoqqalisunit pisariqartinneqartoq Kommunit suleqatigalugit
ingerlanneqartartoq. Aamma nutarteriniarnermi matumani ilanngullugu aaqqiiviginiarneqartariaqarpoq.
Naggataatigut Naalakkersuisunut aamma
eqqarsaatigeqquarput manna tassa nalinginnaasumik paasissutissanik BSU atorlugu
illuliorsinnaanerit il. il. qaammarsaatigineqarnerat ingerlatiinnaqullugu
aammalu tamatumani nammineerluni illuliassat qanoq periarfissaasinnaaneri
ilanngullugit.
Taamak oqaaseqarluta Siumumit ineqarnermut
isumaliutissiissut oqaaseqarfigaarput.
Peter Ostermann, Atassutip oqaaseqartua:
Inatsisartunut ilaasortap Anthon
Frederiksen-ip siunnersuutai sisamaasut ataatsimiititaliap suliarisimavai.
Atassummiillu imatut oqaaseqarfigissavagut.
Siunnersuuteqartup nammineq
kissaateqarneratigut siunnersuut siulleq tassa Danmarkimi ilinniagaqartut
pillugit akissuteqareersimasutut misigisimammat oqaasissagut tamaasa oqaaseqarfiginagit
immikkoortut pingajuat sisamaallu issuaaffigilaassavakka "Inuusuttut
nunanut allanut ilinniariartortillugit aallartittarpagut
ilinniagaqareernermikkut inuiaqatigiinnut iluaqutaasumik
sulilersinnaaqqullugit. Taamaalillunilu aamma tikisitanik pisariaqartitsinerput
ukiut ingerlanerini malunnartumik milliartuleqqullugu. Taamaattumik immitsinnut
aperisariaqarpugut ilinniakkaminnik naammassinnillutik angerlarsinnaanissaannut
naammattumik iliuuseqarpugut?"
Isumaqarpugut naammattumik iliuuseqarneq
ajorluta taamaattumillu Naalakkersuisunut kissaatigissavarput ilinniagaqartut
kattuffiat peqatigalugu ilinniarnermik ingerlatamik naammassinniarnissamut
kaammattuutaasinnaasunik nassaarniaqqullugit. Taamalilluni
naammassinnikkususseq anneruleqqullugu.
Siunnersuutit aappaat tassa BSU
aqqutigalugu illutaarsimasut akiitsuisa pillaammik ernialersorneqartarunnaarnissaannik
siunnersuut. Pillaammik ernialiisarnerup akiliisinnaagaluarlutik
akiliiumanngitsunut atuutiinnarneqarnissaanik ataatsimiititaliami amerlanerussuteqartut
isumaat Atassummiit taperserparput. Akiliiumanngitsullu eqqarsaatigalugit
akiliisitsiniartarnerup sukannernerulersinneqarnissaanik inassutaasoq aamma
taperserlugu.
Naammaginanngilaq apeqqut taannarpiaq
maani Inatsisartuni oqallisigeqattaartuaraluarlugu annertunerusumik pisoqarneq
ajortutut isikkoqarmat. Akileeqqusilluni iliuutsit assigiinngitsut
iliuuserineqaraluartut iluaqutaanngippata aningaasarsiani pinngitsaaliilluni
akilersuisitsisinnaanerup atorneqalernissaa Naalakkersuisut sulissutigisariaqalerpaat.
Taamaaliornikkut sukannersumik akiliisitsiniarsinnaaneq anguneqarsinnaammat.
Ataatsimiiitaliami amerlanerussuteqartut
isumaliutissiissummi Naalakkersuisunut inassutigisimavaat
akiliisinnaanngissuseqarnertik pissutigalugu akiligassaqalersimasunut
pillaammik ernialiisarnerup atortinneqartannginnissaa misissorneqassasoq.
Naalakkersuisut tamatumunnga akissuteqarnerminni ersarissumik akissutigaat
taama aaqqiissuteqarsinnaaneq atortuulersinneqarsinnaanngitsoq INI taamak
naliliiniarnissaminut tunngavissaqanngimmat.
Naalakkersuisut tunngavilersuutigisaat
Atassummiit isumaqatigaarput. Naalakkersuisunullu kajumissaarutigissallugu
INI-ip isumaginninnermilu suliaqartut qanimut suleqatigiinnerulernissaat
aqqutissiuunniarlugu suliniuteqaqqullugit. Taamaalilluta ikinnerussuteqartut
oqaaseqaataanut isumaqataalluta taaseqataassaagut.
Manna iluatsillugu Atassummiit
oqaatigilarput uagut isumaqartuaratta ininut attartortittakkanut BSU-ilu
aqqutigalugu illutaarineqarsimasunut akiliuteqartarneq inuttut atukkanut
naleqqunnerpaaq tassaammat akiliisinnaassusermik aallaaveqarnerusoq.
Nammineerluni illuliat pillugit.
Nammineerluni illuliatut taaneqartartut illoqarfinni atorneqarsinnaalernissaat
arlaleriarluni maani inimi eqqartorneqartarsimavoq. Atassummi
naatsorsuutiginngilarput nammineerluni illulioriaaseq ullumikkut nunaqarfinni
isorliunerusunilu ingerlanneqartoq illoqarfinnut atuuffiginngisaanut
nuuginnarneqarsinnaassasoq. Atassummili isumaqarpugut nammineerluni
illulioriaatsip amerlanerusunit atorneqalersinnaanera anguniarlugu Naalakkersuisut
suliuartariaqartut.
Illorput 2000 maanna
ineriartortinneqarluni naammassisutut oqaatigisariaqarpoq pissarsiarineqarsinnaasutullu
ilanngutereerluni. Illulioriaaseq Nunatsinnut pissusiusunut naleqqulluartutut
oqaatigisariaqarunartoq. Tamanna tunngavigalugu Naalakkersuisunut
inassutigissavarput Illorput 2000 aallaavigalugu nammineerluni illulioriaatsip
illoqarfinni atorneqalersinnaanera aqqutissiuuteqqullugu.
BSU-imi illut inigineqanngitsut pillugit.
Apeqqut taannarpiaq aamma maani arlaleriarluta oqallisigisarsimavarput ukiullu
ingerlaneranni assigiinngitsutigut suleriaatsimik pitsanngorsaasoqartarsimavoq.
BSU aqqutigalugu illuliaasut inuiaqatigiinni tamakkiisumik aningaasaligaapput.
Ilaanneeriarlutillu sivisuumik inoqartannginneri akueriuminaappoq. Tamannami
inissaaleqinerup annertussusianut tulluutinngimmat. Naalakkersuisunut
ilaasortap akissuteqarnermini erseqqissarpaa illup inigineerunnerani
ajornartorsiutit suut pilersinnaasartut. Pingaartumik illu toqusimasut
pigisaanut ilaasimappat. Ajornartorsiulli allatut isigisariaqarsorinarpoq illu
qimanneqarsimappat allamik initaarneq pissutaalluni soorlu attartortittakkanut
imaluunniit isumaginninnermi inissianut nuunnermi. Taamak pisoqartillugu illumik
piginnikkunnaarnermik atsiortitsineq aqqutissaqqissuugunarpoq pisortammi
tigusipallassinnaalissammata inissaqarniarnermullu iluaqutaasumik
iliuuseqarsinnaalissallutik.
