2024 2023 2022 Flere år...
06-11-2006
2005-imi Nunatta Karsiata naatsorsuutai pillugit isumaliutissiissut ataasinngorneq ulloq 6. november 2006 atsiorneqarlunilu tamanut saqqummiunneqassasoq ataatsimiititaliap naatsorsuutigaa
Sermitsiakkut allaaserisami ima allassimasoqarpoq: "Atsiuinissaq sapinngisamik kinguarsarneqarsimavoq. Ilaatigut Siumukkut pinngitsoortitsiniarnissamut amerlanerussuteqarnissaat qularnaarniarlugu, aammalu tusagassiorfiit paasinninnissaat pinaveersaartinniarlugu nalunaarusiap saqqummiunneqarnissaa sapinngisamik kinguarniarlugu."
Kukkunersiuinermut Ataatsimiititaliaq sinnerlugu imaattumik oqaaseqaateqassaanga: Nunatta Karsiata naatsorsuutai annertoorujussuullutillu suliaralugit piffissamik atuinartorujussuupput, ukiummi ingerlanerani naatsorsuutitigut atortut il.il. tusinderpassuarnik qupperneqartut sukumiisumik misissuataarneqarnissaannik nassataqartaramik. Atortussat tamakkerlugit peqqissaarullugit misissorneqarnissaat taamatullu isumaliutissiissusiornermut atatillugu ataatsimiititaliamit oqaaseqaatit tamarmik eqqarsaatigilluareerlugit nalilersorneqarnissaat ataatsimiititaliap sulinerata pitsaassusissaanut pingaarluinnartuupput. Ataatsimiititaliaq, ataatsimiititaliamiluunniit inuit ataasiakkaat, isumaliutissiissutip atsiorneqarnissaanik piaaraluni Sermitsiamit kinguarsaanerarneqarnerat taamaalillunga akuerisinnaanngilara.
Inatsisartut ulluinnarni sulineranni tusagassiorfiit peqataanerat pingaartuusoq Kukkunersiuinermut Ataatsimiititaliaq isumaqarpoq. Inatsisartut ataatsimiititaliaanni sulineq pillugu tusagassiorfiit allaaserinittarnerat pissusissamisoorlunilu pingaartuusoq ataatsimiititaliaq isumaqarpoq. Aammami isumaliutissiissut naammassillugu suliarineqariitsiaannartoq isumaliutissiissut tusagassiorfinnut ataatsimiititaliamit nassiunneqartarmat ileqquuvoq. Ukiut siulii assigalugit periuseq taanna ukioq mannattaaq atorneqassaaq.
Inatsisartut Suleriaasianni § 17, imm. 5-imi allassimasut uku naapertorlugit Kukkunersiuinermut Ataatsimiititaliaq Inatsisartut ataatsimiititaliaattut allatulli ima sulisarpoq: "Isumaliutissiissut imaluunniit ilassutitut isumaliutissiissut saqqummiunneqarnerminit ullut unnuallu pingasut qaangiunnerisigut aatsaat Inatsisartunit suliarineqarsinnaalissaaq." Tamanna imatut paasineqassaaq, Inatsisartuni aappassaaneerinissaq kingusinnerpaamik ullunik unnuanillu pingasunik sioqqullugu isumaliutissiissut saqqummiunneqassasoq.
2005-imi Nunatta Karsiata naatsorsuutai pillugit isumaliutissiissut ataasinngorneq ulloq 6. november 2006 atsiorneqarlunilu tamanut saqqummiunneqassasoq ataatsimiititaliap naatsorsuutigaa. Isumaliutissiissuttaaq ataatsimiititaliamit isumaqatigiittumik atsiorneqassasoq naatsorsuutigineqarmat ilanngullugu oqaatigineqassaaq.
Inussiarnersumik inuulluaqqusillunga
Kristian Jeremiassen
Inatsisartut Kukkunersiuinermut Ataatsimiititaliaata siulittaasua