Oqaluuserisassani immikkoortoq 09-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermi aqutsisoq: Johan Lund Olsen, Inatsisartut
Siulittaasuat:
Johan Lund Olsen, Inatsisartut Siulittaasuat:
Tassa immikkoortoq 9 maannakkut
sammissavarput, tassa aningaasaqarniarnikkut ingerlatsineq pillugu nassuiaat,
tassani saqqummiussissaaq Naalakkersuisut Siulittaasuat.
Jonathan Motzfeldt, Naalakkersuisut Siulittaasuat:
Aningaasaqarniarnikkut ingerlatsineq
pillugu nassuiaat 1999, ilanngussartai ilanngullugit Inatsisartunut
ilaasortanut agguaanneqarsimavoq. Naalakkersuisut sinnerlugit
aningaasaqarniarnikkut ingerlatsineq pillugu nassuiaat 1999 matumuuna
saqqummiutissavara.
Tassa ilisimaneqartutut
aningaasaqarniarnikkut ingerlatsineq pillugu nassuiaateqartarnermi siunertaasarpoq,
ukiumut aggersumi matumani ukioq 2000-imi aningaasanut inatsimmi
tulleriiaarinissami Naalakkersuisut siunniussaasa nassuiarneqarnissaat. Ukioq
manna Namminersornerulernermiit ukiut 20-it qaangiussimanerat nalliussivarput.
Naalakkersuisut nutaat tassaapput
aningaasaqarniarnikkut ingerlatsineq pillugu nassuiaammik saqqummiussisut.
Taamaammat nassuiaat pereersunik kingumut qiviarnermik, kiisalu qinigaaffimmi
tulliuttumi periuserineqartussanik imaqarpoq. Aamma ajornartorsiutit ilaat
aningaasaqarniarnikkut ingerlatsineq pillugu nassuiaammi 1999-imi
saqqummiunneqartuni ajornartorsiutaapput, uteqqiattuartut siusinnerusukkut
qasseeriaqalutik naalakkersuinikkut oqaatigineqartartut.
Aamma qulequttat nutaat, soorlu
ilaatigut suliat naalakkersuinikkut ajornannginnerusumik tulleeriaarneqartalerniassammata,
aningaasaliisarnitta qanoq naleqqunnerusumik tulleriiaarneqarnissaannik
eqqarsaasersuutit aamma ilaapput.
Ajornartorsiutit ilisimaneqarnerusut
ilaatigut tassaapput, soorlu landskarsip ingerlatsinermut aningaasartuutigisartagaasa
amerliartuinnarnerat, ukiunilu aggersuni tamatuma ingerlaannarnissaa,
minnerunngitsumik pissutigalugu inuit ukiumikkut katitigaanerisa
allanngoriartornerat peqqinnissaqarfimmi, aamma inunnik isumaginnittoqarfimmi
aningaasartuutit allanngoriartornerinut sunniuteqarmata.
Aamma ilinniartitaanikkut
aningaasartuutit amerliartortussaapput, ilusilersuinikkut ajornartorsiuteqarnermik
kiisalu meeqqat atuarfiata pitsaanerulersinneqartariaqarneranik
pissuteqartumik.
Isumaqatigiinniarnerit
naammassineqalersut ilaatigullu naammassineqareersut sunniutaat aamma
tamatumuuna ilaapput. Akissarsiat qaffaataat siornagut takusartakkatsinnit
annertunerupput, Danmarkimi suliffeqarnikkut pissutsit tuniluunnerinik
pissuteqartut. Kisianni aamma taamaakkaluartoq aningaasartuutit
amerlanerulernerat landskarsimik nammakkiisussaq allanngortinneqanngilaq.
Naalakkersuisut isumaqarput
ilinniartitaanerup ilungersuunneqarnerulernissaa pisariaqarlunilu siunissamut
isigaluni isumatuut iliornerusoq, aamma OECD tamatuminnga nalunaarummini
upernarsaavigaatigut. Ukiuni aggersuni aningaasartuutit aqutassaajunnaarlutik
amerliartornissaanik ilaqanngitsumik suliat aaqqissunneqarnissaat
suliassarujussuussaaq.
Nutarterinikkut
aserfallatsaaliinikkullu aamma suliassaqaqaagut. Ilisimaneqartutut tamatumani
kinguartoortoqarujussuarsimavoq, taamaammat suliassat aamma ikinngeqaat.
Tamatuma peqatigisaanik ukiuni qulini kingullerni inuussutissarsiornikkut
aningaasarsiorneq qaffakkiartungaarsinnaasimanngilaq.
Namminersornerullutik Oqartussat
aktiaateqarluni ingerlatseqatigiiffiutaat eqqarsaatigalugit ukiumut angusat
kingulliit takutippaat, aningaasarsiornikkut inissisimanerat ataatsimut
isigalugu aalaakkaanerulersimasoq. Pissutsit taamaakkaluartut ukiut tamaasa
landskarsip aningaasaatai 600 mio. kr.-it missarpiaat inuussutissarsiutinut
tapiissutinut assigiinngitsunut atortarpagut.
Nunat tamalaat akornanni pissutsit
assigalugit kiisalu OECD-p kaammattuutai naapertorlugit Naalakkersuisut
isumaqarput, inuussutissarsiornermut tapiissutit misissuataarnissaat
pisariaqartoq. Inuussutissarsiutit inuiaqatigiit aningaasaqarnerannut qanoq
annerusumik tunniussaqarsinnaanerat paasiniarlugu.
Tamanna pisariaqarpoq, tassa
sullissinikkut aningaasartuutit amerliartuutaat aningaasalersorniarlugit
kiisalu tamanna inuussutissarsiornerup annertusiartulernissaanut
pissutaaqataassagunarmat.
Tamatumunngattaaq atatillugu
assigiimmik akeqartitsinerup qanoq siunissaqarnissaa eqqarsaatigisariaqarparput.
Aamma soorlu suliariumannittussarsiuussisarnikkut suliffeqarfiit
unammilleqatigiinnerulernissaat qanoq anguneqarsinnaanersoq.
Naalakkersuisut siunniutinngilaat
assigiimmik akeqartitsinerup iperarneqarnissaa, kisiannili assigiimmik
akeqartitsinermi tunngavigineqartut sakkukillisikkiartuaarneqarnissaat.
Tamatumunnga atatillugu illoqarfinni annernerni akissarsiaqarnerusut ineqarnermut
akiliutigisartagaasa qaffanneqarnissaat ineqarnermut aningaasartuutiviusut
atorneqarnerulernissaannut alloriarnerusinnaavoq. Alloriarneq isumaginninnikkut
oqimaaqatigiissitsinertut oqaatigineqarsinnaasoq.
Paasineqartariaqarpoq maanna
Naalakkersuisuusut Naalakkersuisuusimasunit aningaasaqarniarnikkut
aallaavilunnerusut imaluunniit aallaavissaat aallarteriarfiat ajornerusutut
inissisimasoq. Landskarsi amigartooruteqarpoq, sanaartornermut atugassat
ikinnerupput kiisalu ingerlatsinermut aningaasartuutit amerliartuinnarlutik.
Kisiannili landskarsip aningaasaataasa illersorneqarsinnaasumik
tulleriiaarneqarnissaat Naalakkersuisut suliassatut ilungersuussassatut
isigaat.
Suliassarlu pingaarneq tassaassaaq,
isumaginninnikkut illersorneqarsinnaasumik pissutsit illuatungaannut
saatsinneqarnissaat. Taamaattumik ukiut aggersut ilisarnaatigisussaavaat,
inuiaqatigiinni suliassat annertuut aningaasalersorneqartariaqassammata, soorlu
illuutit pitsanngorsarneqarlutillu nutaanngorsarnissaat, pilersuinermut aqqutit
aserfallatsaalinissaannut aningaasanik immikkoortitsinissaq, aammalu
peqqinnissaqarfiup pitsaassusiata qulakkeerneqarnissaa, kiisalu
ilinniartitaanerup meeqqallu atuarfiata pitsanngorsarneqarnissaat.
Inuussutissarsiornermut
tunngatillugu aalisarnermut isumalluuteqarneq suli annertuallaarpoq.
Aalisarnerlu tassaajuarluni nunanut allanut niuernermi pingaarnersaajuartoq.
Tassani pivakka nunami inuussutissarsiutit, aatsitassat
takornariartitsinerullu sammineqarnerulerneratigut tamatuma kisimi
isumalluutigineqarnera annikilliartussajunnarsivoq, tassa aalisarnerup.
Kisiannili ukiuni qanittuni tamanna aamma piuannanngilaq.
Ingerlatsinermi aningaasartuutit
qaffakkiartuinnassagunarnerat, inuiaqatigiinni suliassat annertuut piaartumik iliuuseqarfigisariaqartut
aammalu isertitat aningaasat allanngorarnerannut malussareqisut
eqqarsaatigigaanni pingaaruteqarluinnarpoq Naalakkersuisut aningaasartuutit
salliullugit isigisimassagaat, aammalu inuussutissarsiornermi
tapiissuterpassuit isornartoqarnersut misissussallugit.
Tapeeriaatsit qanoq
pingaaruteqarnerat misissoqqissaartariaqarpoq. Isumalluutit
pissarsiviunerpaamik atorneqarsinnaaqqullugit, aammalu isumannaarumallugu
inuiaqatigiit aningaasaqarneranniik isigalugu tapiissutit naapertuuttumik
iluanaarutaanissaat.
Taamaattumik Naalakkersuisut
inuussutissarsiornermut tapiissuteqariaatsit misissuataarniarpaat
ippinnartorsiorlugit, tapiissuteqariaatsit misissuataarnerata inernerissava,
ungasinnerusoq isigalugu naalakkersuinikkut ingerlatsinermi
anguniagassaliorneq, inuussutissarsiutinik ingerlatsisut tapiiffigineqartariaqarnerannik
annikilliartuaartitsisussaq.
Tamatuma saniatigut Naalakkersuisut
annertuumik pingaartinniarpaat, inuussutissarsiutinut tapiissutit ilaasa annikillisarnissaannik
1999-imut aningaasanut inatsimmi missingersuutaareersimasut piviusunngortinniarnissaat.
Naalakkersuisut isumaqarput
tapiisernermi tunngaviusartoq tapiissutit tunniunneqartariaqartut aningaasaqarnikkut
imminut napatissinnaassuseq annertusarniarlugu, nalinginnaasumik niuernermi
akilersinnaassuseq tamatumani anguniarlugu.
Naalakkersuinikkut ingerlatsinerup
naleqqusarneratigut nunami maani inuussutissarsiornerup aaqqissugaanera
tamatigoornerulersinniartariaqarpoq. Tamannalu aqqutigalugu sunik tamanit
sunnerneqajavallaarunnaarsillugu. Kiisalu aamma pingaartutut
erseqqissartariaqarpoq, naalakkersuinikkut ingerlatsineq aaqqissuuttariaqarmat
sallerpaatillugu suliffeqarfiit piukkunnarluartunik takulertoruminartunillu
ingerlatsinerminni tunngavissaqarnissaat inuussutissarsiutitullu
ineriartortinnissaat.
Taamaattumik inuussutissarsiornikkut
ingerlatsinermi apeqqutituaarsinnaanngillat tapiisarnerit inuussutissarsiutillu
ataasiakkaat qanoq illersorneqarnissaat. Taama oqaaseqarlunga 1999-imi
aningaasaqarniarnikkut ingerlatsineq pillugu nassuiaat Inatsisartunut
oqaaseqarfigisassanngortippara.
Jĝrgen Wĉver Johansen, Siumup oqaaseqartua:
Qujanaq, Siumumiit aningaasaqarniarnikkut ingerlatsineq pillugu Naalakkersuisut nassuiaataat tikilluaqquarput, suliarilluagaallunilu pissusiviusunik tunngaveqarluni suliaasimasoq malunnarpoq. Tamannalu qujarupparput, tamatumami periarfissimmatigut pissusiviusut tunngavigalugit maani Inatsisartuni oqallinnissatsinnut.
Ilisimaaraarput maanna Naalakkersuisuusut Naalakkersuisuusimasunit aningaasaqarniarnikkut aallavissalunnerummata. Tamannali soorunami Naalakkersuisunuinnaq tunngassuteqanngilaq, tamannami aamma isumaqarpoq, Inatsisartuni tamatta suli silatusaarnerulluta mianersornerullutalu ingerlatseqataasariaqarnerput.
Taamaattorli aamma maluginianngitsuunngilarput nassuiaammi erseqqissarnermat, 1988-imiit 1997-imut isertitat ikiliartoraluartut Namminersornerullutik Oqartussat sinneqartooruteqarsinnaasarsimmamata. Tamanna puigorneqartariaqanngilaq, isumaqarpungalu pissutissaqarluartugut ukiuni taakkunani Inatsisartunut Naalakkersuisunullu ilaasortaasarsimasut taamatut angusaqarluarnernut peqataasimanerat pillugu qujassuteqarfigissallugu.
Naalakkersuisut Siulittaasuat ilumoorpoq, saqqummiussinerminut atatillugu oqaatigimmagu, ajornartorsiutit ilaat nassuiaammi matumani saqqummiunneqartut ajornartorsiutaammata uteqqiattuartut, siusinnerusukkulli qasseeriaqalutik naalakkersuinikkut oqallisigineqartartut. Tamanna soorunami isumaqarpoq ajornartorsiutaasut maani Nunatsinni naalakkersuinikkut suleqataasunit eqqumaffiginiarneqarmata, pimoorullugulu oqaluuserineqartuarlutillu aaqqiviniarneqarmata, qujanartumik.
Taamaammat oqaluuserisassani immikkoortuni allani tamakkunani aaqqiissuteqartoqassappat anguniarneqartariaqartutut isumaqarfigisagut saqqummiuttareeratsigit siunissamilu isummersueqataanerput suleqataanerpullu ingerlatsiinnassagipput qularutigineqassanngimmat.
Oqaluuserisassami matumani isummersuutigut siunnersuutigisartakkavullu taakku tamaasa uteqqinngikkaluarlugit pingaarnerutillugu matumani siumut sammisumik siunissaq eqqarsaatigalu aningasaqarnikkut ingerlatsininnut atatillugu qanoq pitsaanerusumik suleqatigiinnikkut aqqutissiuusseqataasinnaanerput sammissagatsigu.
Aallarniutigalugu Siumumiit erseqqissarusupparput, isumaqatigilluinnaratsigu ingerlatsinermut aningasartuutit annertusiartornerat unitsinneqartariaqarmat, maannakkutummi ingerlatsineq ingerlaannassappat nassuiaammi erseqqissarneqarpoq tamatuma kingunerissammagu, ukiut sisamat qaangiuppata 300 mio. kr.-inik amigartoorneq. Taamatulli inissimaneq aamma iluaquteqarpoq, isumaqarmammi pinngitsoqarata nutaamik eqqarsaqataasariaqalersugut, suleqatigiittariaqarnerpullu pisariaqarluinnarpoq Nunatsinnut pitsaanerusussaq anguneqassappat.
Taamaattumik Siumumiit pissusissamisoorluinnartutut isigaarput, Naalakkersuisut siunertarimmassuk aningaasaqarnermi pilersaarusiornikkut nutarterinissaq, ataatsimoortumik tamakkiisumillu pingaarnersiuisarnissap malinneqarnissaata qularnaarneqarnerunissaa anguniarlugu.
Nutaamik eqqarsarnitsinni nassuerutigisariaqarparput aningaasarsiornikkut ineriartorneq sukkasuumik, kusarnartumik tamatsinnullu iluaqutaasumik ingerlassaguni, taava periarfissaqarfiusunik ingerlattariaqarpoq. Tamatuma Nunatsinni periarfissaqarfiusuni pinissaa kissaatigigutsigu taava pinngitsoorata assigiimmik akeqartitsineq nutaamik naliliiffigisariaqarparput.
Siumumi isumaqarpugut aaqqissugaanerup naleqqussarneqarneratigut qitiusumiillu aqutsinnginnerulernikkut inuussutissarsiutit pitsaasumik ineriartortinneqarnerat ikorfartorneqarsinnaasoq, nunaqarfiit, illoqarfiit isorliunerusuniittut inuiaqatigiinnilu sanngiinnerpaat eqqornerlunngikkaluarlugit.
Taamaammat nutaamik aaqqissuussinissatsinnut Siumumi piareersimavugut, Naalakkersuisullu aaqqiissutissamik pitsaanerusumik nassaarnissaat Inatsisartunullu isummerfigisassanik saqqummiussaqarnissaat qilanaaraarput, tamanna Nunatsinni aningaasarsiornikkut ingerlatsinitsinnut iluaqutaassaaq.
Akit pissusiviunerusut pissusiviusut aallaaviginerullugit ingerlatsisariaqalernerput avaqquneqarsinnaanngilaq, erseqqissarneqartariaqarsoraarpulli Siumumit isumarput naapertorlugu, tamanna isumaqanngimmat sutigut tamatigut akitsuisoqassasoq, akerlianilli akit pissusiviunerusut aallaaviginerullugit, soorlu angallannikkut akit, taava assersuutigiinnarlugu Ilulissaniit Kangerlussuarmut, Kangerlussuarmiit Nuummut allatigullu inuiaqatigiinnut atuisartunullu akininnerulernissaa unammilleqatigiinneq aqqutigalugu pissasoq kissaatigaarput. Taamaassanngippammi taamatut allannguinissaq siunertaqarpallaanngitsutut isigaarput.
Nunatta isorartunerujussua inukittunnguunerpullu pissutigalugit tamatigorluinnaq suliassaqarfinni tamani imminut akilersinnaasut akilersinnaanngitsullu immikkoortinneqartariaqarput. Taamaaliornikkut aamma ersarissarneqarsinnaaqqullugu imminut akilersinnaannginnerusut qanorpiaq naleqarneri, nalingimi taakku tassammata inuiaqatigiittut nammaqatigiilluta akiligassagut, kiffartuussineq taanna pigiinnassagutsigu.
Kisianni aamma akiliiniaannarluta akiliissanngilagut taavalu isumaqarluta tassa suna tamarmi aaqqippoq. Siumumiit isumaqarpugut kiffartuussinernut taamaattunut aki naapertuilluarnerpaaq pissarsiarineqartariaqartoq, taannalu pissappat taamaallit anguneqarsinnaavoq unammilleqatigiisitsilluni suliassanik suliariumannittussarsiuussinikkut. Taamaammat isumaqarpugut, assersuutigiinnarlugu Royal Artic Bygdeservicep suliassaqarfii nunaqarfinni isorliunerusunillu pilersuinermut tunngassuteqartut sapinngisamik piaartumik nunap immikkoortukkaarlugit unammilleqatigiisitsilluni suliariumannittussarsiuunneqarnissaat.
Taamaaliornikkut kiffartuussineq piumasarput pissavarput, aki pitsaanerpaaq atorlugu aammalu namminersorlutik inuussutissarsiuteqarlutik ingerlatsisut amerlanerusut pilersiortorneqassapput. Tamanna Nunatta aningaasaqarnikkut ingerlatsineranut iluaqutaassaaq, aamma qularnanngitsumik aningaasartuutikillisaanermik kinguneqartussaassaaq.
Inuussutissarsiutit eqqarsaatigalugit qularutigineqarsinnaanngilaq, aalisarneq ukiuni tulliuttuni tassaajuartussaammat Nunatsinnut isaatitsiviusussaq annerpaaq. Tamatumanili aamma nutarterisoqarnissaa pisariaqarluinnartutut Siumumit nalilerusupparput.
Tassani aalisagartassat pisassiissutigineqartartut agguaanneqartarnerinut tunngassuteqartut eqqarsaatigaagut. Assersuutigiinnarlugu raajat pisassiissutigineqartartut inuiaqatigiit pigisaraat, ilaqutariit piginneqatigiiffiillu ataasiakkaat pisuussut taanna piginngilaat.
Taamaattumik pissusissamisuunngilaq pisassiissutit ullumikkut naaffeqanngiusattumik piginneqatigiiffiit ilaqutariillu ataasiakkaat pigisaattut ilaatigut isigineqaqqajaammata. Soorunami kikkulluunniit pisassinneqarsimanertik aqqutigalugu aningaasaliissuteqarsimasut aningaasaliissutigisimasami taarsersornissaannut piviusorsiortumillu sulilluarnertik aningaasaliissutigisimasamik erniortinneqarnissaannut, sinneqartoornissaminnut periarfissinneqartariaqarput.
Kisianni ataasiarluni raajartassanik pisassinneqarsimaneq isumaqanngilaq pisassiissutigineqartut imungarsuaq pigilerneri. Taamaaliornikkummi aalisartut inuusuttut pikkorissut nutaamik aallartitserusuttut imungarsuaq mattunneqarsimanerat peerneqartariaqarpoq, pingaartumik piffissaq qaninnerusoq eqqarsaatigalugu taamaaliornissaq pisariaqarpoq.
Nassuiaammi OECD-p ilaatigut kaammattuutai tunngavigalugit Naalakkersuisut pisassiissutinut tunngatillugu nutarteriniarnerat malunnarpoq. Siumumiillu kaammatuutigerusupparput matumani pisassiisarnermut tunngatillugu ukiuni aalangersimasuni inuiaqatigiit pisuussutaannik pisassinneqartalernissami siunnersuutigut taamatut nutarteriniarnermi nalilersuinermi ilaatinneqarnissaat.
Qularutigineqarsinnaagunanngilaq aalisarneq suli tassaassammat ukiuni qaninnerpaani Nunatsinni inuussutissarsiutit pingaarnerpaartaat. Aatsitassarsiornerup takornariaqartitsinerullu ineriartortittuarneqarnissaat Siumumit isumaqatigaarput, tamatumani pingaartumik aatsitassarsiornermi ukiuni kingullerni pitsaasumik Nunatta peqataanera ingerlateqqinneqartariaqartutut isumaqarfigaarput, Nunatsinnimi periarfissarititaasut tunngavigalugit pitsaanerpaamik aningaasarsiornikkut iluaqutigisinnaasagut ujartortuartariaqarpagut.
