Oqaluuserisassani immikkoortoq 14-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 17.
maj 1999 nal. 13.20
Ataatsimiinnermi
aqutsisoq: Johan
Lund Olsen, Inatsisartut Siulittaasuat:
Vittus Mikaelsen, Siumut:
Meeqqanut tapiissutit
pillugit Inatsisartut peqqussutaat normu 11, 31 Oktober 1996-meersoq, taavalu
Jaanuarip aallaqqaataani 1997-mi atuutilersinneqarnikuusoq tunngavigalugu,
Inatsisartut oqaluuserisassaannik imaattumik siunnersuuteqarpunga:
Kalaallit Nunaanni
Inatsisartut suleriaasissaanni ' 30 immikkoortoq 30 naapertorlugu, Inatsisartut aalajangiiffigisassaannik
imaattumik siunnersuuteqarpunga:
Inatsisartut
aalajangiiffisassaattut siunnersuut Naalakkersuisut peqquneqassasut 1999-mi
Inatsisartut ukiakkut ataatsimiinnissaanni meeqqanut tapiissutit
tunniunneqartarnerani qummut killigitinneqartup 280.001,00 koruuniusup
peerneqarnissaanik, meeqqat tamarmik meeqqat tapisiaanik pisalersillugit.
Taamatut
siunnersuuteqarninnut tunuliaqutaavoq meeqqanut assigiinngitsitsinerup
illersorneqarsinnaannginnera, meeqqat tapisiaat tunniuunneqarnerannut
atatillugu. Meeqqat tapisineq ajortut misigisimasarput eqqorneqarlutit,
imaluunniit allatut oqaatigalugu immikkoortitaasutut misigisimasarlutik.
Angajoqqaarpassuaasugut
meeqqat nassuiaattaraluarparvut sooq tapisiamik pisannginnerannik, kisianni
taanna nassuiaassineq meeqqat annertunerusumik soorunami paasisaraluarpaat,
uaniipporlu ajornartorsiutip annersaa atuarnerup nalaani anitsiarnermi meeqqat
taama oqaluleraangata meeqqat tapisineq ajortut sakkortoorujussuarmik
eqqorneqartarput.
Allaat ilaat
atuarnissaminnik kajuminnerat killeqalersarluni, taamaattumik taamatut
siunnersuisoqarnermut meeqqat tapisiaannik pineq ajortut, taavalu
amerlavallaarujussuaqimmata Kalaallit Nunatsinni soorunami angajoqqaat sapinngisaminnik
nassuiaattaraluarpaat. Uagut inersimasuusugut assigiinngitsumik pineqarsinnaavugut
aamma eqqarsarsinnaavugut paasisinnaallutalu.
Kisianni uanga
isumaqarpunga meeqqat akornanni eqqarsarsinnaanngitsut akornanni
immikkoortsitsineq taanna peerneqartariaqartoq. Qujanaq.
Mikael Petersen, Isumaginninnermut,
Suliffeqarnermullu Naalakkersuisoq:
Meeqqanut tapisiat
tunniunneqartarneranni 280,001,00 koruuninik qummut killissaqartitsineq peerneqassasoq.
Taamaaliornikkullu meeqqat tamarmik meeqqanut tapisianik pisalersinneqarnissaat
Vittus Mikaelsen-p siunnersuutigaa. Ilanngullugu ikinnerpaaffiliinissaq
siunnersuutigineqarpoq.
Siunnersuut
Inatsisartut Siulittaasoqarfianni Inatsisartut suleriaasissaanni ' 30 naapertorlugu aalajangiiffigisassatut
siunnersuutitut suliarisassanngorlugu innersuunneqarpoq. Meeqqanut tapisiaat
pillugit Inatsisartut peqqussutaat nutaaq 1997-mi januarip aallaqqaataani
atuutilersinneqarpoq, meeqqanut tapisiat meeqqanut 18-it inorlugit ukiulinnut
tunniunneqartarput aningaasartaallu angajoqqaat imaluunniit angajoqqaat meeqqap
najugaqarfigisaasa isertitaqartoqqussusiat tunngavigalugu amerlassusilerlugit
naatsorsorneqartarlutik.
Angajoqqaat tassaapput
soorunami aappariit, imaluunniit inooqatigiit, imaluunniit ilaqutariit
aappariit meeqqap angajoqqaarsiatut najugaqarfigisaat.
Meeqqanut tapisiat
meeqqap pilersorneqarnerannut atugassatut tunniunneqartarput, meeqqallu
pilersorneqarnerannik isumaginnittumut naliginnaasumut qaammmatit
pingasukkaarlugit tunniunneqartarlutik.
Aallaavittut meeqqanut
tapiissutit angajoqqaanut tunniunneqartarput, angajoqqaarsianullu
paaqinninnissamut akuerineqarsimasunut tunniunneqartarlutik. Kiisalu ilaatigut
meeqqanut tapiissutit meeqqanut 15-nik ukioqalereersimasunut ilaannakoortumik
tunniunneqarsinnaasarlutik.
Aaqqissuussineq taanna
pingaartumik ilaqutariinnut meerartalinnut isertitakitsunut akunnattumillu
amerlassusilinnik isertitaqartartunut iluaqutissiisarpoq.
Isumaginninnermut
Iluarsaaqqinnermut Ataatsimiitsitaliarsuup 1997-mi isumaliutissiissummini
oqaatigaa suliassaqarfimmi tassani malittarisassat nutaajusut, taamaattumillu
malittarisassat nutaat taakku aqqutigalugit misilittakkat kingunerisaallu suli
nalilerneqarsinnaanngitsut, imaluunnit uuttorneqarsinnaanngitsut, meeqqanut
tapisiaqartitsinerup saniatigut ilaqutariinnut meerartalinnut
tapiissuteqartarnikkut aaqqissuussinerit arlallit atuupput.
Ilaqutariinnut
meerartalinnut ineqarnermi meeqqanut tapiissuteqartoqartarpoq, meeqqat 18-it
inorlugit ukiullit eqqarsaatigalugit, tapiissuteqartarnermilu
isertitaqqortussuseq apeqqutaatinneqarneq ajorpoq. Tapiissutit taakku
ilaqutariinnut pisortat inissiaataanni attartortittakkani najugaqartunut
ineqarnermut akiliutit 10%-nik annikillisaanikkut tapiissutigineqartarput.
Meeqqamut 18-it inorlugit ukiulimmut ataatsimut naatsorsorlugu meeqqat
arfinilissaat ilanngullugu.
Aammattaaq Boligstĝti
aqqutigalugu illuliorsimasut ineqarnermut meeqqanut tapiissutigineqartarput,
kisianni namminerisaminnik illulinnut piginneqatigiilluni
inissiaatileqatigiiffinnut aamma nammineerluni illulianik pigisaqartunut
tapiissuteqartoqarneq ullumikkut ajorpoq.
Ineqarnermut
tapiissutinik qinnuteqaateqarnissamut aamma periarfissaqarpoq, tapiissutillu
taakku pisortat inissiaataanni attartortittakkani najugaqartut aamma inissiani
attartortittakkani namminersortuni pigineqartuni najugaqartut, kiisalu BSU
tassa Boligstĝti aqqutigalugu illuutiminni najugaqartut isertitaasa ilanngaatissat
ilanngaatigereerlugit aqqiissuteqarfigineqartut amerlassusiat
aalajangiisuutillugu, isertitat ilanngaatissat ilanngaatigereerlugit
aaqqiissuteqarfigineqarsimasut naatsorsorneqartarput inoqutigiit
akileraaruteqaataasumik isertitaat tamarmiusut tunngavigalugit, tassanilu
meeqqamut angerlarsimaffimmi najugaqartumut ataatsimut 18-it inorlugit
ukiulimmut 4000-kruunit ilanngaatigineqartarlutik. Ineqarnermut tapiissutit
taakku isertitat ilanngaatissat ilanngaatigereelugit
aaqqiissuteqarfigineqarsimasut 128.000,- kr-nit sinnersimanngikkaangatigit
tapiissutigineqartarput.
Isumannaallisaanikkut
tunniunneqartartut qulaani taaneqartut tapiissuteqartarnernik aaqqissuussinerit
assigiingitsut aqqutigalugit ilaqutariit meerartallit atungaasa sapinngisamik
pitsaasuunissaannik Inatsisartut qulakkeerinninerattut isigineqassapput.
Oqaatigineqassaaq
meeqqanut inuusuttunullu tunngasut pillugit suliassaqarfimmi ilaqutariit
akunnattumik amerlassusilinnik isertitaqartartut aningaasaqarniarnikkut
pitsanngorsaaffigineqarnissaat oqaluuserineqalermat.
Paasinarsisimavormi
ilaqutariit meerartallit akunnattumik amerlassusilinnik isertitaqartartut
meeqqanik ulluunerani paaqqinnittarfinnut aningaasartortorujuusinnaasartut,
taakkulu ilaqutariinnut meerartalinnut tapiissuteqartarnermik
aaqqissuussinertigut assigiinngitsutigut illuatungilerneqassanatik.
Isumannaallisaatitut
tunniunneqartartut arlallit akornanni tulluanngitsumik ataqatigiisitsisoqarnera
ukiut ingerlaneranni arlaleriarujussuarluni uparuarneqartarsimavoq.
Malittarisassat atuuttut pitsan-ngorsaavigineqarnissaat
pisariillisaavigineqalernissaat nutarterneqarnissaallu Kommuneni
Iluarsaaqqinnermi Ataatsimiitsitaliarsuup pingaarnerusutut
kaammattuutigisimavaa.
Isumaginninnermi isumannaallisaatitut
tunniunneqartartut akornanni ataqatigiinneqartitsinikkut ajornartorsiutit
ilarparujussui tunniunneqartartut ataasiakkaat tunniuneqartarnerini
piumasaqaatit assigiinngitsorujussuit aqukkuminaatsullu
tunngavigeneqartarnerisigut pilersarput.
Tunniunneqartartut
ilaat inigisap suussusia angissusialuunniit tunngavigalugu tunniunneqartarput,
ilaallu inoqutigiit
isertitaat tunngavigalugit tunniunneqartarlutik, allat aappariissuseq
tunngavigisarlugu, ilaasa meerartaqarneq, meerartaqannginnerluunniit
tungavigisarlugu, sulilu allat isertitaqqortussuseq tunngavigalugu
tunniunneqartarlutik.
Piumasaqaatit
assigiinngitsut arlallit ilaanneeriarlutik ataatsikkut
eqqortinneqarsimasuusarput naak imminnut assortuuttuugaluarlutik, imaluunnit
eqqortinneqarsinnaangikkaluarlutik. Aammattaaq pisartakkanik tapiissutinilluunniit
pisariaqartitsinngikkaluartut aamma tunineqartarlutik.
Isumaginninnikkut
isumannaallisaatitut tunniuuneqartartut atuuttut matumani meeqqanut tapisiat
ilanngullugit eqqarsaatigalugit akornanni ataqatigiinneqartitsinikkut
ajornartorsiutinik misissuisussamik suleqatigiissitaliamik Naalakkersuisut
pilersitsipput.
Suliffissaaleqinermi,
napparsimanermi, piginnaangorsaqqinnermi, suliunnaarnersiuteqalernermi il.il.
siunissami isumaginninnikkut isumannaallisaatitut tunniunneqartarumaartussat
pillugit siunnersuutinik suleqatigiissitaliaq saqqummiisussaassaaq.
Siunnersuutinilu taakkunani ilaqutariit meerartallit kiisalu ilaqutariit
isertitakitsut isiginiarneqartussaassallutik.
Aammattaaq
isumaginninnermi isumannaallisaatitut tunniunneqartartut kikkunnut
tunniunneqartarnissaanik isumaliuutersuutit suliassanik nammagassanillu
agguataarineq, kiisalu isumannaallisaatitut tunniunneqartartut
aningaasalersorneqarnissaat pillugu isumaliuutersuutit suleqatigiissitaliamit
saqqummiunneqassapput.
Sulinermi tassani
anguniagaasut ilaat marluk tassaapput ilaqutariit isertitakitsut aamma
ilaqutariit meerartallit tapiiffigineqartarnissaat, kiisalu ilaqutariinnut
meerartalinnut tapiissutaasartut meeqqat pilersorneqarnerinut
naammattuunissaasa qulakkeerneqarnissaat.
Suleqatigiissitaliap
taassuma nalunaarusiamit 2000-imi upernaakkut Naalakkersuisunut
saqqummiussinissaa naatsorsuutigineqarpoq.
Isumannaallisaatitut
tunniunneqartartut ataatsimut isigalugit allanngortinneqarnissaat
kissaatiginartuullunilu pisariaqarpoq. Aammattaaq pingaartuuvoq
isumannaallisaanikkut tunniunneqartartut aammalu ineqarnermut akiliutaasartut
siunissami allanngortinneqarnissaanni ataqatigiisitsisoqarnissaa. Politikkikkut
anguniakkat inatsisiliornikkut aammalu aningaasanut inatsisiliornikkut
anguniarneqassapput. Taamaattumillu isumannaallisaatitut tunniunneqartartut
qanoq iliorluni allanngortinneqarsinnaanerat pillugu suleqatigiissitaliap
nalunaarusiaminik saqqummiussinissaa Naalakkersuisut soqutigalugu utaqqivaat.
Ruth Heilmann, Siumup oqaaseqartua:
Inatsisartuni aalajangiiffigisassatut siunnersuut Naalakkersuisut
peqquneqassasut 1999-imi Inatsisartut ukiakkut ataatsimiinnissaannut meeqqanut
tapisiat tunniunneqartarnerannut qummut killigitinneqartup 280.001 kr.-iusup
peerneqarnissaanik meeqqat tamarmik meeqqanut tapisianik pisalersillugit.