Taamak iliorasuarnikkut illu piaartumik
nalilerneqarsinnaalissaaq takujumallugu inissiatut suli naleqqunnersoq,
nutartertariaqarnersoq tunineqarsinnaasorluunniit BSU-imit atorluni iluarsarneqarsinnaasoq.
Inigineqannginnerisa aamma aserfallakkiartulernerat kingunerisarpaa. Taamaalillutillu
nalikilliartulersarlutik. Tamanna tunngavigalugu ataatsimiititaliaq Atassummiit
isumaqatigilluinnarparput oqarmat illu BSU aqqutigalugu sananeqarsimasut
inigineqaratik uninngasarnissaat piffissamik aalajangersimasumik
killeqartinneqalissasoq. Killeqartitsilernerup qularnanngitsumik aamma
kingunerissavaa illoqarfinni nunaqarfinnilu aqutseriaatsit eqaannerusut
sukkanerusullu atorneqalerneri.
Taamak oqaaseqarluta Ineqarnermut
ataatsimiititaliap isumaliutissiissutaa akueraarput.
Maliinannguaq Marcussen Mĝlgaard, Inuit Ataqatigiit oqaaseqartuat:
Kalaallit Danmarkimi ilinniartut
ilinniakkaminnik naammassinninneranni nunatsinnullu atorfininniarneranni
ajornannginnerusumik inissaqartinneqalernissaannut siunnersuummut atatillugu
Inuit Ataqatigiinniit Ineqarnermut ataatsimiititap isumaliutissiissutaa
taperserparput.
Taavalu boligstĝtte aqqutigalugu
illutaarsimasut akiitsuisa pillaammik ernialersorneqartarunnaarnissaannik
kiisalu boligstĝtte aqqutigalugu illuutigineqartut inuerussimasut
piaarnerpaamik inoqarlersinneqartarnissaannik Anthon Frederiksen-ip
siunnersuutai Inuit Ataqatigiinniit paasilluarlugit tapersersorpagut.
Boligstĝtte aqqutigalugu illuutillit
ukiuni makkunani ajornartorsiutinik annertuunik aqqusaagaqartarput. Ukiualuimmi
qaangiuttut illuutilinnut erniaasartut qaffanneqarput ilaatigut annertuumik
artukkiisumik. Taakkulu qaavatigut pillaammik erniaqartitsineq aamma atuulluni.
Inuit Ataqatigiinniit inuit akissaqaraluarlutik akiliiumanngitsut pillaammik
erniaqartinneqartarnissaat akornutissaqartinngilarput. Illuatungaaniilli inuit
akiliisinnaanngitsut pillarneqartarnerat akuersaarsinnaanagu. Tassami
assersuutigalugu suliffissuarmi sulisut ilaat nammineq kissaatiginngeqisaminik
immaqa suliassaarunneq pissutigalugu soraarsitaasoqartarpoq. Taanna namminermi
pillaataareersoq illuatungaatigut akiliiumagaluarlutik akiliisinnaajunnaarneq
pissutigalugu pillaasersuisarneq Inuit Ataqatigiinniit
akuersaarsinnaanngilarput. Inummi ilungersoreersoq artorsaatissaanik tunioraannarneqarsinnaanngimmat.
Taamaattumik Inuit Ataqatigiinniit
boligstĝtte aqqutigalugu illuutillit akiliiumassuseqaraluarlu-tik
akiliinissaminnut aningaasassaqartitsinngitsut pillaammik
ernialersuiffigineqartarunnaar-nissaannik Ineqarnermut ataatsimiititap Naalakkersuisunut
misissueqqusilluni kaammattuutaat tapersersorparput. Taassumalu saniatigut
boligstĝtte aqqutigalugu taarsigassarsianik akiliisitsisarnerup ukiup
affakkaartup amerlasuutigullu artukkiisaqisup oqilisaaffigineqarluni qaammatit
tamaasa naafferaarlugu akilerneqartalernissaa Inuit Ataqatigiinniit
tamakkiisumik tapersersorparput, piaartumillu aaqqiivigeqqullugu.
Boligstĝtte aqqutigalugu illutillit
inuerussimasut piaartumik inuleqqinneqartarnissaat siunertaralugu Kommunit imaluunniit
Kommuneqarfinni ineqarnermut aqutsisut annertunerusumik pisinnaatitaaffimmik
tunineqartarnissaannut atatillugu Inuit Ataqatigiinniit isumaqarpugut
Nunatsinni inissaaleqiffioqisumi illut 185-it inoqaratik uninngaannartut
amerlavallaarujussuartut. Taamaattumik taakku sapinngisamik sukkanerpaamik
qanoq iliuuseqarfiginissaasa sulissutiginissaat Inuit Ataqatigiinniit
kaammattuutiginiarlutigu. Tassami nalunngilarput illut ilaat ukiut arlalissuit
uninngasartut tassanilu Eqqartuussivik, Kommuni A/S INI piginnittullu imminnut
utaqqeqattaattutut ittartut. Taamaattumik Inuit Ataqatigiinniit sivisuallaamik
suliap ingerlasarnerata sivikillinissaa anguniarlugu inoqannginnerisa
sivisunerpaaffilernissaanik Ineqarnermut ataatsimiititap kissaataa
tapersersorparput.
Inuit Ataqatigiinniimmi isumaqaratta
inoqannginnerisa soorlu annerpaamik naatsorsuutigalugu ukiup affaanik
sivisussusilerneratigut suliap sukkanerusumik ingerlasalernissaa aqqutissiuunneqarsinnaammat.
Kiisalu Anthon Frederiksen-ip
siunnersuutaanut nunaqarfinni illuliaasartut illoqarfinni sananeqarsinnaalernissaannut
tunngatillugu oqaatigissavarput tamanna ukiarmi Aningaasaqarnermut
ataatsimiititap saqqummiussimammagu. Ilanngullugulu Inuit Ataqatigiinniit
oqaatigissallutigu illoqarfinni nammineerluni illuliaasartut kikkunnut
tunniunneqartassanersut sukumiisumik Naalakkersuisut misissuiffigisariaqaraat.
Inuit Ataqatigiinniimmi isumaqarpugut illoqarfinni nammineerlutik illuliassanik
nunaqarfimmiusut periarfissiisoqassappat kikkut tamatumani salliutillugit pineqarnersut
erseqqissumik qulakkeersimaneqartariaqartut. Inuit Ataqatigiinniimmi
isumaqaratta sanariarlugit iluanaarniarfittut atorneqalersinnaaneri
ingalassimaarneqartariaqartut tamatumanilu pissakinnerusut
illuliorsinnaanissaminnut salliutinneqartariaqartut.