Nunatta pitsaasumik kusanartumillu ineriartortuarnissaa aqqutissiunneqassappat ukiuni aggersuni illuutitigut, sulliveqarfitsigut pilersuinermullu iluarsagassanut aningaasarpassuit immikkoortinneqartariaqarnerat tamatta sillimaffigisariaqarparput, aamma minnerunngitsumik inissianik nutaanik sanaartugassat ilanngullugit eqqarsaatigissagaanni, taava pinngitsoorneqarsinnaanngilaq tamakku aamma piginneqatigiiffiit Nunatta avataaneersut suliariumannittussarsiuussisarnerni unammilleqataatillugit ingerlanneqartarnissaat.
Taamaaliunngikkuttami sanaartornerup iluani suut tamarmik akitsoraluttuinnassapput, sunalu tamarmi akitsoraluttuinnassappat taava aningaasat pigisavut killeqareeqisut pissarsissutigineqarsinnaanerat annikinnerulissaaq. Tamatumani aamma Siumumiit isumaqarpugut, pingaartuutoq eqqaamassallugu taamatut sanaartugassanut atatillugu aningaasaliissuteqarneq aningaasartuutaannanngimmat, kingusinnerusukkummi tassuunatigut isertitsisoqartalertussaavoq.
Investeringiummat eqqaamaneqartariaqarpoq Nunarput kisimi aningaasalersuisariaqanngimmat. Allammi aamma tamatumani aningaasalersueqataanissaminnut soqutiginnittut ullumikkut naluneqanngereerput. Taamaattumik Siumumit Naalakkersuisunut kaammattuutigerusupparput sanaartugassat annertuut nutaat aningaasalersorneqarnissaannut atatillugu misissueqqullugit, allanik soorlu nunat tamalaat akornanni aningaaserivissuit ilai soqutiginnissinnaannginnersut aningaasalersueqataanissaminnut.
Ingerlatseqatigiiffiit Namminersornerullutik Oqartussanit pigineqartut eqqarsaatigalugit Siumumiit erseqqissarusupparput, kissaatigigatsigu patajaallisaalluni ingerlatsineq ingerlateqqinneqartariaqarmat, nunanilu allani ingerlatseqatigiiffiit siunertaannut tunngassuteqanngitsunik akulerunneq tamaanga killeqassasoq, Nunatsinnimi ingerlatseqatigiiffitta siunertaat pingaarnerpaaq tassaariaqarpoq patajaattumik ingerlatsinikkut annertunerpaamik sinneqartooruteqarnissaq aamma piginnittumut atuisartunut, inuiaqatigiinnullu iluaqutissanngortinneqartartussanik, taamaattoq ataatsimut isigalugu ingerlateqatigiiffiit tamagangajammik ukiuni kingullerni ilorraap tungaanut saassimanerat nersortariaqarpoq, suleqataasullu tamarmik tassani pitsaasumik suleqataalluarsimanerat pillugu qutsavigalugit.
Akissarsiatigut isumaqatigiinniarnissanut atatillugu Siumumiit Naalakkersuisut isumaqatigaagut, ilumoormat tunuarsimaarniartoqarnissaanut aningaasatigut inississimanerput eqqarsaatigalugu, tunngavissaqarluartoqarmat qipisoq naaffeqanngiusartoq pulaffigissanngikkutsigu inuiaqatigiinnut tamatsinnut aningaasartuuteqarpallaarnerulernermik kinguneqarsinnaasoq.
Taamatut tunuarsimaarnissamut tamatta suleqatigiillutalu nammaqatigiittariaqarpugut. Avammut unammillersinnaanissarput eqqarsaatigalugu aamma Nunatsinni annertunerusumik nioqqutissiorsinnaanerput periarfissaqarneroqqullugu. Immitsinnummi naalleraattaqattaarluta ingerlatsigaluarutta angusassaqanngilagut.
Aningaasaqarnikkullu ingerlatsinerput taamaaliornikkut pitsaanerulersissinnaanngilarput, aamma namminersulivinnissarput pingaatikkutsigu tamakku eqqumaffigisariaqarpagut, qipisormi naaffeqanngiusartoq pulaffigisuussagutsigu, namminersulivinnissarput suli ungasinnerulissaaq.
Ilinniartitaaneq siunissamut eqqanaarsaatissaavoq pitsaasoq, taamaattumik ilinniartitaaneq eqqarsaatigalugu eqaannerusumik periuseqarnissarput pisariaqarpoq. Siumumit isumaqarpugut suliniutigineqartariaqartoq Nunatsinni inuusuttut Nunatsinnut iluaqutaasussamik ilinniarusuttut tamarmik tapersersorneqartuarnissaat, apeqqutaatinnagu sumi ilinniarumanerat. Inuiaqatigiilli isaasalerlugu "akeqanngitsumik" neqeroorutigisinnaasaasa avataasigut nunani allani ilinniarumasut mattunneqannginnissaat pingaarpoq.
Tamatumanilu inuiaqatigiittut aalajangertariaqarparput imaassasoq: Ilinniartoq sumiluunniit ilinniarumasoq ilinniarnermut atatillugu aningaasartuutai inuiaqatigiittut matussuserallartassagatsigit kingusinnerusukkulli ilinniartoq taamatut kiffaanngissuseqarluni neqeroorutit akeqanngitsut avataasigut ilinniarsimasoq ilinniarnermut atatillugu imminerminut aningaasartuutaasimasut nammineerluni matussusertassammagit.
Taamaaliornikkut isumaqarpugut eqaannerusumik periuseqarneq eqqunneqarsinnaasoq inuiaqatigiinnut aningaasartuutaanerulersinngikkaluarlugu, aamma qularnanngitsumik ilinniartut taamatut kiffaanngissuseqarnerulernertik allalippassuartigut iluaqutigissavaat.
Ilinniarnermusiat eqqarsaatigalugit nutaamik aaqqiissuteqartoqarnissaanut atatillugu Kalaallit Ilinniagaqartut Kattuffiata KIK-p isumaqatigiinniarnissanut atatillugu saqqummiussaqarnissaat pissagalluta suli utaqqivarput. Siumumit pingaartipparput ilinniartut qanimut paaseqatigalugit aaqqiissuteqartoqarnissaa tamanut naammaginartumik, tamanullu iluaqutaasumik. Aamma tamatumani ilinniartut akisussaaffimmik annertunerusumik tunineqarnissaasa aqqutissiuunneqarnissaa ilanngunneqartariaqarsoraarput.
Siumumiit ilinniartut amerlavallaat unittoortarnerannut atatillugu paasivarput, uppernarsarneqarsimasoq unittoortarnerit inuussutissarsiutigalugu ilinniartitaanernut atatillugu, amerlanerpaartaat praktikkernerup nalaani pisarmata. Tassa imaappoq ilinniartut atuagarsornermut tunngasortai amerlasuutigut sapersimanngilaat. Allanilli ajornartorsiuteqartoqarsimammat praktikkernerup nalaani taamaatiinnartarnerit pisarput.
Tamatumani Siumumiit kissaatigaarput ajornartorsiutaasut misissuiffigineqarnissaat aaqqiiviginiarneqarnissaallu. Naalakkersuisut aningaasaqarnikkut ingerlatsineq pillugu nassuiaataata ersarissisippaa pitsaasup tungaanut ingerlariaqqissagutta arlalitsigut nutaamik eqqarsartariaqartugut. Taamaattumik Siumumiit pinnngitsoorumanngilagut matumani nutaamik ingerlariaqqinnissamut Naalakkersuisut suliniarnerminnut atatillugu aamma nalilersugassaannik saqqummiussaqassalluta.
Nalunaarusiami oqaatigineqarpoq nunatsinni nioqqutissiat tassaanerummata nerisassat, tamanna allanngortariaqarpoq. Nioqqutissanik allanik amerlanerusunik Nunatsinni tunisassiulernissarput aqqutissiuunneqartariaqarpoq. Ippassaanitsiaannaq iluarsagassat pillugit oqallinnitsinni sanaartornerup iluani ataqatigiissaarilluarnikkut nioqqutissiassat, atortussat amerlanerusut Nunatsinni sanaartorneqartalernissaat Siumumit ujartorparput.
Kisianni taamatut ataqatigiissaarilluarnikkut Nunatsinni nioqqutissiarineqarsinnaasut soorunami sanaartornermuinnaq tunngassuteqanngillat. Taamaattumik Siumumiit Naalakkersuisunut kaammattuutigerusupparput eqqarsartartoqatigiinnik nalilersuisartussanik suleqatigiissitaliamik pilersitseqqullugit. Taamaaliornikkut suut aallartisarneqarsinnaanerinik piviusumik tunngaveqarluni periarfissanik pimoorussilluni suliniuteqarneq aqqutissiuunneqassammat. Suliniutillu taamaattut iluatsissinnaassappata soorunami kingunerisussaavaat Nunatsinni aningaasat amerlanerusut kaaviiaartinneqarnerulernerat. Tamatumalu tamatigorluinnaq nassatarisarpaa suliffinnik amerlanerusunik pilersitsinerit, tamannalu Nunatta aningaasaqarneranut iluaqutaassaaq.
Aningaasaqarnerput pitsaanerusup tungaanut saatsinneqassappat, aamma suliffinnik nutaanik amerlanerusunik pilersitsiniarnissarput pinngitsoorsinnaanngilarput. Tamatumani Siumumit ilaatigut qineqqusaarnerup nalaani oqariartuutigisimavarput, Kangerlussuup silaannakkut usinik assartuinermut kiffartuussivinngortinneqarsinnaanera pimoorullugu misissuiffigilluarneqartariaqartoq.
Paasivarput tamanna siusinnerusukkut misissorniarlugu suliniuteqartoqarsimasoq, taamaattumik Naalakkersuisunut apeqqutigissavarput, suliaq taanna sumut killinnersoq. Naammassineqarnanilu unitsiinnarneqarsimassappat Naalakkersuisut kaammattussavagut periarfissaasinnaasut tassaniittut misissuiffigeqqullugit.
Ullumikkut umiarsuarpassuit Nunatta eqqaaniittartut Nunatsinnut atortussaminnik pisiniarusuttaraluarput, kisianni Nunatsinni umiarsualiviit pioreersut pisiniarfigineqarsinnaasut arlaannaalluunniit akileraarfiunngitsumik akitsuusiiffiunngitsumillu immikkoortortaqannginnerat peqqutigalugit umiarsuit taakku Islandimut allanullu taamaattumik aaqqissuussiffigineqarsimasunut pisiniartarput. Tassa imaappoq aningaasat Nunatsinnut iluaqutaasinnaagaluartut taamaaliornikkut annaasarpagut, naak Nunatsinnut suliffissaqarnikkut aamma iluaqutaasinnaagaluartut.
Taamaattumik Naalakkersuisunut kaammattuutigissavarput, Nunatsinni umiarsualiviit pioreersut ilaanni akileraarfiunngitsumik akitsuusiiffiunngitsumillu immikkoortortamik pilersitsisoqarsinnaannginnersoq misissoqqullugu. Nutaamik eqqarsanngikkutta aamma ingerlariaqqinnavianngilagut.
Nunatta pisuussutai tunngavigalugit tunisassiornissarput soorunami pingaaruteqarpoq. Aatsitassarsiornermut oliasiornermullu atatillugu nassuerutigaarput, nammineerluta maani Nunatsinni taamatut ujarlernermut, piiaanermut avammullu tunisassiornermut tunngatillugu allamiunik aningaasaleeqataarusuttunik suleqateqartariaqarluta.
Tamanna ajunngilluinnarpoq aamma pissusissamisuuginnarpoq sanngiiffigisatsigut suleqatigisinnaasatsinnik pissarsiortarnerput.
Nunatta pisuussutaasa ilaat tassaavoq Nunatta ernga, tamatumani aatsitassarsiornermituulli avammut tunisassiarineqarsinnaanissaanik suleqateqartariaqarnerput nassuerutigisariaqarparput. Qularutigineqarsinnaanngilarmi Nunatsinni imermik avammut tunisassiarineqarsinnaasumik peqarmat.
Taamaattumik Naalakkersuisunut kaammattuutigissuarput, Nunatta ernga avammut tunisassiarineqarnissaa siunertaralugu aningaasaleeqataarusuttunik suleqatissarsioqqullugit.
Tamatumanili soorunami pisarneq malillugu Nunatta annertunerpaamik tunisassiortoqalissagaluarpat piginneqataanissaa peqataanissaalu puigornagu. Tamanna Nunatta aningaasaqarneranut pitsanngoriaammik kinguneqartitsisinnaammat misissorneqarluartariaqartutut isigaarput. Nunatsinni inuussutissarsiornikkut pilersitsisartut annertunerusumik eqqumaffiginiarneqartalernissaat Siumumit kissaatigaarput.
Taamaattumik Naalakkersuisunut kaammattuutigissavarput, Kalaallit Nunaanni inuussutissarsiornikkut nutaamik pilersitsisunut nersornaasiuttakkamik pilersitseqqullugit. Nersornaat imatut aningaasartalerneqartariaqarpoq, orniginartunngortillugu nutaamik nassaarniarnissanut nukiit atorneqarnissaat.
Ukiuni makkunani namminersulivinnissatta oqaluuserineqarnerata piviusorpalaartunngorluni sakkortusiartunnarfiani peqatigiilluta sulissutigisariaqalerparput, nassaariniassallugu inuiattut ineriartornitsinni siunissami suut suliniutigisariaqarnerlugit.
Taamaattumik nutaamik pilersitsinerit suusulluunniit tamatsinnut pingaaruteqarluinnarput.
Tamatumani pineqarpata tekniki nutaaq, internet atorlugu qarasaasiatigut attaveqatigiinnermut atortutut nutaat imaluunnit puisip orsua atorlugu iisartagaliorneq. Taamaaliornikkut aamma qularnanngitsumik avammut nioqqutissiarineqarsinnaasunik taamatullu aningaasaqarnikkut Nunatsinnut iluaqutaasinnaasunik nutaanik nassaarsinnaanissarput qaninnerulissaaq.
Nutaamik eqqarsarneq Nunatsinnut iluaqutaasinnaasoq sukkulluunniit pisariaqartipparput. Inuiaqatigiinni siunissami nammaqatigiilluta ingerlatsinerput ingerlateqqittariaqarparput. Tamatta paasereerparput illoqarfinni assigiinngitsuni periarfissarititaasut assigiinnginnerujussui, aamma nalunngilarput kommunit atugarissaarnerpaat periarfissagissaarnerpaallu tassaammata Nunatsinni akileraaruteqarnikkut procentitigut pitsaanerpaamik inissisimasut. Tamanna equngavoq.
Nunatta illoqarfiit taakkua ineriartorneranni annertuumik tapersersorsimavai, aamma illoqarfiit taakku Nunatta sinneranut tapersersuinerisa annertusarneqarnissaat pissusissamisoorpoq. Pingaartumik assigiimmik akeqartitsinerup nutaamik aaqqissuunneqarnissaa aqqutissiuunneqarsinnaassappat. Taamaattumik Siumumit Naalakkersuisunut kaammattuutigissuarput akileraartarnikkut allanngortitsinissamut atatillugu tamanna eqqumaffigeqqullugu, misissorluaqqullugulu.
Nunatsinni tamatsinnut pitsaanerusussaq ujartussagutsigu nammaqatigiillutalu ingerlatsinerput ingerlatiinnassagutsigu tamatuma sukumiisumik naliliiffiginissaa pisariaqarluinnarpoq. Taamatut oqaaseqarluta Siumumiillu Naalakkersuisunut kaammattuutigisagut innersuussutigalugit suleriaqqinnissaminnilu ilaat toqqammavigalugit ingerlatsinissaat naatsorsuutigalugu, matumuuna Naalakkersuisut aningaasaqarnikkut ingerlatsineq pillugu nassuiaataat pitsaasoq tusaatissatut tiguarput.
Ataatsimiinnermik aqutsisoq: Lars Karl Jensen, Inatsisartut Siulittaasoqarfiani ilaasortaq:
Daniel Skifte, Atassutip oqaaseqartua:
Qujanaq, Atassutip Naalakkersuisut aningaasaqarnikkut ingerlatsinerat pillugu periaasissatsinnik nassuiaateqartarnerat aammalu ukioq manna, siusinnerusukkutulli ileqquliussatut pitsaasutut nalilertarpaa.
Taamatut nalunaaruteqartarnermi anguniarneqartarpoq, aningaasaqarnitsigut sumut killinnersugut kiisalu aamma suup tungaanut qanorlu iliorluta ukiuni tulliuttuni ingerlassanersugut oqaatiginiarneqartarluni.
Naalakkersuisut kalaallisut saqqummiussaat aasiit kingusinaartumik tunniunneqarpoq, kisianni nalunaarusiaat tunniunneqartoq 79-inik quppernilik atuagassatsialassuuvoq, tassani erseqqilluinnartumik nalunaarfigineqarpugut, ukioq manna Namminersornerunitsinni 20-liinerput nalerorluarlugu, ukiuni qaangiuttuni aningaasatigut ingerlatsimaneq tamakkiisumik isigalugu tulluusimaarutissaannanngivissoq.
Kingumut qiviarluta oqarsinnaavugut, ingerlatsinerup ilaani pitsaasunik aammalu Nunatta ineriartortuarneranut ajunngitsumik kinguneqartumik aalangiisoqartarsimagaluartoq, kisiannili aamma pitsaanngilluinnartunik aammalu kukkuissuartunik aalajangiisoqartarsimavoq, Nunatsinnut asulersuaq aningaasartuutaasumik.
Taamaattumik Nunatsinni aningasaqarnernikkut ingerlatsineq ullumikkut killiffigisarput aallavigalugu pinngitsoorata ukiuni qaangiuttuni naalakkersuinikkut periaaserineqartartut ilaat qimattariaqalerpagut, allangortillugit. Allatut iliorsinnaanngilagut, ingerlaaseq allanngortittariaqarparput Nunatta ineriartoqqinnissaa kissaatigigutsigu. Atassutip Nunatta ineriartoqqinnissaa kissaatigaa.
Inuit ataasiakkaat immikkut Nunarput pillugu soqutigisaqartut kiisalu allat pisortatigoortumik akilersugaallutik immikkut sulisinneqartartut, apeqqutit tamakkua Nunatta aningaasarsiorneranut tunngassuteqartut arlaleriarlutik nalilersortuartarsimavaat.
Soorlu oqalugiarnertigut, aviisini allaaerisaqartarnermikkut, atuakkiortarnertigut imaluunniit nalunaarusiortarnertigut.
Atuakkiaasartut nalunaarusiaasartullu tamakkua ajoraluartumik annertunerusumik isumassarsiorfigineqaratik atuagaasivinni amusartuniluunniit pujoralatsertutut ilanngutiinnarsimapput, tamannalu uggornarpoq.
Assersuutitut ukua marluk nutaanerpaat kisiisa taassavakka, siulleq, Danmarkimi Naalakkersuisut Siulittaasuata Kalaallit Nunaani aningaasaqarnerup ineriartorneranik siunnersuisoqatigiiffiata ukiumoortumik nalunaarusiaa, ukiup nikinnerani saqqummiunneqartoq. Kiisalu aappaatut, OECD-p aningaasaqarnerput pillugu nalunaarusiaa, Nunatsinni Naalakkersuisut Siulittaasuata nammineq piumasaralugu suliarititaa. Nalunaarusiaq taanna ulluni makkunanerpiaq saqqummerpoq.
Nalunaarusiat assersuutitut taaneqartut erseqqilluinnartumik assigiimmik nalunaarutigaat, piffissanngortoq qimassallugu Nunatsinni aningaasatigut ukiorpassuarni taamatut ingerlatsisimaneq, Nunarput ineriartornermigut unittoorani ingerlariaqqissappat. Oqaatsit paatsuugassanngitsut aammalu allatut nipilerlugit nassuiaasersorniartariaqanngitsut.
Atassummiit erseqqissumik oqaatigissavarput, ukiuni 20-ni ilaatigut kukkunertalinnik aningaasaqarnikkut ingerlatsimanermi peqqutit annersarigaat, politikkikkut aalajangiinerni immitsinnut kukkussutigisartakkavut. Uagut aamma akisussaaqataavugut tamakkununnga.
Tamannalu qimarratiginianngilarput, aalajangiinernimi illuatungiliukkutta naalakkersuisooqataaguttaluunniit apeqqutaanngilaq.
Tamaattumik soorlu assigiinngitsunik politikkikkut siunertaqartunik tapiissuterpassuaqalersitsisarsimanerup qulaajarnissaa peqataaffigissavarput, innuttaasut imaluunniit suliffeqarfissuarni siulersuisut aqutsisulluunniit eqqariaqqittariaqassapput, taamatut aaqqissuussinerit allanngortinneratik ingerlatiinnarneqassasorigunikkit.
Naalakkeruisut aappaagumut, tassa ukiumut 2000-imut pilersaarutaasa saqqumiunneqartut ilamininngui kisiisa maannakkut oqaaseqarfigissavakka. Erseqqissassalluguli siunnerfiit amerlanerpaartai tupinnanngitsumik Atassummiit isumaqatigineqarmata.
Kisianni Naalakkersuisut tupaallatseqaatigut oqaramik, inissianunngooq assigiinnut akiliut illoqarfiit anginerit ilaannaanni allisinneqassaaq, taakkunani akissaateqqortunerit kisiisa akiliisinnerusalersillugit. Kakkaak, immaqa tikisitat ineqarnerminnuut akiliutaat tapiiffigineqartalissapput imaluunniit akissaataat taamaaqqataanik amerlisarlugit. Tassami naatsorsuutigisinnaavarput akissarsiaminnik annaasaqarnertik utertitsiniarfigiumaaraat.
Aamma Naalakkersuisut tupaallatseqaatigut oqaramik avataanigooq raajarniarneq allisarneqassaaq, raajarniutit fabrikkillit annertusaaffiginerisigut, kisianniligooq tamatuma kingunerissavaa aalisartut suliffii 100-t annaaneqassammata, kakkaak.