Taamatut Inatsisartuni ilaasortap Vittus Mikaelsen-ip siunnersuuteqarnera
Siumumiit paasilluarparput. Apeqqut taanna meeqqat tamarmik assigiimmik
tapisiatigut iliorfigineqarnissaannut tunngasoq, siusinnerusukkulli
Inatsisartuni ilaasortanik arlaqartunik siunnersuutigineqartareersimavoq
isumaginninnikkut iluarsaaqqinnermut nalilersugassatut ingerlatinneqartunut
ilaatinneqareerpoq.
Taannalu ajornartorsiutaasutut annertuutut isigineqartoq angajoqqaanit
aamma arlalippassuarnit Skolebestyrelsenit kiisalu Isumaginninnermut
Iluarsaaqqinnermut Ataatsimiitsitaliarsuarmit aaqqinniagassatut
imaannaanngitsutut isumaqarfigineqarluni uperuartorneqartareersimallunissaaq.
Taamaattumik Siumumiit isumaqarpugut Isumaginninnermi
IluarsaaqqinnermulluAataatsimiitsitaliarsuup kaammattuutigisai malitseqartinniarlugit
sulineq pimoorullugu ingerlanneqartariaqartoq. Nunatsinni meeqqat
tapisiaqartitaanermikkut isertitaqqortussuseq apeqqutaatinnagu assigiimmik
iliorfigineqarnissaat kissaatigineqarpoq.
Angajoqqaat isertitakitsuunerat aallavigiunnaarneqassasoq
isertitaqqortunerimmi aamma tassaammata akileraarnerpaasartut meeqqerivinnullu
akilersuutitigut akiliuteqarnerpaasartooreerlutik, taakkuullutillu aamma
annertuumik akileraartarnermikkut inuaqatigiit aningaasaqarnerannut
nalimmassaaqataasut, kisiannilu taakkusarlutik meeqqat tapiinik tunineqarneq
ajortut, assigiinngissitsinerullu taassuma meeqqanit angajoqqaanillu
paasiuminaatsinneqartarnera Inatsisartunit ilaasortap Vittus Mikaelse-ip
erseqqissaqqittaa tamakkiisumik Siumumiit tamakkiisumik tapersersorparput.
Taamatut assigiinngisitsineq aamma kollegianit atuartuuteqartut
malugilluartarpaat, tassami inuusuttuaqqat atuartuunersineq ajortut
angajoqqaat pingaartumik arlalinnik pilersugaqartut qitornaminnik kaasarfimmioqartitsiniarnerannut
ajornartorsiortitsilersarmat ajoraluartumik atuartup atuartuuneranut allaat
toqqissisimananngitsumik kinguneqartitsisarluni. Pisariaqartitsineq
naapertorlugu ilumut meeqqamut ikiuinertut isigineqarnera
apeqqusersorneqaannarani aamma kommuunimut allaffissornerujussuarmik
pilersitsisartoq ilisimavarput.
Tamannalu pisariillisaavigineqaqqullugu nutarterisoqaqqullugulu Kommuuninik
Iluarsaaqqinnermut Ataatsimiititaliarsuup aamma kaammattuutaanut ilaareersoq
Naalakkersuisut erseqqissaatigeqqippaa.
Isumaginninnermut Naalakkersuisup akissuteqaataa Siumumiit
isumaqatigaarput, tassami suliassaq annertuujuvoq tapiissutinullu
arlalippassuarnut atuumassuteqartinneqartariaqarluni. Soorlu aamma Isumaginninnermut
Iluarsaaqqinnermi Ataatsimiititaliarsuarmit boligskringimik pissarsisarnermi
killigititaasup qaffaavigineqarnissaaq ilanngullugu pingaartuutillugulu
kaammattuutigineqareersoq nalunngikkipput.
Ullumikkuttaaq inuiaqatigiit ilutsinni paasineqareerpoq akunnattunik
akissarsiallit meerartuut kiisalu kisimiillutik pilersuisut tassaasut
aningaasanik imminnut atugassaminnik sipporussaat appasissorujussuusoq.
Taakkuuppullu tamanit naleqqiullugit atukkamikkut ilungersunartorsiornerpaatut
aamma maanna akunnitsinni nalilerneqareersut.
Assersuutigalugu aappariit sisamanik qitornaqatut isertitamikkut 280.001
kr-inik qulaatilaarsimappatigit isertitaat meerartaat meeqqanut tapinik
atuartuunersiutinilluunniit pissarsisinnanngillat. Sanilerisaallu marluinnarnik
meeraqartut 280.001 kr-ni ataatilaarlugu aningaasarsiaqaruni qitornaat tapisisinneqartarlutik
qaavatigullu atuartuunersianik aamma pissarsisinneqartarlutik.
Taamaalilluni oqartoqarsinnaalluni taakkua marloriaammik
pissarsisinneqartut. Tassanilu takuneqareersinnaavoq meerartuut
pilersuinerminnut aningaasartuuteqarneroreersut ajornerusumik pineqartut.
Taamaattumik ikiorsiissutitigut pisariaqartitsineq naapertornerullugu
ikiusoqatalernissaa Isumaginnermut Iluarsaaqqinnermut Ataatsimiiititaliamit
aamma eqqarsaatigeqquneqarsimavoq. Ikiorsiissutitigut inuiaqatigiinnik
annertoorujussuarmik ullumikkut atuinerput ullutsinnut naleqqukkunnaartutut
Siumumiit isumaqarfigaarput.
Tassami sulinikkut ilinniagaqarnikkullu imminut pilersorsinnaalernissarput
anguniarlugu tamatta ilungersuutissaqarpugut, tamanna inuiaqatigiinnut
akikinnerpaallunilu pitsaanerpaassaaq. Meeqqanut tapiissutit taamatut
ilaqutaariit atugaannik assigiinngisitsumik kinguneqartumik
atuutilertinneqarsimanerat Siumumiit assut akueriuminaatsinneqartarsimapput.
Taamaattumik ukiuni atuutsitaaffianni assigiinngitsutigut
nalimmassaataasunik aningaasaateqarneq tunniussaqarsinnaanerlu naapertorlugu
mattusersuuteeqqanik malitseqartitsiniartoqartarsimavoq.
Meeqqat tamarmik tunngaviusumik naligiimmik pineqarnissartik
pisinnaatitaaffigaat. Taamaattumik Siumumiit siunnersuutigerusupparput meeqqat
tamarmik tapiissutinik pisalernissaat anguniarneqartariaqartoq. Bĝrnecheckimi
Nunani Avannarlerni tunniunneqartartup assinganik Nunatsinni
atuutsitisoqalernissaa naleqqunnerussasutut Siumumiit isumaqarfigigatsigu
tamanna Nalaakkersuisunut suliareqqullugu Siumumiit inassutigissavarput.
Naalakkersuisut oqaatigaat assigiinngitsutigut isumaginninnikkut
tapiissuteqartarnernut tunngasunik suleqatigiissitaliamik pilersitsillutik
suliaqartitsilereersimallutik. Tamanna Siumumiit iluarisimaarparput
qilanaarissallugu ukiuamut saqqummiussaqarnissaat. Siumumiillu Naalakkersuisut
apeqqut taanna kinguarsaqqinnagu saqqummiinissaminni ilanngullugu
suliarissagaat.
Taamatut Siumumiit oqaaseqarluta siunnersuuteqartumut qujavugut,
Naalakkersuisullu ukiamut saqqummiinissaat Siumumiit qilanaarigatsigu
sulilluarnissaanik kissaakkumavagut.
Jakob Siverthsen, Atassutip oqaaseqartua:
Siunnersuutigineqartoq Atassummit pisarnitsitut peqqissaartumik oqaluuserereerlugu
imatut oqaaseqarfigissavarput.
Aaallaqqaammut erseqqissaatigissavarput meeqqanut tapiissutit pillugit
Inatsisartut peqqussutaat nr. 4 11.
november 1986-imeersoq, ' 1 imatut oqaasertaqarmat, issuarpara:
"Meeqqanut 16-it inorlugit ukiulinnut meeqqanut tapisititsisoqartassaaq,
peqqussummi malittarisassat malillugit". Kiisalu ' 2 imatut
oqaasertaqartoq issuarpara: "Meeqqamut tapisiat angissuseqarput ukiumut
1.310 kr-inik " aammalu ' 4-imi imatut piumasaqaateqarluni peqqussut:
"Meeqqanut tapisititsinissamut piumasaqaataavoq akileraarusingassanik
120.000 kr-nit sinnerlugit isertitaqarsimannginnissaq".
Inatsisartut peqqussutaat siuliini oqaatigineqartoq 1996-imi Inatsisartut
ukiakkut ataatsimiinneranni peqqussut annertuumik suliarilluagaasumillu
allanngortinneqarpoq, januarip 1-aniit 1997-imi atuutilersumik. Soorlu
isertitanut qummut killissarititaasoq 120.000 kr-iniit 280.000 kr-inut
qaffasinnerpaaffilerneqarpoq, kiisalu meeqqat tapisiaasa ukiumut annertussusaat
1.300 kr-iniit 4.860 kr-inut annerpaaffilerneqarluni, meeqqanik pilersugaallit
130.000 kr- nit inorlugit isertitaqarsimagaagata.
Taamaalilluni Nunatsinni meeqqat amerlanerpaartaat meeqqat tapisiaannik
pissarsisinnanngorput, kiisalu meeqqat 16-it inorlugit ukiullit tapisianik
pissarsisinnaanerat 18-it inorlugit ukiulinnut aamma qaffatsinneqarluni.
Taamatut peqqussummik allanngortitsinikkut Naalakkersuisuni Inatsisartunilu
anguniakkat, tassa Nunatsinni ilaqutariit pissakinnerusut
ikiorsiiffigineqarnerunissaat piviusunngortinneqarsimalluni.
Taamatut aaqqiissuteqarsimaneq Nunatsinni ilaqutariipparssuarni
pingaartumik pissakinnerusunit iluarisimaarneqartoq Atassummit
suleqataaffigisimagatsigu nuannaarutigaarput. Peqqussutinik allanngortitsineq
landskarsimut annertumik 27 mio. kr-it missaanik
aningaasartuuteqarnerulernermik kinguneqarsimavoq.
Taamaakkaluartoq Nunatsinni ilaqutariippassuarnut meerartalinnut
pissakinnerusunut kiisalu akunnattunik isertitaqartartunut annertuumik
iluaqusiisimammat, imaliallaannarlugu allanngortinneqarnissaa Atassummit
piffissaasorinngilarput, Nunatsinni innuttaasut pissakinnerusut
ikiorsiiffigineqarnerunissaat pingaartittuaratsigu.
Atassumi nalunngilarput meeqqanut tapisiaqartitsinerit saniatigut
ilaqutariinnut meerartalinnut tapiissuteqartarnikkut aaqqissuussinerit aamma
allat atuummata. Soorlu ineqarnermut meeqqanut 18-it inorlugit ukiulinnut
tapiissuteqartarnerit, kiisalu ineqarnermut qinnuteqaateqarnikkut
tapiissuteqarfigineqarnissamut periarfissat.
Nunatsinni ineqarnermut akiliutit qaffasinnerujussuat peqqutaallutik
sulisartunut akissarsiakinnerusunut akunnattunillu isertitaqartartunut assut
ajornartorsiutaasut Atassummiit nalunngilarput. Taamaattumik ineqarnermut
meeqqanut tapiissuteqartarnermik aaqqissuussinerup imaaliallaannarlugu
allanngortinnissaa maannakkut piffissaasorinngilarput.
Atassummiit erseqqissassavarput ineqarnermut meeqqanut
tapiissutigineqartartut ineqarnermut akiligassanut ilanngaatigineqartarmata,
taamaalilluni atornerlunneqarsinnaanatik. Taamatut aaqqissuussisimaneq pitsaasutut
nalilerlugu atatiinnarneqarnissaa Atassumit aalajangiussimavarput.
Ineqarnermut tapiissuteqartarneq, boligsikring eqqarsaatigalugu isertitanut
qummut killissarititaasup 128.000 kr-niusup ukiorpaalorujussuarni
allanngortinneqarsimannginnera sulisartunit akissaatikinnerusunit, kiisalu
akunnattumik isertitaqartartunit minnerunngitsumillu utoqqalinersiuteqartunit
sulisinnaajunnaarnersiuteqartunillu maalaarutigineqartaqisup qaffanneqarsinnaanera
Atassummit suleqataaffigissallugu nalilersueqataaffigissallugulu
piareersimaffigigatsigu, matumuuna oqaatigaarput.
Angajoqqaat meerartallit ulluunerani meeqqanut
paaqqinnittarfimmiititsisarnermi akiliutigisartagaasa assigiinnginnerujussuat nalimmassaavigineqartariaqalerpoq,
Atassummit assut pisariaqartipparput. Ullumikkummi angajoqqaaqarmat
meeqqerivimmiititsinermut akiliinerpaajusartunik, pisortanit
tapiiffigineqarnissamik periarfissaqanngitsunik. Tamakku eqqarsaatigalugit
aaqqiinissaq sanioqqunneqarsinnaajunnaarpoq.
Atassummit innuttaasut isumaginninnikkut isumannaallisaavigineqarnissaat
eqqarsaatigalugit tapiissutigineqartartut assigiinngitsut
nalilersoqqinneqarnissaat siornatigut piumasaqaatigisarsimagatsigik. Matumuuna
Naalakkersuisut suliffissaaleqinermik, napparsimanermi,
piginnaanngorsaaqqinnermi, sulilersitsiniartarnermi il.il. pillugit
suleqatigiissitaliamik pilersitsisimammata iluarisimaaratsigik.
