Kalaallit Nunaanni Inatsisartut

Oqaluuserisassani immikkoortoq 27-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ataasingorneq 17.maj 1999 nal. 15.30

 

 

Oqaluuserisassani immikkortoq 27

 

 

Suleriaasissami §' 30 naapertorlugu aalajangiiffigisassatut siunnersuut: Nunat Avannarlliit Killiit Siunnersuisoqatigiiffiata 1998-mi inassuteqaataannik nr. 2-mik, Savalimmiuni Kultureqarnermut Atuartitaanermullu Naalakkersuisumut, Islandimi Atuatitaanermut,  Ilisimatusarnermut Kulture­qarnermullu Ministerimut aamma  Kalaallit Nunaanni Kultureqarnermut, Ilinniartitaanermut Ilisimatusarnermullu Naalakkersuisumut Nunat Avannarliit Killiit akornanni timersorniermut tunngasut  suleqatigiinnerup patajaallisarneqarnissaa pillugu siunnersuumik saqqummiussissus­satut suleqatigiisssitamik pilersitsisoqarnissaanik inassuteqaammik Inatsisartut akuersissutigin­nissasut.

(Inatsisartut Siulittaasuat)

 

Ataatsimiinnermik aqutsisoq: Anders Andreassen, Inatsisartut Siulittaasoqarfianni ilaassortaq:

 

Johan Lund Olsen, Inatsisartut Siulittaasuat:

Qujanaq. Tassa inassuteqaat nr. 2 maannakkut taanna saqqummiutissavara.

Nunat Avannarliit Killiit Siunnersuisoqatigiiffiata 1998-imi ukiumoortumik ataatsimiinnermini inassuteqaat siunnersuummut uunga ilanngunneqartoq akuersissutigaa, tassaasorlu Savalimmiuni Kultureqarnermut Atuartitaanermullu Naalakkersuisumut, Islandimi Atuartitaanermut, Ilisimatusarnermut Kultureqarnermullu Ministerimut aamma Kalaallit Nunaanni Kultureqarnermut, Atuartitaanermut Ilisimatusarnermullu Naalak­kersuisumut Nunat Aannarliit Killiit akornanni timersornermut tunngasumik suleqatigiinnerup patajaallisaavi­gineqarnissaa pillugu siunnersuummik saqqummiussisussatut suleqatigiissitamik pilersitsisoqarnissaanik inassuteqaat.

 

Inassuteqaammut tunuliaqutaavoq inassuteqaammi nassuiaatigineqartutut isikkulerlugu suleqatigiinnissaq nunani kattuffinnut iluaqutaasussatut aammalu avammut kiinnertarnermut nakussassaataasussatut isigineqar­mat. Nunat Avannarliit Killiit Siunnersuisoqatigiiffiat isumaqarpoq inassuteqaammi nassuiaatigineqartutut isikkulerlugu timersornerup tungaatigut Nunani Avannarlerni Killerni suleqatigiinnerup annertusarneqarnera­tigut Nunani Avannarlerni Killerni kinaassuseqaqatigiinnerput nakussassarneqassasoq.

 

Nunat Avannarliit Killiit Siunnersuisoqatigiiffianni Inatsisartut aallartitaasa Inatsisartunut inassuteqaatigaat inassuteqaatigineqartoq akuersissutigeqqullugu, taamaalilluni akuersineq Kultureqarnermut, Atuartitaaner­mut Ilisimatusarnermullu Naalakkersuisumut ingerlateqqitassatut aamma tunniunneqarsinnaaqqullugu.

 

Lise Lennert, Kultureqarnermut, Ilinniartitaanermut Ilisimatusarnermullu Naalakkersuisoq:

Aalajangigassatut siunnersuummi matumani pineqartoq tassaavoq suleqatigiissitaliamik Nunani Avannarlerni Killerni timersornikkut suleqatigiinnerup patajaallisarneqarnissaanik suliaqartussamik pilersitsinissaq. Siunnersuutitarpiaa oqaaseqaateqarfigitinnagu oqaluuserisassani imm. 26 siuliani oqaluuserisarput innersuus­sutigissavara, tassanimi Islandip, Savalimmiut Nunattalu kulturimut, ilinniartitaanermut ilisimatusarnermullu tunngasuni suleqatigiinnissaq pillugu isumaqatigiissutaat ilisimatitisissutigigakku. Taamaattumik suleqatigiin­nerup ingerlareersup killiffia ilanngullugu maani eqqartussanngilara, timersornikkulli suleqatigiinneq kisiat oqaaseqarfigissallugu.

