2024 2023 2022 Flere år...
03-05-2004
Sanaartornermut tunngasut sammineqalerput
Inatsisartut Ineqarnermut Attaveqaqatigiinnermullu Ataatsimiititaliaata sanaartornermut tunngasut samminialerpai
Naalakkersuisut sanaartornermut nutaanngorsaanermullu aningaasaateqarfik pillugu ukiumoortumik nassuiaataat Inatsisartut ulloq 19. maj ullormut oqaluuserisassaanni ilaavoq. Inatsisartut Ineqarnermut Attaveqaqatigiinnermullu Ataatsimiititaliap pineqartoq pillugu suli annertunerusumik samminninnissaq pisariaqarsoraa taamaammallu Inatsisartut ilaasortaasa sinneri marlunngornermi ulloq 4. maj ataaatsimiititaliap sanaartornermut tunngasutigut amerlanngitsunit peqataaffigineqartumik isumasioqatigiisitsinissaanut aggersarpai.
Sanaartornermut nutaanngorsaanermullu aningaasateqarfik pissutsillu Aningaasanut inatsimmut atatillugu sanaartugassanik suliassat suliarineqarneranni atuuttut pillugit peqataasut annertunerusumik ilisimasaqalernissaat isumasioqatigiisitsinikkut anguniarneqarpoq.
Sanaartornermut nutaanngorsaanermullu aningaasateqarfimmi pilersaarusiortarnerup pitsaanngitsumik ataqatigiissagaanera pillugu ajornartorsiuteqartoqartartoq qinikkatut Inatsisartunut ilaasortat atuunnerminni tusarajuppaat. Ajornartorsiutit taakku iluarsiiffiginiarlugit suut suliniutiginiarneqarnersut isumasioqatigiisitsinermi ilaatigut tusarnissaannut periarfissaqassapput.
Ineqarnermut Attaveqaqatigiinnermullu Pisortaqarfimmi atorfilittat arlaqartut taamatullu kommuniniit sanaartornermilu siunnersuisarfinniit sinniisuutitarineqartut ilaatigut saqqummiussisuussapput.
Peqataasut ilisimasaasa pitsaanerusumik toqqammavissinneqarnissaannut amerlanngitsunit peqataaffigineqartumik isumasioqatigiisitsineq sunniuteqassasoq taamaaliornikkullu angallanneq, nuna tamakkerlugu pilersaarusiorneq kiisalu sanaartorneq nutaanngorsaanermullu aningaasateqarfik pillugit Naalakkersuisut nassuaatissaattut naatsorsuutigineqartup oqaluuserineqarnera imartuunngortinneqassasoq Inatsisartut Ineqarnermut Attaveqaqatigiinnermullu Ataatsimiititaliaata neriuutigaa.
Inussiarnersumik inuulluaqqusillunga
Agathe Fontain
Inatsisartut Ineqarnermut Attaveqaqatigiinnermullu Ataatsimiititaliaannut siulittaasoq
Paasissutissat sukumiinerusut pissarsianerineqarsinnaapput
Ataatsimiititaliap allattaa Stefan Knudsen, oqarasuaat 34 61 23-imut attaveqarnikkut.