Atassut isumaqarpoq Nunatsinni suliffiit 100-t allanik taarsernagit annaassagutsigit tamanna isumalerujussuujumaartoq, soorlu akileraarutit aammalu inunnik isumaginninnerup tungaatigut, aammami erseqqissumik oqaatigineqanngilaq pilersitsiniarnermi Royal Greenland imaluunniit Namminersornerullutik Oqartussat arlaatigut akuutinniarneqarnersut.
Atassutip piumasaraa Naalakkersuisut tamanna pillugu nassuiaateqarnissaat, tassami Atassutip ingerlaannartumik akueriumanavianngilaa, assersuutigalugu Royal Greenlandip imaluunniit Namminersornerullutik Oqartussat aningaasanit nunanit allaniit attartoqqinniassappata, peqqutigalugu taakkua attartugaat imaluunniit pisussaaffii annertoreeqimmata.
Namminersortut taamaaliortinniarneqassappata apeqqut allatut Atassummiit nalilissavarput, kisianni puiussanngilarput 1980-ikkunni avataasiutinik killeqanngiusartumik politikkikkut akuliuffigineqajaanngitsumik kilisaatitigut amerlisaasimaneq equsoorsimanerlu. Tamanna naluneqanngitsutut Nunatta karsianut, tassa akileraatartunut miollionerpassuarnik aningaasaataajaasarsimavoq, tamannalu suli eqqaamavarput. Misillersimanerput ilinniarfigisimannginneratsigu.
Ingerlariaqqittoqartinnagu sukumiinerusumik misissorluaqqaartariaqarpoq suliffiit annaasassat sunit allanit taarserneqassanersut, kiisalu kommuni sorleq imaluunniit sorliit akileraarutitigut aammalu inunnik isumaginninnikkut qanoq eqqorneqassanersut.
Nalunaarusiami peqqinnissaqarfik pillugu oqaatigineqartut maannakkut oqaaseqarfigissanngilakka, peqqutigalugu ullormut oqaluuserisassami tulliuttumi tamanna pillugu Atassummiit oqaaserisassagut tassani innersuussutigissagakkit.
Inuussutissarsiorneq pillugu ingerlatsinermut Naalakkersuisut oqarput: "OECD-ip nalunaarusiaani missigersuutaasumi kaammattuutit Naalakkersuisut inuutissarsiornikkut ingerlatsinerminni anguniagaannut naapertuulluartut". Ilasilaraluttuaq, tusarneq, kakkaak talerpermut Siumukkut IA-kkullu illuariarnerat erseqqingaarami.
OECD-ip nalunaarusiamini aningaasaqarnikkut ullumikkutut ingerlatsineq allanngorluinnarteqquaa Nunarput ineriartornermigut unittuunnginniassammat. Pisortat inuutissarsiutinut ingerlanneqartunut akuuallaarnerat aamma piaarnerpaamik qimanniartariaqartutut oqaatigineqarpoq, taama nalunaaruteqarneq nuannaarutigaarput, kisiannili OECD-ip nalunaarutaani inassutaasoq aammalu Naalakkersuisooqatigiit namminneq periaasiat atorneqartoq imminnut assortuupput. Atassutip politikkikkut anguniagaanut siunnerfik ajornartorsiutaanngilaq.
Naalakkersuisut sipaarniarfiusinnaasunik periarfissiuiniarnerat taperserparput, illumut ilumut sipaarniartariaqavikkatta. Naalakkersuisut nalunaarusiaanni oqaatigineqarpoq, sipaarniutinik nutaanik nassaanngikkaanni taava akileraarutit imaluunniit akitsuutit qaffanniarlugit imaluunniit akitsuutit nutaat pilersinniarlugit.
Qaammatialunnguit matuma siornatigut qanormaanna Siumut qineqqusaarnermini oqarpaa. Aamma qanormaanna Naalakkersuisoqatigiinnissap isumaqatigiissutaasup oqallisigineqaleruttorfiani uppernarsaava. Takkua puiorneqareerneramik. Ila eqqumiissaqaaq persuarsiutaallunilu aaversuarmik iisiniarnissaq.
Naggataatigut Atassutip erseqqissassavaa Naalakkersuisut aningaasaqarnikkut ingerlatsineq pillugu nassuiaataanni qulequttat aalajangersimasut ukioq 2000-imi aningaasanut inatsimmi ilaatinniarneqartut uterfigisarnissaat peqataaffigiumagamiuk, soorlu makkua taagorneqarput: Inuussutissarsiornermut, peqqinnissaqarfimmut, iluarsaassinissamut akileraartarnermullu tunngassuteqartut. Kisianni uanga maqaasivara apeqqutigissallugulu sooq, ilinniartitaaneq minnerunngitsumillu meeqqat atuarfiat Nunatsinnut pingaaruteqaqisoq qulequttatut mininneqarsimanersoq.
Taamatut oqaaseqarluta Atassummiit Nunatsinni aningaasaqarnikkut ingerlatsineq pillugu 1999-imi Naalakkersuisut nalunaarusiaat tusaatissatut tiguarput. Naalakkersuisut ingerlariaqqinnissaanni akisussaassuseqaqataanermik uppernassuseqartumillu periaaseqarluta malinnaaffigeqqissaassavarput.
Maliinannguaq Markussen Mĝlgaard, Inuit Ataqatigiit oqaaseqartuat:
Qujanaq, ukiuni makkunani Nunatta imminut napitikkiartuaarnissaanit pingaartitsilluta oqaluttarnitsinni pingaaruteqarluinnarpoq aningaasaqarnikkut ingerlanitta sukumiisumik ataatsimullu isigisumik nalilersoqqinnissaa.
Namminersornerulernitsinnit ukiut 20-t qaangiussimalerput piffissanngorporlu ukiut nutaat 2000-it iserfigilernerani nutaamik eqqarsarluni kinguaassatta inuiaqatiiinni aaqqissuussaanerisa ilusilersorluarnissaat ersarissumillu anguniagaqarluni ingerlanissaq. Inissisimanerput imaannaanngitsuuvoq Inatsisartunilu qinigaasimasugut Naalakkersuinermillu suliaqartugut ukiunut nutaasunut tunaartassanik tikkuussinissarput pisussaaffigaarput imaannaanngitsoq.
Naalakkersuisut aningaasaqarnikkut ingerlatsineq pillugu nassiuaataat maluginiarparput piviusut tunngavigalugit politikkikkullu aalajangigassat imaannanngitsut aallaavigalugit suliaasoq. Allaat naliligassat aalajangigassallu nuannerpallaanngitsut avaqqussinnaanngisagullu pineqarlutik.
Inuiaqatigiit aaqqissuussaanerani aningaasaqarnikkut ilisimatuunik siunnersortinik peqarpugut, aningaasaqarneq kisiat isigissagaanni assortorneqarsinnaanngitsunik. Illuatungaanili pisussaaffigaarput aningaasaqarneq kisiat isiginagu inuiaqatigiinnut sunniutissaat nalilersorluassallugit. Tassaniipporlu matumani nalilersuinissami inuiaqatigiinnut annernannginnerpaamik kinguneqartussamik aaqqiinissamik nalimmassaanissarput.
Inuit Ataqatigiinniit nalunaarusiami erseqqissumi oqaatigineqartoq una maluginiarparput, tassalu maannamut aningaasaqarnitta ingerlanera pitsaavallaanngitsoq, tassami Aningaasaqarnermut Naalakkersuisup, Naalakkersuisunngornerminiit inuiaqatigiinnut oqariartuutaa ersarissoq unaavoq: Isertitat ikiliartorput, illuatungaanilu ingerlatsinermut aningaasartuutit amerliartorlutik.
Uagut Inatsisartuni piumasaqaatigut aaqqittariaqakkatullu isigisagut amerlaqaat, peqqinnissamut, inissialiornermut, iluarsartuussinernut, isumaginninnermut minnerunngitsumillu ilinniartitaanermut. Peqqinnissaqarfiinnarlu eqqarsaatigissagaani maanna aningaasartuutit saniatigut 800 mio. kr.-inik aningaasaleeqqittariaqarpugut nunanut avannarlernut naleqqersuunniassagutta.
Naalakkersuisooqatigiit anguniagaat aningaasartuutikillisaaneq atugassarititaasunillu atorluaaniarneq, Inuit Ataqatigiinniillu nalunngilluinnarparput imaaliallaannaq aningaasarpassuarnik pissarsinaviarnata.
Taamaattumik pigeriikkatta sapinngisamik inuiaqatigiinnut annernannginnerpaamik kinguneqartumik atorluarnerunissaat anguniartariaqarparput. Iluatungaaniillu soorlu nalunaarusiami aamma oqaatigineqartoq, mianersuuttariaqagarput unaavoq piumasaqaatitta pisinnaasatsinnut naleqqussarnissaat. Tassalu ima piumasaqarnaversaassasugut allaat imaaliallaannaq angusinnaanngisatsinnik piumasaqassalluta, tamatumanilu pingaarnersiuinissaq avaqqunneqarsinnaanngilaq.
Unali erseqqismik oqaatigissavarput taamatut pingaarnersiuinermi aaqqissuusinissamilu aamma uagut nammineq misilittakkagut ilisimasagullu aallaaviusariaqarput, avataaniit siunnersortit kisiisa aallaviginagit. Ukiummi 20-t kingulliit qiviassagaanni kukkusarnerit aningaasaliisariaqartarnerillu nuanninngilluinnartut pisarsimapput.
Tamatumani Disko assersuutigiinnarsinnaavarput, avataaniit tikisitagut pikkorissorsuartullu isigisagut pakatsiffigiuarpagut. Soorunami tamarmik taamaanngikkaluarput, kukkunerilli imaannaanngippallaaqaat. Taamami akulikitsigisunik annertutigisunillu kukkusarnissatsinnut akissaqanngilagut.
Ingerlariaqqinnissami akisussaaffik maanna Inatsisartuniillunilu Naalakkersuisuniippoq tamannalu avaqqussinnaanngilarput. Taamaattumik kukkunerit ilinniarfigalugit ingerlaqqittariaqarpugut, tamatuminngami inuiaqatigiit pisussaaffilerpaatigut.
Nalunaarusiami tikkuussutaasut ersarissut Inuit Ataqatiiinniillu pingaartutut isigisatta ilagaat tassa Inatsisartuni sulinitsinni sapinngisami uugaannaq isiginata pilersaarusiornissarput. Tamatumanilu uagut Inatsisartut Naalakkersuisullumi apeqqutaalluinnarpugut. Pinaveersaartariaqakkattami ilagaat, ataatsimiinnermiit ataatsimiinnermut aningaasarpassuarnik nalilinnik allannguutissanik siunnersuuteqartuarnissaq. Tamakku aningaasanut inatsit suliarineqarnerani pisariaqarput, maanaannaq pinnatik.
Aningaasaqarnikkut ingerlatsineq pillugu Naalakkersuisut nassuiaataanni assigiimmik akeqartitsineq iserfigineqarpoq, Inuit Ataqatigiinniillu tamatumap saqqummiuteqqaarneranili ilusaa akerlerisimavarput, isumaqaratta kingunissai imaannaanngitsuusut, aarleqqutigilluinnaratsigumi taama eqiterinermik ullumikkut nipaatsumik ingerlanneqartumit suli annertusisitsissasoq.
Matumani Inuit Ataqatigiinniit erseqqissumik oqaatigissavarput nutaamik eqqarsarneq sunaluunniit akerlerinnginnatsigu, aaqqissuussinissalli kingunissai tamualluaqqaarlugit ilusaatalu qanoq ittuunissaa qulaajaqqaarlugu pisut ingerlasariaqarmata. Inuit Ataqatigiinniit nassuiaammi oqaatigineqartoq, nuannaarutigisarput unaavoq, nutaamik aaqqissuusinissamik eqqarsaatersuutini oqaatigineqarmat inuutissarsiutit pitsaasumik ineriartortinneqarnerat ikorfartorneqarsinnaasoq aaqqissuussaanerup naleqqussarneratigut, qitiusumiillu aaqutsinnginnerulernikkut tamatumuuna inuiaqatigiinni sanngiinnerpaat eqqunngikkaluarlugit.
Aaqqissuussinissamilu eqqarsaatersuutigineqartoq soorlu illoqarfinni annerusunit inigisat akiisa illoqarfinni avinngarusimanerusunut naleqqiullugu qaffasinnerunissaanik eqqarsarnerup kingunissaasa iluamik Inuit Ataqatigiinniit kaammattuutigissavarput. Nassuiaammimi tassunga taarsiullugu avanngarusimanerusunut assartuinikkut akit qaffasinnerunissaat takorloorneqarmat. Tamatumanimi aviinngarusimanerusuni inuutissarsiutitigut ineriartortitsineq taava eqqorneqassannginnerpoq.
Inuit Ataqatigiinniillu nuannaarutigaarput Naalakkersuisut assigiimmik akeqartitsinerup atorunnaartinnissaa imaaliallaannaq pilersaarutiginngimmassuk, aaqqissuussinissanili kingunissai misissorluaqqaarniarmatigit.
Unalu erseqqissumik oqaatigissavarput maannamut takusinnaasagut malillugit inuiaqatigiit nammaqatigiissut ingerlannerutsigit nalimmassaasarnerit, assigiimmillu akeqartitsinerit imaaliallaannaq peerneqarsinnaanngilaq. Siunissarli eqqarsaatigalugu pisariaqavissutitut isigaarput assigiimmik akeqartitsinnerup peerneqarnissaat kisiat aaqqiissutissatut isiginagu aamma periarfissaasinnaasunit aqqutissanillu allanit ujartuinissaq pisariaqarluinnarmat. Tamannalu Naalakkersuisunut eqqarsaatigillaqquarput.
Aalisarneq inuutissarsiutit pingaarnersaraat matumanilu nassuiaammi Inuit Ataqatigiinniit maluginiarparput raajarniarneq ullumernit suli annertunerusumik imminut akilersinnaassappat aningaasanillu isertitsiviussappat avataaniit kilisaatit annertusartariaqartut, nunami suliffissuit ikilisarlugit.
Soorunami aalisarnerinnaq eqqarsaatigalugu tamatumap akilersinnaanerunera assortorsinnaanngilarput, illuatungaanilu naatsorsorneqarsimanerpoq nunami suliffissat aningaasarsiornerlu eqqarsaatigalugit tamanna qanoq kinguneqassanersoq. Taamatummi aaqqiiniarnerni raajaleriffinni sulisut kisimik eqqorneqaratik tulaassuiffiusuni suliffiit allat soorlu: Angallatinik iluarsaasartut, orsussaarniarfiit, pisiniarfiit assigisaallu kaaviiaartitsinermikkut tamarmik eqqorneqartussaapput.
Taamaattumik Inuit Ataqatigiinniit taamatut eqqarsaatersornerit imaaliallaannaq akuersaarsinnaanngilagut illuatungaanit taartissanik takorluuisoqanngippat. Maannamullu kaammattuutigissavarput Royal Greenlandip naleqqussaaneranut atasumik nalilersueqqinnissaq, tamannalumi eqqumaffigineqartoq Aningaasaqarnermut Naalakkersuisup aammalumi Aalisarnermut Naalakkersuisup ataatsimiinnermi matumani erseqqissumik oqaatigaat.
Tamannalumi Naalakkersuisooqatigiit isumaqatigiissutaannut naleqquppoq, ilaatigut allassimasoqarmat imatut: Raajartassat avataasiortunut siunerissamilu qanittumi raajarnianut agguaanneqartarnerat nutaamik ilanngullugu naliliiffigineqassasoq. Inuit Ataqatigiinniillu taamatut nalersuinermi ilannguteqqussavagut Nunatta avataani suliffissuit pisiariortorneqarsimasut ingerlanerisa ilanngunneqarnissaat.
Royal Greenlandip ingerlatsineranut tamakku suliffissuit qanoq sunniuteqarpat ? Iluanaarutaasumik ingerlappat imaluunniit amigartoorutaappat? Namminersornerullutillu Oqartussat piginnittutut attartugarpassuit eqqasaatigalugit aallerinartutut inississimasoqannginnarsoq. Ilumut aalisarneq eqqarsaatigalugu Nunatta aningaasaqarnerata ilorraap tungaanut aallarnissaanut Nunatsinni suliffissuit ikilisarnissaat kisimi aqqutissatuaanerpoq.
Siusinnerusukkumi soorlu oqaatigereeripput aktieselskabit Namminersornerullutik Oqartussat pigasaasa nakkutigisinnaanngisatsinnik amigartoorujussuartarneri inuiaqatigiinnut aningaasatigut annertuumik tuttartut pinaveersaaluinnartariaqarpagut.
Inuiaqatigiit maannamut killiffitsinni Inuit Ataqatigiinniit oqaatigiuarsimavarput ukiuni makkunani piffissaanngortoq ilinniartitaanermut politikkip ersarissumik anguniagallip pilersinnissaa,1998-imi Nunatsinni suliffissaaleqisut 11,3 %-put taakkunannga 80 %-t ilinniarsimasuunatik. Ilungersunarluinnartullu ilagaat ilinniagaqarlutik aallartittartut maangaanna unitsitsisartut amerlavallaarujussuarneri, tamakkulumi kingunerisarpaat aningaasanik atulussinnaanerpassuit, ilaatigut ilinniartut kisimik pisuussutiginngisaat. Tamatumanilu inissaqarniarnerit meeqqanillu paaqqinnittarfissanik amigaateqarnerit apeqqutaaqataalluinnarput, taassumalu saniatigut minnerunngitsumik meeqqat atuarfianni naammassisat ingerlaqqinnissamut naleqquttannginneri.
Taamaattumik Inuit Ataqatigiinninngaaniit isumaqarpugut tamakku akiorniassagutsigit erseqqissumik pilersaarusiorluakkamillu anguniagaqarnissaq pisariaqartoq, tamatumanilu pinngitsoorsinnaanngilaq, ilinniakkanik pisariaqarteqisatsinnik soorlu peqqinnissaqarfik sanaartornermilu ilinniarsimasut eqqarsaatigalugit ilinniartitaanermi pingaarnersiuinissaq. Pisariaqarteqisagut ilinniartitaanikkut annertuumik sulissutigisariaqarpagut ilinniartuutigut suliffissaaleqisussanngorlugit aningaasarpassuit atorlugit ilinniartissanngikkutsigit.
Taassuma saniatigut oqaatigineqartarpoq ilinniartitaanikkut nunarsuarmi torraanerpaamik aaqqussuussisimasugut, ilinniartunik akissarsiaqartitsisarnitsigut. Maannali nunani allani qaffasinnerusumik ilinniartitarpassuatta ilumut Nunatsinnut uterlutik sulilernissaat naluarput. Taamaattumik tamatumap erseqqissumik paasiniarnissaa pisariaqarsoraarput, taamaattoqassappammi ukiorpassuarni ilinniartunut akissarsiaritittakkagut maangaannartutut ittuassapput. Illuatungaanilu naleqangaartunik tikisitsiortortariaqassalluta.
Ilumut ajornartorsiut tamanna isiginngitsuusaaginnassavarput imaluunniit piumasaqarnerusariaqalinnginnerpugut. Qanoq iliuuseqanngikkuttami imminut pilersornerput qaqugumita angussavarput, assersuutigalugu nakorsarpassuit juumoorpaassuillu amigaatigaagut, sumut iluaqutaassava taamannanik ilinniartitsigutta taakkulu nunanut allanut uniinnartassappata. Tamanna partiinut allanut eqqarsaatigillaqquarput.
Ilinniartitaanerit ataatsimut isigalugit maanaannaq unitsitsisarnerit angummanniapiloortarnerillu eqqarsaatigalugit meeqqat atuarfiata nukittorsartuarnissaa avaqqunneqarsinnaanngilaq. Meeqqat pilersittariaqarpagut imminnut tatigisut inuiaassutsiminnik ataqqinnittut sulillu ajornartorsiutinik inuunerup perluinut nalaataqarnermi imaaliallaannerlutik tunniutiinnarneq ajortut. Taamatullu inuttut piginnaanngorsarneq atuarfinni kisitinermi ilinniarnitulli pingaartillugu sammineqartariaqalerpoq.
Aningaasatigut atorluaanerunissaq eqqarsaatigalugu Naalakkersuisut tikkuarsimavaat, inuutissarsiutinik siuarsaaniarluni tapiisarnermi periutsit misissornissaat allanngortiternissaallu, tamannalu Inuit Ataqatigiinniit isumaqatigilluinnarparput. Namminersornerullutilli Oqartussat pilermata aningaasarpassuit inuutissarsiutinik siuarsaanermut atorsimapput, sulilu atorlutik. Taakkununngali maannamut angusat sanilliutissagaani suunngippallaaqaat, uagullu Nunatsinni imminut pilersornitsinnit annertunerusumik sunniuteqarsimanatik.
Soorunami Inuit Ataqatigiinniit oqarnianngilagut taamatut tapiisarnerit tamarmik iluatsissimanngitsut, iluaqutaasarsimapput kisianni amerlavallaaqaat kinguneqarneq ajortut piffissamilu sivikittuinnarmi siunniuteqartartut. Inuit Ataqatigiinniillu isumaqarpugut aammalu oqaatigisarlugu, oqaatigeqqittuassallugulumi, uagut kalaallit niuernerup inuutissarsiutinilllu ingerlatsinerup tungaatigut ilisimasaqanngippallaarpugut. Allaneersunit isumalluuteqarpallaarpugut piffissanngorporlu tamatumap aaqqiiviginissaanut pimoorussilluta iliuuseqarnissarput.
Naliginnaasumik ilinniartitsinerit maanna ingerlanneqartut saniatigut atuarfinni pikkorissaanerit inuiaqatigiinnilu qaammarsaanerit ingerlanneqartariaqarput, kalaalerpassuuppummi Nunatta pissarititai atorlugit pilersitsisinnaanermik isumassarsiaqartartut, naliginnaasumillu toqqammaviusumit aallartisarnermi qanoq iluuseqarnissamik ilisimasaqanngitsut.
