2024 2023 2022 Flere år...
28-08-2006
Ulluni augustusip 28-ianniit 31-iannut 2006 EU-Parlamentimut ilaasortat nunatsinnut tikeraassapput
Tikeraarnermi pisussat takukkit (pdf-fil)
EU´p Nunarsuup Avannaarpiaanut Sammivianut aammalu EU´mut Issittup Igalaavanut atatillugu parlamentimut ilaasortat Issittumi pissutsit pillugit ataatsimiititaliamik ataavartumik pilersitsinissamik siunniussaqarsimapput, maannakkullu Inatsisartut siulittaasoqarfiata pisortatigoortumik qaaqqusinera tunngavigalugu Ilulissanut Nuummullu paasisassarsiorlutik angalallutik.
Issittumi pissutsinut atatillugu silap allannguutissaatut siumut ilisimaneqareersut, taakkulu aalisarnermut piniarnermullu, tassungalu ilanngullugu ilisimatusarnermut inuussutissarsiutitigullu ineriartornermut suleqatigiinnerup pingaarutai
ilaasortat soqutigisaasa pingaarnersaraat.Tikeraarnermissaaq EU-p Kalaallillu Nunaata susassareqatigiinnerinut tunngassutilittut pingaarutillit allat ilaasortat eqqumaffiginiarpaat.
Nuummut tikeraarnerminni Peqqissutsimut Avatangiisinullu naalakkersuisoqarfik aammalu Aalisarnermut, Piniarnermut Nunalerinermullu Pisortaqarfiup sinnisorisaanik EU-mi Parlamentimut ilaasortat ataatsimeeqateqarniarput, taakkununngalu atatillugu EU´p Kalaallillu Nunaata susassareqatigiinnerannut aammalu piniarnermut aalisarnermullu attuumassuteqartumik sammisanut tunngatillugu ilisimatinneqassallutik.
EU-parlamentimut ilaasortat Nuummiinnerminni aamma Pinngortitaleriffik ornissavaat, tassani Kalaallit Nunaanni nunanilu issittuni silap allanngoriartorneranut tunngasunik, kiisalu Kalaallit Nunaata EU-llu akornanni ilisimatusarnermut suleqatigiiffiusinnaasut suleqatigiiffioreersullu pillugit paasissutissinneqassallutik.
Nuummiinnerminni Parlamentimut ilaasortat Nuup Kommunia aamma pulaassavaat, tassani ullup-qeqqasioqatigineqassallutik.
Ullormi sisamanngorneq 31. august nal. 18.15-imiit Hotel Hans Egedemi tusagassiortunik katersortitsiniarput.