2024 2023 2022 Flere år...
19-02-2004
Torrak Upernavik
Pinngortitamut avatangiisinullu alloriarneq
Upernavimmut alloriarneq
Kalaallit Nunaannut pitsaanerusumut alloriarneq
TORRAK UPERNAVIK!
Pinngortitami pisuussutit piujuaannartinneqarnissaat pillugu ulluni 16.-17. februar 2004-mi Upernavimmi isumasioqatigiisitsinermi Inatsisartut Eqqissisimatitsinermut Avatangiisinullu Ataatsimiititaliaat nuannaarutigisaminik peqataavoq.
Aalisartut, piniartut illoqarfimmilu qinikkat suliniutissat, ingerlatassat akuuffigisassallu, maanna kommunimi pinngortitap piuinnartinneqarnissaanut avatanngiisillu pitsanngorsaatissaannut tigussaasumik iliuusissatut pilersaarusiornermi Upernavimmi kommunalbestyrelsip isumassarsiorfigisinnaasaannik, siunnersuutinik tigussaasunik saqqummiussuipput.
Inatsisartut ukiakkut 2003-mi ataatsimiinneranni Pinngortitap illersor-neqarnissaanut inatsisip akuersissutigineqarneranut atatillugu ataatsimiititaliap oqaaseqaataanut isumasioqatigiinneq naapertuulluinnartumik ingerlanneqarpoq. Taamani ataatsimiititaliap oqaatigaa pinngortitamik illersuineq innuttaasut kissaatigisaannik peqataanermillu aallaaveqartariaqartoq.
Pinngortitamik illersuinissamik sernissuinissamillu, avatangiisinut I-liuuseqarnerup patajaallisarneqarnissaanik, siullermillu pingaarnerutillugu nungusaataanngitsumik atorluaanerup uumassusilinnillu isumallutinik pinngortitamillu sanileralugit peqateqarnissamik, kommunip anguniagaqarnera innuttaasullu kissaateqarnerat tamakkiisumik tapersersoramiuk ataatsimiititaliap oqaatigissavaa.
Tamakkunatigut nunatsinni iliuuseqarnerit pinngortitallu pisuussutaasa nungusaataanngitsumik atorluaannarneqarnissaat nungusaataanngitsumillu inuusaaseqarnissaq Naalakkersuisunit patajaallisarneqassasut ataatsimiititaliap kaammattuutigissavaa.
Avatangiisit minguinnerusut pinngortitallu oqimaaqatigiissup annertunerusumik suliniutigineqarnissaat ataatsimiititaliap tapersersugaraa.
Pinngortitami isumalluutigisassata avatangiisillu minguinnerusut Kalaallit Nunaanni sullivinnit tunisassiorfinnillu peqataalluinnartunit iliuuseqarfigineqarnissaat Naalakkersuisut qulakkiissagaat ataatsimiititaliap kaammattuutigissavaa.
Maani najugallit imaani aalisarnermi atortunik annaasaqaatinik ernummateqarnerat ataatsimiititaliap paasivaa.
2000-imili aalajangiiffigisassatut siunnersuummik Inatsisartut isumaqatigiillutik aalajangiipput, tassuuna ajornartorsiutip aaqqiivigineqarnissaanik siunertalimmik siumut isigaluni Naalakkersuisut suliaqartussanngortinneqarlutik. Ajornartorsiutip tamatuma aaqqiiviginissaanut a-nguniagaqarluni iliuuseqarnerminnik Naalakkersuisut nangitseqqullugit ataatsimiititaliap sakkortuumik kaammattussavaa.
Isumasioqatigiinnermi peqataanermi saniatigut ataatsimiititaliaq kommunalbestyrelsimik ataatsimeeqateqarpoq, tassani oqaluuserineqartunut ilaallutik eqqagassalerineq, Qimusseriarsuup eqqissisimatitaanera umimmannullu tunngasut. Tamakku saniatigut kommunimi illut eqqissisimatitat qanoq innerat pillugu ataatsimiititaliq ilisimatinneqarpoq.
PINNGORTITAP PISUUSSUTAASA PIUINNARTINNEQARNISSAAT
PILLUGU SORSUUTIGINNINNEQ
AVATANGIISILLU PILLUGIT ILIUUSEQARNERIT
PATAJAALLISARNEQARNISSAAT
AALAJANGIUSIMANEQARLI!
Inatsisartut Eqqissisimatitsinermut Avatangiisinullu Ataatsimiititaliaat
sinnerlugu
Isak Davidsen
siulittaasuugallartoq