2024 2023 2022 Flere år...
23-05-2006
Arnat Nunat Avannarliit Killiit inatsisartuinut ilaasortat ataatsimeersualersut Sulisartut Højskolianni, Qaqortoq
Pisussat peqataasussallu aqqi uani atuarsinnaavutit (pdf-fil)
Arnat Nunat Avannarliit Killiit inatsisartuinut ilaasortat 18-it, aammalu naligiissitaanermik ataatsimiititaliat/siunnersortit arnallu peqatigiiffiineersut imminnut naapeqatigiissapput Qaqortumi ulluni 31. maj ¿ 1. juni 2006. Misilittakkatik isummatillu paarlaasseqatigiissutigissavaat, nunani pineqartuni pissutsit ajornartorsiutillu tamanut atuuttut eqqartussallugit, minnerunngitsumillu nunani avannarlerni killerni suleqatigiinneq nukittorsassallugu. Nunatsinnit inatsisartuni naalakkersuisunilu ilaasortat peqataassapput.
Ataatsimeersuarnermi saqqummiisussat sammisassaallu imaapput:
· Ellen Kolby Chemnitz, Kalaallit Nunaanni Inatsisartunut allattaaneq: Arnat politikkimi ¿ oqaluttuarisaaneq qimerloorlugu, pingasunngorneq 31. maj nal. 14:30-14:45
· Kristín Ástgeirsdóttir, Islandip Universitetiani Arnat pillugit ilisimatusarfimmi pisortaq: Arnat nunat avannarliit killermiut ullumikkut politikkikkut atugarisaat, pingasunngorneq 31. maj nal. 15:00-15:45
· Jonathan Motzfeldt, Inatsisartut Siulittaasuat: Politikkimi arnat, angutit isaanniit isigalugu ¿ arnat politikki qanoq sunniuteqarfigaat, suut nukilaaffigaat suullu nukittuffigaat? Pingasunngorneq 31. maj nal. 19:00-19:30
· Drude Dahlerup, Stockholms Universitetimi Professori: Politikkimi naligiissitaanissaq anguniarlugu periaatsit nutaat, ass. amerlassusiliisarneq ¿ isuma ullutsinni akerleriiffiusoq isumaqataaffiusorlu. Sisamanngorneq 1. juni kl. 09:00-10:00
· Siunissami arnat politikkimi angusinnaasaannik ilimagisat pillugit paasisimasallit oqallinnerat. Sisamanngorneq 1. juni nal. 10:30-12:00
Ataatsimeersuarneq kikkunnut tamanut ammavoq, Sulisartut Højskolianni ingerlanneqassalluni. Ataatsimeersuarneq nunani avannarlermiut oqaasii atorlugit ingerlanneqassaaq, kissaatiginartinneqarpat kalaallisuumut nutserisoqarumaarpoq.
Tunuliaqutatut nassuiaat
Arnat naalakkersuinermik suliaqartut nunat avannarliit killermiut siullermik ataatsimeersuarput Savalimmiuni 2004-mi rekommandation nr. 2 Nunani Avannarlerni Killiit Siunnersuisoqatigiiffiata akuerisaat tunuliaqutaralugu. Rekommandation nr. 2 Islandimi Altingimut, nunatsinni Inatsisartunut aammalu Savalimmiuni Lagtinginut piumasaqaateqarpoq, arnat nunat avannarliit killerni naalakkersuinermik suliaqartut kiisalu naligiissitaanermik ataatsimiitsitaliat siunnersortit arnallu peqatigiiffiineersut allallu naligiissitaanermik suliniuteqartut ataatsimeersuartinneqartassasut. Ataatsimeersuarnerit ukioq allortarlugu nunani taakkunani pingasuni paarlakaajaallugit ingerlanneqartassapput.
Rekommandation nr. 2-p tunuliaqutarivaa nunat avannarliit killiit pingasuusuni arnat politikkikkut atugarisaasa amerlasuutigut assigiissuteqarnerat. Nunat avannarliit killerni inuiaqatigiit piniartuussusermik annertuumik inuuniuteqarsimapput, taamaalillutillu arnat atugarisaat aamma assigiit pilersissimallugit. Arnat pineqartut atugarisaat Nunani Avannarlerni nunani suliffissuaqarfiusunit annertuumik allaanerussuteqarput, tamakkulu politikkikkut aalajangertakkat arnanit minnerusumik peqataaffigineqarnerannik kinguneqarsorinarpoq. Taamaattumik pingaaruteqarpoq arnat nunat avannarliit killerni politikerit ataatsimut naapittarfissaannik pilersitsineq. Tamanna naalakkersuinermi annerusumik naligiissitaanerulernissap siuarsaatigineqarnissaanut, aammalu arnat nunat avannarliit killerni naalakkersuinikkut aalajangikkanut annerusumik akisussaaqataanerulernissaannut kissaateqarfiuvoq.