Inuit Ataqatigiinniissaaq pingaartillugu
oqaatigissavarput nunaqarfimmiutulli illoqarfimmiut nammineq illuliassanik
sanasalernissaannut periarfissiuussinermi nunaqarfimmiut
eqqorneqan-ngilluinnarnissaat qulakkeerneqartariaqartoq. Tassami imaattariaqanngimmat
illoqarfimmiunut illuliassat tunniunneqarnerini nunaqarfimmiut
ilanngartuunneqartut.
Taamatut oqaaseqarluta Inuit
Ataqatigiinniit Ineqarnermut ataatsimiititap innersuussutai tapersersorpagut.
Bjarne Kreutzmann, Akulliit Partiiat:
Akulliit Partiiata isumaliutissiissut
soqutigalugu missuataarsimavaa imatullu nalinginnaasumik oqaaseqarfiginiarlugu.
Pillaammik ernialersuinerup
atorunnaarsinneqarnissaa Akulliit Partiiata isumaqatiginngilaa tamanna
naleqqutissanngimmat ajornakusuussallunilu, tassa tamakkununnga tunngasutigut
allaffissorluni suliassat INI A/S-ip tigussagaluarunigit periarfissaqanngimmat
isertitat akileraarutillu pillugit paasissutissat pisariaqartinneqartut
pissarsiarinissaannut.
Boligstĝttep illuliaanik piginnittut
suliffissaaleqinertik pissutigalugu aningaasatigut ajornartorsiuteqartut
isumaginninnermut inatsisit atorlugit ikiorserneqartarnissaannik siunnersuut
Akulliit Partiiata tamakkiisumik taperserpaa. Tamannami isumaginninnermut
attuumassuteqarmat. Tassami oqartarnerattut nujaqanngitsoq
nujaajarneqarsinnaanngimmat.
Naak aningaasarissaaraluarlutik
akiitsuminnik akiliiumanngitsut sakkortunerusumik
iliuuseqar-figineqartalernissaat Akulliit Partiiata isumaqatigaa. Tassami
unneqqarillutik sipaaqqissaarlutillu akiligassaminnik
isumannaarinninniartartunut tamanna mittatilliinerummat.
Naak illussaaleqisorpassuaqaraluartoq
illut inuerussimasut sumi tamani takussaasut pillugit ajornartorsiutip qanoq
iliuuseqarfigineqarnera Akulliit Partiiata naammagisimaarpaa.
Inuusuttut ussernartunut
nakkaakkaluttuinnaqqajaasarnerannut inissaaleqineq ilaatigut patsi-saasutut
Akulliit Partiiata isigaa. Inissaaleqinermi eqqissisimannginnerlu inuusuttut
pinerluniaqqajaasarnerannut patsisaasut ilagaat.
Inimi maani oqaatsit atorneqartut
tunngavigalugit taama oqaaseqarneq imak isumaqarpoq tassa ikinnerussuteqartut
taperserlugit oqaaseqartunga.
Anthon Frederiksen, Kattusseqatigiit:
Kattusseqatigiinniit siunnersuutima
assigiinngitsut sisamaasut ataatsimiititaliami sammineqarsimanerat
qujassutigaara. Soorunalumi Ineqarnermut ataatsimiititaliap
isumaliutissiissutaa siun-nersuutinut tunngatillugu imatut
oqaaseqarfigissallugu.
Siullermik kalaallit Danmarkimi
ilinniagaqartut ilinniakkaminnik naammassinninneranni Nunatsinnut uterlutik
atorfininiarneranni ajornannginnerusumik inissaqartitaalernissaannut
tunngatillugu Inatsiartut 1995-imi ataatsimiinnitsinni ilinniartitaanikkut
ingerlatsineq pillugu nassuiaat saqqummiunneqartoq ilaatigut imatut
oqaatigineqartunut ilaapput, suleqatigiissitaq ilinniartut atugaat il. il.
pillugit ukiuni januarip aallaqqaataani 1992-imiit 23. november 1994-imut
Danmarkimi Ilisimatusarfimmilu Namminersornerullutik Oqartussanik
tapiiffigineqarlutik ilinniagaqarsimasut 53-iusut akornanni ilinniakkaminnik
naammassinnissimasut Danmarkimiiginnartullu amerlagineqartut tassa 21-iummata.
Taamaattumik piffissami tassaniinnaq kalaallit Danmarkimi ilinniagaqarsimasut
Danmarkimiiginnartullu amerlavallaarput, soorunami inuk kinaluunniit inatsisit
tunngaviusut tunngavigalugit naalagaaffeqatigiinnerup iluani pinngitsaalineqarsinnaanngilaq
sumi najugaqarnissaanik. Kisianni isumaqarpunga kalaallit Danmarkimi
ilinniagaqarsimasut nunatsinnullu uterusuttut ullumikkornit ajunnginnerusunik
neqeroorfigineqartariaqartut aamma ineqarnerup tungaatigut.
Boligstĝtte aqqutigalugu illutaarsimasut
akiitsuisa pillaammik ernialersorneqartarunnaarnissaannut tunngatillugu
paasivara ajornartorsiutip aaqqiivigineqarnissaa ammaffigineqartoq. Tassami
ajornartorsiut annertummat aammalu iluarsiivigineqartariaqarluni. Aamma
ilanngullugu eqqaasariaqarpoq ineqarnermut akiligassallit allat akiligassaat
pillaammik ernialerneqarneq ajormata. Soorunami taakkununnga pissutsit
allaagaluartut taamaattoq oqartoqarsinnaavoq tassuuna aamma assigiinngisitsisoqartoq.
Nunaqarfinni nammineerluni
illuliaasartunut periusigineqartup illoqarfinni atorneqartalernissaanut
tunngatillugu nuannaarutigaara ataatsimiititaliap Naalakkersuisunut
sukumiisumik misissuisoqarnissaa kaammattuutigimmagu. Aamma nunaqarfinni
innuttaasut eqqorneqannginnissaat eqqarsaatigalugu.
Boligstĝttemit illutaarineqarsimasut
inuerussimasullu piaarnerpaamik inuleqqinneqartarnissaannut tunngatillugu
ataatsimiititaliap isumaliutissiissutaa tusaatissatut tiguara. Kisiannili
Naalakkersuisunut piumasarissavara illut pineqartut allanik
inuttalerneqassatillugit ullumikkut nalilersuisarnermi periusigineqartup
allanngortinneqarnissaa aaqqiivigeqqullugu. Tassa illut ilaatigut
pisoqalereernikut nutaatut nalilerneqartarnerat arlalippassuarnik
naammagittaalliutigineqartarmat.
