2024 2023 2022 Flere år...
25-10-2006
Nunat Avannarliit Siunnersuisoqatigiivisa ataatsimeersuarneranni Savalimmiut, Kalaallit Nunaata Ålandillu suleqatigiinnikkut inissisimanerat oqaluuserineqassaaq
Nunat Avannarliit Siunnersuisoqatigiivini Nunallu Avannarliit Ministerrådianni Savalimmiut namineerluni ilaasortanngorumalluni 2003-mi qinnuteqaateqarpoq. Namminersornerusoqarfiit inissisimanerat nunallu avannarliit pisortatigoortumik suleqatigiinnermi inissisimanerat atuunnerallu Nunat Avannarliit pingasunngorneq ulloq 1. november 2006 nal. 9-11 ukioq manna ataatsimeersuarneranni oqallisigineqassaaq.
Ataatsimeersuarnermi peqataasut tamakkerlutik inersuarmi isumaqatigiinniutigisaat marlunngorneq ulloq 31-ianni nal. 14.15-imiit aamma nal.ak. 1½-imik nikingasumik, aamma pingasunngorneq nal. 9-miit 17-imut DR2-mit tv-kut toqqaannartumik aallakaatinneqassapput.
Josef Motzfeldt, Aningaasaqarnermut Nunanullu Allanut Naalakkersuisoq, Inuit Ataqatigiit, Naalakkersuisunit "Nunanut avannarlernut tunngasut pillugit nassuiaat 2006", naalakkersuisut nunanut avannarlernut maannakkut anguniagaat ammasumik oqaluuserineqassasoq kissaatigalugu, ulloq 18. oktober 2006 Inatsisartunut saqqummiussivoq.
2006-imi Nunat Avannarliit Ministerrådianni Naalakkersuisut sulineranni immikkoortoq pingaarneq tassaasimavoq nunat avannarliit suleqatigiinneranni namminersornerusoqarfiit peqataanerisa patajaallisarneqarnissaanik apeqqut. Nunat Avannarliit Ministerrådiata suleqatigiinnerata aaqqissuunneqarnera taamatullu inatsisiliortut Nunat Avannarliit Siunnersuisoqatigiivini Nunani Avannarlerni peqataanerannut apeqqutinut tunngasut immikkoortup imarai. Nunani avannarlerni suleqatigiinnermi Kalaallit Nunaata siunissami inissisimaneranut pingasunik periarfissaqartoqartoqartoq naalakkersuisut nassuiaasiakkut oqaatigaat:
1. Maannamut inissisimaneq akuerineqassasoq,
2. Helsingforsimi isumaqatigiissutitut atuuttup killissarititaasa iluani namminersornerusoqarfiit piginnaatitaanerata annertusarneqarnissaa sulissutigineqassasoq, imaluunniit
3. Helsingforsimi isumaqatigiissutitut atuuttup killissarititaasa allanngortinneqarneratigut piginnaatitaanerup annertusarneqarnissaa sulissutigineqassasoq.
Namminersornerusoqarfiit nunat avannarliit suleqatigiinneranni piginnaatitaanerisa annertusarneqarnissaanik peqataanerisalu patajaallisarneqarnissaanik sulineq partiit tamarmik tulliullugu oqallinermi taperserpaat.
Kim Kielsen, Siumut sinnerlugu oqaaseqartuusoq, Nunanilu avannalerni siunnersuisoqatigiinni nunatta ilaasortaatitaasa aappaa, imatut oqaaseqarfiginnippoq. "Ikinngutitta savalimmiormiut Nunat Avannarliit Siunnersuisoqatigiivini tamakkiisumik ilaasortaanissamik kissaataat Siumumit tamakkiisumik tapersersorparput, tamatumami suliarineqarnera namminersornerusoqarfiit tamarmik, taakkununnga Kalaallit Nunaat ilaalluni, Nunat Avannarliit Siunnersuisoqatigiivini siunissami inissisimalernissaannut naleqqanik ersarissunik pilersitsissasoq ilimagineqartariaqarmat."
Johan Lund Olsen, Inuit Ataqatigiit sinnerlugit oqaaseqartuusoq, Nunanilu avannarlerni siunnersuisoqatigiinni Kalaallit Nunaata ilaasortaatitaasa aappaa, oqaaseqarpoq "..Namminersornerusoqarfiit Helsingforsimi isumaqatigiissut naapertorlugu siulittaasoqarfimmi nakkutilliisutullu komitiimi aalajangersimasumik inissaqartinneqarnissaat qulakkeerneqarsimanngitsoq." Kiisalu.. "Naalakkersuinikkut aaqqissuussat, tamat oqartussaaqataanerat tunngavigalugu qinigaasimasut, aallaavittut isigalugu, taamaalillutillu naalakkersuinikkut oqallinnerni aalajangiiniartarnernilu ilaanissamut peqataanissamullu naligiimmik pisinnaatitaaffeqarmata tamat oqartussaaqataanerisa piuinnarsinnaassuseqarneranut pingaarluinnartuuvoq.