 

Nunatta Nunat Avannarliit timersornermut ataatsimut komitéanni ilaasortaanera aqqutigalugu Island Savalimmiullu attaveqarfigereerpavut. Ataatsimiititaliaq taanna ukiumut ataatsiarluni ataatsimiittarpoq, ilaatigullu nalillit eqqarsaatigalugit tunngavigisat aaqqissuussaanermilu ajornartorsiutit oqaluuserisarlugit. Ataatsimiititaliap aamma Nunani Avannarlerni timersornernikkut kulturikkullu festivaleqartarneq ukioq manna maani Nunatsinni ingerlanneqartussaq suliniutigisimavaa. Taamatut aaqqissuussisarneq Nunani Avannarlerni Killerni paarlakaajaattumik ingerlanneqartassaaq. Festivaleqarneq siulleq siorna Islandimi ingerlanneqarpoq.

 

Timersoqatigiit Kattuffiat pisortaqarfiup attaveqarfigereersimavaa, taannalu aaqqiissuussaasumik qanimut suleqatigiinnissamik soqutiginnittorujussuuvoq.

 

Nunani Avannarlerni Killerni timersortartut timersuutit ilarpassuini ullumikkut timersornermi nukittussutsimik­kut naligiittorujussuunerat Timersoqatigiit Kattuffiata uppernarsarsinnaavaa. Taamatut naligiinneq Nunani Avannarlerni Killerni timersortartut naapeqatigiikkaangata sungiusarluni pikkorinnerulernissamut aqqutissaq­qissorujussuuvoq.

 

Nunani ataasiakkaani aamma timersuuteqarpoq nunami pineqartumi qangarsuaaniilli ingerlanneqartartunik, nunalli sinnerini allani ingerlanneqarpianngitsunik. Qaninnerusumik suleqatigiinnikkut allat ilisimasaat misilittagaallu aamma nammineq ilisimasat misilittakkallu iluaqutigeqatigiinneqarsinnaapput, taamalu timersornermik ineriartortitseqataaffiullutik.

 

Qaninnerusumik suleqatigiinneq aamma Nunanut Avannarlernut Killernut ilaasutut misigisimanermut nukittorsaaqataasinnaavoq, tamannalu Nunat Avannarliit suleqatigiinneranni nunarsuup ilaani inissisimaner­put pissutigalugu ataatsimut soqutigisaqaqatigiiffigigajutatsinni aamma iluaqutigisinnaavarput.

 

Soorlu oqaluuserisassami immikkoortup 26-p oqaluuserineqarnerani malugeqqoreeriga ilaatigut kulturimut tunngasutigut suleqatigiinneq pillugu isumaqatigiissut ukioq manna naliliiffigineqassaaq, taamaattumillu Nunat Avannarliit Killiit Siunnersuisoqatigiiffiata kaammattuutaata Inatsisartunit akuerineqarnissaa Naalakkersuisut kaammattuutigissavaat. Matuma kingorna Nunani Avannarlerni Killerni Naalakkersuisoqatikka attaveqarfi­gissavakka, kaammattuutillu isumaqatigiissutip naliliivigineqarneranut aamma suliniuteqarfissanik nutaanik toqqartuinermut atatillugu oqaluuserineqarnissaa inassuteqaatigalugu.

 

Tamatumunnga atatillugu malugeqquneqassaaq timersorneq suliniuteqarfissatut toqqarneqarpat suleqatigiis­sitaliamik pilersitsinissamut aallarnisaataasumik suliniutit Savalimmiut Islandillu suleqatigineqarneranni kulturikkut inuiaqatigiinnullu paasissutissiinermut konto pingaarneq aningaasanut inatsimmiittoq 40.14.14 aqqutigalugu immikkoortinneqarsimasut atorlugit aningaasalersorneqarsinnaammata.

 

Lars Karl Jensen, Siumup oqaaseqartua:

Nunat Avannarliit Killiit akornanni timersornikkut suleqatigiinninerup qanoq annertusarneqarsinnaaneranut siunnersuuteqartussanik suleqatigiiitaliamik pilersitsisoqarnissaamik Nunat Avannarliit Killiit Siunnersuisoqa­tigiiffiata 1998-mi inassuteqataanut Siumumiit imatut oqaaseqaateqassaagut.

