Oqaluuserisassani immikkoortoq 28-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Anders
Andreassen, Inatsisartut Siulittaasoqarfianni ilaasortaq:
Johan Lund Olsen, Inatsisartut Siulittaasuat:
Qujanaq, tassa inassuteqaat nr. 3 1998-imeersoq uani tassa sammineqarpoq, aammalu tassa imaappoq: Inassuteqaammut tunngaviunerpaavoq kissaatigineqarmat Nunat Avannarliit Killiit pingasuusut akornanni inuusaaseq inuunermillu isiginnittaaseq pillugit paasissutissiivigeqatigiittarnerup patajaallisaavigineqarnissaa, atuarfinni atuartut oqaatsinik paasinnittarnerisa pitsaanerulersinniarneqarnissaat, minnerunngitsumillu Nunani Avannarlerni Killerni inuusuttut imminnut attaveqatigiinnikkut pitsaanerusumik periarfissiivigineqarnissaat.
Soorlu inassuteqaammi ilanngullugu nassiunneqartumi takuneqarsinnaasoq erseqqinnerusumik siunnersuutigineqarpoq Nunani Avannarlerni Killerniittuni atuarfiit akornanni, atuartut sammissallugit soqutigisaasigut suleqatigiissuteqarsinnaaneq aallartissinnaajumallugu internet atorlugu suleqatigiiffittut atorumallugu attaveqaqatigiinneq pilersitsivigineqassasoq.
Nunat Avannarliit Killiit Siunnersuisoqatigiiffianni Inatsisartut aallartitaasa Inatsisartunut taamaalillutik inassuteqaatigaat inassuteqaatigineqartoq akuersissutigeqqullugu, taamaalilluni akuersineq Kultureqarnermut, Atuartitaanermut Ilisimatusarnermullu Naalakkersuisumut ingerlateqqitassatut aamma tunniunneqarsinnaaqqullugu.
Lise Lennert, Kultureqarnermut, Atuartitaanermut
Ilisimatusarnermullu Naalakkersuisoq:
Internet aqqutigalugu
atuarfiit suleqatigiinnerisa annertusarneqarnissaanik siunnersuut
naalakkersuisut soqutigalugu atuarsimavaat. Naalakkersuisut isumaqarput
siunnersuut periarfissatsialaasoq
Nunatsinni inuusuttut Islandimi Savalimmiunilu peqatiminnut
attaveqarnissaannut, tamatumunngalu peqatigitillugu paasissutissiisarnermi
teknologip periarfissaanik ilisimaarinnilluarlerlutik.
Maannangaaq Nunani
Avannarlerni atuarfiit ilinniarfiillu akornanni suleqatigiinneq
annertusarniarlugu internet atorlugu suliniutit arlallit ingerlareerput.
Tamatumani ilaatigut taaneqarsinnaavoq Nunani Avannarlerni atuarfiit
qarasaasiatigut attaveqarfiat, ODIN. Maannali Nunatsinni atuarfiit ikittuinnaat
internetip iluaqutiginissaannut periarfissaqarput, atuarfiimmi ikittuinnaat
kisimik atuartitsinermi atorneqarsinnaasumik internetimut attaveqarmata.
Neriunarporli pissutsit ukiuni aggersuni allanngorumaartut, anguniagaavormi
atuarfiit amerliartuinnavissut ulluinnarni atuartitsinermut ilaavissutut
internetimik atuilernissaat.
Taamaattumik
atuarfinni sulinermi internetip siunissami ilaalluinnalernissaanik Nunat
Avannarliit Killiit Siunnersuisoqatigiiffiata isumaliutersuutai Naalakkersuisut
isumaqatigaat. Nunat Avannarliit Killiit internet atorlugu
suleqatigiinnerisigut ataatsimut inunnguuserinagu oqaaserisat - danskit oqaasii
- nukittorsarneqarsinnaassapput. Taamatut aamma suleqatigiinnikkut nunani
allani peqatimik imaluunniit ukioqatiminnik inuunerannik isumaannillu
inuusuttortavut inuusuttuarartavullu paasisaqarluarlerniassamata.