Taamatut naatsumik oqaaseqarlunga
Ineqarnermut ataatsimiititaliap isumaliutissiissutaa tusaatissatut tiguara.
Daniel Skifte, Aningaasaqarnermut Ineqarnermullu
Naalakkersuisoq:
Qujanaq. Siullermik partiit ataatsimut oqaaseqaataannut
oqassaanga Ineqarnermut ataatsimiiti-taliap aammalu uagut
Naalakkersuisuninngaaniit akissuteqaaterput malunnartumik tamaginnik
isumaqatigineqarmat naak assigiinngitsut annikitsut immaqa
qaffatinneqarsinnaagaluartut, tamanna nuannerpoq.
Aappassaanik partiinut ataasiukkaanut oqaatigissavara partiit tamarluinnaqqissaamik eqqartormassuk Siumup aamma aallaqqaataaniili qaffatsitaa tassaasoq sivisuumik inuttaqanngitsut piffissap aalajangersimasup ingerlanerani piaarnerusumik aaqqiivigineqarnissaat taanna Siumuinnaanngitsoq aamma Atassutip, Inuit Ataqatigiit, Akulliit Partiiata Kattusseqatigiillu qanoq iliuuseqarfiginissaa kissaatigaat. Taanna neriorsuutigissavarput sulissutiginiassallugu.
Aamma Siumup kissaatigaa ilaatigut pimoorussamik maannakkut qanoq iliuuseqartoqartaria-qartoq pissutsit illussaqarniarnermut ajornartorsiutaasut annertummata, taanna nuannaarutigis-savara neriuppungalu soorunami aamma aningaasartaqarumaartoq.
Aamma Siumumut tunngatillugu oqaatigissavara oqariartuutaa tassasoq qaammarsaanermut tunngasoq isumaqarpunga taanna aamma oqariartuut pingaaruteqartoq, soorluli ippassaanikkunni taagiga isumaqarpunga pingaartorujussuusoq suulluunniit ineqarnermut tunngasut ajornartorsiutit innuttaasut ajornartorsiutaat angippata mikippataluunniit aamma aviisitigut saqqummersinneqartariaqartut. Taamaattumik nuannaarutigisimavara INI A/S-ip siulersuisuisalu aviisertik aallaavigalugu paasissutaanerusunik assigiinngitsunik saqqummiisalermata. Soorunalimi taanna ajornartorsiut Naalakkersuisut sinnerlugit INI A/S ippassaanikkunni ataatsimeersuarmat aamma apuunneqarsimasoq nuannaarutigigatsigu taamatut paasititsiniaanerup sulissutigineqarnerunissaa. Aammalu soorlu assersuutigalugu taanna saqqummersinneqartartoq Atuagalliutit Sermitsiarlu aqqutigalugit.
Atassutip oqaaseqaataanut oqaaseqalaassanga aamma. Tassa kissaatigivaa Naalakkersuisunut ilinniagaqartut kattuffiat peqatigalugu ilinniarnermik ingerlatsisut naammaginarnerusumik aaqqiiviginissaat inissaqarniarnermut tunngasumik. Taanna torrutiinnarlugu akissagukku isu-maqarpunga ajornartorsiut taanna anigorniarneqarsinnaasoq, assersuutigalugu Namminersornerullutik Oqartussat Paasissutissiisarfiat, Kulturemut Atu-artitaanermullu Pisortaqarfik aammalu ilinniartut kattuffiat K.I.K-mik taaneqartartoq, taakkua suleqatigalugit suli paasititsiniaaneq anginerusoq anguniarneqarsinnaammat taamaalillunilu kissaat taanna aamma naammassineqarsinnaalluni.
Aamma assigiinngitsuni Atassut ilaatigut oqariartuuteqarpoq, soorlu ilaatigut isumaqatiginar-tunik, illoqarfinnut assigiinngitsunut nuuinnarneqarsinnaanngitsoq tassa illulioriaaseq nunaqarfinni atorneqartoq. Imaaliallaannaq soorunami nuuinnarneqarsinnaanngilaq kisianni taanna pisussaaffigaarput misissorluassallugu, misissorluariarutsigulu taava paasinarsissaaq nammi-neerluni illulioriaaseq qanoq ikkaluarnersoruna taanna misissorluarneqarsinnaasoq.
Aamma taamaappoq, eqqaaneqarmat Illorput 2000 atorneqarsinnaanersoq illoqarfinni, kisianni tassa taanna qanoq ilerpiarluni aqqutissiuunneqarnissaa imaluunniit aqqutissiuunneqartariaqarnera suliassat siunissami ilagissavaat, taamaattumik oqariartuut taanna aamma tusarluarpara.
Taareerpara sivisuumik inoqanngitsut aaqqiiviginiarneqarnissaat.
Inuit Ataqatigiit aamma taannarpiaq eqqartorpaat, illuutigineqartut inuerussimasut sivisuvallaamik atorneqartannginnerat, taanna kingusinnerulaalaartukkut uterfigissavara, kisianni aamma una siulliullugu tikeqqaarusullugu oqaariartuutigisaat, tassa pillaammik erniaqartitsineq akissaqartunut akiliiumanngitsunut taanna atortittariaqartoq, pillaammik akiliisitsitinniartariaqartoq, kisiannili illuatungaatigut inuit akissaqanngitsut pillaaserneqartarnerat akuersaarsinnaanngimmassuk, taanna innersuussutineereerpoq taamaattumillu maluginiarpara taamatut oqariartuuteqarnerat, suliassap iluaneereermat aamma ajunngitsutut tiguara.
Taava boligstĝttemut tunngasumik atukkiisarnerup aamma partiit allat udvalgillu kissaataat, tassa qaammatikkaartumik akiligassat nassiuttalernissaat, taanna partiit tamarmik aammalu Inuit Ataqatigiit oqariartuutigaat.
Aatsaannguaq oqarnittuut Inuit Ataqatigiit oqaaseqaatiminni imaluunniit saqqummiinerminni eqqartugaasa ilaat uterfigilaarniarpara tassaasoq, illut inoqanngitsut soorlu annerpaamik ukiup affaanik sivisutigisumik imaqanngissinnaanerisa immaqa aqqutissiuunneqarnissaat, taanna imatut oqaatigisariaqarpoq, soorunami siunnersuut taanna aamma partiit tamarmik kissaatigimmassuk qanoq iliuuseqarfiginiartariaqarparput Naalakkersuisuni. Ajornartorsiut taanna ajornartorsiutitaqanngippat aaqqikkuminassaaq kisiannili soorlu aamma saqqummiininni oqareersunga, ilaatigut toqusunik, kingornussisussanik allanillu peqquteqartillugu imaluunniit inatsisilerituut akornanni isumaqatigiinngittoqartillugu ajoraluartumik ukiut arlallit suliassaq ingerlasarpoq. Taanna qanoq iliuuseqarfigiuminaappoq, kisianni ajornartorsiutitaqartinnagu eqaannerusumik aaqqiiniarnissaq taanna oqariartuutitut ajunngitsutut nalilerparput.
