2024 2023 2022 Flere år...
07-06-2006
Inatsisartut Aningaasaqarnermut Ataatsimiititaliaa Upernavimmut angalasoq
Inatsisartut Aningaasaqarnermut Ataatsimiititaliaata pingasunngornermit 7. juni - arfininngornermut ulloq 10. juni 2006 ilanngullugu kommuneqarfik Upernavimmut paasisassarsiorluni angalavoq
Ulluni marlunni siullerni ataatsimiititaliaq illoqarfimmeeriarluni ulloq kingulleq Innaarsunnut Tasiusamullu angalassasoq naatsorsuutigineqarpoq.
Illoqarfinni nunaqarfinnilu pissutsinik paasisimasaqarnissani Aningaasaqarnermut Ataatsimiititaliap pingaartippaa qinigaaffiup iluani kommuninut tamanut tikeraarnissani, piviusunngornissaalu naatsorsuutigalugu.
Aningaasaqarnermut Ataatsimiititaliap sapinngisamik annertunerpaamik paasisimasaqarnissaa Inatsisartuni sulinermut pingaaruteqartutut ataatsimiititaliamit isumaqarfigineqarpoq.
Naalakkersuinikkut suliaqartunik, atorfilittanik inuussutissarsiutinillu ingerlatsisunik oqaloqatiginnittarnermigut immikkoortuni pisoqarfiusuni naalakkersuinikkut inuiaqatigiillu aningaasaqarnerannut attuumassuteqartunik paasinninnissani siunertaralugu Aningaasaqarnermut Ataatsimiititaliaq paasisassarsiorluni angalasarpoq.
Oqaatigineqassaaq kommunit nunaqarfinnilu aqutsisut sinniisaannik ataatsimeeqateqarnermi suliassat aalajangersimasut Aningaasaqarnermut Ataatsimiititaliap isumaqatigiinniutigisinnaanngimmagit, isumaqatigiinniartarnermi Naalakkersuisut oqartussaaffeqarfigimmassuk. Suliassalli pissutsillu kommunimit pisoqarfiullutillu pingaaruteqartutut isigineqartut pillugit tusartinneqarnissani taakkulu oqallisiginissaat Aningaasaqarnermut Ataatsimiititaliap assut soqutigisarisarpaa, taamaaliornikkummi kommunini ajornartorsiutigineqartut pisariaqartinneqartullu ataatsimiititaliap annertunerusumik paasisaqarfigisinnaammagit.
Aningaasaqarnermut Ataatsimiititaliaq pisut ilaanni sammineqartunik Naalakkersuisunut ingerlatitseqqissinnaasarpoq pineqartorlu pillugu nassuiaateqaqqusisinnaasarluni.
Tikeraarnermi nalaani Aningaasaqarnermut Ataatsimiititaliap kommunimi aningaasaqarnermut ataatsimiititaliap ataatsimeeqatiginissaat kissaatigaa periarfissarlu iluatsillugu suliffeqarfinnut Namminersornerullutillu Oqartussat ingerlatsiveqarfiinut takusaarusulluni. Kommunip nunaqarfiisa ilaannut sinniisuusutut taaneqarsinnaasumut, tamanna piffissap iluani pisinnaassappat tikeraarsinnaaneq aamma kissaatigineqarpoq.
Aningaasaqarnermut Ataatsimiititaliami ilaasortat uku angalaqataapput
Inatsisartunut ilaasortaq Ellen Christoffersen, siulittaasoq
Inatsisartunut ilaasortaq Tommy Marø, siulittaasup tullia
Inatsisartunut ilaasortaq Lene Knüppel
Inatsisartunut ilaasortaq Johan Lund Olsen
Aningaasaqarnermut Ataatsimiititaliamit ilaasortat saniatigut ataatsimiititaliap allattaa, Nikolai Sten Christensen, allatsisut ikiorti sekretær Sakarias Amondsen aammalu Naja Rosing Joelsen (oqalutsi) peqataapput.