 

Siumumiit timersornermik nuannarisaqartuusugut tapersuisuusugullu pingaartilluinnarparput pinaveersaartitsi­nermut atasumik meeqqat, inuusuttut allallu peqqinnartumik sammisassaqartitaanerisa nukittorsarnissaat annertusaaffiginissaallu suleqataaffigissallugu.

 

Mannakkut Nunatsinni timersoqartigiit kattuffiat ukiuni kingullerni timersuutinut aalajangersimasunut kattuffeqartunik arfineq pingasunik ilaasortaqarpoq allallu timersuutinik allanik ingerlataqartut peqatigiiffii ilanngullugit maannakkut 12 - 13.000-it missaani Nunatsinni timersoqatigit kattuffiat ilaasortaatitaqarpoq Nunatsinni tulluusimaarutissatsinnik.

 

Maannakkut takornartaajunnaarpoq Nunatsinni timesortartut nunanut allanut unammillersinnaanikkut nallersuukkiartornerat, tamannalu nukittorsarniarlugu Siumumiit isumaqarluinnarpugut nunat sanilerisatta, tassalu Islandimi, Savalimminilu timersortartut peqatigalugit aaqqissuussaanerusumik unammiuaartarnerit aqqutissiuunneqarpata, tamanna suli annertunerusumik  timersornikkut nunatsinni angusaqariartornermik nassataqassasoq.

 

Tamannalu aamma nunarsuarmiunut allanut nallersuukkiartornermut aqqutaalluartussatut Siumumiit isumaqarfigaarput.

 

Taamaattumik Siumumiit pingaartilluinnarparput oqaluuserisassami uani Nunat Avannarliit Killit akornanni timersornikkut suleqatigiinnerup qanoq annertusarneqarsinnaaneranut siunnersuuteqartussanik suleqatigiissi­taliamik pilersitsisoqarnissaanik anguniagaqarneq aqqutissiuunneqassasoq, tamannalu piviusunngortinniarlu­gu suliaqarnermi aamma Kalaallit Nunaanni Timersoqatigiiffiit Kattuffiata qanimut peqataatinneqarnissaa kissaatigaarput.

 

Kiisalu suliassaq pingaartuummat piaartumillu naammassinniffiusumik ingerlateqqineqartariaqarmat, siunnersuutigissavarput nunani pineqartuni pingasuni timersoqatigiiffiit kattuffii naapisinneqaqqullugit, pisortatigoortumik suliaqarnissamut inassuteqaateqartussanngorlugit.

 

Siumumiit taamatut oqaaseqarluta Nunat Avannarliit Killit akornanni timersornikkut suleqatigiinnerup qanoq annertusarneqarsinnaanneranut siunnersuuteqartussanik suleqatigissitaliamik pilersitsisoqarnissaanik Nunat Avannarliit Killit Siunnersuisoqatigiiffiata 1998-imi inassuteqaataat taperserparput.

 

Naggasiullugulu Siumumiit pissusissamisoortutut isigalugu suliniutip piviusunngortinnissaanut akisussaaneq Nunatsinni Kultureqarnermut Ilinniartitanermut Ilisimatusarnermullu Naalakkersuisoqarfimmut ingerlaneqar­tussatut inassutigissavarput.

 

Godmand Rasmussen, Atassutip oqaaseqartua:

Nunat Avannarliit Killit inassuteqaataa ersarimmat annertunerusumik oqaseqarfiginagu Atassummiit imatut oqaaseqassaagut:

 

Nunat Avannarliit Killit Siunnersuisoqatigiiffiata 1998-imi inassuteqaataa nr. 2 pillugu, tassa suleqatigiinnis­samik siunnersuut Atassummi eqqartorsimavarput, pineqartoq iluatinnartutut isigigatsigu, annertunerusumik oqaaseqarfiginagu tamakkiisumik tapersiinerput nalunaarutigaarput, naluneqanngitsutuummi Nunatsinni timersoqatigiit nunatta avataanniit pisariaqartikkiartuinnarmassuk, oqareernittuut annertunerusumik oqaase­qarfiginagu siunnersuut tamakkiisumik taperserparput, qujanaq.