Tamat oqartussaaqataaneranni sakkussanik nutaanik pisariaqartitsisoqarpoq, uaugullu isumaqarpugut Nunat Avannarliit, aamma inuiaat inatsiseqarneranni nunatut immikkoortortatut maligassiuisuullutik namminersornerusoqarfinnik Kalaallit Nunaannik, Ålandimik Savalimmiunillu tamakkiisumik naligiittut suleqateqarnissamut peqatigiinnissamullu ammaassinissamut sapiissuseqartariaqarput."
Nunat Avannarliit Ministerrådiat pillugu Inuit Ataqatigiits sinnerlugit oqaaseqartuusoq oqarpoq, Helsingforsimi isumaqatigiissummik allannguinissaq periarfissaqartoq inuiaallu inatsiseqarnerannut tamanna ataqatigiisinneqarsinnaasoq. "Taamaammat isumaqarpugut Kalaallit Nunaat Nunat Avannarliit Siunnersuisoqatigiivini nammineersutut peqataalersinneqartariaqartoq, Nunallu Avannarliit Ministerrådianni nammineersutut minnerpaamik Danmarkimit inatsisiliornikkut pisinnaatitaaffimmik tamakkiisumik tigusisimasutut Kalaallit Nunaat peqataalersinneqarluni. Taamaammat tassunga tunngatillugu Naalakkersuisut kaammattuutaannut isumaqataavugut, isumaqarlutalu tamanna aammattaaq naalakkersuisooqatigiinnermut isumaqatigiissummut naapertuuttuusoq. Taamaammat Inuit Ataqatigiit isumaqarput Københavnimi qaammat tulleq Nunat Avannarliit Siunnersuisoqatigiivisa Ataatsimeersuarneranni Nunani Avannarlerni Siunnersuisoqatigiinni Naalakkersuisut Inatsisartullu sinniisorisaasa oqariartuutaattut tamanna pingaarnerpaajusariaqartoq."
Nunat Avannarliit Siunnersuisoqatigiivini inatsisartutigut suleqatigiinneq pillugu Johan Lund Olsen oqaaseqarpoq, tamatumani nammineersutut ilaasortaaneq pisariinnerungaartoq, namminersornerusoqarfiillu Nunat Avannarliit Siunnersuisoqatigiivisa Siulittaasoqarfiani Nakkutilliinermullu komitiimi aalajangersimasumik sinniisoqarnissaat qulakkeerneqartariaqartoq, kiisalu namminersornerusoqarfiit Præsidentitut, pisariaqarpallu Ministerrådimut tunngasortaani Siulittaasoqarfimmut tamakkiisumik ilaannakuusumilluunniit qinigaaffimmik tigusinissamut periarfissinneqarnissaat qulakkeerneqartariaqartoq.
Nunat Avannarliit Siunnersuisoqatigiivini 2006-mi ataatsimeersuarnermi Inatsisartut aallartitaat
Johan Lund Olsen, ilaasortaq
Manasse Berthelsen, (partiip allattaa)
Kim Kielsen, ilaasortaq
Jenseeraq Poulsen, (partiip allattaa)
Jakob Hartmann Hansen, (aallartitanut allatsi)
Jonathan Motzfeldt, Inatsisartut siulittaasuat
Inatsisartut siulittaasuattut aamma Nunat Avannarliit Killiit Siunnersuisoqatigiiffianni, alaatsinaattutut inissisimasumi, Siulittaasutut peqataasoq
Dorthie Lyberth, Siulittaasup allattaa
Anja Hynne Nielsen, Aallartitanut allatsi, Nunat Avannarliit Killiit Siunnersuisoqatigiiffiat
Nunani avannarlerni suleqatigiinnermi suleqatigiiffiusut annertunerusumik paasisaqarfigiumagaanni nanoq.gl/ Grønlands Landsting / Landstingssamlinger / Efterårsamling 2006 / Dagsordenspunkter og behandlingsdato 2006 / Redegørelser og beretninger atuarneqarsinnaapput.
Nunat Avannarliit Siunnersuisoqatigiivisa ataatsimeersuarnerannut pilersaarut www.norden.org/session2006 -imi atuarneqarsinnaavoq
Annertunerusumik paasisaqarusukkuit saaffigisinnaavatit:
Johan Lund Olsen, tfl. 34 62 63, e-mail: johan@gh.gl
Kim Kielsen, tlf. 34 62 27, e-mail: kiki@gh.gl