Oqaluuserisassani immikkoortoq 40-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq
7. maj 2001, nal. 20:32.
Ataatsimiinnermik
aqutsisut:
Siulittaasoqarfimmi ilaasortaq Augusta Salling.
Jakob
Sivertsen, Atassut:
Inatsisartut
Suleriaasianni ' 32
naapertorlugu aalajangiiffigisassatut siunnersuummik imaattumik
saqqummiussaqarpunga.
Aningaaserivinni
ileqqaakkat erniaasa akileraaruteqaataajunnaarnissaat Naalakkersuisut sulissuteqarnissaasa
lnatsisartuni aalajangiiffigeqarnissaanik saqqummiussimavara.
Nunatsinni
aningaasat tunngavigalugit inuuniarnerup ingerlanneqaleruttorfiani
aningaasanik sipaagaqarnissaq ileqqaarsimanissaq pinngitsoorneqarsinnaanngilaq.
Qujanartumik
Nunatsinni inuppassuaqalersimavoq siuliminnik kulturikkut ulluinnarnilu inuuniarnermi
ullunik atoruminaatsunik perlussanut, ukiorlunnissaanillu sillimaniarnissamik
kingornussaqarnermikkut aningaaserivinni aningaasanik ukiorpassuarni
toqqorterinermikkut ileqqaagaqarsimasunik, pisortat ajornartorsionermi
utoqqanngornissarnullu kisiat isumalluutigiinnnarnagit imminnut
ilaquttarninnullu aningaasanik ileqqaagaqarnermikkut isumannaarisimasunik.
Kingornutaq pitsaasoq kinguaariinni kalaallini ingerlanneqaqqittariaqarpoq
tapersersorluarneqartariaqarlunilu.
Nunatsinni
inuit kikkulluunniit sulinermikkut aningaasarsisartut tamarmik
akileraartussaatitaapput, isertitallu aalajangersimasut saniatigut
isertitaqartartut sulisartut, piniartut, aalisartut,
sulisinnaajunnaarnersiaqartut, pisortanillu utoqqalinersiaqartut, kiisalu
inuit ukiorpassuarni siunissamut nalorninartumut sillimaniarlutik
aningaaserivinni ileqqaagaqarsimasut tassa toqqorterisimasut ileqqaagaasa
erniaat isertitatut B-tut akileraaruteqaataasarput.
Siunnersuuteqarninnullu
pingaartitara tassa aningaasarsianik isertitanillu allanik akileraarutaareersunik
sinneruttut ilaat aningaaserivinni ileqqaarneqartartut erniaat aamma
akileraaruteqaataasarnerat, marloriaammik akileraarnerummat
aaqqittariaqartutut isumaqarfigiuaannarakku.
Inuit
aningaaserivinni sipaagaat siunissaminnik ilaqutamillu siunissaannik
sillimmatigisarpaat taamaattumik erniaat pisortanit innimigineqartariaqarput,
ileqqaakkat amerliartornissaannut erniat pinngitsoorneqarsinnaanngimmata.
Nunatsinni
aningaasanik ileqqaarnissaq lnatsisartut Naalakkersuisullu pingaartitaraarput,
allaat inuusuttut sipaagaqarnissaat pingaartinnermit aningaaserivinni
ileqqaagaat siunissaminnik sillimmatissaat soorlu initaarsinnaanissaminnik
namminersorlutilluunniit aallartitsinissaminnik kiisalu atugassaat
Landskarsimiit erniaasa angeqataannik qaavisigut ullumikkut 4 %-mik
tapiissuteqartarput.
Ajuusaarnarporli
inuusuttut aningaaserivinni ileqqaagaasa erniaat aamma akileraaruteqaataasussaammata
sipaakkallu amerliartortillugit ernianut akileraarutit aamma
amerliartortussaallutik.
Taamaattumik
tulluartuusinnaanngilaq pisortanit sipaaqquseriarluni sipaakkallu erniaannut
tapiissuteqariarluni aningaaserivinni ileqqaakkat sipaakkat erniaanik assaat
illuatungaasigut arsaartuinissaq.
