Inatsisartut ataatsimiititaliaannut sassartitaqarneq

Ajornartorsiuteqarfiit aalajangersimasut malugineqaqqullugit peqatigiiffiit, suliffeqarfiit kommunillu il.il. ataatsimiititaliamut sassartitaqarnissamik kissaateqarneri pillugit Inatsisartut ataatsimiititaliaat akuttunngitsumik saaffigineqartarput.

 

Sassartitaqarneq qanoq isumaqatigiissutigineqartarpa?

Sassartitaqarnissamik saaffiginnissut (allakkakkut E-mailitulluunniit)  ataatsimiititaliap allattaanut allakkatigut ingerlanneqassaaq. Saaffiginnissummut ilanngullugit nassiunneqassapput:

Isummat ataatsimiititaliamut saqqummiukkumasat pillugit allakkakkut nassuiaatit.

Sassartitaqarnermi peqataasut aqqisa allassimaffiat soqutigisaqatigiinnullu pineqartunut taakku attuumassuteqarnerat.

Naapinnissamut piffissaq pillugu il.il. isumaqatigiissuteqarfissatut inuup attaveqarfiup oqarasuaataata normua aamma  imaluunniit E-mailiata taaguutaa.

 

Saaffiginnissut ataatsimiititaliami ilaasortanut ataatsimiititaliap allattaata saqqummiutissavaa. Ataatsimiititaliap ataatsimiinnissaanut pilersaarusiornermi inissaqarpat sassartitat takkunnissaat ataatsimiititaliamit akuerineqarajuppoq. Taamaalippat soqutigisaqaqatigiinnut pineqartunut piffissaq ataatsimiiffissaq ataatsimiititaliap allattaata isumaqatigiissutigissavaa. Ilanngullugu isumaqatigiissutigineqassaaq piffissaq ataatsimiititaliamut sassartitsineq qanoq sivisutigissasoq.

 

Seqersittakkanik assigisaannilluunniit atortoqarluni saqqummiisoqartariaqarpa?

Sassartitsinermi seqersittakkanik assigisaannilluunniit atortoqarluni sassartitat saqqummiussiumappata tamanna ataatsimiititaliap allattaanut isumaqatigiissutigineqareertariaqarpoq.

 

Sassartitaqarneq qanoq ingerlanneqassava?

Sassartitaqarnermi sassartitat tusarliukkamasaminnik oqaatigalugu saqqummiussinissamut siullermik periarfissinneqassapput. Tamatuma kingorna ataatsimiititaliaq periarfissaqassaaq sassartitanut apeqquteqarnissamut.

Sassartitaqarnermi tusarliussaq kalaallisut danskisulluunniit saqqummiunneqarsinnaavoq. Sassartitaqarnerup nalaani tamarmi oqalutsit atortui torrutiinnarlugulu oqalutsi atorneqassapput.

Sassartitat tusarliussaminnik saqqummiinerminnut allatamik toqqammaveqarpata taassuma nuutinneranik ataatsimiititaliap allattaa pissarsiguni qujamasussaaq.

 

Isertuussassanik ilisimatitsineq.

Ilisimatitsinernik isummanillu sassartitanit ataatsimiititaliamut saqqummiunneqartunik isertuussinissaq sassartitat kissaatigippassuk, tamanna siumoortumik ataatsimiititaliamut nalunaarutigineqarsimasariaqarpoq.

 

Ataatsimiititaliaq kingusinnerusukkut isummerumaarpoq...

Kattuffinnit il.il. paasissutissanik isummernernillu pissarsiarineqartut ataatsimiititaliap pineqartup isumaliutigeqqitassaatut Inatsisartut ataatsimiititaliaata ilanngutissavai. Sassartitaqartulli sassartitaqarneranni isummernermut aalajangersimasumut Inatsisartut ataatsimiititaliaat pituttoreersinnaanngimmat sassartitaqartunut paasilluaqqunaqaaq. Ilaatigut sassartitaqarnermi paasissutissanik pissarsiarineqartunik ataatsimiititaliaq oqaluuserinninnissamut periarfisssaqarsimanngissinnaavoq, ilaatigullu tamatuma kingorna paasissutissanik nutaanik, sassartitaqartutut pineqartut kissaataannut aalajangiisuusumik isumaqatiginanngitsunik saqqummersoqarsimasinnaalluni.

 

Sassartitaqartut aningaasartuutaat.

Sassartitaqartut sassartitaqarnerminnut atatillugu aningaasartuutigisimasaat (angalanermut aningaasartuutit il.il.) Inatsisartut ataatsimiititaliaannit matussusissallugit periarfissaqartoqanngilaq.