Tamakku qaangerniassagutsigit annermik maanna pioreersut atorlugit soorlu Sulisa imaluunniit Niuernermik Ilinniarfigut kommunit atuarfiillu suleqatigalugit niuernerup tungaatigut pikkorissaanerit ingerlanneqartariaqarput. Tamakku pisinnaapput sumiiffiit tikillugit suliffissaaleqinerup nalaani suliffissaaleqisunut imaluunniit soqutiginnittunik allanik pikkorissaasarnikkut. Pikkorissaaginnarani tunngaviusumik pilersitsiniarnerit aamma taamaalillutik malinnaavigineqartassagaluarput.
Taamaalillunissaaq ullumikkutut assersuutigalugu suliffisaqartitsiniarneq eqqarsaatigalugu aningaasarpassuit atortakkagut piffissaq sivikittuinnaq kimeqaratik ataavartunik suliffinnik pilersinnissamut tunngaviliissagaluarput.
Ukiuni kingullerni sunilluunniit aallartitsiniarnerni angisoorsuarnik eqqarsaneq qimallugu naqqaniit mikisunnguaniillu aallartitsisarnerit aallunneqarnerusariaqalerput. Tamatumanilu innuttaasut, kommunit qinikkallu allat suleqatigilluarnissaat avaqqunneqarsinnaanngilaq.
Qimattariaqarpoq imminut pilersorniarnitsinni kommunini immikkoorluni immunut unammillerluni ingerlaniarneq. Nunarsuarmimi taama avinngarussimatigisumi allanullu nalleqqiullugu inukitsigisumi inuutissarsiutitigut pilersitsiniarnermi imminut qalleraalluni unammillunilu ingerlaniarneq nukinik aningaasanillu atulussinnaanermik kinguneqartarpoq. Nunap immikkoortuini kommunit Sulisap Namminersornerullutik Oqartussat suleqatigiissutaanik inuutissarsiornermut siuarsaaqatigiiffimmit imaluunniit siunnersuisoqatigiiffimmik pilersitsinikkut imminut naalleraagani kaammattoqatigiillunili ineriartortitsinissat aallaviusariaqarput.
Tamatumanilu Inatsisartut inuutissarsiutitigut siuarsaanermut aningaasaliissutigisartagaasa nalilersoqqinneranni ilaasa tamakkununnga atorsinnaanissaat ammaffigineqartariaqarpoq.
Ullutsinni kommunini inuutissarsiutitigut siunnersortaasartut kiserliortutut inissisimasarput. Suleqatigiinneruneq aqqutigalugu immersoqatigiinnikkut ikorfartoqatigiinnikkullu angusat ineriartortitallu amerlanerunissaat avaqqunneqarsinnaanngilaq.
Inuit Ataqatigiinniit kaammattuutigerusupparput taamatut suleqatigiinnermik aallarnisartut Naalakkersuisunit eqqumaffigillugillu kaammattoqqullugit, maannami piffissanngorpoq suna tamarmi qulaaniit aalajangersorneqarani avataanilu utaqqiinnartoqarani kommunit innuttaasullu tikillugit kimilimmik kingunilimmillu ineriartortitsinissaq.
Nuka A/S tamatta isumalluarfigeqaarput kissaatigeqaarpullu nunaqarfippassuatta inuutissarsiutitigut siuarsaaffigineqarnissaanut oqaluinnarani takussaasunik ineriartortitaqartoqalernissaa, utaqqineq naammalerpoq, Nuka A/S-illu ilorraap tungaanut aallarnissaa pingaarteqigatsigut Inuit Ataqatigiinniit kaammattuutigissavarput Naalakkersuisut akimmiffissanik ingalassimaartitsiumaartut, sinerissamimi pisuussuterpassuatta innuttaasullu sulerisussuseqarluartut utaqqiinnartut atorluarneqarnissaat oqamiiginnarani piviusunngortariaqalerpoq.
Mannalu iluatsillugu Inuit Ataqatigiinniit QTKS-ip, tassa Qeqertarsuup Tunuani Kommunit Suleqatigiiffiata saaffiginnissutaa, ilumut Nuka A/S Nuummi allaffeqartariaqarnersoq Naalakkersuisunut isummerfigillaqquarput.
Siunissami aningaasatigut ilorraap tungaanut ingerlarniarnissami apeqqutit pingaaruteqarluartut ilaagaat, maannamut illoqarfinni aalajangersimasuni eqiterisitsinerujussuaq. Inissaaleqinerusujussuarmit, meeqqanut paaqqinnittarfissaaleqinernit, atuarfinnillu tattoqisaannermik annertuumik kinguneqartoq isiginngitsuusaaginnarsinnaajunnaarparput.
Ilisimatuut oqarnerattuut eqiterineq aningaasartuutikillisaaneruvoq, maannali illoqarfinni aalajangersimasuni amigaataaginnartulluunniit eqqarsaatigalugit piumasaqaatit tamaasa naammassiniassagutsigit aningaasarpassuarnik naleqarput. Uffa massa illuatungaani illoqarfiit ilaanni inissiarpassuit illorpassuillu inoqaratik naparliinnartut. Massa blokkersuit ilivitsut atorneqanngimmata ingutserniarneqartut.
Taamatut ineriartortitsineq pitsaasutut taaneqarsinnaanngilaq. Taamaattumik Naalakkersuisunngortitsinermi isumaqatigiissutip Inuit Ataqatigiinniillu iluarisimaakkatta anguniarnissaanik Naalakkersuisut pimoorussinissaat kaammatuutigerusupparput, isumaqatigiissummimi ima allassimammat, "Pisortat ingerlatsiviisa sinerissamut nuunneqarnissaat nalilersoqqittariaqarpoq, inissaaleqineq il.il. patsisigalugit".
Aningaasaqarnermut nalunaarusiaq tamatta takusinnaasarput, inuiaqatigiinni killiffitsinni imaannaanngitsumik inissisimavugut. Oqaannarsinnaanngilagut una unalu aningaasaliiffigissavarput, piffissanngorpoq nalilersuilluaqqaarnissarput, tamatumani ilinniartitaaneq, sanaartorneq, peqqinnissaqarfik, isumaginninnermi ataatsimiititarsuup suliassiissutai tamatta aaqqiivigerusoqisagut eqqarsaatigalugit.
Inuit Ataqatigiinniit Inatsisartunut kaammattuutigissavarput, eqqarsaatigilluaqqullugu, aningaasaliivigisariaqagarpassuatsinni suminngaanniit tigussanerigut eqqarsaatigilluaqqullugit. Inuiqatigiit atugassamikkut isertitamikkullu assigiinngilluinnaqisut inuuffigaagut, Inuit Ataqatigiinniillu oqartuarsimavugut pissaqarnerusut pilliuteqarnerulaartariaqalersut, soorlu nunani aallani avannarlerni naleqqissuuffigisartakkatsinni qangaaniilli taama periuseqartoqareersoq. Taakkumi taamaasiorsimagaluartut ineriartornerat unigani ingerlaavarsinnarpoq.
Inuiaqatigiit ataatsimut isigalugit imminut napatissinnaalernissatta sulissutiginissaa aatsaat taama pisariaqartigaaq. Taamaattumik Inuit Ataqatigiinniit nalunngikkaluarlugu Qallunaat Nunaanniit aningaasaliissutaasartut imaaliallaannaq peersinnaanagit, qaqugorsuarmut allanik isumalluuteqartuarnissarput kissaatiginngilarput.
Taamaattumik ersarissumik anguniagaqarluta pilersaarusiornissaq pisariaqalerpoq, paasisariaqalerparput aqqut suna atortariaqarnerlugu, ilinniartitaanikkut, inuussutissarsiornikkut, aningaasarsiornikkut, aalisarnikkut peqqinnissakkut, aatsitassarsiornikkut. Ilami ataatsimut tamaat isigalugu ersarissumik najoqqutassagut suussanersut ersarissartariaqalerpagut.
Taamaattumik aammaarluta inuiaqatigiit ataatsimut isigalugit misissuisoqarlunilu ilusissanik Inatsisartunut inuiaqatigiinnullumi tamanut oqallisissamik suliakkiisoqartariaqalerpoq. Tamannalu Naalakkersuisunut suliakkiissutigaarput.
Qutsatigaavut ilumoorlutik imminullu tunniusimallutik Nunatsinni sullissiumasoqartuarmat. Tamakkuli naammanngillat, angusaqarluassagutta inuttut immitsinnut suli annertunerusumik piumaffigisariaqalerpugut. Silarsuaarannguarput imminuinnarlu eqqarsaatigineq qimallugu, utaqqiinnarneq naammagittaalliorusaarnerlu peertariaqarpoq.
Eqqarsarneq allap aaqqikkumaarpaanik qimallugu akisussaaffimmik inuttut ataasiakkaatut tigusinissaq pisariaqarluinnarpoq. Nunatta kinguaassattalu ilorraap tungaanut ingerlanissaat angussagutsigu. Tamannalumi inuiaqatititsinnut tamanut ukiumi 2000-imi isertussanut neriuutigaarput, anguniagassatut sulissutissatullu siunniunneqarumaartoq.
Taamatut oqaaseqarluta naggasiullugu apeqqutigerusupparput, pissusissamisuunnginnersoq aningaasaqarnermut politikki siunissami Aningaasaqarnermik Naalakkersuisumit saqqummiunneqartarpat. Inuit Ataqatigiinniillu oqaatigissavarput, Naalakkersuisut sulianut imaannaanngitsunut suleqatigissallugit immersortuassallugillu piareersimagatta. Qujanaq.
Mogens Klesti, Kattusseqatigiit oqaaseqartuat:
Naalakkersuisut Siulittaasuata oqaasiinut Kattusseqatigiinniit naatsumik imatut oqaaseqaateqarusuppugut.
Nunatta aningaasatigut ingerlanernera taamatut ingerlaannassappat maannakkumiit aappaagumut aningaasanik missingersuusiornissami sukaterisariaqarpugut. Taamatummi ukiut tamaasa amigartooruteqarluta ingerlasassagutta, aningaasat tigoriaannaat ukiut tallimat ingerlaneranni nungussimassapput.
Sukumiisumik aningaasatigut aqutsineq Kattusseqatigiinniit innersuutigerusupparput, Inatsisartunit tamanit suleqatigiinnikkut. Maannakkummi aningaasaqarnitsinnut tunngatillugu avataanit malinnaaffigineqarnerput eqqaamassavarput. OECD-p nalunaarusiaani taakkartorneqartut arlaliupput aaqqiissutaasinnaasut. Eqqaamassavarpulli uagut nammineerluta aningaasaqarnerput aaqqinniartariaqaratsigu, aammalu Nunatsinnut naleqquttumik aaqqiisariaqarluta.
Oqaatigissavarpullu Kattusseqatigiinniit, OECD-p nalunaarutaani siunnersuutit arlalissuit Nunatsinni atorneqarsinnaanngimmata. Nunarpummi nunanut allanut sanilliutissalugu ajornakusoortuuvoq, angissutsi, siammasinneralu pissutaallutik, aammalumi sikusartuulluni piffissami annertuumi.
Taakkartorneqarsinnaasut amerlagaluaqaat, aningaasaqarnitsinnut tunngatillugu. Oqaatigissavarpulli Namminersornerullutik Oqartussat selskabiisa aningaasatigut inissisimanerat sukumiisumik aaqqiivisariaqarmata, aammalu Namminersornerullutik Oqartussat, selskabit aningaasatigut attartorneri qularnaveeqqusiisarnerat aaqqivigineqartariaqarmata.
Siunissami sanaartornikkut aaqqissugassat aningaasarpassuarnik nalillit peqqissaartumik aaqqinneqarnissaat Kattusseqatigiinniit inassutigerusupparput. Tapiissutitut aningaasat atorneqartartut inuiaqatigiinnut pingaarutillit, siunissami sukumiisumik aaqqiivigineqarnissaat Inatsisartuuniik misissorneqartariaqarput.
Nalunngilarpummi ukiumut aningaasat ikinngitsut atorneqartarmata. Ilanngullugu oqaatigissavarput, Namminersornerullutik Oqartussat selskabiisa sinneqartoorutaannit landskarsi tunineqartariaqarmat.
Ukiup ingerlanerani aningaasatigut tapiisarnerit siunissami aaqqinneqartariaqarput, nalinginnaasunngorsimavormi kukkunikkut aningaasarpassuarnik nalillit inuiaqatigiit akilertarmatigit. Taamaattumik tillĉgsbevillingip siunissami ataasiinnanngortinneqarnissaa innersuutigerusupparput, aammalu suliffeqarfiit aningaasatigut ingerlanerat sukumiisumik malinnaavigineqartariaqartoq.
Taakkartugassat amerlagaluaqaat, Kattusseqatigiinniilli naatsumik taamatut oqaaseqarluta, Naalakkersuisut Siulittaasuata oqaasii tusaatissatut tiguagut. Eqqaamassavarpulli kingullermeerluta aningaasanut tunngasunik oqaaseqannginnatta, aaqqitassammi annertoqaat. Tamattali suleqatigiilluta pitsaanerpaaq anguniarsinnaagatsigu. Qujanaq.
Ataatsimiinnermi aqutsisoq: Johan Lund Olsen, Inatsisartut Siulittaasuat:
Per Rosing-Petersen, kisimiilluni qinigaasoq:
Qujanaq, uanga killilimmik
inuussutissarsiornermut tunnganerusunik oqaaseqarusuppunga, imaattunik:
Qanittukkut Naalakkersuisut
agguaatippaat aningaasaqarniarnikkut ingerlatsineq pillugu nassuiaat.
Nassuiaataallu tunngavigalugu killilimmik inuussutissarsiornermut
samminerusumik imatut oqaaseqassuunga:
Nakorsaq nunarsuarmi
oqaluttuarisaanermi nutaajunerusumik tusaamasaasoq, 1960-ikkunnili toqutaasup
oqaaserisimasaanik imatut issuaaviginnilaassuunga, issuaaneq aallartippoq,
"oqaatsit timitaliinermik malitseqanngitsut suussuseqanngillat",
issuaaneq naavoq.
Nassuiaat aallaqqaaserneqarpoq
Nunatsinni Namminersornerulersimanerup ukiuni 20-ini atasimaneranik.
Naalakkersuisut Siulittaasuata sunarpiaq tunngavigineraa nalugaluarlugu
niviarsiamut Namminersornerulersimanerput assersuuttuartarpaa. Tamatta
nalunngilarput inut arnaappat, angutaappat niviarsiannguugaluarpalluunniit
18-inik ukioqaleraangami inersimasut akornannut isertutut nalilerneqartarpoq.
Taanna oqariartaaseq,
ungaluusalerlugu terminologi tunngavigiinnassagutsigu taava eqqumiiginarpoq,
sooq akisussaaffiup inerisimanerullu tungaatigut niviarsiaq naalakkersuinikkut
suli apersortissimanngitsutut nikorfatinneqaannassappat.
Taamatut aallaqqaaseereerlunga
imarisaata ilaa imatut oqaaseqarfigissavara:
Aallaqqaasiummi anguniakkat
taakkartukkat imatut isorinartoqanngillat, tamakkuami uagut qangali
nilliaatiginikuugatsigit. Issuaaneq aallartippoq, "unammilleqatigiinneq
suliffeqarfiup ineriartortinnissaanut kajumissaataasarpoq, il. il.",
issuaaneq naavoq.
Anguniakkallu allat kusanartut
taakkartorneqarput Nunatsinni inuiaat kalaallit ulluinnarni inuunitsinni
oqinnerusumik inuulernissatsinnut tunngaviliisussat. Tamakkua imannak
isornartoqanngillat, kisiannili qanoq taakkua anguneqarnissai iliuuseriniakkat
Naalakkersuisut tungaaninngaaniit ernumanartortaqarput.
Ersarissumik nassuerutaavoq ukiuni
kingullerni aningaasartuutit isertitatut naleqqiullugit amerliartorpallaarsimanerat,
1998-iinnarmimi aningaasartuutit 212 mio. kr.-inik amerleriarsimapput.
Siunissamilu qaninnermi arlaannik iliuuseqartoqanngippat taamaaginnarnissaa
naatsorsuutigineqartariaqarluni. Illuatungaani aningaasat Nunatta karsiata
isertitaasa malunnaatilimmik ilorraap tungaanut nikiallassinnaanissaannut
ilimanartoqarani.
Taamaattumik tunngavissaqarluarpugut
ataatigut naqillugu, aningaasartuutit nalilersuiffigilluarneqarnissaannut.
Sumiuna annertuumik sipportumik atuisoqartoq. Taama aperininni immaqa tupaallaatigineqarnavianngilaq
nangillunga eqqaagukku, Nunatsinni allaffissornerujussuaq.
Nunatta aningaasaqarnermi
inissisimanerata pinngitsoorsinnaajunnaarsippaa, allaffissornikkut nutaamik
aaqqiinialernissatsinnik. Tassami Namminersornerullutik Oqartussani kommuninilu
milliarti ataaseq angullugu inuiannguit 55.000-iinnaalluta atortaratsigit,
tamannalu aaqqittariaqarpoq.
Tulliullugulu piginneqatigiiffinnut
tapertat, ungaluusalerlugu assersuutigalugu suli, marloqiusanik angallannikkut
ingerlatsisoqarpoq, tamarmillu taamarsuaq tapisiaqartinneqarlutik,
akileraartartunit akileraarutinik akitsuutinillu ĝremik ataasinnguamilluunniit
piumasaqannginnitsinni.
Aningaasartuutinilu aamma
tulleriiaarineq nalilersortariaqarpoq, soorlu ukiorpassuarni meeqqat atuarfiat
tulleriiaarinermi appasippallaartumut inissinneqarsimavoq, meeqqat siunissatut
taakkartorniartillugit. Tamanna akuersaarneqarsinnaajunnaarpoq, soorluluuna
aamma aatsaat nunami allamiunik tamakku ajornartorsiutit taakkartorneqaleraangata,
soorlu OECD-p nalunaarusiaani, pimoorullugu isiginiarneqalersartoq. Ataguli
akornatsinni sissueqqusilluni nilliasartut maluginiarnerulaarniartigit, asuli
siutisi nunami allamiuinnarnut tusaatinnagit.
Inuussutissarsiutit pillugit
siornaak saqqummiussaqarpunga annertuumik oqallititsisumik, ilaatigullu
kinguneqartumik nutaamik nalilersuisussamik ataatsimiititaliamik
pilersitsisoqarmat, Enoksenip ataatsimiititaliaanik taallugu.
Tassami tassani ujartorsimavara
kalaallip inuussutissarsiornermi inissimanera, aammalu kikkut eqqarsartaasaat
tunngavigalugit ineriartortitsisoqarnersoq. Imaakkamimi manna tikillugu suli
danskit eqqarsartaasat tunngavigalugu ineriartortitsisoqarmat,
aningaasaniinnanngitsoq aammali misilittakkani annertuumik Nunatsinniit aniatitsinermik
kinguneqartumik.
Pimoorullugulu
timitalerneqartariaqalerpoq kalaallip immikkuullarissusaa, eqqarsartaasialu
tunngavigalugu ineriartorneq aallartippat, aatsaat taamaasigutta ineriartorneq
Nunatsinni sorlalik siunissarlu eqqarsaatigalugu misilittakkanik
Nunatsinniititsinermik kingunilik aallartissammat.
Taamaattumik aamma
ernumanarluinnarpoq, Naalakkersuisut nassuiaammi nalunaaruteqarmata,
sanaartornermi akit apparsarniarluginngooq suli amerlanerusunik nunani
allamiunik piginneqatigiiffinnik isaatitsisariaqartugut. Naaguna inuk kalaaleq
qitiutillugu ineriartortitsineq. Suli massakkuminngaanniit annerusumik kalaaleq
isiginnaartuunerulissooq, nunami nammineq ineriartortinneqarneranut.
Uanga isinni ineriartorneq
ilumoortoq tassaavoq, kalaallip nunani nammineq ineriartortippagu, soorlu
assersuutigalugu danskit aamma nammineq taamaasisimasut, taamaattumik
kukkunerusinnaanngilaq taamannak eqqarsarneq, neriuuteqarpoq.
Pissutsit
artornarsivallaannginneranni pisariaqarsorinarpoq ineriartornerup
unikaallatsinnissaanut, taamaasillutami aamma kalaaleq nunami nammineq
ineriartornermi katataasimasoq angummatsilersinnaagaluarparput. Taamatut
killilimmik nassuiaammik oqaaseqareerlunga nassuiaat tamarmiutillugu
nangaanertalimmik tusaatissatut tiguara.
Jonathan Motzfeldt, Naalakkersuisut Siulittaasuat:
Nuannaarutigaa taama
annertutigisumik manna aningaasaqarnikkut ingerlatsineq pillugu nassuiaat
oqaaseqarfigineqarmat. Aamma paasinarpoq Inatsisartut nutaat
soqutigilluinnaraat, aningaasarsiornikkut ingerlanitta oqallisigineqarnissaa,
oqallisigilluarneqarnissaalu.
Partiit tamarmik saniatigut aamma
Kattusseqatigiit taavalu aamma ataaseq kisimiilluni qinigassanngortittoq, Per
Rosing-Petersenip, tamarmik oqaaserisamikkut ersersippaat, soqutigineqartoq
aningaasarsiornikkut ingerlatsinitta siammasinnerusumik oqallisigineqarnissaa,
taamalu aamma taassuma saniatigut eqqarsaatit saqqummerartut takutippaat, aamma
iliuusissanik tuniserusuttoqartoq, Naalakkersuisut tigusinnaasaannik.
Siumuminngaanniit oqaatigineqartut
oqaaseqartuanit, Jĝrgen Wĉver Johanseniminngaanniit, oqaatigineqartut
arlalipparujussuit Naalakkersuisut sulinerminni misissoqqitassaannik
innersuussutigineqarput.
Tamatumani takuneqarsinnaapput
ilaatigut tikkuarneqarmat Kangerlussuarmi nassatanik assartuinermi silarsuup
tamaat ataatsimut kaaviffiunera, Amerikamiit Europamut assersuutigiinnarlugu,
akunnaatsumik inissisimaneq pillugu nassatanik allanillu pisariaqartunik
tigusillunilu nassiussuiffigineqarsinnaanera akunniffittut
misissorneqarsinnaanersoq.