Naalakkersuisut
taamaattumik inassutigissavaat Inatsisartut siunnersuut ilalissagaat
peqatigitillugu kaammattuutigalugu atuarfiit internet atorlugu
suleqatigiinnerat kulturi, ilinniartitaaneq ilisimatusarnerlu pillugit
Islandip, Savalimmiut Nunattalu akornanni suleqatigiinnissamut
isumaqatigiissutip qanittukkut nalilersorneqarnissaanut atatillugu
suliniuteqarfissatut siunnersuutigineqarsinnaasutut isumaliutigineqassasoq.
Internet atorlugu
atuarfiit suleqatigiinnissaat immikkut suliuniuteqarfissatut toqqarneqassappat,
taamatut suliniuteqarnissamut aallarniutaasumik ataqatigiissaarineq
aningaasanut inatsimmi kontumi pingaarnermi 40.14.14-imi aningaasanit
immikkoortitanit aningaasalersorneqarsinnaassaaq.
Lars Karl Jensen, Siumup oqaaseqartua:
Siumumiit oqaatigeriissavarput
ukua oqaluuserisatta siuliini pineqartutuulli matumani aamma saqqummiunneqartoq,
tassalu Nunani Avannarlerni Killerni atuarfeqarfiit akornanni
qarasaasiatigut internet atorlugu
suleqatigiinnerup annertusarneqarnissaanik kaammattuuteqarneq peqataanissamillu
inassuteqaat tapersorluinnaratsigu.
Meeqqat
atuartitaanerisa saniatigut qaammaassaqarnikkut ineriartortitaanissamik Nunatta
avataani allatut inooriaaseqartoqarnerik aamma oqaatsit allat atorlugit
paasisaqarnissamut aqqutissiuussinermi Siumumiit pingartilluinnarparput
maannakkut qarasaasiat atorlugit, soorlu internettikkut paasisatigut killeqanngitsumik sumulluunniit
annertusaasinnaanerup aamma Nunatsinni atorluarneqarluni ineriartortitsinikkut
malinnaafigineqarnissaa.
Naalakkersuisut
saqqummiussaatigut takusinnaavarput pissusiviusut toqqammavigalugit maannakkut
nunatsinni atuarfeqarfiit ikittuinnaat internettimik attaveqarneq
periarfissaqarfigigaat. Siumumiit atuarfeqarfiit amerlanerusut
periarfisaqartitaanissaat anguniarlugu tamanna siunissami
aaqqiivigineqartariaqartutut isigaarput.
Naalakkersuisunullu
kaammattuutigissavarput Nunani Avannarlerni Killerni atuarfeqarfiit
qarasaasiatigut attaveqarfiat Odin internettimik atortoqarnikkut aamma
Nunatsinni periarfissaqartitsilluni assigiimmik ineriartortinneqassasoq,
aningaasalersuinikkullu nunat taakkua akornanni aqutsissiuussioqassasoq.
Tamanna Nunat
Avannarliit Killiit Naalakkersuisuisa isumasioaqatigiinnissaanni ilanngullugu
oqaloqatiginnissutigineqartussatut Siumumiit kaammattuutigissavarput.
Siumumiillu aamma pingaartipparput siunissaq ungasinnerusoq eqqarsaatigalugu
anguniarneqassasoq internet atorlugu atuarfiit suleqatigiinnissaannik
ineriartortitsinissamik siammaanissaq, tassani Nunat Avannaamioqatigiit
peqatigalugit anguniarneqassasoq, aningaasalersuinissarlu aamma
aqqutissiuunneqassasoq aningaasaateqarfiit soorlu NORA allallu aqqutigalugit.
Naggataatigut
Siumumiit taamatut oqaaseqarluta pissusissamisoortut isigaarput Nunat
Avannarliit Killiit atuarfeqarfiisa akornanni internet atorlugu Nunatta
peqataaffigisaanik suliniutit akisussaafiginerata Nunatsinni Kultureqarnermut,
Ilinniartitaanermut Ilisimatusarnermullu Naalakkersuisoqarfimmi inissisimasutut
innersuussutigineqarnera.
