§ 1. Inatsisartut Suleriaasianni § 56, imm. 1-4, malillugit Inatsisartunut ilaasortat atuuffitik aningaasatigullu soqutigisatik malittarisassani ukunani aalajangersakkat malillugit Inatsisartut atuuffinnik nalunaarsuiviannut nalunaarsortissavaat.

  Imm. 2.  Naalakkersuisunut ilaasortat Inatsisartunut ilaasortaanngitsut malittarisassani ukunani aalajangersakkat malillugit nalunaarsortinneqarnissaminnut periarfissaqarput.

  Imm. 3.  Paasissutissat Inatsisartut atuuffinnik nalunaarsuiviannut tunniunneqartut Inatsisartut nittartagaatigut kikkunnit tamanit takuneqarsinnaassapput.

 

§ 2. Atuuffiit aningaasatigullu soqutigisat makku nalunaarsorneqartassapput:

 

Isertitanut tunngasut

 

1. Ingerlatseqatigiiffinni namminersortuni pisortanilluunniit pigineqartuni siulersuisunut ilaasortaaffiit akissarsiaqaataasartut. Atorfik ingerlatseqatigiiffillu nalunaarsorneqassaaq.

2. Inatsisartunut ilaasortaanerup saniatigut atorfiit, atuuffiit assigisaalluunniit akissarsiaqaataasartut. Atorfik sulisitsisoq suliassaqartitsisorluunniit nalunaarsorneqassapput.

3. Inatsisartunut ilaasortaanerup saniatigut namminersortutut isertitaqarfiusumik ingerlataasartut. Ingerlatap suunera nalunaarsorneqassaaq.

 

Pigisanut tunngasunut isumaqatigiissutillu

 

4. Atsiorluni akuersissuteqarneq sioqqullugu 31.12. ingerlatseqatigiiffinni soqutigisat erseqqissumik kr. 50.000-it sinnerlugit nalillit kiisalu 31.12 kingorna ingerlatseqatigiiffinni soqutigisat nutaat erseqqissumillu kr. 50.000-it sinnerlugit nalillit. Ingerlatseqatigiiffiup aqqa nalunaarsorneqassaaq.

 

5. Siusinnerusukkut sulisitsisorisimasamik isumaqatigiissutit aningaasartallit, tassunga ilanngullugit Inatsisartunut ilaasortaanerup nalaani sulinngiffeqarnissamik, akissarsiaqarani sulinngikkallarnissamik, akissarsisinneqaannartarnissamik imaluunniit sulisutut ajunngitsorsiassat, soraarnerussutisiaqarnissamut pisinnaatitaaffiit assigisaasalu attatiinnarneqarnissaannut isumaqatigiissutit.

 

§ 3. Ilaasortat soqutigisatik nalunaarsortittassavaat qinigaasinnaanermik akuerineqarnerata kingorna qaammat ataaseq qaangiutsinnagu. Sinniisussat piffissamut siumut aalajangeriinngikkamut Inatsisartunut ilaasortamut sinniisaasut paasissutissiisassapput Inatsisartunut sinniisussatut ilaasortanngornerminniit ullut 30-it qaangiutsinnagit. Pisussaaffik tamanna aamma atuuppoq sinniisussanut piffissami aalajangersimasumi sivikinnerpaamik ulluni 30-ni Inatsisartunut sinniisussatut ilaasortanngortunut.

  Imm. 2.  Sinniisussat allat namminneq aalajangersinnaavaat matumani malittarisassat malillugit paasissutissiissanerlutik.

  Imm. 3.  Paasissutissat nalunaarsorneqartussaatitaasut nutaat, tassunga ilanngullugit ingerlatseqatigiiffinni soqutigisat nutaamik pissarsiat pillugit paasissutissat, imaluunniit paasissutissanik siusinnerusukkut nalunaarsorneqarsimasunik allanngortitsinerit, tassunga ilanngullugit ingerlatseqatigiiffinni soqutigisat pissarsiarineqarnermik kingorna aatsaat erseqqissumik kr. 50.000-it sinnerlugit naleqalersimasut, ullut 30-it iluanni atuuffinnik nalunaarsuivimmut nalunaarutigineqassapput.

  Imm. 4.  Nalunaarsuineq pissaaq Inatsisartut Allattoqarfiannut. Immersuivissat nalunaarsuinermi atorneqartussat Suleriaatsimut Ataatsimiititaliamit akuerineqarsimassapput.

  Imm. 5.  Imm. 1-3 malillugit nalunaarsuisussaatitaanerup atuutilerneraniit ullut nalinginnaasut 20-it (arfininngornerit ilanngunnagit) qaangiutsinnagit nalunaarsuivik § 1, imm. 3 naapertorlugu kikkunnit tamanit takuneqarsinnaassaaq.

 

§ 4. Atuuffinnik nalunaarsuivimmut paasissutissiinnginneq kingusinaartumilluunniit tunniussineq kiisalu amigaateqarluinnartunik paasissutissiineq Naalakkersuinikkut sulinermut aningaasatigut tapiissuteqartarneq pillugu inatsimmi § 4a, imm. 1-3, aalajangersagaq malillugu pineqaatissiissutaasinnaavoq.

 

 § 5. Malittarisassat 1. juli 2015 atuutilerput. Peqatigitillugu Inatsisartunut ilaasortat atuuffiisa aningaasatigullu soqutigisaasa nammineq piumassutsimik nalunaarsorneqartarnerat pillugu malittarisassat atuuttut 1. juli 2011-meersut atuukkunnaarsinneqarput.