Suleqatigiissitap Inatsisartunut ukioq 2000-mi saqqummiussaqarnissaat
qilanaarluta utaqqissavarput, suleqataanissatsinnullu piareersimaffigalugu.
Meeqqanut tapisiat tunniunneqartarneranni isertitanut qummut killigitinneqartup
280.100 koruuniusup peerneqarnissaanik Vittus Mikaelsenip, Maarup siunnersuutaa
Atassummit tunngaviatigut paasilluaratsigu, erseqqinnerusumillu
isummernissatsinnut aningaasatigut kingunerisassaat Naalakkersuisup
siunnersuummut akissuteqarnermini nassuiaateqarfiginngimmagit tamanna
amigaatigaarput.
Tassami ajornanngippat Nunatsinni meeqqat tamarmik assigiinnerusumik
tapisiaqartitaanikkut Atassumit pisariaqartutut isumaqarfigigatsigu.
Taamaattumik ukioq 2000-imi aningaasanut inatsississaannut siunnersuut
saqqunniuneqarpat apeqqutip pineqartup nalilersoqqinneqarnissaa Atassummiit
kissaatigaarput.
Asii Narup, Inuit Ataqatigiit oqaaseqartuat:
Inatsisartuni ilaasortap, Vittus Mikaelsenip siunnersuutaa meeqqanut
tapiissutit pillugit Inatsisartut peqqussutaata allanngortinneqarnissaanut
tunngasoq. Naluneqanngitsutut meeqqanut tapiissutinik tunniussisoqartarpoq
angajoqqaat akileraarutaasussanik isertitaat tunngavigalugit. Peqqussut maanna
atuuttoq tunngavigalugu isertitassatut killigitinneqartut assigiinngitsut
pingasuupput. Angajoqqaallu 280.000 kr.-nit sinnerlugit isertitaqarsimappata
qitornai meeqqanut tapiissutisisinnaatitaanngillat.
Vittus Mikaelsenip siunnersuutigaa, peqqussut allangortinneqassasoq meeqqat
tamarmik pisartagaqalersinnaaqqullugit. Inuit Ataqatigiinni Vittus Mikaelsenip
siunnersuutaa tunngavilersuutaalu soqutigalugit oqallisigisimavagut.
Siunnersuutip tunngavimmigut oqariartuutaa maluginiarsimavarput, tassa
meerartatta assigiimmik pineqarnissaat. Tamanna Inuit Ataqatigiit
anguniagaannut napertuuppoq. Nunatsinni innuttaasut naligiinnerusumik
atugaqarnissarput ilungersuutitta pingaarnerusut ilagimmassuk.
Iluatungaatigut eqqaamasariaqarpoq peqqusutip pioreersup siunertarimmagu
angajoqqaat isertitakitsut qitornaminnik pilersuinerannik oqilaatissallugit.
Eqqaamasariaqarportaaq Nunatsinni innuttaasut isertitamikkut
naligiinngitsorujussuarmik inissisimammata.
Inuit Ataqatigiini pisussaaffitsitut isigaarput isertitanik
nalimmassaanissaq, aammalu isertitakinnerusut atugaannik
pitsanngorsaaqataanissarput. Taamaattumik angajoqqaat isertitaat meeqqanut
tapiissutinik pisartagaqartitsinermi toqqammavigissallugit
tulluartuusorivarput.
Unali ilanngullugu oqaatigilarput, pingaartikkatsigu isertitassatut
killigitinneqartut nalilersortuarnissaat, tapiissutit tuffissaminnut ilumut
tuttarnersut qulakkeerumallugu. Ukiuni arlaqaqisuni aamma maani inimi
oqallisaasarsimapput ineqarnermut akiliutinut meeqqanut tapiissutit.
Naluneqanngitsutut inissianik attartortut kikkulluunniit meeqqat ineqarnermut
akiliummut ilanngaatigisarpaat, isertitaqqortussuseq apeqqutaatinnagu.
Periuseq tamanna pissusissamisoornersoq oqallinnermi aamma
apeqquserneqartuartarsimavoq. Ilaqutariit ulluinnarni inuuniarnerannut
oqalisaassiniarnermik siunertaqarlutik tapiissutaasartut Isumaginninnermi
Iluarsaaqqinnermut Ataatsimiititaliarsuup eqqartorsimavaat. Makku ineqarnermut
tapiissutit, meeqqanut tapiissutit, ineqarnermullu meeqqanut tapiissutit.
Ilimasaarneqarpugullu ataatsimiititaliarsuup innersuussutai tunngavigalugit
ukioq 2000 upernaakkut peqqussutinut allannguutissanut Naalakkersuisut
siunnersuuteqassasut, taakkualu
ataatsimut oqaluuserisassan-ngorlugit saqqummiunniarneqartut. Inuit
Ataqatigiinnit tamanna ilalersoqaarput, taamaalilluta peqqussutip
allannguutissaanik siunnersuutit ataqatigiissillugit oqaluuserisinnaaniassagatsigik.
Aningaasaqarnermut Naalakkersuisup upernaap ingerlanerani tugassiuutitigut
apersorneqarluni oqaatigivaa, nalilerneqartariaqartunut ilaasoq ineqarnermut
akiliutaasartut, eqqarsaatigeqqittariaqarnerarpaalu isertitaqqortussuseq
aallaavigalugu akiliisitsisalersinnaanissaq.
Tamanna Peqqussutinut siuliani eqqaariikkatsinnut ilanngullugu
oqaluuserisassanngortinneqarsinnaasoq Isumaginninnermi Naalakkersuisup
oqaatigimmagu tusaatissatut tiguarput ilalersorlugulu.
Vittus Mikaelsenip siunnersuutaa taamatut oqaaseqarfigalugu Inuit
Ataqatigiinniit nalunaarutigissavarput, ukioq 2000 upernaakkut
ataatsimiinnissatsinni oqaluusereqqinneqassasoq Naalakkersuisut neriorsuutaat
nuannaarluta tusaatissatut tigugatsigu. Isumaqaratta taamaaliornnikkut
ataqatigiissumik peqqissaartumillu isumaginninnikkut isumannaallisaatitut
tunniunneqartartut oqaluuserineqarsinnaasut.
Loritha Henriksen, Kattusseqatigiit oqaaseqartuat:
Inatsisartuni ilaasortap, Vittus Mikaelsenip siunnersuutaa
Kattusseqatigiinniit sukumiisumik eqqartoreerlugu imatut
oqaaseqarfigissavarput. Siunnersuut tunngaviatigut isumaqatigaarput, makku
pissutigalugit:
Siullermik Kattusseqatigiinniit akuersaarsinnaanngilarput meeqqat assigiinngitsumik
pineqarnerat, uffa massa naalakkersuinermik suliaqartugut ullutsinni
naligiissitaanerup aqqa kikkut tamarmik naligiimmik atugaqarnissaanik
suliniutit anguniarneqartut.
Oqartoqartarpoq meerartagut siunissaraavut, taamaattumik meerartagut
timikkut tarnikkullu peqqinnartumik atugaqartinnissaat assigiimmillu
pineqarnissaat suliniutissaraarput. Taamaammat sooq meerartagut puigussavagut.
Sooq meerartagut naligiinngitsumik atugaqartissavagut. Angajoqqaavisa
akissarsiaat meeqqat annerusumik ilisimasaqarfiginngisaat aallaavigalugit.
Sooq meerartatta ilaat aperiuartissavagut, soormi uanga tapisineq
ajorpunga? Sooq uku meeqqat allat tapisisarpat? Pissutsit
taamaattut meeqqanut paasiuminaapput, meeqqanullu toqqissisimanaratik. Aammalu
meeqqat taamaaliornikkut ersarissumik immikkoortitaasutut atuarfiup iluani
avataanilu misigitinneqartarnerat erseqqissisarpoq.
Taamaattumik apererusunnarpoq naligiissitaaneq sumiippaa, meeqqanut
atuutissannginnerami? Kattusseqatigiinni isumaqarpugut inuiaqatigiinni
suulluunniit suliniutit tunngavigalugit iluarsiniartariaqartut. Tassalu
amerlanertigut meerartatta atugaasa sutigut tamatigut sapinngisamik
pitsaanerpaamik suliniutigineqarnissaat iluarsineqartariaqarlutik.
Tassalu imaappoq; sunaluunniit suliniut tunngavianik
iluarsinianngikkaanni ilaatigut piffissarujussuarmik nukipparujussuarnillu
atulussinnaasarmat eqqaamasariaqarparput. Taamaattumik suliap sukumiisumik
suliarineqarnissaa aammalu aningaasatigut qanoq nalilersorneqarnissaa misissoqqittariaqartoq
Kattusseqatigiinniit inassuteqaatigiumavarput.
Matumani ilaatigut Isumaginninnermi Iluarsaaqqinnermi
Ataatsimiititaliarsuup suliaminik naammassinnilluni saqqummiussineranit
eqqartugai uterfigeqqillugit. Suliap Isumaginninnermut Ataatsimiititaliami
suliareqqinneqarnissaa kaammattuutigissavarput.
Kattusseqatigiinnillu suliamut tunngatillugu ilanngullugu
misissugassatut ukua taarusuppagut, misissoqqullugit. Ilaqutariit
assersuutigalugit ukiumut 500.000 kr-inik, taakkuluunniit sinnerlugit
aningaasatigut isertitaqartut ilumut ineqarnermut meeqqap
tapiiffigineqartarnerannut ingerlatiinnarneqartassanerpat. Imaluunniit apeqqutigineqartariaqarpoq
ilumut taamatut tapiissutit Nunatta karsiata akissaqartissavai.
Takorloorneqarsinnaammammi meeqqat assigiimmik
tapisiaqartinneqarsinnaanerat ilaatigut taakkuninnga
aningaasalersorneqarsinnaanera isumaqarfigigatsigu. Naggataatigut
Kattusseqatigiinniit uparuarusuppagut meeqqat tapiisa tunniunneqartarnerini
ilaatigut imigassamut atornerlunneqartarnerat isiginngitsuusaaginnarneqarsinnaangimmat,
naak angajoqqaarpassuit meeqqat tapiinik ajunngitsunik atuisaraluartut.
Taamaattut angajoqqaat amerlavallaaqaat, meeqqat tapiinik
atornerluisartut. Taamaattumik Kattusseqatigiinniit kaammattuutigerusupparput
meeqqat tapii meeqqanut pitsaasumik sunniuteqarsinnaanerat anguniarlugu
immikkut ittumik iliuuseqartoqartariaqarnissaa. Soorlu assersuutigalugu meeqqap
tapiisa ilaasa meeqqanut
ileqqaagassatut immikkoortinneqalersinnaanissaat suliniutigineqartariaqartoq.
Taamaalillutik meeqqat siunissami ilinniagaqarnissamut imaluunniit siunertamut
allamut pitsaasumut nammineq atugassaqarnissaat qulakkeerumallugu.
Taamatut oqarluta siunnersuut Inatsisartut Isumaginninnermut
Ataatsimiititaliamut suliareqqinneqarnissaa inassutigissavarput.
Vittus Mikaelsen, Siumut:
Siullermik
nuannaarutigaara siunnersuutigisara taama erseqqitsigisumik partiinit
tamaginninngaanniit aamma Kattusseqatigiinninngaanniit ilassineqarmat. Tassani
kisianni maluginiarsimavara oqaluuserineqartoq arlaannut
akulerutsinniarneqarnera.
Boligsikringit,
akissarsiat qaffasinnerpaaffissaat, suliffissaqannginneq, napparsimaneq.
Tamakkua mikinerpaamilluunniit uanga eqqarsaatiginngilakka, pissutigalugu:
Tamakkuukua inersimasut akisussaaffigisaat, inersimasut nammineq qanoq
iliornissaanik saaffiginnissutissaat. Ukua meeqqat nammineersinnaanngitsut,
isumaqarpunga una oqaluuserisassanngortitsininnut ersersinniarsarigiga,
oqaluuserineqartup qitia, qitivia sunaana. Tassa tassani pineqarput meeqqat
nammineersinnaanngitsut ulluinnarni inuunerminni aqqusaartagaat.
Taavalu meeqqat
amerlavallaarujussuaqaat atuarnerminnik nalaanik, soorlu aallaqqaataanik
oqaatigiginga taanna, atuarnerup nalaani taavalu meeqqat sumiluunniit katersuuffigisartagaanni
misigisarnerat immikkoortitaallutik.
Oqaluuserisassami
pineqartumi pineqarput meeqqat, makku inersimasut susassaqarfigisaat,
ineqarnermut boligsikringit, akissarsiat qaffasinnerpaaffissaat,
napparsimanersiutit pineqanngillat. Isumaqarpunga partiit tamarmik
oqaaseqartuisa taanna pulaffigisaat. Kisianni naggataagut tamarmik
erseqqissumik taavaat una; ukiassamut budgetip sammineqalernerani
Naalakkersuisoq tassani saqqummiussisariaqartoq, aalajangiiffigisassatsinnik.
Taamaattumik uanga tunginninngaanniik neriullunga qilanaarpunga, aamma
naatsorsuutigaara sineriassuarmi tusarnaartut aamma
anillariarfigisinnaasaminnik meeqqat eqqarsaatigalugit periarfissinneqartut.
Taamaattumik uanga
oqaluuserineqartoq taamatut Naalakkersuisumut piumasaqartoqarnera partiinit
tamagininngaanniit assorujussuaq qujassutigaara.
