2024 2023 2022 Flere år...
09-12-2005
2005-ip sinnerani puisit amiinik tunisinermi tapiissuteqarnissaq pillugu aalajangiussaq
TUSAGASSIORFITSIGUT NALUNAARUT
2005-ip sinnerani puisit amiinik tunisinermi tapiissuteqarnissaq
2005-ip sinnerani puisit amiinik tunisinermi tapiissuteqarnissamut aningaasaliissutit amerlineqarnissaat pillugu Naalakkersuisut qinnuteqaataat Aningaasaqarnermut Ataatsimiititaliap 9. december 2005-imi ataatsimiinnermini oqaluuseraa.
Ataatsimititaliami amerlanerussuteqartut, tassaasut Atassummit, Siumumit Inuit Ataqatigiinnillu ilaasortat aningaasaliissutit 1,6 mio. kr.-inik amerlineqarnissaat akuersissutigaat. Matuma kingorna puisit amiinik tunisinermi akiusussaq 2005-ip sinnerani 215 kr.-iusussatut naatsorsuutigineqarpoq. Ataatsimiititaliami ikinnerussuteqartup, tassaasup Demokraatit ilaasortaatitaata Naalakkersuisut inassuteqaataat akuersissutigisinnaangilai.
Tunisinermi tapiissutit amerlineqarnerat kingumoortumik 1. december 2005 aallarnerfigalugu atuutilissasoq Naalakkersuisut 8. december 2005-imi ilanngullugu Aningaasaqarnermut Ataatsimiititaliamut qinnutigaat.
Tunisinermi tapiissutit kingumoortumik atuutilersumik tunniunneqarnissaannik Naalakkersuisut qinnutaat Aningaasaqarnermut Ataatsimiititaliap isumaqatigiittup akuersissutigisinnaanngilaa. Tapiissutit kingumoortumik atuutilersinneqarnissaannik akuersinikkut inatsisilerinermut aqutsinermullu apeqqutit tunngaviusut pilersinneqassasut ataatsimiititaliaq isumaqarpoq. Taamatuttaaq tapiissutit kingumoortumik tunniunneqarnissaannik akuersineq aningaasaliissuteqarnissamik qinnuteqaatinut allanut pitsaanngitsumik maligassiuinermik pilersitsisinnaavoq.
Aningaasaqarnermut Ataatsimiititaliap aalajangiinera ataatsimiititaliap nittartagaa una atorlugu sapinngisamik piaarnerpaamik tamanut saqqummiunneqassaaq: http://www.nanoq.gl/Kalaallit Nunaanni Inatsisartut.
Annertunerusumik paasisaqarusukkuit Aningaasaqarnermut Ataatsimiititaliap siulittaasua Ellen Christoffersen telefon 48 26 72-mut imaluunniit e-mailimut ekri@gh.gl .-imut
attavigineqarsinnaavoq.
Ellen Christoffersen
Aningaasaqarnermut Ataatsimiititaliap siulittaasua