Otto Steenholdt, Atassutip oqaaseqartua:
Nunat Avannarliit
Killiit Suleqatigiiffiannut aallartitassat nutaat siulerisimasamik Ilulissani
ukioq kingulleq ataatsimiinerminni Naalakkersuisuminnut namminneq
akuersaarsinnarlugit apuukkumasaat ullumikkut saqqummiunneqartoq Atassummiit
pissusissamisoorluinnartutut isigaarput.
Takisuuliutiginagu
neriuutigilluinnarparput Inatsisartunit tamarmiusunit akuersaarneqarluarluni
Naalakkersuisunut ingerlatseqqitassatut suliarineqassasoq.
Ukiorpassuungillat
Atassut Landstingimi meeqqat atuarfiini annertunerungaartumik qarasaasiat
ilinniartitsisutigineqarlutik atornerulertariaqarnerannik siunersuuteqarmat.
Aningaasat aporfittut oqaatigineqaraluartut paasinarsigaluttuinnarpoq
atuarfinni qarasaasianik atuisariaqarneq avaqqunneqarsinnaajunnaartoq, qujanartumik
tamanna arriikkaluamik ornipparput.
Taama naatsunnguamik
Nunatsinni pissusiusut oqaaseqarfigitsiareerlugit siunnersuutigineqartoq
tikkuarumavarput, akuersaarluinnarparput siunnersuutip ersarilluinnartumik
oqaluttuarfigimmatigut pisariaqartitaq Nunatsiniinnaanngitsoq ima
atorfissaqartinneqalersimatigisoq, allaat nunat avatitsiniittut
atassuteqarfiginissaat pinngitsoorneqarsinnaajunnaarsimalluni.
Kultureqarnermut
Naalakkersuisup akissuteqaataani erserpoq ilimageriikkatsitut atuarfiit
ikittuinnaat kisimik atuartitsinermi atorneqarsinnaasunik internetimut
atassuteqartut. Naalakkersuisoq Atassummiit isumaqatigilluinnarparput
neriummat ukiuni aggersuni atuarfinni qarasaasiat atorneqarnerat pillugu
pissutsit allanngorumaartut.
Nunat Avannarliit
Killiit aallartitaannut Nunatsinniit ilaasortat Inatsisartunut akuereqqullugu
siunnersuutaat Atassummiit ersarissumik paatsuugassaangilluinnartumillu
akuersaarparput, qujarullugulu Naalakkersuisup aningaasanut inatsimmi konto aalajangersimasoq
siunnersuummik aningaasalersuisinnaasutuut qularinagu aamma tikkuareermagu.
Olga Poulsen, Inuit Ataqatigiit oqaaseqartuat::
Nunat Avannarliit
Killiit Siunnersuisoqatigiiffiata inassuteqaataa nr. 3 naapertorlugu, tassalu Nunat
Avannarliit Killiit akornanni atuarfeqarnikkut internet atorlugu
suleqatigiinnerup patajaallisaavigineqarnissaanut suleqatigiinnissamik
peqataaffiginninnissamillu inassuteqarnissamik siunnersuut tamakkiisumik Inuit
Ataqatigiinniit tapersersorparput.
Nunarsuarmi
internetikkut ineriartornerup malinnaaffiginerunissaa Inuit Ataqatigiinni
pingaartilluinnarparput, pingaartumillu ilinniartitaanikkut anertunerusumik
atorneqalernissaa. Minnerunngitsumillu Nunatsinni innuttaasut internetimik
atuisinnaanissaasa maannakornit pitsaanerusumik periarfissineqarnissaa
siunertaralugu TELE Greenlandip internetimik atuinermi akigititaasa
allangortinneqarnissaat suliniutigineqartariaqartoq ilaatigut atuisut
aalajangersimasumik qaammammut akiliuteqartarnissaat siunnerfigineqartariaqarluni.
Taamatut
naatsunnguamik oqaaseqarluta inassuteqaat suleqatigiinnerunissamillu
orniginnittoq tapersersorparput.
Anthon Frederiksen, Kattusseqatigiit oqaaseqartuat:
Kalaallit Nunatsinni
Inatsisartut Nunat Avannarliit Killiit Siunnersuisoqatigiiffianni aallartitat
isumaqatigiissut Nunani Avannarlerni Killerni Siunnersuisoqatigiit nunani
pineqartuni Naalakkersuisunut inassuteqaataat Kattusseqatigiinniit
tamakkiisumik taperserpagut.