Mikael Petersen, Isumaginninnermut
Suliffeqarnermullu Naalakkersuisoq:
Tupinnanngitsumik
isummat assigiinngitsut ersarilluinnartut Inatsisartuninngaanniit
saqqummiussuunneqarput. Partiit kiisalu Kattusseqatigiinninngaanniit
saqqummiunneqartut assigiiaarput, taamatut oqartariaqarpunga. Aamma
misilittakkat ullumikkut aallaavigalugit paasinarluarpoq
tunngavilersorluakkanik saqqummiisut tamarmik saqqummiusaqartut.
Siumuminngaanniit
ilanngullugu inassutigineqartoq paasivara tassa, meeqqat tamarmik
pissariaqalersinnaanissaat siunertaralugu Naalakkersuisut
aaqqissuussisariaqartumik inassuteqartoq. Tassa Nunani Avannarlerni
aaqqissuussinerit assigiinngitsut ingerlanneqartut taakkununnga assingusumik,
soorlu Danmarkimi bĝrnecheckimi taaneqartartoq, meeqqanut checki
tunniunneqartartoq angajoqqaat aningaasarsiaat apeqqutaatinnagit
ingerlanneqartoq taamatukkanneq ittumik saqqummiisoqarsinnaanera
inassutigineqarluni.
Soorunami tamanna
Naalakkersuisuninngaanniit misissussavarput. Soorlu aamma Siumup inassutigisaa
taanna, Nunani Avannarlerni assigiinngitsuni misilittagaqarfigineqarluni
ingerlanneqartoq. Soorunami taamaattumik eqqussissagutta eqqaamassuarput aamma
naleqartussaassammat. Kisianni aaqqissuussinerit allat ullumikkut atuuttut
aaqqissuussinerit iluarsiiffigineqarnerannut ilanngullugu qanoq taassuma
kinguneqarsinnaanera Naalakkersuininngaanniit misissussavarput.
Taassuma saniatigut
Siumumiit eqqartorneqartoq assigiinngitsut taakkua Naalakkersuisuni
nalilersuinitsinni ilanngullugit tigussavagut, annertunerusumik
oqaaseqarfiginagit. Kisianni paasinarpoq Siuminnganniit, siunnersuut Vittus
Mikaelsenimit saqqummiunneqartoq, tamakkiisumik tapersersorneqartoq.
Atassumminngaanniit
saqqummiunneqartut aamma arlaliupput. Tassalu siullermik maluginiarpara
ilaatigut meeqqerivinni akigitinneqartutigut akunnatsumik isertitallit
pitsaanerusumik aaqqiivigineqarnissaat, taanna aamma pingaartinneqartoq.
Tamatumani apeqqutit assigiinngitsut aamma nutaajunngillat, tassami siunnerusukkut
Inatsisartut tamanna pillugu aamma saqqummiussaqartarsimapput.
Oqaatigissavara
tassunga tunngatillugu meeqqerivinni akigitinneqartartut pillugit aammalu
Nunatsinni meeqqerivinnik pilersitsisarneq, ulluunerani paaqqinnittarfinnik
pilersitsisarneq pillugu suliaqaratta Naalakkersuisuni, tassa nutarterinissaq
aamma Isumaginninnermi Iluarsaaqqinnermi Ataatsimiititaliarsuup inassuteqaataannut
naapertuuttumik nalunaarusiorneq ingerlakkatsigu. Naatsorsuutigaara tassani
pisariillisaaneq aammalu akigititatigut nalimmassaanissaq siunertaralugit
nalunaarutissaq naammassineqarsinnaajumaartoq ukiup matuma ingerlanerani.
Aamma paasinarpoq
naggataatungaani Atassutip oqaaseqarnermini apeqqutit assigiinngitsorpassuit
aamma oqaaseqarfigigaluarlugit, kisianni aamma erseqqissaraa soqutiginnilluni
Vittus Mikaelsenip siunnersuutaata Naalakkersuisunit
misissuiffigineqarnissaanut aammalu Naalakkersuisut ukiamut aningaasanut
inatsississap suliarineqarnerani tassa 2000-imut aningaasanut inatsisissap
suliarineqarneranut atatillugu Naalakkersuisut saqqummiussaqarsinnaanerat aamma
naatsorsuutigalugu oqarmat.
Inuit
Ataqatigiinninngaaniit ersarilluinnartumik oqaatigineqarpoq Naalakkersuisut
saqqummiussaanni tassa suleqatigiissitap ataatsimoortumik aaqqiissutissatut
saqqummiussassaa Naalakkersuisunit Inatsisartunut saqqummiunneqarumaartussaq
taanna utaqqimaarniarneqartoq. Taamaalilluni ataatsimoortumik aaqqiissutissat
inatsit aningaasalersuinissallu qulakkeerumallugit.
Aamma naggataatungaani
paasinarpoq Vittus Mikaelsenip siunnersuutaa tassani aallavigalugu Naalakkersuisut
eqqarsaasersorsinnaanerat ammaffigineqartoq. Tassami meeqqat naligiimmik
pineqarnissaannik anguniagaqarneq, periarfissaqarnissaannillu ersarissumik
aamma taaneqarmat.
Kattusseqatigiinniit
ilanngullugu oqaatigineqartut soorunami partiininngaaniit allaninngaaniit
oqaatigineqartunik allaanerunngillat, aanali maluginiagara ilanngullugu
taaneqarmat ullumikkkut meeqqat tapiisa aningaasanngorlugu tunniunneqartartut
ilaatigut eqqunngitsumik atorneqarsinnaasarnerat taanna uparuarneqartoq,
oqarneq eqqunngitsumik imatut paasivara meeqqamut/meeqqanut tunngatullugit
aningaasat atorneqannitsoortarnerat tassani uparuarneqarpoq.
Naalakkersuisuninngaanniit
minnerunngitsumik uanga Isumaginninnermi Naalakkersuisutut tamanna pillugu
oqaatigissavara aamma soorunimi saaffigineqartarama, aammalu kommuunit
tungaanninngaaniit tamanna arajutsisimaneqanngitsoq, isumaqarpunga
oqarsinnaallunga.
Taamaattumik partiit
aammalu Kattusseqatigiit saqqummiussaat paasinarluarpoq, Naalakkersuisunit
Inatsisartunillumi aaqqissuusseqqinnerup kingunerisariaqaraa, aningaasat
meeqqanut tunngatillugit ikiorsiissutaasartut, meeqqanut
naapertuilluarnerusumik atuutsinneqarnissaat qulakkeerniartariaqartut,
inatsisiliornikkut.
Tamanna soorunami
siunertaralugu suleqqissaagut aaqqissuussineq qanoq ikkumaarnersoq massakkut
oqaatigisinnaanngilarput Naalakkersuisuniit. Kisianni mississuinerit aammalu
inunnik isumaginninnikkut aningaasaliissutinut allanut naapertuutumik
ataqatigiisitsisumillu, tassa ineqarnermut tapiissutitigut, ineqarnermut
meeqqanut tapitigut aaqqissuussinerit nutaamik aaqqissuunneqarnerannut
tulluuttup, imatut immaqa oqaatigalugu ataqatigiissumik aammalu qularnaarisumik
meeqqanut pitsaasumik pinninnissamik aaqqiisutissaasinnaasumik Inatsisartunut
naatsorsuutigaara saqqummiussaqarsinnaajumaarluta.
Kisianni aana
maluginiagara amerlanerussuteqangaartut Inatsisartuni inassutigigaat meeqqat
Nunatsinni ullumikkut 18.000-iusut 18-init inorlugit ukiullit, 18.000-t missaaniittut taakkua sapinngisamik
immikkoortitsinertaqanngitsumik periarfissaqartinneqarnissaat
inassutigineqarpoq.
Aningaasat tungaasigut
Naalakkersuisuniit maannakkut saqqummiussaqanngilagut, ilumoorpoq Atassutip
maqaasisaani, tassami ullumikkut aajuna nalunngisarput, ukiumut aningaasanik
inatsisikkoorlugit 40 mio.kr.-ngajaat immikkoortittarpagut meeqqat tapiinut,
taamatut ateqarmata ullumikkut. Nutaanillu aaqqiinissaq qularutissaassanngilaq
qanorluunniit ilusilimmik aaqqiissagaluarutta ullumikkut aningaasatigut
ilaqutariit atugarisaat qiviarutsigit, aamma pitsaanerulersitsissagutta
qularutigineqassannilaq suli annertunerusumik
aningaasaliisuteqartariaqarnissaq.
Ullumikkut
aaqqissuussineq naatsunnguamik oqaatigalugu tassa 130.000 kr.-it inorlugit
aningaasarsiallit ukiumut meeqqamut ataatsimut tapiiffigineqartarput 4.860
kr.-init taavalu 180.000 kr.-init, tikillugu aningaasarsiallit
tapiiffigineqartarput ukiumut 3.240 kr.init meeqqamut ataatsimut, kiisalu aamma
minnerpaaq tassalu 280.000 kr.-it tungaanut aningaasarsiallit taakkua
tapiiffigineqartarlutik meeqqamut ataatsimut ukiumut 1.620 kr.-init, taakkualu
tamarmik soorunami kvartalikkaarlugit tunniunneqartarput angajoqqaanut.
Angajoqqaat qinnuteqarsimappata, taanna erseqqissaatigissuara. Tassa
angajoqqaat qinnuteqarsimanngitsut pisinnaagaluarunilluunniit
qinnuteqarsimanngitsut, pineq ajorput.
Taamannak
oqaaseqqillunga oqaatigissavara Naalakkersuisuninngaaniit misilissagatsigu,
tassa amerlanerussuteqartut paasisakka malillugit inassuteqaataat, meeqqanut
tapitigut nutaamik aaqqiisoqarsinnaanera ilanngullugu ukiamut aningaasanut
inatsisissap suliarineqarnissaanut Naalakkersuisut saqqummiisinnaanissaat.
Erseqqissaatigeqqissavaralu
ineqarnermut tapit aammalu ineqarnermi meeqqanut tapit avaqqunneqarsinnaanngimmata
ilanngunneqarnissaat inatsisitassaat kiisalu aamma aningaasatigut qanoq
kinguneqartinneqarnissaat. Tassani apeqqutaangaatsiartussaavoq
angumerineqarsinnaassanersut, kisianni tassa Inatsisartut inassutigaat taakkua
angumeriniassagigut aamma tamanna misilissavarput.
Otto Steenholdt, Atassut:
Meeqqanut tapit
najoqqutassarititaasullu tassunga atuarlugit allaanngiivipput inoqajuitsorsuakkut
ingerlaarluni, imaluunniit qerruinnarsuartigut ingerlaarluni.
Siunnersuuteqartoq
isumaqatiginarpoq, isumaqarmat ilaliussat ajortumik pisut peerlugit, aajuna
kisimi oqaatigisassaq, meeqqat inuiaqatigiinninngaaniit aningaasarsiassaat
oqallisigissavavut. Illoqarnera sussagatigut ataataasoq anaanaasulluunniit
qanoq iliorluni illutaarsimanera ineqarnera tamakkua meeqqamut aningaasanik
pisariaqartumut kakkersuuttariaqanngilluinnartutut oqaatigineqamata
isumaqatigilluinnarpara.
Ammalortumik
titarsigutta meeqqaninngaaniit aallartillugu taava ammalortup isua utoqqarnut
periarluta ataatsimut katissapput. Neriuutigilluinnarpara aamma utoqqaat
aningaasarsiaat pilerutsigit apeqqut taanna Kattusseqatigiinninngaaniit
apeqqutigineqaqattaartoq, naanguna assigiisitsineruna naak? Neriuppunga taanna
aamma tikikkumaarlutigu utoqqalinersiutit pilerutsigit massakkut taakkua
saaffigissanngikkarlarpakka.
Tassa taamaatumik
oqaaseqartut avataatigut uanga isumaqartarama inuiaqatigiit aningaasat
tunniussaat atorfissaanut atussappata tassaapput meeqqamut tuttussat, meeraq
sumulluunniit pigaluarpat angajoqqaani qimallugit imaluunniit allamut
nuussagaluarpat aningaasartaasa malissavaat apeqqutaatinnagu iserfigisaa qanoq
ittuunersoq. Aamma qassinik qatannguteqarnera oqareernittut illu qanoq
sananeqarsimarnera, tamakkua pinnagit qanortoruna oqaatigineqarli aningaasaq
aajuna meeqqap pissaa, tassa inuiaqatigiit tunniussaat aamma qatanngutai
taamaassapput, soorlu siunnersuuteqartup oqaatigigaa assigiimmik tamaasa immaqa
appaallatsitsinissaq eqqarsaatigineqarsinnaavoq aningaasassaaleqineq
pissutigalugu.
Eqqarsaatit tamakkua
nuanneruttormata maanngaaniit oqaatigiinnarpara tunniunneqartussat allanik
ilalersornagit meeqqanut tunniunneqarniarlit, taanna kisiat aallaavigalugu.
Asii Chemnitz
Narup, Inuit
Ataqatigiit oqaaseqartuat:
Otto Steenholdt
apeqqutigivaa sooq? Sorpassuit ilanngussuullugit oqallisilissuugut, sooq
meeqqat angajoqqaavi taputartuullugit eqqartussavavut. Peqqutigalugu meeqqat
akisussaaffigimmatigit qitornatik. Taamaattuumik uagut aamma ippassaani
oqaatigivarput meeqqat silaannaqanngitsumilusooq inuunngillat, kisianni
angajoqqaaqarput. Taakkualu pilersuinissamik akisussaaffeqarput. Taamaattumik
meeqqat angajoqqaallu ataatsimut isigalugit uagut eqqartuerusuttarpugut.
Aamma Inuit
Ataqatigiinninngaanniit oqaatigeqqissavara oqaatigiuartagarput una
isertitakitsut aamma akunnattumik isertitaqartut taakkua
oqilisaavigineqarnissaat peqataaffigerusupparput, aamma matumani.