Paatsuuisoqaqqunagu
erseqqissartariaqarpara Landskarsip inuusuttut sipaagaannik ernianut
tapiissutaat akileraaruserneqarneq ajormata, taamaallaat aningaaserivinni
ileqqaakkanut ernialiunneqartatut erniat naliginnaasut allat assigalugit
akileraaruteqaataasarmata.
Nunatsinni
aningaasanik sipaagaqarnissaq tamatta pingaartipparput, pingaartumik
inuusuttut piffissaagallartillugu sipaagaqarnermikkut siunissaminnik
isumannaariffiginissaat sillimanissaallu pisariaqarluinnartutut
pinngitsoorneqarsinnaanngitsutullu isumaqarfigigatsigu. Ullumikkornit suli
annerusumik aningaaserivinni ileqqaagaqarnissaat sipaagaqarnissaat
pilerinarnerusunngortissagutsigu taava aningaaserivinni ileqqaakkat
sipaakkat tamarmik erniaat akileraaruteqaataajunnaatariaqarput.
Taamatut
saqqummiussaqarlunga siunnersuut pingaaruteqartoq Inatsisartunut
aalajangiiffigisassanngorlugu oqaluuserisassaq saqqummiuppara neriullunga
ilassilluarneqassasoq.
Josef
Motzfeldt,
Aningaasaqarnermut Naalakkersuisoq:
Inuit
ileqqaagaqartarnerisa annertusarneqarnissaannik sulissuteqarnissap
pingaartuuneranik siunnersuuteqartup isumaa Naalakkersuisut isumaqatigaat.
Taamaattumik maanna Naalakkersuisuusut allannguutit assigiinngitsut,
pingaartumik siunissaq ungasinnerusoq eqqarsaatigalugu ileqqaariaatsit
akileraarutitigut oqilisaaffigineqartut atuutilersissimavaat, soorlu ilaatigut
ilinniagaqarnissamut, namminerisamik illutaarnissamut aamma namminersorluni
suliffiutitaarnissamut, matumani ilaallutik ileqqaakkat "meeqqat
ileqqaagaattut" ittut kiisalu soraarnerussutisiaqalernissaq
siunertaralugu ileqqaarnermut aaqqissuussat.
Ileqqaariaatsit
taakku immikkut iluaqutissartaat tassaavoq ileqqaakkat tunngaviusumik ernianik
akileraaruteqaataasussanik ernialersorneqarnermik saniatigut aammattaaq
ajunngitsorsiatut ernianik aammalu ernianut tapiissutinik katillugit 8
pct.-inik ernialersorneqartarmata, taakkulu marluk
akileraaruteqaataasussaanatik.
Soraarnerussutisiaqalernissaq
siunertaralugu ileqqaarnermut aaqqissuussat iluaqutissartaat tassaavoq
inuunermut sillimmasiisarfinni Kalaallit Nunaanniittuni
soraarnerussutisiaqalernissamut aaqqissuussanut ingerlaavartumik
tunniunneqartartussanut imaluunniit naafferartumik tunniunneqartartussanut
ingerlaavartumik akilersuutit ilanngaatigineqarsinnaammata, soorluttaaq
soraarnerussutisiaqalernissamut ileqqaakkat nalingisa annertusiartornerat
ukiumoortumik akileraarutigineqarneq ajortoq, taamaaliornikkullu
soraarnerussutisiassat ingerlaavartumik tunniunneqartalernerminni aatsaat
akileraarusemeqartarlutik.
Maanna
ilaatigut aningaaserivinni ileqqaarneqartartunut tunngatillugu
naluneqanngitsutut aningaasarsiat B-t akileraaruteqaataasussaanngitsut
aappariinnut 10.000 kr.-iupput kisermaanullu 5.000 kr.-iullutik, tamannalu
isumaqarpoq aappariit erniatigut isertitamik saniatigut aningaasarsianik
B-nik allanik isertitaqarneq ajortut aatsaat 200.000 kr.-inik
ileqqaagaqareerunik taakku erniaasigut isertitaminnit
akileraartussanngortarnerannik.
Aningaaserivinnili
uninngasuutit erniaannik akileraarusiisarunnaavinnissamik siunnersuuteqartup
siunnersuutaa Naalakkersuisunit isumaqatigineqarsinnaanngilaq.