Kattusseqatigiinnit
malugeqqussavarput Nunat Avannarliit Killiit Siunnersuisoqatigiivi
siusinnerusukkut Nunat Avannarliit Killit Inatsisartutigoortumik
Siunnersuisoqatigiiffiinnik taaguuteqarsimagaluartoq, nunanit Islandimit,
Savalimmiunit Nunatsinniillu aallartitaqarfiusup ukiumoortumik
ataatimiinnermikkut anguniagassatut aalajangiuttagaasa ilaat nunani
pineqartuni Naalakkersuisut ilaatigut immaqalu amerlanertigut aalajangiussat
piviusunngortinneqarnissaasa sulissutiginiarnerat
ajornartorsiutigisarsimammassuk. Siunnersuisoqatigiinni ilaasortaasugut tamanna
ilisimavarput. Taamaammat Kattuseqatigiinnit kaammattuutigissavarput Naalakkersuisut
siunnersuisoqatiginnit inassuteqaatit pimoorullugit sulissutigeqqullugit,
tassami maannakkut Nunatsinni Naalakkersuisut Siulittaasuata, siornatigullu
siunnersuisoqatigiit Nunatsinnit aallartitaannut siulittaasuusimasup pissutsit
taamaattut ilisimaarilluarmagit.
Taamaattumik Nunat
Avannarliit Killiit Siunnersuisoqatigiivisa nunat pineqartut akornanni
qaninnerusumik sutigut tamatigut nunanut taakkununnga iluaqutaasussamik
suliniuteqarnerat Naalakkersuisunit eqqumaffigineqarnerulernissaa
naatsorsuutigaarput.
Taamatut
oqaaseqareerluta, soorlu siusinnerusukkut immikkoortoq 26-i 27-ilu aamma
akuersissutigireerigut 28-imut tunngatillugu immikkut imatut oqaaseqaateqassuugut:
Nunatsinni interneti
atorlugu aturfiit ikittuinnaat ullumikkut periarfissaqaraluartut, taamaattoq
Kattusseqatigiinniit tamatuma apeqquserneqannginnissaata qulakkerneqarnissaa
kaammattuutigaarput. Nalunngilarpummi internet atorlugu attaveqaasersuineq
Nunatsinni Naalakkersuisutigoortumik pingaartinneqartoq, taamaatumik
tamatumunnga ilanngullugu eqqaasitsissutigissavarput, illoqarfinni Nuup
avataaniittuni internetimut attaveqqaasersuinermi innuttaasut pitsaanerusumik
TELE Attaveqaatiniit kiffartuunneqartalernissaat Naalakkersuisunut piaartumik
suliniutigisassanngorlugu piumasaqaatigissagatsigu, tassami nunani pineqartuni
sutigut tamatigut suleqatigiinnerup taamaallaat pisortatigoortumik
ingerlanneqarnera kisiat siunertarisariaqanngitsoq Kattusseqatigiinniit
eqqaasitsissutigerusukkatsigu aammalu innuttaasunut ataasiakkaanut
periarfissaritinneqartut pitsaanerulersinneqarnissaat ilanngullugu
eqqaasitsissutigisariaqartutut isumaqarfigigatsigu. Kiisalu internet atorlugu
suleqatigiinnermi, tassa Islandip, Savalimmiut Nunattalu akornanni danskit
oqaasiisa nukitsorsarneqarnissaasa Naalakkersuisunit pingaartinneqarmat,
Kattusseqatigiinniit pakatsissutigaarput, tassami Nunatsinni oqaatsinik
ilinniartitsinermi siunissaq eqqarsaatigalugu tuluit oqaasiisa annerusumik
ilinniartitsissutigineqartarnissaat pisariaqartutut pingaaruteqarluinnartutullu
isigigatsigu.
Taamatut naatsumik
oqaaseqarluta siunnersuut tamakkiisumik taperserparput.