Taanna misissorneqarpoq, kisiannili
aamma pisariaqarpoq ilanngullugu eqqaamassallugu, Kangerlussuup siunissaanik
oqallinnerput erseqqissumik aamma isummerfigineqarsimanngilaq suli. Tassani
maannamut isummerfigisassanut ilaatinneqarmata sinerissami, ilaatigut Nuummit
immaqaluunnit allami Atlantiku ikaarlugu assartuinermut qitiusussamik
mittarfimmik sumi aalajangiisoqassanersoq. Tamatumani Nuuk ilaatigut
taaneqareersimavoq, ilaatigut mittarfiit allat aamma taaneqartarsimallutik.
Kisianni apeqqut taanna
soqutiginartoq, Kangerlussuugaluarpat imaluunniit illoqarfik alla tassani
piukkunnarnerussagaluarpat aamma mittarfimmik alliliinissamut, apeqqutit taakku
taamaattut tikinneqarsinnaalluarput. Silaannakkut assartuinermi taamatut
akunnaatsumik unammileqatigiinnermut inissiinikkut Nunatta
neqerooruteqarsinnaanera.
Namminersortunit tigusinissaq, Royal
Artic Bygdeservicemi allanilu, aamma tassani taannaannaanngitsoq
oqaatigissavara, KNI-p aamma privatinut tunniunneqarnissaanik eqqarsaatit
maannakkut qanilliartormata, aammalu eqqarsaatigisariaqarlutik. Tassani aamma
periarfissat soqutiginarmata, takorlooruminartippakka oqallisigisassanut
ukiuni aggersuni aamma ilaatissallugit.
Taamatut aamma oqaatigerusuppara
Nunatsinni ingerlatsinerni suniluunniit maannakkut ilaatigut Kangerlussuaq
aammalu allat taagaluarutsigilluunniit, Nunatsinni unammilleqatigiilluni
ingerlatsinernik saqquminerusunik ingerlatsilernissat maannakkut
tikkuartorneqarput.
Tupigusuutiginngilara Siumup aamma
Inuit Ataqatigiit oqaluttuannit, nalunaarummi uani taaneqarsimammat, raajanik
nioqquteqarnerup misissuifigineqarluni takutitai qanoq isikkoqartut maannakkut
takuneqarsinnaasut. Tassami erseqqissumik oqaatigineqarsimavoq avataani raajanik
aalisarneq tulaassuinngikkaluarluni ingerlanneqalissappat, tamanna
inuiaqatigiinnut aamma annertuumik aningaasatigut pissarsiffiusinnaasoq.
Taanna taamaalilluni nalunaarummi aamma issuarneqarsimammat, aamma
takuneqarsinnaalluni uppernarsaataavoq aamma taamatut
ingerlatsisoqarsinnaanera.
Kisianni manna tikillugu fabrikkit
ingerlatissagivut aammalu Nunatsinni suliffeqarnissaq siunertaralugu
ingerlatsissasugut, taanna aalajangiusimavarput, taannalu tunngavigalugu
Naalakkersuisut maannakkut ingerlatsipput.
Nuannaarutigilluinnarpara aamma
Siumup oqaluttuata allallu oqaatigimmassuk, aamma taanna oqaatigilaarlara,
ilaatigut Atassutip oqaaseqartuata Daniel Skifte maqaasimmagu, ilinniarnermut
tunngasunik oqaaseqaatit. Nalunaarusiami tassani saqqummiunneqartumi qupperneq
qullunaatut 35 - 36-milu takuneqarsinnaapput, meeqqat atuarfiat pillugu
oqaaseqaatit erseqqissut, aammalu tassani pisariaqartitanik aamma
nalunaajaanerit.
Kisianni una pivara, ilinniartunut,
inuusunnerusut eqqarsaatigalugit ilinniarnerminnilu namminneq soqutigisaminnik
qinigassaqarnerat eqqarsaatigalugu, kiffaanngissusermik anginerusumik
inuusuttut tunineqarnissaat oqaatigineqartoq, uanga isumaqatigisaraara aamma
inuk taanna, aamma nalunngilara siunnerfigineqartoq arlalinnit.
Imaalillugu aaqqiniarneqartoq,
ajunngilaq taamaalilluni ilinniarnissani inuusuttup qinerniarlugu, aamma
akilissavarput kisianni aamma nammineq qinigarimmagu taamaalillunilu aamma
sumiluunniit immaqa ilinniarfitta avataatigut anguniagaalluni, akilissavarput
kisianni aamma taama inuiaqatigiinnut akiligassani taava
taarsersinnaasariaqarpai.
Tamakkunatigut erseqqissumik
piumasaqaatitalimmik ilinniartunik piumasaqarnissaq isumaqarpunga eqqarsartaaserissallugu
tupinnartuunngitsoq. Piumasaqaatinik ilaqartariaqarpoq, uagut ilinniartuunerput
naak tikillugu ilinniarnitsinnut akiligassagut taarsersugassagut aamma
amerlaqaat, aamma maannakkumut taamaappoq.
Kisianni nalunngilarput ullumikkut aamma
aaqqissuussat ajunngitsut amerlaqisut, inuusuttunillu aamma atorluarneqarlutik.
Taanna qujanarpoq aamma taamaassaaq. Kisianni ilaatigut namminneq qinikkatik
sumiluunniit ilinniarfinni naammassisimasartik pillugu, taava aamma
ilinniarnerminnik periarfissinneqarnissaat namminneq taarserumaarlugu
taarsersuinermikkut, taanna periarfissaq isumaqarpunga oqallisigisariaqartoq.
Tamakkua uani atuakkami
tikkuarneqartut oqaaseqartunit arlalinnit aamma partiit oqaaseqartuinit, Jĝrgen
Wĉver Johansenimit aamma IA-minngaanniit oqaaseqartumit, Maliinannguup
Markussenip oqaaserisaanik oqaatigisat aamma isumaqatiginarput.
Tassa ilinniarnerminnik
unititsisarnerit Nunatsinniittut annertussusiat misissorumaneqarmat, aammalu
tassuunakkut qanoq ilinniartut maanaannaq unigatik ingerlaqqissinnaanerat aamma
paasiniartariaqaratsigu.
Nunatsinni ilinniartitaanermut
tunngatillugu aamma Daniel Skiftep taanna apeqqutit tikimmagu Atassumminngaanniit
oqaatigilaarlara, inuusuttunut ilinniaqqinnissaannut tunngasut
aaqqissuunneqarneranni aamma taakku aaqqissuuttariaqarput, pitsaanerusumik
isumalluarnarnerusumillu. Taassuma saniatigut meeqqat atuarfiat unittoorani
ingerlalluarluni, ilinniartitsissussaqarluni, aammalu atuarfik meeqqanut
najoruminartunik atuarfeqarluni ingerlanissaa, taanna akisussaaffitta aamma
angeqisup ilagaa.
Taannalu maannakkut kommunit
peqatigalugit suliassaq inerniarneqartoq qularutigissanngilarput, tassaniippoq
suleqatigiiffissaq kommunit aamma namminneq nammaqataaffissaat aningaasatigullu
aamma aviffigeqatigiinnermik isumaqatigiinniutissaq.
Selskabit pillugit oqaatigineqartut,
oqassaanga Diskop ajutoorneratigut aammalu pingaartumik taassuma siuliatigut
ajortumeertarnerit selskabeni eqqarsaatigalugit, ukiuni makkunani pitsaasumik
aallartinnerit, aallartittut angisuut taakkua, KNI aammallu Royal Greenlandip
tungaatigut, Tele aammalu oqaatigissavara, Nuuk Imeq ukioq manna taanna
akiliivoq, akiliiartorpoq nammineerluni iluanaarutiminik, maanga
Naalakkersuisunut, Naalakkersuisoqarfimmut, landskarsimut.
Taannalu ukioq manna aamma
akiliissuteqareermat eqqasitsissutigissavara Nuuk Imeq selskabinut ilaalluni
taanna akiliutissaminik naammassinnittarmat. Ilaasa aamma pilluaamminnik
aviffigeqatiginninnissaat inuiaqatigiinnut pinngitsoorani
naammassiniagassaavoq, maannakkut finanslovimi aaqqinniakkatsinni ilanngullugu
naammassiniagarput.
Tassunga ilanngullugu
oqaatigilaassavara aamma Atassutip oqaluttuanut ullumilu aamma finanslovemi
eqqartorneqartunut ilanngullugu, KNI-kkut iluarsaaqqinnermik aqquteqarneranni
taavalu qaqiniarneranni, nallavimminninngaanniit makinniarneranni
isumaqatigiissuteqarfigineqarsimammata ukiuni aalajangersimasuni
qaqiniarnissaminnut periarfissillugit, maannakkullu makimmata
napasinnaanngormata taava aviffigeqatiginninnissamik isumaqatiginiarnerat
najoqqutaralugu aappaguminngaanniit annertunerusumik periarfissinneqarnissaat
naatsorsuutigissavarput. Taanna aamma tassuunakkut naammassiniagaq kusanartumik
naammassiniarumaarparput.
Atassutip oqaaseqartuanut marlussuit
aamma taalaarusutakka uniffigilaarusuppakka. Tassa Atassut naalakkersuinikkut
aamma maani akisussaaqataajuarsimavoq, taanna nalunngilarput aammalu ukiuni
kingullerni aamma naalakkersuinikkut, pingaartumik aningaasaqarnermut,
annertuumik akisussaaqataasimalluni.
Siumukkut IA-llu talerpimmut
illuariarnerattut tusakkama ilaat, Atassutip oqaluttuata Daniel Skiftep
oqaaseqarfigimmagu oqaatigilaarlara, uani eqqarsaatersuutit ukiumoortumi
aningasaqarnikkut nalunaarutinik taaneqartartut, Inatsisartuni tusartuartarpagut.
Ukiut tamaasa saqqummiussugaapput,
Naalakkersuisut ataatsimoorlutik anguniagassamittut saqqummiussaattut
taaneqartarput. Taamaattumik aamma Naalakkersuisut Siulittaasuata
saqqummiussassat taakkua saqqummiuttarpai, tassani paaseqatigiinnerit,
pingaartumik naalakkersuisooqatigiittoqartillugu naalakkersuisooqatigiillu
akornanni.
Taakkua saqqummiussat tungaatigut
uani oqaatigisagut imaalillugit oqaatigerusuppakka, tusiassutigut erloqinartut
ukiumiit ukiumut tikkuarneqartartut isumaqarpunga aatsaat taama
erseqqitsigisumik oqaatigineqartut, qanoq iliuuseqarfiginiarpagut, suut
Nunatsinni tapiissutinit tunioraanersuarput, taakku qanoq
iliuuseqarfiginiarpavut.
Maannakkut inuussutissarsiornermut 600
mio. kr.-it tikillugit tapiissutit taama ingerlaannarsinnaanngitsut,
erseqqissumik nalunaarutigaavut. Naluara taanna talerpimmut
illuariarnerunersoq. Aamma nalunaarutigaavut Nunatsinni ineqarnikkut
allatigullu aaqqissuussat nutaamik nalilerniarigut.
Ilaatigut tassani tunngaviussammata
qularutigineqassanngilaq, inunnik isumaginninnermut iluarsaaqqinnermi
1997-imili aaqqiissutissatut innersuutit, ilaatigut imaqarput inuit
akissariaqqortunerit, boligbĝrnetilskudimi, meeqqanut ineqarnermut tapiutini
allaanerusumik aaqqiivigineqarsinnaasut, akissarsiaqqortunerit
akissarsiakinnerusunik nammaqataasinnaanngorlugit.
Tamakkuupput 1997-imili
saqqummiunneqartut maannakkut naligiissaarutitut eqqunneqartunut aalajangiiffissatut
Inatsisartunut saqqummiutilersaakkagut. Taama ittunik siunnerfipput aamma
imaqartuaannarnissaa naatsorsuutiginnginnatsigu, aaqqiiniassallutalu.
Aamma Siumup oqaaseqartuata, Jĝrgen
Wĉver Johansenip taamatullu aamma Maliinannguup Markussenip oqaatigisai
IA-minngaanniit, assigiimmik akeqartitsinerup nalilersorneqarnissaa. Taanna
aamma nalilersornera ingerlateqqissavarput. Kisiannili assigiimmik
akeqartitsinerup iluani imaaliinnavilluni kipisamik aaqqiinissaq pinnagu, aamma
taamaanngisaannarpoq takorluuineq, maannakkut eqaatsumik aaqqiviginissaa
misissorneqarpoq. Aamma misissorneqarsinnaavoq, aamma taanna eqqunneqarsinnaanera
noqqaassut isumaqarpunga inerniartariaqaripput maannakkut.
Isumaqarpunga Kalallit Nunaanni
maannakkut illuatungaatigut Nunatta anginerujussua siammasinnerujussuarput
oqalugiaatigiitigalugu illuatungaatigut nipeqalersarpoq, akueriumanngikkipput
aamma taassumarujussuup iluani nunaqarmat, illoqarfeqarmat, nunallu
immikkoortortaqarmat ineriartornissaminnik allaninngaanniit Nunatta
ilaanninngaanniit allaninngaanniit periarfissarinnerusunik.
Taamaattoqarpoq, nunarujussuup
najukkatta iluani, nunarsuarmi qeqertat annersaata iluani nunap immikkoortortat
ilai, ineriartornissaminnut pitsaanerusumik periarfissaqarput. Taanna
pinngortitap ilaatigut aaqqissimavaa, ilaatigullu aamma ilaasa
eqiasuinnermikkut aamma taanna aaqqitaralugu.
Taamaattumik aamma inuit
eqiasuinnermikkut atorluaanermikkullu illoqarfimminnik nunallu ilaanik
kivitsisut kivitsisinnaasullu periarfissittariaqarpavut. Taamaalilluni akit assigiinnerannik
aaqqissuussineq allanngortinneqartariaqarpoq, taamaalillunilu aamma
akileraarutitigut naapertuunnerusumik imartunerumillu
tunngavissaqarnerusumillu allanngortiterinissat aamma
periarfinneqarsinnaammata.
Uagut oqallisigigaangatsigu bananit 8
kr.-eqassanersut, 16 kr.-eqassanersut, 20 kr.-eqassanersulluunniit
oqallisigiuartarpagut. Taakku aallaavigitillugit inernavianngilagut. Uanga
ippassaq tikillugu namminersorluni privatimik uanitsusiniarama sisamat 12
kr.-ilerpakka, ataaseq 3 kr.-eqassammanngooq, Nuummi maani. Privatit taakkua
uanitsut tikisitani ataaseq uannut akigivaa 3 kr.-ilerlugu, aamma akilerpara.
Taava naluara qanoq Upernavimmiut uanittoq akilertarneraat, ataaseq KNI-mi
pisigaangamik.
Tamakku aallaavigalugit
oqalussagutta ineriarfeqanngilagut. Kisianni ineriarfissaqarpugut Nunatta
iluani nunap ilaata aammalu illoqarfiit ilaasa ineriartornissaminnut
periarfissai atussagutsigit. Tassanilu akiviusut tunngavigalugit ingerlaneq
tikinngitsoorsinnaajunnaaripput aamma malunnarpoq.
Tassani Siumup Atassutillu
naalakkersuisuunerminni apeqqut aamma oqallisigisarsimavaat, annertuumillu
suliassami tassani aamma ingerlassaqarsimallutik. Inuit Ataqatigiit Siumullu
naalakkersuisooqatigiinnerminni assigiimmik akeqartitsinerup
allannguuteqarluni ingerlanerani sanilliullugu, reguleringsfondtimik taasartik,
tassa akit assigiinnginnerat pillugu naligiissaarutissamik aningaasaateqarfik
eqqarsaatinut ilanngullugu aamma taanna saqqummiussimavaat. Taannalu
oqallisigisanut pilersaarusianilu maannakkut ilanngutsinneqarpoq. Aamma
suliassanut taanna ilaassaaq.
Aamma Maliinannguup, aamma
taamaappoq Siumup oqaaseqartuisa, Siumullu Inuit Ataqatigiillu oqaaseqartuisa
eqqarsaartit annertoorujussuit saqqummiussisut tamaasa ataatsimut oqaaseqarfigisinnaanngilagut.
Kisianni isummersuutinut annertuunut aamma ilassutitut isigalugit maani
oqallinnerminngaanniit saqqummiussatut tigussavakka ilassillugillu.
Taamatullu aamma Atassutip
oqaaseqaammini suleqatiginnikkusulluni nalunaariartuutaa, aamma taanna
maluginiarpara. Atassut soorunami uparuaassutinik assigiinngitsunik
saqqummiussaqaraluarpoq, saqqummiussaqartussaallunilu. Aamma taanna
ataqqivarput. Kisianni ugguunakkut oqaatigilaarlara, aavernik iisinissaq allalu
eqqartorneqassappata, aaveq taanna iisassaq sunaagaluarnersoq eqqarsaatiginagu,
naalakkersuinikkut siusinnerusukkulli innersuussutit naammassiniaqqusat
maannakkut timitalerlugit aammalu qanoq annertutigisumik
akuersaarumaneqarnersut inimi maani, Inatsisartut qassit aavernik iisiumaanersugut,
tassani apeqqutaajumaarpoq.
Tamatta isummerfigisassaraarput,
tapiissuterparujussuarnik aaqqissuussinerit ingerlaannassanersut tamatta
isummerfigisassaraarput. Akissarsiaqqortunerit, soorlu taamatut siunnersuutigineqarsimasoq
1997-imi, meeqqanut ineqartitsinermut tapisiai allannguuteqassanersut.
Tamakkuupput inimi maani naammassiniaqqullugit innersuussutigisimasagut.
Taamaattumik aavernik iioraanissarput siumoorlugu oqaatigineq ajornaqaaq.
Kisianni iisisussaqassaaq.
Mogens Kleistip oqaaseqaataanut
tunngatillugu tupiginngilara, Mogensi maannakkut oqaaseqarnermini apeqqutit
maannakkut eqqartorneqareersut uani, Mogens Kleistip arlallit apeqqutit uani
eqqartorneqareersunut innersuussai aamma imaqarmata. Aningaasarsiornermi uani
tikitagut arlaqaqisut aamma immikkoortuni allani naapittarpagut ilumoorpoq.
Tassani ukiumoortunik aningaasanik immikkullu ittumik aningaasanik
akuersiniarnitsinni tikittarpagut. Ineqarnermut tunngasutigut oqallinnermi
tikittarpagut, ilinniartitaanermi apeqqutini tikittarpagut ilumoorpoq apeqqutit
taakkua uterfigineqartuartarput Naalakkersuisut saqqummiussaani
assigiinngitsini.
Taamaattumik tupiginngilara
maannakkut Kattusseqatigiinit oqaaseqartoq maannakkut naammagigallarmagit
apeqqutit tassani aammalu nuannaralugu oqaaseqarmat suleqatigiilluta
pitsaanerpaaq anguniarsimassagipput, anguniarsinnaagippullu siunissami
takorlooraa. Taanna qujassutigaara taama neriorsuuteqarneq
Kattusseqatigiinninngaaniit, nutaajulluni iserfigisat tupaallarnartarput
annertoqalutillu kisianni aamma Kattusseqatigiit ilumoorput taanna
oqaatigisattut tikinneqartarmata, immikkut apeqqutini allani suliffigisatsinni.
Tassanilu suleqartaajumaneq Kattuseqatigiini oqaatigineqartoq nuannaarutigaara.
Taavalu Per Rosing-Petersenip
oqaatigisaani aamma illit erseqqissumik Per Rosing-Petersen taaqqippat allat
aamma taariigaat allaffissornikkut Nunatsinni aningaasartornerujussuup aamma
maanngaaniit taaneqarnera ilinninngaaniit erseqqissumik pillugu aamma
akerlilernianngilakkit isumaqatigigakkit tassuunakkut, aammalu
oqartariaqarpunga suliassaq tassaniittoq uagut Namminersornerusuni suliassarput
naammassiniarsaraarput, annikillerivugut atorfeqarnerit tungaatigut
annikillilerivugut suliffiillu allat imminnut katissinnaasut aamma
katititerlugit.
Aamma oqaatigisattut oqaluttarfik
manna atorlugu oqaatigineqarmat oqaatigissavara aamma kommunit tassuunakkut
aamma takusarneqarfissaq annertuumik aamma ilisarisariaqarpaat. Aamma
nalunngilarput annertoqisumik sipaarniutissaminnik maannakkut suliaqartut.
Tamakkuupput uagullu aamma pisortanit suliffiit allat sapinngisatsinnik aamma
pitsaasumik aaqqissuussiniarnitsinnik imaqartut.
Naggataatigut oqaatigilaarlara, una Per Rosing-Petersenip oqaatigisaanik, oqaaseq tunngavigalugu una oqaaseqarnera naggasilaarusukkiga. Aningaasarsiornikkut apeqqutit uku tikinneqartut, soorlu Kattusseqatigiinnit allanillu aamma oqaatigineqarneri najoqqutaralugit oqareerpugut, Inatsisartut sulineranni ullut tamaasa attorneqartuarput. Suliassanut allanut tunngatillugit attorneqartuarput. Aamma taanna ingerlavigissavarput.
Ilaannikkut takkuttoqartarpoq ima sukkatigisumik naammasseqqusanik, kinguartinneqarsinnaanngilllat aappaagumut, tassa aningaasartuutissanut ilanngutissapput, taamaalillutillu amerlanerit akuersigaangata ilanngunneqartarlutik.
Per Rosingip oqaatigaa, oqaaserlu atorpaa una, allappara, taamatut ingerlanermi unikaallatitsisinnaaneq, tassani eqqarsaatiga ilaatigut Perip avataaninngaanniit sulisussarsiortarnissaq, unammilleqatigiinnikkut. Taanna pissutigalugu kalaallit uagut sulisussagut ilinniarteqqaartariaqarigut, kalaallit aamma uagut naammineerluta suliassanik taakkuninnga sulisariaqarnerput.