Taama
akileraartussaajunnaarsitsineq innuttaasut ilaannik ikittuararsuaannarnik
aningaasarsiaqqortunertik pissutigalugu innuttaasut amerlanersaannit
ileqqaagaqarsinnaanerulluinnartunik iluaqutissiinerussaaq tulluanngitsoq,
tamannalu aningaasarsiat maannakkut annertuumik niki-ngassuteqareeqisut suli
nikinganerulernerannik kinguneqartussaavoq.
Kiisalu
erniatigut isertitanik taama akileraarusiisarunnaarneq Landskarsip kommunillu
akileraarutitigut isertittagaannik atornerluinertut taaneqarsinnaavoq,
taamatummi aaqqissuussinissaq inunnut ilaatigut aningaaserivinni
aningaasanillu attartortitsisarfinni aningaasanik attartorsinnaassuseqartunut
aningaasarsiorfissatsialaassaaq. Aningaaserivimmi attartukkat erniaannut
aningaasartuutit aningaasat attartukkat amerlaqataannik aningaaserivimmi
uninngasuuteqarnermi erniatigut isertitanit annertunerugaluartut, ernianut
aningaasartuutit ilanngaatigineqarsinnaanerisigut erniatigullu isertitat
akileraaruteqaataasussaannginnerisigut periarfissanik taakkuninnga tamanik
atuilluni nuussisarneq sinneqartoorutaalissaaq.
Inuiaqatigiinni
innuttaasut ileqqaagaqarnerulernissaat angupallaniarlugu qanoq
aqqutissiuissanerluta misissuinissarput arlaanni piffissanngorsinnaavoq,
Naalakkersuisulli erseqqilluintartumik isumaat tassaavoq tamanna
angupallanniaannarlugu erniatigut isertitat akileraaruteqaataasussaajunnaarsinneqassanngitsut.
Hans Enoksen, Siumup oqaaseqartua:
Inatsisartunut ilaasortaq Jakob Sivertsen Atassut siunnersuuteqarpoq aningaaserivimmi ileqqaakkat erniaasa akileraarutaasarunnaarnissaanik, tamannalu imatut Siumumiit oqaaseqarfiginiarparput.
Innuttaasut aningaasaqarnermikkut nukittorsarneqarnissaat tamakkiisumik Siumumi tapersersugaraarput sapinngisarlu tamaat innuttaasunut assigiimmik atugassaqartitsinissaq salliutillugu inatsisiliornermi aallaaveqartarnissaq Siumumiit pingaartilluinnarlugu oqaatigissavarput.
Aningaaserivinni uninngasuuteqarnissat innuttaasunik tamanik atorneqarnissaa tamakkiisumik tapersersugaraarput atorluarneqarnissaalu anguniartuartariaqarluni, aningaaserivinni uningasuutit erniaasa akileraarutitigut oqilisaaffigineqarnissaat Siumumiit suleqataaffigilluarsimavarput, ullumikkullu aningaaserivinni uninngasuutit akileraarutitigut oqilisaaffigineqartut arlaliupput Siumumiillu isumaqarpugut aaqqiissuteqarsimaneq innuttaasunik iluarisimaarneqartoq allanngortinneqartariaqanngitsoq.
Ullumikkut makku ilaatigut akileraarutitigut oqilisaaffigineqarsimapput, namminerisamik illutaarnissaq anguniarlugu sipaakkat, suliffiutitaarnissaq siunnerfigalugu sipaakkat, meeqqanik ileqqaartitsineq, tamakkulu atuutinneqartut Siumumiit aaqqiinertut kusanartutut isigaagut allanngortinneqartariaqanngitsutullu isigalugit.
Siumumiit inuiaqatigiit aningasaqarnermikkut inissisimanerata suli naliginnginnerulernissaanik anguniagaqarneq isumaqatiginngilluinnarparput itigatinneqarnissaalu inassutigaarput makku pissutigalugu: Inuit aningaasarissaartut kisimik iluaqutissaminnik aqqutissiunneqassapput isumaqarpugullu tamaana innuttaasut suli assigiinnginnerusumik atugaqalernissaannut aqqutissiuiniarnerit pinngitsoorluinnartariaqartut. Tassami takusinnaavarput soorlu sulisartukkormiut, aalisartukkormiut, piniartukkormiut amerlasuut iluaqutissamik tamakkiisumik atuisinnaanngitsut, inuillu aningaasarsiarissaartut kisimik iluaqutissamik atuisussaapput tamannalu inunnut naligiinngitsumik atugaqalernissamut annertuumik aallaviulersinnaasoq pinngitsoortinneqartariaqarpoq.
