Nutaarsiassat

21-12-2004

Tusagassiortunut aningaasaateqarfik 2004

Kalaallit Nunaanni aviisiliortunut aningaasaateqarfik 2004

Kalaallit Nunaanni aviisiliortunut Inatsisartut Aningaasaateqarfiannit 2004-meersumit tunniussinissaq ullumi aalajangerneqarpoq.

Aningaasaliissutit Tusagassiortumut Isak Kleistimut tunniunneqarput:

Sammisanik marlunnik TV-kkut aallakaatitassiornissaq siunertaavoq – nunatsinni namminersulivinnissamut apeqqutinut tunngatillugu danskit partiivi isummernerinik nutaanik ajornanngippat saqqummiussiviusussaq. Namminersorneq sumut killeqassasoq takorloorneqarpa. Aammattaaq erseqqissarneqassaaq Kalaallit Nunaanni uumaatsut pillugit paasisassarsiornermi danskit inuussutissarsiutitigut soqutiginninnerat.  

Aningaasaliinissamik qinnuteqaatinik sisamanik takkuttoqarpoq. Qinnuteqaatini ataasiakkaani aviisiliortutut ineriartortitassatut suliassami sammineqartussaq, aningaasaliinerup atorneqarfissaa nassuiaatigineqarpoq. Sammisat sinneri ukununnga tunngassuteqarput:

Kalaallit 10.000-iniit 12.000 missaannut amerlassusillit ullumikkut Danmarkimi najugaqarput. Inuit taakkua amerlanersaasa piorsarsimassutsimut allaasumut qanoq akulerulluartigisimanerat allaaserisani apersuinernilu arlalinni allaanerusumik nassuiaatigineqassasoq siunertaavoq. Oqaatsinik assigiinngitsunik marlunnik atuinertik minnerunngitsumillu piorsarsimassutsimik qimataminnik qanoq tammatsaaliuinertik pillugu oqaaseqarnissaat tassunga atatillugu aamma paasissallugu soqutiginartuuvoq.

Kalaallit Danmarkimiittut sullinneqarnerat, Københavnimi Kalaallit Illuutaat, Københavnimi ilinniagaqartut, Folketingimi Atlantikup avannaanit ilaasortat, Brønshøjimi napparsimasutut uninngasut ineqarfiat, Rigshospitalimi oqalutsit pillugit il.il. annertunerusumik paasisaqarnissaq.

Kalaallit Nunaanni kommunit suleqatigiinneri/kattunneqarnissaat pillugu Aaqqissuussaanermut Isumalioqatigiissitat sulinerat tunngavigalugu Bornholmimi kommuninik kattussinermit misilittakkat nangeqattaartumik allaaserineqartarnissaat. Naalakkersuinermik sulialinnik, atorfilinnik Bornholmimilu najugalinnik, taakkulu Kalaallit Nunaanni taamaaqataannik, apersuinerit.