Aamma angajoqqaat pilersuinissaminnik
pisussaaffimminnik pitsaasumik naammassinnissinnaanissaat
aqqutissiuusseqataaffigerusupparput. Taamaattumik una
oqaaluuserisassanngortinneqarsimasoq soqutigivarput, minnerunngitsumik aamma
Naalakkersuisuninngaaniit akissut torragisorujussuullugu nuannaarutigalugu
ataqatigiissumik suliniutit isertitakinnerusumit meerartalinnut sammisut
ataatsimut eqqartornissaat siunnersuutigimmassut.
Taamaattumik meeqqanut
tapiissutit ineqarnermut tapiissutit, ineqarnermi meeqqanut tapiissutit
ataatsimoorullugit ataqatigiissumik eqqartorneqarnissaat uagut
ilalersoqaarput. Siusinnerusukkut oqaatigereerpara peqqussutip maannamut
atuuttup aaqqissuussaanera tunngaviatigut iluarisimaaratsigu, tassa
akuersaarparput angajoqqaat isertitaat tunngavigalugit tunniussisoqartarmat.
Tassuunakkut isumaqaratta qulakkeersinnaallutigu pisariaqartitsinerpaanut
aningaasat taakkua tuttassasut.
Kisianni
ammaffigivarput aamma ukiamut poortugaq taanna poortukkamut ataatsimut
immersorlugit malittarisassat ataatsimoorullugit eqqartornissaanut ilumut
meeqqanut tamanut tuttussamik checkimik nassiussuisalissanersugut. Kisianni
suleqatigiissitap suliai naammassereerlugit tunniunneqarpata uagutsinni
nalilersueqqikkumaarpugut. Piareersimavugut suleqartaanissatsinnut aamma
kajumissuseqarpugut, kisianni mianersuutigisassaq unaavoq. Imatut
nipeqaleriataarami ajunngitsumik isertitaqartut meerai qanoq nallinnartigisut,
taanna isumaqarpunga sangutitsinerusoq oqallinnermik. Uani pineqarput
isertitakitsut meerai qanoq ililluta oqilisaavigisinnaavavut, imaluunniit
ikiorsiivigisinnaavavut.
Soorunami Vittus
Mikaelsenip siunnersuuteqarnermiut tunngavilersuutigisai taakkua peqqussutip
kingunerisartagai, meeqqanik assigiinngisitsineq taanna soorunami
eqqaamasariaqarpoq, kisianni inersimasut uagut angajoqqaat pisussaaffeqarpugut
meeqqap inuunermini naapitassai suulluunniit oqaloqatigiissutigissallugit.
Inuiaqatigiit
aaqqissuussanerat taavalu taassuma equngassutai ilaqutariinni sunik aamma
nassataqartartoq taanna ilanngullugu eqqartortariaqarpavut qitornagut
ilagalugit, apeqqutit tamalaat qaammarsaavigalugit ilanngullugit aamma
aaqqiagiinngissutit inuiaqatigiinni, taakkua aamma isummersorfigisariaqarpagut
angajoqqaatut. Aamma meeqqanut tapiissutit taamaliorfigisariaqarpagut, aatsaat
taamaaliornikkut angajoqqaat akisussaaffipput pitsaasumik naammassisimallugu
oqarsinnaassuugut.
Ruth Heilmann, Siumu p oqaaseqartua:
Uaguttaaq Siumumiit Naalakkersuisut akissuteqarnermini ilassinnilluarnera
aamma qujassutigissavarput. Aammalu Siumumit oqaaseqaratta siunnersuuteqarpugut
ukiamut saqqummiinissaq taanna pingaartikkipput, uanilu partiit allat
Naalakkersuisut upernaamut saqqummiiniarnerat taanna iluarisimaarlugu
oqaatigivaat.
Taamaattumik erseqqissumik paaserusunnassaaq, qaquguuna saqqummiiniartoqartoq
tassa isumaqaratta uagut Isumaginninnermut Iluarsaaqqinnermut
Ataatsimiititaliarsuup, aamma innuttaasut annertuumik taanna
oqaluuserereermassuk, aalajangiinissaq taanna pigaartikkipput aamma taamatut
siunnersuuteqartoq kissaateqarmat, taanna uagut tapersersorsimavarput.
Ilumoorpoq suut tamarmik tapiissutaasartunut tunngasut aningaasanik
naleqarput, kisianni aningaasat taakku atorneqartussat ilumut eqqortumik
atortinneqarnersut taanna uagut pisussaaffigaarput Inatsisartuni aamma misissussallugu
aammalu paasiniartuassallugu atuutitilikkavut taakku inatsisit ilumut
naapertuutumik inunnut aamma atuuttuunersut, tassunga ilanngullugu meeqqanut
tapisiat ukiut arlalialussuit imaluunniit arlaqalaartut, immaqa taamatut
oqarluni, ingerlareersimaleraluartut naak, ukiut arlaqanngitsut
qaangiutiinnartut equngassutaat aamma uperuartorneqalereersut tassani aamma
eqqumaffigerusuppagut aammalu aaqqiivigineqarnissaat taanna Siumuminngaaniit
anguniarusupparput.
Atassutip oqaaseqartuata oqaasissani ilaatigut immaqa poortorlugit tassani
nassuerutigimmagu aamma Otto Steenholdtip Atassutip soorunami meeqqat aamma
naligiissumik pineqarnissaat taanna
kissaatigigaat naggataatigullu taanna ersarissumik aamma Atassutip oqaaseqartuata
oqaatigimmagu tassami ajornanngippat Nunatsinni meeqqat tamarmik assigiimmik
pineqarnissaat aamma Atassummiit taanna isumagineqarmat aammalu tassuunakkut
Otto Steenholdtip aamma isumaqatigalugu aammalu pimooruteqqullugu aamma taanna
oqaaseqarpoq. Taamaattumik erseqqissumik isummissagaanni poortornagu maani
oqaluttarfimmi isumaqarpunga isumaq ersarissoq oqaatigisaraanni
ajunnginnerpaasassasoq.
Uani IA tassani malunnarpoq maannakkut ingerlanneqaannarnissaa ilaatigut
toqqammaviatigut kissaatigigaa, kisiannilu Siumumiit uagut paasisagut imaakkamik,
isertitaqqortussuseq najoqqutaralugu massakkut atuutsinneqarnera
qitornaqartunut amerlanerusunut qitornaqartunut pilersugaqartunullu
naapertuutinngitsumik massakkut atuutsinneqartoq, tassami taakkuummata
aningaasartuuteqarnerpaasartut meeqqanut. Taamaattumik tassunakkut
nalimmassaanissaq pingaartillugu uani erseqqissaateqarsimavugut.
Uanilu aamma siunnersuutigisimallugu meeqqat naligiimmik tamarmik
pineqarnissaat bĝrnecheck ilaatigut aqqutigineqarsinnaasutut aamma tikkuarlugu.
Tassani Kattusseqartigiit aamma isumaqarpunga tunngaviatigut aamma siunnersuut
isumaqatigigaat, taannalu aamma nuannaarutigissavara, uanilu aamma ilaatigut
oqaaseqarnermini imaluunniit qupperneq 2-mi taamaattumik apererusunnarpoq
naligiissitaaneq sumiippa? Ilaatigut tassuunakkut isumaqatigivassi tassami
naligiissitaanermi siunnersuisoqatigiit aamma isumaat neriuppunga aamma ukiamut
una eqqartorneqaqqilertinnagu aamma tassani paasiniaavigineqarumaartut.
Uani meeqqanut tapiissutit meeqqanut nuannaarutaasumik tutsinneqarlutik
atorneqarnissaat taanna pingaaruteqartorujussuuvoq, tassami meeqqanut
tapiissutit malunnartumik meeqqanut tutsinneqartarsimassanngippata taava
siunertaa tassani siunertani naapertorlugu atuutsinneqartarsimassanngilaq.
Taamaassappat assut ajuusaarnarpoq tassanilu kommuunit eqqumalluarnissaat
taanna kisimi aqqutissaavoq, tassami taakkua piginnaatitaapput ilaatigut
rekvitisionikkut aamma meeqqanut tuttussanik tunniutaqarsinnaallutik. Taammaattumik
tassani pingaarpoq eqqumalluarnissaq meeqqat tapiissutaat sumut
atorneqartarnersut taanna iluamik malittarissallugu.
Taamaattumik uagut siumut qilanaarpugut neriulluta ukiamut
uterfigineqaqqippat tamakkiisumik aaqqiivigineqarumaartut. Tassani siumut
neriuppunga aamma siunnersuutigisaa aamma partiit Kattusseqatigiillu ukiamut
oqaluusereqqinneqarnissaannut Naalakkersuisunut kissaateqarnertik, taanna aamma
Naalakkersuisup akuerereermagu, neriuutigaarput ukiamut saqqummeqqikkumaartoq.
Lars Sĝrensen, Inuit Ataqatigiit:
Tassa siullermik Siumukkormiit apeqqutigisaannut tunngatillugu aamma
soorunami Inuit Ataqatigiinninngaanniit aamma uagut soqutigivarput
tapiissutinut assigiinngitsunut tunngatillugu ukiamut Naalakkersuisuninngaanniit
saqqummiussaqarnissaa.
Apeqqummi uani eqqartorneqartumi meeqqat tamarmik assigiimmik
pineqarnissaannut tunngatillugu isumaqarpunga illuatungaannarsiorluni
oqallinneq maannakkumut ingerlanneqartoq. Maannakkut oqallinneq
isiginiarneqarpoq meeqqat ulluinnarni amigaateqanngitsut, ulluinnarni
assigiinngitsutigut inuuniarnermikkut amigaateqanngitsut isaanninngaaniit
isigalugu oqallinneq maannakkumut taanna ingerlanneqartoq.
Meeqqat assigiimmik tamarmik pineqarnissaat siunnerfigisariaqarpat taava
aamma sanngeequtaasut eqqartorneqartariaqarput, ilaatigut meeqqat oqaaseqartarsimaneri
sooq uagut meeqqanut tapinik pineq ajorpugut, aamma puigortariaqanngitsoq
uaniippoq, meerarparujussuit oqartarmata sooruna uagut nutaanik qaammammut
pisaarneq ajortugut. Sooruna uagut Danmarkiliarneq ajortugut, sooruna aamma
uagut angallammik nuannaariummik peqanngitsugut.
Isumaqarpunga meeqqat assigiimmik pineqarnissaat siunnerfigineqassappat,
tamakkua apeqqutit sanioqqunneqarsinnaanngitsut. Taamaattumik aamma
inuiaqatigiinni taamatut aaqqissuussineq maannakkut atuuttoq eqqarsaatigalugu
illersugassat pingaarnerpaat tassaapput meeqqat pissakinnernik angajoqqaallit
imaanngitsoq illuatugaanut saatinneqassasoq, meeqqat pissaqareersut ulluinnarni
amigaateqanngitsut suli pissarissaarnerunissaat siunertaralugu suliniarneq.
Oqartariaqarpugut inuiaqatigiinni akissaqatitsinnginnatta qanorluunniit
taamatut eqqarsaraluarutta, taamatut pinnikkusuppugut. Kisianni aamma uagut
inersimasutut akisussaaffeqarpugut, Nunatta aningaasatigut ingerlanera
akisussaaffigaarput. Aammali assigiimmik taamatut aaqqissussinerup
kingunerisussaavaa ulluinnarni pisariaqartitsisut taakkua
aallerfigineqarnissaat.
Taamaattumik aamma oqallinnermi pingaaruteqarpoq meeqqat ulluinnarni
oqaatiginngisartagaat eqqarsaatigisartagaalli oqallinnermi aamma ilaatinneqarnissaat.
Meeqqat pitsaanerusumik assigiimmilli atugaqarnissaat siunnerfigigaanni
ernereernerup kingorna angajoqqaat sulinngiffeqartarnerata taassuma
sivitsorneqarnissa isumaqarpunga pingaarnerusoq, meeqqat tapisiaannik
assigiimmik aaqqissussinerminngaanniit.
Taamatuttaaq aamma pinngitsoornani pingaaruteqarpoq meeqqat assigiimmik
periarfissinneqarnissaat eqqarsaatigissagaanni meeqqerivinnut utaqqisorpassuit
eqqarsaatigalugit aaqqiiniarnissaq, taanna saneqqunneqarsinnaanngitsoq.
Taamaattumik pissaqareersut suli pissaqarnerunissaat siunnerfigalugu
anguniagaqarneq taanna mianersuuttariaqarparput. Oqareernitsituummi taamatut
aaqqiiniarnermi inuiaqatigiit pissakinnerit tamatigut eqqorneqartarmata.
Nunat Avannarlerni bĝrnecheckimik tunniussisarneq massakkut Nunat
Avannarliit qimakkiartuaarpaat. Taanna ilaatigut paasineqarsimammat taamatut
bĝrnecheckimit tunisisarneq annertunerusumik pissakinnernut
tunngatinneqassappat taava pissakinnerit tassani aallavigineqartariaqarmata.
Taamatut oqaaseqarninnut tunngavigivara massuma oqallinnerup ilaatigut nammineq
isumaga malillugu illuatungaannarsiortutut oqallinneq ingerlateqqunagu,
taamaattumik aamma ulluinnarni meeqqat pissakinnerusut atugarisaat aamma
tassani eqqarsaatigisariaqarmata.