Erniat akileraarutaannik peersineq aamma annertuumik kommuninut, Landskarsimullu aamma malunniuteqarluassaaq erniallu akileraarutaannik annaasaqarnissaq suminngaaniit matuneqarsinnaanersoq aamma siunnersuuteqartumik tikkuarneqanngilaq taamammat siunnersuuteqartup siunnersuuta itigartinneqarnissaa Siumumiit inassutigaarput.
Saaleeraq Johansen, Atassutip oqaaseqartua:
Siunnersuut Jakob Sivertsenimit saqqummiunneqartoq, tassalu aningaaserivimmi sipaakkat erniaasa akileraaruteqaataagunnaarnissaanik Atassummiit soqutigalugu oqallisigilluareerlugu imatut oqaaseqarfigissavarput.
Inuit ileqqaagaqarnerisa annertusarneqarnissaanik suliniuteqarnissap pingaaruteqarneranik siunnersuuteqartup saqqummiussaa Atassummiit taperserparput. Siunnersuut meeqqat inuusuttullu aningaasaqarnikkut siunissaanik isumannaarisuummat pingaaruteqarmat.
Siunnersuuteqartup tunngavilersuutitut saqqummiussaa Akileraartarnermut Ataatsimiititaliami qulaajarneqarnissaa Atassummiit piumasaraarput. Taamatullu naatsumik oqaaseqarluta siunnersuut Atassummiit taperserparput, aappassaaneertinnaguli ataatsimiititaliami sukumiisumik nalilersorneqarnissaa innersuutigalutigu.
Johan Lund Olsen, Inuit Ataqatigiit oqaaseqartuat:
Inatsisartuni ilaasortap Jakob Sivertsenip Nunatsinni inuit suli ullumikkornit annertunerusumik ileqqaagaqartalersinnaanerinnik sulissuteqarusunnera tunngaviatigut Inuit Ataqatigiinniit paasilluarparput.
Ukiuni kingullerni Nunatsinni aningaaseriviup nalunaarutiginnittarneri naapertorlugit, Nunatsinni inuit siunissamut ungasinnerusumut ileqqaartalernerat annertusiartorpoq, taassumallu taamatut ingerlanera aamma naalakkersuinikkut tapersersortuarneqarnissaa pingaaruteqarpoq.
Soorlu Naalakkersuisup akissuteqarnermini nassuiaatigigaa, Nunatsinni naalakkersuinikkut inuit ileqqaarnissaminnut aqqutissiuunneqarsimapput. Taamatut iliuuseqarsimaneq Inuit Ataqatigiinniit iluarisimaarparput, tassami taamatut ileqqaarsinnaanissamut inuit amerlasuut periarfissinneqarmata. Aammalu Nunatsinni ileqqaartut amerliartornerisigut Nunatsinni aningaasat kaaviiaartut amerlisinneqartarmata taamaasillunilu Nunatta aningaasaqarniarneranut ataatsimut aamma iluaqataassalluni.
Siunnersuuteqartup siunnersuummini anguniarsaraa, Nunatsinni kikkulluunnit ileqqaagaasa akileraaruserneqartannginnissaaat. Tamanna Inuit Ataqatigiinniit tapersersorsinnaanngilarput.
Taamatut aningaaserivinni ileqqaakkat erniaasa akileraaruserneqartarnerata unitsinneqarnissaanik siunnersuut akuerineqassappat kikkunnut tamanut atuutsinneqartussaavoq. Taamaattoqassappat ullumikkut innuttaasut isertitamikkut assigiinngissutaat annertoreeqisoq suli annertusissaaq. Tamanna pinaveersimatilluinnartariaqarparput.
