Kalaallit Nunaanni Inatsisartut

Oqaluuserisassani immikkoortoq 34-1

Ataatsimiinnerit ] Tilbage ] Op ] Nĉste ]

Siullermeerneqarnera Aappassaanneerneqarnera Pingajussaaneerneqarnera

Pingasunngorneq 19. maj 1999 nal. 14.12

 

Oqaluuserisassaq imm. 34

 

Suleriaasitsinni § 41 naapertorlugu Namminersornerullutik Oqartussani atorfilittat pisortanik akiliunneqarlutik timmisartumik angalaneranni Bonus-iarisartagaasa landskarsimut nakkartinneqartarnissaannik apeqquteqaammik oqaluuserinninneq.

(Anthon Frederiksen, Kattusseqatigiit)

 

Ataatsimiinnermi aqutsisoq: Johan Lund Olsen, Inuit Ataqatigiit, Inatsisartut Siulittaasuat.

 

Anthon Frederiksen, Kattusseqatigiit:

Inatsisartut maannakkut ataatsimiinnissatsinnut siunnersuutigisama ilagivaat Namminersornerul­lutik Oqartussat suliffeqarfiutaanni tamani atorfillit, pisortanit akiliunneqarlutik angalasarnerini tamani, tassa matumani aamma soorunami politikkerit angalasarneri ilaapput, tamani SAS-mi immaqalu aamma Grĝnlandsfly-mi bonus-isiaasaritinneqartartut nalingisa Nunatta karsianut nakkartinneqartalernissaat. Tassami ilumoorsinnaanngilaq angalanernit Namminersornerullutik Oqartussanit akilerneqartartunit ajunngitsorsiassaritinneqartut ataatsimut katersoriarlugit Europami, nunanilu allani biilinik attartornernut, hotel-inut il. il. pilluakataarutigineqartassappa­ta. Uffa massa Nunatta karsiani aningaasanik isertitasssanik allanullu pisariaqartinneqaqisunut atorfissaqartitsingaaluni amigaateqangaartoq.

 

Taamaattumik Namminersornerullutik Oqartussat suliffeqarfiutaanni tamani atorfilinnut aamma­lu politikkerinut ajunngitsorsiassaritinneqartut ilaasa Nunatta karsianut nakkartinneqartalernis­saat matumuuna siunnersuutigaara. Taakkuami pineqrtut aamma feriarnermut, atorfimmullu atatillugu akiliunneqartareerput taamaammat pissusissamisoortutut isigaara Nunatta karsianiit akiliunneqarlutik angalatinneqartartut bonus-isiaritinneqartartut landskarsimut nakkartinneqarta­lerpata.

 

Jonathan Motzfeldt, Naalakkersuisut siulittaasuat:


Naalakkersuisut SAS-imi bonusisiaqartitsisarneq amerlasuunik angalasoqartillugu akikilliliissu­tinut allanngortinniarlugu 1996-imi misilippaat, iluatsitsinatilli. Naalakkersuisut maanna naliliipputtaaq nukissat bonuspointinik pisassarineqalersunik nalunaarsuinermut nakkutilliiner­mullu pisariaqar­tinneqartut Nunatta Karsiata pissarsiassaanut naleqqiullugit naapertuutinngitsut. Bonuspointit qaqugukkut sumullu atorneqarsinnaanerannut maleruagassat sukangasuut taamatut naliliinermut pissutaaqataapput. Taamaammat taamanikkulli bonuspointit pisassarineqalersut sulisunut ajunngitsorsiatut, sulisut namminneq atorsinnaasaattut, Naalakkersuisut naatsorsuutiler­paat. Peqatigitillugu sulisunut ilisimatitsissutigineqarpoq bonuspointit atukkat nalingat isertitanut akileraaruteqaataasussanut ilanngunneqartassasoq.