Akulliit Partiiat aamma nammineq oqarpoq akiliiumanngitsut sakkortunerusumik iliorfigineqarnissaat, taanna paasilluarpara tamanit aamma isumaqatigineqarpoq. Aammalu illut inuerussimasut aamma piaarnerusumik aaqqittariaqarnerat oqariartuutigimmassuk annerusumik oqaaseqarfigissanngilara.
Naggataatigut Kattusseqatigiit saqqummiussaat oqaaseqarfigilaassavara.
Danmarkimi ilinniagaqartut pillugit Kattusseqatigiit oqaaseqarnerat tupigilaarpara, tassami Kattusseqatigiit namminneq partiinut aallartilivissugut oqariartuuteqarput, taanna pereermat oqaaseqarfigisariaqanngitsut, kisianni tassa partiit naalattorujussuullutik partiit oqaaseqartuisa allareersimagaluarlugu taanna oqaaseqarfiginngilaat. Taamaattumik tupigilaarpara Kattusseqatigiit kisimiillutik taanna imatut takitigisumik oqaaseqarfigimmassuk. Soorunami taanna uanga maannakkut annerusumik oqaaseqarfigissanngilara, akissut taanna erseqqissoq immikkoortumi siuliani eqqartoreeratsigu.
Taamatut oqaatigillatsialaariarlugu oqartariaqarsoraanga Kattusseqatigiit saqqummiussaassa ilaat ataaseq eqqunngitsutut qaffatsinneqarmat, tassa ilaatigut quppernerup aappaani issuaassaanga oqariartuuteqarmata:
AAamma ilanngullugu eqqaasariaqarpoq ineqarnermut akiligassallit allat akiligassaat pillaammik erniaqarneq ajormata, soorunami tamakkununnga pissutsit allaagaluartut taamaattoq oqartoqarsinnaavoq, tassuuna aamma assigiinngisitsisoqartoq@.
Taamatut oqarneq kukkuneruvoq, ineqarnermut attartortut tamarmik aamma pinngitsooratik akilertussaavaat, akileeqqusilluni nassitsinerit 1.000 kr. sinnerlugit annertussuseqarpata 2%-imik akiliisussaatitaammata, tassa 1.000 kr. sinnerlugit akiitsoqarunik taassuma 2%-ia aamma pi-sussaaffigimmassuk akilissallugu.
Piumasat kingulliit taasatut, soorlu ineqarnermut tunngasut maannakkut akilersorneqarnerannut tunngasumik aaqqissuussinissaq, naak allassimanngikkaluaraat, isumaqarpunga pingaaruteqartoq taanna aamma eqqaamassagipput.
Taamaalillunga partiit oqaaseqartui oqaaseqarfigaakka qutsavigalugillu.
Jakob Sivertsen, Ataatsimiititaliap siulittaasorigallagaa, Atassut:
Siullermik qujassutigissavara isumaliutissiissut partiinit tamanit tunngaviatigut taperserneqarmat, ikinnerussuteqartup oqaaseqaataa kisiat pinnagu.
Ataatsimiititaliami siulittaasuugallartutut erseqqissassavara, ikinnerussuteqartup oqaaseqaataa tassa pillaammik ernialiisarneq, Ataatsimiititaliamit piffissaq sivisooq atorlugu sammineqarsimammat. Isumaqarpunga tassunga tunngasumik erseqqissaassuteqalaassallunga.
Isumaqarpunga Naalakkersuisunit maluginiarneqartariaqartoq Ataatsimiititaliami amerlanerussuteqartut kissaatiginngimmassuk pillaammik ernialiisarnerup peerneqarnissaa. Soorunami inuit akissaqaraluarlutik akiliiumanngitsut, akiligassanut akiliisinniarneranni pillaammik ernialiisarneq eqqunneqarmalli iluaqutaasoq nalunnginnatsigu. Apeqqummili pineqartut tassaapput piniartut, aalisartut, angallateerarsortut aamma sulisartut maanaannakkut suliffissaarunnertik peqqutigalugu sulisinnaajunnaartartut. Aammalu erseqqissartariaqarpoq kalaaleqaterpassuaqarpugut, pingaartumik aalisartunik piniartunillu inunnik isumaginninnermut saaffiginninnissaminnut tunuarsimaartorujussuarnik. Tassa imminnut upperinermut naluneqannginnamillu ilungersorlutik inuussutissarsiumminnik ingerlareertuullutik, taakkulu tassaapput pillaammik ernialiisarnerup nalilersoqqinneqarnissaanik noqqaasut.
Taamaammat isumaqarpunga pillaammik ernialiisarneq inatsisinik tunngaveqarmat, inunnik isumaginninnermut tunngasunut kaputartuunneqarnissaa mianersuutigisariaqartoq, matumani inuit peqqissut, piumassuseqartut pisinnaalluartullu akiligassaminnut kinguattooruteqartartut pineqarmata.
Ikinnerussuteqartup oqaaseqaataani inuit suliffissaqanngitsut allatulluunniit pisortanit isumagineqartariaqalersartut pineqarput. Taakkuuppullu ineqarnermut akiligassanik oqilisaaffigineqarnissamik, inunnik isumaginninneq aqqutigalugu periarfissaqareersut. Nangeqqissavaralu, apeqqummi uani pineqartut inuit tassaapput, peqqissut piumassuseqarluarlutik akilersuiuartut.
Ataatsimiititaliami siulittaasuugallartutut isumaqarpunga, tamakku pillaammik ernialiiffigineqartarnerat ilumut aaqqinneqarsinnaannginnersoq iternga tikillugu misissuiffigineqartariaqaraluartoq. Inatsisartutut inatsisiliortutullu sulineq taava suusupagineqarsimassaqaaq, inatsisiliavulluunniit paasigaluarlugit aaqqinniarnissaannut periarfissaqartoq allanngortissinnaanngikkutsigit.
Naggataatigut erseqqissaatigissavara ESU aqqutigalugu pillaammik erniaat ullumikkut atorunnaarsinneqarsimammata. Tassani paasineqarmat inuit ilungersorlutik akiliiniaraluarlutik, kisianni akiligassanik malinnaanngitsut immikkut pillarneqartariaqannginnerat paasineqarsimammat. Taamaattumik Ataatsimiititaliami siulittaasuugallartutut taamatut erseqqissaateqarlunga, ikin-nerussuteqartup oqaaseqaataanut akerliullunga taasissagama.