Jakob Sivertsen, Atassutip oqaaseqartua:
Siullermik Siumut oqaaseqartuanut oqaatigissavara Siumup
aalajangigassarinngimmagu Atassutip oqaasissani qanoq aaqqissuutissanerai,
uagut taanna pisussaaffigaarput. Siunnersuutigineqartoq piviusunngortinneqarsinnaavoq,
kisianni ullumikkut meeqqanut tapisisitsisarnermi aningaasat taakku
allanngortinngikkaluarlugit, kisiannili isertitat qummut killissaatut uani
peqqussummi piumasaqaatigineqartut, taavalu aamma aningaasat
qaffasinnerpaaffissaannut pingasunut avinneqarsimasut aatsaat taakku
allanngortillugit.
Aamma Atassummit tamatigut pingaartittarparput apeqqutit taama
inuiaqatigiinnut pingaartigisut suliarineqarneranni paasissutissat
assigiinngitsut pissarsiariniartarsimagatsigit, soorlu naatsorsueqqissaartarnermi
takussutissat, taavalu aamma sapinngisamik aamma aningaasanut inatsimmi qanoq
atsigisut atorneqassanersut. Oqareernittut maqaasisimavara
naatsorsuuserinermut tunngasortaa pingaartumik Isumaginninnermi
Ataatsimiititaliap imaluunniit Naalakkersuisup saqqummiussaqarnermini
erseqqiivissumik takussutissat aningaasanut tunngasut saqqummiutinngimmagit.
Oqareerpunga piviusunngortinneqarsinnaavoq siunnersuut, kisianni ullumikkut
ilaqutariinnut tunniunneqartartut allanngortillugit taamaattumik soqutigalugu
oqaaseqarfigisimavarput ajornan-ngimmat kisianni soorlu amerlanerit ilaatigut
aamma kissaatigigaat, aamma tupinnanngilaq aningaasanut inatsimmi erseqqissumik
allassimammat, tassa 1999-imi aningaasanut inatsisip oqaasertai imaattut
issuassavakka, imatut allassimavoq: "Innuttaasut pisariaqartumik
isumaginninnermik isumannaariffigineqarnissaat taassunga ilanngullugu
inuiaqatigiinni sanngiinnerpaat siunertalimmik sullinneqarnissaat
qularnaassallugu, tassa aningaasat 50 mio. koruuningajaat immikkortinneqarneranni"
Inatsisartut tamakkiisumik oqaatsit aamma taakku ilanngullugit akuersaagaat.
Taavalu aamma immikkut Naalakkersuisut inatsimmut aamma tunngatillugu
oqaasertaliussaat aamma kingulleq issuaqqissavara:" Naalakkersuisut
kissaatigaat ilaqutariit meerartallit atugarisaasa immikkut
pitsanngorsaavigineqarnissaat", tassani tassa pineqarpoq, ilaqutariit
pissakinnerusut, taakkuummata aningaasat tungaatigut atugassaqartitaanissaat
politikkikkut toqqammaviusumik anguniarneqartoq.
Tassa uagut oqaatigereerparput suleqataanissatsinnut piareersimavugut,
oqareernittut kisitsisinik takussutissanik immaqa pinnguarnertut
oqaatigineqarsinnaagaluartoq, kisianni iluaqutaasarpoq, taamaalilluni siunnersuut
qanoq ilillugu piviusunngortinneqarsinnaanersoq takuneqarsinnaasarmat.
Loritha Henriksen, Kattusseqatigiit oqaaseqartuat:
Kattusseqatigiinninngaaniit Naalakkersuisut akissuteqaataat aamma uagut
nuannaarutigaarput, aamma suliarilernissaanut qilanaarpugut. Ilumoorpoq
ukiorpassuanngulerpoq taanna uteqattaarluni oqallisigineqarmat,
isumaqarpungalu aamma piffissanngortoq sorpassuarnut kaputartuunnagu aammalu
siunnersuuteqartup erseqqivissumik taanna qulequtsiussaa aallavigalugu
oqallinnissaq pisariaqartissimavarput. Taamaattumik naatsumik erseqqissunik
uagut saqqummiussaqarsimavugut isumaqaratta aallavissaq tassanngaanit aallartittariaqartoq.
Nalunngilarput aamma Mikaelip nassuerutigivaa ilumoorpoq, meeqqanut
aningaasat atorneqartartut meeqqanut atorneqanngitsoortartut amerlavallaaqaat,
taamaattumik tamakku tusaanngitsuusaaginnarnagit aamma suliniutitsinnut
ilannguttariaqarpagut.
Soorlu siunnersuutigisatsitut meeqqanut immaqa taakkua tapit ilaat
meeqqanut toqqorallarneqarnissai nammineq pisinnaanngoruni
atorsinnaanngorlugit.
Aammalu nalunngilluinnarparput kommuunini suniluunniiit sulisimasugut
aammalu malinnaasugut rekvitisionit soorunami inatsisitigut
periarfissinneqarsimapput, kisianni taakkua rekvitisionit inunnut
malersuinissamut taakkua ajornakusoortorujussuusimapput. Taamaattumik tassuuna
iluarsiineq rekvitisionikkut iluarsiisinnaanneq isumalluutiginagu uagut
nammineerluta ujalertariaqarnerput tassani erseqqissigaluttuinnartoq tamatta
takusinnaavarput.
Taamaattumik suliassap peqqissaarullugu suliarineqarnissaa aammalu
immikkoortitsinnitsumik meeqqanut tapiisutit atuutsinneqalernissaat uagut
Kattusseqatigiinninngaaniit taanna uagut siunnersuutigerusupparput.
Josef Motzfeldt, Aningaasaqarnermut Niuernermullu
Naalakkersuisoq:
Oqaluuserineqartoq Inatsisartunut ilaasortap Vittus Mikaelsenip siunnersuutaa,
tassaavoq meeqqanut tapisiat tunniunneqartarnerini qummut 280.000
killigitinneqartoq peerneqassasoq, taanna 1997-imi ukiortaami atulerpoq.
Taamaattumik oqallinneq manna tassunga tunngasuutinneqartariaqarmat eqqaasitsissutigerusuppara,
aammalu oqaluttut arlaqartut Atassut, Kattusseqatigiit oqalupput, meeqqat
assigiimmik pineqaqqullugit, kisianni pineqaqqusineq imaluunniit meeqqanut
atugassaqaqqusineq taakkua oqaatsit assigiinngimmata eqqaasitsissutigerusuppara
uanga.
Atugassaqartinniarsarissagutsigit meeqqat, ajunngitsorsiat
pisortaninngaaneersut allatut ajornaqaaq assigiinngitsuutittariaqarpagut,
atugassarisaat meerartatsinnut atugassarititaasut assigiisikkusukkutsigit.
Tassalu taanna oqaaseqartut Inuit Ataqatigiinninngaanniit ilaatigut erseqqissumik
oqaatigisaat.
Atassutip, siullermik Inatsisartuni siunnerfeqartumik oqallinneq
innuttaasut piumasaraat aamma innuttaasunut pisussaaffigaarput. 1997-imi peqqussutip
allanngortinneqarneratigut aningaasat isertitatigut killissarititaasut
allanngortinneqarneratisigut pisartakkallu ilaatigut qaffanneqarnerisigut,
aningaasat 27 mio. kr.-inik aningaasartarlit aaqqiinermut
iluarsiissutaasimasut Atassutip apeqqummi uani oqaaseqartuata eqqortumik
oqaatigai, aammalu tassunga uiggiutiinnarlugu oqarluni taamaattumik Atassummiit
allanngortitsinissaq piffissaasorinagu.
Taamaakkaluartoq oqaaseqarnini Atassutip oqaaseqartuata naggaserpaa,
meeqqanut tapisiat tunniunneqartarneranni isertitanut qummut
killigitinneqartut 280.000 kr.-iusut peerneqarnissaanut Vittus Mikaelsenip
siunnersuutaa Atassumit tunngaviatigut paasilluaramikku, Nunatsinni meeqqat
tamarmik assigiimmik pineqarnissaat Atassutip tapersersoraa. Kinguninnguatigullu
Otto Steenholdtip aamma assigiimmik pineqaqqusineq atugassaqaqqusineq kisiat
pinnagu, kisianni pineqaqqusineq qalliinnakkut pineqaqqusineq taanna
taakkarsorlugu.
Taamaattumik ukua Jakob Sivertsenip Atassut sinnerlugu ujartugai
aningaasanut tunngasortai taakkua uani siunnersuummi pineqanngillat,
ineqarnermut meeqqanut tapiissutaasartut boligskringinut tapiisutaasartut
meeqqanut tapiissutaasartut, allanngortinneqarnerisigut aningaasatigut
kingunissai uani apeqqutigineqanngillat. Kisianni Isumaginninnermut
Naalakkersuisup oqarneratut ukiamut taakkua ataatsimoortumik aaqqivigineqassappata
qularnanngilaq ataatsimiititat tamatumunnga susassaqartut
Naalakkersuisoqarfinninngaanniit malinnaatinneqassapput. Tamanna
neriorsuutigisinnaavarput.
Aammalu maluginianngitsuunngilara Inuit Ataqatigiit ilaatigut
oqaaseqartuata aamma ilanngummagu ineqarnermut akiliut naliginnaasoq
aaqqissusiniarnermi aamma ilanngullugu naliliiffigineqaqquaa. Taannalu aamma
aningaasanut inatsisissami siunnersuutip suliarinerani aamma taanna
nalilersugassatsinnut ilaavoq. Kisiannili takkua aningaasatigut
ingerlatsinermut aningaasarsiornikkut ingerlatsinermut nassuiaammi
annertunerusumik tikillarumaarpagut ulluni aggersuni tamakkunun-nga tunngasut
aamma oqaluuserisussaagatsigit.
Otto Steenholdt, Atassut:
Aallaqqaasiullugu
oqaatigissuara Kattusseqatigiinninngaanniit aningaasat taakkua tapit
tunniunneqartut sipaarutissatut tunniunneqarnissaanut oqarnera
isumaqatiginngilluinnarakku. Tapiisarput pisariaqartitsimmata inuunerminni
atisassamikkut allatigullu tamanna sipaarnissaq angajoqqaat isumagisassaraat,
taamaattumik socialiminngaanniit sipaarnissamik tunniussinissaq
isumaqatiginanngilluinnarpoq.
Asii Narupip
poortorujussuarujullugu oqarnaversaartoq, nuannaaleraluaramaana aallartimmat
imannak oqarluni meerattatta assigiimmik pineqarnissaat IA-p anguniagaa,
nangipporlu tamanna Inuit Ataqatigiit anguniagaannut naapertuuppoq,
Nunatsinnimi innuttaasugut naligiinnerusumik atugaqarnissarput ilungersuutitta
pingaarnerit ilagimmassut. Aallaqqaammulli oqarsimasariaqaraluarpoq
oqaaseqartoq, Siumup imaluunniit Vittus Mikaelsenip siunnersuutaa IA-p
akerleraa. Imannak nangikkami taamaattumik angajoqqaat isertitaat meeqqanut
tapiissutinik pisartagaqalertsitsinermi toqqammavigissallugit
tulluartuusorivarput.
Vittup Mikaelsenip
piumasaa aajuna, assigiimmik qanorluunniit aningaasaqartigilaluarpata
angajoqqaajusut meeqqat tamarmik piniarlit. Erseqqilluinnaqqissaassusia
akerleriilluinnaqqissaartusi tassuuna.
Meeqqat anitsiarfimmi
oqaluttuuttarsimanerat aallaqqatigalugu assigiimmik piniartigit, ersarissusia,
uangalu oqarpunga tamakkua ilaliussat ajortumik pisut peerlugit, meeqqat
aningaaarsiassaat tunniunneqarniarlit. Qujanaqaaq Lars Sĝrensenip naqqimmatit
Asii Narup, IA-llu politikkia nalun-ngisarput ersarissumik oqaatigalugu,
kisianni illuatungaannarsiorluni oqallinnerunersoq uanga taanna
isumaqatiginngilara, isumaqarlunga isumaqatigiittumik oqartut assigiissitsineq
ajunnginnerusoq, pisariaqarpoq.
Josef Motzfeldtip
uannut oqaatigisaa qalliinnakkut pineqaqqusineq, suna pineraa paasinnginnakku
immineerallassuara. Kisianni erseqqissaqqillara, Naalakkersuisoqatigiinni
partiit assortuulluinnaqqissaarput. Siunnersuut IA-p akerleraa, tassa
ersarissoq.
Olga Poulsen, Inuit
Ataqatigiit:
Unajuna uanga oqaaseqarfigilaarusullugu Kattusseqatigiit
oqaaseqarnerminni, soorunami uani oqaluttarfimminngaaniit qanorluunniit
oqaaseqarsinnaatitaavugut isumaqarpunga kisianni aamma uani eqqarsaatigisariaqaripput
uani Kattusseqatigiit meeqqat tapisiaasa kukkusumik imaluunniit
atugassaanngitsunut atortinneqartarnerannut tunngatillugu ilaatigut
tunngavilersuutigalugu angajoqqaat imigassamut ajornartorsiuteqarnerat
peqqutaalluni meeqqat tapisiaat eqqortumik atortinneqan-ngitsoortarnerannut
tunngasoq, isumaqarpunga taannna inuttut naleqassutsimut arlaatigut attuisoq,
tassami angajoqqaat inatsisit malillugit pisinnaatitaaffeqarput tapisiassanik
pisinnaatitaaffeqarput. Taavalu angajoqqaat namminneq inersimasutut
akisussaaffeqarnertik naapertorlugu sumut taakkua aningaasat atussanerlugit,
namminneerlutik akisussaaffigivaat.
