2024 2023 2022 Flere år...
23-02-2004
Kunngissaq Frederik nersornaaserneqartoq
Ulloq 23. februar 2004 nal. 11.00 Christian VIII’ip Illussaarsuaaraaniinnermi Kunngikkormiutut Ataqqinassusillip, Kunngissaq Frederik ’up, Namminersornerullutik Oqartussat Nersornaataannik kuultiusumik nersornaaserneqarnerani Inatsisartut Siulittaasuata Jonathan Motzfeldtip oqalugiaataa.
Qaqutigorsuaannaq pisartutut Namminersornerullutik Oqartussat nersornaasiuttagaat akimanerpaaq, Nersornaat kuultiusoq, tunniussinnaagakku nuannaarutigaara. Taamatut qaqutigoortumik nersornaasiineq Ilinnut, Kunngikkormiutut Ataqqinassusilimmut, Kunngissaq Frederik’mut, Kalaallit Nunaannut inuiannullu kalaallinut, minnerunngitsumillu Qaanaami innuttaasunut, iluaqutaasumik pimoorussilluarlutit iliuuseqartarninnut tunngatitaavoq.
Soorlu nalussanngikkit inuiaat kalaallit uummataanni Kunngikkormiut annertuumik inissaqarput. Nunarsuarmi allanngoriartortuartumi, ileqqut pingaartitallu akerleriittuartutut pissaanermillu paatsiveerusimanartumit siulersugaasutut ittuni, inuttut pingaartitatigut Kunngikkormiut naleqassusiat annertoqaaq.
Pingaartitaqarneq, soorlu inummik pingaartitsineq, akaarinninneq, assigiimmik pinnnikkumaneq isumassuinerlu Kunngikkormiut ilisarnaatigiuartuuvaat. Inuttut pingaartitat tamakku Kunngissaq Frederik Illit Kalaallit Nunaannut attuumassuteqarninni kusanarnerpaamik ersersittuarsimasatit.
Ilinnut nersorinnissutissavut amerlaqaat, misigissuseqarfigalugillu peqataaffigisatit sorpassuarnut tunngasuupput. Piffissaq manna atorlugu tamakku tamaasa immikkut taagussanngilakka. Illilli Kalaallit Nunaannut immikkut pingaaruteqarfigalugit nuannarineqaatitit maligassiusuuffigisimasatillu immikkut taasaqarfigilaarniarpakka.
Inunnut pitsaanngitsumik atugaqartunut, taakku uagut inuiaqatitsinneersuuppata nunarsuatsinniluunniit ikiorneqarnissamik pisariaqartitsisuuppata, isumassuinissamik iliuuseqarnissamillu pingaartitsinitit matumani pivakka.
Sirius 2000-imik taallugu ilisimasassarsiornermi peqataanikkut nunarput nunarsuup sinneranut maluginiagassanngortippat. Tamanna uatsinnut, minnerunngitsumillu Qaanaamut, iluaqutaasimaqaaq.
Qaanaarmiunut tunngatillugu pimoorussamik suliniuteqarsimanerit annertoorujussuarmik pingaaruteqarsimavoq; Illimmi, ilisimasassarsiorlutillu angalaqativi, Red Barnet Rotarylu aqqutigalugit suliniarsimanersi pissutigalugu Qaanaami meeqqanut inuusuttunullu ornittakkamik pilersitsisoqarsimavoq.
Ilanngulluguttaaq Red Barnetimut taassumalu suliniarneranut tunngatillugu Illit Kunngikkormiutut Ataqqinassusilittut suliniutigisimasat immikkut taarusuppara. Red Barnetimut illersuisutut inissisimanikkut kattuffiup anguniagai iliuuserisaalu suli erseqqarinnerulersinneqarsimapput, taamaalillutillu suli annertunerusumik nukittorsarneqarsimallutik.
Kalaallit Nunaannut soqutiginninnermik annertuumik takutitsinikkut nunatsinni innuttaasut annertuumik nuannaarutississimavatit, inuillu ataqatigiinnerat naligiinnerallu nukittorsarsimallugu.
Sirius 2000-mi ilisimasassarsiorneq pillugu TV-kut aallakaatitassiani maluginiagassaalluartuni nuannaartorisatut pingaarluinnartutut, minnerunngitsumik kalaallinut inuusuttunut inuiannullumi kalaallinut tamarmut, imminut takutipputit. Kikkunnilluunniit takuneqarsinnaasumik immikkorluinnaq ittumik misilittaanikkut sapiissuseqarnerit angutitullu uummateqarnerit takutippatit. Taakkua saniatigut Kunngikkormiutut ataqqinassusilittut inuttut ilisarnaatit nersortariaqarluartut kusanarnerpaamik takuvagut. Inoqatinik allanik peqateqarnermi taakkunannga naligisatut pinnissinnaasutut pinnittutullu piginnaanermik pingaartitsisuunikkut maligassiuisuuvutit.
Pissutsit qiimasoq peruarsiorpaluttuunngitsorlu nunatsinnik innuttaasullu atugarisaannik uummammit pisumik peqataalluarnermik soqutiginninnermillu akulik nunatsinni innuttaasunit tamanit angisoorujussuarmik ataqqineqaatigalugulu nuannarineqaatigaat.
Namminersornerullutik Oqartussat sinnerlugit Nersornaammik kuultiusumik uuminnga tunniussinera Ilinnut Kunngissaq Frederik’mut Kalaallit Nunaata qujassutaatut oqaatigisannut takussutissaali.
Uummammit pisumik qujanaq pilluarillu.