Johan Lund Olsen, Inatsisartut Siulittaasuat:
Qujanaq, tassa
paasinarpoq maani partiit tamarmik Nunat Avannarliit Killiit
Siunnersuisoqatigiiffiata inassuteqaataat nr. 3 una tamakkiisumik aamma
tapersersoraat, tamanna aamma soorunami
nuannaarutissaavoq, kisianni aamma maluginiartariaqarpoq internetimi
periarfissat eqqarsaatigalugit oqaatigineqartut aamma taakkua
Naalakkersuisutsinninngaannit taakkua aamma eqqumaffigineqaqqummata. Tassa
ilumoorpoq maani Nunatsinni internetimik atuisinnaanermut periarfissat
killeqartutut aamma oqaatigisariaqarmata, internetimut minutsimut
akigitinneqartut qaffasippallaarneri taakkua patsisaallutik.
Taamaattumik soorunami
uani Nunat Avannarliit Killiit Siunnersuisoqatigiiffiata inassuteqaataat
akuersissutigineqareersoq isumaqarpunga aamma pissusissamisoortoq taanna aamma
malersulaasallugu, aammalu Naalakkersuisunut taanna ingerlateqqilaassallugu,
tassa internetimut taanna minutsimut akigitinneqartoq maanni Nunatsinni
appartuugaluarpat ataava qularutissaangimmat aamma meeqqat atuarfianni aammalu
allani ilinniarfinni inuusutissarsiutitigut ilinniarfiusartuni internetimik
atuisinnaaneq, taanna aamma siumut ilorraap tungaanullu aamma
ingerlalerumaarmat.
Taamatullu
oqaaseqareerlunga aammalu partiit tamaasa taamatut tapersiinerannut
qujaniaatigalunga oqaatigissavara, tassa
Nunat Avannarliit Killiit Siunnersuisoqatigiiffianni aamma interneti
aamma uagut nammineq aamma atoratsigu, taassa internetimi qupperneqarpugut,
tassa soqutiginnittut kikkulluunniit, taamatullu periarfissaqartut Nunat Avannarliit Killiit Siunnersuisoqatigiiffianni
suliniutigut pillugit paasisassarsiorfigisinnaavaat taanna qupperneq.
adresseqarpoq www.vestnordisk.is, tassa taanna qupperaanni suliniutigut tassani taava
takuneqarsinnaasapput.
Taassuma aamma
saniatigut Nunat Avannarliit Killiit
Siunnersuisoqatigiiffianni naqitaliorsimavugut taannalu tassa tassani
siunnersuisoqatigiinni ukiuni kingullerni, ukiuni tullinnguuttuni aamma
suliniutigisassatsinnik ilisarititsisoq, taanna aamma maannakkut
naqissimalerparput, tassalu maani Inatsisartuni naalakkersuisunilu ilaasortanut
aamma taanna agguaanneqarumaarpoq.
Naggaterpiaatigullu
una aamma ilisimatitsissutigilaasavara, tassa qanittukkut tassa majip
arfineq-pingajuanni Islandimi Altingimut qinersisoqarsimavoq, tassungalu
tunngatillugu isumaqarpunga nuannaarutissatsitut aamma una
oqaatigilaartariaqartoq tassa Nunat Avannarliit Killiit
Siunnersuisoqatigiiffianni maannamut siulittaasuusimasoq Ísólfur Gylfi Pálmason
aamma qinigaaqqimmat majip arfineq-pingajuanni, taamaammat tassa
naatsorsuutigivarput aamma uani Nunat Avannarliit Killiit
Siunnersuisoqatigiiffianni aamma ingerlaqqikkumaartoq, aammalu tassani
suleqatigiinnerput nuannerluinnartumik ingerlajuartarmat.
Lise Lennert, Kultureqarnermut,
Ilinniartitaanermut Ilisimatusarnermullu naalakkersuisoq:
Partiit
Kattusseqatigiillu taamatut tapersiinerat nuannaarutigalugu tiguara, taavalu
naggasiutaasumik oqaaseqarfigilaasavakka ataasiakkaarlugit.
Siullermik Siumup
oqaaseqartuata una oqaatigimmagu, immikkut Odin internetimik atortoqarnikkut
attaveqarfik Odin taammagu, aamma Nunatsinni periarfissaqartitsilluni
assigiimmik ineriartortinneqassasoq aningaasalersuinikkullu nunat taakkua
akornanni aqqutissiuunneqassasoq ujartormagu.
