Oqaluuserisassani immikkoortoq 26-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 17.
maj 1999 nal. 15.10
Ataatsimiinnermi
aqutsisoq: Anders
Andreassen, Inatsisartut Siulittaasoqarfianni ilaasortaq:
Johan Lund Olsen, Inatsisartut Siulittaasuat:
Tassa matumani
immikkoortoq 26-mi Nunat Avannarliit Killiit Siunnersuisoqatigiiffiani
aallartitat siulitaasuffigisakka ukuusut: Anders Andreassen, Lars Karl Jensen,
Tommy Marĝ, Otto Steenholdt aamma Anthon Frederiksen sinnerlugit ukua
aalajangiinissamut siunnersuut una saqqummiutissavara ima oqaasertaqartoq.
Nunat Avannarliit
Killiit Siunnersuisoqatigiiffiata 1998-imi ukiumoortumik ataatsimiinnermini
inassuteqaat siunnersuummut ilanngunneqartoq akuersissutigaa, tassa lu
Savalimmiuni Naalakkersuisunut, Islandimi Naalakkersuisunut aamma Kalaallit
Nunaanni Naalaakersuisunut Kulturikkut nunat akornanni suleqatigiinnermut
iluaqutaasussamik Nunat Avannarllliit Killiit Kulturikkut
aningaaasaateqarfiannik pilersitsisoqarnissaanik Siunnersuisoqatigiit
inassuteqaataat.
Inassuteqaammut
tunuliaqutaavoq Nunat Avannarliit Killiit akornanni Kulturikkut
assiginngitsorpassuartigut suleqatigiinnissamik pisariaqartitsisoqarneranera.
Nunarsuarmi annertusiartuinnartumik nunat assigiinngitsut suleqatigiinneranni
nalaassimaneqarnermi Nunat Avannarlliit Killiit Kulturikkut
ataatsimoorfeqaqatigiinnerata ataannarnissaannut pingaaruteqarluinnarpoq
Nunanini Avannarlerni Killerni Kulturikkut suleqatigiinnerup aallaavissaasa
pitsaanerulesinneqarnissaat.
Nunat Avannarliit
Killiit Kulturikkut aningaasaateqarfiannik pilersitsinerup tamanna
iluaqutsississavaa.
Nunat Avannarliit
Killiit inassuteqaataat ilanngunneqartoq naapertorlugu Aningaasaateqarfiup
aningaasaatai atorneqariaannaasut atorneqartassapput Nunat Avannarliit Killiit
suleqatigiissutigisat ingerlataanni soorlu kulturikkut, ilinniartitaanikkut,
ilisimatusarnikkut kiisalu atuarfeqarnikkut timersornikkullu suleqatigiinnerni.
Siunnersuummmi
ilanngunneqartumi takuneqarsinnaavoq Siunnersuisoqatigiit aningaasaateqarfiup qanoq
aningaasalersorneqarnissaanut malittarisassat qanoq suliarineqarnissaannut
aammalu siulersuisut qanoq inuttalersorneqarnissaannut
isumaliutersuuteqarnersut.
Nunat Avannarlliit
Killiit Siunnersuisoqatigiiffiani Inatsisartut aallartitaasa Inatsisartunut
inassuteqaatigaat inassuteqaat akuersissutigineqassasoq taamaalilluni
akuersineq Naalakkersuisunut ingerlateqqitassatut aamma
tunniunneqarsinnaaqqullugu.
Lise Lennert, Kultureqarnermut,
Ilinniartitaanermut Ilisimatusarnermullu Naalakkersuisoq:
Kultureqarnermut,
Ilinniartitaanermut Ilisimatusarnermullu Naalakkersuisutut Nunat Avannarliit
Killiit Siunnersuisoqatigiiffiata kingullermik ataatsimiinnerani kulturikkut
ilinniartitaanikkullu suleqatigiinnerulernissamik siunnersuutit arlallit
oqallisigineqarsimasut paasigakku nuannaarutigaara.