Alla kingunipiluusinnaasoq tassaasinnaavoq, nunanit allanit aningaasarpassuit Nunatsinnutnuullugit erniortinneqartalerneri, annertuumillu erniorteriarlugit Nunatsinniit annillugit. Tamanna Inuit Ataqatigiinniit peqataaffiginianngilarput, taamaattumik Naalakkersuisut akissuteqaataat taperserlugu siunnersuut itigartikkatsigu matumuuna nalunaarutigissavarput.
Mogens
Kleist, Kattusseqatigiit
oqaaseqartuat:
Aningaaserivinni
sipaakkat erniaasa akileraarutaagunnaarnissaat Naalakkersuisuni Inatsisartuni
aalajangiiffigineqarnissaanik Jakob Sivertsenip siunnersuutaanut
Kattusseqatigiinni imatut naatsumik oqaaseqaatigissavarput.
Siunnersuuteqartup
saqqummiussaa, tassalu innuttaasut aningaasatigut akileraarutigisartagaasa
ilaat, tassalu katersukkanut tunngatillugu soqutiginaateqartutut
taarusupparput. Taamaattorli innuttaasut ataasiakkaat allanut sanilliullugit
pitsaanerusumik inissisimalernissaat Naalakkersuisup akissuteqaateqarnermini
taakkartugai taperserusuppagut, ullumikkummi innutaasut periarfissaat
ammareerput, aammalu annertunerusumik taamatut iliornikkut inuit sipaagaasa
akileraaruserneqartarnerannut tunngatillugu periarfissaqareermat
akileraaruserneqartarnerannut tunngatillugu. Maleruagassaqareerpugummi
ullumikkut ersarissumik aammali Naalakkersuisup akissuteqarnermini
taakkartugarisai taperserusuppagut. Kiami illersussavai
aningaasarsiaqarnerusut annertunerusumik suli periarsiffissallugit.
Oqaatigissavarpulli
arlaatigut aaqqiiniarutta innuttaasunut tamanut assigiimmik periarfissiinissat
taperserusukkatsigit.
Taamatut
naatsumik oqaaseqarluta Naalakkersuisup oqaaseqaatai taperserusuppagut,
siunnersuuteqartullu siunnersuutaa akuersaaruminaatsillugu.
Otto Steenholdt, attaviitsoq:
Siunnersuut taannarpiaq takuinnarlugu qallunaat oqaaserisartagaat, spekulant imaluunnit pengespekulant, kisiat eqqaavara. Tassalu kalaallisut imatut nutserneqarsinnaasoq, annertuumik pilertortumillu nalornenaraluartut atorlugit iluanaaruteqarniartarneq.
Ilumoorpoq aningaaseriviit aqqutigalugit ileqqaarsinnaaneq qujanartumik aqqutissiuuneqarsimammat. Ilaatigut soorlu akissuteqaammi immikkut iluaqutissaasut atorluarneqarsinnaasullu, tassa ilinniagaqarnissamut, namminerisamik illutaarnissamut aamma namminerisamik suliffiutitaarnissamut kiisalu Ameeqqat ileqqaagaannik@ aamma taaneqartartut maani taaneqarsinnaallutik.
Immaqali aningaaseriviit Nunatsinni arlalissuuppata sipaarniutit allat aqqutissiuunneqarsinnaasimassagaluartut. Suli nunani siuarsimasorsuugaluani aningaaserivinnut toqqorsineq ilaatigut, pingaartumik utoqqarnut ornigineqanngilaq, qularnanngitsumik siunnersuuteqartup aamma isoralugu peeqqusaa aamma taakkua iluarisimannginnamikkut.
Qularutissaanngilaq nammineq aningaasaatit erniaasa akileraaruserneqartarnerat tamakkua aamma annerisimagaat, taamaattumillu tusartarpagut taakkunnguit aningaasaatitik madrasse-minnut mersuullugit toqqortarisaraat.
Qulaani qallunaat oqaasiat taasara periarfissatsialaassagaluarpoq siunnersuuteqartup siunnersuutaa akuerineqassagaluarpat. Tassami aningaaserivimmi aningaasarpassuarnik akiitsoriarluni taakkua erniaannik akileraaruserneqanngitsunik inuunerup sinneranik inuulluataarluni, aningaasanillu eqqasuuteqannguarani inuunissaq anguneqarsinnaagaluarmat.