Anguniagaq taanna allanngortinneqanngisaannassaaq, politikkimi sulinitsinni. Kisianni aamma aajuna nalunngisarput, innuttaasut piumaffigaatigut illutaassaagut, illutaassaagut pitsaasunik, suliarilluakkanik, ima imaalippallu iserterfissatsinnik, aamma taanna akilerniarparput. Aamma ingerlajumavugut Paamiunut, Sisimiunut, Maniitsumut nalunaaqutaq imaalippat aallartussanik. Tamakku tamavimmik maannakkut nalaanni inuulersimavugut. Tassanilu apeqqutaajunnaannguatsiarpoq, kiap taanna suliassaq suliarissaneraa, imaalerlunilu kiap akikinnerusumik tassuunakkut kiffartuussinnaavaanga.
Kalaallit aamma uagut nalitsinni taanna maannakkut tikinnguatsiarparput annertoorujussuarmik. Apeqqutiginngilarput kiap suliassaq taanna suliarigaa, kissaatigaarput pitsaasumik suliarineqassasoq, illu iserfissarput, qaammaqqutai allallu tamarmik pissusissamittut suliarineqassapput. Akilerusupparput taanna husleje, kissaatigiinnarnarput pitsaasumik suliarineqarsimanissaa.
Apeqqutaanngilaq kiap taanna suliarisimagaa. Kiffartuussinerit taama ittut akikinneqqusaannikkut anguneqassappata Nunatsinni kalaallit namminneq akornannatsinni, aqqutissaavoq orniginarnerpaaq. Taamaattumik avataaninngaanniit tikerartitsinissaq takorluunngilarput Naalakkersuisuni. Allaat maannakkut ininik iluarsagassanik, nutarterinissani allanilu Nunatsini nammineq sulisut atorneqarnissaat salliutittariaqarparput.
Tassani neriuppunga Per Rosing-Petersen paaseqatigisinnaallugu. Tassani assersuutigalugu, iluarsagassat allallu tungaatigut, imaasinnaavoq ukiut 15-it oqarnata, taava isumaqatigiissinnaasugut ukiut 15-it, qulinik oqarnata ukiut 15-inik taava oqarluta kinguartitsilaartarsinnaasugut, taakku utaqqisinnaappata iluarsagassagut.
Tamakkunatigut nammineq aalajangiisinnaanerput atorniartariaqaripput neriuutigaara, kisianni illutaarniat 1.200-t allallu kissaatigippassuk, pitsaasunik akikitsunik sukkasuumik illutaarniarlutik, taava tamanna kalaallit ilinniaqqaarnissarput angusaqarnissaa utaqqineqarumanngilaq. Akilerumaneqarput tassani inuit suliarineqarsinnaasut pitsaasumik, akikitsumik aammalu sukkasuumik.
Taakkulu nassaarineqarsinnaappata aamma isumaqatigineqarlutik taava suliarineqarsinnaapput.
Naggaterpiaatigut oqaatigissavara assut nuannarigakku maani oqaaserineqartut ullumikkut. Aamma oqaaserineqartut allaanerulaarput siornatigut tusartakkatsinninngaanniit. Maluginiakkakka aajuna partiit oqaaseqartuinit allanillu, una piffissaq atorniarneqarmat Naalakkersuisunut isumaliutissanik tunniussuinermik.
Aamma taannarpiaavoq maani oqallinnermi siunertaq. Qujassutigaakka, Siumumit, Inuit Ataqatigiinnit, Atassummit, Kattusseqatigiinnit aamma ataasiinnaalluni qinigassanngortittumit oqaaserineqartut. Maani suliassat ingerlaqqinnissaanni uagut immersuisut saniatigut oqaaserineqarput avaqqunneqarsinnaanngitsunik imaqartut ilaatigut.
Josef Motzfeldt, Aningaasaqarnermut Niuernermullu Naalakkersuisoq:
Tunngavilersorluakkanik nalunaarusiorneq Naalakkersuisut Inatsisartunut sulisitsisuminnut pisussaaffigaat. Taamatut nalunaarusiaq ullumikkut sukumiisoq ukiumoortumik saqqummiunneqartartoq upernaakkut ataatsimiinnermi tunngavigalugu oqallinneq pivoq.
Periarfissatsialaavoq partiit ataasiakkaat nalunaarusiaq aallaavigalugu isummersornissaannut. Sammivik suna Nunatsinni ingerlariaqqinnissatsinni orniginartinneruarput, tamakkiisumik oqallinnerup tassa qiterisaa. Isumaqarpungalu tamanna ullumikkut inimi maani amerlanerit atorluaraat.
Ilaatigut sumut, talerpit saamik atorlugu sangusaarnerit eqqartorneqarput, tamanna Atassutip oqaluttuata oqaaserigaa paasivara. Naalakkersuisooqatigiinni pingaarneruvoq talerpimmut saamimmut sanguneq eqqarsaatiginnginnerullugu sammiveqarneq, aajalangiussamik sammiveqarneq Naalakkersuisooqatigiit pingaartinneruaat.
Nunami maani periarfissagut atorlugit nalunaarusiap qulaajagai isummersorfigineqartariaqarmata, killeqanngiusattumillu 800 mio. kr.-it ukiumut atorlugit tapiissutit akilersortuassanerigut, ineriartornermik kinguneqarnera kinguneqannginnerilu apeqqutaatippallaarnagit. Tassa Naalakkersuisut isummersornerminni pingaartitaat.
Ineqarnermut akiliut, taanna pillugu eqqaasitsissutigissavara, ullumikkut sanaartornermi inissiarsuarni aningaasartuutit sananerini 73 procentiisa missaannaat, 73 procentiisa missaat tassaammata tapiissutit, sinnerilu tassaapput ineqartut akilersortagaat.
Atassutip qinigaaffiup siulia ilanngullugu inimi maani ilungersuutigisagaa tassaavoq, isertitaqqortussuseq aallaavigalugu ineqarnermut akiliisalernissaq. Ullumikkulli sooq pinerpoq, kakkaamik taavaat ineqarnermut akiliut isertitaqarneq najoqqutaralugu, illoqarfinni isertitaqqortussuseq aallaavigalugu, inissaaleqisut amerlassusiat aallaavigalgu aaqqiiniartoqassappat.
Tamanna akinik eqqortunik, akinik piuviusunik toqqammaveqarluni akilersuisitsiniarnertut taaneqartariaqarpoq. Taakkuali saniatigut isumagisassarput naalakkersuinikkut tassaavoq, isertitakinnerusut, meeraqqortuut allatigut boligsikring imaluunniit ineqarnermut meeqqamut tapiutaasartoq ataatsimut katillugit taakkununnga oqilisaassutiginissaat.
Nalunaarusiat Atassutip oqaluttuata eqqaasai pujoralatsiinnartut, naluara kikkut pujoralatsersimaneraat, Naalakkersuisut massakkut annertuumik nalunaarusiat taakkua atorluarlugit kingumut isumassarsiaasinnaasunik ujarlerfigalugit, pissutsit piviusut innuttaasut kissaatigisaat, qineqqusaarnermi partiinit tamanit oqaatigineqartut ataatsimut katinniarsaralugit naalakkersuinikkut killiffipput nalilersuiffigisimavarput.
Uani pingaarnerunngilaq OECD -p nalunaarusiaa piffissami matumanerpiaq saqqummiunneqarmat, kisianni aamma allat isumaannik mattussivinnginnissaq isumaqarpunga Nunatsinni aamma pingaartittariaqaripput. Taamatulli pingaartigaaq uagut aamma nammineq isummatinnik avammut nassarsinnaanerput puigussannginnatsigu.
Ilaatigut Inuit Ataqatigiit oqaluttuata Maliinannguaq Markussen Mĝlgċrdip oqaatigisaatut aunga isigaluni pilersaarusiornissaq, isumaqarpunga tassa taanna ullumikkut aningaasaqarnermut killiffimmik nalunaarusiami oqaatigineqartut pingaarnersarigaat.
Kiisalu arlallit oqaatigisaattut aningaasat Landskarsip uninngasuutai ilassutitut aningaasaliissutitigut maannaannaq mangiarneqannginnissaat aamma pingaartinneqarpoq nalunaarusiami, tamannalu qujanaaq amerlasuunit isumaqatigineqarmat.
Selskabit patajaallisarlugit Siumut oqaluttuata oqaatigisaanut tamanna pingaaruteqarluinnarpoq patajaallisagassatut piukkunnartut isumalluarnartut siunissami taakku patajaallisarnerat naammasisariaqarpoq, kisiannili aamma selskabinik ingerlatsisut siulersuisullu eqqaamasariaqarpaat inuiaqatigiinni piginnitsiminnut akisussaaffeqaramik, tamatuminngalu eqqaasinneqartuartariaqarput.
Isumaqatigiinniarnerit akissaatitigut atorfeqarnermilu atugassarititaasutigut massakkut ingerlanneqartut, ukioq manna naammassinngersaapput, kattuffik ataaseq kisiat suli isumaqatigiissuteqarfigineqanngilaq, Inatsisartunullu nalunaarutigissavara manna tikillugu Inatsisartut Aningaasaqarnermut Ataatsimiititaliaata, kingornalu ilassutitut aningaasaliissutitut siullertut, ukioq manna ullumi akuersissutigisatsinni aningaasaliunneqareersimasut iluanni, taakkua aningaasarsiatigut qaffaanerit suli ingerlanneqarmata, kisianni immikkukajaaq ukioq manna taamatut qaffaanerit annertunerat immikkukajaarluinnartut Naalakkersuisut isigivaat.
Tassa ukiarmi ilisimaneqartutut ilinninniartitsisunut aaqqiisariaqarsimanerup kinguneranik kattuffiit allat taamatumunnga assigusumik pineqarnissaat tupinnanngimmat.
Kiisalu Nunatta suut piginerai inuutissarsiutit ingerlaqqinnissaannut qitiusariaqarmata Siumup oqaluttuata, Nunatsinni suna pigaarput, imeq killeqanngitsoq pigaarput, taassuma isumaqarpugna kiisami tamakkiisumik aqqutissiuunneqarnissaa tunisassiatut Naalakkersuisuninngaanniit pimoorullugu ingerlanniarneqartariaqartoq.
Tassa imaappoq naalakkersuinikkut uagut inuussutissarsiorneq eqqarsaatigalugu pisussaaffipput inuussutissarsiornermik ingerlatsiniartut pitsaasunik atugassaqarnissaat, tassunga killeqartariaqarpoq uagut pisussaaffipput, tassanngaanniit ingerlatsinerit inuit ataasiakkaat imaluunniit ingerlatseqatigiit nunaqqatigiiaat ingerlassinnaanerusariaqarpaat.
Toqqortikujulluni tapiissutit kingunerisarpaat unammillersinnaannginneq, illersukkat tunisassiorfiit illersorneqarpallaartut kajumissuseqarneq ajorput ineriartortitsinissamut taamaattumik tamakkuuput naalakkersuinikkut killiffitsinni sammiviginiartariaqakkavut, naalakkersuisooqatigiit isumaat najoqqutaralugu.
Simon Olsen, Inuussutissarsiornermut
Naalakkersuisoq:
Partiinit oqaatigineqartut ilagaat
NUKA A/S. Tassunga tunngatillugu erseqqisaatigissavara niuernermit
isumaginerqartoq tassaammat NUKA A/S Royal Greenlandilu
avissaartilluinnarnissaat tamannalu piviusunngortutut
oqaatigineqarsinnaapajaalereerpoq.
Namminersornerullutik Oqartussat
nunaqarfinni nioqqutissiorfiit qaleraleqarfiit avataaniittut tamaassa
tigusassarivaat. Tamatuma saniatigut tiguneqassapput fabrikkit Kangaatsiami,
Qaqortumi aamma Nuummi GFI-usimasoq tamaat.
NUKA-mik tigusinissamik
ajornarunnaartitsisuussapput aningaasat 125 mio. kr.-it. Maannakkut NUKA 150-it
missaanik sulisoqarpoq. Piffissaq aggersoq ilaatigut atorneqassaaq
misissoqqissaassallugit periarfissat Qeqertarsuarmi aamma Alluitsup Paani
fabrikkinik tigusinissamut. Piffissaq taamatuttaaq atorneqassaaq Royal
Greenland pisariaqartunik isumaqatigiissuteqarfigissallugu sullissinissamik
fabrikini NUKA-p tigunngisaani. Taamatuttaaq pineqarpoq Royal Greenland aamma
init NUKA-p tigusassaaninngaanniit attartortitaanissaa.
Inatsisartut ilassutitut
aningaasanut inatsisaat akuersissutigineqarpat NUKA A/S pillugu Inuutissarsiornermi
qullersaqarfik aamma Aningaasaqarnermut qullersaqarfik aallartissapput
qinnutigissallugu aningaasaliissutissat Kalaallit Nunaanni
Namminersornerullutik Oqartussat ingerlatassaannut tunngasoq. Niuerneq
piaarnerpaamik aallartinneqartussaavoq. Inuutissarsiutinut qullersaqarfiup
assorujussuaq qilanaarivaa nunaqarfinni tunisisitsinerup nioqqutissiornerullu
NUKA A/S-ip ataani ingerlatilernissaa.
Godmand Rasmussen, Atassut:
Tassa Atassumminngaanniit eqqaareerpara
naatsuarannguanik oqaaseqartarluta, kisianni erseqqissunik. Nuna inoqanngitsoq
imaluunnit qeqertaq ajornartorsiunik pilersitsiviusanngilaq. Nuna
inoqaleqqaaraangami imaluunniit qeqertaq siullermik tassa piumasarineqartarpoq
tassa inuk aammalu illu taavalu suliffissaq. Ullumikkut uani eqqartorneqartuni
aningaasaqarnermut tunngatilluguoqaatsit assigiinngitsorpassuit ilaatigut
aamma isumalluarnartut pilersaarutit tusarpavut, aamma taamaattariaqarpoq.
IA-p oqaluttuata oqaatigivaa
aningaasaqarnerput pitsaavallaanngitsoq aamma ilumoorpoq. Uani tunngavinni
qisuariaassutima annerpaartaringunarpaa naalakkersuisut Siulittaasuata
ataqqisama oqaatsit uku atormagit: Inuit eqiasuitsut kivitsisinnaasullu
periarfissarsiuutariaqarpavut.
Ilumoorluinnarpoq, kisianni ippassaani
pisoq eqqarsaatigitigu. Inuit eqiasuittut kivitsisinnaanngorsimallutik
namminersulersimasut inuiaqatigiit iluanni suliffinnik
akileraarusersuigaangatta taava ikiorsiinerput sumut pisarpa?
Kukkuneq annertooq uaniippoq,
suliffissanik ujaasivugut Nunatta aningaasaqarniarneata iluaqutigisinnaasaa
aallaaviginiarlugu, kukkusarpugut kukkussuteqartarpugut suliffiit
aallartikkaangata akileraarsillugit artukkerlugit unittoortikkaangatsigit.
Siunissami taanna eqqaamaqqunaqaaq. Suliffissanik ullumikkut amigaateqarpugut
aningaasarsiornerput pitsaasup tungaanut saatissagutsigu suliffissanik nutaanik
aammalu ujaasiniarta, taakkulu artukkernaveersaarlugit suliffinnik
ingerlatsisinnaanerat eqqarsaatigeqqittariaqarlutigu.
Una Aningaasaqarnermut Naalakkersuisup
atsaannguaq oqaaserivaa ineqarnermut assigiissumik akileeriaaseq taanna
attupillappaa. Tummaarisaq ataaseq imaluunniit najugaq ataaseq
assigiinngitsumik akilersorneqarnissaa taanna siunissami uangut
Atassumminngaanniit pakkersimaarusupparput. Inuit soorunami sanngiinnerusut
tassani eqqaaqqajaaneqartartorujussuupput aamma sanngiinnerusunut uagut aamma
qanoq iliuuseqarnissarput pingaartittorujussuuvarput.
Erseqqilluinartumik oqartoqarpoq ukiut
sisamat qaangiuppata Nunarput sillimmataarukkumaartoq, imaluunniit ukiut
tallimat, Kattusseqaqatigiit taanna erseqqissumik oqaatigaat, ukiut tallimat
ingerlanerani Nunatsinni nungukkumaartut. Taamaattumik taamatut navianartumik
inissisimanitsinni immaqa pitsaasumik eqqarsarluaqqaarluta nalilersuigutta
pitsaanerpaassooq.
Aamma Naalakkersuisut ukua
isumalluarfigivavut massakkut nutaat uani saqqummersut imaannaanngitsut
inuiaqatigiinni imartoqisut saqqummiussorpasi aamma neriussuugut taakku
pitsaasumik inuiaqatigiinnut pitsaanerpaamik ikiuineqartumik
atuutsinneqarumaartut. Tassa taanna aappassaaneerlugu uanga anerusuppara,
Nunatsinni suliffissanik amigaateqarpugut tamanna nassuerutigisariaqarparput,
suliffissanik ataavartunik pilersitsinermi pinaveersaarniartigu suliffinnik
akileraarusersuinaveersaarluta. Ullumikkut uani immaqa takuneqarsinnaasuuguni
nuannissagaluaqaaq Nunatsinni taxaatiinnallilluunniit Landskarsimut
akileraarut akiliutigisartagaa qanoq annertoreertiginera. Qujanaq.
Steffen Ulrich-Lynge, Ineqarnermut, Attaveqarnermut
Pilersuinermullu Naalakkersuisoq:
Tassa Per Rosing-Petersen angallannermut
tunngatillugu oqaatigaa tamani angallanneq ilaatigut ima ingerlasoq, tassa
umiarsuit atorlugit timmisartorlu atorlugu, kisialli massakkut
isumaqatigiissutit nutaat takkuttussaasut aammalu atsiorneqartussaasut qanittukkut
Grĝnlandsflymut tunngatillugu, tassani anguniarneqarpoq Upernavimmi taavalu
aamma Uummannap pigisaani timmisartoq atuunnarlugu taamaallaat siunissami
angallannissaq. Tassa taanna inuiaqatigiinnut sipaarutaasinnaasutut soorunami
aamma isigineqarmat.
Taava aamma Per Rosing-Petersenip
taakkartorpaa taallugu una sanaartornermut atatillugu avataaninngaanniit
tikisitsinissaq taanna assut, isumaqarpunga tassani paatsoortoqarsimasoq,
pineqanngillat inupparujussuarnik tikisitsinissaq, kisianni una pineqarpoq ammasumik
avataaningaanniit aamma unammillerteqarnissaa, immaakkami massakkut arlaatigut
sanaartussagutta, maaniinnaq unammillerneq ingerlassagaluarpat akit suli taama
qaffasitsigisut qaffasittuaannasapput aamma taamatut. Taannartaa
paasilluaqqunarpoq, tassa inuit maaniittut atussavavut, kisiannili
suliffeqarfiit avataaningaanneeraluarpata aamma ajunngilaq. Qujanaq.
Daniel Skifte, Atassutip oqaaseqartua:
Naalakkersuisut Siulittaasuata aammalu Aningaasaqarnermut
Naalakkersuisup oqaasiinut annikitsumik oqaaseqalaassaanga. Tassa siullermik
Naalakkersuisut Siulittaasuannut. Ilinniartaaneq pillugu maqaasinninnitsinnut
peqqutaavoq Naalakkersuisut 2000-imi pilersaarumminni aningaasat
inatsisissaannut ikkussiniarnerminni ilinniartitaaneq meeqqalluunniit atuarfiat
taanngimmassuk puigorsimammassuk.
Uanga qupperneq 35-mi 36-milu
eqqartorneqartut pinngilakka, uanga pivakka qupperneq 54-mi 63-milu
eqqartorneqartut, tassa ataatsimoortumik aappaagumut pilersaarutit, tassa
oqaannassaanga assortuussutaanngitsumik neriuppunga aamma ilinniartitaaneq
meeqqalluunniit atuarfiat taanna aamma tulleriiaarinissami naalakkersuisut
eqqaamassagaat, tassa Atassutip oqariartuutaa ujartugaalu.
Siumukkut Inuit Ataqatigiillu talerpiatungaanut
saannersut eqqartorneqarpoq naalakkersuisunit marlunnit. Tassani
oqaatigissavara erseqqissarlugu pingaartumik Josef Motzfeldtimut erseqqissarumagakku
talerpimmut partiit allat sangunerunerat Atassutip iluarisimaarmagu aammalu
oqaatsitsinni taanna erseqqissumik oqaatigigatsigu.
Taamatut oqareerlunga OECD-p inassutai
qupperneq 47-miittut qallunaatuuani qupperneq 40-miittut imatut oqaaseqarput,
tassalu taamatut oqarninnut tunngaviupput, issuaalaassaanga: OECD-p nalunaarusiaani
missingersuutaasumi kaammattuutit naalakkersuisut inuutissarsiornikkut
ingerlatsinerminni anguniagaannut naapertuulluarput. Ullumikkut amerlanernit
ilisimaneqarpoq pisortat kisermaassinerat aaqqissuussinerusoq
pissarsinanngitsoq. Issuaanera naavoq.
Tassalu taanna maluginiarpara
ullumikkorpiaq aamma Siumup oqaaseqartuata oqaaseqaatimini qupperneq 8-mi
oqaatsit uku atormagit, issuaaneq tassa tunisassiorfissamik pilesitsiniarnermut
tunngasumik issuaaneq: Tamatumanili
soorunami pisarneq malillugu Nunatta annertunerpaamik tunisassiortoqalissappat
piginneqataanissaa puigornagu, tassa Nunatta piginneqataanissaa
puigoqquneqanngilaq.
Taakkulu marluk oqariartuutit imminnut
akerleeriipput aappaa siumut sammilluni OECD-minngaanniit inassutigineqartut
tigujumavai, aappaatali suligooq Nunatsinni ullumikkutut ingerlaneq
ingerlatiinnarneqassaaq, tassa imaappoq umiarsualiissaagut
Namminersornerullutik Oqartussat imaluunniit taassuma pigisaani
suliffissuaqarfiusuni? Isumaqarpugut
taanna imminut assortuuttoq.
