2024 2023 2022 Flere år...
01-12-2006
Inatsisartut Nunanut Allanut Sillimaniarnermullu Ataatsimiititaliaat atlantikup avannaani sillimaniarneq pillugu ataatsimeersuarniartoq
Inatsisartut Nunanut Allanut Sillimaniarnermullu Ataatsimiititaliaat atlantikup avannaani sillimaniarneq pillugu ataatsimeersuarnissami peqataassaaq
Atlantikup avannaani sillimaniarneq pillugu ataatsimeersuarnissamut ¿From Ice to Fire¿-imi qulequtaqartumut Inatsisartut Nunanut Allanut Sillimaniarnermullu Ataatsimiititaliaat qaaqquneqarsimavoq. Ataatsimeersuarneq Christiansborgip Landstingssal-iani marlunngornermi ulloq 5. december 2006-imi ingerlanneqassaaq. Atlantikup Avannaani Suleqatigiinnit aaqqissuunneqassaaq, atlantikullu avannaani sumiiffinni sillimaniarnikkut ineriartornermut sammitinneqassalluni.
Atlantikup avannaani siunissami ineriartornissamik qulaajaataasinnaasumik ulluni makkunani pissutsit ataqatigiissinnissaat ataatsimeersuarnissami siunertaavoq. Atlantikup avannaani sumiiffinni sorsunnermit nillertumit aporaaffiit sakkortuallaarunnaariartornerat ilutigalugu sakkutooqarfiit raadareqarfiillu amerlanerpaartaat matoorarneqarput. Peqatigisaanik issittumi avannarlermi arlalitsigut allannguutit piortorput sumiiffimmi sillimaniarnikkut aamma kinguneqarsinnaasut matumani silap allanngoriartornera, uuliamik pinngortitallu pisuussutaanik assingusunik nassaarnerit nutaat ilaallutik. Pissutsinit marluusunit sillimaffissanik nutaanik pissaaneqarniunnernillu pilersitsisinnaammata nutaamik sillimaniarnissamik illersorneqarnissamillu pisariaqatitsisoqarlersussaapput.
Pingaarnertut oqalugiartuusussaavoq Illersornissamut ministeri Søren Gade, USA-mit, Rusland-imit, Norge-mit aamma Island-imit Danmark-imut aallartitanit kiisalu Savalimmiuni Kalaallit Nunaannilu namminersornerusoqarfinni aqutsisunit malitseqartinneqartussaq. Savalimmiormiut Island-imiullu sillimaniarnermut ataatsimiititaliaanni ilaasortat kiisalu naalakkersuisut sinniisuutitaat ataatsimeersuarnissamut aammattaaq qaaqquneqarsimapput.
Pilersaarut ilanngunneqarpoq. Annertunerusumik paasissutissat pissarsiarineqariniarukkit ¿ attavigiuk ataatsimiititaliap siuliitaasua Lars-Emil Johansen oqarasuaat: +299 55 19 15 imaluunniit +45 40 17 50 05.
Inussiarnersumik inuulluaqqusillunga
Lars-Emil Johansen
Ataatsimiititaliami siulittaasoq