Tassunga tunngatillugu
oqaatigisinnaavara atuarfiit tamarmik aammalumi allat internetimut
isersinnaasut taanna Odin iserfigisinnaammassuk, tassa taamaalilluni
periarfissaq taanna ammaanneqareersimavoq.
Aamma Siumup
oqaaseqartuata ujartugaa alla, aningaasaateqafiit soorlu NORA allallu
aqqutigalugit aqqutissiuussisoqarnissaanik kissaateqarneq aamma tiguara
maluginiarlugu.
Taavalu Atassutip
oqaaseqartuata imatut oqaaseqarnera: Atassumiit isumaqatigilluinnarparput
Naalakkersuini neriummat ukiuni aggersuni atuarfinni qaraasaasiat
atorneqarnerat pillugu pissutsit allanngorumaartut, tassa tassani una
ujartorunarparsi sukkanerusumik kommunini ataasiakkaani qarasaasiatigut
ineriartortitsinerup angulertorneqarnissaa.
Aamma taanna
ilimanarluinnartoq aammami ukiut makkua ineriartortitsinerit piffinni
ataasiakkaanni ilaatigut sukkaneruvoq ilaatigullu sukkaannerullu, tassami
tassaniaasiit aningaasat aamma uniffiummata, kisianni tassa qularnanngilaq
tassa taamatut qarasaasiatigut atuarfiit ineriartortitsinerat
avaqqunneqarsinnaanngilaq, ingerlavorlu, kommunit ataasiakkaat qanoq
akissaqartiginerat tunngavigalugu.
Inuit Ataqatigiit
oqaaseqartuata una aamma taammagu, ilaarpara: Minnerunngitsumillu Nunatsinni
innuttaasut internetimik atuisinnaanissaata maannakornit pitsaanerusumik
periarfissinneqarnissaat siunertaralugu TELE Greenland internertimik atuinermik
akigititaasa allanngortinneqarnissaat suliniuteqartariaqartoq, ilaatigut
atuisut aalajangersimasunik qaammammut akiliuteqartarnissaat
siunnerfigineqarsinnaalluni.
Tassa aamma taanna
tiguara, soorunami misissussavarput, kisianni massakkorpiaq
neriorsuuteqarsinnaanngikkallarpunga.
Kattusseqatigiit
immikkoortoq 28-mi immikkut taavaat aamma pitsaanerusumik TELE Attaveqaataanit
kiffartuussinissaq, aamma tassa taanna tusaatissatut aamma tiguara.
Otto Steenholdt, Atassutip oqaaseqartua:
Kattusseqatigiinnuna
oqaaseqaataat Naalakkersuisunit pingaartinneqartorooq Savalimmiut Nunattalu
akornanni danskit oqaasiisa nukittorsarneqarnissaa, taanna
pakatsissutiginerarmagu.
Uanga Nordisk Rċdimi ilaasortaasimavunga
ukiorpaalussuarni, aamma oqaatigissavara ataatsimeeqatigalugit svenskisut,
norskitut pingaartumik taakkua malinnaaniapiloorfigisartuugakkit,
paasiuminaatsorsuanik erinarsuuserlutik oqaluttarneri, Finlandimiut taakkua
oqalutseqartarmata svenskisooraluartuni ajunngillat, Islandimiulli qallunaatut
oqalussinnaalaarnerat assorsuaq iluatigineqarsimavoq, kisianni Kattusseqatigiit
oqaatigisaat tuluit oqaasiisa qanoq pingaaruteqassusii, Islandimiut assorsuaq
taanna akorsimagamikku, tassalu Nunat Avannarliit oqaasii piunnaarlugit
ilaatigut tuluttut ilinniartinneqalersimallutik, taamaallillutik Nunani
Avannarlerni ataatsimiinneq ilaatigut Islandimiut inuusuttortaanut
paasiuminaatsinneqalersimavoq, svenskisut, Norgemiutut pingaartumillu
kalaallisut oqalussagaluarutta paasisinnaajunnaavissimallutik.
