2024 2023 2022 Flere år...
15-08-2006
Tusagassiuutitigut nalunaarut
Nunat avannarliit killiit, svenskit, qallunaat norskillu inatsisartuisa ilaasortaat ministeriilu tallimanngorneq augustip18-ianniit marlunngornerup 22-iata tungaanut Tórshavnimi, Savalimmiuni Nunat Avannarliit Killiit Siunnersuisoqatigiiffianni 22-issaanik ukiumoortumik ataatsimiinniarput. Nunat Avannarliit Killiit suleqatigiinnerat, takornariaqarneq, silap pissusia avatangiisillu ataatsimiinnerni ullormut oqaluuserisassani sammineqartussanut ilaapput.
Takornariaqarneq angallannerlu Nunanut Avannarlernut Killernut qnnertuumik pingaaruteqartuusut Nunat Avannarliit Killiit Siunnersuisoqatigiiffiata siulittaasua Henrik Old oqarpoq. "Taamaammat nunat avannarliit killiit takornariaqarnikkut suleqatigiinnerat pillugu junip qaammataani sammisaqarlutik ataatsimeersuarput, tassanilu nunani avannarlerni killerni sullissisut assigiinngitsut suleqatigiinnerisa annertusarneqarnissaa pillugu piumassuseqarluarnertik takutillugu; minnerunngitsumik nunat taakku pillugit ataatsimoorussamik niueruteqarnissaq inuussutissarsiutitigullu ilinniartitaaneq pillugu suleqatigiittoqarnissaa eqqarsaatigalugit. Ukiumoortumik ataatsimiinnerni suleqatigiinneq qanoq pitsaanerpaamik patajaallisarneqarsinnaanersoq oqallisigineqassasoq" Henrik Old oqarpoq.
Ukiumoortumik ataatsimiinnermut atatillugu arfininngorneq ulloq 19. august siullermeerluni ullormut sammisaqartoqassaaq. Sammisassaq tassa "Silap pissusiata allannguutai Atlanikullu Avannaanut Nunanullu Killernut Avannarlernut sunniutigisinnaasai." Qanorpiaq pisoqarneranik Nunanilu Avannarlerni Killerni avatangiisinut kinguneqaataasinnaasut suusinnaanerinik Nunani Avannarlerni Killerni ilisimatuunik nuimasunik oqalliseqatigiittussanik Siunnersuisoqagiiffik katersisimavoq. Ullormi sammisaqarfimmi peqataassaapput Dr. Anna Maria Fosaa, Færøernes Naturhistoriske museum,
Savalimmiuni Pinngortitap oqaluttuarisaaneranut katersugaasivik, Helle Siegstad, afdelingschef Grønlands Naturinstitut, Pinngortitaleriffimmi immikkoortortamut pisortaq, Dr. Kristján Kristjánsson, afdelingschef for forskning og innovation, Ilisimatuussutsikkut inerisaanikkullu immikkoortortamut pisortaq, Det islandske forskningcenter, Islandimi ilisimatuussutsikkut qiterisaqarfik RANNÍS, Jacob Vestergaard, Savalimmiut Avatangiisinut tunngassutilinnut Naalakkersuisuat kiisalu Dr. Hjálmar Hátún, Dr. Eilif Gaard aammalu Dr. Bogi Hansen, Den færøske fiskeforsknings institut, Savalimmiut aalisarnermut ilisimatuussutsikkut suliffianeersut.
Nunat Avannarliit Killiit Siunnersuisoqatigiiffiata Nunallu Avannarliit Siunnersuisoqatigiivisa suleqatigiinnerisa patajaallisarneqarnissaa ataatsimiinnerni oqaluuserisassanut ilaavoq, Ole Stavadili, Folketingimut ilaasortaq Nunallu Avannarliit Siunnersuisoqatigiivisa præsidentiat, siunnersuisoqatigiit suleqatigiinnermut isumaqatigiissuteqarnissaannut, suleqatigiinnermik oqinnerungaalersitsisussamut pingaartillugillu suleqatigiissutigisat paasissutissiissutigineqartarnissaannut siunnersuumminik saqqummiussiniarpoq.
Nunat nukissiuutitigut suleqatigiinnerinik Siunnersuisoqatigiit killiffiliiniarpoq, nunanili taakkunani avatangiisinut innarliisuunngitsumik ataavartumik nukissiuuteqarneq nukissuutinillu piuinnartitsineq pillugu ilisimaarinilluartunik teknikimillu peqartoqarpoq kiisalu taakku suli inerisarneqarnissaannut kajumissuseqartoqarluni. Nunat akunnerminni ingerlatitseqqinnissamut ilisimasaqarluartillu misilittagaqarluarput.
Killilersugaanngitsumik niuernermut isumaqatigiissutit, arnat inissisimanerat, pujortartarneq, peqqissuseq peqqissumillu inuuneqarneq ataatsimiinnernissaaq oqallisigineqassapput.
Maannakkut Nunat Avannarliit Killiit Siunnersuisoqatigiiffiata Siulittaasoqarfianniipput Henrik Old, Savalimmiut Inatsisartuinut ilaasortaasoq siulittaasuusorlu, Jonathan Motzfeldt, Nunatta Inatsisartuisa siulittaasuat aamma Halldór Blöndal, Altingimut ilaasortaq Altingillu nunanut allanut nævnianut siulittaasuusoq.
Ukiumoortumik ataatsimiinnermut qaaqqusanut ilaapput Olav Gunnar Ballo, Norges Odelstingip præsidentiata tullia, Ole Stavad, Nunat Avannarliit Siunnersuisoqatigiivisa præsidentiat Folketingimullu ilaasortaq, Jógvan á Lakjuni, Savalimmiut suleqatigiinnermut ministeriat aammalu svenskit Riksdagiannut ilaasortat Barbro Feltzing aamma Agne Hansson.
Nunat Avannarliit Killiit Siunnersuisoqatigiiffiat Islandip Altingiata, Nunatta Inatsisartuisa Savalimmiullu Lagtingiata suleqatigiiffigaat, nunallu tamarmik inatsisartunut ilaasortanik arfinilinnik sinniisuutitaqarlutik. Kalaallit Nunaata ataatsimiinnerni sinniisorai Kim Kielsen, Kuupik Kleist, Ruth Heilmann, Marie Fleischer, Juliane Henningsen, Ellen Christoffersen aamma Anthon Frederiksen.
Paasisaqarnerujumagaanni saaffigisassaq: Thordur Thorarinsson, siunnersuisoqatigiit allattaat, +354 5630731, tt@althingi.is