Aaversuarmik iisineq
eqqartorneqallatsiarmat oqaatigissavara tassaana taanna eqqaagipput
akileraarutit qaffanneqarnissaat aammalu akileraarutit
qaffatsinneqassanngippata akitsuutit akitsuuserneqareersut qaavinut imaluunniit
nutaanik akitsuusiinikkut pissarsiornissaq oqaaseqarfigigatsigu, taannalu
naleqqiupparput qaammatit marluk matuma siornatigut pisimasunut. Taamaattumik
aamma politikkikkut assersuutitaqassagaanni qaammatinilu kingullerni pisimasut
eqqaassagaanni taaneqarpatalu aamma tusaatissatut tiguneqarsinnaasariaqarput.
Lise Lennert, Kultureqarnermut,
Ilinniartitaanermut Ilisimatusarnermullu Naalakkersuisoq:
Qujanaq. Siulliutissavara taanna
aatsaannguaq Daniel Skiftep uparuagaa, taanna ilinniartitaanermut tunngatillugu
immikkut sammisassani taaneqarsimanngimmat,
kisiannili tassa imaappoq puigorneqanngilluinnarpoq, immikkut
suliniutigineqareerpoq, ilinniaritaaneq pillugu Inatsisartunut 1995-mi
nassuiaatip malitsigisaanik suliniutit iluini taanna ingerlanneqarpoq.
Naluneqanngitsutullu iliuuserisassat tulliuttut ilagaat meeqqat atuarfiat
pillugu september ip 8-ninngaanniit 14-iat ilanngullugu isumasioqatigiinnissaq
annertooq, tassa suliniutip taassuma malitsigisaasa ingerlanneqarsimasullu
annertuut tulliuttut taanna ilagivaat. Taavalu aamma assersuut alla tassa
ullumikkut pingajussaanik oqaluuserivarput inuussutissarsiutinik
ilinniartitaanerit pillugit Inatsisartut peqqussutissaat.
Taavalu aamma
oqaaseqarfigilaarusuppakka partiit ataasiakkaat uparuarsimasaasa ilaat, naak
Jonathan Motzfeldtip annertuumik ilinniartitsinerup iluani aamma
taaneqarsimasut oqaaseqarfigereeraluarai marlussunnguit taarusuppakka
ilanngussassatut, tassalu siullermik Siumup oqaaseqartuata eqqaavaa
ilinniartitaanerup iluani eqqaavaa nunani allani ilinniarumasut
mattunneqannginnissaat pingaartillugu, aap pingaartinneqaqaaq, taavalu tassa
pingaartinneqaqimmat taamatut kalaallit inuusuttut GU-mi atuartut
naammassinnginneranni siunnersorluarneqarnissaat anguniarlugu, periarfissallu
aamma nunani asssigiinngitsuni suuneri erseqqissarniarlugit, tassa massakkut
ingerlanneqalersimavoq siunnersuisarneq Nunatsinninngaanniit,
Danmarkiminngaanniit Canadaminngaanniillu GU-nut ingerlanneqartalersimavoq
ukiut tamaasa, taavalu taassuma soorunami kingunerisarpaa inuusuttut ilai
Canadami atuarusuttarput, ilai Danmarkimi ilaalu Nunatsinni.
Taakkua periarfissat isumaqarpunga
inuusuttortatta eqqumalluarfigigaat, taavalu aamma atorneqarlualereersimasut.
Kisianni ilinniagassat ilaat aamma assersuutigiinnarlugu nakorsanngorniat
inatsisilerituunngorniallu Canadami atuarniaraluarunik taanna Canadami
taamatut taakkua ilinniakkat iluini aaqqissuussisimanerit Nunatsinnut
tulluanngimmata, taamaammat tassa taamatut ilinniagaqarniartut Danmarkimiit
siunnersorneqartarput atuarnissaat, kisianni ilinniakkat allat soorlu
ujarassiujuunngorniat, ingeniĝrinngorniat biologinngorniallu assersuutigalugit
taakkua Amerikami Avannarlermi Canadamiluunniit ilinniarneqarsinnaapput.
Taava aamma ilinniarnermusiat
pillugit taaneqartumut imatut oqarsinnaavunga, tassani KIK-p DKIK-llu
suleqatigalugu taamatut aaqqissueqqinnissap ilinniarnersiutilinnut
tunngatillugu aaqqissuusseqqinnissaq ingerlanneqarpoq taavalu aamma
ungasinngitsukkut naapeqatigivakka, tamaasa aammalu taassuma iluani suliassaq ingerlavoq.
Aamma arlalitsigut aamma
Siumuminngaanniit Inuit Ataqatigiinninngaanniillu eqqartorneqarpoq taanna
ilinniagaqartut akornanni ingammik sanaartornerup iluani taamatut
taamaatiinnartarnerup annertussusia, aap taanna eqqumaffigeqaarput, taavalu KIIP-imi
suliassani tulleriiaarinitsinni qutsitsittorujussuullugu pingaarteqalugulu
inississimavarput taamaammallu aamma taassumap iluani suliniutit
ingerlatilereerpavut, tassalu neriulluta piffissmi qaninnermi ersarissumik
aamma nalunaaruteqariartorsinnaajumaarluta qanoq iliornitsigut taassuma
taamaatittarnerujussuup millisarneqarnissaa.
Kisianni soorlu aamma
nalunnginneqareersutut siunnersuissarnerup iluani taamatut aaqqiinissap aammalu
siunnersuisartussat ilinniartinneqarnissaat tassa aamma ingerlanneqalereertut
ilagivaat.
Aamma una Maliinannguaq Markussen
Mĝlgċrdip uparuagaasa ilaat ilinniartitaanerup iluani taatsiarusuppara imatut
oqaravit, taassumalu saniatigut minnerunngitsumik meeqqat atuarfiani
naammassisat ingerlaqqinnissamut naleqquttannginneri uparuarakkit, kisianni
tassunga tunngatillugu aamma taanna inersuussutigiinnarsinnaavara taamatut
meeqqat atuarfiata iluani aaqqissuusseqqinnissami suliniutaasut ingerlammata,
taavalu aamma assiliaq una pigilersimavarputGU-mi atuarniartut atuarnissamullu
kajumittut aammalu isernissaminnut piukkunnartut amerliartuinnarsimammata,
taavalu tassa GU-t Nunatsinni massakkut pingasuussut ilinniarfiusut massakkut
tigusinnaasatik tamaasa tigusarpaat. Taava taamaalilluni tassa uppernarsaatitut
taaneqarsinnaanngikkaluarpoq kisiannili tassa taamaalilluni erserpoq qanoq
GU-mi atuarnissaq taavalu isissutaanissamut piumasaqaataasut aamma
atuartuutitta akornanni saperneqanngitsut atorneqartullu. Qujanaq.
Jĝrgen Wĉver Johansen, Siumup oqaaseqartua:
Qujanaq, siullermik
Naalakkersuisunut qujanaq Siumuminngaanniit oqariartuutigisatta taavalu
anguninarneqartariaqartutut siunniunneqartariaqartutullu isumaqarfigisavut
amerlanerpaartaat ilalerluarlugit tigugassigit. Aamma
naatsorsuutigilluinnarparput isumassarsiaammata pitsaasut
ingerlariaqqinnissassinni suliniaqqinnissassinni taakkua aamma
nalilesuinissainnut ilaatillugit ingerlaqqikkumaartusi.
Taava una ilinniaritaanermut
tungatillugu ilinniartut kiffaanngissuseqarnerulernissaat siunertaralugu
siunnersuutigisimasarput pillugu immaqa erseqqissaassuteqalaarnissarput tassani
pisariaqarpoq nalunngereeratsigu ilinniartut karakterimikkut qaffasissuseq
aalajangersimasoq qaangerlugu angusigaangata taava periarfissarpassuit
taamaattut ammartarmata nunani allaniittut. Kisianni aamma ilinniartoqarpoq
agguaqatigiisillugu karakterimikkut taama qaffasitsigisumik
angusaqartanngitsunik, kisianni taakkua nunani allani atuarfinnut,
ilinniarfinnut ilisimatusarfinnullu isersinnaagaluarput taakani piumasaqaatit
naapertorlugit, kisianni Nunatsinni aalajangersaasimanerput naapertorlugu
uagutsinniit aningaasalersorneqarlutik isersinnaatitaanngillat.
Taamaattumik taakkua
kiffaanngissusermik annertunerusumik periarfissanillu annertunerusumik
tunineqarnissaat tassani siunnersuutigisatsinni pivarput, taannalu soorunalimi
aamma ilinniartorpassuarnut iluaqutaasinnaammat aamma
misissorneqarluarsinnaasut ilagisaattut tikkuarparput.
Taava Daniel Skiftep oqaaseqaqqinnermi
oqaatigisaanut tunngatillugu isumaqarpunga siullermik malunnartoq Daniel
Skiftep nassuaatip immaqa eqikkarnerinnaa annertunerusumik sammisimagaa.
Taava oqaatigisatsinnut
tunngatillugu tassalu Nunatta ernga avammut tunisassiarineqalissagaluarpat Nunatta
soorunalimi piginneqataanissaa tassani pigorneqartariaqanngitsoq. Tassunga
tunngatillugu Daniel Skiftep oqaatigaa taakkua, taavalu Naalakkersuisut
nassuiaammik anguniagassatut tikkuartorsimasaat imminnut assortuuttut.
Kisianni arlaannaatigulluunniit taamaattoqarnera uanga takusinnaanngilara,
pissuissamisuuginnarpoq.
Aamma Daniel Skiftetut
isummissagaanni taava isumaqassagaluarpoq aatsitassarsiornermut uuliasiornermullu
Nunatta piginneqataanerata peerneqarnissaa Atassutip suliniutiginiaraa.
Tamannalu naatsorsuutigineqarsinnaagunanngimmat isumaqarpunga aamma Nunatta
ernga tunisassiarineqalissagaluarpat aamma Nunatta piginneqataanissaa
taamatorsuaq eqqumiigineqarsinnaanngitsoq.
Taava isumaqarpunga partiit arlallit
maani oqaaseqarnerminnut atatillugu takutikkaat una nassuiaat soorlu aamma
naalakkersuisut oqaatigigaat atormassuk suut siunniunneqartariaqarnersut
aammalu suut anguniarneqartariaqarnersut tikkuartolugit, taamaattumik aamma
taanna Atassutip oqaaseqartuanut innersuukkuppara, nassuiaat una atorniarsiuk
suut siunniunneqartariaqarnerinut naalakkersuisut suliniutigisassaannut
oqariartuiffittut. Qujanq.
Maliinannguaq Markussen Mĝlgċrd, Inuit Ataqatigiit oqaaseqartuat:
Qujanaq, uaguttaaq Inuit
Ataqatiginninngaanniit Naalakkersuisut akissuteqaataannut qujavugut. Uani
partiit oqaaseqartuinut tunngatillugu oqaaseqalaarusuppunga tassa ilaatigut
Siumup oqaaseqartuata oqaatigisai isumaqatigilluinnaratsigit raajartassanut
tunngasut aamma naliliiffigineqaqqittariaqartut ilumut pisuussutiut
qaqugorsuamut pigiuassaneraat taamatut pissarsisartut, taanna
nalilerssoqqittiariaqarluinnarpoq, tassami ineriartorneq ingerlajuarpoq aamma
uagut Nunatsinni atortorinngilarput piginnittarluta imannak Qallunaat
Nunaannisuut illuutit toqqaviinik, tassami iluutit toqqaviinik piginninneq,
taanna attartukkatut ingerlattarparput. Taamaattumik ineriartorneq malillugu
aamma taamatut naliliiuarnissaq isumaqarpunga pisariaqartoq aamma raajartassat
eqqarsaatigalugit.
Taassuma saniatigut aamma
isumaqatigaarput oqaatigineqarnmat nunani allani ingerlatseqatigiiffiit
siunertanut tunngassuteqanngitsunik akuleruttarneq aamma taanna
killeqartariaqartoq. Taanna aamma isumaqatigilluinnarparput. Kiisalu
ilinniartitaanermut tunngatillugu oqaatigineqartut uniinnartarnernut tunngasut
aammalu nalilersueqqinnissaq massakkut ilinniartitaanermut tunngatillugu
aningaasarpassuit atortakkatta maanngaannaratik ilumut atorfissaminnut
atornissaat taanna nalilersoqqittariaqalerparput, aammalu Inuit
Ataqatigiinninngaanniit pingaartitatta ilagivaat massakkut nalugatsigu
ilinniartorpassuit GU-tut il.il. ilumut ukiorpassuarni ilinniariartornissaat,
nalunngilarpummi Qallunaat Nunaanninngaanneeraanni iserniarneq ilinniarfinnut
ajornakusoortorujussuusoq, taamaattumik pilerinartorujussuusarpoq soorunami
tikisitat meeraannut maanngaanniit ilinniarfinnut qinnuteqarnissaq immikkut
isiginnittoqartarmat.
Taavali naluarput tamakkua ilumut
uternissaminnut pilersaarnersut, paaserusunnaqaaq ilumut aningasat aningaasaliissutigisartakkavut
ilinniaritaanermut tunngasut pissusissamisut aammalu Nunatsinnut iluaqutissatut
siunissaq eqqarsaatigalugu atornerigut.Taamaattumik taanna
erseqqissaatigerusupparput.
Taavalu aamma Inuit Ataqatigiinninngaanniit
siusinnerusukkulli oqaatigisartagarput Nunatta pissarititaanik
piorsaajuarnissaq taanna avaqqunneqarsinnaanngilaq, aammalu Nunatta
pissarititaasa ineriartortinnissaat nioqqutissiarinissaat eqqarsaatigalugu
eqqarsartartoqatigiinnik, taamatut taaneqarsimasoq, taanna aamma
isumaqatigilluinnarpapput, ilaatigut amigaatigisaratsigu aallarniutissatut
ilumut misileraasimanerit, suut
massakkut puisit orsuinut tunngasut ingerlanneqartut taakkua
ajunngitsumik isumalluarfigaavut.
Kisianni taakkuinnaanngitsut aamma
pisuussuterpassuatta allat atorluanngisatta taakkua sumut atorsinnaanerisa
misileraaffigineqarnissaat isumaqarpunga Inuit Ataqatigiinniit
pingaartilluinnarlugu aamma isumaqataaffigigatsigu, kiisalu aamma soorunami
imermut tunngasut taakkua tamakkiisumik isumaqataaffigivavut.
Ilinniaritaanermut naalakkersuisup
oqarneranut ilumut GU-tartut tiguneqartartut taakkua naammassillutik
ulikkaartarput, ilumoorpoq, uanili aamma nalunaarusiami imaluunniit nassuiaammi
ilaatigut erseqqissoq oqaatigineqartoq maanaannaq unittartut ingammik
sanaartorneq aamma eqqarsaatigalugu maanngaannaq unittartorpassuussartut,
tassa affai sinnerlugit allaat ilinniarnertik unitsittaraat.
Aammami aamma allani ilinniarfinni
nalunngilarput ilinniarnertuunngorniat avataatigut immaqa STI allallu
eqqarsaatigalugit oqaatigineqartuartartoq meeqqat atuarfiini naammassisimasat
taakkua annikippallaartartut taamaattumik tamatuma aamma ilorraaq tungaanut,
immaqa assigiinngissuseq annertusimavoq GU-niartunik naammassisuni taavalu allani
ilinniagaqarniartut eqqarsaatigalugit taavalu aamma tigusissarnerit
ilinniarfinnut allanut isigissagaanni, taamaattumik taanna
ersseqqissaassutigilaarusuppara.
Kiisalu Atassutip Siulittaasuanut
oqassuunga saamimmut sangunermi imaluunniit talerpimmut sangunermik
oqariartuutaanut akissutigalugu, uagut Inuit Ataqatigiinniit saqqummiussatsinni
saqqummiuttakavut allanngorianngimmata, tassa taakkua pingaartitagut
saqqummiuppavut, aamma soorunami ineriartornermi peqataarusuppugut, kisiannili
tunngavissat ersarissut takorusuppavut ineriartortitsinerup ajunngitsumik
sapinngisamik tamanut aamma avinngarusimasunut pitsaasumik kinguneqarnissaa
taanna eqqarsaatigalugu.
Tassungalu tunngatillugu
naalakkersuisut Siulittaasuata oqarnera assorsusaq nuannaarutigaarput, tassa
suliffissuit eqqarsaatigalugit Royal Greenlandip avataasiortut amerlillugit
suliffissuit matoorarnissaannik ilaatigut oqaaseqartoqarnera nalunaarusiami
taanna Naalakkersuisuniit suliniutigineqanngitsoq erseqqissumik
oqaatigineqarmat.
Kiisalu naggasiullugu
oqaatigissavara, tassa taanna assigiimmik akeqartitsineq, taassumap
peerneqarnissaa imaaliallaannaq akuerisinnannginatsigu kisiannili
ineriartornermi aaqqiissutissat assigiinngitsut, taanna kisiat pinnagu, aammali
allat periarfissat misissorneqarnissaat kissaatigilluinnaqqissaaratsigu.
Tassami taamatut aaqqinniarnermi
soorunami pisinnaasut aammalu ineriartortitsiviusinnaasut ineriartortitsivigineqarnissaasa noqinnissaat taanna kissaatiginngilarput,
kisiannili nunaminnik imaluunniit illoqarfimminnik nammineq inunngorfimminnik
kivitserusuttut amerlaqaat aammalu periarfissaat nunaminniinnginnarlutik
periarfissaasa assigiinngippallaarnissaat uagut imaaliallaannarlugu
akuersaarsinnanngilarput.
Isumaqarpugut ineriartortitsineq
ataatsimut isigigalugu. Soorunalimi oqilisaanissat taakkua misissortariaqarput
kisianni illuatungaani piigassat sunik taarsenissaat aamma erseqqissumik
paasisariaqarput akuersinnginnermi.
Naggasiutigerpiarlugu Nunatta
aningaasaqarnikkut inissisimanerata killiffia eqqarsaatigalugu ataatsimut
isiginnilluni isumalioqatigiinnik imaluunniit kommission -mik
sunaasinnaavorluunniit tikkuussisussamik pisariaqaritsivugut ukiut 2000-it
iserfissavut eqqarsaatigalugit, pisariaqalerpoq massakkut sattartutut ingerlanata
aqqutissarput sunaasoq inuutissarsiornikkut, aalisarnikkut, ilinnititaanikkut
il.il assigisaanik aqqutissarput ersarissoq isigalugu maani
aalajangiisarnissarput aamma kinguaassagut eqqarsaatigalugit. Qujanaq.
Mogens Kleist, Kattusseqatigiit oqaaseqartuat:
Naalakkersuisut taakkartugaat
assigiinngitsut taakkua uagut Kattusseqatigiinniit tungaaninngaanniit
qujassutigissavavut, aamma partiiningaanniit taakkartorneqartut assigiinngitsut
aningaasarsiornermut tunngatillugu aaqqiissutaasinnaasut.
Naatsorsuutigiluinnarparput ukiamut
Finanslovi ingerlanneqalerpat tamakku assigiinngitsorpassuit siunnersuutit
iternga tikillugit eqqartorneqarumaartut, taamaatumik uagut
tungitsinninngaanniit oqaatigissavarput taakku siunnersuutaasimasut
naatsorsuutigilluinnaratsigit sukumiisumik eqqartorumaassallugit, aammalu
taakkartorneqartut naalakkersuisuninngaanniit assigiinngitsut neriuutigaarput
ataatsimoorluta ukiamut eqqartorumaarigut. Taamaattumik annertunerusumik
oqaaseqarnanga qujaffigissavakka naalakkersuisut taamatut aamma uagut
siunnersuutigisinnaasatsinnit tigusiumasinnaasimammata aammalu ukiap
ingerlanerani nalunngilara taakku eqqartorumaarigut.
Otto Steenholdt, Atassut:
Qujanarluinnarpoq taamatut saqqummiussaqarneq malugalugu aningaasaq pillugu oqallittariaqartarneq, ippassaaninnguakkuni oqaaseq tusagara aningaasat taakku kisimik maani uninngaarfissaanngillat aamma allanik peqarpoq.
Taamatut pinngitsaalillutalusooq aningasaq oqallisigineqaraangat, tassa aatsaat, aamma isumaqarlunga oqartartut inuit aningaasat kisiat oqallisigineqassanngitsumik pinngitsaalineqarlunilusooq oqartinneqaraangata aningaasaq pitinnagu ingerlasoqarsinnaanngilaq. Aamma uagut maani inuiaqatigiit ingerlaasitsinni taamaappoq.
Ukiorpaaluunngillat ilisimatooq Paldam saqqummiimmat Kalaallit Nunatsinni pissutsit qulaajarlugit ersarilluinnartumillu oqarfigaluta, taamatut ingerlaannarsinnaanngilasi privatit periarfissillugit ingerlalinngikkussi aningaasarsiornersi aaqqinnavianngilaq. Assartuineq allarparujussuillu tamaasa qulaajarpai eqqortumik, aamma ullumikkorpiaq OECD-p aamma taamatut oqariartorfigivaatigut ersarivissumik.
Raadiukkut tusarnaarpara Aningaasaqarnermut Naalakkersuisutta taanna nassuiaat akiniarpalukkaluaraa oqariartuulli ersaringaarmat, ukorsiia aningaasaqarnikkut uku aaqqinngikkussigit, privatit periarfissinngikkussigit ingerlaaseq taanna isumannartumik ingerlavoq. Soorunami immaqa politikkeriugaanni naalagaaffik isumalluutiginerullugu ingerlatsisussanik eqqarsarluni OECD-p oqariartuutai akiuminaassimassaqaat.
Taamaattumik tupiginngilara Atassutip Siulittaasuata ersarissumik oqarfigimmasi, tusarnaarlusi saqqummiussasilu takullugit nalunngereerlugu sumut ingerlarusuttartusi, taamatut naalakkersuinikkut sangoriataarneq ersarissumik oqaatigimmagu isumaqatigilluinnarpara, aamma pissusissamisoorpoq.
