2024 2023 2022 Flere år...
11-07-2005
Kukkunersiuinermut Ataatsimiititaliamit
Nunatta Karsiata 2004-mut naatsorsuutai pillugit Kukkunersiuinermut Ataatsimiititaliaq ulluni 7. – 10. juli 2005 ataatsimeeqqammerpoq.
Tassunga atatillugu Naalakkersuisut ilassinnissutinik atuinerat pillugit ataatsimiititaliap apeqquteqaatai arlallit pillugit Naalakkersuisut Siulittaasuata akissuteqaataa 30. juni 2005-imeersoq ataatsimiititaliap ilanngullugu suliaraa.
Nunatta Karsiata 2004-mut naatsorsuutai pillugit isumalitissiissummimi aatsaat siuliani taaneqartut inaarutaasumik nalilersuiffigisussaagini ataatsimiititaliap erseqqissassavaa. Ataatsimiititaliap maannamuugallartoq eqqartorsimasani toqqammavigalugit maannangaaq ima oqaaseqarumavoq.
Naalakkersuisunut ilaasortat ilassinnissutaannik atuinermut malittarisassiuunneqarsimaneri allan-ngortinneqassanersut Naalakkersuisut aasap ingerlanerani misissorniarmatigit ataatsimiititaliamit maluginiarneqarpoq. Misissuinermut matumunnga atatillugu ilassinnissutit pillugit maleruagassat qanoq ililluni annertunerusumik paasiuminarnerulersinneqarsinnaaneri, ilassinninnertullu suut taaneqarsinnaallutilluunniit ilassinninnertut taaneqarsinnaassannginnersut ilanngullugit Naalakkersuisut eqqarsaatersuutigissagaat ataatsimiititaliamit naatsorsuutigineqarpoq. Taamatuttaaq pisartut pereersut toqqammavigalugit Naalakkersuisunut ilaasortat ilassinnissutitut atugaannik nakkutilliineq Naalakkersuisut annertuutigut sukateriffigissagaat ataatsimiititaliap naatsorsuutigaa.
Taamatuttaaq Ineqarnermut Attaveqarnermullu Naalakkersuisuusimasup ilassinnissutinik atuisimanera Naalakkersuisut Siulittaasuata ataatsimiititaliamut allakkamini naammaginartuutinngikkini Kukkunersiuinermut Ataatsimiititaliap maluginiarpaa. Tamanna toqqammavigalugu Ineqarnermut Attaveqarnermullu Naalakkersuisuusimasup ilassinnissutitut atorsimasai akuerineqarsinnaasut iluini pisarsimanissaat Naalakkersuisut Siulittaasuata pisariaqartumik nakkutilliinikkut qulakkeerniarsimanngimmagu Kukkunersiuinermut Ataatsimiititaliap isornartoqartippaa.
Taamatuttaaq kontup misissornissaa Naalakkersuisut isumaginiaraat Naalakkersuisut Siulittaasuata oqaatigigaa ataatsimiititaliap maluginiarpaa, ilassinninnermullu kontumit aningaasat Naalakkersuisut ilassinnissutinik atuinerat pillugu Naalakkersuisut kaajallaasitaannut naapertuutinngitsumik atorneqarsimassappata, aningaasat utertinneqartariaqarnerannik Naalakkersuisut isumaat ataatsimiititaliamit maluginiarneqarpoq. Taamatullu Naalakkersuisut misissuinerisa inernerat, taanna saqqummiunneqariarpat nassiunneqassasoq ataatsimiititaliap naatsorsuutigaa. Taamatuttaaq Inatsisartut ukiakkut ataatsimiinnissaat sioqqulluarlugu misissuinerup taassuma inernera saqqummiunneqarsinnaajumaartoq ataatsimiititaliap naatsorsuutigaa, taamaalilluni Nunatta Karsiata 2004-mut Naatsorsuutai pillugit ataatsimiititaliap isumaliutissiissutaani suliap inaarutaasumik ataatsimiititaliamit nalilersuiffiginninnera ilanngunneqarsinnaaniassammat. Nunatta Karsiata 2004-mut Naatsorsuutai pillugit Isumaliutissiissut Inatsisartut 2005-imi ukiakkut ataatsimiinnerannut atatillugu aappassaaneerneqassaaq.
Inussiarnersumik inuulluaqqusillunga
Isak Davidsen
Kukkunersiuinermut Ataatsimiititaliami siulittaasoq