2024 2023 2022 Flere år...
26-04-2004
Namminersorneq pillugu Ataatsimiititaliaq
Namminersorneq pillugu Ataatsimiititaliaq ulloq 19. april 2004-mi siullermeerluni ataatsimiillunilu inissitsiterpoq
Namminersorneq pillugu Ataatsimiititaliap siullermeerluni ataatsimiinnermini Aqqaluk Lynge (IA) Namminersorneq pillugu Ataatsimiititaliap siulittaasussaatut qinerneqarpaa.
Siulittaasup tulliatut Per Berthelsen (D) qinerneqarpoq.
Namminersorneq pillugu Ataatsimiititaliaq Inatsisartut 2003-mi ukiakkut ataatsimiinneranni pilersinneqarpoq. Ataatsimiititaliami ilaasortaasussatut partiiminnit qinerneqarput Ruth Heilmann (S), Per Rosing Petersen (S), Aqqaluk Lynge (IA), Per Berthelsen (D) aamma Jensine Berthelsen (A).
Siulittaasup tulliatut atuuffimmik illuatungiliuttumut Per Berthelsenimut (D) tunniussinermi ataatsimiititaliaagallartup sulinerani misilittakkat tunngavigalugit Namminersorneq pillugu Ataatsimiititaliap partiit akimorlugit suleqatigiinnissamik kissaateqarnera tunngavilersuutigineqarpoq.
Namminersulernissaq anguniarlugu sulinissaminut ataatsimiititaliaq maanna piareersalerpoq ullullu 14-it ingerlanerini ataatsimeeqqinnissaq isumaqatigiissutigineqarpoq, tassani qulequttat sammineqarsinnaasullu oqaluuserineqassallutik. Ataatsimiititaliap suliani ingerlatilissavaa Kalaallit Nunaata namminersornissaa pillugu kommissionersuassaa pilersinneqareerpat.
Namminersulernissaq anguniarlugu sulinerup ingerlaqqinnerani Naalakkersuisunik qanimut suleqateqarnissaq pilersaarutaavoq.
Annertunerusumik paasisaqarusukkuit uunga saaffiginnissinnaavutit: Aqqaluk Lynge, Namminersorneq pillugu Ataatsimiititaliap siulittaasua im. Naja Joelsen, ataatsimiititaliap allattaa, Inatsisartut Allattoqarfiat, oqarasuaat 34 62 68, e mail najo@gh.gl.