Taavalu soorunami kommuunit qanoq suleqataanissaat eqqarsaatigalugu
pisariaqarpoq, kommuunit isumaginninnermut siunnersortaat imaluunniit inuit
ataasiakkaat sagsbehandleritik suleqatigalugit qanoq aningaasat taakkua
ajornartorsiutaappat sumut atortinneqarnissaat sulissutigissavaat,
marluullutik. Uagut Naalakkersuinikkut inatsisiliornikkut
aalajangersussanngilagut angajoqqaat tapisiat sumut atussaneraat, isumaqarpunga
taanna pingaaruteqartoq.
Aamma Isumaginninnermut Naalakkersuisup akissuteqarnermini
oqariartuutigigamiuk taamatut tapiissutit iluamik atortinneqannittarneranut
aaqqiissuteqarniarluta arlaatigut inatsisitigut inatsisiliortariaqartugut. Tassani
sianigilluinnaqqissaartariaqarparput qanoq, taamatut inatsisiliussagutta qanoq
nipeqartinniarneqarnersoq.
Taavalu Siumup oqaluttuanut tassani rekvitision atorlugu angajoqqaat
meeqqanut arlaatigut qanoq atuinerlunnertik peqqutigalugu rekvitisionimik
tunineqarlutik meeqqanut atuagassaannut pisiniartarnissaat, isumaqarpunga
taanna aamma tulluartuunngitsoq. Pissutigalugu kinaluunniit inuk isumaqarpunga
arlaatigut misigissusaannut attuumassuteqartorujussuusut. Taamaallilluni inuk
rekvitisionimik tunineqarluni pisiniartoq arlaatigut kanngusuuteqartarpoq.
Taamaattumik taanna ajornartorsiutip qaangerniarneqarnissaanut atortussatut
tulluartuusorinngilara.
Johan Lund Olsen,
Inatsisartut siulittaasuat:
Ja, qujanaq. Taava tassa ingerlaqqittussaassaagut, tassa
siunnersuuteqartoq aappassaaneerluni maannakkut oqaaseqassaaq.
Tamatuma kingorna, taava oqaaseqarluni aamma nalunaarsimavoq Gudmann
Rasmussen aammalu Anders Andreassen. Taava naggasiiniartariaqassaagut,
isumaqarpunga maannamut isummiunneqartut ersarereersut taamaattumik aamma
naammassiniartariaqarliivisugut.
Tassa suleriaaserput malillugu partiit oqaaseqartui marloriarlutik
oqaaseqarsinnaatitaapput, taannalu periarfissaq aamma atortareerpaat.
Takusinnaavara nappaasartut partiit oqaaseqartui pingajussaaneernissaminnut
aamma nappaasaraluartut, kisianni taanna allattut ajornartumik oqallinneq
ersarissereermat aamma taanna unitsittariaqarlugu, taamaammat maannakkut tassa
oqareernittuut Vittus Mikaelsen siunnersuuteqartutuut aappassaaneerluni
naggammik oqaaseqassaaq, taavalu tamatuma kingorna akuerivakka Godmand
Rasmussen, Anders Andreassen taavalu aamma Anthon Frederiksen.
Vittus Mikaelsen, Siumut:
Siullermik una
oqallisigisatsinni siunnersuutigisannut taamatut oqallittoqarnera
paasisinnaavara, pissutigalugu ukiorpassuarni taanna oqallisaanikuummat.
Taavalu aamma
appassaattut maani siunnersuuteqartuullunga assut apererusunnaraluarpoq,
imaluunniit nappaasitsisinnaagaluaruma aperisinnaasagaluarpassi
aalajangiisussat, kikkut maluginikuuvaat ukioq aningaarsisartoq meeqqat
aningaasarsisarfiat, aningaasarsisartut meerai, tulliani meerai
aningaasarsisarnatik, tulliani aningaasarsisarlutik, taakkuukua pigikka,
taakkua assorujussuaq ajornartorsiorput, akissarsiamikkut 280.001 kr.-imik pulaqattaarlutik
inortuillutillu pulaqattaarlutik inissisimasut, assorujussuaq meeqqat taakkua
ajornartorsiorput, ajornartorsiortinneqarput, aamma taakkuupput ullumikkut
aningaasatigut Kalaallit Nunatsinni ajornartorsiornepaatut taaneqarsinnaasut,
pissutigalugu taakkuupput akiligassanik annertunerpaanik tunineqartartut,
ineqarnermut, meeqqerivinnut allarpassuarnullu akiligassanik tunineqartarput
taakkua annertuumik. Tassalu naggataatigut meeqqat tapisiaannik meerai
pissanatik.
Taamaattumik ukua
akulerussorneqartut suliffissaaruttut, taakkuaakua inuit pilluataanerpaat,
taamaattumik maani oqaluttarfimminngaanniit oqaluttoqarnera
ajornartorsiornerpaat kikkunukua. 1993-iminngaannit Inunnik Isumaginninnermut
Ataatsimiititaliami siulittaasuullunga,
maannakkut borgmesteritut inissisimallunga malinnaaffigeqqinnaarlugit
suliffissuaqarfiunngitsumi kommunimiilluni qanimut suleqatigalugit, innuttat
isigalugit malugissagaluarparsi tamakkua erseqqissusiat.
Taamaattumik una
oqaluuserisarput partiit oqaaseqarnerminni suut apeqqutigineqarsinnaasut
tamaasa eqqartoreerlugit amerlanerpaartarpiaasa piumasarivaat Naalakkersuisut
misissuisariaqartut ukiamut ataatsimiinitsinni aalajangiiffigineqarsinnaasumik.
Isumaqarpunga aamma uanga ajugaaniaannarneq nuannarisarinngilara takorluuillunga
imaluunniit toqqammaveqanngitsumik oqalullunga.
Ukua assigiinngitsunik
akueritinniarneqarnerat aallaqqaammut una erseqqissaqqiinnassavara,
kissatiginngilara inersimasut akisussaaffiannut taanna pulatinneqassasoq.
Akissarsiagut mikivallaarpata uagut pisussaaffigivarput qinnuteqassalluta
assigiinngitsunik. Taamaattumik ukua ilinniarnerminni Nunatta siunissaanik
meeqqat eqqartukkagut, taakkuukua maani oqaluttarfik aqqutigalugu ullumikkut
isigisakka, ukiuni qaangikkatsinni isigisakka, takusartakkakka tunngavigalugit
erseqqissumik nassuiaateqarfigalugit aalajangiiffigeqqullugu taanna. Qujanaq.
Godmand Rasmussen, Atassut:
Tassa siullermik naqqiutigilaarniarpara Johan Lund naalakkersuisoq
naliliimmat aamma Aningaasaqarnermut Naalakkersuisoq nalunaaruteqarnerat
paasinaqqissaangitsumik nassuerutigineqarnera una oqaatigilaarusuppara, tassa
Atassuminngaannit naggasiinermi oqaaseq atorneqarmat una: Tassami
ajornanngippat Nunatsinni meeqqat tamarmik assigiimmik pineqarnissaat Atassummit
pisariaqartutuut isumaqarfigigatsigu. Tassa taassuma allakkiap kimilluunniit
paatsoorneqarsinnaannginnerata tassa tunulequtaa.
Uku eqqartorneqartut malunnarluinnaqqissaarpoq isumaqataaffigigivut imaqa
amerlanerit tamavitta, tassa Vittus Mikaelsenip saqqummiussaa. Aamma
nuannersuuvoq Atassuminngaannit uagut immikkut isummersinnaatitaasarnerput
gruppip avataani. Uanga nammineq isumaqarpunga taanna tunngavimmigut assorujussuaq
pitsaasoq, kisiannili killiliussaasoq uanga isumaqarlunga appasippallaartoq,
tassa 280.000-it. 1/2 mio.-it immaqa tassani soorunami Naalakkersuisut tamanna
isummersuutigiumaarpaat, killigitinneqalerpata immaqa inuit pissakinnerunerpaat
tassani aatsaat attorneqarnerat imaluunniit ikiorserneqarnerat ersarinnerusunngortinneqarsinnaassooq,
sooruna taanna Naalakkersuisut namminneq eqqarsaatersuutigiumaarpaat.
Ajornartorsiummi angisoorujussuaq pilersarpoq, Siumup oqaluttuata aamma
erseqqissumik oqaatigereerpaa, akissarsiat taakku naligiikkanneraluarlutik meeqqat
amerlassusiisigut soorunami angerlarsimaffimmi inuit amerlanerungaangamik
atugaat amerlaninngortarput, atisanut allatigullu, aamma taanna uani partiinit
eqqartorneqqartoq aningaasarsiaqqortunerit tapiissutisisanngisarnerat
meeqqerivinnullu aamma akilersuerujussuarnerusarnerat taanna aamma
attorneqanngitsoorsinnaanngilaq.
Uani eqqaasitsissutigissavara ajornartorsiut imaannaanngitsoq massakkut
oqallisigivarput aningaasarpassuarujorujusssuarnik naleqariaannaasoq
siunissami. Taamaatumik Siumup oqaseqartuata una torrallallugu oqaaseq atugaa
uanga pingitsoornanga issuialaarusuppara naatsunnguummat: Ikiorsiissutitigut
inuiaqatigiinni annertoorujussuarmik ullumikkut atuinerput ullutsinnut
naleqqukkunnaartutuut Siumumiit isumaqarfigaarput, tassami sulinikkut
ilinniagaqarnikkullu imminut pilersorsinnaalernissarput anguniarlugu tamatta
ilungersuutissaqarpugut, tamannami siunissami inuiaqatigiinnut
akikinnerpaallunilu pitsaanerpaasaaq.
Taanna oqaaseq torrallataangaarmat eqqarsalersitsivoq uannga: Massakkut eqqartukkagut
aningaasarpassuupput, suliffinnik aammalu pilersitsisariaqarpugut Nunatsinni.
Ippassaani pisoq eqqarsariartitsivoq, suliffinnik pioreersunik arlaatigut
artukkiissagutta tassa aamma erloqinartumut pulaqqittussanngorpugut.
Sallerpaatillugit ujagassagut tassaalerput aningaasarsiornermi
suliffissanik ataavartunik Nunatsinni pilersitsiniarniarta ilungersorluta,
tassuuna pigut tamaani ajornartorsiutit tikittakkagut pinngitsoorata
oqilisaaffigilissavagut. Aningaasarsiorneq siumut saappat tamakku isumaminnik
sinneri inaalikkiartulerumaarmata.
Taama naatsumik oqaaseqarlunga oqallisigineqartoq uanga tunngaviatigut
aamma tapersersorpara, neriuppuna aamma kusanartumik Naalakkersuisut
isumatuumillu tamatsinnut naleqquttumik allanik aalajangersaaffigijumaaraat.
Anders Andreassen, Siumut:
Avataaninngaanniit tusarnaartunut imaluunniit tusarnaarlugu qularnanngilaq
tusarnaartut ilarparujussui eqqarsalissapput Inatsisartut sunaana
oqallisigileraat. Tassa tusarnaartut nalunngilakka aamma arlalippassuit
eqqaamagaat Isumaginninnermut Ataatsimiititaliarsuup sulinera sulisimanera
aammalu siunnersuuteqarnera.
Suliaq taannarpiaq ilaatigut eqqaamanerlunngikkukku aamma Isumaginninnermut
Ataatsimiititaliarsuup suliarisimavaa, taamanikkullu aamma
innersuussutigineqarpoq suliap inaarsarnerata aallaavigalugu suliarlu
ingerlatseqqinneqassasoq Naalakkersuisunut, taakkulu Naalakkersuisut
suliakkiissutaasut nalilersorluarlugit aamma saqqummiussiumaartut, tassalu
utaqqisarput aamma una suliaq imaluunniit ullumikkut siunnersuutaasoq taassuma
iluanereerpoq, taamaattumik uanga paasilluanngilara sooq taama annertutigisumik
oqalliseqqissasugut meeqqat pillugit. Oqaatsit taakkorpiaat aamma
aninneqareerput Isumaginninnermi Ataatsimiititaliarsuup sulinerata nalaanni,
imaluunniit suliaata inernerata nalaanni.
Taamaattumik uanga paasilluarpara Naalakkersuisunut ilaasortaq
misissuilluariarluni ukiamut saqqummiussippat meeqqanut aaqqiissutissanik
saqqummiussaqarpat, taaava taanna aallaavigalugu aalajangerumaarpugut.
Ajorpata aamma soorunami
uparuarumaarpagut. Kisianni massakkut putoorparput Isumaginninnermut
Ataatsimiititaliarsuup isumaliutissiissutaa, isumaqarpungalu taamaalillugu
ingerlateqqitariaqartoq, Naalakkersuisut saqqummiussigallarlik siunnersuutissanik,
taakkulu aallaavigalugit aamma aalajangeqqikkumaarpugut.
Anthon Frederiksen, Kattusseqatigiit:
Nalunngilarput 1997-imi upernaakut Isumaginninnermut Ataatsimiititaliarsuaq
saqqummiussaqartoq, tassalu massakkut ukiut marlorpiaat qaangiussimalerput suliaq
saqqummiunneqarmat, taamaattumik ilaatigut tupinnanngilaq Inatsisartuni
ilaasortat ataasiakkaat maannamut aamma Isumaginninnermut Ataatsimiititaliarsuup
suliarisimasaasa ilaannut siunnersuuteqartuarmata,
apeqqutigineqartariaqarporlu, sooruna siunnersuuteqartoq.
Pissutaasimassannguatsiarpoq 1997-imiilli maannamut Naalakkersuisut sulinerat
immaqa apeqqusertariaqarmat qanoq pilertortigisumik tamakkua Naalakkersuisuni
suliarineqartut. Soorunami nalunngilarput suna tamaat ataatsikkut
imaaliallaannarlugu piareerneqarsinnaanngitsoq.