Maliinannguaq Markussen Mĝlgaard, Inuit Ataqatigiit:
Tassa erseqqissaatigerusuppara Inuit Ataqatigiinninngaanniit isumaliutissiissut, Ineqarnermut
Ataatsimiititaliap isumaliutissiissutaanut tunngatillugu, akiitsullit akiliisinnaassuseqanngitsut pillugit, tassa pillaammik ernialersuisarnermut tunngatillugu oqaasii tusarnaarluaqqullugit maluginiaqqullugulu tassani INI A/S ataatsimilluunniit eqqaaneqanngimmat. Issuarpara:
ATassunga uiggiutitut Ataatsimiititaliami amerlanerussuteqartut kissaatigaat akiitsullit akilii-sinnaassuseqanngitsut aammalu inuit akiitsuminnik akiliinissaminnut piumassuseqanngitsut immikkoortinneqarsinnaasariaqartut. Tassunga atatillugu Ataatsimiititaliami amerlanerussuteqartut Naalakkersuisunut kaammattuutigissavaat boligstĝtte aqqutigalugu illutaarsimasunut, aki-liiumassuseqaraluarlutik akiitsunik akiliinissaminnut aningaasassaqartitsinngitsut pillaammik ernialersuiffigineqartarunnaarnissaannik aaqqissuussinermik nassaartoqarsinnaanersoq misis-sussagaat@.
Tassani maluginiarneqassaaq Ataatsimiititaliami amerlanerussuteqartup INI A/S ataatsimilluunniit eqqaanngimmagu, aamma eqqaanngimmagu taassumap suliarisussaagaa. Tassani kaammattuutigiinnarparput Naalakkersuisut aaqqissuussinermik nassaartoqarsinnaanersoq misissussagaat. Tassa imaappoq pillaammik ernialersorneqartartut taakku akileerusukkaluarlutik akiliisinnaanngitsut qanoq iliuuseqarfigineqarsinnaanerinik.
Inunnik isumaginninneq immikkut eqqaaneqanngilaq, INI A/S immikkut eqqaaneqanngilaq, suliassiissutigineqaannarpoq Naalakkersuisut misissuissasut. Taamaattumik ikinnerussuteqarluni oqaaseqaateqartup, INI A/S taassuma nammineq kisimi iserfigivaa, Inunnillu Isumaginninnermut Ataatsimiititaliarsuaq aamma oqaatigalugu. Kisianni Inuit Ataqatigiinninngaanniit erseqqissumik oqaatigissavarput, soorunami Naalakkersuisut misissuereerunik oqarsinnaapput, INI A/S-ip taanna suliassarinngilaa, immaqa isumaginninnermut tunngasut suliarissavaat imaluunniit qanoq aaqqissuussinermik pitsaanerusumik aaqqiisoqarsinnaanera orniginartinneqarnersoq.
Tassa taanna erseqqissaatigiinnarpara, INI A/S immikkut Ataatsimiititaliap taakkartorsiman-ngimmagu.
Peter Ostermann, Atassut:
Kingullermik oqaaseqartup oqaaserisaa
kingulleq naatsunnguamik oqaaseqarfigilaassavara, tassa uagut Naalakkersuisut
akissutteqarnerminni oqaaserisaat paasilluaratsigu, tassa INI A/S ullu-mikkut
pillaammik akiliisitsisartuusarpoq. Tassani aalajangerneqartarpoq pillaammik
akilii-sitsisoqassanersoq. Ullumikkullu INI A/S ima aaqqissuussaanngilaq,
misissueqqissaassalluni una akissaqannginnerarluni oqaluttoq ilumut
akissaqannginnersoq, qanoq aningaasarsiaqarpa, tamakkua misissorsinnaanngilaat,
taamaattumik imaaliinnarlugu atortuulersinneqarsinnaanngilaq.
Kisianni uagut Naalakkersuisunit
inassutigaarput INI A/S-ip isumagiinnermillu suliaqartut akornanni
suleqatigiinneq qaninnerusoq qanoq-ittoq nassaarineqarsinnaava, taanna
misissoqqullugu. Isumaqarpunga taanna aqqutigisariaqartoq, arlaannik nassaartoqarsinnaassaaq, immaqami
arlaannik assersuutissaqariissaaq kommunet arlaanni, imminnut suleqatigiillutik
taassuma nalilipallassinnaanera immaqa periarfississinnaassavaat.
Aappassaanik oqaaseqarumallunga maannga
qaqininnut una annerusumik pissutigaara, tassa akiliisinnaasorsuugaluarlutik
akiliiumanngitsut pillugit ilaatigut sukannikujuttumik oqaaseqaratta. Tassami
aamma maani Inatsisartut nalunngilaat, ila arlalerialerparput taanna
eqqartorlugu, aammalu periutsit assigiinngitsut akiliisitsitsiniarnermut
tunngassuteqartut ukiut ingerlaneranni sukannersikkiartuaarneqarsimapput,
kisiannili massakkut takusinnaavarput tamaat ataatsimut isigalugu
annertunerusumik iluaqutaanngitsoq, aammalu amerlavallaartut
akiliisinnaasorsuugaluarlutik akiliiumanngitsut. Aammalu inissaqarneq pillugu
nassuiaammi taanna erseqqissumik ilaatigut tupannalaartoq unaavoq, illoqarfinni
allaat amerlammata annertuunik akiligassallit. Taamaattumik isumaqarpugut tassa
taanna sukannersumik iliuuseqarfigisariaqaleripput.
Takuuk, Eqqartuussisarnermi inatsimmi
(Retsplejeloven) ' 20-mi
erseqqissumik tassani nalunaarsorneqarsimapput, akiligassat suut
pinngitsaaliilluni akiliisitsiniarnikkut akilersinniarne-qarsinnaasut. ' 1-imi immikkoortut aappaanni ilaatigut
erseqqissumik taaneqarsimavoq, allaat inimi attartukkamik najugallip
akiligassani akilersinnaanngippagu, pinngitsaalillugu tamakku akilersinniarneqarsinnaasut. Imermut
akiligassat, sarfamut akiligassat, eqqaanermut akiligassat akiliisinniarneqaraluarluni
nalinginnaasumik akilersinnaanngippagit, pinngitsaalillugit
akiler-sinniarneqarsinnaapput.
Uagut naliliinerput naapertorlugu init
attartortittakkat boligstĝtte-illut, inuiaqatigiinnit tamakkiisumik
akiligaapput taamaattumillu aamma
attartortut ukulu boligstĝttemik
ineqartut, taamaattumik sukannersumik pineqarsinnaanermut assigiimmik
pineqartariaqartutut isigaavut, ajornartorsiut taamaaginnarmat aammalu
aaqqittariaqalerluni.