Paasilluinnarpara siunnersuut itigartinneqarluinnarmat, siornatigullu oqaasereriikkakka aamma pissutigalugit, spekulantiussagaanni ilalersornassagaluartoq, maani akerlilerlugu nalunaarutigaara.
Josef Motzfeldt, Aningaasaqarnermut Naalakkersuisoq:
Tassa siunnersuuteqartup siunnersuutaa oqaaseqarfigineqareersoq najoqqutaralugu, Inatsisartuni ilaasortanik tunuliaqutaqartut 24-inik ilalernartuutinngilaat siunnersuutigineqartoq, tassa Naalakkersuisut ilalerinatik oqaaseqaataat, akissuteqaataat taperserneqarpoq taamaalilluni annertuumik.
Taamaakkaluartoq pissutissaqarpunga nassuiaateqaqqilaassallunga. Tassa siunnersuuteqartoq Inatsisartuni ilaasortaq Jakob Sivertsen, ilaatigut imak allappoq. Siunnersuuteqarninnullu pingaartitara tassa aningasarsianik isertitanillu allanik akileraarutaareersunik sinneruttut ilaat aningaserivinni ileqqaarneqartartut erniaat aamma akileraaruteqaataasarnerat marloriaammik akileraarnerummat aaqqittariaqartutut isumaqarfigiuaannarakku. Kisiat tassa taanna eqqortuunngilaq, sipaakkat ernialerneqartanngillat a, imaluunniit akileraasulerneqartanngillat, kisianni erniamerngat, erniaasa ilaminiaraat akileraaruserneqartarput, isertitaammat.
Ilanngullugu siunnersuuteqartoq aamma allappoq Nunatsinni aningaasanik ileqqaarnissaq Inatsisartut Naalakkersuisullu pingaartitaraarput, allaat inuusuttut sipaagaqarnissaat pingaartinnermit aningaaserivimmi ileqqaagaat siunissaminni sillimmatissaat, soorlu initaarsinnaanissaminnit namminersorlutilluunniit aallartitsinissaminnik atugassaat Landskarsimit aningaaserivinni ernialiunneqartartut angeqqataanit qaavisigut ullumikkut 4 %-inik tapiissuteqartarlutik. Ajuusaarnarporli inuusuttut aningaaserivinni ileqqaagaasa erniaat aamma akileraarutaasussaammata, sipaakkallu amerliartortillugit ernianut akileraarutit aamma amerliartortussaallutik. Taamatut allappoq Inatsisartunut ilaasortaq Jakob Sivertsen, Box 104, 3913 Tasiilaq.
Kisianni tassa erseqqissaatigilaassavara, aningaaseriviup ernialiuttagaa 4 %-i akileraarutaaneq ajorpoq, akileraartussaatitaanngilaq. Tassa Landskarsip tapiissutaa 4 %-i akileraaruteqanngilaq, bankip aningaaseriviup tapiissutaa prĉmierente 4 %-i akileraartussaatitaanngilaq. Kisiannili aningaasat sipaakkat uninngatinneqartartut aqaguani tiguneqarsinnaajunnaarlugit, piffissaq sivisooq aalajangerlugu sioqqullugu nalunaareerluni aatsaat tiguneqarsinnaallutik.
Taamaammat erniaat 1/8 %-i procentiinnaavoq, tassalu taanna akileraaruteqaataasussaavoq. Assersuutitut immaqa taaneqarsinnaavoq 0,125 %-i, tassa 1/8 %, sipaagaqarsimagaanni 500.000 kr.-inik taavalu akileraarutissatuaq tassaalluni 0,125 %. Ukiumut sipaagaqartup 500.000 kr.-it sipaagaqarsimasup akiliutissaa, akileraarutissaa tassaavoq 625,00 kr.-i. Tassa imaappoq akileraarutiginavianngilaa 5.000 kr.-it akileraarutaasussaanngitsut saniatigut isertitassanik suli angoqqajannginnamigit.
Taamaammat ataatsimiinnermi aqutsisup aalajangissavaa Naalakkersuisunut paasinninnerput najoqqutaralugu siunnersuutigineqartoq itigartivillugu itigartinneqarumaartoq.