Tamatumunnga
atatillugu ilisimatitsissutigisinnaavara annertungaatsiartumik
suleqatigiittoqareermat. Ilaat aaqqissuussamik ingerlapput ilarpassuilu
suliniaqatigiiffiit, suliffeqarfiit inuillu ataasiakkaat akornanni ingerlanneqarput.
1996-imi nunat
pingasuusut suleqatigiinnissamik isumaqatigiissuteqarput. 1997-imi januaarip
aallaqqaataaniit atuutilersumik isumaqatigiissuteqartoqarpoq ukiuni pingasuni
atuuttussamik.
Isumaqatigiissuteqarnikkut
siunertarineqarpoq nunat pingasut akornanni kulturikkut, ilinniartitaanikkut
ilisimatusarnikkullu suleqatigiinneq annertusarneqassasoq
patajaallisarneqarlunilu, suleqatigiinnermi pilersitsisinnaassuseq
pitsaassuserlu nunanut pingasunut tamanut pissarsiviusumik iluaqutaasumillu ineriartortinneqarsinnaaqqullugit.
Tamanna anguniarneqarpoq suliassaqarfiit iluanni ataatsimoorluni
aningaasalersuinikkut, paasissutissiisarnikkut ataqatigiissaarinikkullu
suliniuteqarnikkut.
Isumaqatigiissut
timitalersorneqarpoq ukiuni pingasuni taakkunani ukiumut suliniuteqarfissamik
toqqaasarnikkut, tamatumunnga attaveqaqatigiinnernik pilersitsinernut kiisalu
misilittakkanik ilisimasanillu paarlaasseqatigiittarnernut aningaasanik
tapersiisoqartarluni. Siunertarineqarpoq taamaaliornikkut attaveqaqatigiinnerit
ilaallu ilanngullugit pisariaqartinneqartut pilersiortorneqassasut,
taamaalilluni ukiup suliniuteqarfissamut immikkut atorneqartup avataatigut
suleqatigiinneq ingerlaqqissinnaasussanngorlugu.
Suleqatigeeriaaseq
taamaattoq ilaatigut atorumaneqarpoq isumaqatigiissutitigut allatigut,
tamatigoornerusumik oqaasertalersugaasutigut, misilittagaasut tunngavigalugit.
Misilittakkammi takutippaat naatsorsuutigisaasut avatangiisini nunanilu
assigiinngitsuni attorneqartuni isumaqatigiissutitigut pilersinneqartartut
naammassineqakkajunngitsut. Tamatumunnga ilaatigut pissutaasinnaavoq
aningaasatigut inuttassatigullu nukissat pisariaqartinneqartut
pigineqartannginnerat, isumaqatigiissut tamatigoorpallaamik
oqaasertalersorneqarsimagaangat.
Ukioq siulleq
assassorluni eqqumiitsuliorneq suliniuteqarfigineqarpoq. Tassunga atatillugu
Savalimmiuni assassorluni eqqumiitsuliorneq pillugu ataatsimiittoqarpoq.
Savalimmiut suliassaqarfimmut tassunga ingerlatsiviusussatut toqqarneqarput,
Island Nunarpullu tamakkunatigut ilisimasaqangaatsiarlutillu misilittagaqareermata
Savalimmiunut iluaqutaasinnaasunik.
1998-imi
nipilersornermik ilinniartitsineq suliniuteqarfiuvoq. Soorlu amerlasuunit
ilisimaneqassasoq 1998-imi ukiakkut maani Nuummi ataatsimeersuartitsisoqarpoq
atuartullu nipilersornermik ilinniarfiineersut naapeqatigiissinneqarlutik.
Tamatuma inernerigallarpaa nalunaarusiaq, Nunatsinni nipilersornermik
ilinniartitsisalernissamik sulissuteqarnermut tunngaviliisuusussaq.