Kisianni Aningaasaqarnermut Naalakkersuisoq oqaraluarpoq pingaarnerunngitsoq OECD-p saqqummiunneqarnera massakkut, naagga eqqorluinnaqqissaartumik periarfissaq eqqorlugu saqqummerpoq, aningaasanik oqallinnissarput ullumikkut pisoq, tassunga tapertatuut ersarissumik oqariartuuteqarmat naalagaaffiup ingerlatsinipilorujussua taamaatinngikkussiuk aningaasaqarnikkut siunissarsi isumannarpoq.
Taamaattumilliuna taanna isumaqatiginiarsaralugu naalakkersuisut Siulittaasuat aammalu Aningaasaqarnermut Naalakkersuisoq OECD-mut imannak isumaqataanerminnik oqarniarsarigaluartut, kisianni partiimik ilaatigut immaqa akerlilerneqamisaartumik nipilimmik ilalerneqarlutik.
Soorlu Siumup oqaluttua nuannarilluinnarpara imatut oqalummat, tigoriasaarmagit raajarniarneq avataani imaluunniit raajarniarneq tamaat, imatut erseqqitsigisumik oqaatigimmagu, tassa taakkuuku inuiaqatigiit pii. Nalunanngingaarami taanna tusaannarlugu taavalu ilaqutariit piginneqatigiiffiillu aamma saassutarilerlugit, taakkuagooq isumaqassanngillat tassa pigiuassallugit.
Tassa soorlu imaassagaluartoq, naagga naalagaaffiumukua pii, ukua ilaqutariit allallu taakkua naassaanngitsumik piginnissanngillat. Isumaqatigisinnaavarput taamatut allassimammat, nikissinnaassappata ajussanngilarmi. Issualaarpara imatut erseqqitsigisumik oqarmat, taamaattumik pissusissamisuunngilaq pisassiissutit ullumikkut naaffeqanngitsumik piginneqatigiiffiit ilaqutariillu ataasiakkat pigisaattut ilaatigut isigineqarmata.
Danmarkimi tamakkua aalisarnermut ingerlaatsit allaniluunni takugutsigu naalagaaffik tamakkununnga akuliuttussaanngilaq, privatinut tunniunniarli aalisarnerup taanna ingerlanerissavaa, kisianni isumaqatigaara oqarmat, nalagaaffiup pigisaassa ilaasa tunniukkiartuaarneqarnissaat immaqa ilaqutariinnut. immaqa piginneqatigiiffinnut.
Naalagaaffik imaluunniit Namminersornerullutik Oqartussat pisiniarfinnik, aallisarnernik sorpassuarnik ingerlatsinersuat qimallugu tamakkununnga tunniussiartuaarnissamik oqarneq ajunngitsutut uanga nalilerpara. Annerusumik oqaaseqarfigisussaagaluarlugu takulerakku piffissaq imaalereersoq. Nuannarilluinnarpara aamma naalakkersuisut Siulittaasuata uanitsorsiniarsimanini maanngaanniit eqqartormagu.
Ajunngilarmi, kisianni allatut ajornaqaaq assartuineq taama akisutigitillugu uanitsut aamma akitsorsiartortarput, Paldam erseqqissorujussarmik eqqartugaata sanianut ilillulu uanitsut suunngillat. Karsersuarooq nuutassat maanngaanniit Danmarkimukaraangami qanoq akeqartarnera tassani erseqqivissumik taasimasai aamma Naalakkersuisut Siulittaasuata uanitsorsiaminut assersuummagit nuannerluinnarpoq.
Tassungali tunngatillugu oqaatigilara eqqartulaarassiuk timmisartumik assartuisinnaaneq Atlatikoq qulaallugu eqqarsaatigineqannguatsiarmat, timmisartoqarfik suna siunissami tamakkununnga piukkunnarnersoq. Atasssummiit ersarivissumik oqaatigisarsimasarput Aasianni timmisartoqarfik siunniunniarli, taassuma allinissaa imannak allanut naleqqiullugu akisunerunngilaq.
Taama erseqqilluinnartigisumik oqarfigineqareerpugut, allanik tassunga sanilliutassaqaraluarutta akissaqanngilagut, aningaasat ullumikkut oqallisigigatsigit akikinneq pitsaanersumik ingerlasinnaasoq toqqassagaanni oqareertariaqarpoq allanik piukkunnartunik soqangilaq.
Aamma Maliinnannguaq tupigaara oqaannarmat allanngorianngilagut. Aningaasaq taanna eqqartuleratsigu tassa oqaatsikka uterfigeqqiinnassavakka, aningaasaqarnani ingerlaneq ajornaqaaq aamma IA-p Siumullu taanna paasisariaqarpaat. Aningaasaq qitiuvoq, oqallisigisarlu ullumikkut tassarpiaavoq oqartoq ingerlaaseq taanna atuinnassagussiuk aningaasaarnikkut Kalaallit Nunaata siunissaa isumannarpoq.
Taamaattumik Namminersornerullutik Oqartussat aningaasaqarnermut suliffinnilluunnit tigumminninnerujussuat killilersimaarneqalerniarli ilissi- mi oqareernikuuvusi ersarissumik, privatit periarfississigit, naaguna taanna? Oqaasiinnaassanngippat ullumikkut oqallinnermut taanna ilanngussiuk siunissami ingerlariassagutta, Paldamlu OECD-llu oqarfigaatigut taakkua privatit periarfissinneqassasut. Utaqqiinnarsinnaanngilagut periarfissinneqarniarlik.
Josef Motzfeldt, Aningaasaqarnermut Niernermullu Naalakkersuisoq:
Kingullerminngaanniit aallartissaguma soorunami Otto Steenholdt, naluara nalunaarusiaq ullumikkut oqallisigisatsinni aallaavigisarsi atuarsimaneraa.
Tassani pisortat ingerlatsinerujussuata taarseriartuaarneqarnissaa inassutigineqarpoq. Taamaattumik privatit periarfississigit, Atassutip ukiuni sisamani 95-iminngaanniit 99-imut qanoq annertutigisumik suliniutigisimaneraa Ortup immaqa imminut apeqqutigisariaqaraluarpaa.
Taavalu OECD-ermiut Naalakkersuisunut nalunaarusiarisimasaat Inatsisartunut agguaanneqarsimasoq ataatsimilluunniit Naalakkersuisuisooqatigiit ajortuliatut ajortorsuartut ataasiarlutilluunniit nalilersimanngilaat, isumassarsiorfissatsialattut, kisiannili isummiussaat ilassuteqaataalu tamaasa sanninngaarlugit ataatsikkut tamaasa iineqarnissaat naalakkersuisut ataasiarlutilluunniit siunnerfigerusunngilaat, aamma nammineq OECD-p nalunaarusiornermi inassutigisaa tassaavoq mianersortumik pissusitoqqat allorneerakkuutaarlugit allanngortikkiartuaartariaqarput.
Aningaasaq uani qitiutillugu oqallittoqanngilaq, inuiaqatigiinni tulleriiaarineq, inuiaqatigiinni sumut sammiveqarnissarput, qanoq pingaarnersiuinissarput oqaluserineqarpoq, aap, aningaasat atorfissaqartinneqarput, kisianni qitiusoq tassaavoq, suunnuku qanorlu tulleriiaaraluta ingerlatsiniartugut, taanna Otto Steenholdtip paasisimanngippagu ajuusaarnaqaaq.
Kiisalu kommunit suleqatigiinnerunissaannik Inuit Ataqatigiit oqaluttuata oqariartuutaa taanna pingaaruteqartorujussuartut Naalakkersuisut nalilerparput, aamma anguniakkatsinnut ilaavoq, nammineq maani ingerlatsinitsinni aningaasartuutikillisarnitsitullu pingartigaaq, kommunit ukimut aningaasanik taamannanik 6-700 mio. kr.-inik tapiissuteqarfigisakkagut aamma taakkua soqutigisarisariaqarpagut isumaqatigiinniartaratsigimmi bloktilskuditigut qanoq pineqassanersut.
Taakku aamma suleqatigiissinnaannerat qanimut aningaasartuutikillisaanissaq siunertaralugu, tamanna ingerlanneqareerpoq, kommunini annertuneerujartuinnartumik ingerlanneqarpoq qujanartumik.
Kiisalu aarrup neqaa taanna taama mamartigisoq aningaasarsiornikkut killiffik nalorninaatsumik eqqartorneqarmat matumani, eqqaasariaqarpoq ullumikkut Inatsisartuni oqallinnermi ersarissumik toqqammavissaqarluni oqallinneq aallaaveqartoq malunnarmat. Ilimagisariaqanngilarmi tukattunik ersarinngitsunik Inatsisartut saqqummiivigigaanni ersarissumik isummersornissaat ilimagisariaqanngilaq.
Aningaasarsiornikkut killiffik nalorninaatsumik nalunaarutigineqartarsimanngilaq. Aningaarsarsionikkut Naalakkersuisuusimasup ukiuni kingullerni oqalugiaatigaa Nunatta aningaasarsiornera isumannanngitsumik inissisimasoq, tamanna aallaavigalugu Inatsisartut oqallittarsimapput, Naalakkersuisut tassaammata eqqortumik nalunaarusianik Inatsisartunut saqqummiisussat.
Ullumikkut qulaajaavugut, annernarsinnaasut tikittussaavagut, allatut ajornaqaaq, Naalakkersuisuni Inatsisartunilu isumaqartoqassanngilaq nuannersuinnavinnik toqqammaveqarluta oqallisit aalajangertarnerillu isumagissagigut.
Allanngortitsiniarutta mianersortumik, kalluarneqartussallu inuusutissarsiortuuppata, kalluarneqartussat peqatigalugit pilersaarusiorneq ingerlattariaqarparput, siullertulli nalunaarfigisassagut Naalakkersuisuniit tassaapput Inatsisartut, aningaasanik agguaasartut.
Raajarniarnerup allanngortinneqarsinnaaneranik inuiaqatigiinni tamakkiinerusumik iluaqutaanissaata saniatigut, ingerlataqartunut, tassa aalisartunut, iluaqutaanerunissaa siunnerfigisariaqartoq Naalakkersuisut isumaqarpugut. Aningaasat aalisarnikkut raajarniarnikkutmpissarsiarineqartut amerlippata nunatsnni inuutissarsiutinik nutaanik immaqa suliffissaqartitsinikkut iluaqutaasussanik, Nunatta aningaasaqarneranut iluaqutaanerusumik immaqa aalaartitsisinnaanngussuugut.
Iluarsiinerillu oqarnittut ataqatigiissuusariaqarput, ingerlataqartut peqatigalugit mianersortumik pilersaarusiorluakkat.
Mads Peter Grĝnvold, Kattusseqatigiit:
Siullermik Naalakkersuisunut ilaasortaq Steffen Ulrich-Lyngep oqaaseqarmat angallanneq pillugu Upernavimmi Uummannallu eqqaani angallanneq umiarsuarmik piunnaarlugu timmisartukkuinnaq angallannissaq eqqarsaatigineqalersimasoq, taanna qisuariarfiginngitsoorsinnaannginnatsigu Kattusseqatigiinniit qisuariarfiginiarparput.
Tassa naluneqanngitsutut mittarfiliat assigiinngitsut arlallit sanaartorneqarput, aamma inereernikut arlallit soorlu Aasiaat eqqarsaatigalugu illoqarfiit arlaaninnganniit timmisartorluni orninneqarluni ilaasoqaraanngamik inuit tallimat sisamat eqqaanaanni ilaasoqartarput, taamaattumik tamakkua immersorluarniarlugit tassa isummat allanngukaalersimagunarput, tassa aamma takorloorsinnaagakku Upernavimmi Uummannamilu angallanneq timmisartukku umiarsuakkullu ingerlanneqassappat ilaasussat timmisartukkut marluk ataaseq pingasut kisimik ilaasassamata inissanik 50-ini, taamaattumik taamannak angallannikkut pilersaarusiornerlussimanerit takussutissiinnarpaat pitsaanngitsumik piareersaasoqarsimasoq angallanneq eqqarsaatigalugu.
Aamma eqqaangitsoorneqartariaqanngillat timmisartukkut angalasinnaanngitsunik arlalinnik inoqarpoq, aamma tamakku periarfissamik tunineqartariaqarput umiarsuakkut angallassinnaanerminnut. Angallannermi timmisartukkut angallanneq eqqarsaatigalugu akit taama qaffasitsigisut umiarsuarmut unammillersinnaangillat, taamaattumik umiarsuaq sinersortaat suli atuuttuartariaqarpoq Upernavimmi Uummannallu eqqaani, taamaattumik uagut Kattusseqatigiinninngaanniit isummat teqqaajuartut aalajuartut angallannermi pilersaarutit allanngorartuartut nalaanni torernerusumik atuisussat eqqugaasussat, soorlu Upernavik Uummannarlu isumasiorluaqqissaarlugit taamatut eqqorneqarniarpata suna ajornartorsiutaasoq suna iluaqutaasava, tamakkua saqqummiunneqaqqaartariaqarput Inatsisartunut ilaasortanut allanullu.
Jonathan Motzfeldt, Naalakkersuisut Siulittaasuat:
Oqallinneq manna ataatsimut tamaat tusarnaarlugu oqartariaqarpunga soqutiginninneq aningaasarsiornikkut naalakkersuinikkullu ineriartornermut maanni Inatsisartuni soqutigineqarluarpoq, taama oqartariaqarpugut.
Aamma oqaaserineqartut pisarnertut inuiaqatigiinnut tamanik attuipput, aammalu oqallisigisat siammaqalugit oqaasseqarfigineqarlutik.
Naggasiininni una issualaarusuppara, Danmarkimi inuit alutorineqartut ilaata PH-p qanga oqaatigisimasaa nuannarisuugakku issuassallugu ineriartorneq pillugu oqaaserisimasaa, oqarpoq: Ineriartorneq unitsissinnaangilarput aamma naaggaarsinnaanngilarput qaquguluunniit, kisianni ineriartornerup pitsaasortai tigussavagut. Aamma Kalaallit Nunaannut taanna oqaaseq ullumikkumut naleqquppoq, taama oqassaanga, ineriartorneq unitsissinnaangilarput, aamma naaggaarsinnaangilarput, kisianni pitsaasortai tigusassavagut ajortullu igillugit. Taanna isumaqarpunga oqallinnermi maani killiffigisariaqaripput.
Takusinnaavarput Kaassassuk oqaluttuarineqarami pinnguarpassuani allisiinnerminut pissutigigai, taamaalillunilu aamma namminerminut Kaassassummut naalliuutaaqqimmata pissaap inuata qanoq pivaa. Kaassassuk tamanut eqqakattaraa, salippaa. Kalaallit Nunaanni ineriartornermi aamma uagut alliseeqquteqarpugut, kalitaqarpugut oqimaatsunik. Ullumikkut arlaleriarluni taaneqarpoq inuusutissarsiornikkut tapiissuteqarparujorujussuit atorigut, tamaalillutalu sorparujussuit akissarinngisaatut akilerlugit isikkoqartilersarpagut taamaattussatut, tamakkuupput Naalakkersuisut maannakkut qiviarniarlugit nalunaarutigisaat, tassani soorunami pissaap inuatut isiginngikkaluarluta, kisianni takusinnaavarput allisiinnitsinnut aamma tamakkua ilaatigut pissutaasut, aningaasanut tapiissutitta naleqqunnerusumik atugaanissaat pissavagut, tassa isumaginninnikkut, inuit isumagisassagut tapiissutinik allanillu atugaqartinnissaat taanna tunuarsimaarfiginngilarput, aamma taamaalilluta atussavarput taanna, kisianni allatigut nutaamik naliliisariaqarpugut, periarfissagullu aamma atorluarlugit.
Kalaallit Nunaata angallannikkut imminut katikkiartuaarnera najoqqutaralugu Upernavimmut ungaseqisumut, Avanersuarmullu timmisartutigut aaqqiiniarnerit inuiaqatigiit akisoqisumik akilereerpaat, akilerniarlugillu, taamaattumik pisariinnerusumik, sukkanerusumik allatullu aamma akikinnerusumik angalanissat, piffissallu eqqarsaatigalugit angusimagutsigit pilersaarusiorlugu aammalu taama kissaatigineqarmat Upernavimmut timmisartumik ilaasut angallanneqalernissaat aamma tassani oqalisaaseqataajumalluta, taava taanna eqqarsaatigaarput, piviusunngortikkumallugulu.
Raajarniarnermut tunngatillugu, soorunami fabrikkinik allanillu Nunatsinni ingerlassineq, taanna innarlerneqanngitsumik aamma kommunalbestyrelsit, tassani tuniniaasut peqatigalugit, suliffissaqarnermi isumannaallisaanerat aserornaveersarluinnartariaqarmat nalunngilarput.
OECD-p nalunaarutaani tassunga tunngatillugu, aalisarnermut tunngatillugu ataaseq aamma maannakkut Naalakkersuisuusut alaatsinaasaat takuneqareersimasivoq, uagullu aamma takusimavarput, tassalu kvotanik nioqquteqarneq atuuteqissappat, taanna aallartimmat kovatanik taamaalilluni aaqqiinneq, aalisariutinik iluarsaaqqinnerup nalaanni atortussatut isigineqaraluarami, maannakkut suli atuuppoq, atortuarlunilu, OECD oqarpoq, kvotanik nioqquteqarnikkut taava akileraarutinik akileraarusiisinnaaneq eqqarsaatigineqarsimanngitsoq, aap, ilatigut uanga paasisinnaavara Jĝrgen Wĉver Johansen ullumi oqaluttarfimmi oqarpat:
Pisuussutit uumassusillit inuiaat tamarmik pigisaraat, taamaattumik inunnut ataasiakkaanut pigitissallugit, taamaalillugit kvotatut ilillugit kvotamik tunisigaani, namminerlu aalisanngikkaluarlugit nioqqutiginnalersimappagit, aamma taanna eqqunngilaq. Taamaattumik taama pisoqartillugu kvotanik allanillu nioqquteqarnerni akileraarusersuinissanik nakkutilliinnginneq OECD-p uparuarpaa.
Aamma tamakkunatigut alaatsinaasassat pisariaqarput, inuiaqatigiit tamarmik pigisaannik isiginninneq imaappoq, sapinngisamik pisuussutit taakkua iluaqutigineqarneranni nuannersumik qiimasumik aammalu piumassuseqartumik aalisartut atorluarmatigit, qujanaqisumik, pissarsillutaalluarneranni aviffigineqassapput, aammalu kvotat taamatut aamma ilillugit aviffiginnissinnaaneq isigisariaqarpoq.
Tassa oqaatigaara uani assersuutissarparujussuit maani taaneqartut nuannersuummata aammalu tikkuartuimmata, oqaloqatigiinnitta inimi maani uterfigisarnissaannut apeqqutit iserfeqeqqittarumaaratsigit, soorlu aatsaannguaq siuliani Kattusseqatigiinnut oqaaseqaatinni erseqqisariga uterfigisassagatsigit apeqqutit uku, tikitatsinni ilinniartitaaneq tikikkutsigu, tikitatsinni inuusutissarsiorneq tikikkutsigu, tikitatsinni illoqarneq, tikitatsinni isumaginninneq tikikkutsigu tassani ilisarissavagut Naalakkersuisunit oqaaserineqarsimasut maanni, taava tassa piviusunngortinniarneqarneranni qanoq iliuusissat tikikkumaaratsigit.
Taava naggaterpiaatigut oqaatigiinnassavara aamma ataatsimilluunniit apersuuserneqassanngimmat Naalakkersuisut ukiuni tulliuttuni suliassaanut pingaarnerpaarpaanut ilaavoq ilinniartitaanitta pitsaanerpaamik aaqqinniarnissaa, unalu nalunaarusiami uani takuneqarsinnaasoq oqaatigeqqikkusuppara, meeqqat atuarfiata patajaatsumik ingerlanissaa maannakkut atugarliuutitsinni kingornatigut saqqummersuni tamani nalaarparput, meeqqat atuarfiat pitsaasumik ilinniartitsinerit, ilinniartitsisut pitsaasut, sulilluartut, soorlu ullumi taamaattut, atorlugit tunngavissaq tassaniittoq ilusilertariaqarparput, tassaniipporlu aamma meeqqat atuarfianni ukiuni tulliuttuni aaqqissuussamik isumalluarnartunut meeqqanullu nuannersumik aaqqiinnerup sammivissaa.
Maqaassineqarpoq ilaatigut Daniel Skiftep Atassumminngaanniit uani nalunaarummi annertunerusumik quppernernik arlalialunnguanik kisiat taaneqarsimammat, eqqaasanngikkaani, atuarfik nutaamik peqqussusiornikuuvarput, nutaamillu periarfississimallugu, maannakkullu ilaatigut akuleriinnik meeqqanik ilinniartitsiffiunera kaalaallisut qallunaatullu nalilerfissaa qanilliartorpoq, inatsisip taassuma pissusissani eqqorlugu ingerlalersoq naliiffigillassaqqaarparput, soqutiginninnerput atuarfimmut, malinnaanerpullu ilinniarfinnullu malinnaanerput Naalakkersuisuninnganniit maannakkut ukiuni tulliuttunik assut malinnaaffigissavarput, assut ilinniarfissuarmi sulineq pitsaasumik ingerlanissaanut tapersersorusupparput, assut ilinniartitsisut sinerissami suliaannut qiimmassarusuppagut suleqatigalugillu, assut kommunit ilinniartitsisunik atuarfimmilu sulinissaani ilusileeqqataaffigerusupparput. Maskiina ingerlalluartoq atuarfik, meeqqat atuarfiat. pilersittariaqaratsigu, aallariarnitsinni aamma ukiuni tulliuttuni sisamani.
Johan Lund Olsen, Inatsisartut Siulittaasuat:
Qujanaq, taamatullu Naalakkersuisut Siulittaasuat oqaaseqarluni ullumikkut immikkoortoq 9-mi oqaluserisarput, aningaasaqarniarnikkut ingerlatsineq pillugu nassuiaat tamaanga naammassivarput, immikkoortoq 20-mullu ingerlaqqitigata siunnersuutigissavara ilaasortat arlallit suliluunniilli ullaarli aalartikkatali nerinngimmata akunnerup affaanik unikaallassasugut, taava pingasunut ingerlaqqissagaluarpugut.