2024 2023 2022 Flere år...
10-10-2006
Inatsisartut ukiumoortumik nalunaarutaat 2005
Ukiumut qaangiuttumut nalunaarummik saqqummiineq inatsisiliornimik sulinerup aammalu Inatsisartut Naalakkersuisullu naalakkersuinermut tunngasutigut peqatigiinnerisa ammasuunissaanik paasiuminartuunissaanillu Inatsisartut kissaateqarnerattut isigineqassaaq. Ukiup ingerlanerani Inatsisartut Siulittaasoqarfiata ataatsimiititaliallu suliarisartagarpassuisa paasisaqarfiginissaannut nalunaarut aammattaaq periarfissiisuuvoq.
Inatsisartut sulinerat ima aaqqissuussaavoq nunatta inatsiseqarnerata piareersarneqarneranut suliarineqarneranullu atatillugu Inatsisartut tamarmiusut ukiumut minnerpaamik marloriarlutik ataatsimiittarlutik. Taakku upernaakkut ataatsimiinnermik sapaatip akunnerinik arfinilinnik¿arfineq marlunnik ukiakkullu ataatsimiinnermik sapaatip akunnerinik arfineq pingasunik-qulingiluanik sivisussuseqarajupput. Taakkulu saniatigut Inatsisartut ataatsimiititaliaat tamarmik immikkut suliassaqarfimminnut tunngassutilinnik ukioq kaajallallugu sulisarput. Pissutsit immikkut ittut naalakkersuinikkut iliuuseqarfigineqartussatut isigineqartut naalakkersuinermik sulialinnut eqqumaffigineqaqqullugit nunatsinni innuttat soqutigisaqaqatigiillu ataatsimiititalianut qanoq ilisukkulluunniit saaffiginnissinnaapput.
Inatsisartunut immikkut qinersisitsinerup ingerlanneqarneranik ukioq 2005 annertuumik sunniivigineqarpoq. Inatsisartunut immikkut qinersineq pillugu Inatsisartut inatsisaat 23. september 2005-imeersumik Inatsisartut akuersissutiginninnerat malillugu qinersineq pisussanngortinneqarpoq. Qinersinerup pisussanngortinneqarneranut atatillugu 2006-imut aningaasanut inatsisaagallartussamik Inatsisartut akuersissuteqarput.
Ulloq 15. november 2005 qinersisoqarpoq decemberillu qaammataata aallartilaarnerani Inatsisartut nutaat katersuullutik ataatsimeeqqissinnaalerput. Taamaalilluni ukiumut nalunaarut una novemberip qaammataa sioqqullugu kingornagullu Inatsisartut katitigaanerannik imaqarpoq. Qinersinerup inernera Kalaallit Nunaata oqaluttuarisaanerani partiit pingasut suleqatigiinnerisigut Naalakkersuisooqatigiinnermut tunngavissaq nutaaq pernaammik pilersinneqarpoq.
Inatsisiliornermik sulinerup piareersarneqarneranut, Inatsisartut ataatsimiinnerisa ingerlanneqarnerinut ataatsimiititaliallu ingerlaavartumik sulinerannut ikorfartuutaasumik Siulittaasoqarfimmut ataatsimiititalianut Inatsisartunullu ilaasortanut ataasiakkaanut kiffartuussivittut aaqqissuussamik, Inatsisartut ukioq kaajallallugu sulinerannut ikiuutaasussamik Inatsisartut atugassaqartinneqarput. Kiffartuussivittut aaqqissuussaq taanna Inatsiartut Allattoqarfiannik taaneqartarpoq aalajangersimasumillu atorfilinnik 28-inik sulisoqarluni.
Partiit allattoqarfiinit ataasiakkaanit Inatsisartunit allaffeqartinneqarlutillu partiinut siunnersorteqartinneqartunit Inatsisartut sulinerat aammattaaq ikorfartorneqartarpoq. Inatsisartut sulinerisa naapertuunnerpaamik piareersarneqarnissaa ingerlanneqarnissaalu pillugit Inatsisartut naalakkersuinikkut ilaasortaasa immikkoorsiternerinik taamatullu Inatsisartut allattoqarfiannik partiit allattoqarfii suleqateqarput.
Partiit allattoqarfiisa Inatsisartullu allattoqarfiata akornanni inerisaanermik sulineq kinguneqarluarsimasoq 2005-imi maluginiarneqarsimavoq. Taamaattumik Inatsisartuni sulinermi partiit allattoqarfiisa inissisimanerat iluaqutaasumik patajaallisaqqinneqarsinnaasoq isumaqartoqarpoq.
Inatsisartut Siulittaasoqarfiat Inuusuttut Inatsisartuinik 2005-imi aammaarluni ingerlatsisuuvoq. Inuiaqatigiinni suliassarpassuit isumagineqarnissaannut aningaasat atugassiissutigineqartut atorneqarnissaasa pingaarnersiorneqarnissaannik naalakkersuinermik suliaqartut pingaarnerpaatut suliassaqarnerat sammissallugu nunatta ilinniarfiini inuusuttut ilinniagaqartut tamat oqartussaaqataanerisa atuuffii killissarisaalu paasisaqarfigaat. 2005-imi Inuusuttut Inatsisartoqarnerat qinikkat sulinerattut ilusilikkatut soorunami taaneqarsinnaagaluartoq naalakkersuinermik sulialinnut inuusuttunullu ¿Inatsisartutut atuuttunut¿ kingumut ilinniarfiulluarlunilu isumassarsiviulluarpoq.