 

Naalakkersuisut nutaat kaajallaasitaq pineqartoq atorunnaarsippaat, taamaalilluni bonuspointit sulinermut atatillugu angalanerni pissarsiarineqartut kingusinnerusukkut sulinermut atatillugu angalanernut maannakkut atorniarneqartassallutik. Periaasissat erseqqinnerusut taamatut piso­qartarnissaanut isumannaarinnissutaasussat aalajangersarneqassapput periaatsit suut pitsaaner­paassanersut paasineqariarpat.

 

Naalakkersuisut aalajangernerat Naalakkersuisunut aamma Naalakkersuisut allattoqarfiini, Naalakkersuisut Allattoqarfianni, pisortaqarfinni sullissivinnilu taakkununnga atasuni Aningaa­sanut Inatsimmiittuni, sulisunut atuutissaaq.

 

Ingerlatseqatigiiffinnut Namminersornerullutik Oqartussanit pigineqartunut tunngatillugu aktiaateqarluni ingerlatseqatigiiffeqarnermeereerpoq aalajangiinerit taamaattut ingerlatseqati­giiffiup nammineq aalajangigassarigai. Kisiannili aaqqiineq Naalakkersuisut nassaarisassaat pisariunngitsumik allaffissornikkut suliaqarluni isumatuumik ileqqaarutaasinnaassappat qu­larinngilara ingerlatseqatigiiffiit Namminersornerullutik Oqartussanit pigineqartut tamatuminn­ga isumassarsisinneqarumaartut aaqqiinernillu tamatumunnga assingusunik atugaqalerlutik.

 

Hans Enoksen, Siumup oqaaseqartua:

Inatsisartunut ilaasortaq Anthon Frederiksen (K) siunnersuuteqarpoq Namminersornerulluni Oqartussani atorfeqartut angalanerminni bonusisiassaminnik katersaasa Namminersornerullutik Oqartussanut nakkartinneqartalernissaanik. Taannalu tunngavigalugu imaak Siumuminngaaniik oqaaseqarfigissavarput.

 

Siumumi ilisimalluarparput Namminersornerullutik Oqartussani sulinermut atatillugu annertuu­mik angalanerit ingerlanneqartartut. Aammalu taakku pinngitsoorneqarsinnaanngillat inuiaqati­giit iluanni suliassat suliakkiutigineqartartut naammassineqassappata. Siumumiillu inassutigissa­varput Naalakkersuisunut angalanermi aningaasartuutikillisaanermut atatillugu suliassat ataqati­giissaarneqarnissaat eqqumaffigeqqullugu. Atorfillit arlariiaat angalatinngikkaluarlugit naam­massineqarsinnaanissaat anguniarlugu.

 

Naalakkersuisut siunnersuuteqartumut akissuteqaataat tunngaviatigut Siumumit isumaqatigilluin­narparput. Inuiaqatigiimmi akiligaannik angalassagaanni ajunngitsorsiassat aamma tamarmik inuiaqatigiinnut nakkartinneqartariaqarput, inunnut ataasiakkaanut iluaqutissanngortinneqaratik. Naalakkersuisut aalajangernerat, naalakkersuisut aammalu Naalakkersuisut allattoqarfiini pisortaqarfiinilu taakkununnga atasuni atuuttussanngortitsinerat iluarisimaarlugu Siumumiit oqaatigissavarput.


Inassutiginiarparpulli aamma Namminersornerullutik Oqartussat suliffeqarfiutaani tamani, aamma selskabini, atuuttussanngortinneqarsinnaaneri ukiumoortumi ataatsimeersuarnerit aqqutigalugit piginnittunit oqariartuutigineqaqqullugit. Aammalu ilanngullugu Siumumiit piumasarissavarput Inatsisartunut ilaasortat angalasarnerminni taamatut pissarsisartut aamma pinngitsooratik utertitsisarnissaat piumasaralugu Inatsisartut siulittaasoqarfiannut misissoqqugat­sigu.

 

Taamak oqaaseqarluta Naalakkersuisut akissuteqaataat tunngaviatigut taperserparput.

 

Anders Nilsson, Atassutip oqaaseqartua:

Angalanernit Nunatta Karsianit inniminnerneqarlutillu akilerneqartartunit bonusiassaritinneqartut nalingisa Nunatta Karsianut nakkartinneqartalernissaannik siunnersuut Atassutip tapersersorpaa.