Suliniuteqarfissaq taanna Nunatsinnit kissaataavoq, tamatumani Savalimmiuni
Islandimilu misilittagarineqartut iluaqutissarsiffigisinnaajumallugit.
1999-imi
ilisimatusarneq suliniuteqarfiussaaq maannakkullu Akureyrimi, Thorshavnimi Nuummilu
ilisimatusarfiit suleqatigiinnerisigut ukiaru Islandimi Akureyrimi
ataatsimeersuartitsinissaq piareersarneqarpoq. Ataatsimeersuarnermi Nunani
Avannarlerni Killerni inuiaqatigiinnik ilisimatusarneq oqallisigineqassaaq.
Isumaqatigiissut
naapertorlugu suleqatigiinneq ukioq manna nalilersorneqassaaq. Taamatut
nalilersuineq tunngavigalugu suleqatigiinneq qanoq ilusilerlugu
ingerlateqqinneqassanersoq isummerfigineqassaaq.
Siumut
inernileeriinngikkaluarluni ilisimatitsissutigineqarsinnaavoq Naalakkersuisut
isumaqarmata suleqatigiinnerup ilusaa pitsaasuusoq, aamma isumaqatigiissutip
ingerlateqqinneqarsinnaanerata isumaqatigiissutigineqarnissaa
naatsorsuutigineqartoq, immaqa allanngortilaarlugu allanillu nutaanik
suliniuteqarfissalerlugu.
Nunat Avannarliit
Killiit kulturimut aningaasaateqarfiat pillugu suleqatigiittoqalernissaanik
siunnersuut manna akuersissutigineqartinnagu suleqatigiinnerup eqqartorneqartup
naliliivigineqarneranut atatillugu oqallisigineqartariaqarpoq.
Siunnersuutigineqartutut aningaasaateqarfissap assersuutigalugu naligisinnaavai
suliniutit annikikkaluanik tassanngaanniit tapersiivigineqarsinnaasut
peqatigitillugulu aningaasaateqarfinnut anginerusunut naalagaaffiit nunallu
immikkoortuisa aningaasaleeqataaffigisartagaannut matunik
ammaassisuusinnaalluni.
Maannakkuugallartorli
Nunani Avannarlerni Killerni naalakkersuisoqatima isumassarsiamut isummersimaneri
aningaasalersueqataasinnaanerallu oqaaseqarfigisinnaanngilakka. Taamaattumik
aningaasaateqarfeqalissappat aningaasanik nunani ataasiakkaani taamatut
suleqatigiinnermut atugassanngortitaasunik atuisoqarsinnaanersoq
oqallisigineqartariaqartoq. Misissorneqartariaqarportaaq nunani ataasiakkaani
aningaasalersuinissamik pisariaqartitsinermut naleqqiullugu
aningaasaateqarfimmik taamaattumik pisariaqartitsisoqarnersoq.
Taamaammat
Naalakkersuisuniit inassutigissavarput Inatsisartut akuerissagaat siunnersuutip
Savalimmiunut Islandimullu suleqatigiinnissamut isumaqatigiissutip atuuttup
nalilersorneqarneranut atatillugu oqaloqatiginnissutigineqarnissaa, tamannalu
pereerpat Naalakkersuisut aningaasaateqarfiup pilersinneqarnissaanik
aningaasalersorneqarnissaanillu siunnersuummik Inatsisartunut
saqqummiussissasut, tassa nunat pineqartut tamanna pillugu
isumaqatigiissuteqarfigineqarsinnaassappata.
Lars Karl Jenen, Siumup oqaaseqartua:
Nunat Avannarliit
Killiit Siunnersuisoqatigiiffiata ukiumoortumik ataatsimiinerani Ilulissani
juni 1998-mi ingerlanneqartumi inaasuteqataanik pingasunik suliaqartoqarpoq
Kalaallit Nunaanni, Islandimi aamma Savalimmiuni Naalakkersuisunut
ingerlateqqitassanik.
