Naalagaaffiit Peqatigiit nunat akornanni suleqatigiiffiuvoq. Ataatsimeersuarneq oqartussat qullersaraat. Ataatsimeersuarnermut qanilluinnartumik inissisimapput Isumannaallisaanermut Siunnersuisoqatigiit, Nunat tamalaat akornanni Eqqartuussivik, Aningaasaqarnermut Inuttullu atugarisanut Siunnersuisoqatigiit (ECOSOC), Nakkutilliisoqarfik
Allattoqarfillu. Taakku saniatigut Naalagaaffiit Peqatigiit ataanni arlalippassuarnik suliaqatigiiffeqarpoq, soorlu Naalagaaffiit Peqatigiit ineriartortitsinermut suliniuteqarfiat (UNDP) aamma atavangiisinut tunngatillugu suliniuteqarfiat. Suliniaqatigiiffiit kingulliit tamarmik toqqaannartumik Ataatsimeersuarnermut nalunaaruteqartartuupput.
Naalagaaffinnut Peqatigiinnut atatillugu taamatuttaaq arlalinnik immikkut suliniaqatigiiffeqarpoq, namminersortunik namminneq immikkut ataatsimeersuartartunik il.il., kisiannili Naalagaaffiit Peqatigiit pingaarnerusutigut anguniagai naapertorlugit sulisunik ECOSOC-ilu aqqutigalugu
Ataatsimeersuarnermut nalunaaruteqartartunik.
Ataatsimeersuarnermut ilaapput ilaasortat ataatsimeersuarnerat aalajangersimasumillu ataatsimiititaliat. Taanna Naalagaaffinni Peqatigiinni oqartussat qullersaraat. Ataatsimeersuarnermi nunat ilaasortaasut tamarmik sinniisuutitaqartarput, amerlanerpaamilli tallimanik aalajangersimasumik sinniisuutitaqarsinnaallutik, nunallu ataasiakkaat tamarmik immikkut ataasiinnarmik taasisinnaallutik.
Ataatsimeersuarnermut aalajangersimasumik aallartitat tallimat saniatigut nalinginnaavoq nunat peqataatitaqartut ukiumoortumik ataatsimeersuarmut
atatillugu New Yourkimi Naalagaaffiit Peqatigiit qullersaqarfiannut aallartitaqartarnerat. Aallartitat nunat ilaasortaasut naalakkersuisunit oqqarneqartarput, tassaagajullutillu naalakkersuinermik suliallit (naalakkersuisunut inatsisartunullu ilaasortat) kiisalu siunnersortit atorfillillu il.il. Ataatsimersuarneq ukiat tamaasa ingerlanneqartarpoq.
Ataatsimeersuarnerup suliassarisarpaa suliniatigiiffiit alliunerusut missingersuutaasa, taamatullu aamma aalajangersakkat taammattuutillu akuersissutigineqartarneri.
Isumannaallisaanermut Siunnersuisoqatigiinnut ECOSOC-imillu ilaasortaatitassanik ataatsimeersuarneq qinersisarpoq. Ataatsimeersuarnerup
suliassaanut ilaapputtaaq nunat tamalaat akornanni pissusilersornissamut najoqqutassiortarnissaq.
Allattoqarfiup Ataatsimeersuarnermik sullissisussaatitaasup suliassaraa Ataatsimeersuarnermi Naalagaaffinnilu Peqatigiinni oqartussani assigiinngitsuni aallartitat atugassaannik atortussanik paasissutissanillu katersinissaq, suliaqqiinissaq ingerlatitseqqiinissarlu. Allattoqarfik Naalagaaffiit Peqatigiit allattaanerannit aqunneqarpoq, taannalu tassa aamma Naalagaaffinni Peqatigiinni allaffissornikkut atorfillit qullersaralugu.
Ilaasortat
Naalagaaffiit tamarmik Naalagaaffinnut Peqatigiinnut ilaasortanngorniarlutik qinnuteqarsinnaapput.
Kalaallit Nunaata peqataanera
Kalaallit Nunaat 1992-imiilli ataatsimeersuarnermut peqataasalerpoq, taamanikkumiit danskit nunanut allanut ministeriaqarfiat isumaqatigiissuteqarfigalugu danskit ataatsimeersuarnermut aallartitaannut folketingimut ilaasortat marluk inissaat nunatsinni Inatsisartunut ilaasortanut tunniunneqarmata. Kalaallit Nunaannit peqataasussat ukiumut ataatsimut atuuttussamik upernaakkut ataatsimiinnermi toqqarneqartarput partiit anginerit marluk tamarmik immikkut ataatsimik sinniisuutitaqartarlutik. Naalakkersuisut taakkulu atorfilittaat taamatuttaaq aamma peqataanissaminnut periarfissaqarput, suliassat Kalaallit Nunaannut immikkut soqutiginaatillit pingaartitalluuniit oqaluuserineqassatillugit.
Taamaaqataanik Kalaallit Nunaat Naalagaaffiit Peqatigiinni suliniaqatigiiffinni, immikkut suliniaqatigiiffinni, isumalioqatigiissitani il.il. sulinermi peqataasarpoq pissutsit Kalaallit Nunaannut tunngasut oqaluuserineqartillugit.
Saaffissaq
Inatsisartut Allattoqarfiat: inatsisartut@inatsisartut.gl