Naalakkersuisut siulittaasuata paasissutissiissutigaa aaqqissuussineq taama ittoq 1996-imi atuutilersinniarneqarsimagaluartoq iluatsinngitsumilli. Taamaattumik tassunga taarsiullugu maanna bonuspointit pissarsiarisimasat sulinermut atatillugu angalanernut atorneqaqqittalernis­saannik aaqqissuussineq pisariulluinnartoq Naalakkersuisut pilersinnialerpaat.

Matumani Naalakkersuisut takkuitsuugaat tassaavoq piffissap ingerlanerani atlantikoq qulaallugu imminnut unammillertunik marlunnik timmisartuussisartoqalersimanerput. Maanna sulinermut atatillugu angalanissat tamarmik timmisartuussisartunut Namminersornerusunut pisisartorsuartut pitsaanerpaamik akikillisaasinnaasunut inissinneqarsinnaalerput. Tamanna taaneqartarpoq killilersugaanngitsumik unammilleqatigiinneq, tamannalu pisisartunut iluaqutaaniartussaagaluar­poq.

Atassutip siunnersuutigissavaa suliaq Angallannermut Ataatsimiititaliamut suliassanngortinne­qassasoq, bonusisitsisarnermut taarsiullugu angalanernut pisortanit inniminnerneqartartunut Nunattalu karsianut akilerneqartartunut tamarmiusumut akikillisaasinnaanermut periarfissat misissoqqissaarneqarsinnaaqqullugit.

 

Maliinaannguaq M. Mĝlgċrd, IA-p oqaaseqartua:

Ukiuni makkunani Namminersornerullutik Oqartussat sinnerlugit angalanerpassuit ingerlanne­qartarput, taamaalillutillu aningaa­sarpassuit atorneqartarlutik. Matumani apeqqummi Anton Fre­deriksenimit qaqinneqartumit maluginiarparput Naalakkersuisut 1996-imi misiliisimagaluartut bonusip, tassalu angalnermi bilitsip nalingata ajunngitsorsiassaata toqqortorlugu alliar­tortinne­qartartup, Namminersornerullutik Oqartussanut akikilliliissutitut atorneqarsinnaasunngor­nissaa anguniarlugu.

 


Tamannali piviusunngorsinnaanngimmat unitsiinnarneqarsimavoq, kaajallaatitakkulli erseqqis­saassutigineqarsimalluni bonu­spointinit isertitat nalingat akileraaruteqaataasussanut ilanngunne­qartassasoq. Inuit Ataqatigiinniilli nuannaarutiga­lugu maluginiarparput naalakkersuisut nutaat taanna kaajallaa­titaq atorunnaarsissimagaat, aaqqissuussinerullu nutaap ilusi­lersorlugu suliarinis­saa aallartereersimasoq.

 

Inuit Ataqatigiinniit siunnersuuteqartumit maluginiagarput unaavoq tamatumani sulisut kisimik pineqartut, siunnersuuti­gerusupparpullu Inatsisartunut ilaasortat politikerillu  aamma Namminer­sornerullutik Oqartussat sinnerlugit angalasut tamatu­mani pineqartariaqartut.

 

Mannalu iluatsillugu nunatsinni pigineqartunit ingerlatsiviit siuarsarnissaat, nunatsinnilu aningaasat kaaviiaartinneqarnis­saat siunissatsinnut pingaaruteqaqimmat angalanermi Grĝnlands­fly atorneqartarnissaa kaammattuutigissavarput. Tamatumanilu aamma pineqarput Namminersor­nerullutik Oqartussat pigisaat piginneqartigiiffissuit.

 

Naggasiullugu Inuit Ataqatigiinniit apeqquserusupparput ilumut pisariaqavinnersoq ukiuni makkunani sipaarniarnitsinni Nammi­nersornerullutik Oqartussat ataani angalanerni tamani akisu­nermi angalajuarnissaq? Soorunami isumaqatiginninniarnerni unnuartalersorlugulu ataatsimiittar­nerni aqqutaani qasuersaar­nissaq pisariaqartarpoq, angalasulli tamarmik taamaanneq ajorunarma­ta tamanna aamma nalilersullaqquarput.

