2024 2023 2022 Flere år...
15-11-2006
Asii Chemnitz Narupip Doris Jakobsenillu Naalakkersuisunut ilaasortatut atuukkunnaartut
Asii Chemnitz Narupip Doris Jakobsenillu Naalakkersuisunut ilaasortatut atuukkunnaarnissaanik Naalakkersuisut siulittaasuata Inatsisartut ullormut oqaluuserisassat aappaata immikk. 143, Naalakkersuisut katitigaanerisa allanngortinneqarnerat, suliarineqarnerani qinnuigai.
Naalakkersuisut siulittaasuata Inatsisartunut inassutigaa Agathe Fontain Tommy Marølu Naalakkersuisunut ilaasortatut qinerneqassasut, taamaalillutillu Agathe Fontain Tommy Marølu Kalaallit Nunaanni Naalakkersuisunut ilaasortatut qinerneqarput.
Matumalu kingorna Naalakkersuisut Naalakkersuisut siulittaasuata Hans Enoksenip saniatigut tassaalerput:
Josef Motzfeldt (Inuit Ataqatigiit)
Agathe Fontain (Inuit Ataqatigiit)
Finn Karlsen, (Atassut)
Siverth K. Heilmann (Atassut)
Jørgen Wæver Johansen (Siumut)
Tommy Marø (Siumut)
Aleqa Hammond (Siumut)
Naalakkersuisutut nutaamik qinigaasoq Agathe Fontain Naalakkersuisunut ilaasortatut atuuffimminik isumaginninnermi nalaani Inatsisartuni sulinerminit sulinngiffeqarnissamik qinnuteqaateqarsimavoq.
Tommy Marø maannamut Inatsisartuni sinniisussaasimavoq. Tamanna Naalakkersuisunut ilaasortatut atuutilernermut atatillugu ullumimiit atorunnaarpoq.
Naalakkersuisunut ilaasortatut atuunerminni Asii Chemnitz Narup Doris Jakobsenilu Inatsisartunit sulinngiffeqarsimapput. Naalakkersuisunut ilaasortatut tunuarnerminnut atatillugu ulloq 15. november 2006-mi atuutilersumik sulinngiffeqarnertik atorunnaartoq nalunaarutigaat.
Naalakkersuisut katitigaanerat allannguuteqartoq ullumilu akuersissutigineqartoq tunngavigalugu Olga P. Berthelsen Inatsisartuni sinniisussatut ingerlaannassasoq nalunaarutigineqassaaq . Olga P. Berthelsen siusinnerusukkut Asii Chemnitz Narupimut sinniisussaavoq, maannamiillu Naalakkersuisunut ilaasortaq Agathe Fontainimut sinniisussaassalluni.