 

Olga Poulsen, Inuit Ataqatigiit oqaaseqartuat:

Nunat Avannarliit Killit Siunnersuisoqatigiiffiata inassuteqaataa nr. 2 naapertorlugu, tassalu Nunat Avannar­liit Killit akornanni timersornermut tunngasumik suleqatigiinnerup patajaallisaavigineqarnissaa pillugu siunnersuummik saqqummiussisussamik suleqatigiissitamik pilersitsisoqarnissaa Inuit Ataqatigiinniit tamak­kiisumik tapersersorparput.

 

Nunatsinni timersornerup inerisarneqarluarnissaa Inuit Ataqatigiinniit tapersersorluinnarparput, isumaqarpu­gullu taamatut siuarsaaniarnermi nunat qaninnerpaat suleqatissavut tassaasut Nunat Avannarliit Killiit.

 

Nunatsinni timersortartut nunarsuarmioqatigiinnut nallersuukkiartuinnarnissaminnut pisariaqartippaat timersortartunik nunanit allaneersunit naapeqateqartarnissartik, aammalu unammiuaaqqateqartarnissartik, taamaalillutik misilittakkatigut imminnut inerisarluarsinnaannissaminnut periarfissaqalersinnaasagamik angusarisartakkamikkullu pitsanngoriartulissallutik.

 

Taamaattumik taamatut naatsumik oqaaseqarluta suleqatigiiffiup timersornermut tunngasunik patajaallisaavi­gineqarnissaa pillugu saqqummiussisussamik pilersitsisoqarnissaa pingaaruteqarluinnartutut isigigatsigu siunnersuut taperserparput.

 

Anthon Frederiksen, Kattusseqatigiit oqaaseqartuat:

Nunat Avannarliit Killit Siunnersuisoqatigiiffiata inassuteqaataa nr. 2, tassa Savalimmiuni Kultureqarnermut Atuartitaanermullu Naalakkersuisumut, Islandimi Atuartitaanermut Ilisimatusarnermut Kultureqarnermullu ministerimut, aamma Kalaallit Nunatsinni Kultureqarnermut, Atuartitaanermut Ilisimatusarnermullu Naalak­kersuisumut Nunat Avannarliit Killit akornanni timersornermut tunngasunik suleqatigiinnerup patajaallisaavi­gineqarnissaa pillugu  siunnersuutip inassutigineqarnera Kattusseqatigiinniit tamakkiisumik taperserparput.

 

Johan Lund Olsen, Inatsisartut siulittaasut:

Siulianitut tassa oqaqqiinnarusuppunga takisuuliornissamut pissutissaqarsorinanngilarngaassiit aamma uani, tassa maani aamma Inatsisartut, Inatsisartuni partiit tamarmik isumaqatigiipput, aammalu paasinarpoq Nunat Avannarliit Killit Siunnersuisoqatigiiffianni taanna kaammattuutiginiagarput, tassa Inatsisartuni akuersissutigi­neqalersoq aammalu tamanna Naalakkersuisuni aamma malinniarneqartoq tamannalu qutsatigissvara Nunat Avannarliit Killit Siunnersuisoqatigiiffianni ilaasortaaqqatikka aamma sinnerlugit.

 

Lise Lennert, Kultureqarnermut, Atuartitaanermut Ilisimatusarnermullu Naalakkersuisoq:

Uangattaaq qujavunga taamatut siuliatulli isumaqatigiissutigitigalugu partiininngaanniit Kattusseqatigiinninn­gaanniillu tapersersorneqarmat.

 

Immikkut taalaarusuppara Siumup oqaaseqartuaninngaanniit kissaatigineqartoq una, nunani pineqartuni pingasuni timersoqatigiiffiit kattuffii naapitinneqaqqullugit pisortatigoortumik suleriaqqinnissaminnut inaasute­qaateqartussanngorlugit  kissaatigineqartoq  misissuiffigissagakku.

 

Anders Andreassen, Ataatsimiinermi aqutsisoq:

Tamaalillni ullumikkut oqaluuserisassaq immikkoortoq 27, tassalu Nunat Avannarliit Killit akornanni timersornermut tunngasunik suleqatigiinnerup patajaallisarneqarnissaa pillugu suleqatgiissitamik pilersitsinis­samik siunnersuutip oqallisiginera naammassigallarpoq.