Anthon Frederiksen, Kattusseqatigiit:
Nuannaarneq anginerusariaqarpoq, taamaattumik
nuannaaqaanga siunnersuutikka soqutigineqarluarlutik Ataatsimiititaliami
aammalu inimi maani oqaluuserineqarluarmata, aammalu minnerunngitsumik
Ataatsimiititaliap ajunngitsumik sulisimanera aammalu kaammattuuteqarnera
Naalakkersuisunut, kajumissaaruteqarnera assigiinngitsutigut ajornartorsiutit
pineqartut ilumut oqaluttup kingulliup oqaatigaa, ataasiarunnaarparput maani
oqaluuserineqarlutik. Iluarsiinissamut aaqqiisoqartariaqalerpoq, manna
oqaluttarfik atornerluinnartariaqanngilarput, qangali ilisimaneqarput tamakkut
ajornartorsiutit. Una oqaluttarfik pinnguaanngilaq, timitaliiniartoqartariaqarpoq
ajornartorsiutit anigorniarlugit. Taamaattumik uanga taasititsinissami
oqalunneq maani paasisinnaanngilara. Suna taasissutigineqassava,
ajornartorsiutit ilisimaneqarput.
Inuit akiliisinnaanngitsut
akissaqaraluarlutik, taakkua pineqartariaqarput pinngitsaalillugit
akiliisinniarlugit, kisianni nunaqarfinni piniartoqarnermut tunngasut,
aalisarnermi inuussutis-sarsiuteqartut inuussutissarsiornerannut tunngasut
misissorneqarput siorna, eqqaamanerlun-ngikkukku siorna. Tassani
paasitinneqarpugut agguaqatigiisitsinermi aningaasarsiat aalisarnermik piniarnermillu
inuussutissarsiuteqartunut annikitsuaraararsuusut. Taamaattumik pillaam- mik
ernialiisarneq maannakkutut atuutsillugu, tamatta
isumaqatigiissutigisinnaagunarparput, iluanngilaq. Periarfissiisoqartariaqarpoq
inuit naammattumik akiilisinnaassuseqanngitsut tama-tuminnga
pinngitsoortissinnaaneranut, soorlu
Ataatsimiititaliami siulittaasuugallartup tamanna aamma ersarissumik
nassuiaraa.
Immikkut partiit oqaaseqarfiginagit
qujaqqissaanga, toqqaannartumik toqqaannanngikkaluartumilluunniit
siunnersuutinnut tapersiisunut. Malunnarpoq paasilluarneqartoq suna, suut siunnersuutigineqartut
suullu oqaluuserineqarsimasut, aammalu tamakkua assigiinngitsut
ajornartorsiutit anigorniarnissaannut piumassuseqartoqartoq
malunnarluuinnarpoq, aamma taamaattariaqarpoq. Taamaattumik uanga maani
assersuutigalugu nunaqarfinni nammineerluni illuliaasartut pillugit,
taakkorpiaat asseqqinnaat eqqarsaatigalugit siunnersuutiginngilakka, aamma
oqartoqarpoq Illorput 2000 maannakkut misilittaaffigineqartoq aamma
periarfissanut ilaasoq. Aamma taman-na eqqunneqarpoq annerusumillu atorneqassappat
soorunami periarfissiisussaavoq, inissaaleqinerup akiorneqarnerani aamma
oqilisaaqataanissamut. Taamaattumik pissutsit taamaattut inuiaqatigiinnut
ajunngitsumik kinguneqarsinnaasut tapersersorpavut tamatta, tamanna qularutissaanngilaq.
Taamaattumik nuannaarpunga sulilu
nuannaarnerulerpunga taakkua aamma oqaluuserineqartut paasigakku assorujussuaq
soqutigineqartut.
Daniel Skifte, Aningaasaqarnermut Ineqarnermullu
Naalakkersuisoq:
Ineqarnermut Ataatsimiititaliami
siulittaasuugallartup taasinissamut tunngasumik oqaasia uanga
oqaaseqarfigissanngilara, kisianni tassa soorunami Jakob Sivertsen nammineq
nalunngeqatigiinnissutsi aallaavigalugu, qanoq iliornissaa nammineq taanna
akisussaaffigissavara, taannalu sunngilara. Kisianni una eqqaasissutigissavara
inuit assigiinngitsut paatsooqatigiikkaangamik inuk ataasiuneq ajorpoq, kisianni tamatigut marluusarput
paatsooqatigiit. Taamaattumik imaassinnaavoq Jaaku ikinnerussuteqarluni
oqaaseqartup paatsooraa imaluunniit aamma imaassinnaavoq Jaakup
ikinnerussuteqarluni oqartoq paatsooraa. Inuit marluugajuttarput, taanna
eqqaasissutigiinnarpara.
Maliinannguup oqaasiinut ilaatigut
Naalakkersuisut misissuisariaqartumik oqaaseqarmat, isumaqarpunga
erseqqissassallugu una, ippassigamikkunni Boligredegĝrelse - Ineqarnermut
nassuiaat - saqqummiunneqarpoq, tassanilu oqaaserineqartut ilagaat una:
Tassani nassuiaammi INI pineqarpallaaqaaq
taamaattumik Inatsisartut kissaatigaat ukiaru Naalakkersuisut BSU-mut
tunngasunik nassuiaassasut. Taanna isumaqatigiissutaavoq. Taamaattumik
Naalakkersuisut sinnerlugit oqarpunga, ajunngilaq taamaaliussaagut. Suliassaq
ingerlavoq, ukiaru apeqqut taanna eqqartussaqqaarparput eqqartussavarpullu.
Taamatut iliornermut ilaatigut peqqutaasut
ilagaat ullualunnguit - taanna sioqqullugu aamma - Isumaginninnermut
Ataatsimiititaliarsuup isumaliutissiissutaa saqqummiunneqarmat taavalu tassani
oqariartuut ineqarnermut tunngasumut atatissagutsigu, Naalakkersuisut
qularnaatsumik oqarput saqqummiinerminni:
Ikiortariaqartut ikiorneqassapput
inatsisit Inatsisartut akuersissutaat aallaavigalugit, kisianni
akissalissuullutik akiliiumanngitsut taakkua sakkortuumik malersorneqassapput.
Tassalu ullumikkut aamma partiit amerlanerpaartaasa taanna oqariartuutigaat.
Anthon Frederiksen naatsunnguamik
akissuteqarfigilaassavara, ilaatigut kissaatigimmagu aki-liisinnaanngitsut
imaluunniit akiliiumanngitsut akissaqanngitsullu pillugit Aaaqqiisoqartariaqalersoq@. Isumaqarpunga taanna oqaaseq aamma
tunuartittariaqarlugu, tassami oqareernittuut Naalakkersuisut akueraat
Inatsisartut kissaatigisaat, aaqqiiniarluta taava ukioru BSU tunngavigalugu
oqallinniarpugut iluarseeqataanissamut Naalakkersuisut kissaateqarmata,
piumassuseqarmata. Taamaattumik taanna tupaallaatigaaralusooq,
eqqaamanninnerput qulequttannut taama puuigupajaarneqarsimammat.
Isumaqatigiittoqarpoq uagullu pisussaafilerneqarpugut ukiaru taanna
oqalliserissagipput.