Taamaattumik ukiut
marluk matuma siornagut Nordisk Rċdimi isumaqatigiippugut aningaasaliiniarluta
Islandimut, Islandip Naalakkersuisui ajuallatsinnagit, qujanartumillu aamma
tigusimavaat 6 mio.-inik aningaasaliigatta, oqaasertalerlugit imannak: Islandip
atuarfimmi qallunaat oqaasii annerusumik ilinniartitsissutigissagaat, tassa
Nordisk Rċdimi ataatsimiinnerni oqaatsit ilattuunnginniassammata, Islandillu
qujarullugu taanna tiguaa. Taannarpiaq pissutaavoq Islandi Nunanit
Avannarlerninngaanniit inattorneqarmat Nunat Avannarliit oqaasii atorlugit
ingerlaaseq oqaatsitik atorlugit atoqqullugu.
Qangaagallarmat
Nordisk Rċdimi tuluttut oqarneq ajortuliaavoq ajornerpaaq, appisaluunneqartarpugut
paasisinnaajunnaarluta tuluit oqaasii ikiortiginiarneqaleraangata, tassami
tassani siunertaagami Nunat Avannarliit aamma oqaatsimikkut kulturimikkut
imminnut qanillisassasut.
Kisianni massakkut
imaalerpoq Ĝstersĝminngaannit allaat tusarnaariartoqartalermat allatut
ajornartumik tuluit oqaasii tassani ilaatigut atorneqartalerput, kisianni tassa
siunertaavoq Nunat Avannarliit oqaasii atorlugit ataatsimiinnerit
ingerlasassasut, taamaattumilluuna Islandimiut aningaasaliiffigineqarsimasut,
tassa internetikkut aamma Nunat Avannarliit ataatsimiisinnaaneri
isumasioqatigiissinnaaneri, kulturi Nunat Avannarliit atugaat, pingaartumik
oqaasii atorlugit ingerlanneqarnissaa pingaartinneqarmat. Taama naatsunnguamik
oqaaseqatsiarpunga.
Lars Karl Jensen, Siumup oqaaseqartua:
Siumuminngaannit
oqaaseqaaterput paatsorneqaqqunagu, qularinngilarput qarasaasiatigut
attaveqarfik Odin kikkunnilluunnit iserfigisinnaagaat. Uaniliuna
pingaartikkipput Nunatsinni ilaatigut aamma atuarfeqarfiit suli amerlaqimmata
periarfissaqartitaanngitsut qarasaasiatigut, tamakkua aqqutissiuunneqarneranni
Nunat Avannarliit Avannaamioqatigiillu aningaasalersuinikkut soorlu
amerlisaanertigut suleqatisiarineqarsinnaanerat, tassami anguniagaasoq taanna
nammineq kusanareerpoq inooriaatsikkut aammalu oqaatsitigut meeqqat
pisinnaasaasa inuusuttullu annertusaassagutta isumaqarpunga aamma tamarmik
assigiikkannersumik atugassaqartitaanissaat aamma naalakkersuisutigut
sulissutigisariaqartoq. Taamaattumik kaammattuutigiinnassavara illoqarfiit
amerlanerusut atuarfeqarfiisa aammalu nunaqarfiit tamakkunuuna aamma
periarfissaqartitaanissaat, Nunani Avannarlerni suleqatigiinnikkut
aqqutissuunneqassasoq.
Olga Poulsen, Inuit Ataqatigiit oqaaseqartuat:
Uaniuna
Naalakkersuisut akissuteqarnermini neriorsuisinnaanngitsutut oqarnerat
isumaqarpunga pingaaruteqartorujussuusoq taamatut suleqatigiinniarnerup
internetikkut annertusarneqarnissaani kingunerisussaagaa atuarfeqarfinni
assigiinngitsunik internetimik atuinerulerneq, aammalu taamatut atuinerulerutta
taava aamma kingunerissavaa aningaasat annertunerusut
akiliutigisalertussaagigut, taavalu aningaasat taakkua immaqa qanoq
annertunerusumik atorneqarsinnaanissaa siunertaralugu TELE Greenland
suleqatigalugu qanoq ililluta taakkua aningaasat sivisunerusumik atorsinnaanerigut
isumaqatiginninniutigineqarsinnaanera tassani ujartorparput.