Jakob Sivertsen, Atassut:
Siunnersuuteqartutut erseqqissaaqqinniarpunga. Siullermik Kattusseqatigiit siunnersuut misissorsimannginnguatsiarpaat aamma paasinarpoq uani saqqummiusaanni Naalakkersuisut taamaallaat saqqummiussaat misissorneqarsimasoq.
Una saqqummiussara paasineqannginnera ajuusaarutigaara. Ilaatigut januarimi Naalakkersuisoq Jĝrgen Wĉver Johansen siunnersuummut assingulluinnaqqissaartumik saqqummiussaqarpoq. Tassa meeqqat sipaagaqarnissaannik aalajangersimasumik angajoqqaat ilanngaaffigineqartarnissaat.
Taamaattumik naalakkersuisooqatigiit saqqummiussamik akissuteqaataat naleqquttuunngilaq siornatigut tusagassiuutitigut saqqummiunneqartumut sanilliukkaanni.
Aamma Naalakkersuisup akissuteqarnermini ilaatigut sipaakkat erniaasa akileraaruteqaataajunnaarnissaannik Landskarsip kommunillu akileraarutitigut isertittagaannik atornerluinertut taallugu oqaatigimmagu akuerisinnaanngilara.
Atornerluinertut uanga isumalimmik siunnersuummik saqqummiussaqanngilanga. Siunnersuutip qiterpiaa tassa meeraaneraninngaaniit inuusuttunngornermut sipaagaqarsinnaapput allaat ullumikkut inuusuttut pikkorissut siunissaminnik isigisut eqqarsaatigissagaanni ikioqatigiinnikkut 200-300.000 mio.-it qeqqi tikillugit sipaagaqarsinnaapput, sapinngillat.
Taamaattumik sumut iluaqutaassava siunissaannik initaarnissamut ilinniarnerminnut, nalunngilarsi aamma maaniittut aningaaserivinnut qanoq atsigisumik atorniartarpat? Ilinniarnerminnut tunngatillugu imminnut pingaartumik ilaqutaqalersimasut.
Taamaattumik uani sipaakkat erniaannik akileraaruteqaataajunnaarnissaannik saqqummiussara assigiinngitsunut taputartuunneqarnera akuerisinnaanngilara.
Soraarnerussutisiaqalernissaq uanga pinngilara. Meeqqanuku inuusuttullu sipaarnerulernissaat anguniarlugu saqqummiussaqartunga. Taamaattumik ima suunngitsigisutut meeqqat inuusuttullu siunissaat maanngaaniit isigineqarnera akuerineqarsinnaanngilaq.
Soorlumi tassa uani saqqummiussannut oqaatigineqartoq inuit immikkoortinniarikka. Kina oqarpa saqqummiussannut inuit pisuut pisuunerulersikkumagikka. Siunnersuutinnut qiterisaa tassaavoq inuusuttut siunissaminnik ileqqaarnissaat.
Uagut utoqqanngoreersugut oorinik naammattunik peqanngilagut. Siunissatsinnik taasartakkagut inuusuttut siunissaat maani eqqarsaatigalugit saqqummiussaqarpunga. Taamaattumik aamma tassunga uniinnarnianngilanga.
Ilaatigut aningaaserivinni sipaakkat akileraaruteqaataasarnerannut tunngasumik nassuiaanerit ilaat eqqortuunngillat. Landskarsimit tapiissutigineqartartut akileraartarnermut pisortaqarfimmiipput. Aamma tamakkua IA -p oqaluttuatut avataaniit tikilluni atornerluinissamut taputartuunneqarnerat akuerineqarsinnaanngilaq.
Landskarsip tapiissutai akileraartarnermut pisortaqarfimmi toqqortaapput. Taavalu nalinginnaasumik banki tunngavigalugu ernialiunneqartartut bankeni tigummiarneqarput. Taakku eqqortuuvoq, taakkulu tassaapput nalinginnaasumik sipaakkatut erniat akileraaruteqaataasarmata.
Apeqqutaanngilaq siunissamut ileqqaarnissamut sipaagaanersut. Aamma maannakkut sipaakkat erniaat akileraaruteqaataasarnerat allaffissornermut annertoorujussuarmik suliakkersuutaavoq. Assut kikkut tamarmik sipaarsimasut ukiup naanerani tamatigut aningaasat uninngasuutit allattuiffiat nassiussuunneqartarput, inunnut tamanut.
