2024 2023 2022 Flere år...
25-08-2006
Nunat Avannarliit Killerni Siunnersuisoqatigiivisa innersuussutaat 2006
Nunat Avannarliit Killiit Siunnersuisoqatigiiffiat 18.-21. august ataatsimeersuarnermini nunani pineqartuni naalakkersuisunut tallimanik innersuussuteqarput. Inatsisartut Siulittaasuat Jonathan Motzfeldt Siunnersuisoqatigiffiup siulittaasuatuttaaq qinerneqarpoq.
Ataani atuarsinnaavatit Siunnersuisoqatigiit innersuussutaat tallimat:
Innersuussut 1 (pdf-fil)
Nunat avannarliit killiit Siunnersuisoqatigiivi Island-imi, Savalimmiuni kiisalu Kalaallit Nunaanni naalakkersuisunut kaammattuipput isumaqatigiissusiornissamik periarfissanik eqqartueqqulluugit, Savalimmiut Island-illu killeqanngitsumik niueqatigiinnissamik isumaqatigiissutigisimasaat (Hoyvík-imi isumaqatigiissut) annertusarneqaqqqullugu taamaalilluni aamma Kalaallit Nunaannut atuttussanngorlugu.
Innersuussut 2 (pdf-fil)
Nunat Avannarliit Killiit Siunnersuisoqatigiivi Island-imi, Savalimmiuni Kalaallillu Nunaanni naalakkersuisunut kaammattuipput nunani pineqartuni sinniisoqarfinnik pilersitseqqullugit. Sinniisoqarfiit pilersinneqarnerannut atatillugu nunat ataatsimoorussamik allaffeqarfimmik pilersitsissasut kaammattorneqarput.
Innersuussut 3 (pdf-fil)
Nunat Avannarliit Killiit Siunnersuisoqatigiivi Island-imi, Savalimmiuni Kalaallillu Nunaanni naalakkersuisunut kaammattuipput, pujortartarnerup akiorniarneqarnerani suleqatigiinnertik paasissutissanillu ingerlatitseqqittarnertik annertusillugulu patajaallisassagaat. Tassunga tunngassuteqartumik nunani avannarlerni killerni peqqinnissaqarfinni sulisunut sammisaqartitsinermik isumasioqatigiinnermilluunniit ingerlatseqqullugit nunat kaammattorneqarput.
Innersuussut 4 (pdf-fil)
Nunat Avannarliit Killiit Siunnersuisoqatigiivi Island-imi, Savalimmiuni Kalaallillu Nunaanni naalakkersuisunut innersuussuteqarput, sumiiffittut Nunanut avannarlernut killernut ataatsimoorussamik nunat avannarliit killiit takornariaqarnermut periusissamik suliaqaqqullugit. Siunnersuisoqatigiit innersuussutigaat periuseq taanna Nunat avannarliit killiit takornariartunut ornittagassatut ataatsimoorussamik nittarsaanneqarneranut patajaallisaasumik suliniutinik ilaatigut imaqartinneqassasoq. Taamatuttaaq Nunat Avannarliit Killiit Siunnersuisoqatigiivisa nunani naalakkersuisunut kaammattuutigaat Nunani avannarlerni killerni takornariartitsisartutut ilinniartitaanerup iluani annertunerusumik suleqatigiinnissammut pilersaarusiussasut.
Innersuussut 5 (pdf-fil)
Nunat Avannarliit Killiit Siunnersuisoqatigiivi Island-imi, Savalimmiuni Kalaallillu Nunaanni naalakkersuisunut kaammattuipput, nunat avannarliit killiit saninerisat oqaluttuarisaanerat, inuiaqatigiittut atugarisaat, kultureqarnerat oqaatsiisalu ilinniartitsissutigineqarnerat, meeqqat atuarfeqarfiini ilinniartitsissutissat pilersaarutaannut atuaqatigiiaanut assigiinngitsunut naleqqussakkamik aalajangersimasumik eqquteqqullugit. Siunertaq iluaquserniarlugu oqaatsit pingasut ilinniartitsissutiginissaannut ataatsimoorussamik atortussanik nunat sanassasut kaammattorneqarput.
Nordisk Rådip præsidentiata Ole Stavadip ataatsimiinnermi paasissutissiissutigaa, Nordisk Rådip Nunat Avannarliit Killiit Siunnersuisoqatigiiffiisa siulittaasoqarfiisa isumaqatigiissutigisimagaat taakku marluk akornanni suleqatigiinnissamut missiliuusiussasut.
Paasissutissat allat pissarsiarineqarsinnaapput siunnersuisoqatigiiffimmi allatsimut Thordur Thorarinsson, oqarasuaat 00354 563 0731 saaffiginninnikkut.