Siumumiit
peqataanitsinni Nunat Avannarliit Killiit Siunnersuisoqatigiiffianni
aallartitat allat peqatigalugit inassuteqaatitut siunnersuutit tamakkiisumik
tapersersorsimavavut aamma maani maannakkut saqqummiunneqartoq kulturikkut
aningaasaateqarfimmik pilersitsinissamik inassuteqaat pillugu.
Nalakkeersuisut
akissuteqaataatigut ersippoq maannakkumut Nunat Avannarliit Killiit
Kulturikkut, Ilinniartitaanikkut Ilisimatusarnikkullu suleqatigiinnerat
annertusarneqartoq tamakkunanngalu suliniuteqarnermi maannakkumut suleriaatsit
aammalu aningaasalersuinerup nalilersorneqarnerat allatut ittumik aaqqissuussilluni
periarfissarsiuunniarneqartoq, tamannalu anguniagassatut saqqummiunneqartoq
Siumumiit tulluartutut isigaarput.
Siumumiit
pingaartipparput Nunat Avannarliit Killiit innuttaasa akornanni
ilinniartitaanikkut, ilisimatusarnikkut, timersornikkut allatigullu qanimut
suleqatigiittoqarnissaa nunat taakkua Naalakkersuisuniit pitsaasumik aqqutissiuunneqassasoq.
Siumumiit
nuannaarutigaarput inassuteqaat siulleq Nunat Avannarliit Killiit
Piorsarsimassutsikkut aningaasaateqarfissaanik pilersitsinissamik
anguniagaqarneq Naalakkersuisutta piumassuseqarfigalugu sulissutiginiarmassuk,
neriuppugullu kulturimut anigaasaaateqarfimmik pilersitsinissamik inassuteqaat
aamma Nunat Avannarliit Killiit suleqatigisatta Naalakkersuisuinit
ilassilluarneqassasoq.
Naggataatigut taamatut
oqaaseqarluta piorsarsimasutsikkut aningaasaateqarfimmik pilersitsinissamik
inassuteqaat Siumumiit tamakkiisumik taperserparput, tassungalu
suliniutiginiakkat Naalakkersuisut saqqummiussaat ilassilluarlutigit.
Otto Steenholdt, Atassutip oqaaseqartua:
Siulittaasoq, ukiut
ingerlarngat sukkaqaaq, tassa ukiut
14-it matuma siornagut Nordisk Rċdikkoorlugu Nunat Avannarlliit Killiit
Siunnersuisoqatigiiffiat pilersikatsigu.
Soorlu saqqummiussami
takuneqarsinnaasoq saqqummiussaq manna nunat pingasut aallartitaasa isumaqatigiillutik
1998-mi ukiakkut Ilulissani akuersissutigisimavaat neriorsoqatigiillutillu
akuerisartik Naalakkersuisuminnut akuereqqullugu saqqummiukkumallugu.
Manna
saqqummiunneqartoq Atassummiit annerusumik oqaasertalersunngilarput
isumqatigiilluinnarlutali siunnersuut Inatsisartunut tamarmiusunut
akuerillaqqullugu inassutigiinnarumallugu.
Aningaasateqarfissap
suliariniagai saqqummiussami ersaripput, qanoq aningaasalersorneqarnissaa,
malittarisassaasa qanoq suliarineqarnissaat kiisalu siulersuisut qanoq
inuttalersorneqarnissaannik isumaliutersuutit. Atassumminngaanniit innersuullugit
akueriumavarput Inatsisartullu tamarmiusut akuersaariarpata Naalakkersuisunut
ingerlateqqinneqarnissaa taamattaaq partiimit Atassummiit akerusaarluinnarlugu.
Olga Poulsen, Inuit Ataqatigiit oqaaseqartuat:
Nunat Avannarliit
Killiit Siunnersuisoqatigiiffiata inassuteqaataa nr. 1 naapertorlugu tassalu
Nunat Avannarliit Killiit kulturikkut aningasaateqarfimmit pilersitsissasut
siunersuisoqatigiiffiup Inatsisartut Naalakkersuisunut
kaammattuuteqaqqusinerat Inuit Ataqatigiinniit tamakkiisumik taperserparput.