Taamaattumik sipaarutaasinnaallunilu aamma pingaartumik inuusuttunut siunissami sipaarnerulernissamik oqaluttuannguarluta illuatungaatigut oqilisaassiffigineqarnissaannik saqqummiussaqarmat tamarmik itigartippaat.
Assut uanga eqqumiigivara. Taamaattumik oqareernittut tassunga killinnianngilanga. Misissoqqissaaqqissavara. Taavalu misissoqqissaareerlugu naatsorsuutineqassaaq ukiamut immaqa siunnersuummik ersarinnerusumik saqqummiussaqaqqissallunga.
Aamma oqareernittut akuerisinnaanngilara meeqqat inuusuttullu siunissaannik isumannaarinninniarnermut sakkussat pingaarnersaat itigartinneqarnera. Qujanaq.
Anders Andreassen, Siulittaasoqarfimmi ilaasortaq:
Qujanaq. Tassa maluginiarpara partiit imaluunniit amerlanerussuteqartut kissaatiginngikkaat ataatsimiititaliamut ingerlaqqinnissaa aammalu amerlanerussuteqartut itigartitsinissamut siunertaqartut, imaluunniit itigartitsisut.
Kisianni oqaatigissavara taamaakkaluarpalluunniit suliassaq una aalajangiiffigisassatut siunnersuut suleriaatsimi malittarisassatsinni paragraf 32, immikkoortup arfineq aappaat malillugu marloriagassaavoq. Taamaattumillu ataatsimiititaliamut ingerlaqqanngikkaluarluni aappassaaneernissaminut aamma ingerlasussaalluni.
Josef Motzfeldt, Aningaasaqarnermut Naalakkersuisoq:
Tassa una naggataarutaasumik siunnersuuteqartumut erseqqissaatigiinnassavara siunnersuuteqartup siunnersuutaa imatut qulequtaqarpoq. "Aningaaserivimmi ileqqaakkat erniaasa akileraaruteqaataasarunnaarnissaat pillugu Naalakkersuisut suliniuteqaqqullugit Inatsisartut aalajangiinissaanik siunnersuut".
Naalakkersuisuni atuuttut Inatsisartut atuuttunngortissimasaat najoqqutaralugit nalunngisarput tassaavoq sipaakkat erniaat, Landskarsip tapiissutaa, bankit tapiissutaa 8% nalinga tamarmi akileraarutaasussaanngereerpoq.
Oqareernittulli bankemi uninngasuutit anfordringskontomi taaneqartumi erniamerngat 1/8 del % taanna akileraarutaasussaavoq.
Tassalu oqareernittut 500.000-it Jaakup oqareerneratut 500.000 -it inuusuttut peroriartornermini 500.000-it angullugit sipaagaqarsimaguni ukiumut erniasiassai 0.125% taakku 625 kr.-iupput.
Taava akileraarutigissanngilai. Isertitat B-t 5.000-it kisimiikkaanni atsaat 5.000-it anguppagit akileraarutaasussaammata.
Taamaattumik isumaqarpunga siunnersuuteqartup atuuttut pissutsit angorusutani anguneqareersimammata taanna nuannaarutigisariaqaraa.
Jĝrgen Wĉver Johansen, Isumaginninnermut Suliffeqarnermullu Naalakkersuisoq:
Inatsisartunut ilaasortap Jakob Sivertsen saqqummiussaa taavalu uanga qaammat apriliugaa oqallisissiara taakkua imarisamikkut tunngavimmikkullu assigiinngitsorujussuupput. Taamaattumik imaaliallaannaq imminnut assersuunneqarnerat isumaqatiginngilara.
Kisianni ilittulli uanga isumassarsiara taanna aammalu oqallisissiaq taanna malersoqqinniarlugu eqqarsarpunga.
Anders Andreassen, Siulittaasoqarfimmi ilaasortaq:
Qujanaq taamaalilluni ullumikkut oqaluuserisassaq immikkoortoq 40-p siullermeerneqarnera naammassigallarpoq. Taamatut aamma isikkoqarluni aappassaaneerneqarnissaminut.