 

Taamatut oqaaseqarluta suliap ingerlateqqinnissaa IA-nniit kaammattuutigaarput.

 

Mogens Kleist, Kattusseqatigiit:

Anthon Frederiksen-ip siunnersuutaa Namminersornerullutik Oqartussat angalasarnerannut bonuseqarnermut tunngatillugu Kattusseqatigiinniit imatut oqaaseqarusuppugut. Anthon Frederiksen-ip Kattusseqatigiinniit siunnersuutaa siunertaatigut isumaqatigaarput. Tassalu bonuspointit katersukkat landskarsimut nakkartittalernissai.

 

Imatut iluarunartinneruvarput, tassalu bonuspointit angalasarnernut atorneqarsinnaappata landskarsillu aningaasatigut sipaarutigisinnaappagit. Nalunnginnatsigumi angalanermut aningaa­sartuutit ukiumut atorneqartartut annertoqisut, taassuma tungaatigut atorluarsinnaagutsigit iluatinnaateqarmata. Kattusseqatigiinniit sipaarniutaasinnaasut atorluarsinnaasagut tamaasa atorluarnissaat eqqortuusorigatsigit.

 


Naggataatigut ilanngullugu Kattusseqatigiinniit siunnersuutigissavarput Namminersornerullutik Oqartussat aktieselskabiini siulersuisut, tassalu ilaasortat Namminersornerullutik Oqartussat ataani suliffeqareersut ajunngitsorsiassaasa landskarsimut nakkartinneqarnissaat Naalakkersuisu­nut aamma sulissutigisariaqartitatut taakkartorusullugit.

 

Taamatu oqaaseqarluta neriuutigaarput Naalakkersuisuusut angalanermut sipaarniutaasinnaasutut qissimittaariaqagaasa ilagimmassuk taakku taakkartorneqartut uY

 

 

Jonathan Motzfeldt, Naalakkersuisut siulittaasuat:

Partiit oqaaseqartuinut qujavunga, taavalu oqaaseqatsiassaanga erseqqissaatinik nalinginnaasu­nik. Tassa ilaatigut Siumup oqaaseqartuata Hans Enoksen-ip aamma allallu oqaaseqartut selskabinut hjemmestyremut atasunut aamma atortussanngortinneqarsinnaanera aamma eqqaam­matigit.

 

Siullermik erseqqissaatigissavara ilumoormat landstyre 1996-imi misilimmagu iluatsinnagulu taamak SAS-imi bonusimik aaqqissuussinerit ataatsimoortumik, kvantumrabat-itut taaneqarsin­naasumik, aaqqiniaraluarlutik ataatsimoortumik taamaalillutik akikillissutaasinnaasumik  aaqqiissuteqarniarlutik. Aamma Naalagaaffik taamaalilluni aamma aaqqissuussinermi misiliisi­magaluarpoq. Kiisalu aamma ilisimavarput DK-mi inuussutissarsiornermut suliaqartut aamma EU misiliisimagaluarmata aamma timmisartuutileqatigiit, taamatut bonusimik aaqqissuussiner­mik allanngortitsinissaannut. Tamatumani maani aamma inuussutissarsiortut assigiinngitsunik misilittagaqarput. RG-ip taamatut aaqqiisimaneq pillugu assigiinngitsunik periusissanik aaqqiini­arnini taamaatiinnartariaqarsimavaa. Aammalu paasisagut najoqqutaralugit danskit firma-t arlallit taamatut pointinik atugaqartut atortorisaqartullu aamma allaanerusumik aaqqissuussisarsimasut, tassa ulluinnarni siulersuiffimminnut taamaalillugit sangutittarsimallugit.