Kisianni Namminersornerullutik Oqartussani sulisorpassuaqarpugut,
konsulentit qassiusimassagaluarnerput, tamakkua sumik sulisinneqarpat, aammalu
qanoq sulinerat aaqqissuunneqarpata, qanoq pilertortigisumik
isumaliutissiissutit ingerlanneqarsimanerat ingerlanneqarnerallu
apeqquserneqarsinnaavoq.
Uani Kattusseqatigiit saqqummiussatsinnut soorunami uparuarneqarnerput
aamma akissuteqarfiginngitsoorsinnaangilarput, tassalu Inasisartunut
ilaasortat Otto Steenholdtip aammalu Olga Poulsenip uparuaataat
akissuteqarfigilaarniarpakka, tassa inatsisissat peqqussutissallu
suliarigaangatsigit naleqqussarneqartuartarput pissutsinut, aammalu peqqussut
inatsilluunniit inuiaqatigiinnut qanoq atortinneqartoq takugaangatsigu,
isornartoqaraangat, taava soorunami allanngortinneqarnissaa suliarineqartarpoq.
Aajukua uparuakkagut, meeqqanut tunngasut ullumikkut aningaasat
tunniunneqartartut, oqanngilagut tamarmik, aamma oqanngilagut angajoqqaat
tamarmik, kisianni amerlavallaaqqaat ilaqutariit meeqqanik tapisisoqartillugu
imigassamik atuisartut.
Tamanna ersissutiginagu ammasumik oqaluuserisariaqarpoq, tamatta
takusarpagut, ersinanngilaq, aaqqittariaqartoruna maanngaanniit inimiit. Ulumikkut
periarfissaareerput kommunini rekvisitionit atorlugit tunisisinnaaneq,
periarfissaareerpoq, kisianni atortinniarneqarnera amigarpoq, taamaattumik
periarfissatuaq maaniippoq Inatsisartuni allanngortitsinikkut tamakkua
pissutsit aaqqinniartariaqarpagut, oqaannarsinnaangilagut, aap, inuit kikkut
tamarmik pisinnaatitaaffii malillugit aningaasaq tunniunneqartoq inuup
qanorluunniit atorsinnaavaa.
Akuerineqarsinnaanngilaq meeqqanut atortinniarlugit siunertamut pitsaasumut
tunniunneqartut imigassamut ilai atorneqartassappata, taanna ajorpoq
aaqqittariaqarlunilu, aamma nalunngilarput uagut kalaallit aningaasatigut
sipaarniarnermik ajornartorsiuteqartugut, aamma tamanna
nassuerutigisariaqarpoq, ilumoorpoq, taamaattumik sipaarniassagutta meerartagut
aamma ilinniartittariaqarpagut, sipaarneruna aamma ajunngitsoq. Aningaasat
tunniunneqartartut ilai annikitsunnguugaluartut immaqa
sipaartinneqarsinnaalersuuppata, taava meeqqap inersimasunngulernermini immaqa
18-inik ukioqalernermini tigusinnaasai isumalluarluni atorsinnaasai tassani
takutinneqassapput ajunngitsut.
Taamaammat taamatut oqaaseqaateqarluta saqqummiussaqarpugut, aammalu
siunnersuuteqartup siunnersuutaa qiviarutsigu qularnanngilaq aningaasanik
naleqartussaavoq, ullumikkullu nalunngisagut aallaavigalugit ineqarnermut
tapiissutit eqqaavagut uagut, aningaasat ilai tassanngaanniit aaneqarsinnaasut
takorlooratsigu aammalu oqallisigineqartussatut. Tassa inuit,
assersuusiorpugut, 500.000-it angullugit aningaasarsisartut,
taakkuninngaluunniit amerlanermik aningaasarsisartut soormi ineqarnermut
tapiiffigineqartassappat, taakku automatiskimik tunniunneqartarput,
malugineqarneq ajorput meeqqanit. Taakkuninnga immaqa aallertoqarsinnaappat
taava aningaasat sumin-ngaanniit aaneqarsinnaaneri ilanngullugit siunnersuutigaarput
tamannalu Inatsisartunut oqaluuserisassanngorlugu isumaliutissiissutissatut
tunniuparput.
Josef Motzfeldt, Aningaasaqarnermut Niuernermullu
Naalakkersuisoq:
Tassa Gudmand Rasmussen -ip oqarneratuut ilumoorpoq una siunnersuutigineqartoq
piviusun-ngortinneqassappat imaaliallaannarlugu, soorunami aningaasanik
nassaqartussaavoq, aamma oqaluttut kingulliup taanna oqaatigaat, tassami
kingullermik 97-mi ukiut marluk matuma siornatigut qaffaaneqarmat 120.000-nut
killigititaasut 280.000-nut qaffanneqarmata taanna 27 mio-koruuninik ukiumut
naleqarpoq, 500.000 -llu Gudmand Rasmussenip oqarneratuut 2
mio.-nut isertitat qaffanneqassappata naatsorsukannersinnaavarput qanoq
aningaasartaqassanersoq, aningaasarparujusuussapput aamma.
Kiisalu aningaasat Inatsisartut inatsisiliaat peqqussusiaallu
tunngavigalugit innuttaasunut atugassanngortitaasut aamma maanngaanniit
aalajangersortalissagutsigit sunorpiaq atorneqassanersut, isumaqarpunga
eqqarsartaaseq taanna qimanneqartariaqartoq. Inimi maanngaanniit inuit
ataasiakkaat oqaluffigisinnaanngilagut akisussaaffiiarlugit ima iliussasut, ima
iliussasullu. Innttutaasugut tamatta akisussaaffigisarput naalakkersorneqarata
ilumoorunnerusariaqarparput, massakkutut suut tamaviisa angajoqqaat, inuttaasut
ataasiaakkasugut qanoq iliussanersugut Inatsisartuninngaanniit
oqaluttuunneqartariaqanngilagut.
Kiisalu paatsuungasoqaqqunagi Otto Steenholdtip Atassutip
naalakkersuinikkut oqaaseqartartuata Inuit Ataqatigiit oqaaseqartuat
patsisiliullugu Siumukkullu assortuunnerarlugit oqaaserisaat oqaatigineqarmat
naqqiissuteqarfigissavara naalakkersuisuninngaanniit ima paasigatsigu Inuit
Ataqatigiit pineqartut tamakkiisumik
nalilersorneqarnissaat akuersaaraat aammalu ammafigigalugu bĝrnechecki
suleqatigiissitaliap suliaai saqqummiunneqariarpata tamatuma
nalilersuiffigineqarnissaa aamma peqataaffigerusullugu, taamaattumik Otto
Steenholdt-ip suna poortuutissiaq takusimanerpaa Inuit Ataqatigiit oqaluttuat,
Inuit Ataqatigiit isumaannik poortuerujussuarluni isummaminik anitsisutut
pisuutinniaraluarmagu.
Kisianni tassa paasilluarpara Vittus Mikaelsenip siunnersuutaa ukiamut
Naalakkersuisut tamakkiisumik ataatsimoorussamik aaqqiinissamut ukiumiit
ukiumut allanngortitsereqattaaqinani ataasimoorussamik aaqqiiniarnermi ilanngunneqartussaasoq
aamma siunnersuuteqartup paasilluarmagu. Taamaatumik isumaqarpunga inimi maani
paaseqatigiinneqartoq annertuumik.
Jonathan Motzfeldt, Naalakkersuisut Siulittaasuat:
Aamma Atassutip politikkikkut oqaaseqartartuanut oqaatigissavara assortuussutigineqanngimmat
naalakkersuisooqatigiinni apeqqut taaanna, aammalu aaqqiiviginiarnerani
qimoqatigiinneq tassani aamma ingerlanneqarmat.
Uani ukiamut aaqqiviginiarnissaa naatsosorsuutigaarput, sapinngisamik
meeqqanut tunngasortaat ineqarnermut tunngasortaallu tassani naammasillugit
siunnersuusiorfiginissaat. Oqaatigiinnassavara naalakkersuinikkut
isummerfissaapput. Kommunit pillugit Iluarsaaqqinnerni apeqqutit taakku
oqallisigiloorsimavavut, Inunnik Isumaginninermut Kommissionersuup aamma
tamaaviisa nalilersoreersimavai.
Ukiaru naalakkersuinikkut isummertariaqarpugut, tassanilu aamma nutaamik
eqqarsarsinnaaneq aamma periarfissittariaqarpoq. Ilaatigut pingaartinneqarpoq
boligsikring aqqutigalugu meeqqat isumannatsumik nuannersumik angerlasimafimmik
periarfissaatigut ikiorneqarnissaat. Tassuunakkulluunniit aaqqiisoqarsinnaappat
meqqqanut tapisiat nikisilaarnerisigut assigiinngitsutigut qularnanngilaq
taamaalillugu qularnaaneqarsinnaavoq akissarsiat aalajangersimasut iluini
taava meeqqat angerlarsimaffissaanik pitsaanerusunik innersuunnissaat
aaqqivigalugu.
Aamma siornatigut taanneqartareerpoq, boligbĝrnetilskudinik taaneqartartut,
meeqqanut inissianut taapiissutigineqartartut akissarsioaqqortuunut aamma
killilernissaa taanna politikkerit qangarsuarlu oqaluttarfimmi maani
utertuarpaat. Ukiaru taanna aamma isummerfigissavarput,
isummerfigisasan-ngorlugulu. Aningaasanik nikisitsinerit tassaniittut
aqqutigalugit naligiissaarinerit siulliullugit taakku misissussavavut Naalakkersuisuni.
Immikkut aningaasartuutissanik allanillu akileraarutinik qaffaanissat
kingullerpaallugit taakku misissorneqarsinnaapput taakku atortinneqassappata,
kisianni taanna siunertarineqanngilaq, maannakkut tapiissutit angereeqaat
nikisiallannerisigut atorfissaqartitsisunut ikkunniarneqarsinnaasut.
Mikael Petersen, Isumaginninnermut Suliffeqarnermullu
Naalakkersuisoq:
Anthon Frederiksenip, Kattusseqatigiinninngaanniit oqaaseqartut avataatigut
oqaaseqarnermini ilanngullugu taavaa naalakkersuisuni arriippallaamik
sulisoqartoq Inunnik Isumaginninnermut Iluarsaaqqinnermut atatillugu.
Taanna aatsaat tusalinngilarput, taamaalluarsinnaavoq aamma uagut
nammineerluta oqartariaqarpunga Naalakkersuisuni piaartumik angusaqarusoqaagut.
Soorunami sulisutigut pissutsit eqqartorneqarsinnaapput, kisianni aamma
eqqaamasariaqapoq isumaginninikkut inatsisit suliarinerat pisariusorsuummat
sorpassuarnut attuumasssuteqartuartuummat, soorlu uani oqallinnermi ilaatigut
oqaatigineqartoq peqqussutit inatsisillu allat attorneqanngitsoorsinnaanngillat
meqqaanut tapit nutaamik aaqqiivigineqasappata.
Taamaattumik Isumaginninikkut Pisortaqarfimmi ataasiinannguamik
inatsisileritooqarluni imaalitsiaanneq suliassat angorusunnartaraluartut
imaalitsiaannaq anguneqarsinnaasanngillat. Kisianni aamma eqqaamaqqulaassavara
Inatsisartuni akuersaarneqareernikuummat Inunnik Isumaginninnikkut
Iluarsaaqqinnermi atatillugu Naalakkersuisut sulinermini tunngaviat
Inatsisartuni akuersaarneqareersimasoq, tassalu tulleriiaarineq, taanna
kinguaattoorfiginngilarput, taanna tunaartaralugu ingiaqatigalugulu
ingerlavugut.
Aamma ilanngullugu tassunga tanngitsoorusunngilara inunnik
isumaginninnikkut aningaasaliissutit assigiinngitsorpassuit milliuunerpassuarnik
nalillit allanngortinniarneqaraangata avaqqunneqarsinnaasanngimmat kommuninik
isumaqateqarnissaq, taamaalillunilu aamma kommuninut tapiissuitit
sunnerneqartarmata Landskarsiminngaanniit aningaasaliissuteqartarneq
naapertorlugu.
Uaniaasit meeqqat tapii pillugit avaqqussinnaanngilarput aamma
nutaaliornitsinni kommunit peqatigalugit aaqqiinissaq, taamaalilluni kommunit
karsiinut aamma assigiinngitsutigut sunniuteqartuartuummata.
Naggataarutigalugu ilanngullugu oqaatigilaassavara Naalakkersuisuni aamma
piareersimaffigigatsigu ukunani nutarterinissani ukiamut angumereriagasatsinni,
tassa meeqqat tapiisa nutaamik taaguuteqartilersinnaanerat, ilaatigut
paatsuungassutigineqartarmat meeqqat tapii, taaku qanoruna/sumununa
sammitinneqarnersut, tassa angajoqqaanut sammitinneqarput, angajoqqaanut
tapiissutaapput, meeraqassuseq isertitaqqussuserlu naapertorlugit. Taamaattumik
ilaatigut paatsuungassutigineqartarpoq.
Aamma ineqarnermut meeqqanut tapit kiisalu aamma ineqarnermut tapit, soorlu
tamakku assigiiaakannersumik taaguusersuinigut paasiuminarnerusumik
pisariinnerusumillu inatsisitigut aaqqinneqarsinnaasorinarput, tamanna
siunertaralugu Naalakkersuisuni sulivugut.
Anders Andreassen, Inatsisartuni siulittaasoqarfimmi
ilaasortaq:
Qujanaq. Taamaalilluni ullumikkut oqaluuserisassaq immikkortoq 24 tassalu
Meeqqat tapisiaat pillugit oqallinneq tamaannga killeqarpoq.