Nutaarsiassat


2017 2016 2015 Flere år...

05-09-2017

Inatsisartut Siulittaasuata Lars-Emil Johansenip ulloq 5. september 2017 Oluf Høegh, København, kuultiusumik Nersornaaserpaa

Inatsisartut Siulittaasoqarfiata Landsrådimut ilaasortaasimasoq Oluf Høegh Kalaallit Nunaata Sinniisoqarfiani, Københavnimi kuultiusumik Nersornaaserpaat ukiorpassuarni qasusuilluni tunniusimallunilu Kalaallit Nunaannik naalakkersuinikkut sullissisimanera nersorniarlugu.

 

Inatsisartut Siulittaasuata Lars-Emil Johansenip Oluf Høeghimut oqaaseqarnermini ilaatigut erseqqissarpai:

“Peqatigiiffippassuarni assigiinngitsuni peqataanippit uninngaannarusunnginnerit takutippaa – ilaatigut iminngernaveersaaqatigiiffimmik Det Hvide Korsinik pilersitseqataasimavutit ukiullu qulit siulittaasuullutit, Peqatigiiffimmut Kalaallit Meerartaannut Foreningen Grønlandske Børn, Atassutip Danmarkimi immikkoortortaqarfiani, Københavnimi Kalaallit Illuutaata aamma siunnersuisarfiup Pooq siulersuisuinut ilaasortaasimavutit. Taamatuttaaq nunatta juullimut nipitittagaata saqqummersinneqartarneranut ataatsimiititaliamut Den grønlandske Julemærkekomité ilaasortaasimavutit, piffissami 1987-imiit 1992-imut siulittaasuullutit, piffissamilu 1991-imiit 2000-imut tassunga tapersersortitut Danmarkimi ataatsimiititaliamut ilaasortaallutit.

 

1963-imiit 1967-imut Landsrådinut ilaasortaanippit, kiisalu Qaqortumi kommunalbestyrelsemut ukiuni 1955 – 1963 aamma 1967 – 1975 ilaasortaasimanerit  naalakkersuinikkut sulininnut, ilaatigut Landsrådit namminerisaminnik allattoqarfeqalernerannik malitseqartumik, innuttaasunit tapersersorneqarsimanerit takutippaa.

 

Ullumikkut ukiut 50-it qaangiutereersimalerput Landsrådit namminneq akunnerminnit siulittaasussaminnik qinersinerannit, nunatsinnilu nammineernerulluni ingerlatsiartulernermut ineriartornerup alloriarfigineranit, siullermit. Immikkut pisoq tamanna nunatsinni innuttaasut oqartussaaqataanerat naalakkersuinikkullu oqaluttuarisaanerani alloriarnerusimavoq pingaarutilik, illit, Oluf, Landsrådinut ilaasortaaninni timitaleeqataaffigisimasat.”

 

Siulittaasoqarfik sinnerlugu

 

Lars-Emil Johansen

Inatsisartut Siulittaasuat