Anthon Frederiksen, Kattusseqatigiit oqaaseqartuat:
Uanga utoqqatsissuunga
Otto Steenholdtip paasinerlussimassappanga imaluunniit paasinerlussimassappatigut,
tassa uagut siunissaq eqqarsaatigalugu eqqarsartaratta, pereersut qanorlu
oqalunnermut tunngasut eqqarsaatigivallaarnagit, uani pivakka uani
oqaluuserisami immikkoortoq 28-mi pineqartut tassaammata atuarfeqarnikkut
internet- atorlugu suleqatigiinnerup patajaallisarneqarnissaa. Ataatsimiinnerit
tassani eqqartorneqanngillat, tassa ataatsimiinerni ajunngilaq
aalajangiunneqarsimappat qallunaat oqaasii atorneqarlik, imaluunniit Nunat
Avannaamiut oqaasii atorneqarlik, uanili eqqarsaatiginerusagut tassaapput
meeqqat siunissatsinni ingerlatsiumaartussat. Taakkua qularnan-ngitsumik aamma
Islandimiut, Islandimiummi taakku usornareerput, Savalimmiormiut kalaallillu
siunissami tuluit oqaasii atornerullugit nunarsuup sinneranut
oqariartuutissatik ingerlattassappatigit. Internetimi ammareerpoq avammut
nunarsuup sinneranut, nunarsuup avannarliip avannarleq nunarsuarmi kisimi
eqqartorneqanngimmat.
Taammaattumik taassuma
tungaa taamatut oqaaseqarfilaariarlugu uani oqaaseqarnitsinni interneti-mik
pilersuineq, aamma neriuppunga Attaveqaatitigut Naalakkersuisup taanna
akissuteqarfigilaarumaaraa, tassa ullumikkut Nuuk avataani kommuneqarfinni
internetimut attavilerniarneq ajornartorsiutaasarmat annertuumik, ilaatigut
ilitsersuineq Attaveqaatininngaanniit aammalu sullinneqarneq annertuumik
killeqarmat, taanna maqaasillutigu taamatut eqqaavarput, aammalu soorunami
Inatsisartut Siulittaasuata akissuteqaammini aamma ujartorusunnarpoq assut,
tassalu interneti atorlugu akitigut immaqa aaqqiinniarsinnaaneq taanna
periarfissanut ajornannginnerulersitsisussaammat.
Ukualu Nunat
Avannarliit suleqatigiinneranni, tassa Ministerrċdip aalajangiussimasaanni
aningaasat eqqartorneqartut 1997-i eqqarsaatigissagaanni aningaasat
atugasiuunneqartut 700 mio.-it sinneqalaarput, ilinniartullu Nunani Avannarlerni
Killerni siuarsarneqarnissaat eqqarsaatigalugu takusinnaasakka naapertorlugit
1,3 mio.-ngajaat immikoortinneqarsimasut, isumaqarpunga aamma Naalakkersuisut
taakkua ujartuiffigisinnaagaat annerusumik, tassami oqartoqareerpoq
suleqatigiinneq ingerlanneqareersoq, aammalu nalunaarummi uani aamma
takuneqarsinnaareerluni.
Anders Andreassen, Inatsisartut Siulittaasoqarfiani
ilaasortaq:
Tassa
oqaluuserisatsinni tassani pineqarpoq suleqatigiinnerup
patajaallisarneqarnissaa, taamaattumillu akinut tunngasut naalakkersuisut aamma
isumagissavaat misissussallugit qanoq isumaqatigiittoqarsinnaajumaarnersoq
siunissami akit appartinneqarsinnaannissaat eqqarsaatigalugu.
Tassa taamaalilluni ullumikkut oqaluuserisassaq immikkoortoq 28, tassalu Nunat Avannarliit Killiit akornanni atuarfeqarnikkut internet atorlugu suleqatigiinnerup patajaallisarneqarnissaanik sulissutiginninnissamik peqataaffiginninissamillu siunnersuutip oqallisigineqarnera naammassigallarpoq, aammalu ullumikut oqaluuserisassat tamakkerpavut.