Jonathan Motzfeldt, Siumut:
Paatsoorneqaqqunata una Anders Nilssonip
oqaaseqaataa, taanna uagut aamma ilanngullugu tapersiiffigineqarnissaanik
oqaaseqartugut, erseqqissaateqarfigilaassavara maannakkut ilaatigut
siulittaasuugallartup paatsuunganartumik isummersimanerput
nassuiaateqarfigimmagu.
1995-ip siornatigut aaqqissuussineq
pisussanngormat piniartut aammalu inuussutissarsiornermikkut
akornuserneqarnissaminnik ilisimasaqarluartut periarfissinneqarput,
isumaqatigiissuteqassasut aatsaat piniarnikkut nalerorluarfigisaanni
akiliinissaminnut periarfissinneqarnissaminnut. Taanna Boligudvalgimi uagut
ilaasortaaffigisatsinni siusinnerusukkut, periarfissat taanna INI-mut aamma
kaammattuutigisimavarput atulersillugu. Naatsorsuutigilluinnarpara piniartut
taanna aamma tamakkua tungaatigut paasisimasaqarluartut, periarfissaq taanna
atorsimagaat aammalu taamaalillutik pillaammik pineqaatissanik
tassinneqartuarnissartik isumannaarsimassagaat.
Inuit inersimasuupput.
Naatsorsuutigissavavut taama periarfissat noqqaassutigisatik naaperiarfiusut
aqqissuussivigineqarnertik tassaniittoq atorluarsimagaat, taakku ajunngillat. Nappaammik
allanillu peqquteqartut Socialreformip isumaliutissiissutaani
innersuussutigineqartut, taakkunatigut aaqqiissutissaqarpoq.
Pisariillisaanerit tassaniittut innersuutaapput tassanilu
atorneqarsin-naallutik.
Pillaammik tunineqartussamik eqqartukkavut
tassaapput akiliisinnaagaluarlutik akiliiuman-ngitsut. Taamaattumik Anders
Nilssonip oqaaseqaataani tassani oqaaseqaatigineqartut tunngavigalugit
isumaqatigiissutigaarput taanna oqaaseqaat aamma ilaasariaqartoq, maannakkut maani aaqqiiniarnermi. Taanna
tunngavigalugu oqaaseqaat taanna tapersersorneqarpoq.
Jakob Sivertsen, Ineqarnermut Ataatsimiititaliap
siulittaasorigallagaa:
Ineqarnermut Ataatsimiititaliap
paatsuuisimasutut nalilissanngilaanga. Tassani marloriusanik maannakkut
isummertoqarpoq. Ineqarnermut tunngatillugu pillaammik ernialiisarneq inatsimmiippoq,
aatsaat allanngortillugu taanna aaqqiisoqarsinaavoq. Inunnik isumaginninnermut
tunngasut ineqarnerup oqaluuserinerata avataaniipput, taakkua periarfissat
erseqqissumik oqaatigereerpakka. Taamaattumik ajornartorsiut maannakkut
eqqartorneqartoq ima annikitsigaaq, ikinnerussuseqarluniluunniit
oqaaseqarnissamut tunngavissaanngikkaluarluni. Taamaattoq Naalakkersuisup
oqaatigisinnaappagu, ukiamut pillaammik ernialiisarneq nalilersoqqinneqassasoq
taava taamaallilluta taaseqataasinnaassaagut.
Maliinannguaq Markussen Mĝlgaard, Inuit Ataqatigiit:
Erseqqissaatigiinnarniarluguuna
Ineqarnermut Naalakkersuisup paatsoorsimagunarmanga. Tassa uani oqaaseqarninni
INI-p eqqaaneqarsimannginnera oqarninnut pissutaavoq, uani ikinnerussuseqarluni
oqaaseqaateqartup ataani INI eqqartormagu. INI-kkut Isumaginninnermut
Ataatsimiititaliarsuup eqqartorpai, kisianni Ineqarnermut Ataatsimiititaliami
ilaasortat amerlanerussuteqartut, taakku eqqaanngikkaluarlugit,
Naalakkersuisunut suliassiissuteqarput, namminneq Naalakkersuisut
nalilersuisinnaanerat takorloorlugu, tassa pillaammik ernialiisarnerup
aaqqiivigineqarnis-saanut tunngatillugu, akiliisinnaanngitsut
eqqarsaatigalugit.
Taava Jakob Sivertsen taperserusupparput
Inuit Ataqatigiinninngaanniit, tassa isumaqarpugut aamma uagut taanna
suliassiissut ukiamut boligstĝtte
aqqutigalugu illulianut aamma tunngatil-lugu saqqummiinermi suliassiissut
Naalakkersuisut tigussagaat, Inuit Ataqatgigiinninngaanniit Isumaqataagatta.
Daniel Skifte, Aningaasaqarnermut Ineqarnermullu
Naalakkersuisoq:
Maannakkorpiaq oqaluuserineqartoq
Naalakkersuisunullu suliassiissut uani immikkoortumi
eqqartorneqanngikkaluarpoq, kisianni tassa oqareerpunga, ippassaanikkunni
ineqarneq pillugu isumaliutissiissummi (betĉnkning-imi) eqqartorneqarpoq,
tassanilu isumaqatigiittoqarpoq, qalleqqissavara; isumaqatigiittoqarpoq
Naalakkersuisut suliassinneqarput ukiaru saqqummiussissasut, ilaatigut boligstĝtte
eqqartorlugu. Taamaattumillu ajornartorsiutaanngilaq, nutaaq suliassiissutaanngilaq
issakkulli suliassiissutaavoq.
Taamaattumik suliassaq taanna
tigussavarput. Eqqartulerutsigu assigiinngitsut ineqarmut tunngasut
eqqartorneqagaassapput. Aatsaannguaq oqarnittuut nassuiaat INI-mut
tunngatinneqarpallaarmat apeqqutit assigiiinngitsut maannakkut taaneqartut,
soorlu Jakob Sivertsenip taasai, Maliinannguup taasai immaqalu allat
ineqarnerup iluani ajornartorsiutit allat qaffatsinneqassapput oqallisilerutta.
Taamaattumik uanga takusinnaanngilara ajornartorsiutaanersoq. Inissaqarniarneq
pillugu oqallittussaavugut ukiaru.
Ataatsimiinnermik aqutsisoq:
Taava massakkut ikinnerussuteqartup, tassa
Anders Nilssonip, Ataatsimiititaliami ilaasortap ikinnerussuteqartup,
oqaaseqaataa uteqqinnagu tassa Ataatsimiititaliap siulittaasuata saqqummiutereermagu,
Anders Nilssonip ikinnerussuteqaataanut isumaqataasut tassani nikueqqussavakka.
20. Tassunga akerliusut nikueqqussavakka. 8.
Taamaalilluni ullormut oqaluuserisassaq
nr. 55 - tassa Ineqarnermut Ataatsimiititaliap isumaliutissiissutaa
naammassineqarpoq.
Oqaluuserisaq naammassivoq.