 

Naalagaaffik, danskit naalagaaffiat finansministeria aqqutigalugu issuarpara, piumasarsimavoq suliffeqarfiit ataasiakkaat isumaliutigissagaat bonusit pissarsiarineqartut qanoq ilillugit atorluar­neqarsinnaanerat siunnersuusiorfigeqqullugu. Tassa taamaalilluni aningaasartuutit suliffeqarfiup annertuumik aningaasartuutigisai millisinneqarsinnaaqqullugit.

 

Tassa soorlu oqaatigineqartoq bonusimik aaqqissuussinerit atorneqarsinnaapput taamaallaat biilinik attartornermut, hotel-imi najugaqarnermut aammalu piffissaalluartumi inniminniisima­gaanni aallarfissanut aalajangersimasunut aamma inniminniinerullutik.

 


Timmisartuutileqatigiit aalajangiusimavaat bonuspointit inunnut ataasiakkaanut tunngatitaasut, tassalu angalasunut ataasiakkaanut. Aammalu taamaalilluni sulisitsisoq sulisut sinnerlugit bonusiaanik katersuisinnaanngitsoq. Tassa landstyre 1996-imi nalileramikku taamanikkut ingerlatsinikkut akisuallaassasoq pointinik taamaalilluni aaqqissuussinerup allanngortinniarnera nalilersimavaat. Taamaattumik 1996-imi cirkulĉre najoqqutaralugu tamanna sulisunut ajunngit­sorsiassatut isigineqarsimavoq, taamaakkamilu skattevĉsenimut akileraartarfimmut nalunaaruti­gineqartussaalluni. Aammalu taamaaliussagaanni taamaaliornikkut taava periarfissat aallartiffigi­simasaaniit siusinnerusukkut aallartiffianinngaanniik naatsorsorneqarsimammata, paasinarpoq aamma taamaaliornissaq ajornakusoortorujussuusoq. Tassa Naalakkersuisut taamaalillutik bonusinik aaqqissuussineq cirkulĉrikkut aaqqissuussiniarnermikkut aaqqiiffiginiarsimasaat tamakkiisumik naammassiniassagaanni.

 

Taamaattumik Naalakkersuisut maannakkut aalajangerpaat aalajangiineq Naalakkersuisunut aammalu Naalakkersuisut allaffeqarfiini, taakkualu ataani direktoratini direktoratillu ataani suliffeqarfinni atussasoq. Taavalu oqaatigaarput Inatsisartut siulittaasoqarfiat aamma nammineq aalajangiisinnaavoq Inatsisartunut ilaasortat aammalu atorfillit, tassani qanoq iliorfiginissaanut aamma taamaaliuusanerluni.

 

Aamma hjemmestyremut atasuni suliffeqarfinni selskabini, tassa maannakkut uagutsinnut pigineqartuni, taanna selskabit namminneq aalajangersinnaagaat innersuussimavarput. Kisiannili soorunami neriuutigalugu una aalajangigarput, Naalakkersuisut aalajangigaat, isumassarsissutaa­sinnaasoq Inatsisartuni aammalu selskabini aamma namminneq taamaalillutik aaqqiisinnaaner­minni.

 

Anthon Frederiksen, Kattusseqatigiit:

Qujanaq siunnersuutigisara taamatut tamanik tigulluarneqarmat. Tassami qularnanngilaq aningaasat annertunngikkaluarpataluunniit landskarsimut iluaqutaasussaapput. Taamaattullu aningaasat qularnanngilaq arlaqarput suli landskarsip sipaarsinnaasai. Sunaluunniit annikikkalu­artoq ataatsimut katersorlugu tiguneqarnerani iluaqutaasinnaasera annertusarpoq. Uani eqqaa­maqquinnassavara soorunami siunnersuummi inuit namminneq akilerlugu angalasarneranni bonusisiarineqartartut eqqarsaatigineqanngimmata.