Inuit Ataqatigiinni
naatsorsuutigaarput taamatut aningaasaateqarfimmik pilersitsinerup
kingunerissagaa Nunat Avannarliit Killiit, pingaartumik isiginnaartitsinikkut filmiliortitsisarnikkullu
suleqatigiinnerat nukittorsarneqassasoq. Tamaalilluta Nunatsinni
isiginnaartitsisartut aammalu filmiliortitsisartut kissaataat tassalu
Nunatsinni filmfondeqalernissaa qanillatorneqarsinnaassammat.
Taamatut naatsumik
oqaaseqarluta siunissamilu qanimut suleqatigiinissamik kissaateqarluta
siunnersuut akuersaarparput.
Anthon Frederiksen,
Kattusseqatigiit
oqaaseqartuat:
Nunat Avannarliit
Killiit Siunnersuisoqatigiiffiata inassuteqaataa nr. 1 tassalu
Siunnersuisoqatigiinni Savalimmiuni Naalakkersuisunut, Islandimi
Naalakkersuisunut aamma Kalaallit Nunatsinni Naalakkersuisunut kulturikkut
nunat akornanni suleqatigiinnissamut iluaqutaasussamik Nunat Avannarliit
Killiit kulturikkut aningaasaaateqarfiannik pilersitsinissamik inassuteqaat Kattuseqatigiinniit
tamakkiisumik taperserparput, naggataatigullu oqaatigerusullutigu immikkoortup
28-ip oqaluuserineqarnerani ukua immikkortut 26-i 27-i aamma 28-i
ataatsimoorullugit oqaaseqarfigiumaaratsigit.
Johan Lund Olsen, Inatsisartut Siulittaasuat:
Naatsunnguussaaq,
tassami takisuuliornissamut pissutissaqarsorinanngilaq maani Inatsisartuni
partiit isumaqatigiingaarmata aammalu Nunat Avannarliit Killiit
Siunnersuisoqatigiiffianni inassutigineqartoq una aamma
naalakkersuisuninngaanniit taama ajunngitsigisumik aamma ilassineqarmat,
taamaattumik taamatut oqaaseqaannarlunga ilisimatitsissutigissavara Nunat
Avannarlliit Killiit Siunnersuisoqatigiiffiat ukiumoortumik ukioq manna
aaatsimiinnissaat Islandimi tassa pisussaammat, taannalu augustip ingerlanerani
aamma ingerlanneqartussaalluni. Ukioq mannalu nutaamik iliuuseqarluta tassa
Islandip statsministeria aamma aggersarlugu aamma ataatsimiinnitsinni aamma
ilagissamaaratsigu.
Lise Lennert, Kultureqarnermut,
Ilinniartitaanermut Ilisimatusarnermullu Naalakkersuisoq:
Partiit tamarmik
Kattusseqatigiillu uunga siunnersuummut taama erseqqitsigisumik tapersiinerat
qutsatigaara aammalu maluginianngitsoorusunngilara una aamma Inuit
Ataqatigiinninngaanniit immikkut
kissaatitut saqqummiunneqartoq, tassa ukua kulturimut suliniuteqarnermut
pingaartillugit isiginnaartitsinikkut filmiliortitsinikkullu suleqatigiinnermi
nukittorsaanisaq immikkut taammassuk aamma maluginiarpara. Kisianni nuannerpoq
taamatut partiit Kattusseqatigiillu isumaqatigiitsigisumik tapersiimmata. Qujanaq.
Anders Andreassen, Inatsisartut Siulittaasoqarfiani
ilaasortaq:
Qujanaq. Taamaalillunilu ullumikkut oqaluuserissaq immikkoortoq 26 naammassivoq.