 

Taamatut oqareerlunga taava ataasiakkaannguit oqaaseqarfigilaassavakka, immaqaluunniit immaqa IA oqaaseqartuata paattuulaarsimagunarmagu una siunnersuutigisara. Tassa sulisut kisimik pineqartutut oqaatigineqarmata uani. Siunnersuuteqarninni imatut allappunga. Pisortanit akiliunneqarlutik angalasarnerni tamani akiliunneqartartut, taakkua tamaasa pivakka. Tassa tassani aamma Naalakkersuinermut suliaqartut tamarmik ilaapput, taamaattumik taakkutsia erseqqissaassutigaara taamaalillugu.

 

Uanilu aamma IA ilumoorput, oqaaseqartuata oqaatigisaa, tassa politikkerit angalanerminni immaqa angalanerit akisuallaartut atorpallaaqaat, aamma tassani sipaarutissat eqqarsaatigineqar­sinnaapput.

 


Tassami uagut aamma angalatinneqaraangatta Inatsisartuni ilaasortatut tassa maluginiakkama nammineerlunga ilagivaat angalanerit, qularnanngitsumik immaqa tamarluinnarmik Inatsisartu­nut ilaasortat aallartinneqaraangata, akisunerni inissinneqartartut. Pisariaqaviunanngikkaluarpoq Inatsisartunut ilaasortaaneq pissutigalugu akisunerni inissinneqartarnissaq tamatigut angalanerni. Immaqa Naalakkersuisut siulittaasuat ataqqillugu akisunerni angalatinneqarsinnaavoq, kisianni uagut ilaasortaannaasugut uanga pisariaqartinngilara akisunerni inissinneqassaguma. Taamaattu­mik ataatsimiititaliami oqaluuserineqarnissaanik isumaqarpunga tamakkua ilanngullugit sipaaru­tigineqarsinnaasut, tamaasa eqqartorneqartariaqartut.

 

Aammalu angalanernut atatillugu soorlu Kĝbenhavnimi hoteliniittarnerit, aamma tassa assigeq­qinnaarpaa. Tassani Inatsisartut pingaartumik angalatillugit Kĝbenhavnimi hotelimiittarnermi akikinnersiorneqarsinnaavoq aamma. Aamma tamakku aqqutigalugit aamma tassani sipaarneq nassaarineqarsinnaavoq. Imaanngilaq politikkeritut qinigaasimagaanni tassa suna tamarmi akisuuinnarmik ingerlanneqartariaqartoq, naagga aamma tassani eqqarsaatigisariaqarpagut akiliisartugut tassalu landskarsi, tassani sipaarsinnaanera isumaqarpunga ilanngullugu oqallisigis­sutigineqartariaqartoq.

 

Kisianni tassa qujavunga taamatut siunnersuutigisara paasineqarluarluni aamma piviusunngortin­niarneqarnera neriuppunga qanittukkut atuutilerneqarumaartoq.

 

Maliinannguaq M. Mĝlgċrd, IA:

Naatsunnguaminguna una Anthon Frederiksen-ip paatsoorsimanerarmanga. Kisiat siunnersuutaa­niuna imatut allaqqariarmat, Namminersornerullutik Oqartussat suliffeqarfiutaanni tamani atorfillit pisortanik akilunneqarlutik angalasarnerini. Taamatut allassimariarmat politikkerit immikkut taaneqaratik, taanna taamatut oqaaseqarfigigipput. Aamma oqaaseqatigiinni kinguller­ni aamma Namminersornerullutik Oqartussat suliffeqarfiutaanni tamani atorfilinnut ajungitsorsi­assaritinneqartut, taakku taaneqarsimammata erseqqissaatigiinnariga. Aamma qujavunga Anthon Frederiksen-ip erseqqissaatigimmagu taakku kisimik pineqanngimmata.

 

Johan Lund Olsen (IA), Ataatsimiinnermi aqutsisoq:

Tassalu takusinnaasakka malillugit allanik oqaaseqartoqarumanngilaq, kisiat naggataarutaasumik Naalakkersuisut siulittaasuat oqaaseqarumavoq.

 

Jonathan Motzfeldt, Naalakkersuisut siulittaasuat:


Uangattaaq qujassutigalugu taamatut maannakkut apeqqut una Inatsiartuni aammalu Naalakker­suisut akornanni paaseqatigiiffiummat. Taamaalilluni naak tamakkiisumik aaqqiinerunngikkalu­artoq qujassutgiaara maani aaqqiisimanerput isumaqatigineqarmat. Aammalu soorunami Naalak­kersuisuni uagut angalanikkut sipaarniutit aamma iluuseqarfigisimavagut. Tassa Naalakkersuisut kingulliit atuunnerisa nalaanni angalanikkut sipaarniutit aamma aallartinneqarsimammata. Taamaalillunilu kr. 7-8 mio. missaani angalanikkut sipaarniutissat anguneqarsimapput, qular­nanngilarlu aamma ukiuni tulliuttuni aamma taamatut sipaarniarnerit angalanermut tunngasut nanginneqarumaarlutik.

 

Kisianni aamma oqassaagut angalaneq amerlaqisut, aamma uagut atortarparput ataatsimiigiarner­nut nukingersunut. Aqqutaanilu aamma suliffissanik ilaannikkut aamma nassataqartarluta. Taamaattumik aamma periarfissat taakkua ajunngitsumik atorniarneqartarnerat aamma eqqaassu­tigissavara. Kiisalu aamma Inatsisartut namminneq qanoq ilillutik angalasarnissaminnut aaqqis­suussinissaat, taanna Inatsisartut siulersuisoqarfiata nammineerluni aaqqissuutassaraa.

 

Taavalu uagutsinnut oqaatigineqartut selskabinut tunngatillug aamma taakkua selskabit tungaan­nut paaseqatiginninniarnerat aamma ingerlakkumaarparput. Kisianni qanorluunniit pigaluarutta angallannermi tunngasunik politikkerit angalanerput, taanna uagut eqqartorsinnaavarput.

 

Aamma kisianni napparsimasunik angallassineq atorneqartorujussuummat, aamma napparsima­sortatta isumannaatsumik angallanniarneri naammassissagatsigit naammassisariaqarlugillu. Taakkua aamma aningaasartuutinik angisuunik imaqarput, taakkulu aamma sipaarniarnermi sapinngisamik eqqornaveersaarlugit ingerlanneqarput. Pisariaqartitsineq najoqqutaralugu tassani napparsimasumut angallassisumullu isumannaatsuuneq aamma inissiisimanissat aamma qular­naarniarneqartarmata. Taakku aamma ilanngullugit eqqaasissutigaakkat.

 

Johan Lund Olsen (IA), Ataatsimiinnermi aqutsisoq:

Tassa taamaalillutalu imm. 34 naammassilerparput, naammassivitsinnaguli una Inatsisartut siulittaasoqarfianni siulittaasutut aamma uanga oqaatigissavara. Tassa Inatsisartut siulittaasoqar­fianni aamma matumani eqqartorneqartut soorunami aamma oqallisigineqarumaarmata. Aamma­lu tassani aamma isummersorfigineqarumaarput, tassa politikkerinut tunngasortai Inatsisartut siulittaasoqarfiata taakkua akisussaaffigivai aammalu aalajangersaaffigissallugit qularnanngitsu­mik tulliani siulittaasoqarfimmi ataatsimiilerutta.

 

Aamma tassunga ilanngullugu aamma Inatsisartut siulittaasoqarfianni eqqartugassaqqissunut ilaavortaaq Grĝnlandsfly atlantikoq qulaallugu timmisartuussisalernikuusoq, taanna siunissami atorumaneqassanersoq Inatsisartuninngaanniik imaluunniit taassuma saniatigut aamma SAS taamatut timmisartuussisartoq aamma atorumaneqassanersoq. Taakkua Inatsisartut siulittaasoqar­fianinngaaniik aamma oqallisigineqarumaarput.

 


Taamaalillutalu tassa imm. 34-i naammassivarput. Maannakkullu tullinnguupput tassa pinga­sunngornikkut apeqquteqaatit, tassani apeqquteqaateqarpoq Inatsisartunut ilaasortaq Anthon Frederiksen.